1. Hadia zinangea ifalua si samösa niha fatua lö ibörögö wamazökhi omo?

KHALAIGÖ so samösa niha si no mangai angetula ba wamazökhi omo. No aboto ba dödönia hewisa nomo sinangea ifazökhi. Hadia iʼanemaiʼö möi ia ba toko ba wowöli gama-gama, ba ibörögö wamazökhi yaʼia? Tatu manö, löʼö. Fatua lö ibörögö wamazökhi yaʼia, moguna iʼerai hawaʼebua gefe niʼogunaʼö. Hadia mbörö? Börö me moguna itatugöi hadia ibönö gefenia ba wamazökhi omo andrö irege awai. Na no ihaogö wangerai hawaʼebua gefe niʼogunaʼö fatua lö ibörögö wamazökhi yaʼia, hasambalö tola iʼasiwai wamazökhi omo andrö.

2. Moloʼö Luka 14:27-30, hadia zinangea öhaogö öʼangeragö fatua lö tebayagö ndraʼugö idanö?

² Börö me öʼomasiʼö Yehowa ba öʼandrö saohagölö ba ngawalö zi sökhi si no ifalua khömö, tola manö terou dödöu ba wombayagö ndraʼugö idanö. Hizaʼi, fatua lö tebayagö ndraʼugö idanö, hadia zinangea öfalua? Moguna öʼerai simane nifalua niha samazökhi omo no mege. Hadia mbörö? Nehegö wehede Yesu si so ba Luka 14:27-30. (Baso.) Nitutunö Yesu andre manandrösa ia ba zinangea tafalua enaʼö tola tobali nifahaʼönia. Na omasi ita tobali nifahaʼö Keriso, moguna tataögö gabula dödö ba tatehegö zi so khöda. (Luk. 9:23-26; 12:51-53) Börö daʼö, fatua lö tebayagö ndraʼugö idanö, moguna öhaogö öʼangeragö hadia manö dania nitaögöu na no tobali nifahaʼö Keriso. Na öfalua daʼö, tola itugu tefaʼanö ndraʼugö ba wamosumange Lowalangi si fao faʼalöfaröi na no tobali niha Keriso si no tebayagö idanö.

3. Hadia nitutunöda ba artikel daʼa?

³ Howu-howu nitemamö na no tobali nifahaʼö Yesu, abölö ebua moroi ba ngawalö zi no ötehegö. Na no tebayagö ndraʼugö idanö, oya howu-howu nitemamö iadaʼa hegöi ba zi so miföna. Ba artikel daʼa, so ösa wanofu-nofu si tohude nitutunöda sanandrösa ba wombayagö idanö. Daʼa zanolo yaʼugö ba wameʼe fanema li ba wanofu, ”Hadia no sinangea tebayagö ndraʼo idanö?”

4. (a) Hadia geluaha wolulu faʼauri khö Yehowa? (b) Hadia geluaha wehede nitutunö ba Mataiʼo 16:24 wa ’tenga ha ba khöu auri ndraʼugö’?

⁴ Hadia geluaha wolulu faʼauri? Fatua lö si tebayagö ndraʼugö idanö, moguna ölulu waʼaurimö khö Yehowa. Hewisa lalania? Angandrö soroi ba dödö ba fatunö khö Yehowa wa omasi ndraʼugö ba wangogunaʼö faʼaurimö ba wamosumange yaʼia sagötö faʼara. Me ölulu waʼaurimö khö Lowalangi ’tenga ha ba khöu auri ndraʼugö’. Öfatunö khö Yehowa wa iʼotarai daʼö, famosumange yaʼia zabölö öʼofönaiʼö ba waʼaurimö, tenga ba wangomusoiʼö tödöu samösa. (Baso Mataiʼo 16:24.) Tobali ndraʼugö tana khö Yehowa, ba no töi si sökhi daʼö. (Rom. 14:8) Folulu faʼauri andre no buʼusa li soroi ba dödö khö Lowalangi. Lö ifaso ita Yehowa enaʼö fawuʼu li ita khönia. Hizaʼi, na no tafabuʼu, omasi Yehowa enaʼö lö mamalö tafalua daʼö.​—Zin. 116:12, 14.

