1. Ino ty tokony hataon’olo raiky alohani-hanamboara trano?

ERITSERETO hoe misy olo manapa-kevitsy hamboatsy trano. Hainy hoe karazan-trano manao akory ro teany hamboary. Avy le handeha am-bazary any va ie ka hivily ty fitaova sisany, bakeo hanomboky hamboatsy? Aha. Alohani-zay, le misy raha bevata mila ataony. Tsy maintsy manao kontikonty ie hoe hotrino ty ho lany amy fanamboara ani-trano iny. Manino? Satria mila hainy hoe ampy hamità ani-trano iny va ty dralany. Laha manao kontikonty soa tse ie alohani-hanombohany, le azo antoky fa ho vitany soa tranony vaovao iny.

2. Ino ty raha mila dinihinao alohani-hanaova batisa anao, laha hentea ty Lioka 14:27-30?

² Tea ani-Jehovah noho mankasitraky azy va iha ka mieritseritsy hatao batisa? Laha zay, le mila manapa-kevitsy manahaky ani-lahilahy naniry hamboatsy trano iny koa iha. Manino tsika ro mivola ani-zay? Diniho moa ty raha nivolanini-Jesosy amy Lioka 14:27-30 ao. (Vakio.) Nihazavanini-Jesosy ty dikani-hoe manjary mpianatsiny. Laha ta hanori-dia azy tsika, le tokony haneky “ze ho lany”, zany hoe parè hiaritsy raha sarotsy noho hamoy raha sisany. (Lioka 9:23-26; 12:51-53) Ka alohani-hanaova batisa anao, le mila dinihinao soa ty raha iaby tafilitsy amy zay. Ho parè iha amy zay, ka ho vitanao avao ty hanompo a Ndranahary lafa manjary Kristiana vita batisa iha.

3. Ino ty horesahintsika amy lahatsoratsy toy ato?

³ Marina fa misy raha tsy maintsy afoinao mba hahavy anao ho mpianatsini-Kristy vita batisa. Fe tsy matiantoky iha! Lafa vita batisa iha, le maro biby ty fitahia ho azonao ndre henanizao ndre amy hoavy. Ndao tsika hiresaky fanontanea bevata vitsivitsy mikasiky batisa. Hanampy anao hamaly ani-fanontanea  toy raha zay: “Fa parè hatao batisa va aho?”

4. a) Manao akory manokam-bata zao? b)  Ino ty dikani-safà hoe ‘mandà ty vatany’ amy Matio 16:24 ao?

⁴ Manao akory manokam-bata zao? Misy raha bevata mila ataonao, alohani-hanaova batisa anao. Tsy ino zay fa ty fanokanam-bata. Vavaky raiky manoka ataonao raha io. Lafa manao ani-vavaky io iha, le mampitamà ani-Jehovah hoe hampiasa ty fiainanao mba hanompoa azy zisiky farany. Lafa iha manoka ty vatanao ho a Ndranahary, le ‘mandà’ ty vatanao. (Vakio Matio 16:24.) Manjary ani-Jehovah iha. (Rom. 14:8) Tombontsoa bevata raha zay! Ambaranao azy fa manomboky amin’io, le tsy hanao ze hampifalifaly ty vatanao avao iha fa hifantoky amy fanompoa azy. Mivoady na mampitamà a Ndranahary iha lafa manao fanokanam-bata. Tsy manao forosè antsika hanao ani-voady io Jehovah. Fe mitamà ie fa hotanterahintsika voady io lafa ataontsika.—Sal. 116:12, 14.

5. Ino ty ifandrambesani-fanokanam-bata amy batisa?

⁵ Ino ty ifandrambesani-fanokanam-bata amy batisa? Lafa iha manokam-bata, le tsy misy mahay ani-zay laha tsy nareo amy Jehovah avao. Fa ty batisa, atao ankavoria na amason’olo, le matetiky amy fivoriambeni-faritsy na vondrom-paritsy ty anaova azy. Lafa atao batisa iha, le mampiseho amin’olo hoe fa nanoka ty vatanao ho ani-Jehovah. * Ka ty batisanao ro ahaizan’olo hoe tea ani-Jehovah Ndranaharinao amy ty fonao iaby, ty vatanao iaby, ty sainao iaby noho ty herinao iaby iha sady tapa-kevitsy hanompo azy zisiky farany.—Mar. 12:30.

6-7. Manino ro tena ilà ty batisa, laha hentea ty 1 Petera 3:18-22?

