ບົດຄວາມສຶກສາທີ 11
ເຈົ້າພ້ອມແລ້ວບໍທີ່ຈະຮັບບັບເຕມາ?
“ການຮັບບັບເຕມາຊ່ວຍພວກເຈົ້າໃຫ້ລອດ.”—1 ປຕ. 3:21
ເພງ 28 ໄດ້ເປັນເພື່ອນກັບພະເຢໂຫວາ
ໃຈຄວາມສຳຄັນ *
1. ກ່ອນທີ່ຄົນໜຶ່ງຈະສ້າງເຮືອນ ລາວຄວນຈະເຮັດຫຍັງ?
ລອງນຶກພາບເບິ່ງວ່າຄົນຜູ້ໜຶ່ງຕັດສິນໃຈທີ່ຈະສ້າງເຮືອນ. ລາວຮູ້ວ່າລາວຢາກສ້າງເຮືອນແບບໃດ. ແຕ່ລາວຈະຟ້າວໄປຊື້ວັດສະດຸອຸປະກອນ ແລະເລີ່ມສ້າງເຮືອນເລີຍບໍ? ບໍ່. ກ່ອນທີ່ລາວຈະເລີ່ມສ້າງເຮືອນ ມີບາງສິ່ງທີ່ສຳຄັນທີ່ລາວຕ້ອງເຮັດຄື ລາວຕ້ອງຄິດໄລ່ເບິ່ງກ່ອນວ່າຈະໝົດຄ່າໃຊ້ຈ່າຍເທົ່າໃດ. ຍ້ອນຫຍັງ? ຍ້ອນລາວຕ້ອງຮູ້ກ່ອນວ່າເງິນທີ່ລາວມີຈະພໍສ້າງເຮືອນໃຫ້ແລ້ວບໍ. ຖ້າລາວຄິດໄລ່ຄ່າໃຊ້ຈ່າຍຢ່າງລະອຽດກ່ອນ ລາວກໍມີໂອກາດທີ່ຈະສ້າງເຮືອນແລ້ວ.
2. ຕາມລູກາ 14:27-30 ເຈົ້າຄວນຄິດເຖິງຫຍັງຢ່າງຮອບຄອບກ່ອນຈະຮັບບັບເຕມາ?
2 ຄວາມຮັກທີ່ເຈົ້າມີຕໍ່ພະເຢໂຫວາແລະການເຫັນຄຸນຄ່າສິ່ງທີ່ພະອົງເຮັດເພື່ອເຈົ້າໄດ້ກະຕຸ້ນເຈົ້າໃຫ້ຄິດທີ່ຈະຮັບບັບເຕມາບໍ? ຖ້າແມ່ນ ເຈົ້າກໍຕ້ອງຕັດສິນໃຈຄືກັບຜູ້ຊາຍຄົນນັ້ນທີ່ຢາກສ້າງເຮືອນ. ເປັນຫຍັງຈຶ່ງເວົ້າແນວນັ້ນ? ຂໍໃຫ້ພິຈາລະນາຄຳເວົ້າຂອງພະເຢຊູໃນລູກາ 14:27-30 (ອ່ານ). ພະເຢຊູກຳລັງເວົ້າເຖິງຄວາມໝາຍຂອງການເປັນລູກສິດເພິ່ນ. ເພື່ອຈະເປັນລູກສິດເພິ່ນ ເຮົາຕ້ອງເຕັມໃຈອົດທົນກັບຄວາມຍາກລຳບາກບາງຢ່າງແລະເສຍສະລະບາງສິ່ງ. (ລກ. 9:23-26; 12:51-53) ດັ່ງນັ້ນ ກ່ອນທີ່ເຈົ້າຈະຮັບບັບເຕມາ ເຈົ້າຕ້ອງຄິດຢ່າງຮອບຄອບວ່າເຈົ້າຈະປະສົບຫຍັງແດ່ເມື່ອເຂົ້າມາເປັນລູກສິດຂອງພະຄລິດ. ແລ້ວເຈົ້າຈະພ້ອມຫຼາຍຂຶ້ນທີ່ຈະຮັບໃຊ້ພະເຢໂຫວາຢ່າງສັດຊື່ຕໍ່ໆໄປໃນຖານະທີ່ເປັນຄລິດສະຕຽນທີ່ຮັບບັບເຕມາແລ້ວ.
3. ເຮົາຈະຄົ້ນຄວ້າຫຍັງໃນບົດຄວາມນີ້?
3 ການຮັບບັບເຕມາເຂົ້າມາເປັນລູກສິດຂອງພະຄລິດຄຸ້ມຄ່າກັບສິ່ງທີ່ຕ້ອງເສຍໄປບໍ? ຄຸ້ມຄ່າແທ້! ເພາະການຮັບບັບເຕມາເປີດໂອກາດໃຫ້ເຮົາໄດ້ຮັບພອນຢ່າງບໍ່ອັ້ນທັງໃນຕອນນີ້ແລະອະນາຄົດ. ໃຫ້ເຮົາມາຄົ້ນຄວ້າບາງຄຳຖາມທີ່ສຳຄັນກ່ຽວກັບການຮັບບັບເຕມາ ເພາະນີ້ຈະຊ່ວຍເຈົ້າໃຫ້ຕັດສິນໃຈໄດ້ວ່າ “ຂ້ອຍພ້ອມແລ້ວບໍທີ່ຈະຮັບບັບເຕມາ?”
