1. Omuntu manga inaa tameka okutunga egumbo, tango oku na okuninga shike?

DHILADHILA ando omuntu a tokola okutunga egumbo. Oku shi kutya okwa hala okutunga egumbo lya tya ngiini. Mbela oku na owala okuthikila ta landa iitungitho e ta tameke okutunga? Aawe. Manga inaa tameka, oku na okuninga oshinima shimwe sha simana, ano okuyalula kutya egumbo ndyoka otali ke mu pula shi thike peni. Omolwashike? Omolwaashoka okwa pumbwa okutseya ngele oku na oshimaliwa sha gwana shoku li manitha. Ngele okwa kuutumba e ta yalula nawanawa kutya otali ke mu pula shi thike peni, nena ota ka vula okumana egumbo lye.

2. Shi ikolelela kuLukas 14:27-30, owa pumbwa okudhiladhila muule kombinga yashike, manga inoo ninginithwa?

² Mbela ohole yoye yokuhola Jehova nosho wo oku mu pandula, oye ku inyengitha wu kale wa hala okuninginithwa? Ngele osho, nangoye owu li monkalo ya fa yomulumentu ngoka a hala okutunga egumbo. Omolwashike tatu tile ngawo? Natu taleni koohapu dhaJesus, ndhoka dhi li muLukas 14:27-30. (Lesha.) Jesus okwa li ta popi shoka sha kwatelwa mo mokukala omulongwa gwe. Tu li aalanduli ye, otu na okukala tu na ehalo lyokutaamba ko ‘shoka’ sha kwatelwa mo kutya nduno omashongo nenge omaiyambo. (Luk. 9:23-26; 12:51-53) Onkene manga inoo ninginithwa, owa pumbwa okudhiladhila muule kombinga yaashihe shoka sha kwatelwa mo. Kungawo, oto ka kala wi ilongekidhila okulongela Kalunga nuudhiginini, wu li Omukriste a ninginithwa.

3. Oshike tatu ka kundathana moshitopolwa shika?

³ Mbela okuninga omulongwa gwaKristus oku na ngaa uuwanawa mboka itaawu vulu okuyelekwa nomashongo ngoka to tsakaneke nosho wo shoka to yamba po? Eeno! Okuninginithwa ohaku etele omuntu omayambeko ogendji ngashingeyi nomonakuyiwa. Natu ka kundathaneni omapulo gamwe ga simana kombinga yokuninginithwa. Oku shi ninga, otashi ke ku kwathela wu yamukule  epulo ndika tali ti: “Mbela ondi ilongekidha okuninginithwa?”

4. (a) Eiyapulo oshike? (b) Ngaashi sha popiwa muMateus 16:24, ‘okwiidhimbwa’ otashi ti shike?

⁴ Eiyapulo oshike? Manga inoo ninginithwa, tango owu na okwiiyapulila Jehova. Uuna to mu iyapulile, oho shi ningi okupitila megalikano tali zi komutima noho mu lombwele kutya oto ke mu longela sigo aluhe. Uuna wi iyapulile Kalunga, oho ‘idhimbwa.’ (Lesha Mateus 16:24.) Oho ningi omupiya gwe, shoka shi li uuthembahenda wi ikalekelwa. (Rom. 14:8) Kungawo, owe mu lombwela kutya okuza esiku ndyono, oye to kala wa pititha komeho, pehala lyokupititha komeho omahalo goye mwene. Eiyapulo lyoye oli li egano, ano euvaneko ndyoka wa ningila Kalunga. Ihe tu thiminike tu ninge egano ndyoka. Ndele ngele otwe li ningi, oha kala a tegelela tu li gwanithe po. — Eps. 116:12, 14.

