MWAHA WOOSOMIYA 11
Uheetthenkaca wiira upattisiye?
‘Upattisiya ciicammo unaawoopolani.’—1 PET. 3:21.
NCIPO 28 Quem Pode Ser Amigo de Jeová?
NINHALA WIITTHUCANI? *
1. Isiyani ntthu inlamuliyaawe upanka hinaaya wancera uteka inupa?
UMUUPUWELE ntthu mpheela uteka inupaawe. Uyo hoopuwela inannani yonupa impheelaawe uteka. Masi niireke uyo naahala wowaakuvya ukela nlooca, uthuma ikaruma coopheela utekela ni wancera uteka? Mena. Hinaaya wancera uteka, uyo ntthuuyo haana apacaka upanka itthu yofayita: wuupuwela nsurukhu unhalaawe urihakaca atekaka iyo inupeeyo. Kontha isiyani? Kontha uyo haana acuwelaka wakhala wiira nsurukhu urinaawe unaahala utosera awula mena. Ntthuuyo apacaka wonkoma ni wuupuwela nsurukhu unhalaawe urihakaca, khunhala unrika umaliha inupa impheelaawe uteka.
2. Toko cinthoonyeraaya Luka 14:27-30, isiyani weeva inlamuliyaa wuupuwela ratta uhinaaya upattisiya?
2 Weeva unnoopuwelaka upattisiya? Unfenta ni unsukhuru Yehova atthunaka phinwiiriha upheela upattisiya. Khweeliini, ntthu nlakela upattisiya naalattanaca ni ntthu nlakela uteka inupa. Toko cani? Wuupuwele itthu Yesu yuulumalyaawe nhina Luka 14:27-30. * (Usome.) Yesu aawiitthuciha atthu isiyani yaalamuliyaaya upanka wiira akhale attharyaawe. Hiiva napheelaka ukhala attharyaawe, nihaana naaminiki uliva “ihisapu” awula iperesu. Iyo ipereswiiyo akhanle marikariko anhala uniphwanya ni ciicammo cikhanle citthu cinhaleehu uleva nlattu wookhala atthari a Yesu. (Luka 9:23-26; 12:51-53) Phimaana, uhinaaya upattisiya, weeva uhaana wuupuwelaka ratta ukhala ntthari a Kristu maanaaya isiyani. Wuupuwela iyo, unaahala wuukavihera wiitthenkaca saana wiira uhirwee uhiya unswalela Nluku ukati unhalaa ukhala nkristau oopattisiya.
3. Isiyani inhaleehu wiitthuca nhina ula mwahoola?
3 Uliva ihisapu awula iperesu wiira ukhale ntthari a Kristu, niikere unaahala khweeliini wuuphwanyiha ifayita? Iyee, unaahala uphwanyera ifayita! Upattisiya unawuuhulela mikhora wiira waakhele iparakha cinci—nenna va ni wahoolo. Nhina ula mwahoola, ninaahala waakhula makoho moolupale nhina upattisiya. Noopelaka mwaha ayo makohwaayo, weeva unaahala ucuwela waakhula nna nikohonna: “Kiheetthenkaca wiira kipattisiye?”
ISIYANI INLAMULIYAA UCUWELA NHINA WIIVAHERERA NI UPATTISIYA?
4. a) Wiivaherera isiyani? b) Nuulumo ‘wiikhotta’ nihimiye nhina Matewus 16:24 maanaaya isiyani?
4 Wiivaherera isiyani? Weeva uhinaaya upattisiya, uhaana wiivahereraka wa Nluku. Masi wiivaherera isiyani? Wiivaherera unkhala ulompa unhimyeraka Yehova wiira weeva unaavaha ukumyaa wiira unswalele Yehova mpaka. Weevaherekaka wa Yehova, weeva ‘unawiikhotta.’ (Usome Matewus 16:24. *) Weeva unkhala ntthu a Yehova, ni iyo ikhanle iparakha yuulupale. (Aroo. 14:8) Weevahereraka, weeva ummwiirela Nluku wiira, ukhuma nna va mpaka, unhala uhoolelihera unswalela uyova, kahi uhoolelihera upanka citthu cinoocivela. Wiivaherera, ninkhala nikhuluveliho nuulupale ninompankelaa Nluku. Yehova khannikhanyereriha upanka nno nikhuluvelihonno. Masi nankhuluvelihaka, uyo nweherera wiira nipanke itthu inkhuluvelihaleehu.—Isaa. 116:12, 14.
