1. Khoe-e tae-e omsa i nî om tsoatsoas aiǃâ nî ǂan?

OMSA oms xa ra ǂâi khoe-i xa ǂâi re. ǁÎ-i ge a ǂan tae ǃnôa omsa i ra omǂgao ǃkhaisa. ǃHaese-i xūna sī ǁama tsî omsa nî om tsoatsoa? Hî-î. Oms nî omhe tsoatsoas aiǃâ i ge ǂhâǂhâsa xū-e nî dī—kō i ge nî nē oms mati kō mari-e nî ǂgansa. Tae-i ǃaroma? ǂÂusa mari-e i ūhâsa ǂanǂûis ǃaroma nē omsa om toas amsi. ǃGâise i ga tsoatsoa i nîs aiǃâ ǁî-i mari ǁhōga ǃoa kō o, o i ge nî ǂan nē omsa i a omtoa ǁkhā ǃkhaisa.

2. Lukab 14:27-30 ǃoagu du tae-i xa ǃgâise nî ǂâiǃgâ ǁāǁnâhe du nîs aiǃâ?

² ǀNammi tsî ǃgôaǃgâsib Jehovab ge dība du xūn diba ra ǂkhâǃnâ du ǁāǁnâ kaisensa? Nēs ga ama o, o du ge omsa ra om ǂgao khoe-i hâǃâ mâsib ǃnâ hâ. Tae-i amsi da nēti a mî ǁkhā? Jesub mîdi hîna Lukab 14:27-30 ǃnâ ra hō-e di xa ǂâi re. (Khomai re.) Jesub ge ǁîb ǁkhāǁkhāsabe kais taena ǃkhōǂgā hâsa gere ǃhoaǃgao. ǁÎb ǁkhāǁkhāsabe kais ǃaroma da ge sada “ǃgâuhaiba” nî ūkhâi hîna ǃgomsigu tsî māǁnâ da nî xūn tsîna ǃkhōǂgā hâba. (Luk. 9:23-26; 12:51-53) Nēs ǃaroma du ge ǁāǁnâhe du nîs aiǃâ ǃgâise nē xūn hoan xa nî ǂâi. O du ge ǃgâise nî aiǂhomisa i Eloba ǁāǁnâs khaoǃgâ ǂgomǂgomsase ǃoabasa.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Xristub di ǁkhāǁkhāsabe kai tsî ǃâitsâgu ǃnâ ǃkharu tsî sadu xūna māǁnâsa a ǂhâǂhâsa? Î, ǂhâǂhâsa a. ǁĀǁnâs ge ǂgui dao-amde ǂgui ǀkhaega ǃoa ra ǁkhowa-am nēsi tsî hānîǁaeb ǃnâ. Hā re i da ǂhâǂhâsa dîdi ǁāǁnâs xa hâ de ǃhoaǃgao.  Sadu ǃereams nē dîs ais ge nî hui du nē dîsa ǃereams ǀkha, “ǁāǁnâs amsi ta a ǂhanu?”

4. (a) Māǁnâsensa a tae? (b) Mateub 16:24 ǃnâ i ra ǁgauhe khamis ǁî-aitsama ‘ǀūxūsensa’ tae-e ra ǂâibasen?

⁴ Māǁnâsensa a tae? ǁĀǁnâhe du nîs aiǃâ du ge mîǁguiba nî dī. Māǁnâsensa du ge ǂgaob ǃgamsiba xu hâ ǀgores ǃnâ-ū Jehovaba ra mîba sadu ûib hoaba du ǁîba nî ǃoaba di. Jehovab ǃoa-ai du ga māǁnâsen o, o du ge ǁî-aitsama ra “ǀūxūsen.” (Khomai re Mateub 16:24.) Nēsisa du ge Jehovab ǃomǁae hâ tsî nēs ge kaise a ǃgâi. (Rom. 14:8) ǁÎba du ge ra mîba nētsēsa xu du ge ǁîba nî ǃoaba tsî aitsama ǂkhîǂkhîsen tide. Sadu māǁnâsens ge khôahe ǁoasa mîmâis hîna du Elob ǃoa-ai ra dīsa. Jehovab ge ǁgari da tama hâ nē mîmâisa dīs ǃnâ. Xawe da ga nēsa dī o, ob ge ǂhaba hâ i da nēs ǃoagu ûi.​—Psa. 116:12, 14.

