SEHLOOHO SE ITHUTOANG 11
Na U Malala-a-Laotsoe Hore U ka Kolobetsoa?
“Se lekanang le sena le sona joale sea le pholosa, e leng, kolobetso.”—1 PET. 3:21.
PINA EA 28 E-ba Motsoalle oa Jehova
SELELEKELA *
1. Pele motho a haha ntlo o lokela ho etsa’ng?
AK’U nahane ka motho ea entseng qeto ea hore o batla ho haha ntlo. Oa tseba hore na o batla ho haha ntlo e joang. Na e tla re ha a se a tloha feela a be a reka thepa ea mohaho ebe o qala ho haha? Che ha ho joalo. Pele a ka qala, ho na le ntho ea bohlokoa eo a lokelang ho e sheba, e leng hore na ntlo eno e tla mo jella chelete e kae. Hobane’ng? Hobane o lokela ho tseba hore na o na le chelete e lekaneng hore a ka haha ntlo eo a e qete. Haeba a bala litšenyehelo tsa ntlo eo pele, o tla atleha ho qeta ho e haha.
2. Ho latela Luka 14:27-30, u lokela ho nahana ka eng ka ho teba pele u kolobetsoa?
2 Na ho ba le kananelo le ho rata Jehova ho u susumelitse hore u batle ho kolobetsoa? Haeba ho joalo, u lokela ho etsa qeto e tšoanang le ea motho eane ea batlang ho haha ntlo. Ke hobane’ng ha re cho joalo? Nahana ka mantsoe a Jesu a hlahang ho Luka 14:27-30. (E bale.) Jesu o ile a hlalosa hore na ho bolela’ng ho ba morutuoa oa hae. Ha u batla ho ba molateli oa hae, u lokela ho mamella mathata le ho tela lintho tse ling tse itseng. (Luka 9:23-26; 12:51-53) Kahoo, pele u ka kolobetsoa u lokela ho nahana ka ho teba ka hore na u tla thulana le maemo afe. Ho etsa joalo ho tla u thusa hore u lule u tšepahala le ka mor’a hore u kolobetsoe.
3. Re tl’o hlahloba eng sehloohong see?
3 Na joale ho na le thuso ea hore u kolobetso empa ho na le mathata ao u tl’o tobana le ’ona le ho tela lintho tse ling tse itseng? E! ho na le thuso. Ho kolobetsoa ho etsa hore u fumane litlhohonolofatso tse ngata hona joale le nakong
e tlang. A re ke re hlahlobeng lipotso tsa bohlokoa tse buang ka kolobetso. Ka mor’a moo, u tla khona ho araba potso ena, “Na ke se ke loketse ho kolobetsoa?”U LOKELA HO TSEBA’NG KA BOINEHELO LE KOLOBETSO?
4. (a) Ho inehela ho Jehova ho bolela’ng? (b) Ho itatola hoo ho buuoang ka hona ho Matheu 16:24 ho bolela’ng?
4 Ho inehela ho bolela’ng? Pele u ka kolobetsoa u lokela ho inehela ho Jehova. Ha u inehela ho Jehova, u mo rapela ka pelo ea hao eohle u mo bolella hore u tla mo sebeletsa bophelo bohle ba hao. Ha u inehela ho Jehova, u itella ho mo sebeletsa. (Bala Matheu 16:24.) U se u le oa hae, e leng tlotla e kholo ka ho fetisisa. (Bar. 14:8) Ho tloha letsatsing leo ho ea pele, u mo bolella hore ntho e tla tla pele bophelong ba hao ke ho mo khahlisa, eseng ho ikhahlisa. Boinehelo ke kano kapa tšepiso e tiileng eo u e etsetsang Molimo. Jehova ha a re qobelle hore re etse kano e joalo. Empa haeba re e etsa, o lebeletse hore re e phelele.—Pes. 116:12, 14.
5. Ho inehela ho fapane joang le ho kolobetsoa?
5 Ho inehela ho fapane joang le ho kolobetsoa? Ha ho na motho ea tsebang ha u inehela ho Molimo. Athe ha u kolobetsoa teng, u bonoa ke batho ba bangata ’me hangata e ba likopanong. Ha u kolobetsoa, u bontša batho hore u inehetse ho Jehova. * Kahoo, kolobetso e etsa hore batho ba bone hore u rata Jehova ka pelo ea hao eohle, kelello ea hao eohle, moea oa hao oohle le ka matla a hao ’ohle le hore u entse qeto ea ho mo sebeletsa bophelo ba hao bohle.—Mar. 12:30.
6-7. Ho latela 1 Petrose 3:18-22, ke mabaka afe a mabeli a etsang hore re batle ho kolobetsoa?
