1. Umuntu kumele enzeni engakaqalisi ukwakha indlu?

AKE ucabange ngomuntu ofuna ukwakha indlu. Uyakwazi ukuthi ufuna ukwakha indlu enjani. Kumele ahle ayethenga izinto azazisebenzisa abeseqalisa ukwakha yini? Hatshi. Kulento eqakathekileyo okumele aqale ayenze. Kumele abale izindleko zokwakha indlu leyo. Lokhu kuqakathekile ngoba kumele abone ukuthi imali alayo iyenela yini. Nxa eqale ngokubala izindleko, angenelisa ukwakha indlu yakhe ayiqede.

2. Ngokwalokho okutshiwo kuLukha 14:27-30, kuyini okumele ucabangisise ngakho ungakabhabhathizwa?

² Ukuthanda uJehova lokufuna ukumbonga ngalokho akwenzele khona sekwenze wafuna ukubhabhathizwa yini? Nxa kunjalo, kumele wenze okuhambelana lokwenziwa ngumuntu ofuna ukwakha indlu. Kungani sisitsho njalo? Kasixoxeni ngamazwi kaJesu akuLukha 14:27-30. (Bala.) UJesu wayekhuluma ngokuthi kugoqelani ukuba ngumfundi wakhe. Nxa sifuna ukulandela uJesu kufanele sizimisele ukwehlelwa zinhlupho lokutshiya ezinye izinto. (Luk. 9:23-26; 12:51-53) Yikho ungakabhabhathizwa kumele uqale ucabangisise ngalokho okuzakwehlela nxa ungaba ngumfundi kaKhristu. Ungenza njalo, uzabe usukulungele ukuqhubeka ukhonza uNkulunkulu uthembekile nxa usubhabhathiziwe.

3. Sizaxoxa ngani esihlokweni lesi?

³ Kambe ukubhabhathizwa kuqakatheke okokuthi usungaze uzimisele ukwehlelwa yibunzima lokutshiya ezinye izinto ngenxa yakho? Ye. Phela ungabhabhathizwa uzathola izibusiso ezinengi khathesi lasesikhathini esizayo. Asixoxeni ngeminye imibuzo eqakathekileyo emayelana lokubhabhathizwa. Ukwenza njalo kuzakunceda ubone langabe usukulungele ukubhabhathizwa.

4. (a) Kutshoni ukuzinikela? (b) Kutshoni ‘ukuzidela’ okukhulunywa ngakho kuMathewu 16:24?

⁴ Kutshoni ukuzinikela? Ukuzinikela kutsho ukuthandaza ngenhliziyo yonke utshela uJehova ukuthi uzamkhonza kuze kube nini lanini. Lokhu kumele ukwenze ungakabhabhathizwa. Nxa uzinikela kuNkulunkulu uyabe ‘uzidela.’ (Bala uMathewu 16:24.) Uyabe usungokaJehova futhi lokhu kuyisibusiso esikhulu. (Rom. 14:8) Uyabe umtshela ukuthi kusukela ngalelolanga usuzaphilela ukumkhonza kulokuqakathekisa ukwenza izinto ozifunayo. Ukuzinikela yisifungo osenza kuNkulunkulu okungamelanga udlale ngaso. UJehova kasibambi ngamandla ukuthi senze isifungo lesi. Lanxa kunjalo, ukhangelele ukuthi sisigcwalise nxa singasenza.—Hubo. 116:12, 14.

5. Ukuzinikela kutshiyene njani lokubhabhathizwa?

⁵ Ukuzinikela kutshiyene njani lokubhabhathizwa? Nxa uzinikela uyabe ubonwa nguJehova kuphela. Kodwa nxa ubhabhathizwa uyabe ubonwa ngabantu abanengi, kungaba semhlanganweni wesiqinti loba owesabelo. Nxa ubhabhathizwa uyabe utshengisa abantu ukuthi usuzinikele kuJehova. * Bazabona ukuthi uthanda uJehova uNkulunkulu wakho ngenhliziyo yonke, langomphefumulo wonke, langengqondo yonke langamandla wonke lokuthi usuzimisele ukumkhonza kuze kube nini lanini.—Mak. 12:30.

6-7. Ngokwalokho okutshiwo ku-1 Phetro 3:18-22, kungani ukubhabhathizwa kuqakathekile?

