1. Shuj huasita nara shayachishpallataca ¿imatata rurana can?

PIPASH shuj huasiguta shayachingapaj munashcanman. Jatunlla o uchilla huasigu canataca ali alimi yachana can. Chaita ali yachaimandami ima minishtishcaguta randingapaj rin. Shinapash nara randingapaj rishpallatami mashna culqui gashtarinata ali ali ricuna can. ¿Imamandata chaita ruranaca minishtirin? Mashna culquigu gashtarinata ali ali ricushpami huasitaca shayachi ushanga.

2. Lucas 14:28-30​pi nishca shinaca nara bautizarishpallata ¿imapita pensarina capangui?

² ¿Jehovata juyaimanda, paita agradicimandachu quiquinga bautizaringapaj munapangui? Shina cashpaca huasichingapaj munajuj jarigu cuendami capangui. ¿Imamandata shina nipanchi? Lucas 14:28-30​pi Jesús imata nishcapi pensaripashunchi (chai textota liipangui). Jesuspa ali catijcuna cangapaca ¿imatata rurana capanchi? Paita catingapaca ‘culquigu pactanata, na pactanatapash’ ricujuj cuendami paita catina capanchi. Jesusta catimandami llaquicunatapash charishun, huaquinbicarin ñucanchi munashca cosascunatapash saquina tucupashun (Luc. 9:23, NM; 9:24-26; 12:51-53). Shina cashpaca nara bautizarishpallatami Jesuspa ali catij tucungapaca, imatalla rurana cashcata ali ali yachana capangui. Shina ali yachaimandami bautizarishca jipapash Jehová Diosta tucui shunguhuan ali sirvishpa cati ushapangui.

3. ¿Cai temapica imatata yachajugripanchi?

³ Jesusta catimandami huaquinbica llaquicunata charishun. ¿Shina llaquicunata charinata yachashpapashchu bautizarinaca ali can? Ari, alimi can. Bautizarishpaca cunanbi, jipa punllacunapipashmi ashtaca bendiciongunata chasquipangui. Chaimandami cai temapica bautizarinamanda huaquin tapuicunata yachajupashun. Cai tapuicunamanda yachajunami bautizaringapaj listo o na listo cashcata yachachun ayudanga.

4. a) Jehovatalla sirvisha nishpa mañanaca ¿imatata ningapaj munan? b) Mateo 16:24​pi nishca shinaca ñucanchi munaita ladoman saquinaca ¿imata can?

⁴ Jehovatalla sirvisha nishpa mañanaca ¿imatata ningapaj  munan? Nara bautizarishpallatami quiquinga, Jehová Dios ñuca causaipica candallami sirvisha nishpa tucui shunguhuan mañana capangui. Shina mañashpaca quiquinba munaita ñana rurashpa causana cashcatami ricuchipangui (Mateo 16:24, liingui) *. Chai punllamandapachami Jehová Diostalla sirvingapaj causapangui (Rom. 14:8). Jehovatalla sirvisha nishca punllamandapachaca paita sirvinami quiquinba causaipica ashtahuan importante cana can. Shinami quiquinba munaita ladoman saquishcata ricuchipangui. Jehová Diosca paitalla sirvichunga pitapash na obliganllu. Shinapash paitalla sirvisha nishcataca tucui shunguhuan ñucanchicuna pactachichunmi Jehová Diosca munan (Sal. 116:12, 14).

5. Jehovatalla sirvisha nishpa mañanaca, bautizarinahuanga ¿igualchu can?

⁵ Jehovatalla sirvisha nishpa mañanaca, bautizarinahuanga ¿igualchu can? Na, na igualchu can. Ñucanchilla cashpami Jehovatalla sirvisha nishpa mañapanchi. Cutin bautizarishpaca shuj asambleapimi tucuicunapa ñaupajpi bautizaripanchi. Bautizarishpami Jehovatalla sirvisha nishcata tucuicunaman ricuchipanchi. * Shina rurashpami, Taita Diostaca tucui shunguhuan, tucui causaihuan, tucui yuyaihuan, tucui ushaihuan juyashcata ricuchipangui. Shinallata quiquinba causaipi para siempre Jehovatalla sirvingapaj decidishcatapashmi ricuchipangui (Mar. 12:30).

6, 7. Bautizarinamandaca ¿ima ishcai yuyaicunatata 1 Pedro 3:18-22​pica yachachin?