6 Na ehlile hoa hlokeha hore motho a kolobetsoe? Nahana ka mantsoe ana a hlahang ho 1 Petrose 3:18-22. (E bale.) Areka e ile ea bontša batho hore Noe o ne a e-na le tumelo ho Molimo, ka tsela e tšoanang ha u kolobetsoa u bontša batho hore u inehetse ho Molimo. Empa na ehlile hoa hlokeha hore u kolobetsoe? E ho joalo. Petrose o ile a hlalosa hore na hobane’ng. Lebaka la pele, ke hobane ea u pholosa. Kolobetso e ka re pholosa haeba re bontša ka liketso hore re na le tumelo ho Jesu ebile rea lumela hore o re shoetse hape o “ka letsohong le letona la Molimo.”
7 Lebaka la bobeli, ke hore ha re kolobetsoa re ba le “letsoalo le letle.” Ha re inehela ho Molimo re bile re kolobetsoa, re ba le kamano e khethehileng le eena. Kaha re bakile ebile re na le tumelo sehlabelong sa Jesu, Molimo o re tšoaretse libe. Ka lebaka leo, re ba le letsoalo le letle ka pel’a Molimo.
8. Ke lebaka lefe le ka etsang hore u batle ho kolobetsoa?
8 Ke lebaka lefe le ka etsang hore u batle ho kolobetsoa? Ka mor’a hore u ithute Bibele ka hloko, u ile oa ithuta lintho tse ngata ka Jehova, hore na o rata’ng le mabaka ao a etsang lintho ka ’ona. Lintho tseo u ithutileng tsona li ile tsa u ama pelo ’me tsa u susumetsa hore u mo rate le ho feta. Ntho e ka sehloohong e ka etsang hore u batle ho kolobetsoa ke hobane u rata Jehova.
9. Ho kolobetsoa ka lebitso la Ntate, la Mora le la moea o halalelang ho bolela’ng joalokaha ho boletsoe ho Matheu 28:19, 20?
9 Lebaka le leng le ka etsang hore u batle ho kolobetsoa ke hobane u lumela lintho tseo u ithutileng tsona ka Bibeleng. Hlokomela hore na Jesu o ile a re’ng ha a fana ka Matheu 28:19, 20.) Jesu o ile a re ba batlang ho kolobetsoa, ba lokela ho kolobetsoa “ka lebitso la ntate, la Mora le la moea o halalelang.” Taba ee e bolela’ng? Ka pelo ea hao eohle, u lokela ho lumela seo Bibele e se buang ka Jehova, ka Jesu le ka moea o halalelang. Lithuto tsena ke tsa bohlokoa ’me li ka ama pelo ea hao. (Baheb. 4:12) A re ke re hlahlobeng tse ling tsa tsona.
taelo ea hore ho etsoe batho barutuoa. (Bala10-11. Ke lithuto life tse buang ka Ntate oa rona tseo u ithutileng tsona oa ba oa li lumela?
10 Ak’u nahane ha u ntse u ithuta ka Ntate oa rona. U ile oa ithuta hore lebitso la hae ke Jehova, oa ithuta hore ke “Ea Phahameng ka ho Fetisisa holim’a lefatše lohle” le hore ke eena a le mong feela Molimo oa ’nete. (Pes. 83:18; Esa. 37:16) Ke ’Mopi oa rona ebile “poloko ke ea [hae].” (Pes. 3:8; 36:9) O entse hore re pholohe sebeng le lefung hape o re file tšepo ea ho phela ka ho sa feleng. (Joh. 17:3) Boinehelo le kolobetso li tla u khetholla o le e mong oa Lipaki Tsa Jehova. (Esa. 43:10-12) U tla ba karolo ea lelapa le motlotlo hore ebe le bitsoa ka lebitso la Jehova le ho le tsebisa batho ba bang.—Pes. 86:12.
11 Ke tlotla e kholo ho utloisisa lithuto tsa Bibele tse buang ka Ntate oa rona. Ha u lumela lithuto tsena tsa bohlokoa, u tla ikutloa u batla ho inehela ho Jehova u be u kolobetsoe.
12-13. Ke lithuto life tseo u ithutileng tsona ka Mora oa ba oa li lumela?
