1. Apa harusẹ̌ koatengu taumata mạeng i sie měkoạ bal᷊e?

KĚNANG pẹ̌tiněna piạ sěngkatau esẹ němutusẹ̌ gunang měkoạ bal᷊e. I sie masingkạ bal᷊e kerea sarung koatenge. Apa i sie langsung makoạ sarang toko měměli manga bahan, kụ langsung měkoạ bal᷊ene? Tantu tala. Těntal᷊ang bědang tawe měkoạ bal᷊e, piạ hal᷊ẹ̌ penting harusẹ̌ koatenge. Ene kai měndekeng biayane. Kawe nụe? Ual᷊ingu i sie harusẹ̌ masingkạ apa roite makatimu sarang bal᷊ene masueng koạe arau tala. Mạeng i sie měndekeng kal᷊imona biayane, i sie sarung makakoạ bal᷊ene sarang masue.

2. Tumuhụ Lukas 14:27-30, apa harusẹ̌ tiněnangu těntal᷊ang bědang tawe nibaptisẹ̌?

² Apa kakěndagẹ̌ dingangu pěngangarěganu si Yehuwa nakakoạ si kau nẹ̌tiněna gunang ibaptisẹ̌? Mạeng iya, i kau harusẹ̌ měndekeng biayane kere sěngkatau esẹ někoạ bal᷊e. Kawe nụe? Pẹ̌tiněna bawerang i Yesus su Lukas 14:27-30. (Basa.) Yesus nẹ̌bisara soal u apa mangal᷊ene makoạ murite. Gunang makoạ murite, i kitẹ harusẹ̌ sadia měnanggung ”biayane”, ene kai kasasigěsạ dingangu pengorbanan. (Luk. 9:23-26; 12:51-53) Hakị u ene, těntal᷊ang bědang tawe nibaptisẹ̌, i kau harusẹ̌ mẹ̌tiněna soal u apa sarung kahombangengu mạeng makoạ muriti Kristus. Mạeng měkoạ ene, i kau sarung limembong sadia gunang masatia mẹ̌tahamawu si Yehuwa su apang seng bọu nibaptisẹ̌.

3. Apa sarung ěndungang i kitẹ su pěngangěndungang ini?

³ Al᷊amatẹ̌ sarung kaěbakengu ual᷊ingu makoạ muriti Yesus ene limembong gěguwạ bọu pengorbanan sarung koatengu. Baptisan sarung makarěntang lawọ al᷊amatẹ̌ si kau, orasẹ̌ ini dingangu su tempo mahi. Su pěngangěndungang ini, i kitẹ sarung měngěndung piram baụ kakiwal᷊o penting soal u baptisan. Sasimbahe sarung makatul᷊ung si kau sumimbahẹ̌ kakiwal᷊o, ”Apa iạ seng sadia ibaptisẹ̌?”

4. (a) Apa mangal᷊ene mẹ̌diandi měgělị watangeng i kitẹ si Yehuwa? (b) Apa mangal᷊ene bawera ’mẹ̌timbul᷊eng batangeng’, kere nisěbạ su Matius 16:24?

⁴ Apa mangal᷊ene mẹ̌diandi měgělị watangeng i kitẹ si Yehuwa? Těntal᷊ang bědang tawe nibaptisẹ̌, i kau harusẹ̌ měgělị watangengu si Yehuwa. Kerea carane? I kau harusẹ̌ mẹ̌doa dingangu kaguwạu naung kụ měhabarẹ̌ si Yehuwa i kau mapulu měpakẹ pěbawiahu gunang měkoạ kapulu-Ne sarang karěngụe. Su tempong i kau měgělị watangengu si Yehuwa, i kau ’mẹ̌timbul᷊eng batangengu’. (Basa Matius 16:24.) Ene mangal᷊ene i kau nẹ̌diandi si Yehuwa měnětạ tempo ene, hal᷊ẹ̌ kahumotongange si kau ene kai mẹ̌tahamawu si Sie, bal᷊inẹ makal᷊uasẹ̌ watangeng hala. I kau seng nakoạ tataghuaneng i Yehuwa, kụ ene kai kehormatan luar biasa. (Rm. 14:8) Mẹ̌diandi měgělị watangengu ene kai diandinu su Mawu, kụ ene sěbạe serius. Yehuwa tawe měnihasa si kitẹ gunang mẹ̌diandi kerene. Katewe, mạeng i kitẹ seng nẹ̌diandi, Yehuwa mapulu i kitẹ měkoạ apa seng nirianding i kitẹ.​—Mz. 116:12, 14.

