1. Chumanyi chatela kwilayi muntu henohu kanda yatachiki kutuña itala?

FWIKIJENU hadi muntu wunakukeña kutuña itala. Welukaña itala dinakukeña kutuñayi. Komana wukushikena kuya nakulanda yuma yinakukeñeka nakutachika kutuña? Inehi. Henohu kanda yatachiki, wukusambila kushakama nakuchinda mali anateli kwiñila kwitala. Muloñadi? Kulonda yeluki neyi chakwila wudi namali atela kumanisha itala. Neyi yachindila chadimu mali, wukumanisha chiwahi itala.

2. Kwesekeja naLuka 14:27-30, yumanyi yimwatela kutoñojokahu chikupu henohu kanda mupapatishewi?

² Komana kukeña kumwamukeña Yehova nikusakilila hayuma yinayililiyi kunayileñeli kufuukulahu kupapatishewa? Neyi dimu, mwatela kwila neyi ona iyala wunakukeña kutuña itala. Muloñadi chitunahosheli mwenimu? Talenu mazu ahosheliyi Yesu adi haLuka 14:27-30. (Tañenu.) Yesu wahosheleña chichalumbuluka kwikala kambanji kindi. Hakwila twikali kambanji kindi, twatela kwiteja kuumika kukala kwejima nikuleka yuma yikwawu. (Luka 9:23-26; 12:51-53) Henohu kanda mupapatishewi, mwatela kutoñojoka chikupu hayuma yinabombelimu. Kufumahu chakayikwasha kutwalekahu kumukalakela Nzambi nakashinshi hanyima yachipapatishu.

3. Yumanyi yitukuhanjeka muchinu chibaaba?

³ Komana kwikala kambanji kaKristu kwalema kubadika kukala kumukuumikaña niyuma yimwatela kushiya? Eña! Muntu neyi yapapatishewa wukudiluñishaña nkisu jajivulu makonu nikumbidi. Tuhanjekenu hamalwihu alema kutalisha hachipapatishu. Kwila mwenimu kukuyikwasha kwakula ilu lwihu: “Komana Nashikilimu Kupapatishewa?”

4. (a) Kudihana hichumanyi? (b) Indi ‘kudibonda’ kwashimunawu haMatewu 16:24 kwatalisha mudihi?

⁴ Kudihana hichumanyi? Henohu kanda mupapatishewi, mwatela kudihana. Neyi munakudihana, mwatela kumulejamu Yehova mukulomba chakufuma hamuchima nenu munakukeña kwila nkeñelu yindi muchihandilu chenu chejima. Kudihana kudi Yehova, ‘hikudibonda’ enu aweni. (Tañenu Matewu 16:24.) Dikwila nawu munekali dehi wambala waYehova, hikukooleka chikupu. (Rom. 14:8) Munakumuleja nenu kufuma ifuku dalelu, mukusha hohu muchima hakumukalakela bayi kuditiyisha enu aweni kuwahaku. Kudihana hikukana, hichikaninu chakanañayi muntu kudi Nzambi. Yehova hatukanjikijaña kumukanaku. Ilaña neyi tunakani twatela kwilamu.—Mas. 116:12, 14.

5. Kudihana kwendelaña ñahi hamu nachipapatishu?

⁵ Kudihana kwendelaña ñahi hamu nachipapatishu? Neyi muntu nakudihana halwindi; kwosi watela kwiluka chiña yena hohu naYehova. Chipapatishu chekalaña hatooka; chekalaña hadi antu amavulu, sweje-e hakupompa kwañinza hela kweluña. Neyi mupapatishewa, chamwekeshaña kudi antu nawu mwadihana dehi kudi Yehova. * Dichi chipapatishu chenu chikuletesha antu kwiluka nawu mwamukeña Yehova Nzambi yenu namuchima wenu wejima, nawumi wenu wejima, nayitoñojoka yenu yejima ninañovu jenu jejima nawa munakufwila kumukalakela haya nyaaka.—Maku 12:30.

6-7. Kwesekeja na 1 Petulu 3:18-22, muloñadi chitwatela kupapatishewela?