5. Māǁnâsens tsî ǁāǁnâs tsîna mati ra ǃgûǀhao?

⁵ Māǁnâsensa mati ǁāǁnâs ǀkha ra ǃgûǀhao? Māǁnâsens ge ǀgores ǃnâ ra dī-e tsî khoe-i tsî Jehovab tsîn ǁaegu hâ. ǁĀǁnâs ge khoen aisi ra dīhe ǂharis ǀhaos tamas ka io ǀkharib kai ǀhaos tawa. ǁĀǁnâ kaisen du ga o, o du ge khoena ra ǁgau ǀnai du ko Jehovab ai māǁnâsen ǃkhaisa. * Nēs ǃaromas ge sadu ǁāǁnâsa khoena ra ǁgau Jehova Eloba du sadu ǂgaob hoab, ǀoms hoas, ǁnâuǃāb hoab tsî ǀgaib hoab ǀkha a ǀnam ǃkhaisa.​—Mrk. 12:30.

6-7. 1 Petrub 3:18-22 ǃoagun mâ ǀgam xūna a ǂhâǂhâsa ǁāǁnâs ǃaroma?

⁶ ǁĀǁnâ kaisensa amabes ǃnâ a ǂhâǂhâsa? 1 Petrub 3:18-22 ǃnâ hâ mîdi xa ǂâiǃgâ re. (Khomai re.) Arki ge Noaxi di ǂgoms ǃgaoǃgao i khamis ge ǁāǁnâsa Jehovab ǃoa-ai da ra māǁnâsen ǂgoms di ǃgaoǃgao. Xawe ǁāǁnâsa a ǂhâǂhâsa? Î, ǂhâǂhâsa a. Petrub ge nēs ai ge ǃeream, tae-i ǃaroma? ǂGurose nēs ge ra ‘ǁkhauba du.’ ǁĀǁnâs ge a ǁkhauba da ǁkhā sada dīgu ǃnâ-ū da ga ǁgau o Jesub ǃnâ da ǂgomsa ūhâ ǃkhaisa. Tsî ǁîb ge sada a ǁōba tsî ǁōba xu a khâi tsî ǀhomma ǃoa oa tsî “Elob amǀkhāb ǁôab” ai sī ǂnôa ǃkhais ǃnâ ǂgoms ǃnâ-ūs tsîna.

⁷ ǀGamǁîse ǁāǁnâs ge ‘ǃgâi ǃgâiǂâisa’ ra mā da. Māǁnâsen tsî da ga ǁāǁnâhe o, o da ge ǀō-aisa ǀhōsagusisa Jehovab ǀkha ra om. Ama ǃhausen tsî xoremarib ǃnâ da ūhâ ǂgoms ǃaromab ge Eloba sada ǁorena ra ǀûba. Nēs ǃaroma da ge ǃgâi ǃgâiǂâisa ǁîb aiǃâ a ūhâ ǁkhā.

8. Mâ ǃaromasa nî ǂkhâǃnâ du i du ǁāǁnâ kaisen?

⁸ Mâ ǃaromas amsi du nî ǁāǁnâhe? Sadu ôaǃnâs hîna du Elobmîs ǃnâ ra dīsa xu du ge Jehovab ǀgaugu xa ra ǁkhāǁkhāsen. Tsî nē xūn hîna du ra ǁkhāǁkhāsen an ge ra ǃaroma i du ǀnamma omkhâiba bi. ǀNammi hîna du Jehovaba ūba hâb ge ra ǂkhâǃnâ du i du ǁāǁnâ kaisen.

9. Tae-e i ra ǂâibasen ǁGûb, ǀGôab, tsî ǃanu gagab ǀons ǃnâ ǁāǁnâhesa, Mateub 28:19, 20 ǃnâ i ra ǁgauhe khami?

⁹ Sadu ǃaromas hîna du ra ǁāǁnâ kaisens ge Elobmîsa xu du ra hō amab ais tsîna a ǃgaoǃgaosa. ǂÂi re Jesub ge tae-e mîsa mîmās ǁkhāǁkhāsabedīs disab ge mā o. (Khomai re Mateub 28:19, 20.)  Jesub ge mî mîdi ǃoagun ge ǁnān hîna ra ǁāǁnâhena “ǁGûb, ǀGôab, tsî ǃanu gagab ǀons ǃnâ” nî ǁāǁnâhe. Nēsa tae-e ra ǂâibasen? Sadu ǂgaob hoab ǀkha du ge Elobmîs amab hîna Jehovab; ǁîb ǀGôab tsî ǃanu gagab xa hâb ǃnâ nî ǂgom. Nē amab ge kaise a ǂhâǂhâsa tsî sadu ǂgaoba a tsâǀkhā ǁkhā. (Heb. 4:12) Hā re i da nē amab xa ǃhoa.

