1. Eaa ta tetai tangata ka rave i mua ake ka patu ei i te are?

AKAMANAKO ana i tetai tangata tei inangaro i te patu i tetai are. Kua kite aia eaa tana are ka inangaro i te patu. Ka aere viviki ainei aia ka oko i te au apinga e ka akamata i te patu i te are? Kare. I mua ake ka akamata ei aia, ka akamanako aia e ia moni ka pou no te oko i te au apinga are. Eaa te tumu? No te mea ka anoanoia aia kia kite me ka rava te moni no te akaoti i te reira. Me tare meitaki aia e kua rava tana moni, ka oti tona are i te patu.

2. Ia Luka 14:27-30, eaa taau ka akamanako meitaki i mua ake ka papetito ei?

² Kua akakeu ainei toou inangaro e te akaperepere ia Iehova ia koe, no te papetito? Me koia ïa, ka anoanoia koe kia rave i tetai iki anga mei tetai tangata tei inangaro i te patu are. Eaa te tumu ka tuatua ai tatou i te reira? Akamanako ana i ta Iesu tuatua ia Luka 14:27-30. (E tatau.) Te tuatua ra a Iesu i te aiteanga kia akariro i te tangata ei pipi. Kia riro ei pipi nana, ka anoanoia tatou kia āriki “i te apinga ei ou,” te ka o mai te au akaaoanga e te au atinga. (Luka 9:23-26; 12:51-53) I mua ake ka papetito koe, e akamanako meitaki eaa te ō maira kia riro ei pipi. I reira koe e papa meitaki ei no te tavini tiratiratu i te Atua ei Kerititiano papetito.

3. Eaa ta tatou ka uriuri i roto i teia atikara?

³ Ka paunaia ainei te tautaanga kia riro mai ei pipi papetitoia na Karaiti? E tika roa! Me papetito koe, ka maata ua atu te au akameitakianga i teianei e a te tuatau ki mua. Ka  uriuri ana tatou i tetai au uianga puapinga no te papetito. Ka tauturu te reira ia koe kia pau i teia uianga, “Kua papa ainei au no te papetito?”

4. (a) Eaa te akatapuanga? (e) Eaa te aiteanga o te “akaruke” ia koe uaorai, tei taikuia ia Mataio 16:24?

⁴ Eaa te akatapuanga? I mua ake ka papetito ei koe, ka akatapu koe ia koe. Me akatapu koe i toou oraanga, ka pure akatenga koe kia Iehova e te akakite kiaia e ka tavini koe iaia e tuatau ua atu. Me akatapu koe ia koe ki te Atua, ka “akaruke” koe ia koe uaorai. (E tatau ia Mataio 16:24.) Na Iehova koe i teianei, e akameitaki maata. (Roma 14:8) Ka akakite koe kiaia i teianei e ka tavini koe iaia anake. E tia taau akatapuanga—e taputou ngateitei ki te Atua. Kare a Iehova e māro ia tatou kia rave i teia tia. Inara me rave tatou, te tapapa maira aia kia akatupu tatou i te reira.—Sala. 116:12, 14.

5. Eaa te pirianga o te akatapuanga e te papetitoanga?

⁵ Eaa te pirianga o te akatapuanga e te papetitoanga? Naau anake rai te akatapuanga i rotopu ia koe e Iehova. Ka kite te katoatoa i te papetitoanga; ka tupu te reira ki mua i te katoatoa, i te akaputuputuanga e te uruoaanga. Me papetito koe, te akaari ra koe e kua akatapu takere koe ia koe uaorai kia Iehova. * No reira ka akaari toou papetitoanga ki te katoatoa e te akaperepere ra koe i te Atua ko Iehova ma to ngakau, te vaerua, te manako e te ririnui katoa e te anoano ra koe i te tavini iaia e tuatau ua atu.—Mare. 12:30.

6-7. Ia 1 Petero 3:18-22, eaa nga tumu ka anoanoia ai tetai kia papetito?

