1. Yisinke ga hepa kurugana muntu komeho a tameke kudika nzugo?

GAZARA kuhamena muntu ogu ana tokora kudika nzugo. Age ana diva nzugo ezi ana hara kudika. Ngoso age kuvhura tupu a tokore kuza kositora nokukaranda yiruganeso nokutameka kudika ndi? Hawe. Komeho a tameke kudika, posili sininke simwe somulyo ga hepa kurugana. Age ga hepa kuvarura asi yimaliwa yokuhura kupi nga vhura kuruganesa mokudika nzugo ozo. Morwasinke? Age ga hepa kuyirugana yipo a dive nsene ana kara noyimaliwa yokugwanena po yipo a mane kudika nzugo. Nsene a varura nawa yimaliwa eyi ga hepa, ayo kuvhura ngayi mu tompoke kumana kudika nzugo zendi.

2. Kuliza naRukasa 14:27-30, yisinke wa hepa kugazadara komeho o gwane ekuho?

² Ove kuna kugazadara kugwana ekuho morwa wa hara Jehova ntani wa kara norupandu kweyi ga ku ruganena ndi? Nsene yiyo ono hara kurugana, ukaro woge una lifana nomugara ogu ana hara kudika nzugo. Morwasinke tuna kuuyungira ngoso? Koneka nonkango daJesus edi da kara mwaRukasa 14:27-30. (Resa.) Metjangwa eli, Jesus kwa fatwilire eyi twa hepa kurugana nsene tuna hara kukara murongwa gwendi. Mokukara murongwa gwendi, twa hepa kulididimikira maudigu ntani nokusiga yimwe eyi twa hara. (Ruk. 9:23-26; 12:51-53) Yipo nye, komeho o gwane ekuho, wa hepa kugazadara ko kwanayinye eyi ya hamena mo. Nsene o yi rugana ngoso, ayo ngayi kuvatera o twikire kukarera Karunga noulimburukwi konyima zokugwana ekuho.

3. Yisinke natu ka zogera mosirongwa esi?

³ Ayo mulyo kugwana ekuho ndi? Nhi. Muntu ogu a gwana ekuho, age kugwana mauwa gomanzi ngesi ntani nokomeho. Tu zeni tu ka zogere mapuro gamwe gomulyo kuhamena ekuho. Ayo nayi ka kuvatera o dive nsene ono liwapaikire kugwana ekuho.

4. (a) Yisinke eligawo? (b) Kuliza naMateusa 16:24, yisinke ayi tanta ‘kulidina’?

⁴ Yisinke eligawo? Komeho o gwane ekuho, wa hepa kuligava kwaJehova. Eligawo kutanta asi, kutantera Jehova kupitira mekanderero asi ove ngo ruganesa eparu lyoge mokumukarera dogoro narunye. Apa o ligava kwaKarunga, ove ‘kulidina’ nyamoge. (Resa Mateusa 16:24.) Konyima zokuligava, ove kuyahama kwaJehova ntani aso kuna kara situmbukira somulyo sili. (Rom. 14:8) Ove kumutumbwidira asi konyima zokuligava kwendi, ove ngo demenena mokumukarera nye kapisi kweyi wa hara. Apa o ligava, ove kugana kwaKarunga. Jehova kapi a tu sininike tu ture po mugano ogo. Nye apa atu tura po mugano ogo, age kundindira ko kwetu tu gu sikise mo.—Epis. 116:12, 14.

5. Ngapi omu eligawo lya lifana nekuho?

⁵ Ngapi omu eligawo lya lifana nekuho? Muntu kuligava kwaKarunga pwagelike ntani kwato ogu ayi diva apa a yi rugana. Ekuho kulirugana moyitarameho yombunga, ntani yikando yoyinzi alyo kuhorokera poyigongi. Apa o gwana ekuho, ove kuyilikida kwanavenye asi nare wa ligava nyamoge kwaJehova. * Yipo nye, apa o gwana ekuho ove kulikida wopeke asi wa hara Jehova Karunga nomutjima goge nagunye, nomwenyo goge nagunye ntani nononkondo doge nadinye. Ntani ayo kulikida hena asi ove ono tokomene kukarera Jehova dogoro narunye.—Mar. 12:30.

6-7. Kuliza na-1 Peturusa 3:18-22, nokonda musinke mbali domulyo deyi natu gwanena ekuho?

