1. Ko e heigoa kua lata e tagata ke taute fakamua to kamata ke tā e fale?

MANAMANATU LA ke he tagata kua fifili ke tā e fale. Iloa e ia e fale kua manako a ia ke tā. Amanaki ni kia a ia ti fano ke fakatau e tau koloa ti kamata ke tā e fale? Nakai. Fakamua to kamata a ia, fai mena aoga lahi kua lata a ia ke taute​—ke fatifati ko e fiha e totogi he fale. Ko e ha? Ha kua lata a ia ke iloa kaeke kua lahi e tupe haana ke mau e fale he tā. Ka fatifati fakamitaki tuai e ia e totogi, liga to kautū a ia ke mau e fale foou.

2. Ia Luka 14:27-30, ko e heigoa kua lata a koe ke manamanatu fakahokulo fakamua to papatiso?

² Kua omoomoi kia he fakaalofa mo e loto fakaaue haau ki a Iehova a koe he manamanatu ke papatiso? Ka pihia, kua fehagai a koe mo e fifiliaga tuga he tagata kua manako ke tā e fale. Ko e ha ne talahau pihia a tautolu? Manamanatu ke he tau kupu ha Iesu ia Luka 14:27-30. (Totou.) Fakatutala a Iesu ke he kakano ke eke mo tutaki haana. Ke eke mo tutaki haana, lata a tautolu ke makai ke fakauka ke he tau paleko mo e taute e tau foakiaga. (Luka 9:23-26; 12:51-53) Ato papatiso a koe, lata a koe ke manamanatu fakahokulo ke he tau mena oti kua putoia ai. To mautauteute mitaki a koe ke fekafekau fakamooli tumau ke he Atua he eke mo Kerisiano papatiso.

3. Ko e heigoa ka fakatutala a tautolu ki ai he vala tala nei?

³ Kua uho lahi kia ke toka falu mena ke eke mo tutaki papatiso he Keriso? Ē, uho lahi! Hafagi he papatisoaga e gutuhala ke he tau monuina loga he magaaho nei mo e anoiha. Kia fakatutala a tautolu ke he falu hūhū aoga hagaao ke he papatiso. Ko e taute pihia ka lagomatai a koe ke tali e hūhū, “Mautali nakai au ke papatiso?”

4. (a) Ko e heigoa e tukulele? (e) Ko e heigoa e kakano ke “aua neke omaoma” e tagata ki a ia ni tuga ne fakakite ia Mataio 16:24?

⁴ Ko e heigoa e tukulele? Fakamua to papatiso a koe, lata a koe ke taute e tukuleleaga. Ka taute e koe e tukuleleaga, liogi fakamakamaka ki a Iehova mo e tala age ki a ia to fakaaoga e koe e moui haau ke fekafekau tukulagi ki a ia. Ka tukulele e koe a koe ke he Atua, “aua neke omaoma” a koe ki a koe ni. (Totou Mataio 16:24.) Kua eke a koe mogonei mo tagata ha Iehova, ti ko e lilifu lahi. (Roma 14:8) Tala age a koe ki a ia, ke kamata atu he mogonei to hagaaki a koe ke fekafekau ki a ia ka e nakai fakafiafia ni e koe a koe. Ko e tukuleleaga haau ko e omonuo, ko e maveheaga mauokafua ne taute ke he Atua. Nakai fakaohooho e Iehova a tautolu ke taute e omonuo pihia. Kaeke ke taute e tautolu, kua amanaki a Iehova ki a tautolu ke fakamooli ai.​—Sala. 116:12, 14.

5. Matutaki fēfē e tukulele ke he papatiso?

⁵ Matutaki fēfē e tukulele ke he papatiso? Ko e tukulele haau ko e mena fakatagata he vahāloto haau mo Iehova. Ko e papatiso kua kitia he tau tagata oti; ti fa taute he toloaga po ke fonoaga. Ka papatiso a koe, fakakite e koe ke he falu kua fitā he tukulele e koe a koe ki a Iehova. * Ti ko e papatisoaga haau kua iloa he falu kua fakaalofa a koe ki a Iehova ko e haau a Atua mo e loto, agaaga, manatu, mo e malolō katoa ti eketaha a koe ke fekafekau tukulagi ki a ia.​—Mare. 12:30.

6-7. Ia 1 Peteru 3:18-22, ko e heigoa e ua e kakano kua lata ke papatiso?