5. Kerea mẹ̌diandi měgělị watangeng piạ sěmpụe dingangu baptisan?

⁵ Kerea mẹ̌diandi měgělị watangeng piạ sěmpụe dingangu baptisan? Tawẹ apa taumata nakasilo su tempong i kau nẹ̌diandi něgělị watangengu si Yehuwa. Katewe, su tempong i kau nibaptisẹ̌, piạ lawọ taumata nakasilo, ual᷊ingu ene biasane kẹ̌koateng su kebaktian. Su tempong nibaptisẹ̌, i kau něnodẹ su taumata wal᷊inẹ i kau seng nẹ̌diandi něgělị watangengu si Yehuwa. * Hakị u ene, taumata wal᷊inẹ sarung makasingkạ i kau kiměndagẹ̌ si Yehuwa dingangu kaguwạu naung, pěbawiahẹ̌, tiněna, lai katatoghasẹ̌ kụ i kau mapulu mẹ̌tahamawu si Sie sarang karěngụe.​—Mrk. 12:30.

6-7. Tumuhụ 1 Petrus 3:18-22, apa darua alasang i kitẹ harusẹ̌ ibaptisẹ̌?

⁶ Apa i kitẹ memang harusẹ̌ ibaptisẹ̌? Pẹ̌tiněna bawera su 1 Petrus 3:18-22. (Basa.) Bahtera kai bukti mal᷊ahẹ i Noakẹ̌ mangimang su Mawu. Kerene lai, su tempong i kau nibaptisẹ̌, ene nakoạ bukti mal᷊ahẹ i kau seng nẹ̌diandi něgělị watangengu si Yehuwa. Katewe, apa i kitẹ memang harusẹ̌ ibaptisẹ̌? Iya. Rasul Petrus naul᷊ị alasange. Humotong, ene ”makasal᷊amatẹ̌ si kau”. Baptisan botonge makasal᷊amatẹ̌ mạeng i kitẹ měnodẹ i kitẹ mangimang si Yesus dingangu mangimang i sie seng nate gunang i kitẹ, saụ nipěbiahẹ̌ sarang sorga, dingangu orasẹ̌ ini ene ”su sěmběka koanengu Mawu”.

⁷ Karuane, mạeng nibaptisẹ̌, i kitẹ sarung pia ”hati nurani burěsi”. Su tempong i kitẹ nẹ̌diandi něgělị watangeng su Mawu kụ nibaptisẹ̌, i kitẹ nakoạ limembong marani dingang’E. Ual᷊ingu kahěngang-hěngang nẹ̌tobatẹ̌ dingangu mangimang su tatěbusẹ̌, Mawu něngampung dosang i kitẹ. Hakị u ene, i kitẹ botonge piạ ”hati nurani burěsi” su těngong Mawu.

8. Apa harusẹ̌ makoạ alasang kahumotongange i kau mapulu ibaptisẹ̌?

⁸ Apa harusẹ̌ makoạ alasang kahumotongange i kau mapulu ibaptisẹ̌? Su apang bọu něngěndung Alkitapẹ̌ pakapia, i kau seng nakasingkạ lawọ soal i Yehuwa, contone soal u manga sipat’E dingangu cara i Sie mẹ̌tiněna. Kěbị apa seng niěndungangu nakakanoạ naungu dingangu nakakoạ si kau sěbạe makěndagẹ̌ si Yehuwa. Kakěndagu si Yehuwa harusẹ̌ makoạ alasang kahumotongange i kau mapulu ibaptisẹ̌.

9. Apa mangal᷊ene ibaptisẹ̌ su ral᷊ungu areng i Amang dingangu Ahusẹ̌ dingangu rohkẹ̌ masusi, kere niul᷊ị su Matius 28:19, 20?

⁹ Alasang wal᷊inẹ botonge makakoạ si kau mapulu ibaptisẹ̌ ene kai ual᷊ingu i kau mangimang su těntirong Alkitapẹ̌ seng niěndungangu. Pěmanda apa niul᷊ị i Yesus su tempong i sie nẹ̌parenta si kitẹ gunang měkoạ muritẹ̌. (Basa Matius 28:19, 20.) Tumuhụ si Yesus, i sire apang ibaptisẹ̌ harusẹ̌ ibaptisẹ̌ ”su ral᷊ungu areng i Amang dingangu Ahusẹ̌ dingangu rohkẹ̌ masusi”. Apa mangal᷊ene bawerang i Yesus? I kau  harusẹ̌ kahěngang-hěngang mangimang su katěngadu Alkitapẹ̌ soal i Yehuwa, i Yesus, dingangu rohkẹ̌ masusi. Kěbị katěngadẹ̌ ene matoghasẹ̌ dingangu botonge kahěngang-hěngang makakanoạ naungu. (Ibr. 4:12) Mahịe měngěndung piram baụ katěngadẹ̌ ene.

