1. Со ваљани те керел некој англедер те почминел те керел кхер?

ЗАМИСЛИН туке кај некој мангела те керел кхер, хем џанела сар ваљани те изглединел. Дали одма ка џал те кинел о материјали со ваљани леске хем те почминел те градинел? На. Англедер те почминел, мора те керел нешто бут важно — те дикхел кобор ка коштинел ле са адава. Соске? Адалеске со ваљани те џанел дали ка овел ле доволно паре те завршинел о кхер. Ако англедер шукар рачунинела о трошако, веројатно ка шај те завршинел о кхер.

2. Спрема Лука 14:27-30, башо со ваљани шукар те размислине англедер те крстине тут?

² Дали о мангипе хем и благодарност спрема о Јехова поттикнинена тут те размислине те крстине тут? Ако оја, тегани сиан ки слично ситуација сар о мануш кова со мангела те керел кхер. Соске вакераја акава? Па, размислин башо е Исусескере лафија сој пишиме ко Лука 14:27-30. (Читин.) О Исус керела сине лафи башо адава со значинела некој те овел лескоро ученико. Окова со ка овел лескоро следбенико, мора те овел спремно те прифатинел „о трошако“. Јавере лафенцар, мора те овел спремно башо проблемија хем башо жртве (Лука 9:23-26; 12:51-53). Адалеске, англедер те крстине тут, ваљани шукар те размислине башо са сој вклучимо ко адава те ове е Христосескоро ученико. Акава ка спреминел тут верно те служине е Јеховаске откеда ка крстине тут да.

3. Со ка дикха ки акаја статија?

³ Дали врединела те кере добором жртве те шај те крстине тут? Џанѓола пе кај врединела! Окова со ка крстинел  пе ка овен ле бут берекетија хем акана хем ки иднина. Те дикха некобор важна пучиба башо крстибе. Адава ка поможинел туке те дикхе дали сиан спремно те крстине тут.

4. а) Со значинела те де завет е Девлеске? б) Спрема Матеј 16:24, со значинела те откажине тут тутар?

⁴ Со значинела те де завет е Девлеске? Англедер те крстине тут, мора те де завет е Јеховаске. Кеда деа завет е Јеховаске, ту молинеа тут леске искрено таро вило, хем вакереа кај таро адава моменти ка служине леске засекогаш. Кеда деа лафи е Јеховаске кај ка служине леске, ту откажинеа тут тутар. (Читин Матеј 16:24.) Таро адава моменти, ту сиан е Јеховаскоро, хем адаја тани бут бари чест (Рим. 14:8). Вакереа леске кај најважно ко живото ка овел туке те служине леске, а на те кере тли волја. Кеда деа лафи е Јеховаске кај ка служине леске, ту деа јекх сериозно ветување. О Јехова на чхивела амен силаја те кера адава. Ама ако даја ле асавко ветување, ов аџикерела амендар те икера амен ко амаро лафи (Пс. 116:12, 14).

5. Сар тано поврзимо о завет е крстибаја?

⁵ Сар о завет со деа ле е Девлеске тано поврзимо е крстибаја? О завет тано машкар туте хем о Јехова, адалеске никој јавер на џанела кеда деа завет е Јеховаске. Ама кеда крстинеа тут адава кереа ле англо јавера мануша, обично ко конгрес. Аѓаар сикавеа е јаверенге кај ту више денѓан лафи е Јеховаске кај ка служине леске. * Уствари, тле крстибаја сикавеа е јаверенге кај мангеа е Јехова цело тле вилеа, душаја, гоѓаја хем силаја, хем кај сиан одлучно те служине леске вечно (Мар. 12:30).

6-7. Спрема 1. Петрово 3:18-22, таро кола дуј причине мора те крстине тут?

