1. ¿Toni achto moneki kichiuas akin kineki kichijchiuas se kali?

XIKONNEMILI ke se takat kineki kichijchiuas se kali uan kimattokya keniuj yeski. ¿Uelis niman kikouatiuj tein monekis uan peuas kichijchiuas? Amo. Achto ke peuas, moneki kichiuas se taman tein semi moneki: kiixejekos kanachi tomin mokuis itech nejon tekit. ¿Keyej? Porin moneki kiitas ox kiajsis tomin uan ijkon uelis kitamichijchiuas kali.

2. Kemej kijtoua Lucas 14:28-30, ¿itech toni moneki kuali tiontanemilis achto ke tionmoauis?

² ¿Tikonnemilijtok tionmoauis porin tikontasojta Jiova uan tikontasojkamatilia tein moka kichiuani? Komo ijkon, tionmoajsi kemej akin kineki kichijchiuas se kali. ¿Keyej ijkon tikijtouaj? Xiontanemili itech tein kijtoj Jesús itech Lucas 14:28-30 (xikonixtajtolti). Jesús ika tajtouaya tein panoua keman se mochiua itatojtokakauj. Komo tiknekij timochiuaskej tiitatojtokakauan, moneki tikajsikamatiskej ke tikpiaskej seki ouijkayomej uan monekis tikauaskej seki taman (Luc. 9:23-26; 12:51-53). Yejua ika, achto ke tionmoauis, moneki kuali itech tiontanemilis nejin. Nejon mitsonpaleuis xikonsentoka xikontekitili Jiova satepan ke tionmoauis.

3. ¿Toni tikitaskej itech nejin tamachtilis?

³ Maski tikonpanos ouijkayomej uan monekis tikonkauas seki taman satepan ke tionmoauis, amo nenkaj yeski. Neauilis uelis kichiuas xikonseli miak tatiochiualismej axkan uan satepan. Itech nejin tamachtilis tikitaskej seki netajtanilmej tein semi monekij. Nejin mitsonpaleuis xikonita ox uelisya tionmoauis.

4. 1) ¿Toni kijtosneki se motemaktis iuan Dios? 2) ¿Toni kijtosneki tikauaskej totanejnekilis kemej kijtoua Mateo 16:24?

⁴ ¿Toni kijtosneki se motemaktis? Nejin moneki tikchiuaskej achto ke timoauiskej. Keman timotemaktiaj, tikchiuaj se netataujtil kampa tikiluiaj Jiova ke tiktekitiliskej nochipaya. Keman tikchiuaj nejon, amo tiktayekanaltiajok totanejnekilis (xikonixtajtolti Mateo 16:24, TNM). Ijkuak tikpiaj tatiochiualis timochiuaskej tiiaxkauan Jiova (Rom. 14:8). Keman timotemaktiaj, tikiluiaj Jiova ke tiktayekanaltiskej tiktekitiliskej uan amo tikchiuaskej tein tejuan techyolpaktia. Jiova amo techchikaujkauia maj tikijtokan nejon, sayoj ke keman tikijtouaj, kichia maj ijkon tikchiuakan (Sal. 116:12, 14).

5. ¿Keyej taman keman se motemaktia iuan Dios uan keman se moauia?

⁵ ¿Keyej taman keman se motemaktia iuan Dios uan keman se moauia? Keman tionmotemaktis iuan Dios, tikonchiuas moselti uan amo akin kimatis, ta sayoj tejuatsin uan Jiova. Sayoj ke keman tionmoauis, tikonchiuas ininixpan miakej. Miakpa, nejin mochiua itech se ueyi nechikol. Keman tionmoauis, miakej kiitaskej ke tejuatsin tionmotemaktijya iuan Jiova. * Ijkon kimatiskej ke tikontasojta ika nochi moyolo, monemilis, motanemilil uan mochikaualis uan ke tikonixtalijya tikontekitilis nochipaya (Mar. 12:30).

6, 7. Kemej kijtoua 1 Pedro 3:18-22, ¿keyej moneki timoauiskej?

