СТАТЬЯ, КАЙ ТЭ СЫТЮВАС 11
Ӷотово ту тэ болдёс чи най?
«Инке исин, со шолпэ пэ кода, со фэрий тумэн акана. Када, кай тумэ болдён» (1 ПЕТРА 3:21).
ДИЛИ 28 Ав лэ Иеговаско друӷо
ПАЛА СО УӶАНАСА АНДА СТАТЬЯ? *
1. Со трэбуй май англал тэ стерэл о мануш, кай тэ вистол о цэр?
ԤЭНАСА, ек мануш закамля тэ строий о цэр. Во драго ӷанэн, саво цэр во камэл. Жала во сразу тэ тинэл кода, со трэбуй, кай тэ строий? Най. Май англал, кай тэ лэлпэ тэ строий, трэбуй варисо тэ стерэл. Када тэ подадиной, скати трэбуй ловэ, кай тэ вистол о цэр. Состэ? Би кадэлэско во на уӷанэна, хутилэла лэстэ ловэ, кай тэ доандярэл и дила. Сар май англал погиндоя, скати и со трэбуй, тоди лэстэ вижала тэ достроий о цэр.
2. Пала со, сар пистромэ андэ Луки 14:27—30, трэбуй драго тэ погиндон англа кода, сар тэ болдён?
2 Важ кода кай исин любовь и блаӷодарность каринг о Иегова, гиндон тумэ тэ болдён чи най? Тоди тумэ шонпэ пэ кодэва мануш, саво камэл тэ строий о цэр. Васо? Диқам лэ Иисусостирэ алава анда Луки 14:27—30 * (адиносар). Катэ о Иисусо росԥэнэн, со трэбуй, кай тэ авас лэстирэ учениконэнца. Кай тэ жас пала о Иисусо трэбуй тэ авас ӷотови бут пэр со тэ жас. Када тэ пэрэандярас о ԥаримос и варисостар тэ отԥэндювас (Луки 9:23—26; 12:51—53). Трэбуй тэ подадинон вся, пэр со трэбуй тэ жан, кала камэн тэ болдён. Тоди тумэ авэна ӷотови май драго тэ служын лэ Дэвлэсти, сар христианоря, савэ болделэ, и савэ на ашавэн лэс.
3. Со тумэ уӷанэна андэ кадэя статья?
3 Кай тэ болдён, ашэл бут пэр со тэ жан? Канешно! Кодэлэстэ, ко болдёла, акана и англэ авэла бут лашимос. Подам дума пала дэсавэ вопросоря, важ кода кай тэ болдён. Када поможыя тэ полэн, ӷотови тумэ каринг кадэва важно шаго чи най.
СО ТРЭБУЙ ТЭ ӶАНЭН, КАЛА ДЭН АЛАВ ЛЭ ИЕГОВАСТИ ТЭ ЖУВЭН ВАЖ ЛЭСТЭ И ТЭ БОЛДЁН?
4. а) Сар тэ полэн кода, кала дэн алав лэ Иеговасти тэ жувэн важ лэстэ? б) Сар тэ полэн и алава «отԥэндёлапэ пэстар» анда Матфея 16:24?
4 Со када, кала дэн алав лэ Иеговасти тэ жувэн важ лэстэ? Сар камэн тэ болдён, май англал трэбуй тэ дэн алав лэ Иеговасти тэ жувэн важ лэстэ. Када, кала мангэнпэ анда вся оди лэ Дэвлэсти и ԥэнэн, кай камэн тэ служын лэсти вся и вечность. Кала дэн алав лэсти, тумэ отԥэндён тэ жувэн важ пэстэ. (Адиносар Матфея 16:24 *.) Кадэла времятар тумэ жувэн важ о Иегова, ай када со май бари бах (Римлянам 14:8). Тумэ ԥэнэн лэсти, кай акана и вся и время со май ӷлавно важ тумэндэ тэ служын лэсти, ай най тэ уӷодин пэсти. Кала дэн алав лэ Иеговасти, тумэ када ԥэнэн радосно и анда вся оди. О Иегова на заставий тумэн тэ дэн алав лэсти. Но сар тумэ динэ лэсти кацаво алав, тоди во лэла тэ аштярэл, кай тумэ лэс зритярэна (Псалом 116:12, 14).
