1. Waut sull eena doonen, ea eena aunfangt een Hus to buen?

STAL die mol väa, doa well wäa een Hus buen un dee weet aul krakjt, woo daut loten saul. Wudd dee dan fuaz sellen de Sachen kjeepen un aunfangen to buen? Nä, wiels doa es noch eenatlei, waut hee onbedinjt ieescht doonen mott. Waut es daut? Hee mott sikj daut äwaräakjnen, woo dia am daut komen woat, daut hee weet, aus hee jenuach Jelt doatoo haft. Wan hee sikj de Kosten em verut goot äwatalt, dan woat hee daut niee Hus secha foadich moaken kjennen.

2. Äwa waut saust du goot nodenkjen, ea du die deepen latst, soo aus Lukas 14:28-30 sajcht?

² Best du Jehova dankboa un leefst du am? Haft die daut bat doa jebrocht, äwa de Doop notodenkjen? Wan jo, dan motst du dautselwje doonen aus jana, waut daut Hus buen well. Wuarom? Denkj mol aun Jesus siene Wieed ut Lukas 14:28-30 (läs). Jesus rät hia doavon, waut daut bediet, sien Jinja to sennen. Wan wie am wellen nofoljen, dan mott wie reed sennen, jewesset opptojäwen un uk met Schwierichkjeiten to räakjnen (Luk. 9:23-26; 12:51-53). Ea du die kaust deepen loten, motst du aulsoo goot doaräwa nodenkjen, waut doa aules met en es. Dan woat die daut lota leichta sennen, Gott tru to deenen.

3. Waut woa wie en disen Artikjel beauntwuaten?

³ Loont sikj daut dan, een Nofolja von Jesus to woaren? Jo, secha! Wäa sikj deepen lat, woat nu aul väl Säajnungen beläwen un uk lota. Nu woa wie eenje wichtje Froagen äwa de Doop beauntwuaten. Daut woat die halpen doaräwa notodenkjen: “Sie ekj aul reed, mie deepen to loten?”

4. (a) Waut bediet daut, sikj Gott hantojäwen? (b) Woo wudd wie kjennen von ons “selfst vejäten”, soo aus Matäus 16:24 sajcht?

⁴ Waut bediet daut, sikj Gott hantojäwen? Ea du die kaust deepen loten, motst du die ieescht Jehova hanjäwen. Daut deist du, wan du von Hoaten bätst un Jehova sajchst, daut du dien gaunzet Läwen brucken west toom am deenen. Wan du die Gott hanjefst, dan deist du soo to sajen von die “selfst vejäten” (läs Matäus 16:24). Nu jehieescht du Jehova, un daut es eene groote Iea (Reem. 14:8). Doamet sajchst du am, daut du nich mea soo läwen west, aus die daut jefelt, oba daut du von nu aun bloos noch am deenen west. Sikj hanjäwen es een Vespräakjen, ooda Bunt met Gott, un daut es eene iernste Sach. Jehova bemott ons nich doatoo. Oba wan wie daut doonen, dan velangt hee von ons, daut wie ons uk doaraun hoolen (Psa. 116:12, 14).

5. Wuarom jehieren sikj hanjäwen un sikj deepen loten toop?

⁵ Wuarom jehieren sikj hanjäwen un sikj deepen loten toop? Wan du die Jehova hanjefst, dan es daut eene Sach tweschen die un Jehova. Oba sikj deepen loten deit eena ver aulem; jeweenlich opp eenen Kongress. Wan du die deepen latst, dan es daut een Bewies, daut du die Jehova aul ea hanjejäft hast. * Derch diene Doop kjennen aundre tweeatlei kloa seenen: Du leefst Jehova, dienen Gott, met dien gaunzet Hoat un gaunze Seel un met aul diene Jedanken un Krauft. Un du best die gaunz eenich, am fa emma to deenen (Mar. 12:30).

6-7. Waut sent no 1. Petrus 3:18-22 no twee Jrind, wuarom wie ons sellen deepen loten?