⁶ Lata mooli kia ke papatiso? Manamanatu ke he tau kupu ia 1 Peteru 3:18-22. (Totou.) Tuga ni e vaka ko e fakamooliaga ne fakakite e tua ha Noa, ko e papatiso ko e fakamooliaga ne fakakite e tukulele haau ki a Iehova. Ka e lata mooli kia ke papatiso? Ē. Talahau e Peteru e kakano kua lata. Fakamua, ‘kua fakamoui ai a koe.’ Maeke he papatisoaga ke fakamoui a tautolu kaeke ke taute e tautolu e tau lakaaga ke fakakite kua tua a tautolu ki a Iesu mo e talitonu kua mate a ia ma tautolu, fakaliu tu mai ti hake ke he lagi, mo e ko ia mogonei “ha he fahi matau he Atua.”

⁷ Uaaki, ka papatiso a tautolu to moua e tautolu e “loto manamanatu hifo mitaki.” Ka tukulele e tautolu a tautolu ke he Atua ti papatiso, to moua e fakafetuiaga uho mo Ia. Ha ko e fakatokihala mooli ha tautolu mo e tua ke he lukutoto, fakamagalo he Atua e tau agahala ha tautolu. Maeke ia tautolu ke moua e loto manamanatu mitaki ki mua Haana.

8. Ko e heigoa kua lata ke fakavē aki e fifiliaga haau ke papatiso?

⁸ Ko e heigoa kua lata ke fakavē aki e fifiliaga haau ke papatiso? Ko e fua he kumikumi fakamatafeiga haau ke he Tohi Tapu to lahi e mena kua fakaako e koe hagaao ki a Iehova, haana mahani mo e haana tau puhala. Ko e mena kua fakaako e koe hagaao ki a ia kua fakamafana e loto haau ti fakalagalaga a koe ke fakaalofa lahi mahaki ki a ia. Ko e haau a fakaalofa ki a Iehova kua lata ke eke mo fakavēaga pauaki he fifiliaga haau ke papatiso.

9. Ko e heigoa e kakano ke papatiso ke he higoa he Matua mo e Tama mo e agaaga tapu, tuga ne talahau ia Mataio 28:19, 20?

⁹ Ko e fifiliaga haau ke papatiso kua fakavē foki ke he tau kupu mooli he Tohi Tapu ne talia e koe. Manamanatu ke he mena ne talahau e Iesu he poaki a ia ke taute tutaki. (Totou Mataio 28:19, 20.) Hagaao ki a Iesu, ko lautolu ne papatiso kua lata ke taute ai “ke he higoa he Matua, mo e Tama, mo e Agaga Tapu.” Ko e heigoa e kakano he mena nei? Lata  a koe ke talitonu mo e loto katoa haau e tau kupu mooli he Tohi Tapu hagaao ki a Iehova; haana Tama ko Iesu; mo e agaaga tapu. Malolō e tau kupu mooli nei ti maeke ke aamotia lahi e loto haau. (Hepe. 4:12) Kia fakatutala la ke he falu he tau kupu mooli nei.

10-11. Ko e heigoa e tau kupu mooli hagaao ke he Matua kua fakaako mo e talia e koe?

¹⁰ Liu ke manatu e magaaho ne fakaako e koe e tau kupu mooli nei hagaao ke he Matua: Ko e haana “higoa ko Iehova,” ko ia “kua Mua ue atu ke he lalolagi oti,” ti ko ia ni hokoia ko e ‘Atua mooli.’ (Sala. 83:18; Isaia 37:16) Ko ia ko e ha tautolu a Tufuga, ti “ha ha ia Iehova e fakamouiaga.” (Sala. 3:8; 36:9) Tauteute e ia e tau foakiaga ke fakahao a tautolu mai he agahala mo e mate ti foaki e ia ki a tautolu e amaamanakiaga he moui tukulagi. (Ioane 17:3) Ko e tukulele mo e papatiso haau ka fakakite a koe ko e taha he Tau Fakamoli a Iehova. (Isaia 43:10-12) To eke a koe mo vala he magafaoa he tau tagata tapuaki he lalolagi katoa kua matalahi ke fakahigoa aki e higoa he Atua mo e tala age ai ke he falu.​—Sala. 86:12.

¹¹ Ko e lilifu ke maama e mena ne fakaako he Tohi Tapu hagaao ke he Matua! Ka talia e koe e tau kupu mooli uho nei, to fakalagalaga e loto haau ke tukulele a koe ki a Iehova ti papatiso.

12-13. Ko e heigoa e tau kupu mooli hagaao ke he Tama ne fakaako mo e talia e koe?