5. Сар сԥангло кода, кала дэн о алав лэ Иеговасти тэ жувэн важ лэстэ и кода, кала болдён?
5 Сар сԥангло кода, кала дэн о алав лэ Иеговасти тэ жувэн важ лэстэ и кода, кала болдён? Кала тумэ дэн о алав тэ жувэн важ о Иегова, када ӷанэн кати о Иегова и тумэ. Ай кала болдён, када уӷанэн всаворэ. Када терэн обычно по канӷрэсо, кала диқэн авэр мануша. Кала тумэ болдён, тумэ сыкавэн аврэнди, кай ужэ динэ алав лэ Иеговасти тэ жувэн важ лэстэ *. Кала болдён, кадэлэса тумэ всаворэнди ԥэнэн, кай любин пэстирэ Дэвлэс лэ Иеговас «всаворэ одеса, всаворя жызняса, всаворя годяса и всаворэ зорэса» и кай камэн тэ служын лэсти вся и вечность (Марка 12:30).
6, 7. Сар пистромэ андэ 1 Петра 3:18—22, савэ исин дуй причины, кай тэ болдён?
6 Трэбуй тэ болдён чи най? Диқам и алава, савэ запистромэ андэ 1 Петра 3:18—22 * (адиносар). Кадя жэ, сар и о ковчеӷо сыкавэлас, кай о Ноё патял лэ Дэвлэсти, кадя и кала болдён, сыкавэл, кай динэ алав лэ Иеговасти тэ жувэн важ лэстэ. Чаче трэбуй тэ болдён чи най? Трэбуй. И о апостоло Пётро росԥэндя васо. Пэрво, кала болдён, када спасый тумэн. Кала болдён, када спасыя, если о мануш пэстиря диласа сыкавэл, кай патял лэ Иисусости. Инке, кай патял андэ кода, кай о Иисусо муля важ лэстэ, и кай во рисайля каринг и жызня по нэбо «и акана па право вас лэ Дэвлэстар».
7 Дуйто. Кала болдён, тумэндэ авэла «вужо ди». Кала тумэ дэн алав лэ Дэвлэсти и болдён, тумэ ашэн май пашэ лэса. О Дэл простий тумарэ ӷрехоря, кала диқэл, кай тумэ анда вся оди каинпэ и патян андэ кода, кай о Иисусо отдя пэстири жызня, кай тэ витинэл лэ манушэн. И кадя оди ашэл вужо.
8. Васо тумэ можэте тэ закамэн тэ болдён?
8 Васо тумэ можэте тэ закамэн тэ болдён? Кала драго сытёнас па Библия, тумэ бут уӷанглэ пала о Иегова, саво во и сар во андярэл пэс. Када ля тумэн лэ одестар и тумэ линэ фартэ тэ любин лэс. Тумэ трэбуй тэ болдён кати важ кода, кай любин лэ Иеговас.
9. Сар тумэ полэн лэ Иисусостирэ алава анда Матфея 28:19, 20, кай трэбуй «тэ болдён через о алав лэ Дадэско, лэ Шавэско и лэ свынтонэ духоско»?
