1. Ki lika mañi zaswanela kueza mutu pili asika kala kale kuyaha ndu?

LUUNGEÑI kuli mutu ubata kuyaha ndu. Waziba mufuta wa ndu yabata kuyaha. Kana uswanela kuyo leka liyahiso ni kukala kuyaha honafo feela? Batili. Pili asika kala kale kuyaha, kunani nto ya butokwa yaswanela kueza; uswanela kunyakisisa teko yayona. Kabakalañi? Kakuli ubata kuziba haiba unani masheleñi akwanile aka mutusa kuyaha ndu yeo. Haiba anyakisisa ka tokomelo teko ya ndu yeo inze kusanani nako, wakona kufeza kuyaha ndu yahae yenca yeo.

2. Ka kuya ka Luka 14:27-30, ki lika mañi zemuswanela kunahanisisa ka tokomelo pili musika kolobezwa kale?

² Kana musweli kunahana za kukolobezwa bakeñisa lilato lamina ku Jehova ni kuitebuha lika zamiezelize? Haiba ki cwalo, uzibe mutokwa kueza katulo yeswana ni ya mutu yabata kuyaha ndu. Ki kabakalañi halubulela cwalo? Halunyakisiseñi zanaabulezi Jesu kwa Luka 14:27-30. (Mubale.) Jesu naaambola sekutalusa kuba mulutiwa wahae. Haiba lubata kumulatelela, luswanela kulibelela kuli lukakopana ni miinelo yetaata mi luswanela kuitoboha lika zeñwi mwa bupilo. (Luka 9:23-26; 12:51-53) Kacwalo, pili musika kolobezwa kale, mutokwa kunahanisisa ka tokomelo lika zemukona kukopana ni zona hase mukolobelizwe. Kueza cwalo kuka mitusa kuzwelapili kusebeleza Mulimu ka busepahali ka kuba Mukreste yakolobelizwe.

3. Lukanyakisisañi mwa taba ye?

³ Kana kuba mulutiwa wa Kreste yakolobelizwe ki kwa butokwa hahulu kuli mane muitukiselize kukopana ni miinelo yetaata ni kuitoboha lika zeñwi mwa bupilo? Eni ki kwa butokwa! Kukolobezwa kuka mitahiseza limbuyoti zeñata ka nako ya cwale  mane ni kwapili. Halunyakisiseñi lipuzo zeñwi za butokwa ka za kolobezo. Kufumana likalabo za lipuzo zeo kuka mitusa kualaba puzo ye, “Kana niitukiselize kukolobezwa?”

4. (a) Buineelo ki nto mañi? (b) Taba ya ‘kuitoboha’ yebulezwi kwa Mateu 16:24, italusañi?

⁴ Buineelo ki nto mañi? Pili musika kolobezwa kale, muswanela kuineela ku Mulimu. Hamuineela ku Jehova mulapela ku yena kuzwelela kwatasaa pilu ni kumutaluseza kuli muka musebeleza mwa bupilo bwamina kaufela. Hamuineela ku Mulimu, ‘muitoboha’ bupilo bwamina. (Mubale Mateu 16:24.) Mubonisa kuli cwale semuli ba Jehova, mi yeo ki tohonolo yetuna. (Maro. 14:8) Mumutaluseza kuli kuzwa cwale, nto ya butokwa hahulu ku mina ki kumusebeleza isiñi kueza feela lika zemitabisa. Buineelo ki buitamo bwaeza mutu ku Mulimu bwasatokwi kukeshebisa. Jehova haaluhapelezi kueza buitamo bobucwalo. Kono haiba luitama ku Jehova, ukabata kuli lutaleleze buitamo bwaluna.—Samu 116:12, 14.

5. Ki ifi shutano ye mwahalaa buineelo ni kolobezo?

⁵ Ki ifi shutano ye mwahalaa buineelo ni kolobezo? Buineelo ki muhato omuunga inze muli munosi kwa mukunda; ki mina feela ni Jehova babaziba zateñi. Kolobezo yona iezezwanga fapilaa batu; hañata ibelanga kwa mukopano wa mupotoloho kamba mukopano omutuna. Hamukolobezwa, mubonisa babañwi kuli muineezi kale ku Jehova. * Kacwalo, kolobezo yamina ibonisa batu kuli mwalata Jehova Mulimu wamina ka pilu yamina kaufela, ka moyo wamina kaufela, ka munahano wamina kaufela ni ka maata amina kaufela, mi mubonisa kuli muikatulezi kumusebeleza mwa bupilo bwamina kaufela.—Mare. 12:30.