⁶ Tena ilà va ty batisa? Diniho moa safà amy 1 Petera 3:18-22 ao. (Vakio.) Sambofiara iny ro nahità hoe nanam-pinoa Noa. Manahaky ani-zay koa ty batisanao. Io ro porofo hita maso hoe fa nanokam-bata ho ani-Jehovah iha. Fe raha tsy maintsy atao va ty batisa? Eka. Niresahini-Petera ty antony. Voalohany, “manavotsy” anao raha io. Afaky manavotsy antsika ty batisa laha atorontsika amy ty raha ataontsika hoe mino ani-Jesosy tsika sady mino hoe nimaty ho antsika ie, nivelomy ho an-danitsy any, le mipetraky “an-tana ankavana-Ndranahary eo” henanizao.

⁷ Faharoe, manampy antsika hana “feoni-fieritsereta malio” ty batisa. Lafa nanokam-bata ho a Ndranahary noho natao batisa tsika, le nanjary nana fifandrambesa manoka aminy. Tena nibebaky tsika sady nino ty vilim-panavota, ka nengà-Ndranahary ty fahotantsika. Afaky mana feoni-fieritsereta malio amy zay tsika.

8. Ino ty tokony ho antony mahavy anao hanapa-kevitsy hatao batisa?

⁸ Ino ty tokony ho antony mahavy anao hanapa-kevitsy hatao batisa? Nianaranao soa ty Baiboly, ka maro ty raha nihainao mikasiky ani-Jehovah. Hainao ty toetsiny noho ty fomba fanaovany raha. Nidosiky ty fonao ty raha nianaranao mikasiky azy, ka nanjary teanao marè ie. Ty fitiavanao ani-Jehovah ro tokony ho antony bevata marè hanaova batisa anao.

9. Mivola ty Matio 28:19, 20 hoe tokony hatao batisa amy anarani-Baba noho amy anarani-Anaky voho amy anarani-fanahy masy ty olo atao batisa. Ino ty dikani-zay?

⁹ Manapa-kevitsy hatao batisa koa iha, satria ekenao fa marina ty fampianara fototsy baka amy Baiboly ao. Eritsereto ty raha nivolanini-Jesosy lafa ie nanome didy mba  hanaova mpianatsy. (Vakio Matio 28:19, 20.) Tokony hatao batisa “amy anarani-Baba, noho amy anarani-Anaky, voho amy anarani-fanahy masy” hoasany ty olo atao batisa. Ino ty dikani-zay? Tokony hinoanao amy fonao iaby ty fahamarina nianaranao amy Baiboly ao mikasiky ani-Jehovah, noho Jesosy Anakiny, voho ty fanahy masy. Tena bevata fahamarina rey ka afaky midosiky ty fonao. (Heb. 4:12) Ndao tsika handiniky ty sisany aminy.

10-11. Ino ty fahamarina nianaranao noho ekenao mikasiky ty Baba?

¹⁰ Eritsereto ndraiky fahamarina nianaranao mikasiky ani-Baba retoa: “Jehovah” ty anarany, ie ro “Farani-Anabo amy tany toy iaby”, le ie raiky avao ro “Ndranahary marina.” (Sal. 83:18; Isa. 37:16) Ie ro Mpamoro antsika, le ‘baka aminy ty fanavota.’ (Sal. 3:8; 36:9) Nanao fandahara ie mba hanavota antsika amy ota noho fahafatesa, noho hahazoantsika fiaina zisiky farany. (Jaona 17:3) Ty fanokanam-batanao noho ty batisanao le mampiseho hoe manjary Vavolombeloni-Jehovah iha. (Isa. 43:10-12) Tafilitsy anatini-fianakavia misy ty mpanompony amy tany toy iaby iha. Falifaly biby rozy fa kaihy amy ty anara-Ndranahary noho manambara ani-raha zay amy ty hafa.—Sal. 86:12.

¹¹ Voninahitsy bevata ty mahay ty raha ampianarini-Baiboly mikasiky ty Baba! Laha iha mino ani-fahamarina lafovily zay, le ho voatosiky hanokam-bata ho ani-Jehovah noho hatao batisa.

12-13. Ino ty fahamarina nianaranao noho ekenao mikasiky ty Anaky?

