1. Dahme aramas emen anahne wia mahs mwohn eh pahn tepida wiahda ihmw ehu?

MEDEWEHLA me aramas emen pilahn en wiahda ihmw ehu. E ese soangen ihmw dah me e men wiahda. Ia duwe, e anahne mwadangete kohla ni sidohwa oh pwainda kepwe kan oh tepida wia ihmwo? Soh. Mwohn eh pahn tepida, mie mehkot kesempwal me e anahne wia. E anahne kapatahda ia uwen pweinen soahng koaros me pahn wiahda ihmwo. Dahme kahrehda? Pwehki e anahne ese ma nah mwohnio pahn itar pwehn kanekehla ihmwo. Ma e kapatahda mahs ni keneinei soahng kan me e anahne, ele e pahn kak kanekehla imwe ihmw kapwo.

2. Nin duwen me Luk 14:27-30 mahsanih, dahme ke anahne medewe kanahieng mwohn omw pahn papidaisla?

² Ia duwe, omw limpoak oh kalahngan ong Siohwa me kamwakid uhk en medewe en papidaisla? Ma ei, ke anahne wiahda pilipil me duwehte en ohlo me men wiahda ihmwo. Dahme kahrehda kitail kak ndahki met? Medewehla mahsen en Sises ko nan Luk 14:27-30. (Wadek.) Sises mahmahsanih duwen ia wehwehn en wiahla sapwellime tohnpadahk. Ma kitail men wiahla sapwellime tohnpadahk, kitail pahn men dadaur pahn kahpwal kan oh tounmeteikihla soahng kei me kitail ahneki. (Luk 9:23-26; 12:51-53) Eri mwohn omw pahn papidais, ke anahne medewe kanahieng duwen soahng koaros me met kin pidada. Eri, ke pahn onopada mwahu en pousehlahte papah Koht ni lelepek nin duwen emen Kristian me papidaislahr.

3. Dahme kitail pahn koasoiapene nan iren onop wet?

³ Ia duwe, pweinen omw pahn dadaur pahn kahpwal kan oh tounmeteikihla dahme ke ahneki pwehn wiahla sapwellimen Krais tohnpadahk men me papidais pahn mie katepe? Ei uhdahn! Emen me papidaisla pahn alehdi kapai tohto met oh pil ahnsou kohkohdo.  Kitail pahn koasoiapene ekei peidek kesempwal kan duwen papidais. Omw wia met pahn seweseiuk en sapengala peidek wet, ‘I onopadahngehr en papidaisla?’

4. (a) Ia wehwehn atail en inoukihong Siohwa atail mour? (b) Nin duwen me Madiu 16:24 mahsanih, ia wehwehn en “tounmeteikihla” omw mour?

⁴ Ia wehwehn atail en inoukihong Siohwa atail mour? Mwohn omw kak papidaisla, ke anahne wiahda inou ehu. Ni omw inoukihong Siohwa omw mour, ke kapakap ong ih sang nan omw mohngiong unsek oh padahkihong ih me ke pahn doadoahngki omw mour pwehn papah ih kohkohlahte. Ni omw wiahda inou wet ong Koht, ke “tounmeteikihla” pein kowe. (Wadek Madiu 16:24.) Met Siohwa sapwellimankinuhkalahr, oh e wia pai uhdahn kaselel ehu. (Rom 14:8) Ke patohwanohng ih me sang met kohla, dahme keieu kesempwal ong kowe iei en papah ih, a kaidehn en kaperenda pein uhk. Inou wet wia inou kesempwal ehu me ke wiahda ong Koht. Siohwa sohte ketin idingkihong kitail en wiahda inou wet. Ahpw ni atail wiahda inou wet, e ketin kasik me kitail pahn kapwaiada.​—Mel. 116:12, 14.

5. Ia wekpeseng en omw inou oh papidais?

⁵ Ia duwen atail wiahda inou eh pidada papidais? Sohte emen likin kowe me ese ahnsowo me ke inoukihong Siohwa omw mour. Papidais kin wiawi mwohn meteikan, oh e kin kalapw wiawi ni mihting tohrohr kan. Ni omw papidaisla, ke kasalehiong meteikan me ke inoukihongehr Siohwa omw mour. * Omw papidaisla kin kasalehiong meteikan me ke poakohng Siohwa omw Koht sang omw mohngiong unsek, mour unsek, lamalam unsek, oh kehl unsek, oh ke koasoanedier en papah ih kohkohlahte.​—Mark 12:30.

6-7. Nin duwen me 1 Piter 3:18-22 mahsanih, kahrepe riau dah kan me kitail anahne papidaisla?