⁶ Ukubhabhathizwa kuqakathekile yini? Cabanga ngamazwi aku-1 Phetro 3:18-22. (Bala.) Umkhumbi wawutshengisa abantu ukuthi uNowa ulokholo kuNkulunkulu. Ngendlela efananayo ukubhabhathizwa kwakho kutshengisa abantu ukuthi usuzinikele kuJehova. Kodwa ukubhabhathizwa kuqakathekile yini? Ye. UPhetro wakhuluma ngokuthi kungani kuqakathekile. Okokuqala, ukubhabhathizwa ‘kuyasisindisa.’ Ukubhabhathizwa kungasisindisa nxa sitshengisa ngesikwenzayo ukuthi silokholo kuJesu, siyakholwa ukuthi wasifela, ukuthi wavuswa waya ezulwini lokuthi khathesi “usesandleni sokudla sikaNkulunkulu.”

⁷ Okwesibili, ukubhabhathizwa kwenza sibe ‘lomzwangedwa omuhle.’ Nxa sizinikela kuNkulunkulu futhi sibhabhathizwa siba lobudlelwano obuseduze kakhulu laye. UNkulunkulu uzasithethelela izono zethu ngoba siyabe siphenduke okweqiniso njalo silokholo enhlawulweni. Lokhu kuzakwenza sibe lomzwangedwa omuhle.

8. Kuyini okumele kukufuqe ukuthi ubhabhathizwe?

⁸ Kuyini okumele kukufuqe ukuthi ubhabhathizwe? Ukufunda iBhayibhili kukuncede wazi okunengi ngoJehova, ukuthi unjani lendlela enza ngayo izinto. Okufundileyo ngaye kukuthinte kwamancane njalo kwenza wamthanda kakhulu. Ukuthanda uJehova yikho okumele kube yisizatho esiqakatheke kulazo zonke sokuthi ubhabhathizwe.

9. Kutshoni ukubhabhathizwa ebizweni likaBaba leleNdodana lelomoya ongcwele okukhulunywa ngakho kuMathewu 28:19, 20?

⁹ Okunye okungenza ufune ukubhabhathizwa yikuthi usufundile lokho okutshiwo liBhayibhili njalo wakukholwa. Cabanga ngalokho uJesu akutshoyo lapho enika abalandeli bakhe umlayo wokwenza abafundi. (Bala uMathewu 28:19, 20.) Wathi umuntu kumele abhabhathizwe “ebizweni  likaBaba leleNdodana lelomoya ongcwele.” Kutshoni lokhu? Kutsho ukuthi kumele ukukholwe sibili lokho okutshiwo liBhayibhili ngoJehova, ngeNdodana yakhe uJesu langomoya ongcwele. Iqiniso leli eliseBhayibhilini lilamandla kakhulu futhi lingakuthinta inhliziyo. (Heb. 4:12) Asixoxe ngokunye owakufundayo.

10-11. Yiziphi izinto osuzifundile ngoBaba njalo wazikholwa?

¹⁰ Cabanga ngesikhathi ufunda ukuthi ibizo likaBaba nguJehova, ukuthi “ungoPhezukonke emhlabeni wonke” lokuthi nguye yedwa uNkulunkulu weqiniso. (Hubo. 83:18; Isaya. 37:16, NWT) UnguMdali wethu futhi ‘ukukhululwa kuvela kuye.’ (Hubo. 3:8; 36:9) Usivulele indlela yokuthi sikhululwe esonweni lasekufeni njalo usinike ithemba lokuphila okungapheliyo. (Joh. 17:3) Nxa ungazinikela futhi ubhabhathizwe uyabe usunguFakazi kaJehova. (Isaya. 43:10-12) Uyabe usulilunga lemuli yabantu abasemhlabeni wonke abakhonza uJehova, abazigqaja ngokubizwa ngebizo lakhe njalo abatshela abanye ngalo.—Hubo. 86:12.

¹¹ Kuyisibusiso sibili ukuzwisisa lokho iBhayibhili elikutshoyo ngoBaba. Nxa ungazikholwa izinto lezi eziligugu uzazimisela ukuthi uzinikele kuJehova njalo ubhabhathizwe.

12-13. Yiziphi izinto osuzifundile ngeNdodana njalo wazikholwa?

