1. Antoy nepeg ya gawaen na sakey a too antis ya mangipaalagey na abung?

IMADYIN mo pay sakey a laki ya mangipaalagey na abung. Amta to la no anton klase na abung so labay to. Kasin mangaliw lan tampol na materyales tan igapo to lan ipaalagey? Andi ni. Antis ya onggapo, wala ni importantin gawaen to​—kuentaen to no panon kabaleg so nagastos to. Akin? Pian amta to no malaem so kuarta to tan nasumpal toy abung. No akuenta ton maong no pigaray nagastos, mas baleg so posibilidad ya nasumpal toy abung to.

2. Base ed Lucas 14:27-30, antoy nonoten mo nin maong antis kan manpabautismo?

² Kasin lapud panangarom tan pisasalamat mo ed si Jehova et iisipen mo lay manpabautismo? No on, singa ka samay laki ya labay toy mangipaalagey na abung. Akin ey? Imanoen so ilustrasyon nen Jesus diad Lucas 14:27-30. (Basaen.) Impaliwawa nen Jesus no anto ray nalalanor ed pagmaliw ya disipulo to. Pian magmaliw tayon patumbok to, nepeg ya akaparaan tayo ed saray “nagastos” odino saray subok tan sakripisyo ed pagmaliw ya Kristiano. (Luc. 9:23-26; 12:51-53) Kanian antis kan manpabautismo, nonot mo nin maong no anto ray nalalanor ed satan ya desisyon. Diad ontan et mas akaparaan ka ya matoor a manlingkor ed Dios kayari na bautismom.

3. Antoy pantongtongan tayo ed sayan artikulo?

³ Kasin nabawbawim so “nagastos” mo no manpabautismo ka bilang disipulo nen Kristo? On! No say sakey et manpabautismo, nilukas ed sikato so dakdakel a bendisyon, natan tan diad arapen. Pantongtongan tayo iray importantin tepet nipaakar ed bautismo. Makatulong itan pian naebatan mo so tepet ya, “Kasin akaparaan ak la ya manpabautismo?”

4. (a) Anto so dedikasyon? (b) Antoy labay ya ibaga na ‘iburi so sarili’ ya nabasa ed Mateo 16:24?

⁴ Anto so dedikasyon? Antis kan manpabautismo, kaukolan mon idedika so sarilim ed si Jehova. Pian nagawaan mo itan, nepeg ya masimoon kan manpikasi ed si Jehova tan ibagam ed sikato ya usaren moy bilay mo ed panlingkor mod sikato ya anggad angga. No idedikam so sarilim ed Dios, kaukolan mo lan ‘iburi so sarilim.’ (Basaen so Mateo 16:24.) Kayarian ka la nen Jehova, tan balbaleg itan a pribilehyo. (Roma 14:8) Ibagam ed sikato ya manlapud satan ya agew, say manuna la ed bilay mo et say panlingkor mod sikato, aliwan say pamaliket mod sarilim. Say dedikasyon et seryoson sipan ed Dios. Ag-itayo pipiliten nen Jehova ya gawaen itan. Balet no nandesisyon tayon gawaen itan, iilaloan to ya tooren tayo.​—Sal. 116:12, 14.

5. Antoy pandumaan na dedikasyon tan bautismo?

⁵ Antoy pandumaan na dedikasyon tan bautismo? Say dedikasyon et personal tan gawaen ed pribado; say makaamta labat ed satan et sika tan si Jehova. Say bautismo balet et gawaen ed publiko; nanengneng ka na dakel a totoo, nayarin diad asemblea odino kombension. No manpabautismo ka, labay mon nanengneng na arum ya indedikam lay sarilim ed si Jehova. * Kanian say pampabautismom so mangipaamta ed publiko ya inar-arom si Aman Jehova ed interon pusom, kamarerwa, nonot, tan biskeg mo, tan desidido kan manlingkor ed sikato ya anggad angga.​—Mar. 12:30.

6-7. Base ed 1 Pedro 3:18-22, anto so duaran rason no akin ya kaukolan so manpabautismo?

