1. Ta na ruma do se haginia neganai dahaka baine kara guna?

MANI e uramu ruma ta baine haginia tauna aita laloa. Ia na mai dibana ia be ruma ede bamona ta baine haginia. To ia be maoromaoro bainela ruma kohudia baine hoi bena ruma baine haginia, eiava? Lasi. Ḡau ta do se karaia neganai, ḡau badana na baine haeroa ia be moni hida be negemu. Dahaka dainai? Badina unu amo be dibamu bema iena moni na heḡereḡere ruma ibounai baine haginia. Ruma do se haginia lalonai, be negeamu monina be haeroa namonamomu neganai ena ruma ibounai na baine haginia diba.

2. Luka 14:27-30 ena hereva heḡereḡerena, do so bapatiso lalonai ba haerodia guna ḡaudia be dahaka?

² Iehova o lalokau heniamu dainai o uramu ba bapatiso, a? Bema oibe, oi na una ruma e uramu baine haginia tauna heḡereḡerena abi hidi badana ta bo karaiamu. Dahaka dainai unu ta gwau tomamu? Mani Iesu ena hereva Luka 14:27-30 ai ba laloa. (Ba duahi.) Iesu na iena hahediba ai baitala anina e herevalaia. Bema ita na ta uramu ia murinai baita raka, namona na hekwakwanai baita haheaukalai bona ḡau haida baita dadarai. (Luka 9:23-26; 12:51-53) Una dainai do so bapatiso lalonai, namona na Keriso ena hahediba ai bo laomu neganai emu ai be varamu ḡaudia na ba haerodia. Una ese oi na be durumumu bapatiso murinai mai emu abidadama ida Dirava bo hesiai heniamu.

3. Ina atikol ai dahaka baita herevalaimu?

³ Oi na hekwakwanai o haheaukalai bona ḡau haida o dadarai, unu amo bapatiso o abi bena Keriso ena hahediba ai ola, to una be mai hahenamona, a? Oibe. Bapatiso ese dala be kehoamu hahenamo momo bo davarimu, hari bona vaira negai danu. Mani bapatiso dainai e varamu henanadaidia haida aita herevalai. Oiemu haere ese be durumu ina henanadai, “Lau be  heḡereḡere baina bapatiso totona, a?” bo haerelaiamu.

4. (a) Gwauhamata anina be dahaka? (b) Mataio 16:24 heḡereḡerena ta sibona baine “hedadarai” anina be dahaka?

⁴ Gwauhamata anina be dahaka? Oi do so bapatiso neganai, namona na ba gwauhamata. Anina na mai kudoumu idoinai ida Iehova ba ḡuriḡuri henia bona ba hamaoroa emu mauri na bo ḡaukaralaiamu ia ba hesiai henia hanaihanai totona. Una neganai oi na o hahedinaraiamu oi na sibomu o ‘hedadaraimu.’ (Mataio 16:24 ba duahia.) Una dainai oi na da Iehova ena bona una na hahenamo badana. (Roma 14:8) Oi na ia o hamaoroamu hari amo ia ihesiai henina karana na emu mauri ai ḡau ginigunana ai bo halaoamu to dia oi sibomu emu ura. Emu mauri Dirava enai o gwauhamatalaia neganai, una na gwauhamata badana. Iehova ese ita na se doridamu unu baita kara toma. To, bema gwauhamata ta ta karaiamu, Ia na e uramu una na baita haḡuḡurua.​—Sal. 116:12, 14.

5. Gwauhamata bona bapatiso edia idau be dahaka?

⁵ Gwauhamata bona bapatiso edia idau be dahaka? Emu gwauhamata na oi sibomu ese ba karaia ḡauna, una na oi bona Iehova padamuiai. To, bapatiso be taunimanima vairadiai ba karaia ḡauna, nega momo una na hebouhebou ai e varamu. O bapatisomu neganai, ma haida vairadiai o hahedinaraiamu oi ese Iehova na vada o gwauhamata henia. * Bona emu bapatiso ese ma haida e hadibadiamu oi na mai kudoumu, lalomu, daramu, bona goadamu idoinai ida Iehova emu Dirava o lalokau heniamu bona lalomu o hadaia Ia ba hesiai henia hanaihanai.​—Mar. 12:30.

6-7. Petro Ginigunana 3:18-22 ai, ededia badi rua ese e hahedinaraimu bapatiso na mai anina bada?