⁶ Komana chalema kupapatishewa? Shinshikenu mazu ekala ha 1 Petulu 3:18-22. (Tañenu.) Neyi chamwekesheli watu nawu Nowa wadiña nachikuhwelelu, chipapatishu nichena chamwekeshaña kudi antu nawu mwadihana kudi Yehova. Komana chipapatishu mwalala chalema? Eña chalema. Petulu walumbulwili chichalemena. Chatachi, “chinakuyamwina enu.” Chipapatishu chinateli kutwamwina neyi tumwekesha netu twamukuhwelela Yesu nawa netu watufwilili, amusañwili nakuya mwiwulu nawa chayinu mpinji “wudi kuchikasa chaNzambi chachidiilu.”

⁷ Chamuchiyedi, chipapatishu chatukwashaña kwikala ‘nachinleji chamuchima chachiwahi.’ Neyi tudihana kudi Nzambi nawa tupapatishewa, twekalaña nawubwambu wadimena nayena. Muloña wakwila tunaleki nshidi jetu nawa tunakuhweleli mwifutu danyiloña, Nzambi wukutwanakena nshidi jetu. Dichi tukwikala nachinleji chamuchima chachiwahi kumesu indi.

8. Yumanyi yatela kuyiletesha mufuukulihu kupapatishewa?

⁸ Yumanyi yatela kuyiletesha mufuukulihu kupapatishewa? Hamuloña wakudiza Bayibolu muneluki yuma yayivulu hadi Yehova, chekalayi nichelañayi yuma. Yuma yimuneluki hadi yena yinasañumuni nyichima yenu nawa yinayileteshi kumukeña nankashi. Kukeña kumwamukeña Yehova dikunateli kuyiletesha kupapatishewa.

9. Neyi chinahoshiwu haMatewu 28:19, 20, kupapatishewa mwijina daTata nidaMwana nidaspiritu yajila kwatalisha mudihi?

⁹ Chuma chinaleteshi mufuukulihu kupapatishewa, chidi chakwila nawu muneteji chalala chamuBayibolu. Shinshikenu yuma yahosheliyi Yesu hahanineñayi lushimbi lwakwilisha atumbanji. (Tañenu Matewu 28:19, 20) Kwesekeja nachahosheliyi Yesu, ejima anakupapatishewa atela kupapatishewa “mwijina daTata nidaMwana  nidaspiritu yajila.” Chumichi chatalisha mudihi? Mwatela kukuhwelela namuchima wenu wejima chalala chamuBayibolu kutalisha hadi Yehova; Mwanindi, Yesu; nispiritu yajila. Ichi chalala chikweti ñovu nawa chinateli kuyishika hamuchima. (Heb. 4:12) Tuhitulukenu muniyi nsañu.

10-11. Chalalanyi chahosha hadi Tata chimunadizi nikwiteja?

¹⁰ Toñojokenu hampinji yimwadizili ichi chalala hadi Tata: Ijina ‘dindi diyi Yehova,’ diyi “Mukwakubadika heseki dejima,” nawa yena kanka windi hohu “diyi Nzambi walala.” (Mas. 83:18; Isa. 37:16. NWT) Diyi Nleñi yetu nawa “wamwinu wambala waYehova.” (Mas. 3:8; 36:9) Waloñesha njila yakutwamwinamu kunshidi nikufwa nawa watwinka kuchiñeja kwawumi wahaya nyaaka. (Yow. 17:3) Neyi mudihana nawa mupapatishewa akuyiluka nawu mudi Chinsahu chaYehova. (Isa. 43:10-12) Mukwikala hakachi kawakwakudifukula atiyaña kuwaha kuyitambika hejina daNzambi nawa aditiyakeshaña kudi antu amakwawu.—Mas. 86:12.

¹¹ Hikukooleka kwakweni kwiluka chahosha Bayibolu hadi Tata. Neyi mukuhwelela ichi chalala, chikuyileñela kudihana kudi Yehova nikupapatishewa.

12-13. Chalalanyi chimunadizi nikwiteja hadi Mwana?