⁶ ¿Bautizarinaca minishtirishcapachachu can? (1 Pedro 3:18-20; 3:21 *; 3:22, liingui). Noeca arcata rurashpami feta charishcata ricuchirca. Shina cuendami ñucanchicunaca Jehovatalla sirvisha nishcataca bautizarishpa ricuchipanchi. Shinaca bautizarinaca ¿minishtirishcapachachu can? Ari, minishtirishcami can. Caimandallata parlashpami apóstol Pedroca cai ishcai yuyaicunata nirca: Callari yuyai, “bautizarishpami, cunanga quishpirinchi”. Shinaca bautizarishpa salvaringapaca ñucanchi ruraicunahuanmi Jesuspi feta charishcata ricuchina capanchi. Shinallata Jesús ñucanchimanda huañushcata, causarishpa jahua cieloman rishcata, cunanbi ‘Taita Diospa ali ladoman tiajujtapashmi’ bautizarishpaca crishcata ricuchipanchi.

⁷ Cati yuyai, bautizarinaca “ñucanchi shungu ama nalita yarichun” o ali concienciata charichunmi ayudan. Jehovatalla sirvisha nishpa mañana, bautizarinaca Jehovahuan ali amigo cachunmi ayudan. Ñucanchicuna tucui shunguhuan arripintirijpi, Jesús ñucanchimanda huañushcapi crijpimi ñucanchi juchacunata Jehová Diosca perdonanga. Shinami shuj ali concienciata charishpa paipa ñaupajpi ali cashcatapash ricuchipashun.

8. ¿Imamandata bautizarina capangui?

⁸ ¿Imamandata bautizarina capangui? Quiquindaca Bibliamanda ali intindinami Jehová Dios imashna cashcata ali yachajuchun ayudashca. Chai yachajushcacuna quiquinba shunguman chayajpimi Jehová Diostaca tucui shunguhuan juyai callaripangui. Shinaca Jehová Diosta juyaimandami bautizarina capangui.

9. Mateo 28:19, 20​pi nishcashnaca Taitapa, Churipa, Diospa jucha illaj espiritupa shutipi bautizarinaca ¿imatata ricuchin?

⁹ Bibliamanda cabalta yachajunami quiquindaca bautizaringapaj decidichun ayudanga. Ñuca catijcuna tucuchun villagrichi nishpa imacunatalla Jesús nishcata ricupashunchi (Mateo 28:19, 20, liingui). Jesusca ‘Taitapa, Churipa, Diospa jucha illaj espiritupa shutipimi’ gentecunataca ‘bautizana canguichi’ nircami. Cai shimicunaca Jehovamanda, Jesusmanda, Jehovapa espíritu santomanda Bibliapi imata yachachishcata tucui  shunguhuan gentecuna crina cashcatami ricuchin. Caicunamanda yachajunami quiquinba causaipica ashtacata ayudanga (Heb. 4:12). Shinaca imacunatalla quiquin yachajushcata yaripashun.

10, 11. Bibliamanda chaira yachajujushpaca ¿imatata Taita Diosmandaca yachajuparcangui?

¹⁰ Bibliamanda chaira yachajujushpaca Taita Diospa shuti Jehová cajta, ‘Tucui Alpamanda ashtahuan Jatun Dios’ cajta, pailla “tucui cai pachapi mandajuj llactacunapa Taita Dios” cajtami yachajuparcangui (Sal. 83:18, NM; Is. 37:16). Ñucanchita Ruraj Dios cashcamanda salvarina paimandalla shamujtapashmi yachajuparcangui (Sal. 3:8; 1 Tim. 6:13). Ashtahuanbash ñucanchimanda paipa Churita huañuchun cachamushpa ñucanchi juchacunata perdonashpa para siempre causachun ayudashcatapashmi yachajuparcangui (Juan 17:3). Jehová, candallami sirvisha nishpa mañashca jipaca, bautizarishpami testigo de Jehová cashcata ricuchipangui (Is. 43:10-12). Bautizarishpaca Jehová Diostalla tucui shunguhuan sirvij gentecunapurapimi caita ushapangui (Sal. 86:12).

¹¹ Jehová Diosmanda Bibliapi yachajunaca alipachami can. Cai yachajushcacuna quiquinba shunguman chayajpimi Jehová Diostalla sirvingapaj, bautizaringapapash munapangui.

12, 13. Taita Diospa Churimandaca ¿imatata yachajupashcangui?