¹² Wezwa njani usufunde izinto ezilandelayo ngeNdodana? UJesu nguye olandela uYise ngobukhulu ezulwini lasemhlabeni. Wavuma ukunikela ngokuphila kwakhe ukuze sihlawulelwe. Nxa sitshengisa ngesikwenzayo ukuthi silokholo enhlawulweni, izono zethu zizathethelelwa, sibe ngabangane bakaNkulunkulu futhi sithole ukuphila okungapheliyo. (Joh. 3:16) UJesu ungumphristi wethu omkhulu. Uyafuna ukuthi inhlawulo isincede lokuthi sibe ngabangane bakaNkulunkulu abaseduze. (Heb. 4:15; 7:24, 25) UyiNkosi yoMbuso kaNkulunkulu yikho uJehova uzamsebenzisa ukuthi angcwelise ibizo lakhe, aqede ububi futhi alethe izibusiso ezingapheliyo ePharadayisi. (Mat. 6:9, 10; Isam. 11:15) UJesu wasitshiyela isibonelo okumele sisilingisele. (1 Phet. 2:21) Waphilela ukwenza intando kaNkulunkulu njalo lathi kumele senze njengaye.—Joh. 4:34.

¹³ Uzayithanda iNdodana kaNkulunkulu eligugu nxa ungakholwa lokho iBhayibhili elikutshoyo ngayo. Ukuyithanda kuzakwenza uzimisele ukuyilingisela ngokuphilela ukwenza intando kaNkulunkulu. Lokhu kuzakufuqa ukuthi uzinikele kuJehova futhi ubhabhathizwe.

14-15. Yiziphi izinto osuzifundile ngomoya ongcwele njalo wazikholwa?

¹⁴ Wezwa njani usufunde izinto ezilandelayo ngomoya ongcwele? Umoya ongcwele kawusiwo muntu kodwa ungamandla kaNkulunkulu. UJehova wawusebenzisa ukuthi aphefumulele abantu ababhala iBhayibhili. Umoya lo usinceda lokuthi sizwisise njalo sisebenzise esikubala eBhayibhilini. (Joh. 14:26; 2 Phet. 1:21) UJehova uyawusebenzisa ukuthi asinike “amandla amakhulu futhi angajayelekanga.” (2 Khor. 4:7) Umoya ongcwele usinika amandla okuthi sitshumayele izindaba ezinhle, silwisane lezilingo kanye lokudana njalo siqinisele nxa sisebunzimeni. Usinceda ukuthi sibe ‘lezithelo zomoya.’ (Gal. 5:22) UNkulunkulu ubapha ngesihle umoya ongcwele labo abamthembayo futhi abawucelayo.—Luk. 11:13.

¹⁵ Kuyaduduza sibili ukwazi ukuthi umoya ongcwele uyazinceda izinceku zikaJehova ukuthi zimkhonze. Nxa ungakukholwa  lokho osukufundile ngomoya ongcwele, uzazimisela ukuthi uzinikele kuNkulunkulu njalo ubhabhathizwe.

16. Yiziphi izinto esesixoxe ngazo?

¹⁶ Nxa ungazinikela kuNkulunkulu futhi ubhabhathizwe uyabe wenze into eqakatheke kakhulu. Sesifundile ukuthi kumele uzimisele ukwehlelwa yibunzima lokutshiya ezinye izinto. Kodwa izibusiso ozazithola zinengi kakhulu kulalokho okuzakulahlekela. Ukubhabhathizwa kungakusindisa futhi kukwenze ube lomzwangedwa omuhle phambi kukaNkulunkulu. Ukuthanda uJehova uNkulunkulu yiso isizatho esiqakatheke kulazo zonke sokuthi ubhabhathizwe. Kanti njalo kumele ukukholwe sibili lokho osukufundile ngoBaba, ngeNdodana langomoya ongcwele. Nxa uhlola lokho esesixoxe ngakho, ubona angani usukulungele yini ukubhabhathizwa?

17. Kuyini okunye okumele umuntu akwenze engakabhabhathizwa?

¹⁷ Nxa ubona angani usukulungele ukubhabhathizwa, akuthandabuzwa ukuthi kulezinto ezinengi osuzenzile ukuze ube ngumngane kaJehova. * Ukufundiswa iBhayibhili sonke isikhathi sekwenze wazi okunengi ngoJehova loJesu futhi waba lokholo. (Heb. 11:6) Uyazikholwa sibili izithembiso zikaJehova eziseBhayibhilini njalo kawuthandabuzi ukuthi umhlatshelo kaJesu ungakukhulula esonweni lasekufeni. Usuphendukile ezonweni zakho okutsho ukuthi uyazisola ngezinto ezimbi owazenzayo njalo usucele uJehova ukuthi akuxolele. Usuguqukile okutsho ukuthi usuzitshiyile izinto ezimbi owawuzenza futhi waqalisa ukuphila ngendlela ethokozisa uNkulunkulu. (ImiSeb. 3:19) Uzimisele ukutshela abanye ngalokho okukholwayo. Waba ngummemezeli ongabhabhathizwanga njalo waqalisa ukutshumayela lebandla. (Mat. 24:14) UJehova uyazigqaja ngawe ngenxa yokuthi ukwenzile konke lokhu. Okwenzileyo kumthokozise okwamagama.—Zaga. 27:11.