⁶ Ta baine bapatiso be mai anina, eiava? Petro Ginigunana 3:18-22 ai e hetore herevadia mani aita lalo. (Ba duahi.) Taunimanima ese lagatoi e itaia neganai e diba Noa na mai ena abidadama, una heḡereḡerena emu bapatiso karana ese taunimanima be hadibadiamu emu mauri na Iehova enai vada o gwauhamatalaia. To, bapatiso be mai anina, eiava? Oibe. Petero ese badi rua e herevalai. Ginigunana na, bapatiso ese ‘e hamaurimumu.’ Bapatiso ese baine hamaurida diba bema eda kara amo baita hahedinaraia ita na Iesu ta abidadama heniamu bona ta abia daemu ia na ita daidai e mase, e toreisi lou bona guba ai “Dirava idibana kahana ai e helaimu.”

⁷ Iharuana na, bapatiso na “lalomui ihaḡoevadia.” Dirava ta gwauhamata heniamu bona ta bapatisomu neganai, ita na Dirava turana ai ta laomu. Mai kudouda idoinai ida ta helalo-kerehai bona mauri idavalaina boubouna ta abidadama henia dainai, Dirava ese eda kara dika na e gwautao. Una dainai Ia vairanai laloda na e ḡoeva.

8. Oi ba bapatiso badina badana be dahaka?

⁸ Oi o uramu ba bapatiso badina badana be dahaka? Oi na Baibul o stadilaia namonamo amo Iehova ena kara bona ena dala o dibadia. O diba ḡaudia daidiai o moale bona Ia o lalokau henia bada. Oi ba bapatiso badina badana na Iehova o lalokau heniamu dainai.

9. Mataio 28:19, 20 ena hereva, “Tamana, Natuna, Lauma Helaḡa ladana ai” ba bapatiso anina be dahaka?

⁹ Oi ba bapatiso badina ma ta na, oi na Baibul ese e herevalaimu herevadia o dibadia bona o abi dae. Mani Iesu ena haheḡani, taunimanima na hahediba ai ba halaodia aita laloa. (Mataio 28:19, 20 ba duahi.) Una haheḡani lalonai e hahedinaraia, namona na bapatiso e abimu taudia na “Tamana, Natuna, Lauma Helaḡa ladana  ai” bae bapatiso. Iena hereva anina be dahaka? Namona na mai kudoumu idoinai ida Baibul ese Iehova, Natuna Iesu, bona lauma helaḡa e herevalaidiamu daladia na bavabi dae. Unu na mai anidia bada bona oi na bae durumu diba. (Heb. 4:12) Mani haida aita herevalai.

10-11. Baibul ese Tamana o Tamada be ede e herevalaia toma bona una na o abia daemu?

¹⁰ Mani Baibul amo Tamana o Tamada o dibaia matama negana a laloa: Ia ladana na “Iehova,” ia na “Herea Mikamika, tanobada idoinai daenai,” bona ia mo sibona “Dirava korikorina.” (Sal. 83:18; Ier. 10:10) Ia na ita e Havarada Tauna, bona “hahemauri na Iehova ena amo e maimu.” (Sal. 3:8; 36:9) Ia ese dala e kehoa kara dika bona mase amo baine hamaurida bona mauri hanaihanai helarona danu e henida. (Ioa. 17:3) Emu gwauhamata bona bapatiso karana amo be hedinaraimu oi na Iehova ena Witnes tauna ta. (Isa. 43:10-12) Unu amo oi na tanobada heḡeḡemadai Dirava ladana e nemaia ruma besena lalonai bo vareaimu bona Dirava ladana na ma haida ba hadibalaidia.​—Sal. 86:12.

¹¹ Baibul amo Tamana o Tamada, anina ta lalopararalaiamu na hahenamo ta. Unu hereva momokanidia bo abi daemu neganai, oi na bo uramu Iehova enai emu mauri ba gwauhamatalaia bona bapatiso bavabi.

12-13. Baibul ese Natu be ede e herevalaia toma bona una na o abia daemu?

¹² Baibul amo Natuna o dibaia neganai, emu hemami be ede bamona? Iesu na iunives ibounai lalonai siahu tauna badana iharuana. Ia na eda Mauri Idavalaina Tauna. Ia na mai ena ura ida ita daidai ena mauri e heni. Bema eda kara amo baita hahedinaraiamu mauri idavalaina boubouna na ta abidadama heniamu, eda kara dika na be hegwautaomu, Dirava turana ai baita laomu, bona mauri hanaihanai baita abiamu. (Ioa. 3:16) Iesu na eda Hahelaḡa Tauna Badana. Ia na e uramu baine duruda mauri idavalaina boubouna amo namo baita abi bona baine duruda Dirava turana ai baitala totona. (Heb. 4:15; 7:24, 25) Ia na Dirava ena Basileia pavapavana dainai, ia amo Iehova ese sibona ladana be hahelaḡaiamu, kara dika be haoreamu, bona kahirakahira be varamu Paradaisona lalonai be mia hanaihanaimu hahenamodia be havaramu. (Mat. 6:9, 10; Apok. 11:15) Namona na Iesu ena haheitalai baita tohotohoa. (1 Pet. 2:21) Ia ese ena mauri na e ḡaukaralaia Dirava ena ura e karaia bona unu e kara toma neganai, ia na ita edai haheitalai namona e hahedinaraia.​—Ioa. 4:34.