5. Eiyapulo olya pambathana ngiini neninginitho?

⁵ Eiyapulo olya pambathana ngiini neninginitho? Eiyapulo oshinima shopaumwene shoka hashi kala owala pokati koye naJehova. Eninginitho ohali ningwa montaneho yaantu, nolundji ohali ningilwa poshigongi shoshikandjo nenge shoshitopolwa. Uuna to ninginithwa, oho ulukile yalwe kutya owi iyapulila nale Jehova. * Onkee ano, okuninginithwa kwoye ohaku ulukile yalwe kutya owu hole Jehova Kalunga koye nomutima gwoye aguhe, nomwenyo gwoye aguhe, nomadhiladhilo goye agehe nonoonkondo dhoye adhihe. Ohaku ulike wo kutya owa tokola wu mu longele sigo aluhe. — Mark. 12:30.

6-7. Ngaashi sha popiwa muPetrus gwotango 3:18-22, omolwomatompelo gaali geni eninginitho lya pumbiwa?

⁶ Mbela osha pumbiwa ngaa omuntu a ninginithwe? Natu taleni koohapu ndhoka dhi li muPetrus gwotango 3:18-22. (Lesha.) Ngaashi owala Noa a ulike kutya oku na eitaalo, sho a tungu onguluwato, okuninginithwa kwoye ohaku gandja wo uumbangi kutya owi iyapulila Jehova. Ihe mbela eninginitho olya pumbiwa ngaa shili? Eeno. Petrus okwe tu pa omatompelo. Lyotango, otali tu “hupitha.” Otatu vulu okuhupithwa omolweninginitho, ngele otwa katuka oonkatu ndhoka tadhi ulike kutya otu na eitaalo muJesus, otwi itaala kutya okwe tu sila, okwa londa a ya megulu noku li ngashingeyi “kolulyo lwaKalunga.”

⁷ Etiyali, ngele otwa ninginithwa, ohatu kala tu na “eiyuvo ewanawa.” Uuna twi iyapulile Kalunga, e tatu ninginithwa, ohatu kala tu na ekwatathano li ikalekelwa naye. Molwaashoka otwi iyela lela ombedhi notu na eitaalo mekuliloyambo, Kalunga ohe tu dhimine po oondjo dhetu. Shoka ohashi tu kwathele tu kale tu na eiyuvo lya yela.

8. Oshike shi na oku ku inyengitha wu ninginithwe?

⁸ Oshike shi na oku ku inyengitha wu ninginithwe? Sho wa kala nokukonakona Ombiimbeli nuukeka, owi ilongo oshindji kombinga yaJehova, mwa kwatelwa omaukwatya ge noondjila dhe. Shoka wi ilonga kombinga ye, oshe ku guma lela komutima noshe ku inyengitha wu kale wu mu hole noonkondo. Ohole yoye yokuhola Jehova oyo nayi kale oshinima sha simanenena shoka tashi ku inyengitha wu ninginithwe.

9. Ngaashi sha popiwa muMateus 28:19, 20, okuninginithwa medhina lyaHe, nOlyomwana nolyombepo ondjapuki, otashi ti shike?

⁹ Etompelo lilwe ndyoka hali ku inyengitha wu ninginithwe, oosho wi ilonga oshili yOmbiimbeli nowe yi itaala. Tala shoka Jesus a ti, sho a gandja elombwelo lyokuninga aantu aalongwa. (Lesha Mateus 28:19, 20.) Jesus okwa ti kutya mboka taya ninginithwa, oye na oku shi ninga “medhina lyaHe nolyOmwana nolyombepo ondjapuki.” Shika otashi ti shike? Owu na okwiitaala nomutima gwoye aguhe oshili yOmbiimbeli kombinga yaJehova, yOmwana, Jesus, nokombinga  yombepo ondjapuki. Oshili kombinga yiinima mbyono, oyi na omungunda notayi vulu oku ku guma lela komutima. (Heb. 4:12) Natu ka taleni oshili kombinga yiinima yimwepo.

10-11. Oshili yini wi ilonga kombinga yaTate yetu nowe yi itaala?

