1. Łaʼda hooghan ádeeshłííł niizı̨́įʼgo haʼátʼíí áłtsé áʼdoolííł?

ŁAʼDA hooghan ádeeshłííł niizı̨́įʼgo baa nitsíníkees. Tʼáá íídą́ą́ʼ éí hooghan kótʼéego ádeeshlííł nízingo nitsékees. Ákoósh yee íʼdoolíłígíí tʼóó tsı̨́įłgo tʼáá ákǫ́ǫ́ neidiyoołnih? Ndagaʼ. Tʼáadoo hooghan ííléhé éí áłtsé dínóodaałgo bą́ą́h adooleełígíí yíídóołtah. Éí haʼátʼíí biniyé? Jó, bił bééhózingo béeso daatsʼí bíighah nízingo yiniyé áłtsé béeso ahíidoozoh. Tʼáá bítséedi kótʼéego béeso ahííyiizohgo éí tʼáá bééhózínígo hooghan ałtso niidooʼááł.

2. Luke 14:​28-30 bikʼehgo tʼah doo baptize ániʼdilnééhgóó haʼátʼíí hazhóʼó baa nitsíníkees doo?

² Jiihóvah ayóóʼííníʼní áádóó baa ahééh nínízin sínílı̨́įʼgo éí baptize áshidiʼdoolnííł ninizı̨́ı̨́ʼ? Éí díidi hooghan ííléhígíí hazhóʼó yaa tsídeezkézígi tʼáá ákótʼé nahalin. Éí haitʼéego? Luke 14:​28-30 éí Jesus yaa hoolneʼ yę́ę baa nitsíníkees. (Yíníłtaʼ.) Éí ákweʼé íhoołʼaahii jidooleełgi baa haneʼ. Jesus bikééʼ joogáał dooleełgo éí achʼįʼ nidahwiiʼnáanii bichʼįʼ haʼjólní índa haʼátʼíí shı̨́ı̨́ nináhizhdiiʼaah doo. (Luke 9:​23-26; 12:​51-53) Áko tʼah doo baptize ániʼdilnééhgóó díí tʼáá átʼé hazhóʼó baa nitsíníkees. Ákwíinidzaago éí Oodlání baptize ábiʼdiilyaii Diyin nizhónígo bikééʼ sínízı̨́į doo.

3. Haʼátʼíí baa nídadíitʼįįł?

³ Achʼįʼ nidahwiiʼnáanii bichʼįʼ haʼjólní índa tʼáadoo leʼé nináhizhdiʼaahgi éí Jesus yíhoołʼaahii jidooleełgo baptize áhoʼdilnéehgoósh tʼáá ákónéehee doo? Aooʼ, éí tʼáá aaníí ákótʼé! Baptize áhoʼdilʼįįhgo éí kʼad índa níléí náasdi ląʼígóó bee hakʼihojidlí. Áko kodóó naʼídíkid łaʼ baa  nídadíitʼįįł áádóó díí baa nitsíníkees doo: “Baptize áshidiʼdoolnííł nisingoósh nitséskees?”

4. (a) Diyin baa ázhdeetʼą́ągo haʼátʼíí óolyé? (b) Romans 14:8 éí Jiihóvah “bííʼ daniidlı̨́” níigi haʼátʼíí ááhyiłní?

⁴ Diyin baa ázhdeetʼą́ągo haʼátʼíí óolyé? Tʼah doo baptize ániʼdilnééhgóó éí Jiihóvah bichʼįʼ sodidíílzįįł áádóó sheʼiinaʼ hoolʼáágóó naa dinishʼaah bididíiniił. Kótʼéego Diyin baa ádíínítʼą́ągo kʼad éí Jiihóvah bííʼ nílı̨́. Díí yéigo baa hózhóonii átʼé. (Romans 14:8 yíníłtaʼ.) Áko kodóó éí kʼad ná naashʼaʼ índa shí akééʼdóó naʼáʼdishtʼeʼ doo bidííníniid. Diyin baa ádíínítʼą́ągo éí bee ádee háínídzíiʼii átʼé. Jiihóvah éí shichʼįʼ ádee hadíídzih, doo nihił níi da. Ákondi bichʼįʼ ádee hadiidzíiʼgo éí beʼdiilnííł nihóʼní.—Ps. 116:​12, 14.