¹² Taita Diospa Churimanda yachajushpaca ¿imashinata sintiriparcangui? Jehovamanda yachajushpapash Jesusmanda yachajunaca minishtirishcapachami can. Jesusmi ñucanchimanda huañushpa ñucanchitaca salvarca. Jesús huañushcapi feta charishcataca ruraicunahuanmi ricuchina capanchi. Chaimi Jehová Diosca ñucanchi juchacunata perdonanga, paipa amigocuna cachunbash saquinga. Shinallata paraíso Alpagupi para siempre causachunbash ayudanga (Juan 3:16). Jesusca ñucanchipa Sumo Sacerdotemi can. Paimi ñucanchicuna Jehovapa ali amigocuna cachunbash ayudangapaj munan (Heb. 4:15; 7:24, 25). Jesustami Jehová Diosca paipa Reinopi rey cachun churashca. Paipa shutiguta jatunyachichun, llaquicunata tucuchichun, jipa punllacunapi shuj paraíso Alpagu tiachunbashmi Jehová Diosca Jesustaca utilizanga (Mat. 6:9, 10; Apoc. 11:15). Jesusca ñucanchipaca alipacha ejemplomi can (1 Ped. 2:21). Paica Jehová Diospa munaita rurashpami causarca. Shinami ñucanchipaca shuj alipacha ejemplo capashca (Juan 4:34).

¹³ Jesús Taita Diospa Churi cashcata Bibliapi yachajushpaca Jesustaca ashtahuanmi juyapangui. Jesusta juyaimandami quiquinbash Jesushna Jehovapa munaita pactachingapaj munapangui. Chaimi Jehovatalla sirvisha nishpa mañashca jipaca, bautizaringapaj munapangui.

14, 15. Jehová Diospa espíritu santomandaca ¿imatata yachajuparcangui?

¹⁴ Jehová Diospa espíritu santomandaca ¿imatata yachajuparcangui? Jehovapa espíritu santo na shuj gente cashcatami ali intindiparcangui. Ashtahuangarin Jehovapa fuerza cashcatami yachajuparcangui. Jehová Diosca paipa espíritu santota utilizashpami Bibliataca escribichirca. Shinallatami paipa espíritu santota utilizashpa quiquinba causaipi Biblia imata nishcata pactachichun ayudanga (Juan 14:26; 2 Ped. 1:21). Ñucanchicunaca “Taita Diosmandami ninan ushaita charinchi”, chaimi imagutapash rurai ushapanchi (2 Cor. 4:7). Jehová Diospa espíritu santomi shuj gentecunaman ali villaigucunata villachichun, tentaciongunata aguantachun, llaquicunata o problemacunata aguantachunbash ayudanga. Shinallata ali cualidadcunata charichunbashmi Jehová Diospa espíritu santoca ayudanga (Gál. 5:22). Jehová Diosca paipa espíritu santotaca paipi confiajcunaman, tucui shunguhuan mañajcunamanmi cunga (Luc. 11:13).

¹⁵ Jehová Diosca paipa espíritu santohuanmi paita sirvishpa cati ushachunga ayudan. Chaita yachaimandami tranquilo sintiripanchi. Jehová Diospa espíritu santo paipa poder cashcata cabalta intindishpaca, quiquinbashmi Jehovatalla  sirvisha nishpa mañashpa, bautizaringapaj munapangui.

16. ¿Imatata cunangamanga yachajupashcangui?

¹⁶ Jehová Diosta candallami sirvisha nishpa mañana, bautizarinaca importantepachami can. Jesusta ciertopacha ali catingapaca imata saquina cajpipash saquinalla cashcatami cunangamanga yachajupashcangui. Quiquin Jesusta catimanda imacunatapash saquijpica, Jehová Diosca ashtacatami bendicianga. Quiquin bautizarishpaca quiquinllatami salvari ushapangui. Shuj ali concienciatapashmi chari ushapangui. Shinapash bautizaringapaj munashpaca Jehovata juyaimandami bautizarina capangui. Shinallata Jehová Diosmanda, paipa Churimanda, Jehovapa espíritu santomandapash imata yachajushcatami tucui shunguhuan crina capangui. Caicunamanda yachajushca jipaca ¿bautizaringapaj listochu capangui?