⁶ Ayo mulyo kugwana ekuho ndi? Koneka nonkango edi da kara mwa-1 Peturusa 3:18-22. (Resa.) Ngwendi moomu tupu wato waNowa wa likidire asi age ga kere nepuro, ekuho lyoge kulikida asi ove wa ligava kwaJehova. Nye ayo mulyo kugwana ekuho ndi? Nhi. Peturusa kwa geve nokonda deyi ekuho lya karera nomulyo. Zokuhova, age kwa tente asi ekuho “kumuparura.” Ekuho kuvhura kutuparura nsene tu yi likida asi ose twa pura mwaJesus ntani nokupura asi age kwa tu fira, yiyo va mu vhumbura a ze meguru ntani ngesi age kuna kara “korulyo rwaKarunga.”

⁷ Konda zauvali, ekuho kutuninkisa tu kare ‘nezwi lyewa lyomomutjima.’ Apa atu ligava kwaKarunga nokugwana ekuho, ayo kutuninkisa tu kare nelikwatakano lyokulikarera kumwe naJehova. Mokumona asi ose twa litezurura kononzo detu ntani twa kara nepuro monzambo zaJesus, Karunga kudongonona po nonzo detu. Yipo nye, ayo kutuvatera tu kare nezwi lyewa lyokomutjima.

8. Yisinke nayi kutumangeda o tokore kugwana ekuho?

⁸ Yisinke nayi kutumangeda o tokore kugwana ekuho? Kupitira melirongo lyoge lyoBibeli, ove wa lironga yininke yoyinzi kuhamena Jehova, eyi ga hara ntani monkedi omu a gendesa yininke. Yininke eyi wa lironga ya kutwa komutjima ntani ya ku tumangeda o mu hare unene. Kuhara Jehova kuna kara konda zomulyo ezi nazi kutumangeda o gwane ekuho.

9. Yisinke ayi tanta kukuhwira medina lyaGuhwe neli lyoMuna neli lyompepo zokupongoka, eyi va tumbura mwaMateusa 28:19, 20?

⁹ Konda zimwe hena ezi nazi kutumangeda o gwane ekuho kuna kara asi morwa ove wa diva eyi azi rongo Bibeli ntani ove ngesi wa yi pura. Koneka eyi ga uyungire Jesus apa ga geve mpangera zokutulisa po varongwa. (Resa Mateusa 28:19, 20.) Jesus kwa tente asi vantu ava vana kugwana ekuho vava “kuhwire medina lyaGuhwe neli lyoMuna neli lyoMpepo  zoKupongoka.” Yisinke ayi tanta? Age kwa tembe asi wa hepa kupura nomutjima goge nagunye eyi azi rongo Bibeli kuhamena Jehova, Munwendi ntani nompepo zokupongoka. Mausili ogo mulyo ntani ago kuvhura ga ku kundame unene. (Heb. 4:12) Tu zeni tu tarurure hena mausili ogo gamwe.

10-11. Mausili musinke gokuhamena Guhyetu wa lironga nokutambura?

¹⁰ Gazadara ko apa wa lirongere usili kuhamena Guhyetu asi edina lyendi Jehova ntani age “mupangeli gomunene gouzuni mudima!” Age hena yige ‘gelike Karunga’ gosili. (Epis. 83:18; Jes. 37:16) Age Musiti gwetu ntani “eparu kwaHOMPA ali tundu.” (Epis. 3:8; 36:9) Age kwa tulire po mawapaiko yipo a tu zowore kononzo nokonomfa ntani age kwa tu tumbwidira asi nga ka tu pa mwenyo gwanarunye komeho. (Joh. 17:3) Eligawo lyoge nekuho ngayi likida asi nove gumwe goNombangi daJehova. (Jes. 43:10-12) Ove ngo ya hamena kepata lyovantu ava ava karere Jehova ntani ava ava lizuvhu mfumwa kweyi ava va zigidisa kedina lyaKarunga ntani nokulidivisa kovantu wopeke.—Epis. 86:12.

¹¹ Azo kuna kara sili mfumwa zonene kweyi twa kwata egano eyi azi rongo Bibeli kuhamena Guhyetu! Nsene o pura momausili aga, ngayi kutumangeda o ligave nyamoge kwaJehova nokugwana ekuho.

12-13. Mausili musinke wa lironga ntani naga wa tambura kuhamena MunwaKarunga?