9 Тэ болдён трэбуй тоди, кала тумэ драго полэн о чачимос анда Библия. Сгиндосарам лэ Иисусостирэ алава, кала во ԥэндя тэ жан тэ сытярэн лэ манушэн, кай вонэ тэ ашэн лэстирэ ученикоря. (Адиносар Матфея 28:19, 20 *.) О Иисусо ԥэндя, кай нэвэ ученикоря трэбуй тэ болдён «через о алав лэ Дадэско, лэ Шавэско и лэ свынтонэ духоско». Сар када тэ полас? Тумэ трэбуй анда вся оди тэ патян андо чачимос анда Библия пала о Иегова, пала лэско Шаво, о Иисусо и пала свынто духо. Кадэва чачимос састо и можэт тэ лэл лэ одестар (Евреям 4:12). Сгиндосарам пала када май драго.
10, 11. Саво чачимос пала Дад тумэ уӷанглэ и прилинэ?
10 Акэ, саво чачимос пала небесно Дад тумэ уӷанглэ, кала сытёнас па Библия. Тумэ уӷанглэ, кай лэс ақарэн Иегова, кай «во ек Всевышнё па вся ԥув» и кай во ек чачуно Дэл (Псалом 83:18; Исаия 37:16). Во Создателё и «спасения авэла лэ Иеговастар» (Псалом 3:8; 36:9). Во стердя кадя, кай тэ спасый лэ манушэн лэ ӷрехостар и ла смэртятар и дя лашимос, саво аштярэн англэ, кай тэ жувэн вечно (Иоанна 17:3). Кала тумэ дэн алав лэ Иеговасти тэ жувэн важ лэстэ и тэ болдён, тумэ ашэн лэ Иеговаско свидетелё (Исаия 43:10—12). Тумэ ужан андэ лэ Иеговаско баро ери, саво пэ вся и люма. И лэстирэ служытеля абурон андэ кода, кай пэр лэндэ ԥэнэн лэ Иеговастирэ свидетеля и кай вонэ росԥэнэн пала лэстэ (Псалом 86:12).
11 Тэ ӷанэн о чачимос пала небесно Дад, када бари бах! Кала тумэ прилэн кадэва чачимос, тоди тумэ анда вся оди камэн тэ дэн алав лэ Иеговасти и тэ болдён.
12, 13. Саво чачимос тумэ уӷанглэ и прилинэ пала лэ Дэвлэско Шаво?
12 Со тумэндэ сас по гиндо, кала уӷанглэ о чачимос пала лэ Дэвлэско Шаво? Па вся и Люма нинай нико май баро лэ Иисусостар, кати ек о Иегова. О Иисусо камэлас тэ отдэл и отдя пэстири жызня, кай тэ витинэл амэн лэ ӷрехостар. Кала тумэ пэ дила сыкавэн, кай патян, кай о Иисусо витиндя тумэн, тоди простияпэ тумаро бэзэх и тоди тумэндэ вижала тэ дружын лэ Иеговаса и тэ жувэн вечно (Иоанна 3:16). О Иисусо амаро Пэрвосвященико. Во камэл, кай амэндэ тэ авэл лашимос через кода, кай во амэн витиндя анда бэзэх и камэл, кай амэ тэ дружысарас лэ Дэвлэса (Евреям 4:15; 7:24, 25). О Иисусо Царё андэ лэ Дэвлэско Царство, и кати через лэстэ лэ Иеговаско алав авэла свынто, на авэла о найлашимос, пэ вся и ԥув авэла раё и мануша лэна тэ жувэн вечно (Матфея 6:9, 10; Откровение 11:15). О Иисусо кодэва, кастар трэбуй тэ сытювас (1 Петра 2:21). Во сыкадя амэнди, кай трэбуй тэ на жалуисарас пэс и тэ терас кода, со камэл о Дэл (Иоанна 4:34).
13 Кала тумэ прилэна кадэва чачимос анда Библия пала о Иисусо, тумэ лэна тэ любин лэ Дэвлэстирэ Шавэс, саво лэсти куч. Важ када тумэ, сар и во, камэн тэ терэн кода, со камэл о Иегова. Тоди тумэ закамэна тэ дэн алав лэ Иеговасти тэ жувэн важ лэстэ и тэ болдён.