5. Hadia gamaehuta wolulu faʼauri ba famayagö idanö?

⁵ Hadia gamaehuta wolulu faʼauri ba famayagö idanö? Me ölulu waʼaurimö khö Yehowa, lö hadöi niha böʼö sangila daʼö. Hizaʼi, ato niha sangila me öbayagö ndraʼugö idanö, börö me toʼölö mufalua daʼö ba kebaktian. Me tebayagö ndraʼugö idanö, öforomaʼö ba niha sato wa no ölulu waʼaurimö khö Yehowa. * Börö daʼö, tola laʼila wa öʼomasiʼö Yehowa moroi siʼaikö ba dödöu, nosou, era-erau, hegöi faʼabölöu, ba öhalö gangetula ba wamosumange Yehowa sagötö faʼara.​—Mrk. 12:30.

6-7. Moloʼö 1 Fetero 3:18-22, hadia zi dombua dane-dane wa moguna sibai wamayagö idanö?

⁶ Hadia moguna wamayagö idanö? Angeragö ngawua wehede ba 1 Fetero 3:18-22. (Baso.) Owo nifazökhi Noakhi, no sambua tandra wa mamati ia khö Lowalangi. Simanö göi, famayagö idanö no sambua tandra wa no ölulu waʼaurimö khö Yehowa. Hizaʼi, hadia moguna wamayagö idanö andrö? Moguna. Ifatunö khöda Fetero hadia dane-danenia. Si oföna, daʼö ’zangorifi yaʼugö’. Tola iʼorifi ita famayagö idanö na no taforomaʼö wa mamati ita khö Yesu, faduhu dödöda wa mate ia salahida, tesusugi ia ba zorugo, ba iadaʼa so ia ”ba gambölö Lowalangi”.

⁷ Si dua, na tebayagö ita idanö, taʼokhögö ’dödö side-ide si lö sinegu’. Na no aefa talulu waʼaurida khö Lowalangi ba tebayagö ita idanö, taʼokhögö wahuwusa si sökhi khönia. Börö me no tafalalini gera-erada ba mamati ita ba höli, iʼefaʼö horöda Lowalangi. Andrö wa tola taʼokhögö ’dödö side-ide si lö sinegu’ föna Lowalangi.

8. Hadia dane-dane si oföna wa omasi ndraʼugö tebayagö idanö?

⁸ Hadia dane-dane si oföna wa omasi ndraʼugö tebayagö idanö? Na no öhaogö öfahaʼö ndraʼugö ba Zura Niʼamoniʼö, oya niʼilamö iadaʼa sanandrösa khö Yehowa, simane amuata hegöi lala wangera-ngerania. Tofakha ba dödömö zi no öfahaʼö yaʼugö, irege öʼomasiʼö sibai Yehowa. Faʼomasi andrö zi tobali dane-dane si oföna wa omasi ndraʼugö tebayagö idanö.

9. Hadia geluahania tebayagö idanö ba döi Nama, Ono, hegöi eheha niʼamoniʼö, simane niwaʼö ba Mataiʼo 28:19, 20?

⁹ Dane-dane tanö böʼö waʼomasi ndraʼugö tebayagö idanö, yaʼia daʼö börö me no öfaduhusi tödö zi no öfahaʼö yaʼugö moroi ba Zura Niʼamoniʼö. Nehegö hadia niwaʼö Yesu me ifaretakö ita ba wombaliʼö nifahaʼö. (Baso Mataiʼo 28:19, 20.) Moloʼö Yesu, moguna tebayagö idanö zi samösa niha ”ba döi Nama, ba döi Nono, ba döi geheha niʼamoniʼö”. Hadia geluaha wehede Yesu andrö? Moguna öfaduhusi tödö soroi ba dödö zindruhu si so ba Zura Niʼamoniʼö sanandrösa khö Yehowa, Yesu, hegöi eheha niʼamoniʼö. Afönu faʼabölö fefu zindruhu andrö ba tola tofakha  ba dödömö. (Heb. 4:12) Datatutunö hadia manö zindruhu andrö.

10-11. Hadia manö zindruhu sanandrösa khö Namada Yehowa si no öfahaʼö yaʼugö ba öfaduhusi tödö?