⁶ Kitail uhdahn anahne papidaisla? Medewehla dahme 1 Piter 3:18-22 mahsanih. (Wadek.) Warihmwo kasalehiong aramas akan me Noha kin pwoson Koht. Ni ahlohte, omw papidais kin kasalehiong aramas akan me ke inoukihongehr Siohwa omw mour. Ahpw ia duwe, kitail uhdahn anahne papidaisla? Ei uhdahn. Piter kawehwehda dahme kahrehda. Keieu, papidais kin ‘komourkitailla.’ E kak komourkitailla ma kitail wiadahr kahk kesempwal kan pwehn kasalehda me kitail pwoson Sises oh kamehlele me e ketin pwoukinkitailla, iasadahr oh ketidalahr nanleng, oh met ketiket “ni palimaun en Koht.”

⁷ Keriau, papidais kin kahrehiong kitail en ahneki “nsenmwakelekel.” Ni atail inoukihong Koht atail mour oh papidaisla, kitail kin ahnekihda nanpwungmwahu tohrohr ehu reh. Pwehki kitail uhdahn koluhkihla dipatail kan oh kin pwoson pweinen pweipwei sapahlo, Koht ketin mahkohng kitail. Eri kitail kakehr ahneki nsenmwakelekel mwohn silangi.

8. Ia uhdahn kahrepe me ke pilada en papidaisla?

⁸ Ia uhdahn kahrepe me ke pilada en papidaisla? Pwehki omw onopki mwahu duwen Paipel, ke sukuhlki soahng tohto duwen Siohwa​—soangen Koht dahmen ih, oh duwen sapwellime wiewia kan. Dahme ke sukuhlki duwen ih kin sair uhk oh kahrehiong uhk en uhdahn poakohngala ih. Kahrepe keieu kesempwal me ke pilada en papidaisla iei pwehki ke poakohng Siohwa.

9. Nin duwen me Madiu 28:19, 20 mahsanih, ia wehwehn en papidaisla ni mwaren Sahm oh Sapwellime Ohl oh sapwellimen Koht manaman?

⁹ Pil ehu kahrepen omw pilada en papidaisla iei pwehki ke sukuhlki padahk mehlel kan en Paipel oh kamehlele. Medewehla dahme Sises mahsanih ni eh ketikihda kehkehliko duwen katohnpadahk. (Wadek Madiu 28:19, 20.) Nin duwen me e mahsanih, irail kan me papidaisla anahne wia met “ni mwaren Sahm oh Sapwellime Ohl oh  sapwellimen Koht manaman.” Ia wehwehn met? Ke anahne kamehlele sang nan omw mohngiong unsek padahk mehlel kan en Paipel me pid Siohwa, sapwellime Ohlo Sises, oh pil sapwellime manaman. Padahk mehlel pwukat uhdahn manaman oh kak sair omw mohngiong. (Ipru 4:12) Kitail pahn kousapahlih ekei padahk pwukat.

10-11. Padahk mehlel dah kan duwen Sahmo me ke sukuhlkiher oh kamehlele?

¹⁰ Medewehla ni ahnsowo me ke sukuhlki padahk mehlel pwukat me pid Sahmo: Ih “me mwarenki Siohwa,” ih me “Wasa Lapalahpie pohn sampah pwon,” oh ih kelehpw “me Koht mehlel.” (Mel. 83:18, NW; Ser. 10:10) Ih me Sounkapikpatail oh Sounkomourpatail. (Mel. 3:8; 36:9) E ketikihda koasoandi kan pwehn komourkitailsang dihp oh mehla, oh pil ketikihong kitail koapworopwor en mour soutuk. (Sohn 17:3) Omw inoukihong Koht omw mour oh papidaisla pahn kasalehda me ke wialahr emen Sounkadehdehn Siohwa. (Ais. 43:10-12) Ke pahn wiahla kisehn peneinei ehu nan sampah pwon me kin kaudokiong Siohwa oh kin pohlki weuwa mware oh pil padahkihong meteikan.​—Deud. 32:3.

¹¹ E uhdahn wia pai kaselel ehu en wehwehki dahme Paipel padahngki duwen Sahmo! Ni omw kamehlele padahk mehlel pwukat, omw mohngiong kin kamwakid uhk ken inoukihong Siohwa omw mour oh papidaisla.

12-13. Padahk mehlel dah kan duwen sapwellimen Koht Ohlo me ke sukuhlkiher oh kamehlele?