10-11. Tae amaba du ge sada ǁGûb xa ǁkhāǁkhāhe tsî ūǃoa?

¹⁰ ǂÂi oa re sadu ge amaba ǁGûb xa a ǁkhāǁkhāsen ǁaeba ǃoa: ‘ǀons âb Jehova’ di hâs tsîb ǁîba a “Hoan xa ǀGapisa ǃhūbaib hoaragab ai” tsî a ‘ama Elo’ ǃkhaisa. (Psa. 83:18; Jes. 37:16) ǁÎb ge a sada di Kuru-ao tsî ‘ǃgâiǃōsib ge ǃKhūb di.’ (Psa. 3:8; 36:9) ǁÎb ge ǁoreb tsî ǁōb tsîna xu oredas ǃaroma xū-e ge dī tsî ǀamose ûis ǃâubasens tsîna ge mā da. (Jhn. 17:3) Sadu māǁnâsens tsî ǁāǁnâs tsîn ge Jehovab ǀHûǀguitimî-aon di ǀgui du a ǃkhaisa ra ǁgau. (Jes. 43:10-12) Sadu ge nî ǃhūbaib ǂhabase hâ omaris ǃoaba-aon di ǀgui kai hîna Elob ǀons ai ǂgâihe tsî nēsa khoena ra ǂanǂan na.​—Psa. 86:12.

¹¹ Kai aiǂhanub ge Elobmîs ǃnâ sada îb xa hâ amaba ǁnâuǃāsa. Nē amaba da ga ūǃoa o, ob ge sada ǂgaoba ra ǁgari da Jehovab ǃoa-ai māǁnâsensa.

12-13. Tae amaba du ge ǀGôab xa ǁkhāǁkhāsen?

¹² Mati du ge tanisen amaba du ge ǀGôab xa ǁkhāǁkhāsen o? Jesub ge a ǀgamǁî ǂhâǂhâsa khoe kurus hoas ǃnâ. ǁÎb ge a sada di Xoremari ǁguiba. ǁÎb ûibab ge sada ǃgao māsenxase ge mā. Sada dīgu ǃnâ-ū da ga ǁgau o xoremariba da ra ǃgôaǃgâsa on ge sada ǁorena a ǀûbahe ǁkhā. Tsî da ge Elob ǀkha ǀhōsagusisa om tsî ǀamo ûiba a hō ǁkhā. (Jhn. 3:16) Jesub ge a sada di ǀGapi Prister. ǁÎb ge ra hui da ǂgao i da xoremariba xu ǀama tsî ǀgū ǀhōsagusisa Jehovab ǀkha ūhâ. (Heb. 4:15; 7:24, 25) Jesub a Elob Gaosib di Gao-ao amagab ge Jehovaba ǁîb ǃnâ-ū ǁîb ǀonsa nî ǃanuǃanu, ǁgaoǁgaosiba ǀam kai tsî hâhâ ra ǀkhaega paradais ǃhūbaib ai nî mā da. (Mat. 6:9, 10; J.ǂHa. 11:15) Jesub ge a ǃgâi aiǁgau hîna da a ǁgae ǁkhāba. (1Pet. 2:21) ǁÎb ge ǁîb ûiba Elob ǂâisa īǁkhā kais ǃaroma ge sîsen-ū tsî nēs ǃnâ-ū ǃgâi aiǁgausa ge mā da.​—Jhn. 4:34.

¹³ Elobmîs Jesub xa ra ǁkhāǁkhā xūna du ga ūǃoa o, o du ge Eloba ǀnamma ra omkhâiba. Nē ǀnammi ge nî ǁgari du i du Elob ǂâisa dī. Tsîs ge nēsa ra ǂkhâǃnâ da i da Jehovab ǃoa-ai māǁnâsen.

14-15. Mâ amaba du ǃanu gagab xa ǁkhāǁkhāsen tsî ge ūǃoa?

¹⁴ Tae-e du ǃanu gagab xa hâ amaba du ge ǁkhāǁkhāsen o, o gere ǂâi? ǃAnu gagab ge khoe tama hâ xawe a Elob di ǀgâi. Jehovab ge ǃanu gagaba ge sîsen-ū Elobmîsa xoahes ǃaroma tsî ǃanu gagab ge ra hui da Elobmîsa ǁnâuǃā tsî ǁkhāǁkhāsen da ra xūna ûiǂûis ǃnâ. (Jhn. 14:26; 2Pet. 1:21) ǁÎb ǃanu gagab ǃnâ-ūb ge Jehovaba ‘ǃnāǂamsasib ǀgaiba’ ra mā da. (2Kor. 4:7) Nē ǃanu gagab ge ra hui da aoǁnâ sîsenna dī, ǃgomsin ǃnâ māǀgai tsî ǂkhabuǂâis tsâsiga ǃkhamǃoas ǀkha. ǃGâi ǀgaugu hîna a “gagab di ǂûb” diga ǁgauǂûis ǀkhas tsîna i ge ra hui da. (Gal. 5:22) Elob ge ǁîb ǃanu gagaba ǁnān hîna ǁîb ǃnâ ra ǂgomna ra mā ǂgan bin ga o.​—Luk. 11:13.