5. Diyin baa ádeetʼą́ągi éí baptism haitʼéego bił ahídéétʼiʼ?

⁵ Diyin baa ádeetʼą́ągi éí baptism haitʼéego bił ahídéétʼiʼ? Diyin baa ádíínítʼą́ągi éí tʼáá ni tʼéí tʼáá sáhí Jiihóvah bichʼįʼ ádee háínídzííʼ. Baptism éí hasłą́ągi diné binááł assembly doodaiiʼ conventiongi baa naʼaldeehgo álʼįįh. Áko baptize ániʼdilnéehgo éí Jiihóvah baa ádíínítʼą́ągi diné bił ííshjání áníléeh doo. * Áádóó shijéí, tʼáá sézı̨́ı̨́ ńtʼééʼ, shíniʼ, índa shidziil tʼáá átʼé bee Jiihóvah ayóóʼííníshʼní diníigo baptize ániʼdilnéeh doo. Éí hoolʼáágóó bá naashʼaʼ doo diníigo ííshjání íinilaa doo.—Mark 12:30.

6-7. 1 Peter 3:​18-22 bikʼehgo haʼátʼíí naakigo biniyé baptize áhodiʼdoolnííł?

⁶ Haʼátʼíí biniyé baptize áhodiʼdoolnííł? 1 Peter 3:​18-22 baa nitsíníkees. (Yíníłtaʼ.) Éí Nóah tsin naaʼeeł áyiilaago bibeʼoodląʼ bee bééhózingo áyiilaa, áko baptize ániʼdilnéehgo éí Diyin baa ádeetʼą́ągi ííshjání íinilaa doo. Daʼ ákoósh baptize áhoʼdilnéeh doo? Aooʼ. Peter kótʼéego yee haadzííʼ: Áłtsé éí, ‘bee yisdádíínááł’ ní. Áko Jesus baʼííníidlí, éí nihá daaztsą́ągi, yáʼąąshgóó náábiʼdiilzáagi, áádóó kʼad éí Diyin binishʼnáájí dah sidáagi yiniidlą́ągo binahjįʼ baptize áhoʼdilʼįįhgo bee yisdáhóótʼiʼ.

⁷ Naaki góneʼ éí, baptize áhodilʼįįhgo ‘tʼáá ákogi ájooníiłgi bee ádaa ákozhnízingo áhoołʼįįh.’ Áko Diyin baa ádiitʼą́ągo áádóó baptize ánihiʼdiilyaago éí yáʼátʼéehgo bił kʼéʼahidiiʼní siidlı̨́įʼ doo. Bąąhági ádaatʼéii yę́ę ałtso bitsʼá niidzáago áádóó Jesus nááʼíʼdisniiʼgi yiniidlą́ągo éí niʼiilzííhgóó Diyin nihá yóóʼidiyiiʼaah. Éí tʼáá ákogi ááshnííł niidzingo bidááhdóó siidzı̨́.

8. Haʼátʼíí éí íiyisíí biniyé baptize ániʼdilnéeh doo?

⁸ Haʼátʼíí éí íiyisíí biniyé baptize ániʼdilnéeh doo? Diyin Bizaad éí ląʼígóó hazhóʼó bíhwiiniłʼą́ąʼgo Jiihóvah bíniʼ átʼéegi áádóó bí bikʼehgóó oodáałgi nił bééhoozin. Áko kótʼéego baa íhwiiniłʼą́ąʼgo nidiisnáaʼgo ayóóʼííníʼní sínílı̨́ı̨́ʼ. Jiihóvah ayóóʼííníʼníigo éí íiyisíí biniyé baptize ániʼdilnéeh doo.