14, 15. Саво чачимос пала свынто духо тумэ уӷанглэ и прилинэ?
14 Ай со тумэндэ сас по гиндо, кала уӷанглэ о чачимос пала свынто духо? О свынто духо, када най дэл анда Троица, ай када лэ Дэвлэско зор. О Иегова дя свынто духо лэ манушэнди, кай вонэ тэ пистрон и Библия и кадэлэ духоса поможый лэ манушэнди тэ полэн и тэ прилэн кода, со адинон андэр латэ (Иоанна 14:26; 2 Петра 1:21). О Иегова дэл пэско свынто духо, кай лэ манушэндэ тэ авэл «о зор, саво май баро обычнонэстар» (2 Коринфянам 4:7). О свынто духо дэл зор тэ росԥэнэн лащи весть, тэ на терэн кода, со камэлпэ, но нащи, тэ на умэкэн и вас и тэ пэрэандярэн о ԥаримос. О свынто духо поможый, кай тэ авэн лашэ качестворя (Галатам 5:22). О Дэл камэл тэ дэл пэско зор кодэлэнди, ко патял лэсти и мангэл анда оди кадэва зор (Луки 11:13).
15 Сар жэ драго тэ ӷанас, кай лэ Иеговастирэ служытелёнэнди поможый о свынто духо, кай тэ на парашэн тэ служын! Кала тумэ прилэн кадэва чачимос анда Библия пала свынто духо, тумэ закамэн тэ дэн алав лэ Иеговасти тэ жувэн важ лэстэ и тэ болдён.
16. Со тумэ уӷанглэ анда кадэя статья?
16 Тумэ на обжанапэ би кодэлэско, кай тэ болдён и тэ дэн алав лэ Иеговасти тэ жувэн важ лэстэ. Тумэ ужэ уӷанглэ, кай трэбуй тэ авэн ӷотови бут пэр со тэ жан, тэ виритярэн о ԥаримос и тэ авэн ӷотови варисостар тэ отԥэндён. Но кода, со тумэндэ авэла, ашэл када. Кала болдён, тумэ можэте тэ спасынпэ и тумэндэ авэла вужо ди англа Дэл. Кати, важ кода кай любин лэ Иеговас, тумэ трэбуй тэ болдён. Кадяжэ тумэнди трэбуй анда вся оди тэ патян андо чачимос, саво тумэ уӷанглэ пала небесно Дад, пала Шаво и пала свынто духо. Акана, сар тумэ полинэ, ӷотови тумэ тэ болдён чи най?
СО ТРЭБУЙ ТЭ ТЕРЭС АНГЛА КОДА, САР ТЭ БОЛДЁС?
17. Со трэбуй тэ терэс англа кода, сар тэ болдёс?
17 Если ту гиндос, кай ту ӷотово тэ болдёс, када сыкавэл, кай ту ужэ бут со стердян, кай тэ авэс май пашэ каринг о Иегова *. Ту бут со уӷанглян пала Иегова и пала Иисусо, важ кода кай на промэкэсас тэ сытёс па Библия. Ту лян фартэ тэ патяс лэ Дэвлэсти (Евреям 11:6). Ту ӷанэс, кай можно тэ патяс всаворэсти, пала со о Иегова дя алав андэ Библия. Кадяжэ ту патяс андэ кода, кай о Иисусо витиндя тут, и када спасыя лэ ӷрехостар и ла смэртятар. Ту каисайлян андэ тирэ ӷрехоря, ԥэндян лэ Иеговасти, кай полян, со терэсас найдраго и камэс будэр тэ на терэс кадя и анда вся оди мангэсаспэ лэсти тэ простий тут. Ту паруделян, парудян тиро гиндо и кода, сар андярэсас пэс, и акана жувэс па лэ Дэвлэстирэ законоря (Деяния 3:19). Ту закамлян тэ росԥэнэс аврэнди, кай патяс андо Дэл. Ашэлян некрещённо вазвещятелё и лян ла собранияса тэ росԥэнэс, кай патяс лэ Дэвлэсти (Матфея 24:14). О Иегова абурой кодэлэса, саво ту дром прожылян! И лэско ди лошавэл, кала диқэл пэр тутэ (Притчи 27:11).