⁶ Es daut werkjlich needich, sikj deepen to loten? Denkj mol aun daut, waut et en 1. Petrus 3:18-22 sajcht (läs). Wiels Noah dän Kausten bud, kunnen aundre seenen, daut hee aun Gott jleewd. Un wan du die deepen latst, dan kjennen aundre seenen, daut du die Jehova hanjejäft hast. Oba es daut werkjlich needich? Jo. Petrus muak ons daut dietlich. Ieeschtens bediet de Doop diene Radunk. Wie kjennen jerat woaren, wan wie met onse Woakjen bewiesen, daut wie aun Jesus jleewen. Un wie motten uk jleewen, daut hee fa ons storf, vom Doot oppstunt un nu “bie Gott to rajchte Haunt” em Himmel es.

⁷ Tweedens kjrichst du dan “een goodet Jewessen”. Woosoo? Wan wie ons Gott hanjäwen un ons deepen loten, dan kjenn wie opp eene besondre Wajch siene Frind sennen. Hee woat ons onse Sinden vejäwen, wiels wie een Leetsennen haben un aun daut Leesjelt jleewen. Doawäajen kjenn wie een goodet Jewessen ver am haben.

8. Waut saul daut wichtichste sennen, wuarom du die west deepen loten?

⁸ Waut saul die bat doa brinjen, die deepen to loten? Derch dien goodet Bibelstudium hast du väl äwa Jehova jelieet, biejlikj woo hee es un woo hee daut haft. Daut jinkj die sea to Hoaten un brocht die bat doa, am sea to leewen. Diene Leew fa Jehova saul daut wichtichste sennen, wuarom du die west deepen loten.

9. Waut meent daut, sikj en dän Nomen von dän Voda, dän Sän un dän heiljen Jeist deepen to loten, soo aus Matäus 28:19-20 sajcht?

⁹ Secha west du die uk wäajen daut deepen loten, waut du ut de Schreft jelieet hast. Daut stemt met Jesus sien Jeboot, Jinja to moaken (läs Matäus 28:19-20). Hee säd je: “Deept an en dän Nomen von däm Voda, von däm Sän un von däm  Heiljen Jeist.” Waut meent daut? Du motst met dien gaunzet Hoat aun daut jleewen, waut de Schreft äwa Jehova un Jesus un dän heiljen Jeist sajcht. Daut kaun väl aun die doonen un die sea to Hoaten gonen (Heb. 4:12). See wie mol een poa Biespels.

10-11. Waut hast du äwa dän Voda jelieet?

¹⁰ Denkjt die daut noch, aus du de Woarheit äwa dän Voda kjanen lieezhd? Sien Nomen es Jehova un hee es “de Aulahechsta en de Welt” un “de eensja Gott” (Psa. 83:19; Jes. 37:16). Hee haft ons jemoakt, un aule “Help kjemt” von am (Psa. 3:9; 36:10). Hee haft daut mäajlich jemoakt, daut wie kjennen von Sind un Doot friekomen, un haft ons de Hopninj jejäft noch mol eewich to läwen (Joh. 17:3). Wan du die hanjefst un die deepen latst, dan bewiest du, daut du eent von Jehova siene Zeijen best (Jes. 43:10-12, NW). Dan woascht du to eene groote Famielje jehieren, waut Jehova oppe gaunze Welt deenen. Dee sent brow, daut dee no Gott sienen Nomen jenant woaren, un moaken aundre met dän bekaunt (Psa. 86:12).

¹¹ Daut es eene groote Iea, to weeten, waut de Schreft äwa dän Voda lieet! Wan du daut väl räakjenst, dan kaust du bloos nich aundasch, aus du west die Jehova hanjäwen un deepen loten.

12-13. Waut hast du äwa dän Sän jelieet?