ເຈົ້າຕ້ອງຮູ້ຫຍັງກ່ຽວກັບການອຸທິດຕົວແລະການຮັບບັບເຕມາ
4. (ກ) ການອຸທິດຕົວແມ່ນຫຍັງ? (ຂ) ຕາມມັດທາຍ 16:24 ການ “ເຊົາໃຊ້ຊີວິດ” ເພື່ອຕົວເອງໝາຍຄວາມວ່າແນວໃດ?
4 ການອຸທິດຕົວແມ່ນຫຍັງ? ເພື່ອທີ່ເຈົ້າຈະຮັບບັບເຕມາໄດ້ ເຈົ້າຕ້ອງອຸທິດຕົວກ່ອນ. ການອຸທິດຕົວຄືການອະທິດຖານເຖິງພະເຢໂຫວາຢ່າງຈິງຈັງຈາກຫົວໃຈແລະສັນຍາກັບພະອົງວ່າຈະໃຊ້ຊີວິດຂອງເຈົ້າຮັບໃຊ້ພະອົງຕະຫຼອດໄປ. ເມື່ອເຈົ້າອຸທິດຕົວໃຫ້ພະເຈົ້າແລ້ວ ເຈົ້າກໍຕ້ອງ “ເຊົາໃຊ້ຊີວິດ” ເພື່ອຕົວເອງ. (ອ່ານມັດທາຍ 16:24) ຕອນນີ້ເຈົ້າເປັນຄົນຂອງພະເຢໂຫວາ ເຊິ່ງນີ້ກໍເປັນສິດທິພິເສດທີ່ຍິ່ງໃຫຍ່ແທ້ໆ. (ຣມ. 14:8) ນອກຈາກນັ້ນ ເຈົ້າກໍກຳລັງບອກພະອົງວ່າຕັ້ງແຕ່ນີ້ຕໍ່ໄປເຈົ້າຈະໃຫ້ການຮັບໃຊ້ພະອົງເປັນສິ່ງສຳຄັນທີ່ສຸດໃນຊີວິດແລະບໍ່ເຮັດຕາມໃຈຕົວເອງ. ການອຸທິດຕົວຂອງເຈົ້າເປັນຄຳສັນຍາທີ່ເຈົ້າເຮັດກັບພະເຈົ້າຢ່າງຈິງຈັງ. ພະເຢໂຫວາບໍ່ໄດ້ບັງຄັບເຮົາໃຫ້ເຮັດຄຳສັນຍາແບບນັ້ນ. ແຕ່ເມື່ອເຮົາເຮັດແລ້ວ ພະອົງກໍຄາດໝາຍໃຫ້ເຮົາເຮັດຕາມທີ່ສັນຍາໄວ້.—ເພງ. 116:12, 14
5. ການອຸທິດຕົວແລະການຮັບບັບເຕມາແຕກຕ່າງກັນແນວໃດ?
5 ການອຸທິດຕົວແລະການຮັບບັບເຕມາແຕກຕ່າງກັນແນວໃດ? ການອຸທິດຕົວເປັນເລື່ອງສ່ວນຕົວລະຫວ່າງເຈົ້າກັບພະເຢໂຫວາ ເຊິ່ງບໍ່ມີໃຜຮູ້ເລື່ອງນີ້. ສ່ວນການຮັບບັບເຕມາເປັນສິ່ງທີ່ເຈົ້າເຮັດຕໍ່ໜ້າຄົນອື່ນ ເຊິ່ງປົກກະຕິຈະມີການຮັບບັບເຕມາຢູ່ໃນການປະຊຸມໝວດຫຼືການປະຊຸມພາກ. ເມື່ອເຈົ້າຮັບບັບເຕມາ ເຈົ້າກໍສະແດງໃຫ້ຄົນອື່ນຮູ້ວ່າເຈົ້າໄດ້ອຸທິດຕົວໃຫ້ພະເຢໂຫວາແລ້ວ * ແລະຍັງເຮັດໃຫ້ຄົນອື່ນຮູ້ວ່າເຈົ້າຮັກພະເຢໂຫວາສຸດຫົວໃຈ ສຸດຊີວິດ ສຸດຄວາມຄິດ ສຸດກຳລັງ ແລະຢາກຮັບໃຊ້ພະອົງຕະຫຼອດໄປ.—ມຣກ. 12:30
6-7. ຕາມ 1 ເປໂຕ 3:18-22 ມີສອງເຫດຜົນຫຍັງແດ່ທີ່ເຮົາຕ້ອງຮັບບັບເຕມາ?