¹⁰ Dhiladhila owala sho wi ilongo oshili kombinga yaKalunga. Owi ilonga kutya ‘edhina lye oJehova,’ oye “awike Omukombandambanda kombanda yevi alihe” noye awike ‘Kalunga kashili.’ (Eps. 83:18, yelekanitha NW; Jes. 37:16) Oye Omushiti gwetu noye “ha gandja esindano” nenge tu tye ehupitho. (Eps. 3:8; 36:9) Okwa ninga elongekidho, opo tu mangululwe muulunde nomeso. Okwe tu pa wo etegameno lyomwenyo gwaaluhe. (Joh. 17:3) Eiyapulo lyoye neninginitho otayi ke ku ndhindhilikitha mo wu li Onzapo yaJehova. (Jes. 43:10-12) Oto ka kala oshitopolwa shaantu mboka taye mu longele muuyuni awuhe, mboka ye shi tala ko shi li uuthembahenda okwiithanwa nedhina lye noku li tseyithila yalwe. — Eps. 86:12.

¹¹ Oshi li lela uuthembahenda okukala tu shi shoka Ombiimbeli tayi longo kombinga yaTate yetu. Uuna wi itaala oshili ndjoka yi na ongushu, otashi ke ku inyengitha wu iyapulile Jehova nowu ninginithwe.

12-13. Oshili yiinima yini wi ilonga kombinga yOmwana gwaKalunga nowe yi itaala?

¹² Owa li wu uvite ngiini, sho wi ilongo oshili yiinima tayi landula kombinga yOmwana gwaKalunga? Jesus oye omuntu omutiyali a simanenena meshito alihe. Oye Omukulili gwetu. Okwe tu sile nehalo ewanawa. Uuna iilonga yetu tayi ulike kutya otu na eitaalo mekulilo, otatu vulu okudhiminwa po oondjo dhetu, okukala nekwatathano naKalunga noku ka mona omwenyo gwaaluhe. (Joh. 3:16) Jesus oye Omuyambi gwetu Omukuluntu. Okwa hala oku tu kwathela tu mone uuwanawa mekuliloyambo notu kale tu na ekwatathano lyopothingo naKalunga. (Heb. 4:15; 7:24, 25) Jesus oye Omukwaniilwa gwUukwaniilwa waKalunga. Jehova ote ke mu longitha a yapulithe edhina Lye, a hulithe po uukolokoshi noku ete omalalekonuuyamba taga kalelele mOparadisa. (Mat. 6:9, 10; Eh. 11:15) Jesus oye oshiholelwa shetu shoka tu na okulandula. (1 Pet. 2:21) Okwe tu tulila po oshiholelwa, sho a kala ta longo ehalo lyaKalunga onkalamwenyo ye ayihe. — Joh. 4:34.

¹³ Uuna wi itaale shoka Ombiimbeli tayi tu longo kombinga yaJesus, ohashi ku kwathele wu kale wu mu hole. Ohole ndjoka otayi ke ku inyengitha wu longe ehalo lyaKalunga monkalamwenyo yoye ayihe, ngaashi Jesus. Oshizemo oshini? Oto ka kala wa hala okwiiyapulila Jehova nokuninginithwa.

14-15. Oshili yiinima yini kombinga yombepo ondjapuki wi ilonga nowe yi itaala?

¹⁴ Owa li wu uvite ngiini, sho wi ilongo oshili yiinima tayi landula kombinga yombepo ondjapuki? Owi ilongo kutya kayi shi omuntu, ihe oonkondo dhaKalunga. Okwe yi longitha a wilike aantu ya nyole Ombiimbeli. Ohayi tu kwathele wo tu uve ko shoka tatu ilongo mOmbiimbeli noku shi tula miilonga. (Joh. 14:26; 2 Pet. 1:21) Okupitila mombepo ondjapuki, Jehova ohe tu pe “oonkondo dhi vule ndhoka dhopaunshitwe.” (2 Kor. 4:7, NW) Ombepo yaJehova ohayi tu pe oonkondo tu vule okuuvitha onkundana ombwanawa, tu kondjithe omamakelo, kaatu teke omukumo notu idhidhimikile omayeleko. Ohayi tu kwathele tu ulike omaukwatya omawanawa ngoka ge li oshitopolwa ‘shoshiyimati shombepo.’ (Gal. 5:22) Kalunga oha gandja nehalo ewanawa ombepo ye kwaamboka ye mu inekela nohaye yi mu indile nomutima aguhe. — Luk. 11:13.