18. Kuyini okunye okumele ukwenze ungakabhabhathizwa?

¹⁸ Kulokunye futhi okumele ukwenze ungakabhabhathizwa. Sifundile ukuthi kumele uzinikele kuNkulunkulu. Khuleka kuye ngenhliziyo yonke uwedwa umthembisa ukuthi uzaphilela ukwenza intando yakhe. (1 Phet. 4:2) Nxa usukwenzile lokhu, tshela umhleli wequla labadala ukuthi usufuna ukubhabhathizwa. Yena uzacela abanye abadala ukuthi baxoxe lawe. Sicela ungesabi ukuxoxa labadala laba. Ungakhohlwa ukuthi abazalwane laba abalomusa bayakwazi futhi bayakuthanda. Bazaxoxa lawe ngemfundiso zeBhayibhili eziyisisekelo osuzifundile. Bayabe befuna ukubona ukuthi uyazizwisisa yini imfundiso lezi lokuthi uyakunanzelela yini ukuthi  ukuzinikela lokubhabhathizwa kuqakatheke kanganani. Nxa bebona ukuthi usukulungele ukubhabhathizwa bazakutshela ukuthi uzabhabhathizwa emhlanganweni wesiqinti kumbe owesabelo olandelayo.

19-20. Kuyini okumele ukwenze nxa usubhabhathiziwe njalo ungakwenza njani?

¹⁹ Kuyini okumele ukwenze nxa usubhabhathiziwe? * Khumbula ukuthi ukuzinikela yisifungo uJehova akhangelele ukuthi usigcine. Yikho nxa usubhabhathiziwe kumele usigcine isithembiso owasenza ngesikhathi uzinikela. Ungakwenza njani lokho?

²⁰ Hlala useduze lebandla. Nxa usubhabhathiziwe uyabe usungomunye wabazalwane abasenhlanganisweni. (1 Phet. 2:17) Abafowenu labodadewenu abasebandleni bayimuli yakho. Ubungane benu buzaqina nxa ungahlala ungena imihlangano yebandla. Bala iLizwi likaNkulunkulu nsuku zonke futhi ucabangisise ngelikutshoyo. (Hubo. 1:1, 2) Ngemva kokubala amavesi athile cabangisisa ngalokho osukubalile. Ungenza njalo, okubalileyo kuzathophela enhliziyweni yakho. ‘Hlala ukhuleka.’ (Mat. 26:41) Uzasondela kakhulu kuJehova nxa uthandaza kuye ngenhliziyo yonke. ‘Qhubeka ufuna kuqala uMbuso.’ (Mat. 6:33) Lokhu ungakwenza ngokuqakathekisa kakhulu umsebenzi wokutshumayela. Nxa ungahlala utshumayela, ukholo lwakho luzaqina njalo uzenelisa ukunceda abanye ukuthi bathole ukuphila okungapheliyo.—1 Tim. 4:16.

21. Kuyini ozakuthola ungabhabhathizwa?

²¹ Nxa ungazinikela kuJehova futhi ubhabhathizwe uyabe wenze into eqakatheke kulazo zonke ongazenza empilweni yakho. Kuliqiniso sibili ukuthi uzehlelwa yibunzima futhi kuzamele udele ezinye izinto. Kuzakunceda yini lokhu? Kakhulu! Loba yibuphi ubunzima obungakwehlelwa emhlabeni lo esiphila kuwo ‘ngobesikhatshana futhi abutsho lutho.’ (2 Khor. 4:17) Kodwa nxa ungabhabhathizwa uzathokoza khathesi njalo uthole “ukuphila koqobo” esikhathini esizayo. (1 Tim. 6:19) Yikho siyakucela ukuthi ucabangisise futhi ukhuleke ukuze ubone langabe usukulungele ukubhabhathizwa.