6 ຕ້ອງຮັບບັບເຕມາແທ້ໆບໍ? ຂໍໃຫ້ມາເບິ່ງຄຳເວົ້າໃນ 1 ເປໂຕ 3:18-22 (ອ່ານ) ຄືກັບເຮືອທີ່ເປັນຫຼັກຖານສະແດງເຖິງຄວາມເຊື່ອຂອງໂນອາ ການຮັບບັບເຕມາກໍເປັນຫຼັກຖານທີ່ສະແດງວ່າເຈົ້າໄດ້ອຸທິດຕົວໃຫ້ພະເຢໂຫວາແລ້ວ. ແຕ່ຕ້ອງຮັບບັບເຕມາແທ້ໆບໍ? ແມ່ນ ຕ້ອງຮັບ. ເປໂຕໄດ້ບອກເຫດຜົນກ່ຽວກັບເລື່ອງນີ້. ທຳອິດ ການຮັບບັບເຕມາ “ຊ່ວຍພວກເຈົ້າໃຫ້ລອດ.” ການຮັບບັບເຕມາຈະຊ່ວຍເຮົາໃຫ້ລອດຖ້າເຮົາເຮັດຕາມຂັ້ນຕອນທີ່ສະແດງວ່າເຮົາເຊື່ອໃນພະເຢຊູ ເຊື່ອວ່າເພິ່ນຕາຍເພື່ອເຮົາ ເຊື່ອວ່າເພິ່ນຖືກປຸກໃຫ້ຄືນມາຈາກຕາຍແລ້ວໄປສະຫວັນ ແລະຕອນນີ້ເພິ່ນ “ຢູ່ເບື້ອງຂວາມືຂອງພະເຈົ້າ.”
7 ທີສອງ ການຮັບບັບເຕມາຊ່ວຍ “ບໍ່ໃຫ້ມີຫຍັງລົບກວນໃຈຮູ້ຜິດຮູ້ຖືກ.” ເມື່ອເຮົາອຸທິດຕົວໃຫ້ພະເຢໂຫວາແລະຮັບບັບເຕມາ ເຮົາກໍມີສາຍສຳພັນທີ່ພິເສດກັບພະອົງ. ຍ້ອນເຮົາກັບໃຈແທ້ໆແລະເຊື່ອໃນຄ່າໄຖ່ ພະເຈົ້າຈຶ່ງໃຫ້ອະໄພບາບເຮົາ ເຮົາກໍເລີຍບໍ່ຮູ້ສຶກຜິດຕໍ່ພະເຈົ້າ.
8. ອັນໃດຄວນເປັນເຫດຜົນຫຼັກທີ່ເຈົ້າຈະຕັດສິນໃຈຮັບບັບເຕມາ?
8 ອັນໃດຄວນເປັນເຫດຜົນຫຼັກທີ່ເຈົ້າຈະຕັດສິນໃຈຮັບບັບເຕມາ? ເມື່ອເຈົ້າສຶກສາຄຳພີໄບເບິນຢ່າງລະອຽດ ເຈົ້າກໍຈະມີຄວາມຮູ້ຢ່າງຫຼວງຫຼາຍກ່ຽວກັບພະເຢໂຫວາເຊັ່ນ: ຮູ້ວ່າພະອົງເປັນພະເຈົ້າແບບໃດ ພະອົງມັກຫຍັງບໍ່ມັກຫຍັງ ແລະພະອົງໄດ້ເຮັດຫຍັງ. ສິ່ງທີ່ເຈົ້າໄດ້ຮຽນຮູ້ກ່ຽວກັບພະອົງເຮັດໃຫ້ເຈົ້າຮູ້ສຶກປະທັບໃຈໃນພະອົງແລະຮັກພະອົງຫຼາຍແທ້ໆ. ດັ່ງນັ້ນ ຄວາມຮັກທີ່ເຈົ້າມີຕໍ່ພະເຢໂຫວາຕ້ອງເປັນເຫດຜົນຫຼັກທີ່ເຮັດໃຫ້ເຈົ້າຕັດສິນໃຈຮັບບັບເຕມາ.
9. ຕາມມັດທາຍ 28:19, 20 ການຮັບບັບເຕມາໃນນາມພະເຈົ້າຜູ້ເປັນພໍ່ ໃນນາມລູກຂອງພະອົງ ແລະໃນນາມພະລັງບໍລິສຸດໝາຍຄວາມວ່າແນວໃດ?