⁶ ¿Yekmelauj moneki timoauiskej? (Xikonixtajtolti 1 Pedro 3:18-22, TNM.) Xiontanemili itech nejin tajkuilolmej. Ijkon kemej arca kinnextilij taltikpakneminij ke Noé takuaujtamatia iuan Dios, keman tionmoauis tikonnextis ke tionmotemaktijya iuan Jiova. Sayoj ke ¿yekmelauj moneki maj timoauikan? Kemaj, uan Pedro kijtoj keyej. Yekinika kijtoj: “Namechmakixtijtok”. Neauilis uelis techpaleuis maj timakisakan komo tiknextiaj ika tein tikchiuaj ke titakuaujtamatij iuan Jesús uan tikneltokaj ke toka momikilij, ke oksepa nemik uan yajki iluikak uan ke moajsi “iyekmakopa Dios”.

⁷ Ojpatika, keman timoauiaj techpaleuia maj tikpiakan “se kuali tanemilil”. Keman timotemaktiaj iuan Dios uan timoauiaj, timochiuaj tiitekitikauan. Kemej timoyolnonotskejya oso timoyolnemilijkejya uan titakuaujtamatij itech inemilis Jesús tein kitemakak, Dios techtapojpoluia totajtakoluan. Ijkon, uelis tikpiaskej se kuali tanemilil iixpan.

8. ¿Toni kichiuas xikonixtali tionmoauis?

⁸ ¿Toni kichiuas xikonixtali tionmoauis? Nemachtil ika Biblia mitsonpaleuiani xikonmati keniuj tanemilia Jiova uan tein kichiua. Nochi nejon kichiuani semi xikontasojta. Netasojtalis tein tikonpialia Jiova yejua tein kichiuas xikonixtali tionmoauis.

9. Kemej kijtoua Mateo 28:19, 20, ¿toni kijtosneki se moauis itokaykopa toTajtsin Dios, iKonetsin uan yektikatsin espíritu?

⁹ Okse taman tein no kichiua xikonixtali tionmoauis yejua ke tionmomachtiani tein Biblia kijtoua uan tikonneltoka. Xiontanemili itech tein kijtoj Jesús keman tanauatij maj se kinpaleui oksekin maj mochiuakan itatojtokakauan (xikonixtajtolti Mateo 28:19, 20). Jesús kijtoj ke akin moauiskej moneki kichiuaskej “ika itokaytsin de Toueyitajtsin Dios uan de Ikonetsin Dios uan de in [y]ektikatsin  [e]spíritu”. Nejin kijtosneki ke moneki se kineltokas tein tamachtia Biblia keman ika tajtoua Jiova, iKonetsin, uan iyektikatsin espíritu. Nejin tamachtilismej kipiaj miak chikaualis uan uelis kichiuas xikonneki tikontekitilis Jiova (Heb. 4:12). Maj tikitakan seki.

10, 11. ¿Toni tamachtilismej tein kijtoua akoni toTajtsin tikonmatini uan tikonneltokani?

¹⁰ ¿Tikonelnamiki keman tikonajsikamatik nejin tamachtilismej? Ke toTajtsin monotsa Jiova, akin ‘okachi Ueyichiujkej itech nochi taltikpak’ uan sayoj yejua “Dios akin melauak” (Sal. 83:18; Is. 37:16). No toTachijchiujkauj uan “nemakixtilis iaxka” (Sal. 3:8; 36:9). Uan no, kitemakak tein techpaleuis maj satepan amo titajtakolejkejok nion maj timomikilikanok, uan no kijtoj ke uelis tinemiskej nochipaya (Juan 17:3). Keman tionmotemaktis iuan Dios uan tionmoauis, tikonnextis ininixpan miakej ke tiitaixpantijkauj Jiova (Is. 43:10-12). Peuas tionmoajsis iniuan miakej tokniuan akin nemij itech nochi taltikpak uan kiueyichiuaj Jiova, uan kinyolpaktia moteixmatiltiskej ika itokay uan ika tajtouaj (Sal. 86:12).

¹¹ Se ueyi tatiochiualis maj ueli tikajsikamatikan akoni toTajtsin, kemej Biblia tamachtia. Keman tikonneltokas nejin tamachtilismej, tikonnekis tionmotemaktis iuan Jiova uan tionmoauis.

12, 13. ¿Toni tamachtilismej tein kijtoua akoni iKonetsin Dios tikonmatini uan tikonneltokani?