10-11. Apa katěngadẹ̌ soal i Yehuwa seng niěndungangu dingangu pẹ̌pangimangengu?

¹⁰ Kěnang saụ pẹ̌tiněna tempong i kau něngěndung manga katěngadẹ̌ ini soal i Amang: ’Areng’E Yehuwa’, i Sie ”Karangetange su patikụ dunia”, dingangu i Sie hala ”Mawu nihino”. (Mz. 83:18; Yes. 37:16) I Sie Měndariadi dingangu Měnanal᷊amati kitẹ. (Mz. 3:8; 36:9) I Sie seng něngatorẹ̌ tadeạu i kitẹ botonge ipakawebasẹ̌ bọu dosa dingangu papate, kụ i Sie lai něgělị si kitẹ pělaharapẹ̌ gunang měbiahẹ̌ kěkalẹ̌. (Yoh. 17:3) Mạeng seng bọu nẹ̌diandi něgělị watangengu si Yehuwa kụ nibaptisẹ̌, i kau sarung makoạ sěngkatau Sahiding Yehuwa. (Yes. 43:10-12) I kau sarung makoạ bageang bọu keluarga gěguwạ měnaněmbah si Yehuwa dingangu mal᷊uasẹ̌ měbẹ̌bawa arengu Mawu lai mělẹ̌habarẹ̌ areng ene su taumata wal᷊inẹ.​—Mz. 86:12.

¹¹ I kitẹ tantu sěbạe makitarimakasẹ ual᷊ingu botonge nakaěna těntirong Alkitapẹ̌ soal i Amang i kitẹ, Yehuwa. Ini kahěngang-hěngang sěmbaụ kehormatan gěguwạ! Mạeng mangimang kěbị katěngadẹ̌ ene, i kau sarung mawahangsang gunang měgělị watangengu si Yehuwa kụ ibaptisẹ̌.

12-13. Manga katěngadẹ̌ apa soal u Ahusẹ̌ seng niěndungangu dingangu pẹ̌pangimangengu?

¹² Kerea pěndangu su tempong makasingkạ manga katěngadẹ̌ soal u Ahusu Mawu ini? Yesus kai pribadi karuane kaguwạkenge su alam semesta. I sie kai měnaněbusi kitẹ. I sie něgělị pěbawiahe gunang i kitẹ. Mạeng i kitẹ mangimang su tatěbusi Yesus kụ měnodẹ ene bọu kakanoạ, manga dosang i kitẹ sarung ampungang. Bọu ene, i kitẹ sarung mědal᷊ahapị dingangu Mawu kụ pul᷊ise makaěbạ pěbawiahẹ̌ kěkalẹ̌. (Yoh. 3:16) Yesus kai Imang Mawantugi kitẹ. I sie mapulu mẹ̌tul᷊ung si kitẹ makaěbạ gunane bọu tatěbusẹ̌ lai piạ pẹ̌dal᷊ahapị mapia dingangu Mawu. (Ibr. 4:15; 7:24, 25) Yesus kai Datung Kararatuangu Mawu. Lumiung i sie, Yehuwa sarung mapakasusi areng’E, měngěmụ karal᷊akisẹ̌, dingangu mapakarěntang lawọ al᷊amatẹ̌ sarang karěngụe su Firdaus. (Mat. 6:9, 10; Why. 11:15) Yesus kai pẹ̌tatěnoěng i kitẹ, kụ harusẹ̌ tol᷊eng i kitẹ. (1 Ptr. 2:21) I sie něpakẹ pěbawiahe gunang měkoạ kapulung Mawu, kụ i kitẹ mapulu mẹ̌těno si sie.​—Yoh. 4:34.

¹³ Mạeng i kau měnarimạ apa nitěntirong Alkitapẹ̌ soal i Yesus, i kau sarung kuměndagẹ̌ su Ahusu Mawu. Kakěndagu ene, makakoạ si kau mapulu mẹ̌těno si Yesus, kụ měpakẹ pěbawiahu gunang měkoạ kapulung Mawu. Hakị u ene, i kau nawahangsang gunang mẹ̌diandi měgělị watangengu si Yehuwa kụ ibaptisẹ̌.