¹² Mwelili ñahi chimwadizili ichi chalala kutalisha hadi Mwana? Yesu diyi muntu walema wamuchiyedi mukuleña kwejima. Diyi Nkuuli yetu. Wahanini wumi windi kukoola etu. Neyi tumwekesha muyilwilu yetu netu twakuhwelela mwifutu danyiloña, akutwanakena nshidi jetu, tukwikala amabwambu jaNzambi nawa twakekala nawumi wahaya nyaaka. (Yow. 3:16) Yesu diyi Kapristu Muneni itukweti. Nakukeña kutukwasha kulonda tuheteli mwifutu danyiloña nikwikala nawubwambu wakola naNzambi. (Heb. 4:15; 7:24, 25) Chineli diyi Mwanta waWanta waNzambi, mudi yena dimwakajilikilayi Yehova ijina Dindi, kumanisha kutama nikuleta nkisu yahaya nyaaka muParadisa yinakwinza. (Mat. 6:9, 10; Chim. 11:15) Yesu diyi chakutalilahu chetu. (1 Pet. 2:21) Watwimikila chakutalilahu kuhitila mukuzatisha wumi windi hakwila nkeñelu yaNzambi.—Yow. 4:34.

¹³ Neyi mwiteja yuma yadizishaña Bayibolu kutalisha hadi Yesu, mukumukeña chikupu Mwana kaNzambi akeñayi. Iku kukeña kukuyiletesha kuzatisha wumi wenu kulonda mwileña nkeñelu yaNzambi neyi cheliliyi Yesu. Chikufumamu, mukufwila chikupu kudihana kudi Yehova nikupapatishewa.

14-15. Chalalanyi chimunadizi nikwiteja kutalisha haspiritu yajila?

¹⁴ Mwelili ñahi chimwadizili ichi chalala kutalisha hadi spiritu yajila? Spiritu yajila himuntuku, ilaña hiñovu yaNzambi yazatikaña. Yehova wazatishili spiritu yindi yajila hakwonena amayala asonekeli Bayibolu nawa spiritu yajila yatukwashaña kutiyishisha nikuzatisha yuma yitunakudiza muBayibolu. (Yow. 14:26; 2 Pet. 1:21) Kuhitila muspiritu yindi yajila, Yehova watwinkaña “ñovu yabadika hañovu jawantu.” (2 Kor. 4:7) Spiritu yatwinkaña ñovu yakushimwina nsañu yayiwahi, kutondolwela kweseka, chineñi nikuumika kukala. Yatukwashaña kumwekesha yilwilu yayiwahi ‘yanyikabu yaspiritu.’ (Ñal. 5:22) Nzambi wenkaña antu amukuhwelela nawa amulombaña spiritu yindi.—Luka 11:13.

¹⁵ Twatiyaña kuwaha kwiluka netu akwakudifukula aYehova anateli kushindamena haspiritu yajila kulonda yiyikwashi kumukalakela Nzambi. Neyi mwiteja ichi chalala chimunadizi kutalisha haspiritu yajila chikuyileñela kudihana kudi Nzambi nikupapatishewa.

16. Yumanyi yitunadizi haniyi nsañu?

 ¹⁶ Neyi mufuukulahu kudihana kudi Nzambi nakupapatishewa dikwila nawu muneli chuma chalema nankashi. Neyi chitunadizi, mwatela kwiteja kuumika kukala kwejima nikuleka yuma yikwawu. Ilaña nkisu yimukutambwila yinabadiki yuma yejima yimukuleka. Chipapatishu chinateli kuyamwina nawa chikuyiletesha kwikala nachinleji chachiwahi kumesu aNzambi. Chuma chacheni chinateli kuyiletesha kupapatishewa hikumukeña Yehova Nzambi yenu. Mwatela cheñi kukuhwelela namuchima wenu wejima chalala chimunadizi kutalisha hadi Tata, Mwana nispiritu yajila. Hanyima yakushinshika yuma yitunadizi, munateli kwakula ñahi ilu lwihu, “Komana nashikilimu kupapatishewa?”

17. Yumanyi yatela kwilayi muntu henohu kanda yapapatishewi?

¹⁷ Neyi mumona nenu munashikihu kupapatishewa, chakadi nikujina mwela dehi yuma yayivulu yinateli kuyikwasha kukolesha wubwambu wenu naYehova. * Chineli mwadizaña Bayibolu mpinji yejima, munamwiluki Yehova niYesu. Munekali nachikuhwelelu. (Heb. 11:6) Munakuhweleli chikupu muyikaninu yaYehova yekala muBayibolu nawa muneluki chikupu nenu chikuhwelelu chenu mudi Yesu chinateli kuyamwina kunshidi nikukufwa. Munaleki nshidi jenu, nawa munadanakeni chikupu hayuma yatama yejima yimwakoñeli nawa munamulombi Yehova nenu yayanakeni. Nawa munaleki yilwilu yenu yatama yakunyima nawa munatachiki kwila yuma yamuzañaleshaña Nzambi. (Yilw. 3:19) Munakufwila chikupu kulejaku akwenu yuma yimwakuhwelela. Munashikihu kwikala mukwakushimwina wabula kupapatishewa nawa munatachiki kushimwina hamu nachipompelu. (Mat. 24:14) Yehova nazañalali muloña muneli iyi yuma yejima. Munamuzañaleshi chikupu.—Yish. 27:11.

