1. So valjani te kerel nekoj angleder te počminel te kerel kher?

ZAMISLIN tuke kaj nekoj mangela te kerel kher, hem džanela sar valjani te izgledinel. Dali odma ka džal te kinel o materijali so valjani leske hem te počminel te gradinel? Na. Angleder te počminel, mora te kerel nešto but važno — te dikhel kobor ka koštinel le sa adava. Soske? Adaleske so valjani te džanel dali ka ovel le dovolno pare te završinel o kher. Ako angleder šukar računinela o trošako, verojatno ka šaj te završinel o kher.

2. Sprema Luka 14:27-30, bašo so valjani šukar te razmisline angleder te krstine tut?

² Dali o mangipe hem i blagodarnost sprema o Jehova pottikninena tut te razmisline te krstine tut? Ako oja, tegani sian ki slično situacija sar o manuš kova so mangela te kerel kher. Soske vakeraja akava? Pa, razmislin bašo e Isuseskere lafija soj pišime ko Luka 14:27-30. (Čitin.) O Isus kerela sine lafi bašo adava so značinela nekoj te ovel leskoro učeniko. Okova so ka ovel leskoro sledbeniko, mora te ovel spremno te prifatinel „o trošako“. Javere lafencar, mora te ovel spremno bašo problemija hem bašo žrtve (Luka 9:23-26; 12:51-53). Adaleske, angleder te krstine tut, valjani šukar te razmisline bašo sa soj vklučimo ko adava te ove e Hristoseskoro učeniko. Akava ka spreminel tut verno te služine e Jehovaske otkeda ka krstine tut da.

3. So ka dikha ki akaja statija?

³ Dali vredinela te kere doborom žrtve te šaj te krstine tut? Džangjola pe kaj vredinela! Okova so ka krstinel  pe ka oven le but bereketija hem akana hem ki idnina. Te dikha nekobor važna pučiba bašo krstibe. Adava ka pomožinel tuke te dikhe dali sian spremno te krstine tut.

4. a) So značinela te de zavet e Devleske? b) Sprema Matej 16:24, so značinela te otkažine tut tutar?

⁴ So značinela te de zavet e Devleske? Angleder te krstine tut, mora te de zavet e Jehovaske. Keda dea zavet e Jehovaske, tu molinea tut leske iskreno taro vilo, hem vakerea kaj taro adava momenti ka služine leske zasekogaš. Keda dea lafi e Jehovaske kaj ka služine leske, tu otkažinea tut tutar. (Čitin Matej 16:24.) Taro adava momenti, tu sian e Jehovaskoro, hem adaja tani but bari čest (Rim. 14:8). Vakerea leske kaj najvažno ko životo ka ovel tuke te služine leske, a na te kere tli volja. Keda dea lafi e Jehovaske kaj ka služine leske, tu dea jekh seriozno vetuvanje. O Jehova na čhivela amen silaja te kera adava. Ama ako daja le asavko vetuvanje, ov adžikerela amendar te ikera amen ko amaro lafi (Ps. 116:12, 14).

5. Sar tano povrzimo o zavet e krstibaja?

⁵ Sar o zavet so dea le e Devleske tano povrzimo e krstibaja? O zavet tano maškar tute hem o Jehova, adaleske nikoj javer na džanela keda dea zavet e Jehovaske. Ama keda krstinea tut adava kerea le anglo javera manuša, obično ko kongres. Agjaar sikavea e javerenge kaj tu više dengjan lafi e Jehovaske kaj ka služine leske. * Ustvari, tle krstibaja sikavea e javerenge kaj mangea e Jehova celo tle vilea, dušaja, gogjaja hem silaja, hem kaj sian odlučno te služine leske večno (Mar. 12:30).

6-7. Sprema 1. Petrovo 3:18-22, taro kola duj pričine mora te krstine tut?

