1. O le ā le mea e manaʻomia ona fai e se tasi a o leʻi fausiaina se fale?

SEʻI faaata se tagata ua manaʻo e fau se fale. Ua ia iloa le ituaiga o fale e manaʻo ai. Po o le a ia alu loa ma faatau mai mea faufale ma amata loa ona fau le fale? E leai. A o leʻi amata le galuega, e iai se mea tāua e manaʻomia ona ia faia, o le faitauina lea o tupe e manaʻomia e fausiaina ai le fale. Aiseā? Talu ai afai e muamua ona ia iloilo lelei pe lava tupe e fau ai le fale, e mautinoa la o le a māeʻa lelei lona fale fou.

2. E tusa ai ma le Luka 14:27-30, o le ā e manaʻomia ona e mafaufau lelei i ai ae e te leʻi papatiso?

² Po o lou alofa ma lou talisapaia o Ieova ua uunaʻia ai oe e te mafaufau e papatiso? Afai o lea, o loo e feagai la ma se filifiliga e taitutusa ma le tamāloa na manaʻo e fau se fale. Aiseā e tatou te manatu ai faapea? Seʻi tatou talanoa i fetalaiga a Iesu o loo i le Luka 14:27-30. (Faitau.) Na talanoa Iesu i le uiga o le avea o se tasi ma ona soo. Ina ia avea ma ona soo, e tatau ona tatou lotomalilie e talia le tau po o “tupe o le a faaalu” ai, lea e faasino atu i lo tatou onosaia o faafitauli ma faataulaga e tatou te faia. (Luka 9:23-26; 12:51-53) Ae e te leʻi papatiso, e manaʻomia ona e mafaufau lelei i mea uma e aofia ai i le avea ma soo o Keriso. O le faia faapea, ua saunia lelei ai oe e avea o se Kerisiano papatiso e auauna pea ma le faamaoni i le Atua.

3. O le ā o le a tatou talanoaina i lenei mataupu?

³ Pe e sili ona aogā iā te oe le avea ma soo papatiso o Keriso ae o le a e fesagaʻia ai faafitauli ma e faia ai faataulaga? Ioe e  sili atu ona aogā. O le papatisoga ua tatala ai le avanoa mo le anoanoaʻi o faamanuiaga i le taimi nei ma le lumanaʻi. Seʻi o tatou talanoa i ni fesili tāua e faatatau i le papatisoga. O le talanoaina o na fesili, o le a fesoasoani iā te oe e tali ai le fesili, “Po ua ou sauni ou te papatiso?”

4. (a) O le ā le tuuina atu? (e) O le ā le uiga o le “faafitia” e le tagata o ia lava e pei ona taʻua i le Mataio 16:24?

⁴ O le ā le tuuina atu? Ae e te leʻi papatiso, e tatau ona e faia se tuuina atu. Pe a tuuina atu oe, e te tatalo faatauanau atu i le Atua ma taʻu atu iā te ia o le a faaaogā lou ola e auauna ai iā te ia e faavavau. Pe a e tuuina atu oe i le Atua, ua e “faafitia” la oe lava. (Faitau le Mataio 16:24.) O lea ua pule Ieova iā te oe, ma o se faaeaga sili. (Roma 14:8) Ua e taʻu atu iā te ia e amata atu i le taimi lenā ona e uaʻi atu e auauna iā te ia, ae e lē o le faamalie o oe lava. O lou tuuina atu, o se tautoga po o se folafolaga aloaʻia ua e faia i le Atua. E lē faamalosia e Ieova i tatou e faia lenā tautoga. Ae pe a tatou faia, e faatalitalia la e Ieova i tatou e faataunuu lenā tautoga.​—Sala. 116:12, 14.

5. O le ā le fesootaʻiga o le tuuina atu ma le papatisoga?

⁵ O le ā le fesootaʻiga o le tuuina atu ma le papatisoga? O lou tuuina atu o se mea e patino lava iā te oe ma e lē iloa e se isi ua na o oe lava ma Ieova. O le papatisoga e fai i luma o le lautele, e te papatiso i luma o isi i se fonotaga po o se tauaofiaga. Pe a e papatiso, ua e faailoa atu ai i isi ua uma ona tuuina atu oe iā Ieova. * O lea, o lou papatisoga ua iloa ai e isi e te alofa iā Ieova lou Atua ma lou lotoatoa, ola atoa, mafaufau atoa ma lou malosi atoa ma ua e maumauaʻi foʻi e auauna iā te ia e faavavau.​—Mare. 12:30.

6-7. E tusa ai ma le 1 Peteru 3:18-22, o ā māfuaaga e lua e manaʻomia moni ai lava ona e papatiso?