18. Со инке трэбуй тэ терэс англа кода, сар тэ болдёс?
18 Май англал, сар тэ болдёс, трэбуй тэ стерэс инке варисо. Трэбуй тэ дэс алав лэ Иеговасти тэ жувэс важ лэстэ. Би никаско, екжэно андэ молитва ԥэн лэ Иеговасти, кай акана лэса тэ терэс кода, со во камэл (1 Петра 4:2). Тоди ԥэн, кай камэс тэ болдёс, лэ старейшынасти, саво координаторо андо совето старейшын. Во мангэла лэ старейшынонэн тэ подэн дума туса. Мангас тут на дар тэ диқэспэ лэнца. Кадэла ԥрала ужэ ӷанэн тут и ту ашэлян куч важ лэндэ. Вонэ просто камэн тэ подэн дума туса пала кода, сости сытярэл и Библия, и тэ диқэн, кай ту полэс када. Кадяжэ вонэ камэн тэ диқэн, кай ту полэс, пэ скати важно тэ дэс алав лэ Иеговасти и тэ болдёс. Сар вонэ диқэна, кай ту ӷотово тэ болдёс, вонэ ԥэнэна, кай ту можэш тэ болдёс по канӷрэсо, саво йто авэла.
СО ТРЭБУЙ ТЭ ТЕРЭС ПОСЛИ КОДА, САР БОЛДЕЛЯН?
19, 20. Со трэбуй тэ терэс посли кода, сар болделян и сар када тэ терэс?
19 Со трэбуй тэ терэс посли кода, сар болделян? * Кала дэса алав лэ Иеговасти тэ жувэс важ лэстэ, во лэла тэ аштярэл, кай ту кадя и терэса. Тоди посли кода, сар болделян, ту трэбуй тэ жувэс кадя, сар дян о алав. Сар када тэ полэс?
20 Драго ладисар лэ ԥралэнца и лэ ԥэянца анда тири собрания. Сар болделян, ту ашэлян андэ лэ Иеговаско ери (1 Петра 2:17). Акана када тиро ери, савэса ту патяс андо ек Дэл. Кала на промэкэс и собрании, тутэ ашэл май лащи дружба лэ ԥралэнца и лэ ԥэянца. Кажно дес адиносар лэ Дэвлэско Алав и Библия, и гиндосар пала кода, со адиносардян (Псалом 1:1, 2). Кала проадинос набут анда Библия, виарак время, кай драго тэ погиндос пала кадэла алава. Тоди кадэла гиндоря анда Библия дожана каринг оди. «На парашэн тэ мангэнпэ» лэ Иеговасти (Матфея 26:41). Тирэ молитвы анда оди пашарэна тут каринг лэстэ. Родэн «спэрва лэ Дэвлэско Царство» (Матфея 6:33). Важ када трэбуй, кай со май ӷлавно андэ тири жызня, тэ авэл тэ росԥэнэс важ о Дэл. Кала кажно шон росԥэнэс важ о Дэл. Кадя ту май фартэ лэса тэ патяс и поможыса аврэнди тэ жан па дром, саво андярэл каринг и вечно жызня (1 Тимофею 4:16).
21. Саво лашимос тутэ авэла, кала болдёса?