¹⁰ Fuli angeragö me öfahaʼö ndraʼugö ba zindruhu sanandrösa khö Namada: ’Töinia Yehowa’, yaʼia ”Wondrege Zalawa ba gulidanö maʼasagörö”, ba ’ha yaʼia Lowalangi’. (Zin. 83:19; Yes. 37:16) Yaʼia Zomböi yaʼita, ba ’khönia wangorifi’. (Zin. 3:9; 36:10) No itatugöi enaʼö tola teʼefaʼö ita moroi ba horö hegöi faʼamate, ba no ibeʼe khöda dötönafö faʼauri sagötö faʼara. (Yoh. 17:3) Me ölulu waʼaurimö khö Yehowa ba tebayagö idanö, tobali ndraʼugö Samaduhuʼö Yehowa. (Yes. 43:10-12) Farahu ndraʼugö ba nösi nomo ndra Samaduhuʼö Yehowa si so ba zi sagörö ulidanö, sangokhögö faʼomuso dödö börö me no laʼotöigö döi Lowalangi, ba lafatunö döi daʼö ba niha böʼö.​—Zin. 86:12.

¹¹ Tatu taʼandrö sibai saohagölö me no aboto ba dödöda hadia niwaʼö Zura Niʼamoniʼö sanandrösa khö Namada Yehowa. No töi si sökhi daʼa! Na öfaduhusi tödö fefu zindruhu andrö, terou dödömö ba wolulu faʼaurimö khö Yehowa ba tebayagö idanö.

12-13. Hadia manö zindruhu sanandrösa khö Nono Lowalangi si no öfahaʼö yaʼugö ba öfaduhusi tödö?

¹² Hewisa dödömö me öʼila zindruhu andre sanandrösa khö Nono Lowalangi? Yesu, no fondrege zalawa numero dua ba mbanua si yawa awö danö. Yaʼia Zangöhöli yaʼita, ba ibeʼe nosonia salahida si fao faʼaohagölö. Na mamati ita ba höli si no ibeʼe Yesu ba taforomaʼö daʼö ba mbua-buada, hasambalö wa tola muʼefaʼö horöda. Baero daʼö, tola fahuwu ita khö Lowalangi ba taʼokhögö waʼauri si lö aetu. (Yoh. 3:16) Yesu andrö, no Ere Sebua ia khöda. Börö wanolonia, tola tasöndra mbua moroi ba höli, ba taʼokhögö wahuwusa si sökhi khö Lowalangi. (Heb. 4:15; 7:24, 25) Yaʼia Razo ba Wamatörö Lowalangi. Iʼogunaʼö ia Yehowa ba wangamoniʼö töinia, ba wangohori si lö sökhi, hegöi ba wangaʼasogö howu-howu ba gulidanö Faradaiso sagötö faʼara. (Mat. 6:9, 10; Fam. 11:15) Yesu, no duma-duma sinangea taʼoʼö. (1 Fet. 2:21) Iʼogunaʼö waʼaurinia ba wamalua ohitö dödö Lowalangi, ba omasi ita taʼoʼö duma-dumania andrö.​—Yoh. 4:34.

¹³ Me no öfaduhusi tödö nifahaʼö Zura Niʼamoniʼö sanandrösa khö Yesu, tatu öʼomasiʼö Nono Lowalangi andrö. Faʼomasi andrö zamarou tödöu ba woloʼö duma-duma Yesu, ba ölulu waʼaurimö ba wamalua ohitö dödö Lowalangi. Daʼö mbörö wa tefarou dödömö ba wolulu faʼaurimö khö Yehowa ba tebayagö idanö.

14-15. Hadia manö zindruhu sanandrösa ba geheha niʼamoniö si no öfahaʼö yaʼugö ba öfaduhusi tödö?