¹² Ko e heigoa haau ka taute ka iloa e koe e tau kupu mooli nei hagaao ke he Tama? Ko Iesu ko e tagata ke uaaki ne mua atu e aoga he lagi mo e lalolagi katoatoa. Ko ia ko e ha tautolu a Lukutoto. Kua makai a ia ke foaki e moui haana ke lata mo tautolu. Ka fakakite e tautolu ke he tau gahua kua tua a tautolu ke he lukutoto, maeke e tau agahala ha tautolu ke fakamagalo, feaki e fakafetuiaga mo e Atua, mo e moua e moui tukulagi. (Ioane 3:16) Ko Iesu ko e ha tautolu a Ekepoa ne Mua. Manako a ia ke lagomatai a tautolu ke aoga mai he lukutoto mo e moua e fakafetuiaga tata mo e Atua. (Hepe. 4:15; 7:24, 25) Ha ko e Patuiki he Kautu he Atua, to fakaaoga e Iehova a ia ke fakatapu Haana higoa, fakaotioti e mahani kelea, mo e tamai e tau monuina tukulagi he Parataiso hane hoko mai. (Mata. 6:9, 10; Fakakite. 11:15) Ko Iesu ko e ha tautolu a fakafifitakiaga. (1 Pete. 2:21) Fakatoka e ia e fakafifitakiaga ma tautolu he foaki katoatoa e moui haana ke taute e finagalo he Atua.​—Ioane 4:34.

¹³ Ka talia e koe e tau fakaakoaga he Tohi Tapu hagaao ki a Iesu, to fakaalofa a koe ke he Tama fakahele he Atua. Fakalagalaga he fakaalofa ia a koe ke fakaaoga e moui haau ke taute e finagalo he Atua tuga ne taute e Iesu. Ko e fua, to omoomoi a koe ke tukulele ki a Iehova ti papatiso.

14-15. Ko e heigoa e tau kupu mooli hagaao ke he agaaga tapu kua fakaako mo e talia e koe?

¹⁴ Ko e heigoa e manatu haau he iloa e koe e tau kupu mooli hagaao ke he agaaga tapu? Nakai ko e tagata, ka ko e malolō gahuahua he Atua. Fakaaoga e Iehova e agaaga tapu ke omoomoi e tohiaga he Tohi Tapu, ti lagomatai he agaaga a tautolu ke maama mo e fakagahua e tau mena kua totou ai e tautolu. (Ioane 14:26; 2 Pete. 1:21) Puhala he agaaga ha Iehova, foaki e ia ki a tautolu e “lahi ue atu he malolo.” (2 Kori. 4:7) Foaki he agaaga ki a tautolu e malolō ke fakamatala e tala mitaki, totoko e kamatamata, fehagai ke he fakaloleloleaga, mo e fakauka ke he tau mena vihi. Lagomatai ki a tautolu ke fakakite e tau mahani mitaki ne puna mai he “fua he Agaga.” (Kala. 5:22) Foaki noa he Atua e agaaga haana ki a lautolu kua falanaki ki a ia mo e ole fakamooli ki a ia ma e agaaga Haana.​—Luka 11:13.

 ¹⁵ Mafanatia mooli ke iloa ko e tau tagata tapuaki ha Iehova kua falanaki ke he agaaga tapu ke lagomatai a lautolu ke fekafekau ke he Atua! Ka talia e koe e tau kupu mooli ne iloa e koe hagaao ke he agaaga tapu, to omoomoi a koe ke tukulele a koe ke he Atua ti papatiso.

16. Ko e heigoa kua fakaako e tautolu mogonei he fakatutalaaga ha tautolu?

¹⁶ Kua taute e koe e lakaaga aoga ka fifili a koe ke tukulele ke he Atua ti papatiso. He fakaako e tautolu, lata a koe ke makai ke fakauka ki ai, putoia e tau paleko mo e taute e tau foakiaga. Ka ko e tau monuina ka moua e koe kua mua atu ke he tau foakiaga haau. Fakahao he papatisoaga a koe, ti fakaatā a koe ke moua e loto manamanatu mitaki ki mua he Atua. Ko e fifiliaga haau ke papatiso kua lata ke fakavē pauaki ke he haau a fakaalofa ki a Iehova ko e Atua. Lata foki ke talitonu mo e loto katoa a koe ke he tau kupu mooli ne fakaako e koe hagaao ke he Matua, Tama, mo e agaaga tapu. He mole e fakatutala ke he tau mena oti ia, to tali fēfē e koe e hūhū, “Mautali nakai au ke papatiso?”

