1. San wan sma musu du, fosi a bigin bow wan oso?

KON meki wi taki dati wan sma o bow wan oso. A sabi sortu oso a wani bow. A musu go bai sani wantewante fu bigin bow? Nôno. Fosi a bigin, a musu du wan prenspari sani. A musu luku omeni a o kostu fu bow na oso. Fu san ede? Fu di a musu sabi efu a abi nofo moni fu bigin bow. Efu a e luku na fesi omeni a o kostu fu bow na oso, dan a o man klari a wroko.

2. Soleki fa Lukas 14:27-30 e sori, dan san yu musu prakseri fosi yu dopu?

² Yu e prakseri fu dopu? Yu wani dopu fu di yu lobi Yehovah èn fu di yu de nanga tangi gi san a du gi yu? Efu dati de so, dan yu musu du wan srefi sortu sani leki a sma di wani bow wan oso. Fu san ede wi kan taki dati? Luku san Yesus taki na Lukas 14:27-30. (Leisi en.) Na ini a tekst disi Yesus e sori san a wani taki fu de wan disipel fu en. Wan disipel musu de klariklari fu libi son sani na baka èn a kan fruwakti taki a o kisi tesi (Luk. 9:23-26; 12:51-53). Sobun, fosi yu dopu yu musu prakseri san a wani taki fu de wan disipel fu Krestes. Te yu e du dati, dan yu o man tan dini Gado leki wan dopu Kresten.

3. San wi o luku na ini na artikel disi?

³ Te wi e tron dopu disipel fu Krestes, dan wi kan fruwakti taki wi o kisi tesi èn taki wi o abi fu libi wan tu sani na baka. Ma dati musu tapu wi fu tron wan disipel fu Krestes? Nôno! Te yu o dopu yu o kisi furu blesi now èn na ini a ten di e kon. Meki wi poti prakseri na wan tu prenspari aksi di abi fu du nanga dopu. Den piki tapu  den aksi disi o yepi yu fu sabi efu yu klari kaba fu dopu.

4. (a) San a wani taki fu gi yusrefi abra na Gado? (b) San a wani taki fu ’no teri yusrefi moro’, soleki fa Mateyus 16:24 e taki?

⁴ San a wani taki fu gi yusrefi abra na Gado? Fosi yu kan dopu, yu musu gi yusrefi abra na Gado. Te yu e du disi, dan na ini wan begi yu e pramisi Yehovah taki yu o dini en fu têgo. Te yu e gi yusrefi abra na Gado, dan yu ’no e teri yusrefi moro’. (Leisi Mateyus 16:24.) Baka te yu du dati yu o de fu Yehovah èn dati na wan bigi grani (Rom. 14:8). Te yu e gi yusrefi abra na Gado, yu e taigi en taki yu no o libi moro gi yusrefi, ma fu du a wani fu en. Disi na wan seryusu pramisi. Yehovah no e dwengi wi fu meki so wan pramisi. Ma te wi du disi, dan a e fruwakti taki wi e du san wi pramisi en.​—Ps. 116:12, 14.

5. San na a difrenti te wan sma e gi ensrefi abra na Yehovah èn te a e dopu?

⁵ San na a difrenti te wan sma e gi ensrefi abra na Yehovah èn te a e dopu? Te yu e gi yusrefi abra na Yehovah, dan nowan sma abi fu de nanga yu na a momenti dati. Ma te yu e dopu, dan dati e pasa na fesi tra sma na wan kring konmakandra noso wan kongres. Te yu e dopu, dan yu e sori trawan taki yu gi yusrefi abra na Yehovah. * Na so yu e sori tra sma taki yu lobi Yehovah Gado nanga yu heri ati, yu heri libi, yu heri frustan nanga ala yu krakti èn taki yu o dini en fu têgo.​—Mark. 12:30.

6-7. San na tu reide fu san ede wan sma musu dopu, soleki fa 1 Petrus 3:18-22 e sori?

⁶ A de fanowdu taki mi dopu? Luku san skrifi na 1 Petrus 3:18-22. (Leisi en.) Neleki fa na ark ben sori sma taki Noa ben bribi na ini Gado, na so a de tu taki a dopu fu yu e sori sma taki yu gi yusrefi abra na Yehovah. Ma a de fanowdu fu dopu? Iya. Petrus e sori wi fu san ede dati de so. Na a fosi presi dopu e ’frulusu yu’. Wi o kisi frulusu te wi e sori taki wi e bribi na ini Yesus èn te wi e bribi taki a dede gi wi. Wi musu bribi tu taki a kisi wan opobaka, èn taki a de na hemel „na Gado en reti-anusei”.

⁷ A di fu tu sani na taki te wi dopu wi o abi „wan bun konsensi”. Te wi gi wisrefi abra na Gado èn wi dopu, wi e tron wan anbegiman fu en. Fu di wi abi berow fu den sondu fu wi èn fu di wi e bribi na ini a lusu-paiman, meki Gado e gi wi pardon fu den sondu fu wi. Disi e meki taki wi abi wan bun konsensi.