¹² Ngapi omu wa lizuvhire apa wa lirongere mausili aga gana kukwama ko kuhamena MunwaKarunga? Kugusa ko Jehova, Jesus yige muntu gomulyo po mouzuni mudima. Age Muzowoli gwetu. Age kwa lizamberere eparu lyendi yipo a ya tu parure. Nsene tu yi likida asi twa kara nepuro monzambo zaJesus, nonzo detu ngava di dongonona po, ngatu tunga po ukaume naKarunga ntani ngatu ka gwana eparu lyanarunye komeho. (Joh. 3:16) Jesus yige Mupristeli gwetu gomunene. Age ana hara kutuvatera tu gwanene mo mauwa mosizoweseso ntani tu tunge po ukaume wounene naKarunga. (Heb. 4:15; 7:24, 25) NgaHompa goUhompa waKarunga, Jehova nga ka mu ruganesa yipo a ka pongore edina lyendi, nokukagusa po udona ntani nokukareta matungiko gokukarerera moParadisa. (Mat. 6:9, 10; Ehor. 11:15) Jesus kwa tu tulira po sihonena. (1 Pet. 2:21) Age kwa tu tulira po sihonena omu natu rugana mpango zaKarunga.—Joh. 4:34.

¹³ Nsene o tambura eyi azi rongo Bibeli kuhamena Jesus, ove ngo tameka kuhara MunwaKarunga unene. Eharo olyo ngali kutumangeda o rugane mpango zaJehova ngwendi moomu ga yi rugene Jesus. Ano eyi ngayi ku tumangeda o ligave kwaJehova nokugwana ekuho.

14-15. Mausili musinke wa lironga ntani naga wa tambura kuhamena mpepo zokupongoka?

¹⁴ Yisinke wa gazarere apa wa lirongere mausili aga gana kukwama ko kuhamena mpepo zokupongoka? Mpepo zokupongoka kapisi muntu, nye azo kuna kara nonkondo edi a ruganesa Karunga. Jehova kwa ruganesere mpepo zendi zokupongoka mokupitisira vagara ava va tjenge Bibeli. Mpepo zokupongoka kutuvatera tu kwate egano eyi atu resa moBibeli nokuyitura pasirugana. (Joh. 14:26; 2 Pet. 1:21) Kupitira mompepo zokupongoka, Jehova kutupa ‘nonkondo dononene.’ (2 Kol. 4:7) Mpepo zokupongoka kutupa nonkondo yipo tu zuvhise mbudi zongwa. Azo kutuvatera hena tu nyokere po maheteko nokulididimikira ruguwo ntani maudigu. Azo kutuvatera hena tu tunge po yikara yoyiwa eyi ya hamena ‘koyiyimwa yoMpepo.’ (Gar. 5:22) Karunga kugava mpepo zokupongoka mawoko-woko kovantu ava va mu huguvara ntani ava ava zi hundire.—Ruk. 11:13.

 ¹⁵ Ayo kutuhengagwida mokudiva asi vakareli vaJehova kuvhura va hundire mpepo zokupongoka yipo zi va vatere va mu karere. Nsene o tambura mausili aga wa lironga kuhamena mpepo zokupongoka, ayo ngayi kutumangeda o ligave kwaJehova nokugwana ekuho.

16. Yisinke tuna lirongo dogoro paapa?

¹⁶ Nsene ono hara kuligava kwaJehova nokugwana ekuho, ove kuna kutura po etokoro lyomulyo. Ngomu tuna lirongo, wa hepa kulididimikira maudigu ntani nokusiga yimwe eyi wa hara. Nye ove ngo gwana matungiko gomanzi kupitakana maudigu aga ngo ligwanekera nago. Ekuho kuvhura nga li ku parure ntani alyo ngali kuvatera o kare nezwi lyewa lyokomutjima. Konda zomulyo po zeyi no tokwera kugwana ekuho kuna kara asi morwa wa hara Jehova Karunga. Wa hepa hena kupura nomutjima goge nagunye mausili aga wa lironga kuhamena Karunga naMunwendi ntani mpepo zokupongoka. Kuliza neyi tuna lirongo dogoro paapa, kuvhura o tante asi ove ono liwapaikire kugwana ekuho ndi?