⁶ Дали мора те крстине тут? Размислин башо адава со пишинела ко 1. Петрово 3:18-22. (Читин.) Исто сар и арка со сине јасно доказ кај е Ное сине ле вера ко Девел, аѓаар тло крстибе јасно сикавела кај денѓан завет е Девлеске. Ама, дали мора те крстине тут? Оја. О Петар објаснинѓа соске. Прво, ов вакерела кај о крстибе „спасинела“. О крстибе шај те спасинел амен ако амаре постапкенцар сикаваја кај верујнаја ко Исус хем верујнаја кај ов муло аменге, кај воскреснинѓа те живинел ко небо хем акана тано „тари десно страна е Девлескири“.

⁷ Дујто, о крстибе поможинела аменге те овел амен „чисто совест“. Кеда даја лафи кај ка служина е Девлеске хем крстинаја амен, кхуваја ко посебно однос леа. Адалеске со искрено каинаја амен хем сикаваја вера ки откупнина, о Девел простинела амаре гревија. Аѓаар шај те овел амен чисто совест џикоте служинаја леске.

8. Која ваљани те овел и причина баши тли одлука те крстине тут?

⁸ Која ваљани те овел и причина баши тли одлука те крстине тут? Адалеске со шукар проучинѓан и Библија, халиљан бут буќа башо Јехова. На пример, дознајнѓан сави личност тано хем сар постапинела. Адава со сиклиљан баши лесте кхувѓа ко тло вило хем керѓа те заманге ле бут. О мангипе спрема о Јехова мора те овел туке о најважно мотиви те крстине тут.

9. Сар сој пишимо ко Матеј 28:19, 20, со значинела некој те крстинел пе ко анав е Дадескоро, е Чхавескоро хем е свети духоскоро?

⁹ Јавер причина со ваљани те поттикнинел тут те крстине тут тано адава со дознајнѓан хем прифатинѓан о библиска чачипа. Приметин со вакерѓа о Исус кеда заповединѓа пле учениконге те проповединен. (Читин  Матеј 28:19, 20.) Ов вакерѓа кај окола со крстинена пе мора те керен адава „ко анав е Дадескоро хем е Чхавескоро хем е свети духоскоро“. Со значинела акава? Ту ваљани цело вилеа те верујне ко чачипа со вакерела и Библија башо Јехова, башо лескоро Чхаво хем башо свети дух. Акала чачипа тане бут силна хем шај те кхувен хор ко тло вило (Евр. 4:12). Те дикха несаве лендар.

10-11. Кола чачипа башо Дад халиљан хем прифатинѓан?

¹⁰ Размислин сар осетинѓан тут кеда дознајнѓан акала чачипа башо Дад: кај лескоро „анав тано Јехова“, кај ов тано „Најбаро упри цели пхув“ хем кај само ов тано „единствено чачутно Девел“ (Пс. 83:18; Иса. 37:16). О Јехова тано амаро Створители хем о спасение авела лестар (Пс. 3:8; 36:9). Ов керѓа са со ваљани те шај те спасинел амен таро грево хем таро мерибе, хем денѓа амен надеж башо вечно живото (Јован 17:3). Кеда ка де лафи е Јеховаске кај ка служине леске хем ка крстине тут, ту ка ове е Јеховаскоро сведоко (Иса. 43:10-12). Ка ове дело тари јекх фамилија ко цело свето таро Девлескере слуге кола со дичинена пе со пхиравена е Девлескоро анав хем вакерена ле е јаверенге (Пс. 86:12).

¹¹ Аменге тани бари чест со хаљоваја адава со вакерела и Библија башо Дад! Кеда ка верујне ко акала скапоцена чачипа, тло вило ка поттикнинел тут те де лафи е Јеховаске кај ка служине леске хем те крстине тут.

12-13. Кола чачипа башо Чхаво дознајнѓан хем прифатинѓан?