5. Wiivaherera unvirikana cani nuupattisiya?
5 Wiivaherera unvirikana cani nuupattisiya? Wiivaherera ikhanle itthu weeva impankaa veekha, nipuro noohikhala waatthuni; unkhala weeva ni Yehova paahi. Masi upattisiya, imaara cinci unkhala waatthuni, atthunaka wanthukumanoni wosirikwiitu awula wakonkereesuni. Ukati woopattisiya, weeva unawaathoonyera atthu otheene anwoona wiira uheevaherera wa Yehova. * Coo, upattisiya unawaathoonyera akhwaa wiira weeva unanfenta Nlukwaa Yehova, ninrimaa wotheene, niirooho awula nuukumyaa wotheene, ni moopuwelelwaa otheene ni niikuru caa cotheene. Upattisiya ciicammo unthoonyera wiira weeva uholakela unswalela Nluku mpaka.—Mark. 12:30.
6-7. Toko cinhimyaaya 1 Peturu 3:18-22, citthuni piili cinthoonyera wiira upattisiya uhaana ifayita?
6 Upattisiya uhaana khweeliini ifayita? Woone itthu inhimyaaya Ibiiblya nhina 1 Peturu 3:18-22. * (Usome.) Ikalawa yaatekalyaawe Nowee yaanawaathoonyera atthu otheene wiira uyo ahaana waamini. Inanna imoca, upattisiya waa, unawaathoonyera atthu wiira weeva uheevaherera wa Yehova. Masi niikere upattisiya uhaana ifayita? Iyee, uhaana ifayita. Peturu naattonka nlattuni urinaaya ifayita. Yoopacera, upattisiya ‘unaawoopola’ weeva. Wiira upattisiya unoopole, hiiva nihaana nithoonyeraka wiira ninaamwaamini Yesu. Nihaana nathoonyeraka wiira ninaakupali wiira uyo hokhwa wiira anoopole, honwelelihiya wiira akhale wiirimu ni nna va “ri mphantte wo moono wonlopwana wa Nluku.”
7 Yonayeeli, upattisiya unaanikavihera ukhalana “nrima wootaphuwa.” Neevahereraka wa Yehova ni napattisiyaka, ninawancera umpatthanana Yehova. Ukhala wiira khweeliini nihottharuwa itampi cihu, ni ninaakupali woopoliya wihu ni Yesu, Nluku naalevelela itampi cihu. Iyo inaaniiriha hiiva ukhalana “nrima wootaphuwa” uhoolo wawe.
8. Isiyani inlamuliya uwiiriha weeva ulakela upattisiya?
8 Isiyani inlamuliya uwiiriha ulakela upattisiya? Usomaka Ibiiblya ratta-raatta, weeva uhoncuwela Yehova saana ni uheetthuca makhalelwaawe. Iyo ihoovara nrima ni ihowiiriha unfenta Nluku. Phimaana, unfenta Yehova phi itthu yuulupale inlamuliya uwiiriha ulakela upattisiya.
9. Matewus 28:19, 20 ineera wiira atthari anlamuliya upattisiya “mwancina na Athumwaane, ni na Mwaana, ni no nnepa wowaarya.” Iyo maanaaya isiyani?