17. Bautizaringapaj munajushpaca ¿imacunatallata rurana capangui?

¹⁷ Bautizaringapaj ña listo cashpaca quiquinga Jehová Diospa amigo cangapaj munaimandami imapash ruraicunata saquipashcangui o cambiapashcangui. * Bibliapi Jehová Diosmanda, Jesusmandapash ali ali yachajushpami feta chari callaripashcangui (Heb. 11:6). Jehová Dios carasha nishcacunapimi quiquinga tucui shunguhuan confiapashcangui. Shinallata Jesús ñucanchimanda huañushpa juchacunata perdonashpa, huañuimandapash salvanatami tucui shunguhuan cripangui. Nalicunata rurashcamanda arripintirishpami Jehová Diostaca tucui shunguhuan perdonahuai nishpa mañapashcangui. Shinami quiquinga punda causaita saquishpa, Jehovata cushichingapaj cunanga causajupangui (Hech. 3:19). Quiquinga Jehová Diosmanda yachajushcataca shujcunaman parlangapami munapangui. Shinami nara bautizarishca publicador tucushpa congregacionmanda huauquipanicunahuan villachingapaj llujshi callaripashcangui (Mat. 24:14). Caicunata rurajta ricushpaca Jehová Diosca cushillapachami sintirin (Prov. 27:11).

18. Nara bautizarishpallata ¿imatata ashtahuan rurana capangui?

¹⁸ Imashinami ña yachajuparcanchi, nara bautizarishpallatami quiquinga quiquinlla cashpa Jehová Diosta candallami para siempre sirvishpa causasha nishpa mañana capangui (1 Ped. 4:2). Chai jipaca coordinador del cuerpo de ancianos huauquihuanmi bautizaringapami munani nishpa parlanalla capangui. Chai huauquimi shuj anciano huauquicuna quiquinhuan parlachun arreglota ruranga. Chai huauquicunaca quiquindaca alimi rijsin. Paicunami Bibliamanda minishtirishca yuyaicunata quiquin intindishcata o na intindishcata yachangapaj huaquin tapuicunata ruranga. Paicunaca quiquin Jehová Diosta candallami sirvishpa causasha nishpa mañashcata, bautizarina ima cashcata intindijta o na intindijta yachangapami huaquin tapuicunata ruranga. Shina tapuchishca jipami, anciano huauquicunaca quiquin bautizaringapaj listo cashcata o na listo cashcata villanga. Ña listo cajpica cati asambleapi ña bautizarita ushangui nishpami villanga.

19, 20. a) Bautizarishca jipaca ¿imatata rurashpa catina capangui? b) Chaita pactachichunga ¿imata ayudanga?

¹⁹ Bautizarishca jipaca ¿imatata rurashpa catina capangui? * Quiquinga Jehová Diostaca candallami sirvishpa causasha nishpami mañaparcangui. Jehová Diosca chai nishcata pactachichunmi munan. Chaimandami quiquinga bautizarishca jipaca, Jehová Dios munashcashna causana capangui. Chaita pactachichunga ¿imata ayudanga?

²⁰ Ña bautizarishca jipapashmi siempre Jehovata sirvijcunapurahuan cana capangui. Bibliapica “crijpurapash, juyarinami canguichi” ninmi (1 Ped. 2:17). Jehová Diosta sirvijcunaca quiquinba espiritual familiami tucunga. Tandanajuicunaman siempre rishpaca huauquipanicunahuanmi ali amigocuna tucuita ushapangui. Shinallata Bibliata cada punlla liingapaj, liishcapi pensaringapami tiempoguta llujchina capangui (Sal. 1:1, 2). Shinami imata liishcapash quiquinba shunguman chayanga. Shinallata Jesús nishcatapashmi cazuna capangui. Paica nircami: Jehová “Diosta mañaichi” nishpa (Mat. 26:41). Jehovataca tucui shunguhuanmi mañana capangui. Shinallata “Taita Dios mandajuj” Reinotarami ‘pundapica mascana’ capangui (Mat. 6:33). Chaita pactachichunga ¿imata ayudanga? Siempre villachishpa catinami quiquindaca ayudanga. Villachijpica quiquinba fepash ashtahuanmi shinlliyanga. Shinallata shuj gentecunapashmi para siempre causaiguta chari ushanga (1 Tim. 4:16).

21. Bautizarishpaca ¿ima bendiciongunatata chasquigripangui?

²¹ Jehová Dios candallami sirvisha nishpa mañana, bautizarinami quiquinba causaipica ashtahuan importantepacha can. Chaipaca talvez imacunatapash saquinami capangui. Chaicunata saquishpapash cushillami causapangui. Cunanbi tiashca ‘jatun llaquicunaca, ashacamanllami’ canga (2 Cor. 4:17). Quiquin bautizarishpaca cunanbillatami cushilla causapangui. Shamuj punllacunapicarin “causaita causanatami” japipangui (1 Tim. 6:19). Shinaca Jehová Diosta mañashca jipa cashna tapuripai: “Bautizaringapaca ¿listochu cani?”.