⁶ Kasin talagan kaukolan so manpabautismo? Imanoen so ibabaga na 1 Pedro 3:18-22. (Basaen.) No panon ya samay biong et paneknek na pananisia nen Noe, say pampabautismom so paneknek ya indedikam lay sarilim ed si Jehova. Balet kasin talagan kaukolan so manpabautismo? On. Imbaga nen Pedro so rason no akin. Unona, satan so ‘mangiliktar ed sika.’ Niliktar itayo na bautismo no ipapanengneng tayo ya walay pananisia tayod si Jesus tan manisia tayo ya sikatoy inatey parad sikatayo, ya sikatoy pinaoli ed tawen, tan natan et wala lad “nikawanan na Dios.”

⁷ Komadua, say bautismo et manresulta ed “malinis a konsiensia.” No idedika tayoy sarili tayo ed Dios tan manpabautismo tayo, nawalaan tayoy espisyal a relasyon ed sikato. Lapud impapuson panagbabawi tayo tan pananisia tayo ed dondon, perdonaen la na Dios iray kasalanan tayo. Kanian nawalaan tayoy malinis a konsiensia ed arapan to.

8. Anto so nepeg a rason no akin ya manpabautismo ka?

⁸ Anto so nepeg a rason no akin ya manpabautismo ka? Inaral mon maong so Biblia kanian dakel so naamtaan mo nipaakar ed si Jehova, say personalidad to, tan no panon ton susumpalen so gagala to. Sinmabi ed pusom iratan ya naaralan mo kanian sikatoy naar-arom. Nepeg ya say manunan rason ed desisyon mon manpabautismo et say panangarom ed si Jehova.

9. Antoy labay ya ibaga na manpabautismo ed ngaran na Ama tan ed ngaran na Anak tan ed ngaran na masanton espiritu ya abitla ed Mateo 28:19, 20?

⁹ Say sakey nin rason ya manpabautismo ka et lapud naaralan mo iray katuaan ya ibabangat na Biblia tan papanisiaan mo iratan. Imanoen imay imbaga nen Jesus sanen ingganggan to iray papatumbok to ya manbangat. (Basaen so Mateo 28:19, 20.) Imbaga nen Jesus ya saray manpabautismo et gawaen da itan “ed ngaran na Ama tan ed ngaran na Anak tan ed ngaran na masanton espiritu.” Antoy  labay ya ibaga na satan? Nepeg mon panisiaan diad interon pusom iray katuaan nipaakar ed si Jehova; say Anak ton si Jesus; tan say masanton espiritu. Sarayan katuaan et walaan na pakayari tan sarag dan pakiwasen so pusom. (Heb. 4:12) Pantongtongan tayo iratan ya katuaan.

10-11. Anto ran katuaan nipaakar ed Ama so naaralan tan papanisiaan mo?

¹⁰ Isip mo pa irayan katuaan ya naaralan mo nipaakar ed Ama: Say “ngaran [to] et Jehova,” sikato so “Sankatagyan ed interon dalin,” tan sikato labat so “tuan Dios.” (Sal. 83:18; Isa. 37:16) Sikato so Amalsa tan “manangiliktar.” (Sal. 3:8; 36:9) Sikato so nanggawa na paraan pian niliktar itayo ed kasalanan tan patey tan nawalaan itayo na ilalon manbilay ya andi-anggaan. (Juan 17:3) Say dedikasyon tan bautismom so mangipaamta ya sakey ka lan Tasi nen Jehova. (Isa. 43:10-12) Magmaliw kan kabiangan na sankamundoan a pamilya na saray mandadayew ed Dios. Satan ya pamilya et malikeliket ya natawag ed ngaran na Dios tan ipapaamta da itan ed arum.​—Sal. 86:12.

¹¹ Talagan baleg a pribilehyo ya natalosan so ibabangat na Biblia nipaakar ed Ama! No panisiaan mo irayan mablin katuaan, seguradon napakiwas ka ya idedikam so sarilim ed si Jehova tan mandesisyon kan manpabautismo.

12-13. Anto ran katuaan nipaakar ed Anak so naaralan tan papanisiaan mo?