9 ອີກເຫດຜົນໜຶ່ງທີ່ເຮັດໃຫ້ເຈົ້າຕັດສິນໃຈຮັບບັບເຕມາກໍຄືການທີ່ເຈົ້າເຊື່ອແລະຍອມຮັບຄຳສອນໃນຄຳພີໄບເບິນ. ຂໍໃຫ້ຄິດເຖິງສິ່ງທີ່ພະເຢຊູເວົ້າຕອນທີ່ເພິ່ນສັ່ງໃຫ້ໄປສອນຄົນເປັນລູກສິດ. (ອ່ານມັດທາຍ 28:19, 20) ພະເຢຊູບອກວ່າ ຄົນທີ່ຮັບບັບເຕມາຕ້ອງຮັບ “ໃນນາມພະເຈົ້າຜູ້ເປັນພໍ່ ໃນນາມລູກຂອງພະອົງ ແລະໃນນາມພະລັງບໍລິສຸດ.” ນີ້ໝາຍຄວາມວ່າແນວໃດ? ເຈົ້າຕ້ອງເຊື່ອສຸດຈິດສຸດໃຈໃນຄວາມຈິງທີ່ຄຳພີໄບເບິນສອນກ່ຽວກັບພະເຢໂຫວາ ພະເຢຊູລູກຂອງພະອົງແລະພະລັງບໍລິສຸດ. ຄວາມຈິງເຫຼົ່ານີ້ມີພະລັງຫຼາຍແລະມີຜົນກະທົບຕໍ່ຫົວໃຈຂອງເຈົ້າ. (ຮຣ. 4:12) ຂໍໃຫ້ເຮົາມາທວນຄືນຄວາມຈິງບາງຢ່າງນຳກັນ.
10-11. ເຈົ້າໄດ້ຮຽນແລະເຊື່ອຄວາມຈິງຫຍັງກ່ຽວກັບພະເຢໂຫວາຜູ້ເປັນພໍ່?
10 ຄິດເຖິງຕອນທີ່ເຈົ້າໄດ້ຮຽນຄວາມຈິງເລື່ອງພະເຢໂຫວາພໍ່ໃນສະຫວັນເຊັ່ນ: ພະເຈົ້າ “ມີນາມຊື່ວ່າພະເຢໂຫວາ” ພະອົງເປັນ “ພະເຈົ້າອົງສູງສຸດເທິງແຜ່ນດິນທັງສິ້ນ” ແລະມີພຽງພະອົງເທົ່ານັ້ນທີ່ເປັນ “ພະເຈົ້າທ່ຽງແທ້.” (ເພງ. 83:18; ເອຊາ. 37:16, ລ.ມ.) ພະອົງເປັນຜູ້ໃຫ້ຊີວິດເຮົາແລະ “ເປັນຜູ້ຊ່ວຍໃຫ້ລອດ.” (ເພງ. 3:8; 36:9, ລ.ມ.) ພະອົງໄດ້ຈັດກຽມໃຫ້ເຮົາລອດຈາກບາບແລະຄວາມຕາຍແລະຍັງໃຫ້ເຮົາມີໂອກາດທີ່ຈະໄດ້ຮັບຊີວິດຕະຫຼອດໄປ. (ຢຮ. 17:3) ເມື່ອເຈົ້າອຸທິດຕົວແລະຮັບບັບເຕມາເຈົ້າກໍສະແດງໃຫ້ເຫັນວ່າເຈົ້າເປັນພະຍານພະເຢໂຫວາ. (ເອຊາ. 43:10-12) ເຈົ້າຈະເປັນສ່ວນໜຶ່ງຂອງຄອບຄົວຜູ້ນະມັດສະການພະເຢໂຫວາທົ່ວໂລກ ເຊິ່ງພູມໃຈທີ່ໄດ້ຖືກເອີ້ນຕາມນາມຊື່ຂອງພະເຈົ້າແລະປະກາດໃຫ້ຄົນອື່ນຮູ້ຈັກພະອົງ.—ເພງ. 86:12
11 ເປັນສິດທິພິເສດຫຼາຍແທ້ໆທີ່ໄດ້ຮູ້ໃນສິ່ງທີ່ຄຳພີໄບເບິນສອນກ່ຽວກັບພະເຢໂຫວາຜູ້ເປັນພໍ່. ເມື່ອເຈົ້າເຊື່ອໃນຄວາມຈິງທີ່ມີຄ່າເຫຼົ່ານີ້ ເຈົ້າກໍຈະຖືກກະຕຸ້ນໃຫ້ອຸທິດຕົວໃຫ້ພະເຢໂຫວາແລະຮັບບັບເຕມາ.
12-13. ເຈົ້າໄດ້ຮຽນແລະເຊື່ອຄວາມຈິງຫຍັງກ່ຽວກັບພະເຢຊູລູກຊາຍຂອງພະເຈົ້າ?