⁶ Dali mora te krstine tut? Razmislin bašo adava so pišinela ko 1. Petrovo 3:18-22. (Čitin.) Isto sar i arka so sine jasno dokaz kaj e Noe sine le vera ko Devel, agjaar tlo krstibe jasno sikavela kaj dengjan zavet e Devleske. Ama, dali mora te krstine tut? Oja. O Petar objasningja soske. Prvo, ov vakerela kaj o krstibe „spasinela“. O krstibe šaj te spasinel amen ako amare postapkencar sikavaja kaj verujnaja ko Isus hem verujnaja kaj ov mulo amenge, kaj voskresningja te živinel ko nebo hem akana tano „tari desno strana e Devleskiri“.

⁷ Dujto, o krstibe pomožinela amenge te ovel amen „čisto sovest“. Keda daja lafi kaj ka služina e Devleske hem krstinaja amen, khuvaja ko posebno odnos lea. Adaleske so iskreno kainaja amen hem sikavaja vera ki otkupnina, o Devel prostinela amare grevija. Agjaar šaj te ovel amen čisto sovest džikote služinaja leske.

8. Koja valjani te ovel i pričina baši tli odluka te krstine tut?

⁸ Koja valjani te ovel i pričina baši tli odluka te krstine tut? Adaleske so šukar proučingjan i Biblija, haliljan but bukja bašo Jehova. Na primer, doznajngjan savi ličnost tano hem sar postapinela. Adava so sikliljan baši leste khuvgja ko tlo vilo hem kergja te zamange le but. O mangipe sprema o Jehova mora te ovel tuke o najvažno motivi te krstine tut.

9. Sar soj pišimo ko Matej 28:19, 20, so značinela nekoj te krstinel pe ko anav e Dadeskoro, e Čhaveskoro hem e sveti duhoskoro?

⁹ Javer pričina so valjani te pottikninel tut te krstine tut tano adava so doznajngjan hem prifatingjan o bibliska čačipa. Primetin so vakergja o Isus keda zapovedingja ple učenikonge te propovedinen. (Čitin  Matej 28:19, 20.) Ov vakergja kaj okola so krstinena pe mora te keren adava „ko anav e Dadeskoro hem e Čhaveskoro hem e sveti duhoskoro“. So značinela akava? Tu valjani celo vilea te verujne ko čačipa so vakerela i Biblija bašo Jehova, bašo leskoro Čhavo hem bašo sveti duh. Akala čačipa tane but silna hem šaj te khuven hor ko tlo vilo (Evr. 4:12). Te dikha nesave lendar.

10-11. Kola čačipa bašo Dad haliljan hem prifatingjan?

¹⁰ Razmislin sar osetingjan tut keda doznajngjan akala čačipa bašo Dad: kaj leskoro „anav tano Jehova“, kaj ov tano „Najbaro upri celi phuv“ hem kaj samo ov tano „edinstveno čačutno Devel“ (Ps. 83:18; Isa. 37:16). O Jehova tano amaro Stvoriteli hem o spasenie avela lestar (Ps. 3:8; 36:9). Ov kergja sa so valjani te šaj te spasinel amen taro grevo hem taro meribe, hem dengja amen nadež bašo večno životo (Jovan 17:3). Keda ka de lafi e Jehovaske kaj ka služine leske hem ka krstine tut, tu ka ove e Jehovaskoro svedoko (Isa. 43:10-12). Ka ove delo tari jekh familija ko celo sveto taro Devleskere sluge kola so dičinena pe so phiravena e Devleskoro anav hem vakerena le e javerenge (Ps. 86:12).

¹¹ Amenge tani bari čest so haljovaja adava so vakerela i Biblija bašo Dad! Keda ka verujne ko akala skapocena čačipa, tlo vilo ka pottikninel tut te de lafi e Jehovaske kaj ka služine leske hem te krstine tut.

12-13. Kola čačipa bašo Čhavo doznajngjan hem prifatingjan?