¹² Ia duwen omw mwekidki ni omw sukuhlki padahk mehlel pwukat duwen Sapwellimen Koht Ohlo? Sises iei me keriaun kesempwal nanleng oh pil sampah. E kupwurki tounmeteikihla eh mour nin duwen pweinen pweipwei sapahl ehu ong kitail. Ni atail kin kasalehda sang ni atail wiewia me kitail pwoson pweinen pweipwei sapahlo, kitail kak ale mahkpen dipatail kan, kakairada nanpwungmwahu rehn Koht, oh ale mour soutuk. (Sohn 3:16) Sises iei atail Samworo Lapalap. E kupwurki sewese kitail en paiekihda pweinen pweipwei sapahlo oh ahneki nanpwungmwahu keren rehn Koht. (Ipru 4:15; 7:24, 25) Siohwa pahn ketin doadoahngki Sises nin duwen Nanmwarki en sapwellime Wehi pwehn kasarawihala mware, ketikihsang me suwed kan, oh ketikihdo kapai poatopoat nan Paradais ni ahnsou kohkohdo. (Mad. 6:9, 10; Kaud. 11:15) Sises me kitail en kahlemengih. (1 Pit. 2:21) E ketin doadoahngki sapwellime mour pwehn wia kupwuren Koht, oh ni ahl wet, e ketikihda mehn kahlemeng ehu ong kitail.​—Sohn 4:34.

¹³ Ni omw kin kamehlele dahme Paipel padahngki duwen Sises, ke pahn poakohngala sapwellimen Koht Ohlo. Limpoak wet kin kamwakid uhk en doadoahngki omw mour pwehn wia kupwuren Koht, duwehte me Sises ketin wia. Imwilahn met, ke pahn mwekidki en inoukihong Siohwa omw mour oh papidaisla.

14-15. Padahk mehlel dah kan duwen sapwellimen Koht manaman me ke sukuhlkiher oh kamehlele?

¹⁴ Ia omw madamadau ni ahnsou me ke sukuhlki duwen padahk mehlel kan me pid “ngehn sarawi”? Met kaidehn ngehn emen ahpw e wia sapwellimen Koht manaman. Siohwa kin ketin doadoahngki manaman wet pwehn kaweid ntingdahn Paipel, oh manaman wet kin sewese kitail en wehwehki oh doadoahngki dahme kitail wadek nan Paipel. (Sohn 14:26; 2 Pit. 1:21) Siohwa ketin doadoahngki manaman wet pwehn ketikihong kitail “kehl me laudsang dahme aramas ahneki.” (2 Kor. 4:7) Manaman wet kin kihong kitail kehl en kalohki rongamwahwo, pelianda kasongosong kan, dadaur pahn irair kansensuwed kan, oh powehdi kahpwal kan. E kin sewese kitail en kasalehda irair kaselel kan en “wahn sapwellimen Koht manaman.” (Kal. 5:22) Koht kin ni kadek ketikihda sapwellime manaman ong irail kan me kin likih ih oh peki reh ni mehlel.​—Luk 11:13.

¹⁵ Ia uwen kansenamwahu en ese me sapwellimen Siohwa tohnkaudok kan kak likih  manaman wet pwehn sewese irail en papah Koht! Ni omw kin kamehlele padahk mehlel kan me ke sukuhlki duwen sapwellimen Koht manaman, ke pahn mwekidki en inoukihong Koht omw mour oh papidaisla.

16. Dahme kitail sukuhlkiher?

¹⁶ Omw pilipil en inoukihong Koht omw mour oh papidaisla kin uhdahn kesempwal. Nin duwen me kitail sukuhlki, ke anahne pwungki soahng kan me met kin pidada, me iei kahpwal kan oh tounmetei kan me ke anahne wiahda. Ahpw kapai kan me ke pahn alehdi uhdahn laudsang tounmetei kan me ke pahn wiahda. Papidais kak komouruhkala, oh e kak kahrehiong uhk en ahneki nsen mwakelekel mwohn silangin Koht. Kahrepe keieu kesempwal me ke pilada en papidaisla iei pwehki omw limpoak ong Siohwa Koht. Ke pil anahne kamehlele sang nan omw mohngiong unsek duwen padahk mehlel kan me ke sukuhlkiher duwen Sahmo, Sapwellime Ohl, oh sapwellimen Koht manaman. Mwurin omw medemedewe dahme kitail koasoiapenehier, ia duwen omw pahn sapengala peideko, “I onopadahngehr en papidaisla?”