6-7. Ka kuya ka 1 Pitrosi 3:18-22, ki kabakalañi haluswanela kukolobezwa?

⁶ Kana luli mwaswanela kukolobezwa? Munyakisise manzwi añozwi kwa 1 Pitrosi 3:18-22. (Mubale.) Sina feela aleka hane ibonisa kuli Nuwe naanani tumelo, kolobezo yamina ibonisa kuli muineezi ku Jehova. Kono kana luli mwaswanela kukolobezwa? Eni. Pitrosi naabonisize libaka hamuswanela kueza cwalo. Sapili, naabonisize kuli kolobezo “yamipilisa.” Kolobezo yakona kulupilisa haiba luunga mihato yeswanela yebonisa kuli lunani tumelo ku Jesu ni kuli lwalumela kuli naalushwezi, naazuselizwe kwa lihalimu, mi cwale “uinzi ku la bulyo la Mulimu.”

⁷ Sabubeli, kolobezo ilutusa kuba ni “lizwalo lelinde.” Haluineela ku Mulimu ni kukolobezwa, silikani saluna ni yena sika tiya hahulu. Bakeñisa kuli lubakezi libi zaluna habuniti, mi lubonisize tumelo mwa sitabelo sa tiululo, Mulimu waswalelanga libi zaluna. Kacwalo, lwakona kuba ni lizwalo lelinde fapilaa hae.

8. Ki lifi libaka lelituna leliswanela kumitusa kuunga muhato wa kukolobezwa?

⁸ Ki nto mañi yeswanela kumisusueza kuikatulela kukolobezwa? Kuituta Bibele ka tokomelo kumitusize kuziba zeñata ka za Jehova, ili kuziba mwainezi ni mwaezezanga lika. Zene muitutile ka za hae neli mifitile kwa pilu, mi neli mitusize kumulata hahulu. Lilato lamina ku Jehova ki lona libaka lelituna leliswanela kumitusa kuunga muhato wa kukolobezwa.

9. Kukolobezwa ka libizo la Ndate ni la Mwana ni la moya okenile, kutalusañi sina mokuboniselizwe kwa liñolo la Mateu 28:19, 20?

⁹ Libaka leliñwi hamuswanela kuikatulela kukolobezwa kikuli muitutile litaba za niti za mwa Bibele mi mwalumela litaba zeo. Halunyakisiseñi zanaabulezi Jesu hanaafile taelo ya kuluta batu kuba balutiwa. (Mubale Mateu 28:19, 20.) Jesu naabulezi kuli batu kaufela bababata kukolobezwa baswanela kueza  cwalo “ka libizo la Ndate ni la Mwana ni la moya okenile.” Taba yeo italusañi? Muswanela kulumela litaba za niti za mwa Bibele zebulela ka za Jehova, ka za Mwanaa hae, yena Jesu, ni ka za moya okenile, mi muswanela kueza cwalo ka pilu yamina kaufela. Litaba za niti zeo zakona kumitusa luli ni kumifita kwa pilu. (Maheb. 4:12) Halunyakisiseñi zeñwi za ku zona.

10-11. Ki litaba lifi za niti zebulela ka za Ndate zemuitutile ni kulumela?

¹⁰ Hamunyakisise litaba za niti zemuitutile ka za Ndate: Muitutile kuli ‘libizo lahae ki Jehova,’ ki yena “Yapahami ka Kufitisisa fahalimwaa lifasi kaufela,” mi ki yena feela “Mulimu wa niti.” (Samu 83:18; Isa. 37:16) Ki yena Mubupi waluna mi “kupilisa ki kwa Jehova.” (Samu 3:8; 36:9) Ulukisize nzila ya kululiulula ka yona kwa sibi ni lifu mi ulufile sepo ya kupila kuya kuile. (Joa. 17:3) Buineelo ni kolobezo yamina lika mizibahaza kuba yomuñwi wa Lipaki za Jehova. (Isa. 43:10-12) Mukaba mwa lubasi lwa balapeli babafumaneha mwa lifasi kaufela, ili babaitebuha tohonolo ya kubizwa ka libizo la Mulimu ni baba lizibahaza ku babañwi.—Samu 86:12.

¹¹ Lunani tohonolo yetuna ya kuutwisisa zeiluta Bibele ka za Ndate! Haiba mulumela litaba za niti za butokwa zeo, mukasusuezwa kuineela ku Jehova ni kukolobezwa.

12-13. Ki litaba mañi za niti ka za Mwana zemuitutile ni zemulumezi?