9. Matthew 28:​19, 20 bikʼehgo aTaaʼ áádóó aYeʼ índa níłchʼi diyinii binahjįʼ baptize ádaałeʼ doo níigo haʼátʼíí ááhyiłní?

⁹ Diyin Bizaad tʼáá aaníinii yee naʼnitinii yisínídląądgo éí ałdóʼ binahjįʼ baptize áshidiʼdoolnííł ninizı̨́ı̨́ʼ. Jesus íhoołʼaahii ádaałeʼ doo níigo naanish nihąąh niiníláhą́ą baa nitsíníkees. (Matthew 28:​19, 20 yíníłtaʼ.) Jesus éí baptize ádaalneʼígíí “aTaaʼ áádóó aYeʼ índa níłchʼi  diyinii” binahjįʼ baptize ádaałeʼ doo níigo chʼíiníʼą́. Díí ááhyiłníigo éí Jiihóvah áádóó biYeʼ Jesus índa níłchʼi diyinii Diyin Bizaad biiʼdę́ę́ʼ tʼáá aaníigo yaa halneʼgi yinídlą́ą doo. Díí tʼáá aaníinii ayóó bidziil áádóó ajéí nayiiłná. (Heb. 4:​12, NW) Kodóó łaʼ baa nídadíitʼįįł.

10-11. Haʼátʼíí éí tʼáá aaníigo aTaaʼ baa haneʼgi bíhwiiniłʼą́ąʼgo nídinilá?

¹⁰ NihiTaaʼ tʼóó bíhwiiniłʼą́ą́ʼ yę́ędą́ą́ʼ nátʼą́ą́ʼ baa nitsínáníkees: Éí bízhiʼ “Jiihóvah,” bí éí ‘nahasdzáán bikááʼgóó tʼáá níłtéél nítʼééʼ Aláahgo Ayóóʼátʼéii nílı̨́,’ índa tʼáá bí tʼéiyá “tʼáá aaníí Diyin God nilı̨́.” (Ps. 68:​4, ftn.; Ps. 83:18; Jer. 10:10) Áʼiilaaii nilı̨́, áádóó tʼáá bí “tʼéí bee yisdáʼiildéehii bee hólǫ́.” (Ps. 3:8) Áádóó niʼiidzííh índa anoonééł yitsʼą́ąjįʼ yisdá nihidooniłgo iiná doo ninítʼiʼii nihá bohónéedzą́ągo áyiilaa. (John 17:3) Diyin baa ádíínítʼą́ągo baptize ániʼdiilyaago éí Jiihóvah Yá Halneʼé nílı̨́įgo bee nééhoʼdílzin doo. (Isa. 43:​10-12) Baa bił dahózhǫ́ǫgo Diyin bízhiʼ bee dabiʼdójí áádóó náánáłahjįʼ yił ndahalneʼígíí bidiniyá.—Ps. 86:12.

¹¹ Diyin Bizaad éí aTaaʼ yaa halneʼígíí bikʼidiʼnitą́ągi baa hózhǫ́! Áko díí tʼáá aaníinii baa haneʼgi nídiniláagi nijéí nayiiłnáago Jiihóvah baa ádíínítʼą́ągo baptize ániʼdilnéeh doo.

12-13. Haʼátʼíí éí tʼáá aaníigo aYeʼ baa haneʼgi bíhwiiniłʼą́ąʼgo nídinilá?