¹² ¿Keniuj tionmomachilij keman tikonajsikamatik nejin tamachtilismej? Jesús, iKonetsin toTajtsin, yejua akin kipia okachi tanauatil itech iluikak uan taltikpak satepan ke Jiova. Yejua akin techmakixtij porin kitemakak inemilis. Keman tiknextiaj ika tein tikchiuaj ke titakuaujtamatij itech inemilis tein kitemakak, Jiova uelis techtapojpoluis totajtakoluan, uelis kuali iuan timouikaskej uan tinemiskej nochipaya (Juan 3:16). Jesús no toTayekankatiopixkauj, porin kineki maj techpaleui inemilis tein kitemakak uan maj kuali timouikakan iuan Jiova (Heb. 4:15; 7:24, 25). Kemej yejua Tekiuaj itech iTekiuajyo Dios, Jiova kichiuas maj kichipaua itokay yejuatsin, maj kiixpolo tein amo kuali uan maj techtatiochiui nochipaya itech Xochital (Mat. 6:9, 10, TNM; Apoc. 11:15). Uan no, Jesús techkauilij se kuali neskayot (1 Ped. 2:21). Yejua nochipa kichiuak itanejnekilis Dios uan ijkon technextilij tein moneki tikchiuaskej (Juan 4:34).

¹³ Keman tejuatsin tikonneltokas akoni Jesús kemej Biblia tamachtia, tikontasojtas iKonetsin Jiova. Nejon netasojtalis mitsonolinis xikonchiua itanejnekilis Dios ijkon kemej Jesús. Uan yejua ika tikonnekis tionmotemaktis iuan Jiova uan tionmoauis.

14, 15. ¿Toni tamachtilismej kampa ika tajtoua yektikatsin espíritu tikonmatini uan tikonneltokani?

¹⁴ ¿Toni tikonnemilij keman tikonajsikamatik nejin tamachtilismej? Yektikatsin espíritu amo se dios, ta se chikaualis tein Dios kitekitiltia. Jiova ika kinixyekanak takamej akin kijkuilojkej Biblia, uan no ika techpaleuia maj tikajsikamatikan uan maj tikchiuakan tein ompa kijtoua (Juan 14:26; 2 Ped. 1:21). Ika iyektikatsin espíritu, Jiova techmaka “chikaukauelilis [tein] ualeutok imako” (2 Cor. 4:7). No ika techmaka chikaualis tein techpaleuia maj tikteixmatiltikan iTajtol, maj amo tikchiuakan tein amo kuali, maj amo timosenkauakan uan maj tikxikokan ouijkayomej. Yektikatsin espíritu no techpaleuia  maj tiknextikan kualneskayomej tein kijtoua Gálatas 5:22, 23. Dios kinmaka iyektikatsin espíritu akin takuaujtamatij iuan uan kitajtaniaj (Luc. 11:13).

¹⁵ Semi techyolseuia tikmatiskej ke akin kiueyichiuaj Jiova uelis takuaujtamatiskej ke iyektikatsin espíritu kinpaleuis maj kitekitilikan Dios. Keman tikonneltokas tamachtilismej kampa ika tajtoua yektikatsin espíritu, tikonnekis tionmotemaktis iuan Dios uan tionmoauis.

16. ¿Toni tikitakejya itech nejin párrafos?

¹⁶ Tikonixtalis tionmotemaktis iuan Dios uan tionmoauis semi moneki. Kemej tikitakejya, tikonpias seki ouijkayomej uan monekis tikonkauas seki taman. Sayoj ke okachi tikonselis tatiochiualismej. Neauilis uelis mitsonmakixtis uan mitsonpaleuis xikonpia se kuali tanemilil iixpan Dios. Netasojtalis tein tikonpialia Jiova yejua tein kichiuas xikonixtali tionmoauis. No moneki tikonneltokas tamachtilismej tein kijtouaj akoni toTajtsin, iKonetsin uan toni yektikatsin espíritu. Ika nochi tein tikitakejya, ¿tikonijtoskia ke uelisya tionmoauis?

17. ¿Toni seki taman moneki tikonchiuas achto ke tionmoauis?