⁶ Pe e manaʻomia moni lava ona e papatiso? Seʻi manatu i upu o loo i le 1 Peteru 3:18-22. (Faitau.) O le vaa na avea ma faamaoniga vaaia o le faatuatua o Noa, o le papatisoga o le faamaoniga vaaia foʻi lea o lou tuuina atu iā Ieova. Ae pe e manaʻomia moni lava ona e papatiso? Ioe. Na taʻua e Peteru māfuaaga. Muamua, e “faaolaina” ai oe. O le papatisoga e mafai ona faaolaina ai i tatou pe a tatou faia gaoioiga e manaʻomia e faailoa atu ai lo tatou faatuatua iā Iesu, talitonu na ia maliu mo i tatou, na faatūina aʻe i le lagi, ma ua iai nei i le “itu taumatau o le Atua.”

⁷ Lua, o le papatisoga e iʻu atu ai i “se lotofuatiaifo lelei.” Pe a tuuina atu i tatou i le Atua ma papatisoina, ua tatou maua la se faiā faapitoa ma ia. Ua faamagalo e le Atua a tatou agasala, ona ua tatou faaalia le salamō moni ma faatuatua i le togiola. O lea la, ua tatou maua se lotofuatiaifo lelei ma ia.

8. O le ā e tatau ona avea ma faavae o lau filifiliga e papatiso ai?

⁸ O le ā e tatau ona avea ma faavae o lau filifiliga e papatiso ai? Ona o lou suʻesuʻeina lelei o le Tusi Paia, ua e aʻoaʻoina ai le tele o mea e faatatau iā Ieova, o ona uiga ma le auala e na te faia ai mea. O mea na e aʻoaʻoina e faatatau iā te ia, ua pāʻia ai lou loto ma uunaʻia ai oe e alofa tele mo ia. O lou alofa mo Ieova, e tatau ona avea ma faavae autū o lau filifiliga e papatiso ai.

9. O le ā le uiga o le papatiso i le suafa o le Tamā, ma le Atalii, ma le agaga paia e pei ona taʻua i le Mataio 28:19, 20?

⁹ O lau filifiliga e papatiso e faavae mai foʻi i upu moni ua e taliaina mai i le Tusi Paia. Seʻi manatu i fetalaiga a Iesu ina ua ia avatu le  faatonuga, ia fai isi ma soo. (Faitau le Mataio 28:19, 20.) E pei ona taʻua e Iesu, o i latou ua papatiso e tatau ona papatisoina “i le suafa o le Tamā, ma le Atalii, ma le agaga paia.” O le ā le uiga o lenā fetalaiga? E tatau ona e talitonu ma lou lotoatoa i upu moni o le Tusi Paia e faatatau iā Ieova, o lona Alo o Iesu ma le agaga paia. E malolosi nei upu moni ma e matuā pāʻia ai lou loto. (Epe. 4:12) Seʻi o tatou iloiloina nisi o nei upu moni.

10-11. O ā upu moni e faatatau i le Tamā ua e aʻoaʻoina ma taliaina?

¹⁰ Seʻi toe tomānatu i le taimi na e aʻoaʻoina ai upu moni nei e faatatau i le Tamā. O lona “suafa o Ieova,” ma “o Lē e Silisili Ese i le lalolagi uma,” ma e na o ia lava “le Atua moni.” (Sala. 83:18; Isa. 37:16) O Ieova o Lē na foafoaina i tatou, ma e iā te ia le faaolataga. (Sala. 3:8; 36:9) Na ia faia se sauniuniga e faasaoina ai i tatou mai i le agasala ma le oti, ma ua ia tuuina mai foʻi le faamoemoe o le ola e faavavau. (Ioa. 17:3) O lou tuuina atu ma papatisoina o le a mātaulia ai oe o se tasi o Molimau a Ieova. (Isa. 43:10-12) O le a avea oe ma vaega o se aiga i le lalolagi aoao o ē e tapuaʻi iā Ieova ma mitamita i le tauaveina o lona suafa ma faailoa atu i isi.​—Sala. 86:12.

¹¹ Maʻeu se faaeaga o le malamalama i aʻoaʻoga a le Tusi Paia e faatatau i le Tamā! Pe a e taliaina nei upu moni tautele, o le a uunaʻia oe e lou loto e tuuina atu oe lava iā Ieova ma papatisoina.

12-13. O ā upu moni e faatatau i le Alo ua e aʻoaʻoina ma taliaina?