12 ເຈົ້າຮູ້ສຶກແນວໃດເມື່ອໄດ້ຮຽນຄວາມຈິງກ່ຽວກັບພະເຢຊູ? ພະເຢຊູເປັນບຸກຄົນທີ່ສຳຄັນທີ່ສຸດໃນເອກະພົບຮອງຈາກພະເຢໂຫວາ. ພະເຢຊູເປັນຄ່າໄຖ່ ເພິ່ນເຕັມໃຈສະລະຊີວິດເພື່ອເຮົາ. ເມື່ອເຮົາສະແດງໃຫ້ເຫັນວ່າເຮົາເຊື່ອໃນຄ່າໄຖ່ຂອງເພິ່ນໂດຍການກະທຳ ເຮົາກໍສາມາດໄດ້ຮັບການອະໄພບາບ ມີສາຍສຳພັນທີ່ດີກັບພະເຈົ້າແລະໄດ້ຊີວິດຕະຫຼອດໄປ. (ຢຮ. 3:16) ນອກຈາກນັ້ນ ພະເຢຊູຍັງເປັນປະໂລຫິດໃຫຍ່ຂອງເຮົາ. ເພິ່ນຢາກຊ່ວຍເຮົາໃຫ້ໄດ້ຮັບປະໂຫຍດຈາກຄ່າໄຖ່ແລະສະໜິດກັບພະເຈົ້າ. (ຮຣ. 4:15; 7:24, 25) ແລະພະເຢຊູກໍຍັງເປັນກະສັດໃນການປົກຄອງຂອງພະເຈົ້າ ພະເຢໂຫວາໄດ້ໃຊ້ເພິ່ນເພື່ອເຮັດໃຫ້ຊື່ຂອງພະອົງເປັນທີ່ເຄົາລົບນັບຖື ກຳຈັດຄວາມຊົ່ວ ແລະຈະເອົາພອນຢ່າງຫຼວງຫຼາຍມາໃຫ້ເຮົາໃນໂລກໃໝ່. (ມທ. 6:9, 10; ພນມ. 11:15) ພະເຢຊູເປັນແບບຢ່າງໃຫ້ເຮົາຮຽນແບບ. (1 ປຕ. 2:21) ເພິ່ນວາງຕົວຢ່າງໃຫ້ເຮົາໂດຍອຸທິດຊີວິດຂອງເພິ່ນເພື່ອເຮັດຕາມຄວາມຕ້ອງການຂອງພະເຈົ້າ.—ຢຮ. 4:34
13 ເມື່ອເຈົ້າເຊື່ອໃນສິ່ງທີ່ຄຳພີໄບເບິນສອນກ່ຽວກັບພະເຢຊູລູກຂອງພະເຈົ້າ ເຈົ້າກໍຈະຮັກເພິ່ນ. ຄວາມຮັກນີ້ຈະກະຕຸ້ນເຈົ້າໃຫ້ໃຊ້ຊີວິດເພື່ອເຮັດຕາມຄວາມຕ້ອງການຂອງພະເຈົ້າຄືກັບທີ່ພະເຢຊູເຮັດ ແລະເຈົ້າກໍຈະຢາກອຸທິດຕົວໃຫ້ພະເຢໂຫວາແລະຮັບບັບເຕມາ.
14-15. ເຈົ້າໄດ້ຮຽນແລະເຊື່ອຄວາມຈິງຫຍັງກ່ຽວກັບພະລັງບໍລິສຸດ?
14 ເຈົ້າຮູ້ສຶກແນວໃດເມື່ອໄດ້ຮຽນຄວາມຈິງກ່ຽວກັບພະລັງບໍລິສຸດ? ພະລັງບໍລິສຸດບໍ່ແມ່ນບຸກຄົນ ແຕ່ເປັນພະລັງທີ່ພະເຢໂຫວາໃຊ້ໃນການເຮັດສິ່ງຕ່າງໆ. ພະອົງໃຊ້ພະລັງບໍລິສຸດດົນໃຈໃຫ້ມີການຂຽນຄຳພີໄບເບິນ ເມື່ອເຮົາອ່ານຄຳພີໄບເບິນພະລັງນີ້ຈະຊ່ວຍເຮົາໃຫ້ເຂົ້າໃຈໃນສິ່ງທີ່ອ່ານແລະເອົາໄປໃຊ້ໃນຊີວິດ. (ຢຮ. 14:26; 2 ປຕ. 1:21) ພະເຢໂຫວາໃຫ້ “ກຳລັງທີ່ຫຼາຍກວ່າປົກກະຕິ” ໂດຍທາງພະລັງບໍລິສຸດ. (2 ກຣ. 4:7) ພະລັງນີ້ຊ່ວຍເຮົາໃຫ້ມີກຳລັງທີ່ຈະປະກາດຂ່າວດີ ຕໍ່ສູ້ກັບການລໍ້ໃຈ ຮັບມືກັບຄວາມທໍ້ໃຈ ແລະອົດທົນກັບບັນຫາ. ນອກຈາກນັ້ນ ພະລັງນີ້ຍັງຊ່ວຍເຮົາໃຫ້ສະແດງຄຸນລັກສະນະທີ່ດີຕ່າງໆເຊິ່ງເປັນ “ຜົນທີ່ເກີດຈາກພະລັງຂອງພະເຈົ້າ”. (ຄລຕ. 5:22) ພະເຈົ້າໃຫ້ພະລັງບໍລິສຸດກັບຄົນທີ່ໄວ້ໃຈພະອົງແລະຂໍຢ່າງຈິງໃຈ.—ລກ. 11:13
15 ເຮົາໄດ້ກຳລັງໃຈຫຼາຍແທ້ໆທີ່ຮູ້ວ່າຜູ້ນະມັດສະການພະເຢໂຫວາສາມາດເພິ່ງພະລັງບໍລິສຸດເພື່ອຊ່ວຍພວກເຂົາໃຫ້ຮັບໃຊ້ພະເຈົ້າ. ເມື່ອເຈົ້າໄດ້ຮຽນແລະເຊື່ອຄວາມຈິງກ່ຽວກັບພະລັງບໍລິສຸດ ເຈົ້າກໍຈະຖືກກະຕຸ້ນໃຫ້ອຸທິດຕົວໃຫ້ພະເຢໂຫວາແລະຮັບບັບເຕມາ.