¹⁷ Xa tikonchiuaniya seki taman tein mitsonpaleuiani kuali xionmouika iuan Jiova uan tikonnemilia ke uelisya tionmoauis. * Nemachtil ika Biblia mitsonpaleuiani xikonixmati Jiova uan Jesús uan xikonpia takuaujtamatilis (Heb. 11:6). Senkis tiontakuaujtamati ke Jiova kichiuas tein kijtoua itech Biblia uan ke inemilis tein Jesús kitemakak uelis kichiuas maj satepan amo xiontajtakolejok nion xionmomikiliok. Tionmoyolnonotsakya oso tionmoyolnemilijya ika tein achto tikonchiuak uan tikontajtanijya Jiova maj mitsontapojpolui. Senkis tikonkauak tein achto tikonchiuaya uan axkan tikonchiua tein Dios kiyolpaktia (Hech. 3:19). Tikonnejneki tikontapouis oksekin tein tionmomachtijtok. Uelikya tionmochiuak tanojnotskej uan peuakya tiontanojnotsa iniuan tokniuan (Mat. 24:14). Jiova semi yolpaki porin tikonchiuakya nochi nejin (Prov. 27:11).

18. ¿Toni okachi moneki tikonchiuas achto ke uelis tionmoauis?

¹⁸ Achto ke uelis tionmoauis, no moneki tikonchiuas okseki taman. Kemej tikitakejya, moneki tionmotemaktis iuan Dios. Nejin kijtosneki ke tikonchiuas se netataujtil kampa tikoniluis Jiova ke nochipa tikonchiuas itanejnekilis (1 Ped. 4:2). Satepan, xikonilui akin kinixyekana oloch tayekananij ke tikonneki tionmoauis. Yejua kiniluis seki tayekananij maj  mouan tajtokan. Uan amo xionmomoujti, ta nejin tokniuan mitsonixmatijya uan mitsontasojtaj. Yejuan kiitaskej mouan tamachtilismej tein tayekantokej uan ijkon uelis kiitaskej ke tikonajsikamatikya uan ke tikonmati ke se motemaktis iuan Dios uan se moauis semi moneki. Komo kiitaj ke uelisya tionmoauis, mitsoniluiskej ke uelis tionmoauis itech ueyi nechikol tein nankipiaskej.

19, 20. ¿Toni monekis tikonchiuas satepan ke tionmoauis, uan toni mitsonpaleuis?

¹⁹ Satepan ke tionmoauis, ¿toni moneki tikonchiuas? * Xikonelnamiki ke tikoniluij Jiova ke tikontayekanaltis tikontekitilis, uan Jiova kichia xikonchiua tein tikoniluij. Yejua ika, satepan ke tionmoauis, moneki tikonchiuas tein tikonijtoj. ¿Toni mitsonpaleuis?

²⁰ Keman tionmoauis, tionmoajsis iniuan “tokniuan taneltokani”. Yejua ika amo xionmouejkatili (1 Ped. 2:17). Tokniuan itech nechikol yeskij kemej mochankauan. Komo nochipa tionyoui nechikolmej okachi kuali tionmouikas iniuan. Mojmostaj xikonixtajtolti Biblia uan itech xiontanemili (Sal. 1:1, 2). Nejin kijtosneki ke keman tikontamiixtajtoltis se tajkuilol moneki itech tiontanemilis uan ijkon okachi mitsonpaleuis. No moneki tikonchiuas nejin: “Ximotatatautilikan iuan Dios youalitonal” (1 Tes. 5:17). Komo nochipa tikontataujtia Jiova okachi tionmotokis iuan. Uan xikonsentoka xikontemo achto iTekiuajyo Dios (Mat. 6:33, TNM). ¿Keniuj? Nochipa xikontayekanalti tanojnotsalis. Komo nochipa tiontanojnotsa, motakuaujtamatilis kisentokas chikauak uan xa no tikonpaleuis oksekin maj uelikan nemikan nochipaya (1 Tim. 4:16).

21. ¿Toni tikonselis komo tionmoauia?

²¹ Keman tikonixtalis tionmotemaktis iuan Jiova uan tionmoauis, tikonchiuas tein okachi moneki itech monemilis. Maski tikonpias ouijkayomej uan tikonkauas seki taman, amo nenkaj yeski. Ouijkayomej tein tikonpias itech nejin tonalmej “niman panotikisas” (2 Cor. 4:17). Uan no, komo tionmoauia, axkan okachi tionyolpakis uan satepan okachi kuali tionnemis nochipaya (1 Tim. 6:19). Yejua ika, kuali xikonnemili, xikontataujti Jiova uan xikonnankili nejin netajtanil: “¿Uelisya nimoauis?”.