¹² Nanao akory ty fihetsikinao lafa nianatsy ty fahamarina mikasiky ty Anaky retoa? Jesosy ro olo faharoe farani-anabo amy kila raha iaby zao. Ie ro Mpanavotsy antsika. Nahafoy ty ainy ho antsika ie. Laha atorontsika amy ty raha ataontsika hoe inoantsika ty vilim-panavota, le hahazo fanengà hadisoa tsika, hifandramby amy Ndranahary sady hahazo fiaina zisiky farany. (Jaona 3:16) Jesosy ro Mpisorobentsika. Ta hanampy antsika ie mba hahafahantsika mandramby soa baka amy ty vilim-panavota noho mifandramby marìny amy Ndranahary. (Heb. 4:15; 7:24, 25) Satria ie ro Mpanjakani-Fanjakà-Ndranahary, le ie ro hampiasani-Jehovah mba hanamasy ty anarany, hanafaky ty raha raty iaby noho handay fitahia zisiky farany amy Paradisa ho avy. (Mat. 6:9, 10; Apok. 11:15) Jesosy ro modelintsika. (1 Pet. 2:21) Nanome modely ho antsika ie ka nanoka ty fiainany mba hanaova ty sitrapo-Ndranahary.—Jaona 4:34.

¹³ Laha ekenao ty raha ampianarini-Baiboly mikasiky ani-Jesosy, le hanjary teanao azy Anaky tea-Ndranahary iny. Fitiava zay ro handrisiky anao hampiasa ty fiainanao hanaova ty sitrapo-Ndranahary, manahaky ty nataoni-Jesosy. Farany, ho voatosiky hanokam-bata ho ani-Jehovah noho hatao batisa iha.

14-15. Ino ty fahamarina nianaranao noho ekenao mikasiky ty fanahy masy?

¹⁴ Nanao akory iha lafa nianatsy fahamarina mikasiky ty fanahy masy retoa? Tsy olo raha io fa hery ampiasà-Ndranahary. Nampiasa ty fanahy masy Jehovah lafa nampanoratsy ty Baiboly, le fanahy io ro manampy antsika hahazo noho hanoriky ty raha vakintsika amy Baiboly ao. (Jaona 14:26; 2 Pet. 1:21) Amy alalani-fanahiny ro anomezani-Jehovah antsika “hery fanampiny.” (2 Kor. 4:7) Ty fanahy masy ro manome hery antsika mba hitory ty vaovao soa, hanohitsy fakam-panahy, hiatriky hakivia, noho handresy fitsapà. Io koa ro manampy antsika hana ani-toetsy soa anatini-“vokatsini-fanahy” rey. (Gal. 5:22) Lafa matoky a Ndranahary avao tsika sady mangataky aminy, le ameany antsika ty fanahiny.—Lioka 11:13.

 ¹⁵ Tena mampahery ty mahay hoe afaky miantehitsy amy fanahy masy ty mpanomponi-Jehovah mba hanampy an-drozy hanompo azy! Laha ekenao ty raha nianaranao mikasiky ty fanahy masy, le ho voatosiky hanokam-bata ho a Ndranahary noho hatao batisa iha.

16. Ino iaby ty raha fa nianarantsika tato?

¹⁶ Fanapahan-kevitsy bevata ty hoe manokam-bata ho a Ndranahary noho atao batisa. Nianarantsika hoe tokony haneky “ze ho lany” iha, zany hoe parè hiaritsy raha sarotsy noho hamoy raha sisany. Fe maro biby mandilatsy ty raha afoinao ty fitahia ho azonao. Afaky manavotsy anao ty batisa, sady mahavy anao hana feoni-fieritsereta malio anatreha-Ndranahary eo. Ty fitiavanao ani-Jehovah Ndranahary ro tokony ho antony bevata marè mahavy anao hanapa-kevitsy hatao batisa. Tokony hinoanao amy ty fonao iaby koa ty fahamarina nianaranao mikasiky ty Baba, ty Anaky noho ty fanahy masy. Laha henteanao amy zay raha iaby nianarantsika reo, akory ty hamaleanao ani-fanontanea toy: “Fa parè hatao batisa va aho?”