16. ຈົນຮອດຕອນນີ້ ເຮົາໄດ້ຮຽນເລື່ອງຫຍັງມາແດ່ແລ້ວ?
16 ເມື່ອເຈົ້າຕັດສິນໃຈອຸທິດຕົວໃຫ້ພະເຢໂຫວາແລະຮັບບັບເຕມາ ເຈົ້າກໍກຳລັງເຮັດຂັ້ນຕອນທີ່ສຳຄັນຫຼາຍແທ້ໆ. ດັ່ງທີ່ເຮົາໄດ້ຮຽນມາແລ້ວ ເຈົ້າຕ້ອງເຕັມໃຈຍອມຮັບ “ຄ່າໃຊ້ຈ່າຍ” ເຊິ່ງໝາຍເຖິງຄວາມຍາກລຳບາກຕ່າງໆແລະການເສຍສະລະຫຼາຍຢ່າງ. ແຕ່ພອນທີ່ເຈົ້າຈະຮັບນັ້ນຈະຫຼາຍກວ່າສິ່ງທີ່ເຈົ້າໄດ້ເສຍສະລະໄປ. ການຮັບບັບເຕມາຈະຊ່ວຍເຈົ້າໃຫ້ລອດແລະຊ່ວຍເຈົ້າບໍ່ໃຫ້ຮູ້ສຶກຜິດຕໍ່ພະເຈົ້າ. ຄວາມຮັກທີ່ເຈົ້າມີຕໍ່ພະເຢໂຫວາຕ້ອງແມ່ນເຫດຜົນຫຼັກທີ່ເຈົ້າຕັດສິນໃຈຮັບບັບເຕມາ. ແລະເຈົ້າຍັງຕ້ອງເຊື່ອໝົດໃຈໃນສິ່ງທີ່ຄຳພີໄບເບິນສອນກ່ຽວກັບພະເຈົ້າຜູ້ເປັນພໍ່ ພະເຢຊູລູກຂອງພະອົງ ແລະພະລັງບໍລິສຸດ. ຮອດຕອນນີ້ແລ້ວ ເຈົ້າຄິດແນວໃດກ່ຽວກັບຄຳຖາມນີ້ທີ່ວ່າ “ຂ້ອຍພ້ອມແລ້ວບໍທີ່ຈະຮັບບັບເຕມາ?”
ສິ່ງທີ່ເຈົ້າຕ້ອງເຮັດກ່ອນຮັບບັບເຕມາ
17. ມີຂັ້ນຕອນຫຍັງແດ່ທີ່ເຮົາຕ້ອງເຮັດກ່ອນຮັບບັບເຕມາ?
17 ຖ້າເຈົ້າຮູ້ສຶກວ່າເຈົ້າພ້ອມທີ່ຈະຮັບບັບເຕມາ ສະແດງວ່າເຈົ້າສ້າງສາຍສຳພັນກັບພະເຢໂຫວາມາຫຼາຍຂັ້ນຕອນແລ້ວ. * ເມື່ອເຈົ້າອ່ານຄຳພີໄບເບິນເປັນປະຈຳ ເຈົ້າຈຶ່ງໄດ້ຮູ້ຈັກພະເຢໂຫວາແລະພະເຢຊູເປັນຢ່າງດີ ແລະເຈົ້າກໍມີຄວາມເຊື່ອຫຼາຍຂຶ້ນ. (ຮຣ. 11:6) ເຈົ້າໝັ້ນໃຈໃນສິ່ງທີ່ພະເຢໂຫວາສັນຍາໄວ້ໃນຄຳພີໄບເບິນແລະເຊື່ອວ່າຄ່າໄຖ່ຂອງພະເຢຊູຈະຊ່ວຍເຈົ້າໃຫ້ຫຼຸດພົ້ນຈາກບາບແລະຄວາມຕາຍ. ເຈົ້າໄດ້ກັບໃຈຈາກບາບ ຮູ້ສຶກເສຍໃຈກັບຄວາມຜິດທີ່ໄດ້ເຮັດ ແລະຂໍພະເຢໂຫວາໃຫ້ອະໄພ. ເຈົ້າໄດ້ປ່ຽນແປງຊີວິດຂອງເຈົ້າໂດຍຖິ້ມນິດໄສເກົ່າໆທີ່ບໍ່ດີແລະໃຊ້ຊີວິດໃນແບບທີ່ພະເຈົ້າພໍໃຈ. (ກຈກ. 3:19) ເຈົ້າຮູ້ສຶກຢາກບອກຄົນອື່ນກ່ຽວກັບຄວາມເຊື່ອຂອງເຈົ້າ ເຈົ້າມີຄຸນສົມບັດທີ່ຈະເປັນຜູ້ປະກາດທີ່ຍັງບໍ່ຮັບບັບເຕມາ ແລະເລີ່ມອອກໄປປະກາດກັບພີ່ນ້ອງ. (ມທ. 24:14) ພະເຢໂຫວາພູມໃຈທີ່ເຈົ້າໄດ້ເຮັດຕາມຂັ້ນຕອນທີ່ສຳຄັນເຫຼົ່ານີ້. ເຈົ້າເຮັດໃຫ້ພະອົງມີຄວາມສຸກຫຼາຍແທ້ໆ.—ສຸພາ. 27:11
18. ມີຫຍັງອີກທີ່ເຈົ້າຕ້ອງເຮັດກ່ອນຈະຮັບບັບເຕມາ?