12 U ile oa ikutloa joang ha u ithuta lithuto tse latelang ka Mora? Jesu ke eena motho oa bobeli oa bohlokoa ka ho fetisisa bokahohleng. O ile a fana ka bophelo ba hae e le thekollo. Haeba re bontša ka liketso hore re lumela thekollong, re ka tšoareloa libe tsa rona, ra haha setsoalle le Molimo ra ba ra fumana bophelo bo sa feleng. (Joh. 3:16) Jesu ke Moprista oa rona Ea Phahameng. O batla ho re thusa hore re rue molemo thekollong hape o boetse o batla hore re be metsoalle ea Molimo. (Baheb. 4:15; 7:24, 25) Joaloka Morena oa ’Muso oa Molimo, Jehova o tla mo sebelisa hore a halaletse lebitso la Hae, a tlose bokhopo ebe o tlisetsa batho litlhohonolofatso tsa ka ho sa feleng lefatšeng la Paradeise. (Mat. 6:9, 10; Tšen. 11:15) Jesu ke mohlala o re lokelang ho o latela. (1 Pet. 2:21) O ile a re behela mohlala ka hore bophelo bohle ba hae a etse thato ea Jehova.—Joh. 4:34.
13 Ha u lumela lithuto tsa Bibele tse buang ka Jesu, u tla khona ho mo rata. Lerato leo le tla u susumelletsa hore u etse thato ea Jehova joalokaha Jesu a ile a etsa. Kahoo, u tla susumelletseha ho re u inehele ho Jehova u be u kolobetsoe.
14-15. Ke lithuto life tseo u ithutileng tsona ka moea o halalelang oa ba oa li lumela?
14 U ile oa ikutloa joang ha u ithuta lintho tsee tse latelang ka moea o halalelang? Ho re ha se motho empa ka matla ao Molimo a a sebelisang. Jehova o ile a sebelisa moea o halalelang ho tataisa batho hore ba ngole Bibele hape moea o halalelang o re thusa hore re utloisise lintho tseo re li balang ka Bibeleng le ho li phetha. (Joh. 14:26; 2 Pet. 1:21) A sebelisa moea o halalelang, Jehova o re fa “matla a fetang se tloaelehileng.” (2 Bakor. 4:7) Moea o halalelang o re fa matla a hore re bolele Lentsoe la Molimo, re hlole liteko, re sebetsane le ho nyahama le hore re mamelle mathata. O re thusa hore re be le “litholoana tsa moea.” (Bagal. 5:22) Jehova o fana ka moea o halalelang ho batho ba mo tšepang le ba o kopang ka tieo.—Luka 11:13.
15 Hoa khothatsa ho tseba hore bahlanka ba Jehova ba ka itšetleha ka moea o halalelang hore ba khone ho mo sebeletsa. Ha u lumela lithuto tse buang ka moea o halalelang, u tla susumeletseha hore u inehele ho Molimo u be u kolobetsoe.
16. U ithutile’ng linthong tseo re buileng ka tsona?
16 Ho inehela ho Molimo le ho kolobetsoa ke qeto ea bohlokoa ka ho fetisisa eo u ka e etsang. Joalokaha re ithutile, u tlameha ho amohela maemo a thata ao u tla tobana le ’ona le ho tela lintho tse ngata. Empa litlhohonolofatso tseo u tla li fumana li ngata ho feta lintho tseo u tla li tela. Kolobetso e tla u pholosa le ho u thusa hore u be le letsoalo le letle. Lebaka la bohlokoa leo u lokelang ho kolobetsoa ka lona, ke hobane u rata Jehova. U boetse u lokela ho lumela linnete tseo u ithutileng tsona ka Ntate oa rona, Mora le ka moea o halalelang ka pelo ea hao eohle. Ka mor’a hore re hlahlobe lintlha tsee, u ka araba potso ee joang, “Na ke malala-a-laotse hore nka kolobetsoa?”
U LOKELA HO ETSA’NG PELE U KOLOBETSOA?
17. U lokela ho etsa’ng pele u kolobetsoa?
17 Haeba u se u ikutloa hore u se u loketse ho kolobetsoa, ha ho potang hore ho na le mehato e mengata eo u seng u e entse hore u be le kamano e ntle le Jehova. * Kaha u bala Bibele letsatsi le letsatsi, u se u tseba lintho tse ngata ka Jehova le Jesu. U se u e-na le tumelo. (Baheb. 11:6) U boetse u tšepa hore Jehova o tla phethahatsa litšepiso tsa hae hape oa lumela hore sehlabelo sa Jesu se tla u pholosa sebeng le lefung. U baketse libe tseo u ileng oa li etsa nakong e fetileng ebile u kopile Jehova hore a u tšoarele. U fetotse bophelo ba hao ’me u se u etsa lintho tse khahlisang Molimo. (Lik. 3:19) U labalabela ho bolella batho ba bang ka tumelo ea hao. U se u le mohoeletsi ea sa kolobetsoang ’me u se u qaleletse ho bolella batho molaetsa oa Bibele. (Mat. 24:14) Jehova o motlotlo ka uena hore ebe u se u nkile mehato ena ea bohlokoa. U entse hore a thabe haholo.—Liprov. 27:11.