9 Itthu ikhwaawe inwiiriha weeva ulakela upattisiya cikhanle ikhweeli co mbiiblyani cikupanlya. Wuupuwele itthu Yesu yoolumalyaawe ukati waarumalyaawe attharyaawe urwaa waapanka eetthuci. (Usome Matewus 28:19, 20. *) Yesu aheera wiira atthari anlamuliya upattisiya “mwancina na Athumwaane, ni na Mwaana, ni no nnepa wowaarya.” Iyo maanaaya isiyani? Maanaaya wiira weeva uhaana ukupaliki ninrimaa wotheene ikhweeli co mbiiblyani cimmuuluma Yehova, Mwanawe—khanle Yesu, ni nnepa wowaarya wa Nluku. Nnyo cikhanle ikhweeli cuulupale ni pooti ukela mpaka wanrimani waa. (Mabere. 4:12) Nttwee nuulume vakaani nnyo ikhweelinnyo.
10-11. Ikhweeliini ca Athumwanihu weeva ciitthucalyaa ni cikupanlyaa?
10 Unawuupuwela ukati wiitthucalyaa ikhweeli ca Athumwanihu? Ikhweeli toko nnya: uyo ‘ncina nawe Yehova’; uyo khanle “Nkhulupale otuninya yotheene” ni uyo paahi phiri “Nluku eekhweeli.” (Isaa. 83:18; Isai. 37:16) Uyo khanle mpattusiihu ni “woopoliya unkhuma wa Yehova.” (Isaa. 3:8; 36:9) Yehova hophwanya mananna oonoopola mmatampini ni muukhwani, ni honivaha niveherero noorwaa ukhalana ukumi woohimala uhoolo. (Joau 17:3) Weevahereraka ni wapattisiyaka, weeva unaahala uthoonyera wiira ukhanle Saahiti a Yehova. (Isai. 43:10-12) Ciicammo unaahala ukhala wamoca naamuci anonswalela Nluku ntuninyani motheene. Amuci otheene ayo unawaatteela nrima nlattu wowiihaneliya ncina na Nluku ni nlattu woowacuweliha atthu akhwaawe nno ncinanno.—Isaa. 86:12.
11 Wuupuwele iparakha irinaa yo wiiweeha itthu inhimyaaya Ibiiblya nhina Athumwanihu! Weeva wakupaliki nnyo ikhweeli cofayitannyo, nrima unaahala uwiiriha ulakela wiivaherera wa Yehova ni upattisiya.
12-13. Ikhweeliini nhina Mwaana weeva ciitthucalya ni cikupanlya?
12 Weeva wiicoonale cani wiitthuca waa ikhweeli co mbiiblyani nhina Mwaana? Yesu phiri nkhulupale onayeeli verihenle ntuninyani motheene mpaka wiirimu. Uyo khanle moopoliihu. Niiraati, uyo holeva ukumyaawe wiira anoopole. Meettelweehu yathoonyeraka wiira ninawaamini woopoliya wihu ni Yesu, matampiihu anaaleveleliya, ninaakhalana upatthani ni Nluku ni ninaaweherera waakhela ukumi woohimala. (Joau 3:16) Yesu khanle Nankhutthweehu Muulupale. Uyo naapheela uniphwanyiha iparakha cinaakheleehu nlattu wo woopoliya wihu ni naapheela unikavihera ukhalana upatthani ni Nluku. (Mabere. 4:15; 7:24, 25) Uyo khanle Mwene o Umwene wa Nluku ni phuule Yehova nhalaawe unruma ureeriha ncina nawe, umaliha uhuva ni uwaana iparakha coohimala upeephoni. (Mat. 6:9, 10; Apoka. 11:15) Yesu phintakihero nomaana ninlamuliyeehu utthara, nitakihaka meettelwaawe. (1 Pet. 2:21) Ni mananna caakhalaawe, uyo honiitthuciha wiivaherera wiira nipanke impheelaawe Nluku.—Joau 4:34.
13 Wakupaliki itthu Ibiiblya inhimyaaya nhina Yesu, weeva unawiitthuca unfenta Mwaana a Nluku. Nlattu wonfenta, weeva unaapheela uvaha ukumyaa wiira upanke impheelaawe Nluku, khampa Yesu cipankalyaawe. Iyo inawuusovenriha ulakela wiivaherera wa Yehova ni upattisiya.
