1. So valjani jekh manuš te čerel angleder te počmini te čerel čher?

ZAMISLIN jekhe manuše kova odlučindža te čerel čher. Ov džanela savo čher mangela. Ama, da li odova značini so ov odmah ka džal te činel o materijali hem ka počmini te čerel o čher? Na, naravno. Angleder te počmini, ov valjani te čerel diso but važno – te računini kobor ka koštini le te čerel odova. Sose? Odolese so valjani te džanel da li isi le dovoljno pare te završini o čher. Ako ov angleder šukar računini kobor ka koštini le, verovatno ka završini o čher.

2. Premalo Luka 14:27-30, sostar valjani šukar te razmisline angleder te krstine tut?

² Da li o mangipe premalo Jehova hem i zahvalnost aso sa odova so čerdža tuče podstaknindže tut te razmisline ando krštenje? Ako ja, tegani hem tu hijan ki slično situacija sar akava manuš kova mangela te čerel čher. Sose phenaja odova? Hajde te dikha e Isusese lafija kola tane pisime ko Luka 14:27-30. (Čitinen.) O Isus vačerdža odolestar so značini te ove oleso učenik. Te šaj te ova olese sledbenikija, valjani te džana so odova diso ka „koštini“ amen. Odova značini so ka ovel amen pharipa hem so ka valjani te žrtvujina disave buča (Luka 9:23-26; 12:51-53). Odolese, angleder te krstine tut, valjani šukar te razmisline so sa odova uključini. Adžahar ka ove pošukar pripremimo te služine verno e Devlese sar krstimo hrišćanin hem ponodri.

3. So ka dikha ko akava članko?

³ So mislineja, da li isplatini pe te istrajine ko pharipa hem te žrtvujine disave buča te bi oveja e Hristeso učeniko? Naravno so ja. O manuš kova ka krstini pe, ka ovel le but bare blagoslovija hem akana hem ki budućnost. Hajde te dikha  o odgovorija ko disave važna pučiba ando krštenje. Te odgovorija ka pomožinen tut te odgovorine ko pučibe: „Da li hijum spremno te krstinav man?“

4. (a) Soj tano predanje? (b) So značinena e Isusese lafija ando Matej 16:24?

⁴ Soj tano predanje? Angleder te krstine tut, valjani te predajine tut e Jehovase. Odova značini so tu ki jekh posebno molitva pheneja e Jehovase so mangeja te služine lese zauvek. Ked predajinena to dživdipe e Jehovase, tu „odreknineja tut“ kokri tutar. (Čitinen Matej 16:24.) Kotar odova trenutko, tu pripadineja e Jehovase, a odova tano bari čast (Rimlj. 14:8). Ki odija molitva, tu pheneja lese so kotar odova dive i najvažno buti ko to dživdipe ka ovel te služine olese, a na te ugodine tuče. To predanje tano zavet, odnosno jekh svečano obećanje kova deja e Devlese. O Jehova na čhivela tut zorjeja te de jekh asavko zavet. Ama, ked dindžan zavet, ov adžičeri tutar te ispunine le (Ps. 116:12, 14).

5. Koja tani razlika maškaro predanje hem krštenje?

⁵ Koja tani razlika maškaro predanje hem krštenje? To predanje tano diso maškaro tute hem o Jehova, a o krštenje tano diso javno. Odova čerela pe anglo avera manuša, obično ko pokrajinsko sastanko ja ko kongres. To krštenje tano dokaz so već predajindžan to dživdipe e Jehovase. * Odolese, ked krstineja tut, tu averendže mothoveja so mangeja e Jehova, te Devle, celone vileja, dušaja, godžaja hem snagaja hem so hijan odlučno te služine lese zauvek (Mar. 12:30).

6-7. Premali 1. Petrova 3:18-22, sebepi kola duj razlogija tano neophodno te krstina amen?