¹⁴ Hewisa dödöu me öʼila zindruhu andre sanandrösa ba geheha niʼamoniʼö? Eheha niʼamoniʼö andrö tenga lowalangi, hizaʼi faʼabölö Lowalangi. Iʼogunaʼö geheha niʼamoniʼö Yehowa ba wameʼe fanuturu lala ba ndra matua sanura Zura Niʼamoniʼö. Tola göi möi fanoloda daʼö ba wangokhögö faʼaboto ba dödö hegöi ba wamalua hadia nibasoda ba Zura Niʼamoniʼö. (Yoh. 14:26; 2 Fet. 1:21) Iʼogunaʼö geheha niʼamoniʼö Yehowa ba wameʼe khöda ’faʼabölö sahöli-höli dödö’. (2 Kor. 4:7) Eheha andrö zameʼe khöda faʼabölö ba wanuriaigö turia somuso dödö, ba wanimbagö fondrönisi dödö, ba wanaögö faʼafatö dödö, hegöi ba wanaögö fanandraigö. Eheha niʼamoniʼö göi zanolo yaʼita ba wangoromaʼö mbua-bua si sökhi, yaʼia daʼö ”bua-bua geheha”. (Gal. 5:22) Hasambalö ibeʼe gehehania Lowalangi ba niha sangandrö soroi ba dödö hegöi samati khönia.​—Luk. 11:13.

¹⁵ Faduhu dödö nono mbanua Yehowa wa itolo ira eheha niʼamoniö enaʼö lö faröi ba wamosumange yaʼia. Tatu möi fangaroʼöda daʼa! Me no öfaduhusi tödö fefu zindruhu sanandrösa ba geheha niʼamoniʼö, hasambalö terou dödömö ba wolulu faʼaurimö khö Yehowa ba tebayagö idanö.

16. Hadia manö zi no tatutunö?

 ¹⁶ Me ölulu waʼaurimö khö Yehowa ba tebayagö ndraʼugö idanö, no öhalö gangetula sabölö moguna. Simane si no tatutunö, moguna öfaʼanö ndraʼugö ba wanaögö abula dödö ba ötehegö hadia zi so khömö. Hizaʼi, abölö ebua howu-howu nitemamö moroi ba ngawalö zi no ötehegö. Na no tebayagö idanö, tola teʼorifi ndraʼugö ba öʼokhögö dödö side-ide si lö sinegu föna Lowalangi. Dane-dane si oföna wa omasi ndraʼugö tebayagö idanö, yaʼia daʼö börö waʼomasimö khö Lowalangi. Moguna göi öfaduhusi tödö soroi ba dödö zindruhu si no öfahaʼö yaʼugö sanandrösa khö Nama, Ono, ba eheha niʼamoniʼö. Me no tatutunö fefu daʼa, hadia tola öbeʼe wanema li ba wanofu, ”Hadia no sinangea tebayagö ndraʼo idanö?”

17. Hadia manö zinangea öfalua fatua lö tebayagö ndraʼugö idanö?

¹⁷ Na örasoi wa no sinangea tebayagö ndraʼugö idanö, tatu oya zi no öfalua enaʼö tola öʼokhögö wahuwusa si sökhi khö Yehowa. * Hadia manö zi no öfalua? Börö me lö öböhöli ba wamahaʼö yaʼugö ba Zura Niʼamoniʼö, oya waʼaboto ba dödö niʼilamö sanandrösa khö Yehowa hegöi Yesu. No öʼaroʼö wamatimö. (Heb. 11:6) Faduhu sibai dödöu ba zi no ifabuʼu Yehowa si so ba Zura Niʼamoniʼö, ba aro dödöu wa famatimö ba höli si no ibeʼe Yesu, tola möi fangorifimö moroi ba horö hegöi faʼamate. No öfalalini gera-eramö moroi ba horö si no öfalua. Sindruhu-ndruhu mangesa dödömö, ba no öʼandrö wangefa moroi khö Yehowa. No öbulöʼö waʼauriu. No öböhöli wamalua fefu zi lö sökhi si no irai öfalua ba zilalö, ba iadaʼa öʼokhögö lala waʼauri sangomusoiʼö tödö Lowalangi. (Hal. 3:19) Omasiʼö sibai göi ba wamatunö ba niha böʼö sanandrösa ba nifaduhusimö tödö. No sinangea tobali ndraʼugö sanuriaigö si lö mubayagö idanö ba fao ndraʼugö manuriaigö khö ndra talifusöda ba mbanua niha Keriso. (Mat. 24:14) Omuso sibai dödö Yehowa me no ofalua fefu daʼö. Sindruhu wa no öʼomusoiʼö dödönia.​—Gamd. 27:11.