14-15. Ikhweelini nhina nnepa wowaarya wa Nluku weeva ciitthucalyaa ni cikupanlyaa?
14 Woonenle cani ikhweeli ciitthucalyaa nhina nnepa wowaarya wa Nluku? Wootakihera, weeva uheetthuca wiira nnepa wowaarya wa Nluku khunakhala nlayikha, masi cikhanle ikuru ca Nluku. Yehova hovarela nteko nnepa wowaarya wiira aakavihere atthu wantikha Ibiiblya, ni uyo nnepooyo unaanikavihera wiiweeha ni weettela citthu cinsomeehu mbiiblyani. (Joau 14:26; 2 Pet. 1:21) Avarelaka nteko nnepaawe wowaarya, Yehova naanivaha “ikuru cuulupale.” (2 Akor. 4:7) Nnepa wowaarya unaanivaha ikuru wiira nikhitiri ulalyeera ihapari comaana, upanka itthu yomaana nattehattehiyaka, uvilela masukhuli ni marikariko annikhumelela. Ni ciicammo unaanikavihera uthoonyera makhalelo o “nhokorokho wo nnepa.” (Akalas. 5:22) Nluku nawaavaha nnepa wowaarya ale anonkhuluvela ni anonlepela.—Luka 11:13.
15 Unaareera cinene ucuwela wiira ale anonswalela Yehova anaakaviheriya ni nnepa wowaarya wiira answalele! Ukupali itthu ineetthucihaaya Ibiiblya nhina nnepa wowaarya, unaahala wuusovenriha wiivaherera wa Nluku ni upattisiya.
16. Isiyani yiitthucaleehu mpaka va?
16 Ulakela wiivaherera wa Nluku ni upattisiya ikhanle itthu yuulupale. Toko ciitthucaleehu, weeva walakelaka upanka iyo, uhaana ukupaliki uliva ihisapu—awula weeva uhaana ukupaliki wuukhumelela marikariko ni uleva citthu cikhwaawe. Masi iparakha cinhalaa waakhela cinaapwaha khula itthu weeva inhalaa uleva. Upattisiya pooti uwoopola ni wuukavihera ukhalana nrima wootaphuwa uhoolo wa Nluku. Unfenta Yehova Nluku phi itthu yuulupale inlamuliya uwiiriha weeva upattisiya. Uhaana ciicammo ukupaliki ninrimaa wotheene ikhweeli co mbiiblyani nhina Athumwanihu, Mwaana ni nnepa wowaarya. Wuupuwelaka citthu cotheene ciitthucaleehu mpaka va, waahala waakhula cani nna nikohonna: “Kiheetthenkaca wiira kipattisiye?”
ISIYANI INLAMULIYAA UPANKA UHINAAYA UPATTISIYA?
17. Uhimye citthu ntthu cinlamuliyaawe upanka hinaaya upattisiya.
17 Wakhala wiira uheetthenkaca wiira upattisiye, iyo maanaaya wiira cihaavo citthu weeva cipankalyaa wiira ukhale mpatthani a Yehova. * Nlattu woohihiyerera usoma Ibiiblya, weeva uheetthuca citthu cinci ca Yehova ni ca Yesu. Weeva uhokhalana waamini. (Mabere. 11:6) Unaakhuluvela inatiri ca Yehova ciri mbiiblyani ni unaakupali wiira waamini woopoliya wihu ni Yesu pooti uwoopola mmatampini ni muukhwani. Weeva uhottharuwa itampi caa, uhooriipa nrima nlattu wo citthu cootakhala caapankalyaa khalayi ni uhonlepela Yehova wiira oolevelele. Weeva uhorukunusa nrimaa, uhohiya meettelo oohinamaana yaarinaa khalayi ni uhancera ukhala ni mananna onciveliha Nluku. (Mite. 3:19) Weeva unawuutthapa nrima wiira waahimyere akhwaa citthu cinkupalyaa. Phimaana, uheekurumica wiira ukhale namalalyeera oohipattisiya ni uhancera ulalyeera wamoca ni mayamunna o wanlokoni. (Mat. 24:14) Yehova unantteela nrima cinene nlattu woowoona upankaka citthu cotheenennyo. Weeva uhontteeliha nrima venci.—Miru. 27:11.