⁶ Ka anoanoia ainei tetai kia papetito? Akamanako ana i te tuatua ia 1 Petero 3:18-22. (E tatau.) Mei te araka tei akaari mai i to Noa akarongo, ka riro toou papetitoanga ei akapapu anga i toou akatapuanga kia Iehova. Inara, ka anoanoia ainei te papetitoanga? Ae. Akakite mai a Petero i te tumu. Te mea mua, e “ora katoaʼi tatou.” Ka akaora te papetitoanga ia tatou, me kua rave tatou i te au takainga tau e e akarongo to tatou ia Iesu e kua mate aia no tatou, kua akatuia ki te rangi, e i teianei “tei te rima katau o te Atua ra.”

⁷ Te rua, ka arataki te papetitoanga ki tetai “akava-ngakau meitaki.” Me akatapu tatou ia tatou uaorai ki te Atua e kua papetitoia, ka rauka tetai pirianga takake kiaia. No te mea kua tataraara tatou e kua akarongo ki roto i te atinga oko, ka akakore te Atua i ta tatou ara. I reira e rauka ai tetai akava ngakau meitaki ki mua iaia.

8. Eaa te tumu no taau ikianga kia papetito?

⁸ Eaa te tumu no taau ikianga kia papetito? No taau i apii mai mei te Pipiria, kua kite mai koe ia Iehova—tona au tu e tana au ravenga. Riro taau i apii mai nona ei akapumaana ia koe e te akakeu ia koe kia akaperepere tikai iaia. Toou inangaro ia Iehova te tumu maata i papetito ei koe.

9. Eaa te aiteanga e kia papetito i te ingoa o te Metua, te Tamaiti e te vaerua tapu ia Mataio 28:19, 20?

⁹ Taau ikianga kia papetito, kua akatumuia ki runga i te au tuatua mou Pipiria. Akamanako i ta Iesu i tuatua i tona akaueanga e kia akariroia te tangata ei pipi. (E tatau ia Mataio 28:19, 20.) Kia tau kia Iesu, ka papetitoia tetai na roto i  ‘te ingoa o te Metua, e no te Tamaiti, e no te vaerua tapu.’ Eaa te aiteanga o te reira? Ka irinaki koe ma to ngakau katoa i te au tuatua mou Pipiria no Iehova; tana Tamaiti, ko Iesu; e te vaerua tapu. E ririnui teia au tuatua mou e ka akakeu ia koe. (Ebe. 4:12) Ka uriuri akaou tatou i tetai.

10-11. Eaa te au tuatua mou no te Metua taau i apii e kua āriki?

¹⁰ Akamanako ana i toou apii anga i teia au tuatua mou no te Metua: “Ko Iehova [tona] ingoa,” e koia “Tei Teitei i te enua katoa nei,” e koia anake “te Atua” mou. (Sala. 83:18; Isa. 37:16) Koia Tei Anga ia tatou, e “no ko mai te ora ia Iehova.” (Sala. 3:8; 36:9) Kua oronga mai aia i te akaora ia tatou mei te ara e te mate e kia rauka ia tatou te ora mutu kore. (Ioa. 17:3) Akaari ra toou akatapuanga e te papetitoanga e ko koe tetai o te Au Kite o Iehova. (Isa. 43:10-12) Ko koe tetai o te ngutuare akamori i te ao katoa tei ngakau parau kia kapikiia i te ingoa o te Atua e te akakite aere i tona ingoa ki tetai ke.—Sala. 86:12.

¹¹ Mei teaa atura te akameitaki anga kia mārama eaa ta te Pipiria e apii maira no te Metua! Me āriki koe i teia au tuatua mou akaperepere, ka akakeuia koe kia akatapu ia koe uaorai kia Iehova e kia papetitoia.

12-13. Eaa te au tuatua mou no te Tamaiti taau i apii e kua āriki?