17. Ko e heigoa falu lakaaga kua lata ke taute ato papatiso?

¹⁷ Ka logona hifo e koe kua mautali a koe ke papatiso, kua fitā a koe he taute falu lakaaga ke atihake e fakafetuiaga mitaki mo Iehova. * Ko e fua he fakaako tumau haau he Tohi Tapu ti iloa lahi e koe a Iehova mo Iesu. Kua feaki ai e tua haau. (Hepe. 11:6) Falanaki katoatoa a koe ke he tau maveheaga ha Iehova i loto he Tohi Tapu, ti talitonu a koe ko e tua haau ke he poa ha Iesu ka laveaki a koe mai he agahala mo e mate. Kua fakatokihala a koe he tau agahala haau; fakaatukehe lahi ha ko e tau hepehepe ne taute e koe, ti ole a koe ki a Iehova ma e fakamagaloaga haana. Liliuina tuai e moui haau; tiaki katoatoa e koe e puhala kelea fakamua haau he moui mo e kamata ke moui he puhala kua fakafiafia e Atua. (Gahua 3:19) Makai a koe ke tala age ke he falu hagaao ke he tua haau. Kua hokotia a koe ke eke mo tagata fakailoa nakaila papatiso ti kamata ke fakamatala mo e fakapotopotoaga. (Mata. 24:14) Matalahi a Iehova ia koe he taute e tau lakaaga nei kua lata. Kua fakafiafia lahi e koe a Iehova.​—Fakatai 27:11.

18. Ko e heigoa e falu mena kua lata a koe ke taute ato papatiso?

¹⁸ Ato papatiso a koe, fai mena kua lata a koe ke taute. He fakaako e tautolu he magaaho fakamua, lata ke tukulele e koe a koe ke he Atua. Tutala ki a ia he liogi mai he loto, ti mavehe ki a ia to fakaaoga e koe e moui haau ke taute haana finagalo. (1 Pete. 4:2) Ti fakailoa ke he leveki he kau he tau motua kua manako a koe ke papatiso. To ole a ia ke he falu motua ke feleveia mo koe. Fakamolemole ua tupetupe ka feleveia mo lautolu. Ko e tau matakainaga  taane fakahele nei kua fitā he iloa mo e fakaalofa ki a koe. To fakatutala a lautolu mo koe ke he tau fakaakoaga aoga he Tohi Tapu kua iloa e koe. Manako a lautolu ke iloa tonu kua maama e koe e tau fakaakoaga ia ti mailoga e koe e aoga he tukulele mo e papatiso. Ka talia e lautolu kua mautali a koe, to tala atu e lautolu ki a koe ke papatiso he toloaga po ke fonoaga kahau.

19-20. Ko e heigoa kua lata a koe ke taute he mole e papatiso haau, ti taute fēfē e koe e mena ia?

¹⁹ He mole e papatiso haau, ko e heigoa kua lata a koe ke taute? * Manatu ko e tukuleleaga ko e omonuo ti amanaki a Iehova ki a koe ke taofi mau ki ai. He mole e papatiso haau, lata a koe ke moui fakatatau ke he tukuleleaga haau. Taute fēfē e koe e mena ia?

²⁰ Pipiki mau a koe ke he fakapotopotoaga. He eke mo Kerisiano papatiso, kua fakalataha a koe mogonei mo e “tau matakainaga.” (1 Pete. 2:17) Ko e tau matakainaga taane mo e tau matakainaga fifine he fakapotopotoaga ko e magafaoa fakaagaaga haau. He fina atu tumau ke he tau feleveiaaga, to fakamalolō e fakafetuiaga haau mo lautolu. Totou e Kupu he Atua ti manamanatu fakahokulo ki ai he tau aho takitaha. (Sala. 1:1, 2) He mole e totou e vala he Tohi Tapu, fakaaoga taha magaaho ke manamanatu fakahokulo ke he mena kua totou e koe. To hokotia mogoia e tau kupu ia ke he loto haau. “Liogi” tumau. (Mata. 26:41) Ko e tau liogi haau mai he loto ka fakatata lahi a koe ki a Iehova. “Kia kumikumi fakamua . . . ke he kautu he Atua.” (Mata. 6:33) Taute e koe e mena ia he tuku fakamua he moui haau e gahua fakamatala. He fai vala tumau he gahua fakamatala, to tumau e tua haau ke malolō, mo e liga lagomatai e koe e falu ke takitaki atu ke he puhala he moui tukulagi.​—1 Timo. 4:16.

21. Ko e heigoa e puhala kua hafagi he papatisoaga haau ki a koe?

²¹ Ko e fifiliaga ke tukulele a koe ki a Iehova ti papatiso ko e fifiliaga kua mua e aoga ka taute e koe. Mooli kua loga e mena ne putoia ai. Ka e aoga nakai e tau mena ia ne taute e koe? Ē, aoga! Ko e tau tuaga uka ne liga fehagai mo koe he lalolagi tuai nai kua “mama mo e mole vave.” (2 Kori. 4:17) Kehe ai, to hafagi he papatisoaga haau e puhala ke he moui fiafia lahi mogonei mo e “moui tukulagi” i mua. (1 Timo. 6:19) Kia manamanatu fakahokulo mo e liogi hagaao ke he tali haau ke he hūhū, “Mautali nakai au ke papatiso?”