¹² AYeʼ kótʼéego tʼáá aaníigo baa haneʼgi haitʼéego baa tsídíníkééz? Jesus éí Jiihóvah bikééʼ góneʼ ayóó ájítʼéii jílı̨́įgo nił bééhoozin áádóó beʼiinaʼ nihá ninéidiníʼą́. Íitʼįįłgi bee bééhózingo éí Jesus nináʼádeetʼánígíí deiniidlą́, nidaʼiyiilzííhgóó nihá yóóʼahiditʼaah, Diyin áhánígo nihikʼis íilyaa, áádóó iiná doo ninítʼiʼii nihee hółǫ́ǫ doogo deiniidlą́. (John 3:16) Jesus éí Aláahdi Nááʼiiłniihii nilı̨́. Naʼádiisʼniiʼígi nihíká adoolwoł índa áhánígo Diyin bił kʼéʼahidiʼníi doo nihóʼní. (Heb. 4:15; 7:​24, 25) Diyin biNahatʼaʼ yinaatʼáanii nilı̨́įgo Jiihóvah bízhiʼ hashtʼéédoolnííł, doo yáʼádaashxóonii nidooltʼih, áádóó kéyah hózhóní ánáhoolyaago hoolʼáágóó nihikʼi hojídlíi doo. (Matt. 6:​9, 10; Rev. 11:15) Jesus áátʼįįdgi bedaʼiilʼı̨́į dooleełii nilı̨́. (1 Pet. 2:21) Éí Diyin íinízinii ááníił dooleełgo ádeideetʼą́, áko bikʼehgo bikééʼ deíníikaah doo.—John 4:34.

¹³ Diyin Bizaad éí Jesus yaa naʼnitingi nídinilá áádóó Diyin biYeʼ ayóóʼííníʼní sínílı̨́ı̨́ʼ. Jesus áátʼįįd yę́ęgi átʼéego Diyin íinízinii ááshníił doo nínízingo baa ádíínítʼą́. Áko Jiihóvah baa ádideeshtʼáałgo baptize áshidiʼdoolnííł ninizı̨́ı̨́ʼ.

14-15. Níchʼi diyinii tʼáá aaníí baa haneʼgi baa íhwiiniłʼą́ąʼgo haitʼéego baa tsídíníkééz?

¹⁴ Níłchʼi diyinii tʼáá aaníí baa haneʼgi baa íhwiiniłʼą́ąʼgo haitʼéego baa tsídíníkééz? Éí Diyin bibee adziilii átʼé. Jiihóvah éí níłchʼi diyinii choyoosʼı̨́įdgo Bizaad bikʼeʼashchı̨́įgo ályaa. Áádóó tʼáá éí níłchʼi diyinii nihíká análwoʼgo Diyin Bizaad bikʼiʼdiyiitįįh dóó bikʼehgóó yiidááł. (John 14:26; 2 Pet. 1:21) Díí níłchʼi diyinii éí “tsʼídá aláahdi átʼéego adziil” átʼéii Jiihóvah yee nihaa joobaʼ. (2 Cor. 4:7) Áádóó nizhónígo baa haneʼii bee nidaʼniitin, bidáhonooníinii bikʼeh diidlı̨́, yinííł niidlı̨́įgo, áádóó achʼįʼ anáhóótʼiʼ bikʼeh diidlı̨́įgo yee nihíká análwoʼ. Galatians 5:​22, 23 ánínígi bikʼehgóó ániitʼée doogo ałdóʼ yee nihíká análwoʼ. Índa Diyin yadaʼólíhígíí dóó biníłchʼi diyinii yídayókeedígíí éí tʼáá jííkʼeh yichʼįʼ kwííłʼı̨́.—Luke 11:13.

 ¹⁵ Jiihóvah bidineʼé éí ndaalʼaʼgi níłchʼi diyinii bíká análwoʼgo átʼéegi bił béédahoozingo yaa dahózhǫ́! Áko tʼáá aaníinii naʼnitin nídiniláago éí níłchʼi diyinii baa íhwiiniłʼą́ą́ʼ, éí binahjįʼ Diyin baa ádideeshtʼáałgo baptize áshidiʼdoolnííł ninizı̨́ı̨́ʼ.