8. San musu de a moro prenspari reide fu san ede yu e dopu?

⁸ San musu de a moro prenspari reide fu san ede yu e dopu? Fu di yu studeri Bijbel meki yu kon sabi den fasi fu Yehovah èn fa a e du sani. Den sani disi naki yu ati èn den meki taki yu kon lobi en. A lobi di yu abi gi Yehovah musu de a moro prenspari reide fu san ede yu e dopu.

9. San a wani taki fu dopu na ini a nen fu a Tata, fu a Manpikin, èn fu a santa yeye, soleki fa skrifi na Mateyus 28:19, 20?

⁹ Wan tra reide fu san ede yu e dopu na fu di yu e bribi den sani di yu leri na ini Bijbel. Prakseri san Yesus taki di a taigi den bakaman fu en fu meki disipel. (Leisi Mateyus 28:19, 20.) Yesus ben  taki dati sma ben musu dopu „na ini a nen fu a Tata, fu a Manpikin, èn fu a santa yeye”. San disi wani taki? Wi musu bribi den sani di wi leri fu Yehovah, fu en Manpikin Yesus, nanga a santa yeye. Den sani di wi leri na ini Gado Wortu kan kenki wi libi (Hebr. 4:12). Wi o luku wan tu fu den sani di wi leri.

10-11. San yu leri fu a Tata?

¹⁰ Prakseri den sani di yu leri fu a Tata: En ’nen na Yehovah’, en „na a Moro Heiwan fu heri grontapu” èn en na „a tru Gado” (Ps. 83:18; Yes. 37:16). Yehovah na wi Mekiman èn ’na en e frulusu sma’ (Ps. 3:8; 36:9). A seti sani fu frulusu wi fu sondu nanga dede èn a gi wi a howpu fu libi fu têgo (Yoh. 17:3). Te yu gi yusrefi abra na Gado èn te yu dopu, yu e sori taki yu na wan Kotoigi fu Yehovah (Yes. 43:10-12). Yu o kon na ini a bigi famiri fu anbegiman fu Yehovah di e tyari en nen èn di e fruteri trawan fu en.​—Ps. 86:12.

¹¹ Na wan bigi grani fu sabi san Bijbel e leri fu a Tata! Te yu e bribi den sani disi, dan yu o gi yusrefi abra na Yehovah èn yu o dopu.

12-13. San yu leri fu a Manpikin?

¹² Fa yu feni den sani di yu leri fu a Manpikin? Baka Yehovah, Yesus na a moro prenspari sma di de. En na wi Frulusuman. A ben de klariklari fu dede gi wi. Te wi e sori taki wi e bribi na ini a lusu-paiman, dan wi o kisi pardon fu wi sondu, wi o tron wan mati fu Gado èn wi o kisi têgo libi (Yoh. 3:16). Yesus na wi Granpriester. A wani yepi wi fu kisi wini fu a lusu-paiman èn fu abi wan bun matifasi nanga Gado (Hebr. 4:15; 7:24, 25). Fu di en na a Kownu fu Gado Kownukondre, meki Yehovah o gebroiki en fu santa en nen, fu puru ogri na grontapu èn fu blesi libisma fu têgo na ini Paradijs (Mat. 6:9, 10; Openb. 11:15). Wi musu waka baka Yesus (1 Petr. 2:21). A de wan bun eksempre gi wi, fu di a ben poti a wani fu Gado na a fosi presi na ini en libi.​—Yoh. 4:34.

¹³ Te yu e bribi san Bijbel e leri fu Yesus, yu o kon lobi a Manpikin fu Gado. A lobi dati o meki taki yu o poti a wani fu Gado na a fosi presi na ini yu libi, neleki Yesus. A bakapisi o de taki yu o gi yusrefi abra na Gado èn yu o dopu.

14-15. San yu leri fu a santa yeye?

¹⁴ Fa yu feni den sani di yu leri fu a santa yeye? A santa yeye a no wan sma, ma na a krakti fu Gado. Yehovah gebroiki en santa yeye fu meki sma skrifi Bijbel. En santa yeye e yepi wi tu fu frustan san wi leisi èn fu du den sani di wi leisi (Yoh. 14:26; 2 Petr. 1:21). Yehovah e gi wi „a krakti di bigi pasa marki” nanga yepi fu en santa yeye (2 Kor. 4:7). A yeye disi e gi wi krakti fu preiki a bun nyunsu, fu basi den sondu firi fu wi, fu no lasi-ati èn fu horidoro te tesi e miti wi. Boiti dati, wi kan kon abi den moi fasi „di a yeye e meki sma kisi” (Gal. 5:22). Gado de klariklari fu gi en santa yeye na den sma di e aksi en èn di e frutrow en.​—Luk. 11:13.

¹⁵ A e gi wi deki-ati fu sabi taki a santa yeye e yepi wi fu dini Yehovah! Te yu e bribi den sani di yu leri fu a santa yeye, yu o wani gi yusrefi abra na Gado èn dopu.