¹² Eaa taau i apii mai no te au tuatua mou no runga i te Tamaiti? Ko Iesu te rua e tei puapinga rava atu i te ao katoa e pini ua ake. Koia to tatou Oko. Kua oronga puareinga ua mai aia i tona oraanga no tatou. Me akaari tatou mei ta tatou e rave ra e e akarongo to tatou ki roto i te oko, ka akakoreia ta tatou ara, ka rauka te pirianga oa ki te Atua, e ka rauka te ora mutu kore. (Ioa. 3:16) Ko Iesu to tatou Taunga Maata. Ka inangaro aia i te tauturu ia tatou kia puapinga mei te oko e kia rauka tetai pirianga vaitata ki te Atua. (Ebe. 4:15; 7:24, 25) Ei Ariki no te Patireia o te Atua, koia ta Iehova i taangaanga no te akatapu i Tona ingoa, takore i te kino, e te apai mai i te au akameitakianga mutu kore i te Parataito. (Mata. 6:9, 10; Apo. 11:15) Ko Iesu to tatou akaraanga. (1 Pete. 2:21) Kua akanoo aia i te akaraanga no tatou i te rave i to te Atua anoano.—Ioa. 4:34.

¹³ Me āriki koe i ta te Pipiria e apii ra no Iesu, ka inangaro koe i ta te Atua Tamaiti akaperepere. Ka akakeu teia aroa ia koe kia rave i to te Atua anoano, mei ia Iesu rai. Tei tupu, ka akakeuia koe kia akatapu ia koe uaorai kia Iehova e kia papetitoia.

14-15. Eaa te au tuatua mou no te vaerua tapu taau i apii e kua āriki?

¹⁴ Eaa toou manako i toou apii anga i te au tuatua mou no te vaerua tapu? Kare te reira i te tangata, mari ra e mana ririnui no te Atua. Kua taangaanga a Iehova i te vaerua tapu kia akauru i te tataanga o te Pipiria, e kua tauturu te vaerua ia tatou kia mārama e kia taangaanga i ta tatou e tatau ra. (Ioa. 14:26; 2 Pete. 1:21) Na roto i tona vaerua, ka oronga mai a Iehova i “te mana maata meitaki nei.” (2 Kori. 4:7) Te akakeu ra te vaerua ia tatou kia tutu aere i te nuti meitaki, kia kopae i te timataanga, kia akakoromaki i te taitaia e te au turanga ngata. Ka tauturu ia tatou kia akaari i te au tu manea o ‘ta te vaerua e akatupu ra.’ (Gala. 5:22) Ka oronga ua mai te Atua i tona vaerua ki te aronga tei irinaki iaia e tei pati akatenga no te reira.—Luka 11:13.

 ¹⁵ Mei teaa atura te pumaana i te kite e ka rauka i te aronga akamori ia Iehova te vaerua tapu kia tauturu ia ratou i te tavini i te Atua! Me āriki koe i te au tuatua mou taau i apii no te vaerua tapu, ka akakeuia koe kia akatapu ia koe uaorai ki te Atua e kia papetitoia.

16. Eaa taau i apii mai i roto i ta tatou uriurianga?

¹⁶ Te rave ra koe i tetai takainga puapinga me akatapu koe ia koe uaorai ki te Atua e kia papetitoia. Mei ta tatou i apii mai, kia puareinga ua koe i te āriki i te ka o mai—te au akaaoanga e te au atinga. Inara e maata atu te au akameitakianga. Ka akaora te papetito ia koe, e ka arataki ki tetai akava ngakau meitaki i mua i te Atua. Kua akatumuia taau iki anga no te papetito ki runga i toou aroa no te Atua ko Iehova. Kia irinaki katoa koe ma te ngakau tae i te au tuatua mou taau i apii no te Metua, te Tamaiti, e te vaerua tapu. I muri ake i te uriurianga i ta tatou i apii mai, akapeea koe me pau i te uianga, “Kua papa ainei au no te papetito?”

17. Eaa tetai au takainga te ka arataki atu ki te papetitoanga?

¹⁷ Me kua papa koe no te papetito, kare e ekoko anga kua rave koe i te au takainga kia rauka tetai pirianga meitaki kia Iehova. * Mei taau apii tamou i te Pipiria, e maata taau i kite mai no Iehova e Iesu. Kua rauka toou akarongo. (Ebe. 11:6) Irinaki pu tikai koe i te au taputou a Iehova i roto i te Pipiria, e kua papu toou akarongo ki roto i to Iesu atinga e ka akaora ia koe mei te ara e te mate. Kua tataraara koe i taau ara: kua tataraara koe i taau au kino i rave, e kua pati ia Iehova kia akakore mai i taau ara. Kua taui koe i toou oraanga; kua kopae i toou oraanga i mua ana e kua akamata i tetai oraanga tei marekaia e te Atua. (Anga. 3:19) Te aruaru ra koe i te akakite aere i toou akarongo. Kua papa koe kia riro mai ei papuritia kare i papetitoia e kua akamata i te aru i te putuputuanga no te tutu aere. (Mata. 24:14) Te ngakau parau ra a Iehova ia koe no tei rave i teia au takainga. Kua akarekareka koe i tona ngakau.—Mase. 27:11.