¹² O ā ni ou faalogona ina ua e aʻoaʻoina upu moni nei e faatatau i le Alo? O Iesu e tulaga lua lona tāua i le aoao o mea. O ia o lo tatou Togiola. Na lotomalie o ia e foaʻi mai lona ola mo i tatou. Pe a faaalia i a tatou gaoioiga e tatou te faatuatua i le togiola, e mafai ona faamagaloina a tatou agasala, atiaʻe se faauōga ma le Atua ma maua le ola e faavavau. (Ioa. 3:16) O Iesu o lo tatou Ositaulaga Sili. E finagalo o ia e fesoasoani mai ia tatou maua aogā mai i le togiola, ma maua se faiā vavalalata ma le Atua. (Epe. 4:15; 7:24, 25) Ona o Iesu o le Tupu o le Malo o le Atua, o le a faaaogā o ia e Ieova e faapaiaina lona suafa, tafiesea amioga leaga uma ma aumaia faamanuiaga e faavavau i le Parataiso ua lata mai. (Mata. 6:9, 10; Faaa. 11:15) O Iesu o lo tatou faaaʻoaʻo. (1 Pete. 2:21) Na ia faataatia se faaaʻoaʻoga mo i tatou, o le tuutoina atu o lona ola i le faia o le finagalo o le Atua.​—Ioa. 4:34.

¹³ Pe a e talia aʻoaʻoga a le Tusi Paia e faatatau iā Iesu, o le a e atiaʻe ai le alofa mo le Alo pele o le Atua. O lenā alofa, o le a uunaʻia ai oe e faaaogā lou ola i le faia o le finagalo o le Atua e pei ona sa faia e Iesu. O le iʻuga, o le a uunaʻia ai oe e tuuina atu lou ola iā Ieova ma papatisoina.

14-15. O ā upu moni e faatatau i le agaga paia ua e aʻoaʻoina ma taliaina?

¹⁴ O le ā sou manatu ina ua e aʻoaʻoina upu moni nei e faatatau i le agaga paia? E lē o se atua le agaga paia ae o le mana galue lē vaaia o le Atua. Na faaaogā e Ieova lona agaga paia e taʻitaʻia ai le tusiaina o le Tusi Paia, ma e fesoasoani mai foʻi iā i tatou e malamalama ma faatatau mea ua tatou faitau i ai. (Ioa. 14:26; 2 Pete. 1:21) Ua tuuina mai e Ieova iā i tatou “le mana lea e sili atu i le malosi o tagata” e ala mai i lona agaga paia. (2 Kori. 4:7) Ua tatou maua mai foʻi i le agaga paia le malosi e talaʻi ai le tala lelei, teena ai faaosoosoga, foʻia ai faalogona o le lotovaivai ma manumalo mai ai i faigatā. E fesoasoani foʻi iā i tatou e faaalia ai uiga matagofie ia e faia aʻe ai “le fua o le agaga.” (Kala. 5:22) E foaʻi fua mai e le Atua lona agaga paia iā i latou e  maufaatuatuaina o ia, ma talosaga atu ma le faamaoni mo le agaga paia.​—Luka 11:13.

¹⁵ Maʻeu se faamautinoaga ma se faamāfanafanaga o le iloa, e mafai ona faalagolago tagata tapuaʻi o Ieova i le agaga paia e fesoasoani iā i latou e auauna ai iā Ieova! Pe a e talia upu moni ua e aʻoaʻoina e faatatau i le agaga paia, o le a uunaʻia ai oe e tuuina atu oe i le Atua ma papatisoina.

16. O le ā ua tatou aʻoaʻoina mai i mea ua uma ona tatou talanoaina?

¹⁶ O le a e faia se filifiliga e sili ona tāua pe a e tuuina atu i le Atua ma papatisoina. E pei ona tatou aʻoaʻoina, e manaʻomia ona tatou lotomalilie e talia le tau e aofia ai, o luʻi ma faataulaga. Peitaʻi, o le a sili atu ona tele faamanuiaga e tatou te maua nai lo o faataulaga e tatou te faia. O le papatisoga e mafai ona faaolaina ai oe ma maua ai se lotofuatiaifo lelei ma le Atua. O lou alofa mo Ieova, e tatau ona avea ma faavae autū o lau filifiliga e papatiso ai. E tatau foʻi ona e talitonu ma lou lotoatoa i upu moni o le Tusi Paia na e aʻoaʻoina e faatatau i le Tamā, le Alo ma le agaga paia. Pe a fua i mea ua uma ona tatou talanoaina, o le ā sau tali i le fesili, “Po ua ou sauni ou te papatiso?”