¹⁵ Otashi hekeleke lela okutseya kutya aapiya yaJehova otaya vulu okwiinekela ombepo ondjapuki yi ya kwathele, ye mu longele. Uuna wi itaale oshili yiinima mbyoka wi ilonga kombinga yombepo ondjapuki, otashi ke ku inyengitha wu iyapulile Kalunga nowu ninginithwe.

16. Oshike twi ilonga sigo opo mpaka?

 ¹⁶ Uuna wa tokola okwiiyapulila Kalunga nowu ninginithwe, oshi li onkatu ya simana. Ngaashi twa zi nokwiilonga, kala wu na ehalo lyokutaamba ko shoka sha kwatelwa mo kutya nduno omashongo nenge omaiyambo. Omayambeko ngoka to ka mona, itaga vulu okuyelekwa niinima mbyoka. Ngele owa ninginithwa, oto vulu oku ka hupithwa nokukala neiyuvo ewanawa koshipala shaKalunga. Shoka shi na oku ku inyengitha wu ninginithwe, nashi kale unene ohole yoye yokuhola Jehova Kalunga. Owu na wo okukala wi itaala nomutima gwoye aguhe oshili ndjoka wi ilonga kombinga yaTate yetu, yOmwana noyombepo ondjapuki. Konima yokudhiladhila kwaashoka twa zi nokwiilonga, oto ka yamukula ngiini epulo ndika tali ti: “Mbela ondi ilongekidha okuninginithwa?”

17. Oonkatu dhimwepo dhini omuntu ha katuka, manga inaa ninginithwa?

¹⁷ Ngele owu wete kutya owi ilongekidha okuninginithwa, osha yela kutya owa katuka nale oonkatu dhontumba wu tunge ekwatathano lyoye ewanawa naJehova. * Owi ilonga oshindji kombinga yaJehova naJesus, okupitila mokukonakona kwoye Ombiimbeli pandjigilile. Okwe ku kwathela wo wu kale wu na eitaalo. (Heb. 11:6) Owi inekela thiluthilu momauvaneko gaJehova ngoka ge li mOmbiimbeli nowa tompwa kutya eitaalo lyoye mekuliloyambo lyaJesus, otali vulu oku ku hupitha muulunde nomeso. Owi iyela ombedhi omolwomayono goye, owi ipa uusama, omolwomapuko ngoka wa ninga nowa pula Jehova e ku dhimine po. Owa ningi omalunduluko monkalamwenyo yoye, owa etha okulandula oondjila dhoye oombwinayi nowa tameke okulandula ondjila ndjoka yi li metsokumwe nehalo lyaKalunga. (Iil. 3:19) Owa halelela okulombwela yalwe kombinga yeitaalo lyoye. Owa gwana okuninga omuuvithi inaa ninginithwa nokutameka okuuvitha pamwe negongalo. (Mat. 24:14) Jehova oku ku uvitile uuntsa, sho wa katuka oonkatu ndhoka dha simana. Sho wa ningi ngawo, owa nyanyudha omwenyo gwe. — Omayel. 27:11.