⁶ Da li tano čače neophodno te krstine tut? Te dikha o lafija kola tane pisime ki 1. Petrova 3:18-22. (Čitinen.) I arka hine dokaz so o Noje hine le vera ko Devel. Ko isto način, toklo krštenje tano dokaz so tu predajindžan to dživdipe e Jehovase. Ama, da li tano čače neophodno te krstine tut? Naravno. O Petar objasnindža sose tano odova važno. Sar prvo, o krštenje „spasini“ tut. O krštenje spasini amen ako amare delijencar mothovaja so isi amen vera ko Isus hem so verujinaja so ov mulo amendže, so hine uskrsnimo ko nebo hem so akana tano „ki e Devlesi desno strana.“

⁷ Sar dujto, ako krstinaja amen, ka ovel amen „čisto savest.“ Ked predajinaja amen hem krstinaja amen, tegani o Jehova prihvatini amen ko jekh posebno način. Ked iskreno pokajinaja amen hem ked mothovaja vera ki otkupno žrtva, o Devel oprostini amare grehija. Adžahar ka ovel amen čisto savest anglo leste.

8. So valjani te ovel o najvažno razlog sebepi kova valjani te krstine tut?

⁸ So valjani te ovel o najvažno razlog sebepi kova valjani te krstine tut? Dži temeljno proučindžan i Biblija, sikljiljan but buča ando Jehova – savo tano ov hem sar postupini. Odova so sikljiljan olestar utičindža ko to vilo hem podstaknindža tut te mange le but. Odolese, o najvažno razlog sose valjani te krstine tut tano sose mangeja e Jehova.

9. Premalo Matej 28:19, 20, so značini te krstine tut ko e Dadeso, e Čhaveso hem e sveto duhoso nav?

⁹ Ti odluka te krstine tut tani isto adžahar temeljimi hem ko e biblijake sikljoviba ko kola tu verujineja. Dikh so phendža o Isus ked dindža amendže i zapovest te čera učenikonen. (Čitinen Matej 28:19, 20.)  Premalo e Isusese lafija, o krštenje valjani te čerel pe „ko e Dadeso, e Čhaveso hem e sveto duhoso nav.“ So značini odova? Valjani celone vileja te verujine ko e biblijake sikljoviba ando Jehova, ando Isus hem ando sveti duh. Akala sikljoviba tane but važna hem šaj hor te utičinen ko to vilo (Jevr. 4:12). Te dikha nekobor kotar odola sikljoviba.

10-11. Kola čačipa kotar o Dad sikljiljan hem prihvatindžan?

¹⁰ Razmislin kotar o čačipa kola andi Biblija sikljiljan kotar o Dad. Oleso „nav tano Jehova“, hem ov tano „Najbaro upri celo phuv.“ Isto adžahar, jedino ov tano „čačutno Devel“ (Ps. 83:18; Is. 37:16). Ov tano Stvoritelj hem „Spasitelj“ (Ps. 3:8; 36:9). Ov čerdža sa so hine potrebno te bi oslobodini amen ando greh hem ando meribe hem dindža amen nada te živina večno (Jov. 17:3). Toklo predanje hem krštenje ka mothovi so tu hijan jekh ando e Jehovase svedokija (Is. 43:10-12). Ka ove deo ando e Devleso narodo kova ponosno akhari e Devleso nav hem vačeri averendže olestar (Ps. 86:12).

¹¹ Bari tani čast so šaj te haljove odova so i Biblija sikavi ando Dad! Ked prihvatineja odola sikljoviba, tegani to vilo ka čhivel tut te predajine to dživdipe e Jehovase hem te krstine tut.

12-13. Kola čačipa kotar o Čhavo sikljiljan hem prihvatindžan?