18. Citthuni cikhwaawe weeva cinlamuliyaa upanka uhinaaya upattisiya?
18 Uhinaaya upattisiya, weeva uhaana upankaka citthu cikhwaawe. Toko ciitthucaleehu, uhaana wiivahereraka wa Nluku. Unari veekha, unlompe Yehova ninrimaa wotheene ni umwiirele wiira weeva unaavaha ukumyaa wiira upanke intthunaawe. (1 Pet. 4:2) Vano, urwee wamuulumane humu ntthenkaca mphwinko wo mahumu wanlokoni waa ni wanhimyere wiira weeva umpheela upattisiya. Uyo naahala waalepela mahumu wiira yonkome ni weeva. Uhoove. Ayo mahumwaayo anawuucuwela ni anawuufenta. Ayo anhala uwonkomana wiira yoopele mwaha citthu ciitthucalyaa mbiiblyani. Ayo ampheela ucuweleeha wakhala wiira weeva unawiiweeha citthu cineetthucihiya mbiiblyani ni wakhala wiira unaacuweleeha ifayitaaya wiivaherera ni upattisiya. Yoonaka wiira weeva khweeliini uheetthenkaca, ayo anaahala wuuhimyera wiira weeva pooti upattisiya wanthukumanoni wosirikwiitu awula wakonkereesuni inhala upankiya.
ISIYANI INLAMULIYAA UPANKA WAPATTISIYAKA?
19-20. Isiyani inlamuliyaa upanka wapattisiyaka, ni unhala upanka cani iyo?
19 Vano wapattisiyaka, isiyani inlamuliyaa upanka? * Wuupuwele wiira wiivaherera ikhanle itthu weeva inonkhuluvelihaa Yehova, ni uyo nweherera wiira weeva upanke itthu inonkhuluvelihaa. Phimaana wapattisiyaka, weeva uhaana weettelaka wiivaherera waa. Unhala upanka cani iyo?
20 Itthu yoopacera, uhihiye uviriha ukati ni mayamunna o wanlokoni waa. Wapattisiyaka, weeva unaakela mumphwinkoni muulupale wo mayamunna. (1 Pet. 2:17) Mayamunna o wanlokoni akhanle amucyaa oominepani. Waahiloveke umikutthaanoni, weeva unaahala utepa waapatthanana. Itthu yonayeeli, usome Nuulumo na Nluku khula nihuku ni wuupuwele insomaa. (Isaa. 1:1, 2) Wamalihaka usoma Ibiiblya, ukumihe ukati wiira wuupuwele cinene citthu cisomalyaa. Wapankaka commo, moolumo o mbiiblyani anaahala ukela wanrimani waa. Itthu yoneeraru, ‘ulompe woohihiyerera.’ (Mat. 26:41) Weeva wanlompaka ninrimaa wotheene, unaahala utepa umphiyeera Yehova. Itthu yoneecese, ‘upacere utotha Umwene wa Nluku.’ (Mat. 6:33) Weeva unhala upanka iyo wahooleliheraka muukumini waa uvara nteko woolalyeera. Waahiloveke wuulalyeerani, waamini waa unaahala utepa ulipa ni unaahala waakavihera akhwaa woonelela iphiro inhala waavaha ukumi woohimala.—1 Tim. 4:16.