¹² Isip mo pay aliknam nen naaralan mo irayan katuaan nipaakar ed Anak: Si Jesus so komaduan sankaimportantian ya persona ed uniberso. Sikato so Mananondon tayo. Mabulos ton inter so bilay to parad sikatayo. No ipanengneng tayo ed gawa ya walay pananisia tayo ed dondon, naperdona iray kasalanan tayo, makapikaaro tayo ed Dios, tan nawalaan tayoy andi-anggaan a bilay. (Juan 3:16) Si Jesus so Atagey a Saserdote tayo. Labay to ya nagunggonaan tayo ed dondon tan nawalaan tayoy maapit a relasyon ed Dios. (Heb. 4:15; 7:24, 25) Sikato so Ari ed Panarian na Dios kanian sikato so usaren nen Jehova pian napasanto so ngaran To, naekal so kaugsan, tan niiter so agmanganggan bendisyon diad Paraiso. (Mat. 6:9, 10; Apo. 11:15) Si Jesus so ehemplo tayo. (1 Ped. 2:21) Impanengneng toy maabig ya alimbawa diad impangusar tod bilay to ed panggaway linawa na Dios.​—Juan 4:34.

¹³ No panisiaan mo irayan katuaan ed Biblia nipaakar ed si Jesus, naar-arom so Anak na Dios. Satan ya panangaro so mamakiwas ed sikan usaren so bilay mo pian gawaen so linawa na Dios, ya singa ginawa nen Jesus. Lapud satan et napakiwas kan idedika so sarilim ed si Jehova tan mandesisyon kan manpabautismo.

14-15. Anto ran katuaan nipaakar ed masanton espiritu so naaralan tan papanisiaan mo?

¹⁴ Isip mo pay reaksion mo nen naaralan mo irayan katuaan nipaakar ed masanton espiritu: Aliwa itan ya sakey a persona, noagta aktibon puersa na Dios. Inusar nen Jehova so masanton espiritu pian igiya iray angisulat ed Biblia, tan satan met ya espiritu so uusaren to pian natalosan tan niyaplika tayo iray nababasa tayo ditan. (Juan 14:26; 2 Ped. 1:21) Uusaren met itan nen Jehova pian ikdan itayo na ‘pakayari a mas mabiskeg nen say pakayari na too.’ (2 Cor. 4:7) Say espiritu so mamapabiskeg ed sikatayo pian nipulong tayoy maong a balita, nalabanan tayoy tukso, nadaeg tayoy ikapuy na liknaan, tan nasarag tayo ray subok. Ontulong met itan pian nipanengneng tayo ray balibalin kualidad ya kabiangan na “bunga na espiritu.” (Gal. 5:22) Mabulos ya iiter na Dios so espiritu to ed saray manmamatalek ed sikato tan impapuson onkekerew ed satan.​—Luc. 11:13.

¹⁵ Talagan makapabiskeg tan makaligliwan naamtaan ya saray mandadayew ed si Jehova  et nailaloan day tulong na masanton espiritu diad panlilingkor da! No panisiaan mo iray katuaan ya naaralan mo nipaakar ed masanton espiritu, napakiwas kan idedika so sarilim ed si Jehova tan mandesisyon kan manpabautismo.

16. Anto ray apantongtongan tayo la?

¹⁶ Say pangidedikam na bilay mo ed Dios tan say pampabautismom so sankaimportantian ya desisyon ya gawaen mo. Singa naaralan tayo la, nepeg ya akaparaan ka ed saray “nagastos”​—saray subok tan sakripisyo ed pagmaliw ya Kristiano. Balet mas dakel so bendisyon no ikompara ed saray subok tan sakripisyom. Say bautismo so mangiliktar ed sika, tan manresulta itan ed malinis a konsiensia diad arapan na Dios. Nepeg ya say manunan rason na desisyon mon manpabautismo et say panangarom ed si Aman Jehova. Nepeg met ya panisiaan mo ed interon pusom iray katuaan ya naaralan mo nipaakar ed Ama, Anak, tan masanton espiritu. Natan ya apantongtongan tayo la iraya, antoy ebat mo ed tepet ya, “Kasin akaparaan ak la ya manpabautismo?”