18 ຍັງມີອີກສອງສາມຢ່າງທີ່ເຈົ້າຕ້ອງເຮັດກ່ອນຮັບບັບເຕມາ. ຄືກັບທີ່ໄດ້ຮຽນກ່ອນໜ້ານີ້ ເຈົ້າຕ້ອງອຸທິດຕົວໃຫ້ພະເຢໂຫວາໂດຍການອະທິດຖານຢ່າງຈິງຈັງ ແລະສັນຍາກັບພະອົງວ່າເຈົ້າຈະໃຊ້ຊີວິດເພື່ອເຮັດຕາມຄວາມຕ້ອງການຂອງພະອົງ. (1 ປຕ. 4:2) ຫຼັງຈາກນັ້ນໃຫ້ບອກຜູ້ປະສານງານຄະນະຜູ້ດູແລວ່າເຈົ້າຢາກຮັບບັບເຕມາ. ລາວຈະຂໍໃຫ້ຜູ້ດູແລບາງຄົນລົມກັບເຈົ້າ. ຂໍໃຫ້ເຈົ້າຢ່າກັງວົນທີ່ຈະລົມກັບພວກເຂົາ ພວກເຂົາຮູ້ຈັກເຈົ້າແລະຮັກເຈົ້າ ພວກເຂົາຈະທົບທວນຄວາມຮູ້ພື້ນຖານໃນຄຳພີໄບເບິນທີ່ເຈົ້າໄດ້ຮຽນເພື່ອຈະໝັ້ນໃຈວ່າເຈົ້າເຂົ້າໃຈຄຳສອນໃນຄຳພີໄບເບິນແທ້ໆ ແລະຮູ້ວ່າການອຸທິດຕົວແລະການຮັບບັບເຕມາເປັນເລື່ອງສຳຄັນ. ຖ້າພວກເຂົາເຫັນວ່າເຈົ້າພ້ອມແລ້ວ ພວກເຂົາກໍຈະບອກໃຫ້ເຈົ້າຮູ້ວ່າເຈົ້າຈະໄດ້ຮັບບັບເຕມາໃນການປະຊຸມໝວດຫຼືການປະຊຸມພາກຄັ້ງຕໍ່ໄປ.
ສິ່ງທີ່ເຈົ້າຕ້ອງເຮັດຫຼັງຈາກຮັບບັບເຕມາ
19-20. ເຈົ້າຕ້ອງເຮັດຫຍັງຫຼັງຈາກຮັບບັບເຕມາ ແລະເຈົ້າຈະເຮັດແບບນັ້ນໄດ້ແນວໃດ?
19 ຫຼັງຈາກຮັບບັບເຕມາແລ້ວ ເຈົ້າຕ້ອງເຮັດຫຍັງອີກ? * ຂໍໃຫ້ຈື່ວ່າການອຸທິດຕົວເປັນຄຳປະຕິຍານແລະພະເຢໂຫວາກໍຄາດໝາຍໃຫ້ເຈົ້າເຮັດຕາມຄຳປະຕິຍານນັ້ນ. ດັ່ງນັ້ນ ຫຼັງຈາກເຈົ້າຮັບບັບເຕມາແລ້ວ ເຈົ້າຕ້ອງເຮັດຕາມຄຳປະຕິຍານການອຸທິດຕົວຂອງເຈົ້າ. ແຕ່ເຈົ້າຈະເຮັດແບບນັ້ນໄດ້ແນວໃດ?