18. Yumanyi yikwawu yimwatela kwila henohu kanda mupapatishewi?

¹⁸ Henohu kanda mupapatishewi kudi yuma yantesha yimwatela kwila. Neyi chitwadiza hakusambila, mwatela kudihana kudi Nzambi. Mulombenu kwakankawenu chakufuma hamuchima nawa mukanenu nenu mukwilaña nkeñelu yindi muchihandilu chenu chejima. (1 Pet. 4:2) Kuhiñahu dinu, lejenu nloñeshi wezanvu dawakulumpi nenu munakukeña kupapatishewa. Wukuleja akulumpi amakwawu kulonda mukahanjeki nawu. Mwani bayi mutiya woma kudimona nawuku. Awa amanakwetu ayiluka dehi nawa ayikeña. Akuhituluka nenu hachalala chamuBayibolu chimunadizi dehi. Anakukeña kwiluka neyi mwatiyishishili chikupu yuma yatañishaña Bayibolu nawa anakukeña mwiluki  kulema kwakudihana nichipapatishu. Neyi eteja nawu munashikihu, akuyileja nawu mukapapatishewa hakupompa kwañinza hela kweluña kukalondelahu.

19-20. Yumanyi yimwatela kwila neyi munapapatishewi dehi, nawa munateli kwila ñahi mwenimu?

¹⁹ Neyi munapapatishewi dehi, yumanyi yimwatela kwila? * Mwatela kwanuka nenu kudihana hichikaninu nawa Yehova nakukeña nindi mwili mumwakanini. Dichi neyi munapapatishewi dehi mwatela kuhemba chikaninu chenu. Munateli kwila ñahi mwenimu?

²⁰ Kundamenu kwakwihi nachipompelu. Chimunekali mukwaKristu wapapatishewa munekali dehi hakachi ‘kawamanakwetu ejima.’ (1 Pet. 2:17) Amanakwenu niahela muchipompelu anekali chisaka chenu chakuspiritu. Neyi mupompaña mpinji yejima, wubwambu wenu nawena wukukola. Tañenuña Izu daNzambi nikutoñojokahu chikupu mpinji yejima. (Mas. 1:1, 2) Neyi munatañi Bayibolu, ikalenuña nampinji yakutoñojoka chikupu hayuma yimunatañi. Nkumininaku mazu akuyishika hamuchima. ‘Twalekenuhu nakulomba.’ (Mat. 26:41) Kulomba kwenu kwakufuma hamuchima kukuyikwasha kuswina kwakwihi naYehova. “Twalekenuhu kusambila kukeña Wanta.” (Mat. 6:33) Munateli kwila mwenimu kuhitila mukulemesha nankashi mudimu wakushimwina muwumi wenu. Neyi mushimwinaña mpinji yejima, chikuhwelelu chenu chikukolelañaku nawa mukukwasha antu kwikala nakuchiñeja kwawumi wahaya nyaaka.—1 Tim. 4:16.

21. Yumanyi yikufumamu neyi mupapatishewa?

²¹ Kudihana kudi Yehova nikupapatishewa dichuma chabadika kulema hayuma yejima yimwatela kufuukula. Mwamweni, chakeñekaña kuumika kukala kwakuvulu. Komana chalema kuumika kukala kwakuvulu nikushiya yuma yimu? Eña. Kukala kwejima kumunateli kuhitamu mukanu kaayi ‘kwakapinji kantesha nawa kwapepela.’ (2 Kor. 4:17) Kwambukaku, neyi mupapatishewa mukwikala nachihandilu chachiwahi chayinu mpinji ‘niwumi walala’ wunakwinza kumbidi. (1 Tim. 6:19) Dichi mwani, toñojokenuhu chikupu nikulombelahu hañakwilu yimukuhana hanilu lwihu, “Komana nashikilimu kupapatishewa?”