¹² Nemuikutwile cwañi hane muitutile litaba za niti zelatelela ka za Mwana? Kuzwa ku Jehova, Jesu ki yena wabubeli yali wa butokwa hahulu mwa pupo kaufela. Ki yena Muliululi waluna. Naaitatezi kulushwela. Haiba lubonisa kuli lunani tumelo mwa sitabelo sa tiululo ka lika zelueza, libi zaluna likaswalelwa, lukaba ni silikani sesinde ni Mulimu, mi lukafumana bupilo bobusa feli. (Joa. 3:16) Jesu ki yena muprisita waluna yapahami. Ubata kulutusa kuli lutusiwe ki sitabelo sa tiululo mi lube ni silikani sesinde ni Mulimu. (Maheb. 4:15; 7:24, 25) Bakeñisa kuli Jesu ki yena Mulena wa Mubuso wa Mulimu, Jehova ukaitusisa yena kukenisa libizo lahae, kufelisa bumaswe, ni kulutusa kuli kwapili lufumane limbuyoti mwa Paradaisi kuya kuile. (Mat. 6:9, 10; Sin. 11:15) Jesu ulutomezi mutala omunde. (1 Pit. 2:21) Ulutomezi mutala ka kueza tato ya Mulimu mwa bupilo bwahae kaufela.—Joa. 4:34.

¹³ Haiba mulumela zeiluta Bibele ka za Jesu, mukalata Mwanaa Mulimu yo yalatwa. Lilato leo lika misusueza kueza tato ya Mulimu mwa bupilo bwamina kaufela sina mwanaaezelize Jesu. Mi mukasusuezwa kuineela ku Jehova ni kukolobezwa.

14-15. Ki litaba mañi za niti ka za moya okenile zemuitutile ni zemulumezi?

¹⁴ Nemuikutwile cwañi hane muitutile litaba za niti zelatelela ka za moya okenile? Moya okenile haki mutu, kono ki maata a Mulimu. Jehova naaitusisize moya okenile kususumeza bañoli ba Bibele, mi moya wo ulutusa kuutwisisa ni kusebelisa zelubala mwa Bibele. (Joa. 14:26; 2 Pit. 1:21) Ka kuitusisa moya okenile, Jehova ulufa “maata afita a butu.” (2 Makor. 4:7) Moya okenile ulutusa kuba ni maata a kukutaza taba yende, kutula miliko, kuitiisa haluzwafile, ni kutiyela miinelo yetaata. Ulutusa kubonisa tulemeno totunde totuli kalulo ya “muselo wa moya.” (Magal. 5:22) Mulimu watabela kufa moya wahae kwa batu baba musepile ni baba ukupa ku yena.—Luka 11:13.

¹⁵ Kuziba kuli batanga ba Jehova bakona kufiwa moya okenile kuli ubatuse kusebeleza Mulimu, kwaomba-omba luli! Haiba mulumela zeiluta Bibele ka za moya okenile, mukasusuezwa kuineela ku Mulimu ni kukolobezwa.

16. Ki lika mañi zeluitutile mwa taba ye?

 ¹⁶ Haiba muikatulezi kuineela ku Mulimu ni kukolobezwa, uzibe muezize katulo ya butokwa hahulu. Sina moluitutezi mwa taba ye, luswanela kulibelela kuli lukakopana ni miinelo yetaata mi luswanela kuitoboha lika zeñwi mwa bupilo. Kono limbuyoti zemuka amuhela ki zeñata hahulu kufita lika zemuka itombola. Kolobezo yakona kumipilisa ni kumitusa kuba ni lizwalo lelinde fapilaa Mulimu. Libaka lelituna hamuswanela kuikatulela kukolobezwa kikuli mwalata Jehova Mulimu. Hape muswanela kulumela ka pilu yamina kaufela litaba za niti zemuitutile ka za Ndate, Mwana, ni moya okenile. Hamulaho wa kunyakisisa litaba ze kaufela, mukona kualaba cwañi puzo ye, “Kana niitukiselize kukolobezwa?”

17. Ki lika mañi zaswanela kueza mutu pili asika kolobezwa kale?

¹⁷ Haiba muikutwa kuli muitukiselize kukolobezwa, kusina kukakanya, muungile mihato yetokwahala kuli mube ni silikani sesinde ni Jehova. * Bakeñisa kuli mwaitutanga Bibele kamita, semuziba litaba zeñata ka za Jehova ni Jesu. Semunani tumelo. (Maheb. 11:6) Munani tumelo ya kuli lisepiso kaufela zalufile Jehova mwa Bibele likatalelezwa luli, mi mwalumela kuli kuba ni tumelo mwa sitabelo sa Jesu kwakona kumiliulula kwa sibi ni lifu. Mubakezi libi zamina; muikutwa hahulu bumaswe kabakala lika zemaswe zene muezize, mi mukupile Jehova kuli amiswalele. Muezize licinceho mwa bupilo bwamina; mutuhezi kueza lika zemaswe zene muezanga mi mukalile kupila ka nzila yetabisa Mulimu. (Lik. 3:19) Mutabela kubulelela babañwi litaba zemulumela. Mufitile ku zekonisa kuli mube muhasanyi yasika kolobezwa mi mukalile kukutaza ni puteho. (Mat. 24:14) Jehova wamikatelwa kabakala kuunga mihato ya butokwa yeo. Mutabisize hahulu pilu yahae.—Liprov. 27:11.