17. Anto ray nepeg mon gawaen antis kan manpabautismo?

¹⁷ No iisipen mo ya akaparaan ka lan manpabautismo, seguradon wala la ray ginawam pian nawalaan kay maong ya relasyon ed si Jehova. * Lapud regular ya panaaral moy Biblia, akabat mon maong si Jehova tan si Jesus. Binmiskeg so pananisiam. (Heb. 11:6) Manisia ka ya talagan nagawa iray sipan nen Jehova, tan kombinsido ka ya say pananisiam ed bagat nen Jesus so makapangiliktar ed sika manlapud kasalanan tan ipapatey. Nagbabawian mo la iray kasalanan mo; diad pusom et talagan maermen ka ed saray agawaan mon lingo, tan kinmerew ka lay perdona ed si Jehova. Inuman mo lay kabibilay mo; intundam la iray mauges ya gagawaen mo tan pansasagpotan moy manbilay diad paraan ya makapaliket ed Dios. (Gawa 3:19) Labalabay mon ibaga ed arum iray papanisiaan mo. Nagmaliw kan agbautismadon manangipalapag tan manpupulong ka la kaibay kongregasyon. (Mat. 24:14) Seguradon apaliket mon maong so puso nen Jehova ed saratan ya ginawam.​—Pro. 27:11.

18. Anto ni ray kaukolan mon gawaen antis kan nabautismoan?

¹⁸ Antis kan nabautismoan, wala ni ray kaukolan mon gawaen. Singa abitla la niman, kaukolan mon idedika so sarilim ed Dios. Nepeg ya manpikasi kan impapuso tan isipan mo ed sikato ya usaren moy bilay mo pian gawaey linawa to. (1 Ped. 4:2) Insan ipaamtam ed coordinator na ulop na mamatatken ed kongregasyon yo ya labay mo lay manpabautismo. Wala ray iyasain ton elder ya mitongtong ed  sika. Agka natatakot sano katongtongen da ka. Kabkabat ka la na sarayan brother tan inar-aro da ka. Irepaso da ed sika iray manunan bangat na Biblia. Labay dan seguradoen ya natatalosan mo iratan ya bangat tan antam ya seryoson desisyon so dedikasyon tan bautismo. No nanengneng da ya talagan akaparaan ka la, ipaamta ra ed sika ya nabautismoan ka diad ontumbok ya asemblea odino kombension.

19-20. Anto ray nepeg mon gawaen kayari na bautismom, tan panon mon nagawaan itan?

¹⁹ Anto ray nepeg mon gawaen kayari na bautismom? * Tandaan ya say dedikasyon mo et sipan mo ed si Jehova tan iilaloan to ya tooren mo itan. Kanian kayari na bautismom, ipanengneng mod kabibilay mo ya talagan totooren moy dedikasyon mo. Panon mon nagawaan itan?

²⁰ Mansiansia kan maapit ed kongregasyon. Bilang bautismadon Kristiano, kabiangan ka la na sankamundoan ya impanaagi. (1 Ped. 2:17) Saray agagi ed kongregasyon so espiritual ya pamilyam. No regular kan miaral, onelet so pikakaarom ed sikara. Basam tan dalepdep moy Salita na Dios kada agew. (Sal. 1:1, 2) Kayarim ya basaen so pigaran bersikulo, tunda kan magano tan nonot mon maong so binasam. Diad ontan et onsabi iratan ed pusom. ‘Agka ontutundan manpikasi.’ (Mat. 26:41) Lalo kan onapit ed si Jehova no manpikasi ka ed sikato ya impapuso. ‘Itultuloy mo ya anapen nin unona so Panarian.’ (Mat. 6:33) Nagawaan mo itan no iyunam ed bilay mo so panagpulong. No regular ka ed ministeryo, mansiansian mabiskeg so pananisiam, tan nayarin wala ray natulongan mo ya nawalaan na ilalon manbilay ya andi-anggaan.​—1 Tim. 4:16.

21. Anto ray bendisyon no manpabautismo ka?

²¹ Say pangidedikam na bilay mo ed si Jehova tan say pampabautismom so sankaimportantian ya desisyon ya gawaen mo. Tua, wala ray kaiba ton subok tan sakripisyo. Balet kasin nabawbawim itan? On! Amin ya kairapan ya aanosan tayo ed sayan mundo et “magano tan anlemew” labat. (2 Cor. 4:17) Balet say pampabautismom so mangiter ed sika na mas maliket ya bilay natan tan “tuan bilay” diad arapen. (1 Tim. 6:19) Kanian komon ta nonoten mon maong tan ipikasim so ebat mo ed tepet ya, “Kasin akaparaan ak la ya manpabautismo?”