¹² Waut deed daut aun die, aus du de Woarheit äwa dän Sän kjanen lieezhd? Jesus es de tweeda von daut hechste äwa aules. Hee jeef sien Läwen wellich aus een Opfa fa ons. Wan wie aun daut Leesjelt jleewen un daut met onse Woakjen bewiesen, dan kjennen ons de Sinden vejäft woaren. Wie kjennen uk Gott siene Frind sennen un eewjet Läwen kjrieen (Joh. 3:16). Jesus es ons Huaga Priesta, un hee well ons halpen, daut ons daut Leesjelt togood kjemt un wie Gott noda komen (Heb. 4:15; 7:24-25). Jesus es uk de Kjennich äwa Gott sien Rikj. Jehova woat derch Jesus sienen Nomen heiljen un met daut schlajchte een Enj moaken un em Paradies väl goodet brinjen, waut eewich blift (Mat. 6:9-10; Opb. 11:15). Jesus es ons Väabilt, waut wie nodoonen sellen (1. Pet. 2:21). Sien Läwen dreid sikj bloos doarom, Gott sienen Wellen to doonen (Joh. 4:34).

¹³ Wan du daut jleefst, waut de Schreft äwa dän Sän lieet, dan woat die daut halpen, am to leewen. Ut Leew fa Gott sienen Sän west du dan dien Läwen lank Gott sienen Wellen doonen, krakjt soo aus hee. Un dan west du die uk Jehova hanjäwen un die deepen loten.

14-15. Waut hast du äwa dän heiljen Jeist jelieet?

¹⁴ Waut dochst du, aus du de Woarheit äwa dän heiljen Jeist kjanen lieezhd? Daut es nich eene Jeistpersoon, oba Gott siene Krauft. Derch dän heiljen Jeist jeef Jehova de Bibelschriewa daut en, waut see sullen oppschriewen. Un wan wie enne Schreft läsen, dan halpt dee ons, daut wie daut vestonen un nokomen kjennen (Joh. 14:26; 2. Pet. 1:21). Derch sienen Jeist jeft Jehova ons uk “butajeweenlije Krauft” (2. Kor. 4:7, Reimerbibel). Wäajen dise Krauft kjenn wie de goode Norecht prädjen, Vesieekjungen wadastonen, met Mootloosichkjeit foadich woaren un en Schwierichkjeiten uthoolen. De Jeist halpt ons uk, wundascheene Ieejenschoften to wiesen, waut to “dän Jeist siene Frucht” jehieren (Gal. 5:22). Gott jeft deejanje wellich sienen Jeist, waut am vetruen un am opprechtich doano froagen (Luk. 11:13).

¹⁵ Jehova siene Deena kjennen sikj opp sienen heiljen Jeist veloten. Jeft ons daut nich väl Moot, daut Gott siene Krauft ons  halpt, am to deenen? Wan du die daut to Hoaten nemst, waut du äwa dän heiljen Jeist jelieet hast, dan woascht du die wellen Jehova hanjäwen un die deepen loten.

16. Waut hab wie en disen Artikjel bat nu jelieet?

¹⁶ Daut es eene wichtje Entscheidunk, aus du die Gott hanjäwen west un die deepen loten. Soo aus wie jeseenen haben, motst du die de Kosten äwaräakjnen. Daut meent, daut du reed sennen motst, jewesset opptojäwen un met Schwierichkjeiten foadich to woaren. Oba daut es nuscht em Vejlikj met daut goode, waut du dan kjrieen woascht. De Doop kaun die raden un brinjt die uk een goodet Jewessen ver Gott. Diene Leew fa Jehova es daut wichtichste, waut die bat doa brinjen saul. Du motst uk met dien gaunzet Hoat aun daut jleewen, waut de Schreft werkjlich äwa dän Voda, dän Sän un dän heiljen Jeist lieet. Nodäm daut du äwa dit aules nojedocht hast, wurscht du kjennen äwalajen: “Sie ekj aul reed, mie deepen to loten?”