17. O ā mea e manaʻomia ona e faia a o leʻi papatiso?

¹⁷ Pe afai e te lagona ua e sauni e te papatiso, e mautinoa e tele mea ua e faia e atiaʻe ai se faiā lelei ma Ieova. * O lou suʻesuʻeina e lē aunoa o le Tusi Paia, ua mafai ai ona e iloa lelei Ieova ma Iesu. Ua e atiaʻe le faatuatua. (Epe. 11:6) Ua e talitonu atoatoa i folafolaga a Ieova o loo i le Tusi Paia, ma ua e mautinoa o lou faatuatua i le taulaga a Iesu ua mafai ai ona faasaoina oe mai i le agasala ma le oti. Ua e salamō mai i au agasala, ma ua e matuā faanoanoa ona o au mea sesē na fai ma e talosaga atu iā Ieova mo lana faamagaloga. Ua suia lou olaga, ua e maumauaʻi e teena mea leaga na e faia ma ua e ola i se auala e faafiafiaina ai le Atua. (Galu. 3:19) Ua e naunau e taʻu atu i isi ou talitonuga. Ua e agavaa e avea ma tagata talaʻi e leʻi papatiso, ma amata ona e talaʻi faatasi ma le faapotopotoga. (Mata. 24:14) E mitamita Ieova iā te oe ona o lou faia o nei suiga tāua. Ua e matuā faafiafiaina le finagalo o Ieova.​—Faata. 27:11.

18. O ā isi mea e manaʻomia ona e faia ae e te leʻi papatiso?

¹⁸ Ae e te leʻi papatiso, e iai nisi mea e manaʻomia ona e faia. E pei ona sa tatou aʻoaʻoina mai i le amataga, e manaʻomia ona e tuuina atu i le Atua. Ia faalatalata atu tau lava o ia i le tatalo, ma tautō atu iā te ia o le a faaaogā lou ola e fai ai lona finagalo. (1 Pete. 4:2) Ona e faailoa lea i le sooupu o le ʻautoeaina ua e manaʻo e te papatiso. O le a ia faatulaga isi toeaina e tou te feiloaʻi ma aua e te popole e  feiloaʻi ma i latou. E mautinoa o nei uso pele ua latou iloa lelei oe ma e latou te alolofa foʻi iā te oe. O le a outou autaluina faatasi aʻoaʻoga faavae o le Tusi Paia lea ua e iloaina. E latou te mananaʻo e faamautinoa ua e malamalama i nei aʻoaʻoga ma le tāua o le tuuina atu ma le papatisoga. Pe a latou ioe ua e agavaa, o le a latou faailoa atu iā te oe e mafai ona e papatiso i le fonotaga po o le tauaofiaga o le a sosoo mai.

19-20. O ā mea e manaʻomia ona e faia pe a māeʻa ona e papatiso, ma e faapefea ona fai?

¹⁹ Pe a māeʻa lou papatisoga, o le ā e manaʻomia ona e faia? * Ia manatua o le tuuina atu o se tautoga ma e faatalitalia oe e Ieova e tausisi i ai. O lea, pe a māeʻa lou papatisoga, e tatau ona e ola e tusa ai ma lou tuuina atu. E faapefea ona e faia lenā mea?

²⁰ Ia vavalalata atu i lau faapotopotoga. Ona ua avea oe o se Kerisiano papatiso, ua avea la oe ma vaega o le “ʻauuso.” (1 Pete. 2:17) O uso ma tuafāfine i le faapotopotoga o lou aiga faaleagaga. O lea, o lou auai e lē aunoa i sauniga o le a faamalosia ai la outou faiā. Ia faitau i le Afioga a le Atua ma manatunatu loloto i ai i aso taʻitasi. (Sala. 1:1, 2) Pe a māeʻa ona e faitauina se vaega o le Tusi Paia, ia faaalu se taimi e manatunatu loloto ai i mea ua e faitauina. O le a pāʻia ai lou loto i upu o loo i ai. Ia “tatalo e lē aunoa.” (Mata. 26:41) O au tatalo mai le loto o le a e vavalalata atu ai iā Ieova. “Ia faaauau pea ona . . . saʻili muamua le malo.” (Mata. 6:33) O lea ia faamuamua le galuega talaʻi i lou olaga. O le talaʻi e lē aunoa, o le a faamalosia ai lou faatuatua, ma e te ono fesoasoani ai i isi e uia le ala i le ola e faavavau.​—1 Timo. 4:16.

21. O le ā le avanoa ua tatala mai ona o lou papatisoga?

²¹ O le filifiliga e tuuina atu oe iā Ieova ma papatisoina, o se filifiliga sili ona tāua lea o le a e faia. E moni e iai le tau e aofia ai, o le onosaia o faafitauli ma faataulaga e fai. Ae pe e aogā lou onosaia o faafitauli ma faataulaga e te faia ina ia e papatiso ai? E mautinoa e aogā. O so o se faigatā e te ono fesagaʻia i lenei lalolagi tuai, e “puupuu ma māmā.” (2 Kori. 4:17) Peitaʻi, o lou papatisoga ua tatala ai le avanoa mo se olaga e sili ona faamalieina i le taimi nei ma le “ola moni” i le lumanaʻi. (1 Timo. 6:19) O lea la, ia mafaufau lelei ma tatalo e faatatau i lau tali i le fesili, “Po ua e sauni e te papatiso?”