¹² Sar utičindža upro tute ked počmindžan te sikljove o čačipa ando Isus? O Isus tano o dujto najvažno manuš ko svemir. Ov tano amaro Otkupitelj. Ked amare delijencar mothovaja vera ki otkupno žrtva, amendže šaj te oven oprostime o grehija, šaj te barjačera amaro amalipe e Devleja hem šaj te dobina o večno dživdipe (Jov. 3:16). O Isus tano amaro Prvosveštenik. Ov mangela te pomožini amendže te ovel amen korist andi otkupno žrtva hem te ova paše e Devleja (Jevr. 4:15; 7:24, 25). Odolese soj tano ov Kralj ando e Devleso Kraljevstvo, o Jehova prekalo oleste ka posvetini poklo nav, ka čhinavi o lošnipe hem ka anel e manušendže večna blagoslovija ko raj ki phuv (Mat. 6:9, 10; Otkr. 11:15). O Isus tano primer kova valjani te oponašina (1. Petr. 2:21). Celo poklo dživdipe ov čerdža e Devlesi volja hem adžahar ačhavdža amendže but šukar primer (Jov. 4:34).

¹³ Ked prihvatineja odova so i Biblija sikavi ando Isus, tegani koro tute barjola o mangipe premalo e Devleso manglo čhavo, o Isus. Odova mangipe podstaknini tut, sar o Isus, hem tu te živine premali e Devlesi volja. Odova ka podstaknini tut te predajine to dživdipe e Jehovase hem te krstine tut.

14-15. Kola čačipa kotar o sveti duh sikljiljan hem prihvatindžan?

¹⁴ Sar reagujindžan ked sikljiljan o čačipa kotar o sveti duh? O sveti duh nane osoba, već tano e Devlesi sila. O Jehova koristindža po duh te pomožini e manušendže te pisinen i Biblija. Isto odova duh pomožini hem amendže te haljova hem te primenina odova so čitinaja ki Biblija (Jov. 14:26; 2. Petr. 1:21). Prekalo sveti duh, o Jehova dela amen „but bari snaga“ (2. Kor. 4:7). Odova duh dela amen snaga te vačera o šukar haberi, te borina amen ked isi amen kušnje, te borina amen ked hijam obeshrabrime hem te istrajina ko pharipa. Pomožini amen te mothova o šukar osobine kola tane „plod ando duho“ (Gal. 5:22). O Devel velikodušno dela poklo duho okolendže kola uzdajinena pe upro leste hem iskreno molinena le aso odova duho (Luka 11:13).

 ¹⁵ Kobor tano utešno te džana so okola so služinena e Jehovase šaj te osloninen pe ko odova so o sveti duh ka pomožini len te služinen olese. Ked tu prihvatineja odova so i Biblija sikavi ando sveti duh, tegani to vilo ka čhivel tut te predajine to dživdipe e Jehovase hem te krstine tut.

16. So dži akana sikljiljam ko akava članko?

¹⁶ Ti odluka te predajine tut e Jehovase hem te krstine tut tani but važno. Sar so dikhljam dži akana, mora te ova spremna ko odova so ka ovel amen pharipa hem so ka valjani te žrtvujina disave buča. Ama, o blagoslovija tane pobare andi bilo koja žrtva koja ka čere. Sebepi o krštenje tu šaj te ove spasimo hem šaj te ovel tut čisto savest. Glavno razlog sose tu ka krstine tut mora te ovel to mangipe premalo Jehova. Isto adžahar, celone vileja mora te verujine ko čačipa kola sikljiljan ando Dad, ando Čhavo hem ando sveti duh. Palo sa akava so dikhljam, sar bi odgovorineja ko pučibe: „Da li hijum spremno te krstinav man?“