18. Hadia nasa zinangea öfalua fatua lö tebayagö ndraʼugö idanö?

¹⁸ Fatua lö tebayagö ndraʼugö idanö, so nasa danö böʼö sinangea öfalua. Simane si no tatutunö, moguna ölulu waʼaurimö khö Yehowa. Angandrö soroi ba dödö khö Yehowa, ba fabuʼu khönia wa hasambalö öʼogunaʼö waʼauriu ba wamalua ohitö dödönia. (1 Fet. 4:2) Aefa daʼö, tola öfatunö khö koordinator zatua sokubaloi wa omasi ndraʼugö tebayagö idanö. Yaʼia zotatugöi enaʼö so ndra satua sokubaloi zamalukhaisi yaʼugö. Lö moguna ataʼu ndraʼugö ba wamalukhaisi yaʼira. Tatu no ara laʼila ba laʼomasiʼö ndraʼugö ira talifusöda si sökhi tödö andre. Fao ira khöu ba wanutunö dane-dane wamahaʼö Zura Niʼamoniʼö si no öfahaʼö yaʼugö. Omasi laʼila hadia aboto ba dödöu wamahaʼö andrö, ba öʼila wa tenga  si famai-mai wolulu faʼauri hegöi famayagö idanö. Na faduhu dödöra wa no sinangea tebayagö ndraʼugö idanö, lafatunö khöu wa no tola tebayagö ndraʼugö idanö, na mufalua kebaktian ba zi so miföna.

19-20. Hadia manö zinangea öfalua me no tebayagö ndraʼugö idanö, ba hewisa wamaluamö daʼö?

¹⁹ Na no tebayagö ndraʼugö idanö, hadia zinangea öfalua? * Böi olifuʼö wa folulu faʼauri nifaluamö andrö no buʼusa li, ba omasi Yehowa na öfalua zi no öfabuʼu. Börö daʼö, na no tebayagö ndraʼugö idanö, moguna öʼforomaʼö wa sindruhu-ndruhu no ölulu waʼauriu khö Yehowa. Hewisa wamalua daʼö?

²⁰ Böi fandröndröu ndraʼugö ba mbanua niha Keriso. Me no tobali ndraʼugö niha Keriso si no tebayagö idanö, no tefarahu ndraʼugö ba gotalua ndra ’talifusömö ba wamati’. (1 Fet. 2:17) Ira talifusö ba mbanua niha Keriso andrö no talifusöu ba wamati. Börö daʼö, böi böhöli weʼamöi ba gangowuloa enaʼö tola öʼaroʼö wahuwusau khö ndra talifusömö. Moguna göi öbaso ba öʼangerönusi Zura Niʼamoniʼö ero maʼökhö. (Zin. 1:1, 2) Ero na öbaso Zura Niʼamoniʼö, beʼe ginötöu ba woʼangeragö hadia zi no öbaso. Buania, hasambalö tofakha ba dödöu Daromali Lowalangi. Baero daʼö, böi böhöli ’wangandrö’. (Mat. 26:41) Fangandrö nifaʼemamö soroi ba dödö tola möi fangaroʼö wahuwusau khö Yehowa. Moguna göi ’öʼofönai’ö wangalui Famatörö Lowalangi’. (Mat. 6:33) Ofönaiʼö wamalua halöwö fanuriaigö ba waʼauriu. Na öwölö-ölö ndraʼugö manuriaigö, no örorogö enaʼö aro wamatiu, ba tola ötolo niha böʼö ba wangokhögö faʼauri si lö aetu.​—1 Tim. 4:16.

21. Hadia nirasoimö na no aefa tebayagö ndraʼugö idanö?

²¹ Angetula ba wolulu faʼauri khö Yehowa ba tebayagö idanö, no angetula fondrege zebua ba waʼauriu. Sindruhu sa wa hasambalö ötaögö gabula dödö, hizaʼi abölö oya nasa howu-howu nitemamö. Fefu gabula dödö nitaögöu ba gulidanö andre ’lö abölö-bölö, ba lö arara’. (2 Kor. 4:17) Na no tebayagö ndraʼugö idanö, tola örasoi waʼowua-wua dödö ba waʼauriu iadaʼa, ba öʼokhögö ”waʼauri sindruhu” ba zi so miföna. (1 Tim. 6:19) Börö daʼö, angandrö khö Yehowa ba haogö angeragö wanofu andre: ”Hadia no sinangea tebayagö ndraʼo idanö?”