18. Oshike ishewe wa pumbwa okuninga, manga inoo ninginithwa?

¹⁸ Manga inoo ninginithwa, opu na iinima yontumba mbyoka wa pumbwa okuninga. Ngaashi twi ilongo metetekelo, owu na okwiiyapulila Kalunga. Popya naye paumwene megalikano tashi zi komutima noku mu uvanekela kutya oto ka longa ehalo lye monkalamwenyo yoye ayihe. (1 Pet. 4:2) Opo nduno, tseyithila omuunganeki gwolutu lwaakuluntugongalo kutya owa hala okuninginithwa. Ota ka pula aakuluntugongalo yontumba ye ye ya popye nangoye. Ino kala to ipula unene kombinga yaashoka. Aamwatate mboka oye ku shi nale noye ku hole. Otaya ka kundathana nangoye omalongo gOmbiimbeli gopetameko ngoka wi ilonga. Ohaye shi ningi, opo ya shilipaleke ngele owu ga uvite ko nokutala ngele owu shi esimano lyeiyapulo neninginitho.  Ngele oya mono kutya owu uvite ko, ohaye ku tseyithile kutya oto vulu okuninginithwa poshigongi shoshikandjo nenge shoshitopolwa tashi landula.

19-20. Oshike wa pumbwa okuninga konima ngele wa ninginithwa, nongiini to vulu oku shi ninga?

¹⁹ Oshike wa pumbwa okuninga konima ngele wa ninginithwa? * Dhimbulukwa kutya eiyapulo egano nonokutya Jehova okwa tegelela wu kale metsokumwe nalyo. Onkee ano, konima ngele wa ninginithwa, owu na okukala metsokumwe neiyapulo lyoye. Ongiini to vulu oku shi ninga?

²⁰ Kala ho gongala pandjigilile. Shampa wa ninginithwa, oho ningi oshitopolwa ‘shooitaali ooyakweni’ muuyuni awuhe. (1 Pet. 2:17) Aamwatate naamwameme megongalo, ohaya kala ya fa aanegumbo yaandjeni. Ngele owa kala ho gongala pandjigilile, oto ka koleka ekwatathano lyoye nayo. Kala ho lesha Oohapu dhaKalunga esiku kehe nokutedhatedha kudho. (Eps. 1:1, 2) Konima ngele wa lesha oovelise dhontumba mOmbiimbeli, kutha ethimbo wu tedhatedhe kudho. Kungawo, otadhi ka ningina momutima gwoye. Kala ho ‘galikana.’ (Mat. 26:41) Omagalikano goye taga zi komutima, otage ke ku hedhitha popepi naJehova. Ombiimbeli otayi ti: “Tangotango kongeni Oshilongo shaKalunga.” (Mat. 6:33) Shoka oto vulu oku shi ninga, mokupititha komeho iilonga yokuuvitha monkalamwenyo yoye. Ngele owa kala ho kutha ombinga miilonga yokuuvitha pandjigilile, oto ka kala wu na eitaalo lya kola. Otashi vulika wo wu kwathele yalwe, opo ya mone ondjila ndjoka tayi fala komwenyo gwaaluhe. — 1 Tim. 4:16.

21. Eninginitho lyoye otali ke ku egululila ondjila yashike?

²¹ Etokolo lyoye lyokwiiyapulila Jehova nokuninginithwa, olyo dhingi. Odhoshili kutya olya kwatela mo omashongo nomaiyambo. Mbela omayambeko ngoka to ka mona oge vulithe pomashongo nomaiyambo ngono? Eeno. Omaupyakadhi kehe ngoka tashi vulika wu tsakaneke muuyuni mbuka wa kolokosha, ‘ogopakathimbo notatu vulu okupita mo mugo.’ (2 Kor. 4:17, yelekanitha NW.) Eninginitho lyoye, otali ke ku egululila ondjila yokukala wu na ombili ngashingeyi nosho wo “okukalamwenyo kwashili” monakuyiwa. (1 Tim. 6:19) Onkee ano, dhiladhila muule nokugalikana kombinga yeyamukulo lyoye kepulo ndika tali ti: “Mbela ondi ilongekidha okuninginithwa?”