21 Кала дэс алав лэ Иеговасти тэ жувэс важ лэстэ и тэ болдёс, када само важно андэ тири жызня. И май лашо кадэлэстар никала, нисо на авэла! Канешно, важ када трэбуй бут состар тэ отԥэндёс. Ашэл када чи най? Канешно! Любо ԥаримос, саво исин андэ люма «най пэ долӷонэстэ и вушэро» (2 Коринфянам 4:17). Кала болдёс, ту ашэс май бахтало ужэ акана и англэ тутэ авэла «чачуни жызня» (1 Тимофею 6:19). Важ када, мангас тут, драго погиндосар и мангпэ, кай тэ полэс, ӷотово ту тэ болдёс чи най.
ДИЛИ 52 Дас алав лэ Дэвлэсти
^ абз. 5 Гиндон тумэ пала кода, кай тэ болдён? Тоди кадэя статья важ тумэндэ. Андэр латэ исин важни вопросоря пала кадэя дума. Атветоря пэ кадэла вопросоря поможына тэ полэн, авелэ тумэ каринг кода, кай тэ болдён чи най?
^ абз. 2 Луки 14:27—30: «Кодэва, ко на андярэл пэско столбо и на жал пала мандэ, на авэла мэрнэ ученикоса. Если варико андар тумэндэ закамэла тэ строий башня, хэба май англал на бэшэла и на подадиноя, скати лэстэ жана пэ када ловэ, кай тэ диқэл, хутилэла лэстэ ловэ тэ дотерэл ла? Тоди, кала во зашола о фундаменто, но лэстэ на вижала тэ дотерэл и дила, всаворэ, ко када диқэна, лэна тэ асан лэстар и тэ ԥэнэн: „Кадэва мануш заля тэ строий, ай нащи дотерэл“».
^ абз. 4 Матфея 16:24: «Сар варико закамэла тэ жал пала мандэ, мэк отԥэндёлапэ пэстар, лэла пэско ԥаримос и вся время жала пала мандэ».
^ абз. 5 Диқэн и рамка « Дуй вопросоря, пэ савэ трэбуй тэ дэн атветоря андэ кодэва дес, кала болдён».
^ абз. 6 1 Петра 3:18—22: «Важ кода кай екжэно о Христос еқвар и навсегда муля пала ӷрехоря, праведно пала нэправедни, кай тэ анэн амэн кай о Дэл. Лэс умардэ, кала во сас мануш, ай каринг и жызня во рисайля, сар анӷело. Тоди во жыля и росԥэндя пала сындо лэ анӷелонэнди, савэ андо баруно, савэ варикала на канглэ. Када сас, кала андэ лэ Ноёстирэ деса о Дэл аштярэлас и на холявэлас, пока терэнас о ковчеӷо. Андэр лэстэ сас найбут мануша. Лэн сас восемь, савэ сас фэрисардэ через о паи. Инке исин, со шолпэ пэ кода, со фэрий тумэн акана. Када, кай тумэ болдён (най, кай тэ вихалавэн и мэл па тила, ай тэ мангэн кай о Дэл вужо ди), через кода, кай о Иисус Христос рисайля каринг и жызня. Во вазгляпэ по нэбо и акана па право вас лэ Дэвлэстар, и лэс кандэн и анӷелоря и власти».
^ абз. 9 Матфея 28:19, 20: «Жан кай всаворэ народоря, сытярэн лэ манушэн, кай вонэ тэ авэн ученикоря. Болэн лэн через о алав лэ Дадэско, лэ Шавэско и лэ свынтонэ духоско. И сытярэн лэн тэ терэн вся, со мэ тумэнди приԥэндэм. И мэ авава тумэнца андэ всаворэ деса, пока кадэлэсти, со андэ люма, на авэла конец».
^ абз. 17 Диқэн 18 ӷлава анда книӷа «Сости сытярэл амэн и Библия?».
^ абз. 19 Если ту инке на прожылян и книӷа «Сости сытярэл амэн и Библия?» и «Оставайся в любви Бога», тоди трэбуй тэ прожас лэн до конца кодэлэ свидетелёса, каса сытёс па Библия.