17. Soahng dah kan me emen anahne wia mwohn eh papidais?

¹⁷ Ma ke pehm me ke onopadahngehr en papidais, ele ke wiadahr soahng tohto pwehn kakairada omw nanpwungmwahu rehn Siohwa. * Pwehki omw kin kaukaule onopki Paipel, ke esehlahr duwen Siohwa oh Sises. Ke pil kalaudehlahr omw pwoson. (Ipru 11:6) Ke uhdahn koapworopworki sapwellimen Siohwa inou kan nan Paipel, oh ke kamehlele me omw pwoson sapwellimen Sises meirongo kak doareiukasang dihp oh mehla. Ke koluhkihlahr dipomw kan; me iei, ke uhdahn koluhkihla sapwung kan me ke wiahda, oh ke peki rehn Siohwa sapwellime mahk. Ke wekidalahr omw mour, me wehwehki ke uhdahn liksang omw wiewia suwed kan en mahs oh tepida mourki elen mour ehu me kin kaperenda Koht. (Wiewia 3:19) Ke kin ngoangki padahkihong meteikan duwen dahme ke kamehlele. Ke wialahr sounkalohk men me saikinte papidais oh tepidahr iang mwomwohdiso kalohk. (Mad. 24:14) Siohwa ketin kupwurperenkihda omw wiadahr kahk kesempwal pwukat. Ke uhdahn kaperenda laud kupwure.​—Lep. Pad. 27:11.

18. Dahme ke pil anahne wia mwohn omw kak papidaisla?

¹⁸ Mwohn omw kak papidaisla, miehte soahng kei me ke pil anahne wia. Ni duwen me kitail sukuhlkiher, ke anahne inoukihong Koht omw mour. Kapakap ong Siohwa sang nan omw mohngiong unsek ni omw kelehpwla, oh inoukihong ih me ke pahn doadoahngki omw mour pwehn wia kupwure. (1 Pit. 4:2) Mwuhr, kohla tuhwong soun koasoanehdi pwihn en elder kan oh padahkihong ih me ke men papidaisla. E pahn peki rehn ekei elder kan ren tuhwong uhk. Menlau dehr pwunodki arail pahn tuhwong uhk. Tamataman me brother kadek pwukat eseier ihs  kowe oh re poakohng uhk. Irail pahn kousapahlih rehmw padahk mengei kan en Paipel me ke sukuhlkiher. Irail men tehk mwahu me ke wehwehki padahk pwukat oh me ke ese ia uwen kesempwal en inoukihong Koht omw mour oh papidaisla. Ma re pwungki me ke onopadahr, re pahn padahkihong uhk me ke kak papidaisla nan mihting tohrohr me pahn wiawi mwuhr.

19-20. Dahme ke pahn anahne wia mwurin omw papidaisla, oh ia duwen omw kak wia met?

¹⁹ Mwurin omw papidaisla, dahme ke pahn anahne wia? * Tamataman me ke wiadahr inou ehu ong Siohwa oh Siohwa ketin kasik me ke pahn kapwaiada. Eri mwurin omw papidaisla, ke anahne kapwaiada omw inowo. Ia duwen omw kak wia met?

²⁰ Mihmi karanih mwomwohdiso me ke kin iang. Nin duwen Kristian men me papidaislahr, met ke wialahr kisehn pirien ehu en Kristian kan. (1 Pit. 2:17) Riomw Kristian kan nan mwomwohdiso kin duwehte omw peneinei. Sang ni omw kin kaukaule towehda mihting kan, ke pahn kakehlakahla omw nanpwungmwahu rehrail. Wadek Mahsen en Koht oh doudouloale rahn koaros. (Mel. 1:1, 2) Mwurin omw wadek ehu wasa nan Paipel, kihong ahnsou en medewe mwahu duwen dahme ke wadek. Eri mahsen ko pahn sair omw mohngiong. “Poadidiong kapakap.” (Mad. 26:41) Omw kin kapakap sang nan omw mohngiong pahn kakerenihiukala rehn Siohwa. “Pousehlahte rapahki mahs Wehio.” (Mad. 6:33) Ke kak wia met sang ni omw kin mwohneki doadoahk en kalohk nan omw mour. Sang ni omw kin kaukaule iang kalohk, ke pahn kolokolete omw pwoson en kehlail, oh ele ke pahn sewese meteikan en alehdi koapworopwor en mour kohkohlahte.​—1 Tim. 4:16.

21. Dahme omw papidais pahn ritingadahng uhk?

²¹ Omw pilada en inoukihong Siohwa omw mour oh papidaisla iei pilipil me keieu kesempwal nan omw mour. Ei mehlel, mie soahng kan me ke anahne tounmeteikihla. Ia duwe, e pahn mie katepe? Ei uhdahn! Sohte lipilipil soangen kahpwal dah me ke ahneki nan sampah mering wet kin “ongete ahnsou kis oh me marahra.” (2 Kor. 4:17) Weksang met, omw papidaisla pahn ritingadahng uhk mour nsenamwahu ahnsou wet oh pil ong “mour mehlelo” me pahn kohdo. (1 Tim. 6:19) Eri menlau, medemedewe kanahieng oh kapakapki duwen omw pahn sapengala peideko, “I onopadahngehr en papidais?”