17. Kola tane disave korakija kola igarena dži o krštenje?

¹⁷ Ako mislineja so hijan spremno te krstine tut, sigurno dži akana već čerdžan disave korakija te šaj toklo amalipe e Jehovaja te ovel pozoralo. * Sebepi so redovno proučindžan i Biblija, but buča sikljiljan ando Jehova hem ando Isus. Adžahar, ti vera ulji pozorali (Jevr. 11:6). Akana hijan potpuno uverimo so e Jehovase obećanja kola tane pisime ki Biblija tane čače hem uverimo hijan so ti vera ki e Isusesi otkupno žrtva šaj te oslobodini tut ando greh hem meribe. Palo odova, pokajindžan tut aso te grehija hem tuče tano žao aso sa o lošna buča kola čerdžan angleder. Sebepi sa odola buča, molindžan tut e Jehovase te oprostini tuče hem menindžan o način sar živineja, adžahar so odbacindžan sa o lošna buča kola čerdžan angleder hem počmindžan te čere odova soj tano šukar (Dela 3:19). Palo sa odova, osetindžan i potreba te vačere averendže andi ti vera. Ko krajo, ispunindžan o uslovija te ove nekršteni objavitelj hem te propovedine e skupštinaja (Mat. 24:14). Odolese so čerdžan sa akava, o Jehova tano but ponosno upro tute. Čerdžan le te ovel but bahtalo (Posl. 27:11).

18. So pana valjani te čere angleder o krštenje?

¹⁸ Angleder te krstine tut, isi pana nekobor avera buča kola valjani te čere. Sar so već sikljiljam, valjani te predajine to dživdipe e Jehovase. Molin tut olese ando vilo ked hijan kokri hem obećin lese so ka de lese to dživdipe te čere olesi volja (1. Petr. 4:2). Tegani vačer e phraljese, kova tano koordinator ando starešinstvo, so mangeja te krstine tut. Ov ka zamolini e starešinen  te čeren o pučiba tuvaja. Ma brinin tut sebepi odova, sose akala phralja već džanena tut hem mangena tut. On tuvaja ka razmotrinen o osnovna sikljoviba andi Biblija kola tu već džaneja. On mangena te oven sigurna so haljoveja odola sikljoviba hem so džaneja kobor tano o predanje hem o krštenje važno. Ako on složinena pe so hijan spremno aso krštenje, on ka phenen tuče so šaj te krstine tut ko aver pokrajinsko sastanko ja kongres.

19-20. So valjani te čere palo krštenje hem sar te čere odova?

¹⁹ So valjani te čere palo krštenje? * Setin tut so o predanje tano jekh zavet hem so o Jehova adžičeri tutar te ispunine le. Odolese, palo krštenje, valjani te ičere tut ko to lafi kova dindžan e Jehovase. Sar šaj te čere odova?

²⁰ Ačhov paše e skupštinaja. Sar kršteno hrišćanin, tu akana hijan deo ando e Devleso narodo (1. Petr. 2:17). O phralja hem o phenja ki skupština akana tane sar ti porodica. Ako redovno džaja ko sastankija, ka zorjačere to amalipe olencar. Svako dive čitin e Devleso Lafi hem hor razmislin odolestar so čitindžan (Ps. 1:1, 2). Palo odova so čitindžan diso andi Biblija, odvojin hari vreme te razmisline odolestar. Tegani odova so sikljoveja olatar ka resel dži to vilo. Redovno molin tut (Mat. 26:41). Sebepi so iskreno molineja tut e Jehovase, ka ove popaše oleja. Trudin tut hem ponodri o Kraljevstvo te ovel tuče ko prvo than (Mat. 6:33). Odova šaj te čere adžahar so o propovedanje ka ovel tuče najvažno buti ko dživdipe. Ked redovno džaja ki služba, ti vera ka ovel pozorali hem ka pomožine averendže te ovel len nada aso večno dživdipe (1. Tim. 4:16).

21. Savo dživdipe šaj te ovel tut već akana sebepi so ka krstine tut?

²¹ Najvažno odluka koja ka ane ko to dživdipe tani te predajine tut e Jehovase hem te krstine tut. Odova čače koštini diso. Ama, da li isplatini pe? Naravno! Svako pharipe kova šaj ka ovel tut ko akava sveto tano „trenutno hem lokho“ (2. Kor. 4:17). Ama, sebepi so ka krstine tut već akana šaj te ovel tut pobahtalo dživdipe, a ki budućnost „o čačutno dživdipe“ (1. Tim. 6:19). Odolese, molin tut hem razmislin šukar ando pučibe: „Da li hijum spremno te krstinav man?“