16. Haʼátʼíí kónízahjįʼ bídahwiilʼą́ą́ʼ?

¹⁶ Diyin baa ádideeshtʼáałgo baptize áshidiʼdoolnííł ninizı̨́įʼgo éí ílíinii átʼéego bee ádaa díínítʼą́. Bídahwiilʼą́ąʼgo éí kótʼéego Diyin baa ázhditʼaahgo éí haʼjólní áádóó tʼáadoo leʼé nináhiditʼaahii bił danítʼiʼ. Ákótʼée ndi, nináhiditʼaahii biláahdi átʼéego nihikʼi hozhdoodliił. Baptize áhoʼdilʼįįhgo yisdáhoʼdiltééh áádóó éí tʼáá ákogi ájooníiłgi bee ádaa ákozhnízingo áhoołʼįįh. Baptize áshidiʼdoolnííł nínízingo éí Diyin ayóóʼííníʼníigo íiyisíí biniyé ánítʼı̨́. Áádóó Azhéʼé, aYeʼ, índa níłchʼi diyinii éí tʼáá aaníí yinídlą́ągo baa íhwiiniłʼą́ą́ʼ. Áko kónízahgóó baa ídahwiilʼą́ąʼgo éí díí baa nitsíníkees doo. “Baptize áshidiʼdoolnííł nisingoósh nitséskees?”

17. Baptize áhodiʼdoolníiłgo haʼátʼíí áłtsé ázhdoonííł?

¹⁷ Kʼad bíighah baptize áshidiʼdoolnííł nínízingo éí tʼáá íídą́ą́ʼ Jiihóvah nizhónígo bił kʼéʼahidiʼníigo díkwíígóó shı̨́ı̨́ bikʼehgóó íʼiinilaa. * Diyin Bizaad bíhoołʼaahgo Jiihóvah dóó Jesus ląʼígóó baa íhwiiniłʼą́ą́ʼ. Neʼoodlą́ bidziilgo íinilaa. (Heb. 11:6) Diyin Bizaad biiʼdę́ę́ʼ Jiihóvah yee ádee hahasdzíiʼii índa Jesus nááʼíʼdisniiʼgi éí niʼiidzííh dóó anoonééł yitsʼą́ąjįʼ yisdánihíínilgi yéigo yinídlą́. Bąąhági áánííł yę́ę ałtso yóóʼadííníʼą́. Áádóó éí íínítʼįįd yę́ęgi bąą níniʼgo Jiihóvah shá yóóʼadíʼaah bidííníniidgo néisíníkan. Neʼiinaʼ hashtʼéiiníláago doo yáʼátʼééhgóó iiná yę́ę nahjįʼ kwíinilaago Diyin yaa bił hózhóonii bee neʼiinaʼ chʼííníłtʼiʼ. (Acts 3:19) Neʼoodląʼ baa nił hózhǫ́ǫgo baa hashneʼ doo nínízin. Áádóó unbaptized publisher ániʼdiilyaa. Éí congregation bił nidahólneʼgo háíníłtʼiʼ. (Matt. 24:14) Díí tʼáá átʼé beʼíinílaago Jiihóvah bijéí yéigo bił hózhǫ́ǫgo íinilaa.—Prov. 27:11.