¹² А сар осетинѓан тут кеда дознајнѓан о чачипа башо Чхаво? Ов тано и дујто најважно личност ко универзум. О Исус спремно денѓа аменге пло живото сар откупнина. Кеда амаре постапкенцар сикаваја кај иси амен вера ки откупнина, амаре гревија шај те овен простиме, шај те ова е Девлескере амала хем те овел амен вечно живото (Јован 3:16). О Исус тано амаро Првосвештенико. Ов мангела те поможинел аменге те овел амен корист тари откупнина хем те овел амен паше амалипе е Девлеа (Евр. 4:15; 7:24, 25). Преку о Исус, кова сој Цари ко е Девлескоро Царство, о Јехова ка славинел пло свето анав, ка чхивел крајо башо лошнипе хем ка анел вечна берекетија ко рај со авела (Мат. 6:9, 10; Отк. 11:15). Амен ваљани те џа пало е Исусескоро пример (1. Пет. 2:21). Ов користинѓа пло живото те керел е Девлескири волја хем адалеа денѓа шукар пример аменге (Јован 4:34).

¹³ Кеда ка прифатине адава со вакерела и Библија башо Исус, ко тло вило ка бајрол мангипе спрема е Девлескоро мангло Чхаво. Адава мангипе ка поттикнинел тут те користине тло живото те кере е Девлескири волја, исто сар со керѓа о Исус. Сар резултати, ка овел тут бари желба те де лафи е Јеховаске кај ка служине леске хем те крстине тут.

14-15. Кола чачипа башо свети дух дознајнѓан хем прифатинѓан?

¹⁴ Сар осетинѓан тут кеда дознајнѓан о чачипа башо свети дух? Акава духо нане личност, него и сила со користинела ла о Девел. О Јехова користинѓа о свети дух те водинел е манушен те пишинен и Библија, хем адава исто духо поможинела аменге те хаљова хем те применина адава со читинаја ки лате (Јован 14:26; 2. Пет. 1:21). Преку пло духо, о Јехова дела амен „сила, која со накхавела и нормално“ (2. Кор. 4:7). Исто аѓаар, о духо дела амен сила те проповедина о шукар хабери, те борина амен против о искушенија хем о обесхрабрување хем те истрајна ко неволје. Освен адава, поможинела амен те сикава о бут шуже „особине со авена таро свети дух“ (Гал. 5:22). О Девел спремно дела пло духо  околенге со искрено молинена ле башо адава хем со иси лен доверба ки Лесте (Лука 11:13).

¹⁵ Кобор тано утешно адава со џанаја кај шај те овел амен доверба ки е Девлескири сила — о свети дух, кова со ка поможинел аменге џикоте служинаја е Девлеске! Кеда ка верујне ко чачипа со дознајнѓан башо свети дух, ка ове поттикнимо те де лафи е Девлеске кај ка служине леске хем те крстине тут.

16. Со дикхлем џи акана?

¹⁶ Тли одлука те де лафи е Јеховаске кај ка служине леске хем те крстине тут тани бут важно. Сар со дикхлем, мора те ове спремно те прифатине о „трошако“, јавере лафенцар те ове спремно башо проблемија хем башо жртве. Ама, о берекетија со ка добине лен тане бут побаре таро жртве со ка кере лен. О крстибе шај те спасинел тут, хем шај те поможинел туке те овел тут чисто совест џикоте служинеа е Девлеске. О мангипе спрема о Јехова мора те овел о најважно мотиви те крстине тут. Освен адава, мора цело вилеа те верујне ко чачипа со дознајнѓан башо Дад, башо Чхаво хем башо свети дух. Откеда дикхлем са акава, со мислинеа, дали сиан спремно те крстине тут?

17. Кола буќа ваљани те керел некој англедер те крстинел пе?