¹³ Baibul ai Iesu sivaraina momokanina bo abia daemu neganai, Dirava Natuna lalokauna na bo lalokau heniamu. Una lalokau ese oi na be hagoadamumu emu mauri ba ḡaukaralaia Dirava ena ura ba karaia, Iesu e kara bamona. Bena bo hemamimu oi na heḡereḡere Iehova enai emu mauri ba gwauhamatalaia bona ba bapatiso.

14-15. Baibul ese lauma helaḡa be ede e herevalaia toma bona una na o abia daemu?

¹⁴ Baibul ai lauma helaḡa anina korikorina o dibaia neganai, emu hemami be ede bamona? Lauma helaḡa na dia tau ta, to ia na Dirava ena ḡaukara siahuna. Iehova na lauma helaḡa e ḡaukaralaia unu amo tatau haida e rohedia Baibul e torea, bona lauma helaḡa ese e durudamu Baibul ai ta duahimu ḡaudia ta lalopararalaimu. (Ioa. 14:26; 2 Pet. 1:21) Iehova ese ena lauma helaḡa amo “siahu herea-daena” e henidamu. (2 Kor. 4:7) Lauma helaḡa ese ita na e hagoadadamu sivarai namona baita harorolaia, hahetoho baita hanaidia, lalomanoka bona hedibaḡani baita haheaukalai. Bona e durudamu “lauma huahua” baita hahedinarai. (Gal. 5:22) Dirava ese ena lauma helaḡa na ia e abidadama heniamu bona mai momokanidia ida ia e noiamu taudia e henidiamu.​—Luka 11:13.

 ¹⁵ Ta dibamu Iehova e toma henia dihomu taudia na lauma helaḡa ena heduru amo Dirava bae hesiai henia diba, una ese ita na e hagoadadamu. O dibadia hereva momokanidia bo abi daemu neganai, una ese oi na be hagoadamumu Dirava enai emu mauri ba gwauhamatalaia bona bapatiso bavabi.

16. Tame herevalai ḡaudia amo dahaka tame diba?

¹⁶ Bema oi na o uramu emu mauri na Dirava enai ba gwauhamatalaia bona ba bapatiso, una na abi hidi badana. Matamanai tame herevalaia heḡereḡerena, namona na oi na ba heḡaeḡae bae vara hekwakwanaidia ba haheaukalai bona ḡau haida ba dadarai. To, bo abimu hahenamodia ese o dadarai ḡaudia na e hereadia. Bapatiso ese oi na baine hamaurimu, bona unu amo Dirava vairanai lalo mamina namona bavabia diba. Namona na bapatiso bavabi badina korikorina na, Iehova Dirava o lalokau heniamu. Baibul ese Tamana, Natuna, bona lauma helaḡa e herevalaidia daladia na mai kudoumu idoinai ida bavabi dae. Tame herevalai ḡaudia bo haerodiamu murinai, ina henanadai, “Lau be heḡereḡere baina bapatiso totona, a?” be ede bo haerelaia tomamu?

17. Ta na do se bapatiso neganai baine kara ḡaudia be dahaka?

¹⁷ Bema o hemamimu oi na heḡereḡere bapatiso bavabi, oi na readia ḡau momo vada o kara emu hetura karana Iehova ida ba hagoadaia totona. * Baibul o stadilaia hanaihanaimu dainai, Iehova bona Iesu daidiai ḡau momo vada o diba. Una ese e hahedinaraiamu oi na mai emu abidadama. (Heb. 11:6) Oi ese Iehova ena gwauhamata Baibul ai e herevalai ḡaudia na o abi dae momokanimu, bona o abia daemu Iesu ena mauri idavalaina boubouna iabidadama henina karana ese oi na kara dika bona mase amo baine hamaurimu diba. Emu kara dika amo o helalo-kerehai, anina na emu kara dikadia daidiai o sori, bona Iehova o noia emu dika baine gwautao. Emu mauri na o haidaua, anina na emu mauri gunana o dadaraia bona Dirava ese e moalelaiamu mauri dalana o badinaiamu. (Apos. 3:19) Oi na o ura emu abidadama na ma haida ediai ba herevalaia. Una dainai, oi na o heḡereḡere bapatiso lasi pablisa ai ola bona kongrigeisin taudia ida haroro ḡaukarana o karaia matama. (Mat. 24:14) Unu o kara toma dainai Iehova ese oi na e lalonamo henimumu. Momokani, oi ese ia kudouna na o hamoalea bada.​—Her. 27:11.