17. Waut mott eena doonen, ea eena sikj kaun deepen loten?

¹⁷ Wan du denkjst, daut du fa de Doop reed best, dan hast du secha aul väl jedonen, om met Jehova Frint to sennen. * Wiels du räajelmässich de Schreft studieescht, hast du väl äwa Jehova un Jesus jelieet un dien Gloowen es stoakja jeworden (Heb. 11:6). Du velatst die gaunz opp daut, waut Jehova en de Schreft vesprakjt. Un du jleefst, daut Jesus sien Opfa die von Sind un Doot friemoaken kaun. Du hast uk een Leetsennen, wiels die es daut opp iernst schod, waut du ea orrajcht jedonen hast, un du hast Jehova om Vejäwunk jefroacht. Du hast uk dien Läwen gaunz jeendat un du best die eenich, nich mea soo to läwen aus ea, oba soo, aus Gott daut jefelt (Apj. 3:19). Du jleichst daut, aundre von dienen Gloowen to vetalen, un doawäajen best du ojjedeepta Vekjindja jeworden un kaust nu met de Vesaumlunk toop prädjen gonen (Mat. 24:14). Wiels du daut jedonen hast, waut needich wia, hast du Jehova sien Hoat sea froo jemoakt un hee es brow met die (Spr. 27:11).

18. Waut mott eena noch doonen, ea eena sikj kaun deepen loten?

¹⁸ Ea du die dan kaust deepen loten, motst du noch waut doonen. Soo aus wie aul jeseenen haben, motst du die Gott hanjäwen. Bäd von Hoaten to am, wan du auleen best, un saj am, daut du dien Läwen brucken west, om sienen Wellen to doonen (1. Pet. 4:2). Nodäm saj dän Plona von de Eltestasch daut, daut du die west deepen loten. Hee woat dan eenje Eltestasch froagen, aus dee met die räden kjennen. Oba hab nich Angst! Denkj doaraun, daut dise  leewe Breeda die aul goot kjanen un die väl räakjnen. Dee woaren met die von de Gruntlieren ut de Schreft räden. Dee wellen seenen, aus du dee vestonen kaust un aus die daut kloa es, woo wichtich sikj hanjäwen un deepen loten es. Wan dee jleewen, daut du fa de Doop reed best, dan woaren see die sajen, daut du daut opp dän näakjsten Kongress doonen kaust.

19-20. Waut motst du no diene Doop doonen, un woo kaust du daut?

¹⁹ Waut motst du doonen, wan du die ieescht hast deepen loten? * Hool em Denkj, daut du Jehova waut vespruakst, aus du die am hanjeefst. Un hee velangt, daut du die doaraun helst. Doawäajen motst du no de Doop soo läwen, aus du am vesproaken hast. Woo kaust du daut doonen?

²⁰ Hool die aun diene Vesaumlunk. Wan du ieescht jedeept best, dan hast du een deel Breeda (1. Pet. 2:17). Dise Gloowesbreeda sent soo aus eene jeistelje Famielje fa die. Wan du pinkjlich bie de Toopkomes best, dan woa jie noch jratre Frind woaren. Läs jieda Dach Gott sien Wuat un denkj uk doaräwa no (Psa. 1:1-2). Daut woat die to Hoaten gonen, wan du emma een poa Varzh opp eemol läst un die dan de Tiet nemst toom deep doaräwa nodenkjen. De Schreft sajcht uk: “Hoolt aun met bäden” (1. Tess. 5:17). Wan du von Hoaten bätst, dan woascht du Jehova noda komen. Daut sajcht uk: “Sieekjt daut ieeschte no Gott sien Rikj” (Mat. 6:33). Wan du daut deist, dan woascht du daut prädjen sea iernst nämen. Un wan du daut räajelmässich deist, dan blift dien Gloowen stoakj un du kaust aundre halpen, dän Wajch no daut eewje Läwen to finjen (1. Tim. 4:16).

21. Waut kaust du derch de Doop kjrieen?

²¹ Sikj Jehova hantojäwen un sikj deepen to loten es de wichtichste Entscheidunk en ons gaunzet Läwen. Daut haft waut opp sikj, oba daut loont sikj. Wuarom? Wiels daut, waut wie en dise oole Welt veleicht derchmoaken motten, “es bejrenst un leicht” em Vejlikj met daut, waut wie derch onse Doop kjrieen (2. Kor. 4:17). Wie woaren nu aul een scheenret Läwen haben un lota noch mol “daut woare Läwen” kjrieen (1. Tim. 6:19). Doawäajen sell wie bäden un goot äwa de Froag nodenkjen: “Sie ekj aul reed, mie deepen to loten?”