21. Upattisiya unaahula mikhora wiira ukhalane isiyani?
21 Uvaherera ukumyaa wa Yehova ni upattisiya ikhanle itthu yuulupale weeva inhalaa ulakela upanka muukumini waa. Ninaacuwela wiira ihaavo “ihisapu” awula iperesu ntthu inhalaawe uliva. Masi niireke ukupali uliva iyo ipereswiihu unaahala wuuphwanyiha ifayita? Iyee! Khula marikariko anhala wuukhumelela ila ituninyeela akhanle ‘oohipica uvira ni ooyeva.’ (2 Akor. 4:17) Masi upattisiya, unaahula mikhora wiira weeva ukhalane ukumi wootteeliya ilelo ni wiira urwee wakhalane “ukumi weekhweeli” uhoolo. (1 Tim. 6:19) Phimaana, wuupuwele ratta ni ulompe nhina mananna weeva cinhalaa waakhula nna nikohonna: “Kiheetthenkaca wiira kipattisiye?”
NCIPO 50 A Minha Oração de Dedicação
^ par. 5 Weeva unnoopuwelaka upattisiya? Ula mwahoola utthenkaceriye weeva. Ninaahala woopela mwaha makoho moolupale nhina upattisiya. Waakhuliya waya ayo makohwaayo, unaahala wuukavihera ucuwela wakhala wiira weeva uheetthenkaca wiira upattisiye awula mena.
^ par. 2 Luka 14:27 Ule hincisa nipotto nawe ni hinkitthara, khanlamuliya ukhala nttharyaaka. 28 Wootakihera, tipani vaa aahaala upheela uteka inupa yoorekama, woohipaca toko wonkoma ni uwehera ihisapu yoohala uliva, wiira oone khampa haana nsurukhu wootosera? 29 Aahipankeke commo, uyo nkowancera uhela maluku wiira ateke inupaawe, masi khanhala ukhitiri umaliha uteka, ni atthu otheene anhala umoona anaahala unthyaaca, 30 yeeraka: ‘Ula nlopwanoola hopacera uteka, masi khakhitinri umaliha.’
^ par. 4 Matewus 16:24 Vano Yesu howiirela attharyaawe co: “Ntthu apheelaka ukhala nttharyaaka, haana iikhottaka, alokotthaka nipotto nawe noohuviheriya ni haana akittharaka mpaka.”
^ par. 5 Uwehe ikwaaturu “ Makoho meeli weeva anrwaa waakhula nihuku ninhalaa upattisiya.”
^ par. 6 1 Peturu 3:18 Ukhala wiira Kristu khwile nlattu wo matampi weemaara imoca mpaka, ntthu oweettela isariya hokhwa nlattu waatthu ooheettela isariya, wiira ookavihereni umphiyeera Nluku. Uyo khwile niirutthu yeepinaatamu, masi haakhela ukumi wonnepa. 19 Vano uyo horwaa ni holalyeera malayikha atthukeliye, 20 yaahiile umwiiwelela Nluku ukati waavilelaawe mahuku a Nowee, yatekiyaka ikalawa, yaakavihenre woopoliya mmaacini atthu vakaani, atthu 8. 21 Upattisiya, ulattanacale niila, ciicammo unaawoopolani nenna coo (kahi nlattu wookumiha itthu inhiiriha irutthwiihu, masi nlattu wonlepela Nluku wiira anivahe nrima wootaphuwa), nuwumwelelihiya wa Yesu Kristu. 22 Uyo ri mphantte wo moono wonlopwana wa Nluku, kontha horwaa wiirimu ni hovahaceriya malayikha, akhulupale ni ikuru.
^ par. 9 Matewus 28:19 Coo, nrwee, ni mwaapanke eetthuci atthu olapo cotheene, mwaapattisaka mwancina na Athumwaane, ni na Mwaana, ni no nnepa wowaarya, 20 mwawiitthucihaka wiiwelela citthu cotheene cuurumalyaakani. Ni ncuwele wiira mahuku otheene kiri ni nyuuva, mpaka wiimaleloni ulumwenku.
^ par. 17 Uwehe ikapiitulu 18, nlivuruni O Que Nos Ensina a Bíblia?
^ par. 19 Wakhala wiira khunamaliha usomihiya ilivuru O Que Nos Ensina a Bíblia? ni Continue a Amar a Deus, weeva uhaana nanlelo usomihiyaka nnyo ilivurunnyo mpaka wammalihaa coopiili.