18. Ke lintho life hape tseo u lokelang ho li etsa pele u kolobetsoa?
18 Ho boetse ho na le lintho tse seng kae tseo u lokelang ho li etsa pele u kolobetso. Joalokaha re boletse pejana, u lokela ho inehela ho Molimo. Mo rapele ka pelo ea hao eohle, u be u mo tšepise hore u tla etsa thato ea hae bophelo ba hao bohle. (1 Pet. 4:2) Joale u se u ka bolella mohokahanyi oa baholo hore u se u batla ho kolobetsoa. ’Me o tla kopa baholo ba bang hore ba teane le uena. U se ke oa ngongoreha haholo ha u tl’o kopana le bona. U hopole hore bara bana babo rona baa u tseba ebile baa u rata. Ba tla tšohla le uena lithuto tsa motheo tseo u ithutileng tsona. Ba batla ho bona hore na u utloisisa lithuto tseo le ho bona hore na u utloisisa bohlokoa ba ho inehela ho Jehova le ho kolobetsoa. Haeba ba hlokomela hore ehlile u malala-a-laotsoe, ba tla u bolella ’me u ka ’na oa kolobetsoa kopanong e tlang.
U LOKELA HO ETSA’NG KA MOR’A HORE U KOLOBETSOE?
19-20. U lokela ho etsa’ng ka mor’a hore u kolobetsoe, hona u ka ho etsa joang?
19 Ha u se u kolobelitsoe u lokela ho etsa’ng? * U hopole hore boinehelo ke kano eo u e entseng ’me Jehova o lebelletse hore u e phethe. Kahoo, ka mor’a hore u kolobetsoe, u lokela ho phelela kano eo u e entseng ha u ne u inehela ho Jehova. U ka etsa joalo joang?
20 Momahana le Bakreste-’moho le uena. Ha u se u kolobelitsoe, u karolo ea “mokhatlo oohle oa barab’abo rona.” (1 Pet. 2:17) Bara le barali beno ke lelapa la hao le lecha. Ha u ea libokeng kamehla, u tla matlafatsa setsoalle sa hao le bona. Bala Bibele ’me u nahanisise ka eona letsatsi le letsatsi. (Pes. 1:1, 2) Ka mor’a hore u bale karolo e itseng ea Bibele, ema hanyane ebe u nahana ka ho teba ka lintho tseo u qetang ho li bala. Lintho tseo li tla u ama pelo. “Rapela u sa khaotse.” (Mat. 26:41) Thapelo ea hao e tsoang pelong e tla etsa hore u be haufi le Jehova. Lula u batla “ ’muso pele.” (Mat. 6:33) U ka etsa joalo ka hore u nke mosebetsi oa ho bolela e le oona o tlang pele bophelong ba hao. Ha u bolella batho Bibele hangata, tumelo ea hao e tla matlafala hape u tla thusa batho ba bang hore ba be le tšepo ea ho phela ka ho sa feleng.—1 Tim. 4:16.
21. Kolobetso e tla u fa menyetla efe?
21 Ho etsa qeto ea ho inehela ho Jehova le ho kolobetsoa, ke ntho ea bohlokoa ka ho fetisisa bophelong ba hao eo u ka e etsang. Ke ’nete hore ho na le lintho tseo u lokelang ho li tela le mathata ao u tla tobana le ’ona. Empa na ho na le thuso? E e teng. Mathata ao u tla tobana le ’ona hona joale ke a “motsotsoana ebile a bobebe.” (2 Bakor. 4:17) Empa kolobetso e u fa monyetla oa hore u thabe hona joale le nakong e tlang. (1 Tim. 6:19) Joale, re kopa hore u nahane ka ho teba le hore u rapelle karabo ea potso ena, “Na ke malala-a-laotsoe hore nka kolobetsoa?”
PINA EA 50 Ke Tla U Sebeletsa ka Pelo Eohle
^ ser. 5 Na u ntse u nahana ka hore u tle u kolobetsoe? Haeba ho joalo, sehlooho sena se ngoletsoe ho u thusa. Re tl’o hlahloba lipotso tsa bohlokoa sehloohong sena. Likarabo tsa hao li tla u thusa ho bona hore na u se u le malala-a-laotsoe hore u ka kolobetsoa.
^ ser. 5 Sheba lebokose le reng “ Lipotso tse Peli Tseo U Tla li Araba ha u Kolobetsoa.”
^ ser. 19 Haeba ha u se qete libuka tse peli tseo re ithutang ka tsona e leng Re ka Ithuta Eng Bibeleng? le Le Ipoloke Leratong la Molimo, u lokela ho tsoela pele u li bala ho fihlela u li qeta.