16. San wi leri te nanga now?

¹⁶ Te yu bosroiti fu gi yusrefi abra na  Gado èn fu dopu, dan dati na wan prenspari sani. Soleki fa wi si, wi kan fruwakti taki wi o kisi tesi èn wi o abi fu libi son sani na baka. Ma den blesi di wi o kisi o furu moro ala den tesi disi. Te yu dopu yu kan kisi frulusu èn yu kan abi wan bun konsensi. A moro prenspari reide fu san ede yu o dopu na fu di yu lobi Yehovah Gado. Yu musu bribi den sani tu di yu leri fu a Tata, a Manpikin èn a santa yeye. Now di wi luku den sani disi, dan fa yu o piki na aksi disi: „Mi klari kaba fu dopu?”

17. San na wan tu sani di wan sma musu du fosi a dopu?

¹⁷ Efu yu denki taki yu klari kaba fu dopu, dan a no de fu taki dati yu du muiti kaba fu abi wan bun matifasi nanga Yehovah. * Fu di yu studeri Bijbel, yu kon sabi furu fu Yehovah nanga Yesus èn yu e bribi na ini den (Hebr. 11:6). Yu e bribi taki den pramisi fu Yehovah di de na ini Bijbel o kon tru èn yu e bribi taki a lusu-paiman fu Yesus kan frulusu yu fu sondu nanga dede. Yu abi berow fu den sondu fu yu. Dati wani taki dati yu e sari fu den fowtu di yu meki èn yu aksi Yehovah fu gi yu pardon. Boiti dati, yu drai yu libi èn yu e libi now leki fa Gado wani (Tori 3:19). Yu e angri fu fruteri trawan san yu e bribi. Yu tron wan preikiman di no dopu ete èn yu e preiki makandra nanga a gemeente (Mat. 24:14). Yehovah breiti taki yu du ala den sani disi. Yu e meki en ati prisiri.​—Odo 27:11.

18. Sortu tra sani yu musu du fosi yu dopu?

¹⁸ Wan tu tra sani de di yu musu du, fosi yu dopu. Soleki fa wi si kaba, dan yu musu gi yusrefi abra na Gado. Na ini begi yu o pramisi Gado taki yu o libi fu du en wani (1 Petr. 4:2). Baka dati yu musu meki a fesiman fu den owruman sabi taki yu wani dopu. A o seti sani so taki wan tu owruman luku den dopu aksi nanga yu. Yu no abi fu frede den owruman fu di den sabi yu kaba èn den lobi yu. Den o luku den moro prenspari leri fu Bijbel nanga yu fu luku efu yu frustan den. Den wani si efu yu e frustan o prenspari a bosroiti di yu teki de. Efu den si taki yu kaba fu dopu, den o taigi yu taki yu kan dopu na a fosi bigi konmakandra di e kon.

19-20. San yu musu du baka te yu dopu èn fa yu kan du dati?

¹⁹ San yu musu du, baka te yu dopu? * Hori na prakseri taki te yu gi yusrefi  abra na Gado, yu pramisi Yehovah taki yu o du en wani. Sobun, baka te yu dopu Yehovah e fruwakti taki yu du san yu pramisi. Fa yu kan du disi?

²⁰ Tan krosibei na a gemeente. Te yu dopu, yu o kon na ini wan organisâsi pe ala sma e libi leki brada nanga sisa (1 Petr. 2:17). Den sma na ini a gemeente o tron yu famiri. Te yu e go na den konmakandra yu o tron moro bun mati fu den. Leisi Bijbel ibri dei èn denki fu san yu leisi (Ps. 1:1, 2). Te yu leisi wan pisi fu Bijbel, yu musu teki ten fu denki dipi fu san yu leisi. Dan den sani di yu leisi o naki yu ati. Yu musu „begi doronomo” (Mat. 26:41). Te yu e begi yu o kon krosibei na Yehovah. Boiti dati, ’tan suku a Kownukondre fosi’ (Mat. 6:33). Yu kan du disi te yu e poti a preikiwroko na a fosi presi na ini yu libi. Te yu e tan du a preikiwroko, yu bribi o tranga èn yu kan yepi sma fu kisi têgo libi.​—1 Tim. 4:16.

21. Fa yu libi o de te yu dopu?

²¹ Te yu bosroiti fu gi yusrefi abra na Gado èn dopu, dan dati na a moro prenspari bosroiti di yu o teki na ini yu libi. A tru taki te yu o dopu, yu o kisi problema. Ma disi musu tapu yu fu dopu? Nôno. Den problema di wi e kisi na ini na grontapu disi ’de fu wan syatu pisi ten nomo èn den no hebi’ (2 Kor. 4:17). Te yu dopu yu o abi wan bun libi nownow kaba èn yu o kisi „a trutru libi” na ini a ten di e kon (1 Tim. 6:19). Grantangi, denki bun èn begi fosi yu piki na aksi disi: „Mi klari kaba fu dopu?”