20 ຂໍໃຫ້ເຈົ້າໃກ້ຊິດກັບປະຊາຄົມຂອງເຈົ້າ. ເມື່ອເຈົ້າຮັບບັບເຕມາ ເຈົ້າກໍເປັນສ່ວນໜຶ່ງຂອງ “ພີ່ນ້ອງຄລິດສະຕຽນ.” (1 ປຕ. 2:17) ພວກເຂົາເປັນຄືກັບຄອບຄົວຂອງເຈົ້າ. ເມື່ອເຈົ້າເຂົ້າຮ່ວມການປະຊຸມເປັນປະຈຳ ເຈົ້າກໍຈະສະໜິດກັບພວກເຂົາຫຼາຍຂຶ້ນ. ນອກຈາກນັ້ນ ໃຫ້ເຈົ້າອ່ານຄຳພີໄບເບິນແລະຄິດຕຶກຕອງທຸກມື້. ເມື່ອເຈົ້າອ່ານບາງເລື່ອງໃນຄຳພີໄບເບິນ ໃຫ້ເຈົ້າໃຊ້ເວລາຄິດຕຶກຕອງເລື່ອງນັ້ນຢ່າງເລິກເຊິ່ງ. ຖ້າເຈົ້າເຮັດແບບນັ້ນ ເຈົ້າກໍຈະເຂົ້າໃຈເລື່ອງທີ່ເຈົ້າອ່ານ. (ເພງ. 1:1, 2) ໃຫ້ເຈົ້າ “ອະທິດຖານຢູ່ເລື້ອຍໆ.” ຄຳອະທິດຖານຈາກຫົວໃຈຂອງເຈົ້າຈະຊ່ວຍໃຫ້ເຈົ້າໃກ້ຊິດກັບພະເຢໂຫວາຫຼາຍຂຶ້ນ. (ມທ. 26:41) ຂໍ “ໃຫ້ການປົກຄອງຂອງພະເຈົ້າ . . . ເປັນສິ່ງສຳຄັນທີ່ສຸດໃນຊີວິດສະເໝີ.” (ມທ. 6:33) ເຈົ້າສາມາດເຮັດແບບນັ້ນໂດຍໃຫ້ວຽກປະກາດເປັນສິ່ງສຳຄັນທີ່ສຸດໃນຊີວິດຂອງເຈົ້າ. ການໄປປະກາດເປັນປະຈຳຈະຊ່ວຍເຈົ້າໃຫ້ມີຄວາມເຊື່ອທີ່ເຂັ້ມແຂງສະເໝີ ແລະເຈົ້າກໍອາດຈະໄດ້ຊ່ວຍຄົນອື່ນໃຫ້ເຂົ້າມາໃນທາງທີ່ຈະໄດ້ຮັບຊີວິດຕະຫຼອດໄປ.—1 ຕມ. 4:16
21. ການຮັບບັບເຕມາຈະເປີດທາງໃຫ້ເຈົ້າໄດ້ຫຍັງ?
21 ການຕັດສິນໃຈອຸທິດຕົວແລະຮັບບັບເຕມາເປັນເລື່ອງສຳຄັນທີ່ສຸດໃນຊີວິດຂອງເຈົ້າ. ເປັນຄວາມຈິງທີ່ວ່າເຈົ້າອາດຕ້ອງເສຍສະລະບາງຢ່າງ ແຕ່ມັນຄຸ້ມຄ່າກັບສິ່ງທີ່ເສຍໄປບໍ? ຄຸ້ມແທ້ແນ່ນອນ! ຄວາມຍາກລຳບາກຕ່າງໆທີ່ເຈົ້າປະສົບໃນຕອນນີ້ຈະ “ຢູ່ພຽງໄລຍະສັ້ນໆແລະບໍ່ໜັກ.” (2 ກຣ. 4:17) ການຮັບບັບເຕມາຈະເປີດທາງໃຫ້ເຈົ້າມີຊີວິດທີ່ມີຄວາມສຸກຫຼາຍຂຶ້ນໃນຕອນນີ້ ແລະໄດ້ “ຊີວິດແທ້” ໃນອະນາຄົດ. (1 ຕມ. 6:19) ດັ່ງນັ້ນ ຂໍໃຫ້ເຈົ້າຄິດຢ່າງຮອບຄອບແລະອະທິດຖານຢ່າງຈິງຈັງກ່ຽວກັບຄຳຖາມທີ່ວ່າ “ຂ້ອຍພ້ອມແລ້ວບໍທີ່ຈະຮັບບັບເຕມາ?”
ເພງ 50 ຄຳອະທິດຖານອຸທິດຕົວ
^ ຂໍ້ 5 ເຈົ້າກຳລັງຄິດທີ່ຈະຮັບບັບເຕມາບໍ? ຖ້າແມ່ນ ບົດຄວາມນີ້ກໍຂຽນເພື່ອເຈົ້າໂດຍສະເພາະໄດ໋ນິ. ເຮົາຈະມາເບິ່ງຄຳຖາມທີ່ສຳຄັນກ່ຽວກັບເລື່ອງນີ້ນຳກັນ ແລະຄຳຕອບຂອງເຈົ້າຈະຊ່ວຍເຈົ້າໃຫ້ຮູ້ວ່າເຈົ້າພ້ອມແລ້ວບໍທີ່ຈະຮັບບັບເຕມາ.
^ ຂໍ້ 19 ຖ້າເຈົ້າສຶກສາປຶ້ມຄຳພີໄບເບິນສອນແນວໃດແທ້ໆ? ແລະປຶ້ມຈົ່ງຮັກສາຕົວໄວ້ໃນຄວາມຮັກຂອງພະເຈົ້າ ຍັງບໍ່ຈົບ ເຈົ້າຄວນສຶກສາກັບຜູ້ນຳການສຶກສາຕໍ່ໄປຈົນຈົບທັງສອງຫົວ.