17. Yininke musinke yimwe muntu ga hepa kurugana komeho zokugwana ekuho?

¹⁷ Nsene ove kuna kulizuvha asi ono liwapaikire kugwana ekuho, ayo kulikida asi ove wa rugana ko yuma yipo o kare nelikwatakano naJehova. * Kupitira melirongo lyoge lyoBibeli, ove wa ya diva yininke yoyinzi kuhamena Jehova naJesus. Ove hena ngesi ono kara nepuro. (Heb. 11:6) Ove wa huguvara matumbwidiro gaJehova aga ga kara moBibeli ntani wa yi pura nawa-nawa asi epuro lyoge monzambo zaJesus kuvhura kukuzowora kononzo nokonomfa. Ove wa litezurura kononzo doge danare ntani kulizuvha udona koyininke yoyidona eyi wa rugene. Ove wa hundira Jehova a ku gusire po kononzo doge. Ove wa siga nkareso zoge zanare zondona ntani wa tameka kuparuka monkedi ezi azi hafesa Karunga. (Yirug. 3:19) Ove hena wa hara kutantera ko wopeke kuhamena eyi wa lironga. Ove ya kutompoka kukara muzuvhisi gokudira kugwana ekuho ntani ove ngesi kuzuvhisa kumwe nombungakriste zeni. (Mat. 24:14) Yosili, Jehova kumuhafesa sili yininke nayinye eyi wa rugana. Ove wa hafesa mutjima gwendi.—Yis. 27:11.

18. Yisinke hena wa hepa kurugana komeho o gwane ekuho?

¹⁸ Komeho o gwane ekuho, koyili hena yimwe wa hepa kurugana. Ngomu tuna yi zogere, wa hepa kuligava kwaKarunga. Hedera kwendi kupitira mekanderero nokumutumbwidira asi ove ngo rugana mpango zendi meparu lyoge nalinye. (1 Pet. 4:2) Konyima, kuvhura o tantere muwapaiki gombunga zovakuronambunga asi ono hara kugwana ekuho. Age nga pura vakuronambunga vamwe va zogere kumwe nove. Kapisi hepero o kare nosinka apa ngava  wiza koge. Vanavazinyetu owo va ku diva ntani awo va kuhara. Awo ngava zogera nove kuhamena marongo gamwe gomoBibeli aga wa lironga. Awo kuna hara va dive nsene wa kwata egano marongo ogo ntani nsene wa dimburura mulyo gweligawo nekuho. Nsene ngava dimburura asi ono wapere kugwana ekuho, awo ngava kudivisa asi ngo gwana ekuho posigongi esi ngasi kwama ko.

19-20. Yisinke wa hepa kurugana konyima zokugwana ekuho ntani ngapi omu noyirugana?

¹⁹ Yisinke ngo rugana konyima zokugwana ekuho? * Diworoka asi eligawo kuna kara mugano ntani Jehova kuna kundindira ko koge o gu sikise mo. Yipo nye, konyima zokugwana ekuho wa hepa kusikisa mo mugano goge. Ngapi omu no yi rugana?

²⁰ Kara pepi nombungakriste zeni. Mokumona asi ove wa gwana ekuho, ove ngesi kuna hamene kombunga ‘zovapuli vakweneni.’ (1 Pet. 2:17) Vapuli vakweni womombungakriste kuna kara epata lyoge lyopampepo. Nsene o wiza nkenye apa komapongo ayo ngayi nkondopeka ukaume weni. Resa Nonkango daKarunga nkenye ezuva nokuteda ko. (Epis. 1:1, 2) Konyima zokuresa Bibeli, gazadara ko kweyi ono resa. Makura nonkango odo nga di ku guma komutjima. ‘Kanderera’ nkenye apa. (Mat. 26:41) Makanderero goge gokutunda komutjima ngaga kuninkisa o hedere pepi naJehova. Twikira ‘kupapara muhowo Untungi waKarunga.’ (Mat. 6:33) Kuvhura o yi rugane oyo pokutura sirugana sokuzuvhisa muhowo meparu lyoge. Nsene o lihameka moyirugana yokuzuvhisa nkenye apa, ayo ngayi nkondopeka epuro lyoge ntani ngo vatera wopeke va ka gwane mwenyo gwanarunye.—1 Tim. 4:16.

21. Mauwa musinke ngatu gwana nsene tu gwana ekuho?

²¹ Etokoro lyokuligava kwaJehova nokugwana ekuho kuna kara etokoro lyomulyo po eli ngo vhura kutura po meparu. Yimo, ove ngo ligwanekera nomaudigu ntani ngo siga yininke yimwe eyi wa hara. Nye alyo kuna kara etokoro lyewa po. Nkenye udigu ou ngo ligwanekera nawo mouzuni ou kuna kara “wangapa katu popi” ndi wopokaruwogona. (2 Kol. 4:17) Kugwana ekuho ngayi kupa mpito o hafere eparu ngesi ntani nokukagwana “mwenyo gwanarunye gosili” komeho. (1 Tim. 6:19) Yipo nye, gazadara ko nawa nokukanderera, yipo o dive nsene ono liwapaikire kugwana ekuho ndi hawe.