18. Ki lika mañi zeñwi zemuswanela kueza pili musika kolobezwa kale?

¹⁸ Kunani lika zeñwi lisikai zemuswanela kueza pili musika kolobezwa kale. Sina mose lunyakisiselize mwa taba ye, muswanela kuineela ku Mulimu. Mulapele ku yena kuzwelela kwatasaa pilu inze muli kwa mukunda, mi mumusepise kuli mukaeza tato yahae mwa bupilo bwamina kaufela. (1 Pit. 4:2) Kihona cwale mukazibisa muswalisanisi wa sitopa sa baana-bahulu kuli mubata kukolobezwa. Ukalukisa kuli baana-bahulu babañwi bakopane ni mina. Musike mwasaba kukopana ni bona. Muhupule kuli mizwale bao bamiziba mi bamilata. Bakabuisana ni mina litaba za makalelo za mwa Bibele zene muitutile. Babata kuikolwisisa kuli mwaziba hande litaba zeo mi mwautwisisa butokwa bwa kuineela ni kukolobezwa. Haiba balemuha kuli muitukiselize, baka mitaluseza kuli mwakona kukolobezwa fa  mukopano wa mupotoloho kamba mukopano omutuna omukaba ni ona.

19-20. Ki lika mañi zemuswanela kueza hase mukolobelizwe, mi mukona kueza cwañi cwalo?

¹⁹ Ki lika mañi zemuswanela kueza hase mukolobelizwe? * Muhupule kuli hamuineela ku Jehova, muitamile ku yena mi ubata kuli mutaleleze buitamo bo. Kacwalo, hase mukolobelizwe, muswanela kueza sina mone muitamezi. Mukona kueza cwañi cwalo?

²⁰ Muzwelepili kuswalisana ni puteho yemuli ku yona. Hamuka kolobezwa, mukaba mwa “kopano ya mizwale.” (1 Pit. 2:17) Mizwale ni likaizeli bamina mwa puteho bakaba lubasi lwamina lwa kwa moya. Haiba muzwelapili kufumaneha kwa mikopano ya puteho, silikani samina ni bona sikatiya. Mubalange Linzwi la Mulimu zazi ni zazi ni kunahanisisa zemubala. (Samu 1:1, 2) Hamulaho wa kubala taba yeñwi mwa Bibele, mubange ni nako ya kunahanisisa zemubalile. Haiba mueza cwalo, litaba zemubalile lika mifita kwa pilu. “Muzwelepili kulapela.” (Mat. 26:41) Kulapelanga ku Jehova kuzwelela kwatasaa pilu kukatahisa kuli mube bukaufi ni yena. “Muzwelepili kubata pili Mubuso.” (Mat. 6:33) Mukona kueza cwalo ka kuunga musebezi wa kukutaza kuba wa butokwa hahulu mwa bupilo bwamina. Haiba muyanga mwa bukombwa kamita, tumelo yamina ikatiya, mi mukatusa babañwi kuziba niti kuli babe ni sepo ya kufumana bupilo bobusa feli.—1 Tim. 4:16.

21. Kolobezo ikona kumitahiseza limbuyoti mañi?

²¹ Haiba muikatulezi kuineela ku Jehova ni kukolobezwa, uzibe muezize katulo ya butokwa hahulu mwa bupilo bwamina. Ki niti kuli mutokwa kuitoboha lika zeñwi kuli mueze cwalo. Kono kana luli mwaswanela kuunga muhato wo? Eni! Miinelo kaufela yetaata yemukona kukopana ni yona mwa lifasi lakale le ki ya “nakonyana feela mi ibubebe.” (2 Makor. 4:17) Kono kolobezo yamina ika mitusa kupila bupilo bobunde hahulu ka nako ya cwale ni kumitusa kufumana “bupilo sakata” kwapili. (1 Tim. 6:19) Kacwalo, haike munahanisise ka tokomelo ni kulapela ka za kalabo yamina kwa puzo ye, “Kana niitukiselize kukolobezwa?”