 ¹⁵ Kaise i ge ra ǂkhî kai da ǂansa Jehovab ǃoaba-aon ǁîb ǃanu gagab ai a ǂgomaiǂnûi ǁkhā ǃkhaisa hui-es ǃaroma Eloba ǃoaba ǀgaras ǃnâ. ǃAnu gagab xa du ǁkhāǁkhāsen hâ amaba du ga ūǃoa o, o du ge supuse Elob ǃoa-ai māǁnâsen tsî a ǁāǁnâhe ǁkhā.

16. Tae-e da nēsis kōse nē ǁkhāǁkhāǃâs ǃnâ go ǁkhāǁkhāsen?

¹⁶ Sadu mîmâis Elob ǃoa-ai māǁnâsens tsî ǁāǁnâhes dis ge kaise a ǂhâǂhâsa. ǁKhāǁkhāsen da go khami du ge mâǃoadi hîna da nî hōǃâde du nî ūǃoa ǃkhaisa nî ǂan. Xawe ǀkhaegu hîna da nî ǃkhōǃoagu ge nēsa ra ǃnāǂam. ǁĀǁnâs ge a sâu du ǁkhā tsî ǃgâi ǃgâiǂâis tsîna ra mā du. Sadu mîmâis ǁāǁnâ kaisens dis ge Jehovaba du ūba hâ ǀnammi xa nî ǂkhâǃnâ-e. Tsî du ge amab hîna du ǁGûb, ǀGôab tsî ǃanu gagab xa ge ǁkhāǁkhāsenni a amasa sadu ǂgaob hoab ǀkha nî ǂgom. ǃHoaǃgao da go xūn hoan xa du ga ǂâi-oa o, o du saora dîsa mati nî ǃeream, “ǁāǁnâs amsi ta a ǂhanu?”

17. Mâ xūna da ǁāǁnâs aiǃâ nî dī?

¹⁷ ǁĀǁnâs amsi du a ǂhanu di du ga ǂâi o, o du ge ǀnâi ǂgui xūna ǂâiǃgâ hâ tsî ǀhōsagusisa Jehovab ǀkhas tsîna omkhâi hâ. * Sadu Elobmîs ǁkhāǁkhās hîna du hoaǁae ra dīsa xu du ge ǂgui xūna Jehovab tsî Jesub tsîkha xa ǁkhāǁkhāsen hâ. Tsî du ge ǂgomsa ge omkhâi. (Heb. 11:6) Elobmîs mîmâidi hîna Elobmîs ǃnâ hâ di ǃnâ du ge hoase ra ǂgom. Tsî du ge ra ǂgom Jesub xoremarib sadu ǁoren tsî ǁōb tsîna xu nî ǁkhauba du ǃkhaisa. Sadu ǁorena ǀû, nēs xa ǃhausen tsî du ge Jehovab ai ǀûbaba ge ǂgan. Sadu ûiba du ge ge ǀkharaǀkhara tsî sadu ǁgai ǀgauga ge ǀû tsî Eloba ra ǂkhîǂkhî ǀgaub ǃnâ ra ûi. (ǃNǃkh. 3:19) Tsî nau khoena sadu ǂgoms xa mîbasa ǃoa ra mûǂûi. ǃÂuǁoa du ge a ǁāǁnâsa tama aoǁnâ-ao kai tsî ǀhaohâb ǀkha aoǁnâ tsoatsoasa. (Mat. 24:14) Jehovab ge sadu ai kaise a ǂnîsa nē mîmâis hîna du ge dīs ǃaroma. ǁÎba du ge kaise ra ǂkhîǂkhî.​—ǂKhm. 27:11.