18. Eaa taau ka rave i mua ake ka papetito ei?

¹⁸ I mua ake ka papetito ei koe, te vaira tetai au mea ka anoanoia koe kia rave. Mei ta tatou i apii mai, ka anoanoia koe kia akatapu ia koe uaorai ki te Atua. Aere anake kiaia, na roto i te pure ma te ngakau tae, e te taputou kiaia e ka taangaanga koe i toou oraanga no te rave i tona anoano. (1 Pete. 4:2) E oti e akakite ki te taeake tauturu no te pupu aronga pakari e te inangaro ra koe i te papetito.  E ka pati aia i tetai nga tangata pakari kia aravei ia koe. Auraka e apiapi i te aravei atu ia raua. Kare e ekoko anga e kua kite takere teia nga taeake ia koe e te aroa ra ia koe. Ka uriuri raua i te au apiianga Pipiria taau i apii mai. Ka inangaro raua i te kite e kua mārama koe i teia au apiianga e kua kite koe i te puapinga o te akatapuanga e te papetitoanga. Me akatika raua e kua papa koe, ka akakite mai raua kia koe e ka papetitoia koe i ko i te akaputuputuanga me kore te uruoaanga ka aru mai.

19-20. Eaa taau ka rave i muri ake i toou papetitoanga, e akapeea koe me rave i te reira?

¹⁹ Me papetitoia koe, eaa taau ka anoanoia kia rave? * E akamaara e e tia te akatapuanga e te tapapa maira a Iehova ia koe kia akono i te reira. No reira, i muri ake i toou papetitoanga, ka anoanoia koe kia akono i taau tia toou akatapuanga. Akapeea koe me rave i te reira?

²⁰ E noo vaitata ki taau putuputuanga. Ei Kerititiano papetitoia, kua riro koe ei tuanga no te taokotaianga “taeake.” (1 Pete. 2:17) Ka riro te au taeake e te au tuaine i roto i te putuputuanga ei ngutuare pae vaerua noou. Na te aere putuputu anga ki te au uipaanga, ka akaketaketa koe i toou pirianga kia ratou. E tatau i te Tuatua a te Atua e e akamanako i te reira i te au rā. (Sala. 1:1, 2) I muri ake i te tatau anga i tetai tuanga o te Pipiria, e akanoo i tetai taime no te akamanako oonu i taau i tatau. Ka akakeu teia ia koe. “E pure oki.” (Mata. 26:41) Ka akavaitata taau pure ngakau tae ia koe kia Iehova. “E na mua ra . . . i te kimi i te basileia.” (Mata. 6:33) Ka rauka ia koe i te tutu aere ei mea mua i toou oraanga. Na te piri putuputu anga ki roto i te angaanga tutu aere, ka ketaketa atu toou akarongo, e penei ka tauturu koe i tetai ke ki te mataara o te ora mutu kore.—1 Timo. 4:16.

21. Eaa taau ka rauka me papetitoia koe?

²¹ Te iki anga kia akatapu ia koe uaorai kia Iehova e kia papetito, ko te iki anga puapinga rava atu te reira taau ka rave. E tika e maata te ka ō mai. Pauna ainei te reira? Tika rava! Tetai ua atu au tu ngata taau ka aro atu i teianei ao taito, e “mea ngiti poto māmā” ua te reira. (2 Kori. 4:17) Na te papetitoanga e arataki ia koe ki tetai oraanga mataora i teianei e te “ora[anga] mutu kore” a te tuatau ki mua. (1 Timo. 6:19) E akamanako meitaki ine, e e pure no taau pauanga ki te uianga, “Kua papa ainei au no te papetito?”