18. Tʼah doo baptize ániʼdilnééhgóó haʼátʼíí ałdóʼ ádíílííł?

¹⁸ Tʼah doo baptize ániʼdilnééhgóó kótʼéego áʼdíílííł. Baa nídasíitʼįįdgo áłtsé éí tʼáá sáhí Jiihóvah bichʼįʼ sodidíílzįįłgo baa ádidíítʼááł. Éí ni íinínízinígíí ááshníiłgo sheʼiinaʼ bee chʼídeeshtʼih bididíiniił. (1 Pet. 4:2) Baptize áshidiʼdoolnííł diníigo coordinator of the body of elders nilínígíí bił hodiilnih. Elders bił ahíídiikahgo tʼáadoo bikʼee nitsééníltłiʼí. Díí nihibrothers tʼáá shı̨́ı̨́ íídą́ą́ʼ néédahósin  dóó ayóóʼádanóʼní. Diyin Bizaad biiʼdóó bíhwiiniłʼą́ʼígíí bił baa nídadíitʼįįł. Éí Diyin Bizaad binaʼnitinii áádóó Diyin baa áʼdítʼaah índa baptize áhoʼdilnééh íiyisíí óolyéegi bikʼiʼdiitįįh daatsʼígi bił baa nídadíitʼįįł. Áádóó ná bíighah danidííniidgo éí assembly doodaiiʼ convention nááʼádleehgi baptize ánidiʼdoolnííł.

19-20. Baptize ániʼdiilyaadóó bikʼijįʼ haʼátʼíí ááníił doo, áádóó éí haitʼéego ááníił doo?

¹⁹ Baptize ániʼdiilyaadóó bikʼijįʼ haʼátʼíí áʼdíílííł? * Béénílniihgo Diyin baa ázhditʼaahgo éí bee ádee haʼoodzíiʼii átʼé, áko Jiihóvah éí díí bikʼehgóó ádíínííł nóʼní. Baptize ániʼdiilyaadóó bikʼijįʼ éí Diyin baa ádiniitʼą́ągi bikʼehgóó yínáał doo. Éí haitʼéego ádíínííł?

²⁰ Congregation áhánígo bił honílǫ́. Oodlání baptize ályaii nílı̨́įgo éí kʼad “Christ bee ałkʼisóó danilíinii” bitahdóó honílǫ́. (1 Pet. 2:17) Nibrothers dóó nisisters éí kʼad tʼááłáʼígíí bił háíníjééʼ nahalin. Tʼáá ahą́ą́h áłah náʼádleehgóó ałnáánídáahgo éí ayóóʼádanóʼní dadooleeł. Tʼáá ákwíí jı̨́ Diyin Bizaad yíníłtaʼgo nabikʼítsíníłkees. (Ps. 1:​1, 2) Ákónítʼı̨́įgo éí nijéí nayiiłnáa doo. Tʼáá áłahjįʼ ‘sodílzin.’ (Matt. 26:41) Áko Jiihóvah áhánígo bił nílı̨́į doo. ‘Diyin biNahatʼaʼ alą́ąjįʼ hánítʼı̨́.’ (Matt. 6:33) Ákótʼéego éí nahólneʼgóó tsʼídá áłtsé síníłʼą́ą doo. Tʼáá ahą́ą́h atah nahólneʼgo neʼoodląʼ bidziil áyósin. Áádóó łaʼda iiná doo ninítʼiʼii baa doolyéełgi bee bíká anánílwoʼ.—1 Tim. 4:16.

21. Baptize ániʼdiilyaago éí haʼátʼíí bee baa honítʼiʼ?

²¹ Jiihóvah baa ádííntʼą́ągo baptize ániʼdiilyaagi éí ayóó ílíinii ádaa díínitʼáanii átʼé. Áko tʼáá aaníí díkwíígóó shı̨́ı̨́ ninádahididootʼáałii bił danítʼiʼ. Ákoósh éí tʼáá ákónéehee baptize áhodiʼdoolnííł? Aooʼ! Haashı̨́ı̨́ néelą́ą́ʼ achʼįʼ nahwiiʼná dahólǫ́, ndi éí ‘tʼóó kónígháníjįʼ’ ádaatʼé. (2 Cor. 4:17) Baptize ániʼdilnéehgo éí kʼad iinánígíí áádóó “tʼáá aaníí iináanii” hodooleełii bił nítʼiʼgo baa hózhǫ́ǫ doo. (1 Tim. 6:19) Áko tʼáá shǫǫdí, díí hazhóʼó baa nitsíníkeesgo baa sodílzin, “Baptize áshidiʼdoolnííł nisingoósh nitséskees?”