18. Do so bapatiso neganai, ededia ḡau ma haida ba kara guna na namo?

¹⁸ Do so bapatiso neganai, namona na ḡau ma haida danu ba kara guna. Matamanai tame herevalai heḡereḡerena, Dirava enai oi sibomu emu mauri ba gwauhamatalaia guna. Oi sibomu emu ḡuriḡuri lalonai ia ba hereva henia, bona ba gwauhamata henia oi na emu mauri bo ḡaukaralaiamu iena ura ba karaia totona. (1 Pet. 4:2) Bena elda oreana edia kodineita ba hadibaia, oi na o uramu bapatiso bavabi. Ia ese elda ma haida be noidiamu oi ida ba herevahereva  totona. Bema elda ma haida na oi bae hereva henimu, mani emu kara basio gari. Badina idia na mai dibadia oi bona idia ese oi na e lalokau henimumu. Oi ese o dibadia Baibul ena hereva badadia na idia ida bo riviulaimu. Idia na e uramu bae diba oi ese unu hahediba herevadia o lalopararalaimu eiava bona e uramu bae diba danu gwauhamata bona bapatiso anidia o lalopararalaimu eiava. Bema idia na be itaiamu oi na heḡereḡere, idia ese be hadibamumu hebouhebou ta ai ba bapatiso totona.

19-20. Emu bapatiso murinai dahaka ba kara, bona edena dalai unu ba kara toma?

¹⁹ Emu bapatiso murinai, ba kara ḡaudia be dahaka? * Ba helalotao gwauhamata na Iehova enai o karaiamu ḡauna bona ia na e uramu una na ba hamomokania. Una dainai o bapatisomu murinai, o karaia gwauhamatana na ba hamomokania. Edena dalai unu ba kara toma?

²⁰ Emu kongrigeisin tadikaka taihu ba bamodia. Oi na da bapatiso Kristen ta dainai, oi na da “iseda orea” tauna ta. (1 Pet. 2:17) Emu kongrigeisin ai tadikaka taihu na vaitani emu ruma bese ta lauma dalanai. Hanaihanai hebou bo laomu neganai, emu hetura karana idia ida na bo hagoadaiamu. Dina iboudiai Dirava ena Hereva ba duahia bona ba laloa dobu. (Sal. 1:1, 2) Baibul sirina ta o duahiamu murinai, nega bavato o duahiamu ḡauna ba laloa dobu. Unu amo o duahiamu ḡauna na bo moalelaiamu. “Ba ḡuriḡuri” hanaihanai. (Mat. 26:41) Mai lalomu idoinai ida bo ḡuriḡurimu neganai, Iehova turana ai bo laomu. Hanaihanai ‘Basileia . . . ba tahua guna.’ (Mat. 6:33) Anina na emu mauri lalonai haroro ḡaukarana bavatoa guna. Haroro ḡaukarana bo karaia hanaihanaimu neganai, emu abidadama na be goadamu, bona ma haida bo durudiamu mauri hanaihanai bae abia helaoreana.​—1 Tim. 4:16.

21. Emu bapatiso karana ese dahaka namo be havaraiamu?

²¹ Iehova enai o karaia gwauhamatana bona bapatiso o abi karana na emu mauri ibounai lalonai o karaia mai anina bada abi hidina. Vaia, hekwakwanai na baita davarimu bona ḡau haida baita dadarai na namo. To, una abi hidi be mai hahenamona, a? Oibe. Ina tanobada dikana ai ta davarimu hekwakwanaidia na ‘asi metaudia bona asi vanahana ḡaudia.’ (2 Kor. 4:17) Badina, emu bapatiso karana ese dala be kehoamu hari emu mauri bo moalelaiamu bona vaira negai “mauri korikori” bo abiamu. (1 Tim. 6:19) Una dainai, mani emu kara ina henanadai, “Lau be heḡereḡere baina bapatiso eiava?” haerena na ba lalohadailaia namonamo bona ba ḡuriḡurilaia.