¹² A sar osetingjan tut keda doznajngjan o čačipa bašo Čhavo? Ov tano i dujto najvažno ličnost ko univerzum. O Isus spremno dengja amenge plo životo sar otkupnina. Keda amare postapkencar sikavaja kaj isi amen vera ki otkupnina, amare grevija šaj te oven prostime, šaj te ova e Devleskere amala hem te ovel amen večno životo (Jovan 3:16). O Isus tano amaro Prvosvešteniko. Ov mangela te pomožinel amenge te ovel amen korist tari otkupnina hem te ovel amen paše amalipe e Devlea (Evr. 4:15; 7:24, 25). Preku o Isus, kova soj Cari ko e Devleskoro Carstvo, o Jehova ka slavinel plo sveto anav, ka čhivel krajo bašo lošnipe hem ka anel večna bereketija ko raj so avela (Mat. 6:9, 10; Otk. 11:15). Amen valjani te dža palo e Isuseskoro primer (1. Pet. 2:21). Ov koristingja plo životo te kerel e Devleskiri volja hem adalea dengja šukar primer amenge (Jovan 4:34).

¹³ Keda ka prifatine adava so vakerela i Biblija bašo Isus, ko tlo vilo ka bajrol mangipe sprema e Devleskoro manglo Čhavo. Adava mangipe ka pottikninel tut te koristine tlo životo te kere e Devleskiri volja, isto sar so kergja o Isus. Sar rezultati, ka ovel tut bari želba te de lafi e Jehovaske kaj ka služine leske hem te krstine tut.

14-15. Kola čačipa bašo sveti duh doznajngjan hem prifatingjan?

¹⁴ Sar osetingjan tut keda doznajngjan o čačipa bašo sveti duh? Akava duho nane ličnost, nego i sila so koristinela la o Devel. O Jehova koristingja o sveti duh te vodinel e manušen te pišinen i Biblija, hem adava isto duho pomožinela amenge te haljova hem te primenina adava so čitinaja ki late (Jovan 14:26; 2. Pet. 1:21). Preku plo duho, o Jehova dela amen „sila, koja so nakhavela i normalno“ (2. Kor. 4:7). Isto agjaar, o duho dela amen sila te propovedina o šukar haberi, te borina amen protiv o iskušenija hem o obeshrabruvanje hem te istrajna ko nevolje. Osven adava, pomožinela amen te sikava o but šuže „osobine so avena taro sveti duh“ (Gal. 5:22). O Devel spremno dela plo duho  okolenge so iskreno molinena le bašo adava hem so isi len doverba ki Leste (Luka 11:13).

¹⁵ Kobor tano utešno adava so džanaja kaj šaj te ovel amen doverba ki e Devleskiri sila — o sveti duh, kova so ka pomožinel amenge džikote služinaja e Devleske! Keda ka verujne ko čačipa so doznajngjan bašo sveti duh, ka ove pottiknimo te de lafi e Devleske kaj ka služine leske hem te krstine tut.

16. So dikhlem dži akana?

¹⁶ Tli odluka te de lafi e Jehovaske kaj ka služine leske hem te krstine tut tani but važno. Sar so dikhlem, mora te ove spremno te prifatine o „trošako“, javere lafencar te ove spremno bašo problemija hem bašo žrtve. Ama, o bereketija so ka dobine len tane but pobare taro žrtve so ka kere len. O krstibe šaj te spasinel tut, hem šaj te pomožinel tuke te ovel tut čisto sovest džikote služinea e Devleske. O mangipe sprema o Jehova mora te ovel o najvažno motivi te krstine tut. Osven adava, mora celo vilea te verujne ko čačipa so doznajngjan bašo Dad, bašo Čhavo hem bašo sveti duh. Otkeda dikhlem sa akava, so mislinea, dali sian spremno te krstine tut?