¹⁷ Ако мислинеа кај сиан спремно те крстине тут, сигурно керѓан више бут буќа те шај те ове паше е Јеховаја. * Адалеске со редовно проучинѓан и Библија сиклиљан бут башо Јехова хем башо Исус. Адава поможинѓа туке те бајраре тли вера (Евр. 11:6). Иси тут целосно доверба ко адава со ветинѓа о Јехова ки Библија, хем верујнеа кај и жртва е Исусескири шај те спасинел тут таро грево хем мерибе. Каинѓан тут башо тле гревија, јавере лафенцар жал туке бут башо грешке со керѓан лен хем молинѓан е Јехова те простинел туке. Менинѓан тут корендан, јавере лафенцар чхинавѓан те кере са о лошна буќа со кереа лен сине англедер хем почминѓан те живине сар со мангела о Девел (Дела 3:19). Иси тут бут силно желба те вакере е јаверенге баши тли вера. Исполнинѓан о условија те ове некрстено објавители хем почминѓан те џа ки служба заедно е пхраленцар таро собрание (Мат. 24:14). О Јехова дичинела пе туја адалеске со керѓан са акала буќа со ваљанена. Адалеа керѓан ле бут бахтало (Изр. 27:11).

18. Со јавер ваљани те кере англедер те крстине тут?

¹⁸ Ама, англедер те крстине тут, ваљани те кере панда несаве буќа. Сар со дикхлем, мора те де лафи е Девлеске кај ка служине леске. Молин тут искрено таро вило кеда сиан коркори, хем ветин леске кај ка користине тло живото те кере лескири волја (1. Пет. 4:2). Пало адава, вакер е координатореске таро старешинство кај мангеа те крстине тут. Ов ка замолинел некоборе старешинен те керен туја лафи. На ваљани те дара  таро адава. Ма бистре кај акала пхраља више џанена тут хем мангена тут. Ола ка повторинен туја о основна библиска чачипа со сиклиљан лен. Ка манген те дикхен кај хаљовеа адала библиска чачипа хем кај сиан свесно башо адава кобор тано важно о завет хем о крстибе. Ако дикхена кај исполнинеа о условија, ка вакерен туке кај шај те крстине тут ко следно конгрес.

19-20. Со ваљани те кере откеда ка крстине тут, хем со ка поможинел туке ко адава?

¹⁹ Со ваљани те кере пало тло крстибе? * Сетин тут кај о завет тано ветување хем кај о Јехова аџикерела те икере тут ки лесте. Адалеске, пало тло крстибе ваљани те живине спрема тло завет. Со ка поможинел туке ко адава?

²⁰ Ачхов паше е пхраленцар хем е пхењенцар. Сар крстимо христијани ту сиан акана дело таро јекх пхралипе сој ко цело свето (Мат. 23:8). О пхраља хем о пхења ко собрание тане тли духовно фамилија. Адалеа со редовно ка џа ко состанокија, ка ове панда попаше ленцар. Читин е Девлескоро Лафи хем размислин баши лесте секова диве (Пс. 1:1, 2). Откеда ка читине некобор стихија, одвојн време хор те размислине башо адава. Тегани адала лафија ка кхувен туке хор ко вило. Ма чхинав те молине тут (1. Сол. 5:17). Ако таро вило молинеа тут е Јеховаске, ка ове леа панда попаше. Понадари да роде најангле е Девлескоро Царство (Мат. 6:33). Адава шај те кере ле ако о проповедибе тано туке јекх таро најважна буќа ко тло живото. Адалеа со редовно ка џа ки служба, ка кере тли вера позорали хем ка шај те поможине е јаверенге те овел лен надеж башо вечно живото (1. Тим. 4:16).

21. Саве берекетија ка анел туке о крстибе?

²¹ Кеда ка одлучине те де лафи е Јеховаске кај ка служине леске хем те крстине тут, ка ане и најважно одлука ко тло живото. Точно тано кај ка ваљани те кере жртве. Ама, дали врединела те кере лен? Сигурно оја! Секоја неволја ко акава пурано свето тани „моментално хем локхи“ (2. Кор. 4:17). Ама, о крстибе ка анел туке вечна берекетија хем ка поможинел туке те овел тут побахтало живото панда акана хем те добине о „чачутно живото“ ки иднина (1. Тим. 6:19). Адалеске, размислин шукар хем молин е Јехова те поможинел туке те дикхе дали чаче сиан спремно те крстине тут.