17. Ino ty raha sisany mila andalovan’olo raiky alohani-batisany?

¹⁷ Laha mieritseritsy iha hoe fa parè hatao batisa, le azo antoky fa maro ty raha nataonao mba hifandrambesa soa amy Jehovah. * Nianatsy Baiboly tsy tampaky iha, ka nahay raha maro mikasiky ani-Jehovah noho Jesosy. Nanjary nanam-pinoa amy zay iha. (Heb. 11:6) Tena matoky iha fa ho tanteraky ze raha ampitamanini-Jehovah amy Baiboly ao. Resy lahatsy koa iha fa afaky manavotsy anao amy ota noho fahafatesa ty finoanao ty soro nataoni-Jesosy. Nibebaky tamy ty fahotanao iha, zany hoe naneny marè amy ty raha raty vitanao, ka nangataky amy Jehovah mba hanenga ty hadisoanao. Bakeo nimpoly iha, zany hoe nanova ty fiainanao. Niala amy fomba raty niainanao taloha iha, le niezaky mba hampifalifaly a Ndranahary. (Asa. 3:19) Fa tsy lininao ty hiresaky ani-raha inoanao rey amin’olo. Farany, nameno ty fepetra takỳ amy mpitory tsy vita batisa iha, le nanomboky nitory niaraky amy fiangona. (Mat. 24:14) Mahazo hatò amy Jehovah iha, satria nanao ani-raha tena ilà reo. Tena nampifalifaly ty fony iha.—Ohab. 27:11.

18. Ino koa ty raha mila ataonao alohani-batisa?

¹⁸ Misy raha hafa tsy maintsy ataonao alohani-hanaova batisa anao. Fa nianarantsika taloha teo hoe tsy maintsy manokam-bata ho a Ndranahary iha. Manaova vavaky mitoka sady baka amy fo. Resaho aminy hoe mampitamà iha fa hanoka ty fiainanao mba hanao ty sitrapony. (1 Pet. 4:2) Bakeo ambarao amy anti-panahy mpandrindra hoe maniry hatao batisa iha. Hisy anti-panahy hovolaniny mba hiresaky aminao. Ka matahotsy hiresaky amin-drozy. Tiarovo hoe fa mahay anao anti-panahy reo  sady tea anao. Hiarahan-drozy midiniky aminao ty fampianara fototsy nianaranao tamy Baiboly ao. Tean-drozy ho azo antoky hoe tena azonao fampianara rey sady hainao soa fa vatan-draha ty fanokanam-bata noho batisa. Laha hitan-drozy hoe parè vatany iha, le hambaran-drozy aminao fa azo atao batisa iha amy fivoriambe manaraky.

19-20. Ino ty raha mila ataonao lafa vita batisa iha? Akory ty hahavitanao ani-zay?

¹⁹ Ino amy zay ty tokony hataonao lafa vita batisa iha? * Tiarovo fa voady ty fanokanam-bata, le mitamà Jehovah fa hotanterahinao raha zay. Ka lafa vita batisa iha, le mila manao raha mifanaraky amy fanokanam-batanao avao. Akory ty hahavitanao ani-zay?

²⁰ Miaraha amy fiangona misy anao avao. Lafa Kristiana vita batisa iha, le tafilitsy amy “rahalahy iaby amy finoa ao.” (1 Pet. 2:17) Fianakavianao ara-panahy ty rahalahy noho anabavy iaby amy fiangona eo. Laha mamonjy fivoria tsy tampaky iha, le vomaiky ho mpinama marè nareo. Vakio noho vetsevetseo sanandro ty Safà-Ndranahary. (Sal. 1:1, 2) Lafa baka namaky tampany raiky amy Baiboly ao iha, le manokana fotoa mba handiniha soa ty raha nivakinao. Ho tafalatsaky am-ponao ao safà rey amy zay. “Ka mieny mivavaky.” (Mat. 26:41) Hanampy anao hihamariny ani-Jehovah ty vavaky baka amy fo ataonao. “Ilao avao tse Fanjakà iny.” (Mat. 6:33) Manao ani-zay iha laha ty asa fitoria ro ataonao voaloha lista amy fiainanao. Hatanjaky avao ty finoanao lafa mandeha manompo tsy tampaky iha, sady hanampy olo hafa handeha amy lala mana amy fiaina any iny raha zay.—1 Tim. 4:16.

21. Afaky hahazo ino iha lafa vita batisa?

²¹ Ty fanapahan-kevitsinao hanoka ty vatanao ho ani-Jehovah noho hatao batisa ro fanapahan-kevitsy bevata marè hataonao. Tsy maintsy misy raha hafoinao aloha. Mety avao va ty anaovanao ani-zay? Eka! “Mandalo noho maiva” iaby ze raha sarotsy mety hatrehinao amy tontolo toy eto. (2 Kor. 4:17) Mifanohitsy amy zay fa lafa vita batisa iha, le afaky hana fiaina mahafa-po manomboky henanizao, sady hahazo “ty tena fiaina” amy hoavy. (1 Tim. 6:19) Ka mba diniho soa amim-bavaky lahy ty valin-teninao amy fanontanea iny hoe: “Fa parè hatao batisa va aho?”