17. Kola bukja valjani te kerel nekoj angleder te krstinel pe?

¹⁷ Ako mislinea kaj sian spremno te krstine tut, sigurno kergjan više but bukja te šaj te ove paše e Jehovaja. * Adaleske so redovno proučingjan i Biblija sikliljan but bašo Jehova hem bašo Isus. Adava pomožingja tuke te bajrare tli vera (Evr. 11:6). Isi tut celosno doverba ko adava so vetingja o Jehova ki Biblija, hem verujnea kaj i žrtva e Isuseskiri šaj te spasinel tut taro grevo hem meribe. Kaingjan tut bašo tle grevija, javere lafencar žal tuke but bašo greške so kergjan len hem molingjan e Jehova te prostinel tuke. Meningjan tut korendan, javere lafencar čhinavgjan te kere sa o lošna bukja so kerea len sine angleder hem počmingjan te živine sar so mangela o Devel (Dela 3:19). Isi tut but silno želba te vakere e javerenge baši tli vera. Ispolningjan o uslovija te ove nekrsteno objaviteli hem počmingjan te dža ki služba zaedno e phralencar taro sobranie (Mat. 24:14). O Jehova dičinela pe tuja adaleske so kergjan sa akala bukja so valjanena. Adalea kergjan le but bahtalo (Izr. 27:11).

18. So javer valjani te kere angleder te krstine tut?

¹⁸ Ama, angleder te krstine tut, valjani te kere panda nesave bukja. Sar so dikhlem, mora te de lafi e Devleske kaj ka služine leske. Molin tut iskreno taro vilo keda sian korkori, hem vetin leske kaj ka koristine tlo životo te kere leskiri volja (1. Pet. 4:2). Palo adava, vaker e koordinatoreske taro starešinstvo kaj mangea te krstine tut. Ov ka zamolinel nekobore starešinen te keren tuja lafi. Na valjani te dara  taro adava. Ma bistre kaj akala phralja više džanena tut hem mangena tut. Ola ka povtorinen tuja o osnovna bibliska čačipa so sikliljan len. Ka mangen te dikhen kaj haljovea adala bibliska čačipa hem kaj sian svesno bašo adava kobor tano važno o zavet hem o krstibe. Ako dikhena kaj ispolninea o uslovija, ka vakeren tuke kaj šaj te krstine tut ko sledno kongres.

19-20. So valjani te kere otkeda ka krstine tut, hem so ka pomožinel tuke ko adava?

¹⁹ So valjani te kere palo tlo krstibe? * Setin tut kaj o zavet tano vetuvanje hem kaj o Jehova adžikerela te ikere tut ki leste. Adaleske, palo tlo krstibe valjani te živine sprema tlo zavet. So ka pomožinel tuke ko adava?

²⁰ Ačhov paše e phralencar hem e phenjencar. Sar krstimo hristijani tu sian akana delo taro jekh phralipe soj ko celo sveto (Mat. 23:8). O phralja hem o phenja ko sobranie tane tli duhovno familija. Adalea so redovno ka dža ko sostanokija, ka ove panda popaše lencar. Čitin e Devleskoro Lafi hem razmislin baši leste sekova dive (Ps. 1:1, 2). Otkeda ka čitine nekobor stihija, odvojn vreme hor te razmisline bašo adava. Tegani adala lafija ka khuven tuke hor ko vilo. Ma čhinav te moline tut (1. Sol. 5:17). Ako taro vilo molinea tut e Jehovaske, ka ove lea panda popaše. Ponadari da rode najangle e Devleskoro Carstvo (Mat. 6:33). Adava šaj te kere le ako o propovedibe tano tuke jekh taro najvažna bukja ko tlo životo. Adalea so redovno ka dža ki služba, ka kere tli vera pozorali hem ka šaj te pomožine e javerenge te ovel len nadež bašo večno životo (1. Tim. 4:16).

21. Save bereketija ka anel tuke o krstibe?

²¹ Keda ka odlučine te de lafi e Jehovaske kaj ka služine leske hem te krstine tut, ka ane i najvažno odluka ko tlo životo. Točno tano kaj ka valjani te kere žrtve. Ama, dali vredinela te kere len? Sigurno oja! Sekoja nevolja ko akava purano sveto tani „momentalno hem lokhi“ (2. Kor. 4:17). Ama, o krstibe ka anel tuke večna bereketija hem ka pomožinel tuke te ovel tut pobahtalo životo panda akana hem te dobine o „čačutno životo“ ki idnina (1. Tim. 6:19). Adaleske, razmislin šukar hem molin e Jehova te pomožinel tuke te dikhe dali čače sian spremno te krstine tut.