18. Taena du noxoba ǁāǁnâhe du nîs aiǃâ nî dī?

¹⁸ ǁĀǁnâs aiǃâ da nî dī xūn ge hâ. ǁKhāǁkhāsen da go khami da ge Elob ǃoa-ai nî māǁnâsen. ǁÎba da ge ǂgaob ǃgamsiba xu ǀgores ǃnâ ra ǃhoa-u ǂgao tsî ra mîba ǂgao sada ûiba da ǁîb ǂâisa dīs ǃaroma nî sîsen-ū ǃkhaisa. (1Pet. 4:2) ǁNāba xu ǀhaohâb ǃûi-aogu di ǂnûǁkhaeba-aoba mîba re ǁāǁnâ-e ǂgao du ra ǃkhaisa. ǁÎb ge nau ǀhaohâb ǃûi-aogu ǀkha nî ǃhoa. Tā ǃao re ǁîgu ǀkha ǃhoasa. Nē ǃgâsagu ge a ǂan da tsî a ǀnam da.  ǁÎgu ge ǁlkhāǁkhāsen du ge xūna sadu ǀkha nî ǃgûǃgâ. ǁÎgu ge ra hui du ǂgao nē amab hîna du ge ǁkhāǁkhāsena ǃgâise ǂansa tsî dī du ra mîmâis di ǂhâǂhâsasiba ra mûǂan kai du ǂgao. ǁÎgu ga mû o nēs ǃaroma du a ǂhanusa o gu ge nî ǂanǂan du i du sao ra ǀkharib kai ǀhaos tamas ka io ǂharis ǀhaos dawa ǁāǁnâhe.

19-20. Tae-e du sadu ǁāǁnâs khaoǃgâ nî dī tsî nēsa du mati a dī ǁkhā?

¹⁹ ǁĀǁnâs khaoǃgâ du tae-e noxoba nî dī? * ǂÂis ǃnâ ūhâ re māǁnâsens ge a mîmâi hîna du Jehovab ǃoa-ai ra dīsa tsîb ge ǁîba ǂhaba hâ nē mîmâisa du nî dīǀoaǀoa ǃkhaisa. Nēs ǃaroma du ge ǁāǁnâs khaoǃgâ sadu māǁnâsens ǃoagu nî ûi. Mati du nēsa nî dī?

²⁰ Sadu ǀhaohâb ǀgūse hâ re. ǁĀǁnâsa ǃgâsa i ase du ge sado nēsi a ǃhūbaib ǂhawase hâ ‘ǃgâsan di ǃâ.’ (1Pet. 2:17) Sadu ǃgâsan hîna ǀhaohâb ǃnâ hân ge a sadu di gagasi omaris ǁani. ǀHaode hoaǁae ǁhaoǃgâs ǃnâ-ū du ge sadu ǀhōsaguside sadu ǃgâsan ǀkha nî ǀgaiǀgai. Elobmîsa tsēs hoasa khomai tsî ǂâiǃgâ re. (Psa. 1:1, 2) Elobmîs ǃâ-e khomai tsî ǁaeba ū re nēsa ǂâiǃgâsa. O di ge nē mîde sadu ǂgaoba nî tsâǀkhā. Hoaǁae “ǀgore re.” (Mat. 26:41) Sadu ǂhanu-ai ǀgore di ge Jehovab ǀgūse nî hâ kai du. ‘ǂGurose ǁnâi . . . Gaosiba ôa.’ (Mat. 6:33) Nēsa du ge aoǁnâ sîsen-e ǂgurose sadu ûib ǃnâ mâis ǃnâ-ū a dī ǁkhā. Hoaǁae aoǁnâ sîsenni ǃnâ ǁhaos ǃnâ-ū du ge sadu ǂgomsa ǀgaisase a ūhâ ǁkhā tsî nau khoen tsîna a hui ǁkhā în ǀamo ûib di daoba hō.—1Tim. 4:16.

21. Sadu ǁāǁnâsa mâ dao-amde nî ǁkhowa-amba du?

²¹ Jehovab ǃoa-ai māǁnâsen tsî ǁāǁnâhes ge kaise a ǂhâǂhâsa mîmâi hîna du a dī ǁkhāsa. Ama i ge a ǃgomsina da nî hōǃâsa. Nē ǃgomsina nî ǃao kai du? Hî-î. Nē ǃhūbaib ǃnâ du ra hōǃâ ǃgomsin ge ‘ǃhaese nî ǃgû-ī.’ (2Kor. 4:17) Xawe sadu ǁāǁnâs ge nēsi dao-amdi ǂkhîba ūhâde nî ǁkhowa-amba du tsî du ge ǃgâi ǃgaoǃgaoba ‘ǀamo ûib’ ǃaroma nî ūhâ. (1Tim. 6:19) Nēs ǃaroma sadu ǃereams sao ra dîs dis xa ǂâiǃgâ, ǀgore tsî ǁnās khaoǃgâ nē dîsa ǃeream re, “ǁāǁnâs amsi ta a ǂhanu?”