14-15. Apa katěngadẹ̌ soal u rohkẹ̌ masusi seng niěndungangu dingangu pẹ̌pangimangengu?

¹⁴ Kerea pěndangu su tempong makasingkạ manga katěngadẹ̌ soal u rohkẹ̌ masusi ini? Rohkẹ̌ masusi bal᷊inẹ makhluk roh, katewe katatoghasu Mawu. Yehuwa něpakẹ rohkẹ̌ masusi gunang měngahạ manga měmamohẹ Alkitapẹ̌. Rohkẹ̌ masusi lai makatul᷊ung si kitẹ makaěna dingangu měkoạ apa seng niwasang i kitẹ su Alkitapẹ̌. (Yoh. 14:26; 2 Ptr. 1:21) Bọu rohkẹ̌ masusi, Yehuwa něgělị si kitẹ ”katatoghasẹ̌ sěbạe luar biasa”. (2 Kor. 4:7) Rohkẹ̌ masusi makakoạ si kitẹ botonge měhabarẹ̌ habarẹ̌ mapia, mẹ̌těngkarau bọu sasal᷊ukạ, tumatěngo pěndang nakadodọ naung, dingangu tumatěngo kasasigěsạ. Rohkẹ̌ masusi lai makatul᷊ung si kitẹ měnodẹ manga sipatẹ̌ mapaelẹ̌ hasilu ”buang rohkẹ̌ masusi”. (Gal. 5:22) Mawu sarung měgělị rohkẹ̌’E masusi su taumata apang kahěngang-hěngang mědẹ̌dorong ene dingangu mangimang si Sie.​—Luk. 11:13.

¹⁵ Kěbị ělang i Yehuwa botonge mangimang rohkẹ̌ masusi sarung mẹ̌tul᷊ung si sire tadeạu  tatapẹ̌ masatia mẹ̌tahamawu su Mawu. Ini sěbạe nakatoghasẹ̌ si sire! Mạeng i kau mangimang su kěbị katěngadẹ̌ seng niěndungangu soal u rohkẹ̌ masusi, i kau sarung mawahangsang gunang měgělị pěbawiahu si Yehuwa kụ ibaptisẹ̌.

16. Manga katěngadẹ̌ apa seng niěndungang i kitẹ?

¹⁶ Putusangu gunang měgělị watangengu si Yehuwa kụ ibaptisẹ̌ kai putusang sěbạe penting. Kere seng niěndungang i kitẹ, i kau harusẹ̌ sadia tumatěngo sigěsạ dingangu měkoạ pengorbanan. Katewe, al᷊amatẹ̌ sarung tarimakengu ene limembong mal᷊awọ sul᷊ungu pengorbanan sarung koatengu. Ual᷊ingu nibaptisẹ̌, i kau botonge ipakasal᷊amatẹ̌ dingangu piạ hati nurani burěsi su těngong Mawu. Kakěndagu su Mawu harusẹ̌ makoạ alasang kahumotongange i kau ibaptisẹ̌. I kau lai harusẹ̌ kahěngang-hěngang mangimang katěngadẹ̌ soal i Amang, Ahusẹ̌, dingangu rohkẹ̌ masusi. Su apang bọu něngěndung manga katěngadẹ̌ nilahẹ kanini, apa i kau nẹ̌pěndang seng sadia ibaptisẹ̌?

17. Těntal᷊ang bědang tawe nibaptisẹ̌, manga hal᷊ẹ̌ apa harusẹ̌ koatengu?

¹⁷ Mạeng i kau nẹ̌pěndang seng sadia ibaptisẹ̌, i kau tantu seng někoạ lawọ hal᷊ẹ̌ tadeạu botonge mědal᷊ahapị mapia dingangi Yehuwa. * Manga hal᷊ẹ̌ apa seng nikoạu? Ual᷊ingu marading něngěndung Alkitapẹ̌, i kau seng nakasingkạ mal᷊awọ soal i Yehuwa dingangi Yesus. I kau lai piạ pangangimang matoghasẹ̌. (Ibr. 11:6) I kau kahěngang-hěngang mangimang dianding Yehuwa su Alkitapẹ̌, kụ i kau mangimang tatěbusi Yesus sarung makasal᷊amatẹ̌ si kau bọu dosa dingangu papate. I kau seng nẹ̌tobatẹ̌ bọu manga dosanu. I kau sěbạe nẹ̌sasěsilẹ̌ kụ seng nẹ̌dorong ampung si Yehuwa. I kau seng němal᷊ui pěbawiahu. I kau seng něngědo někoạ manga barang dal᷊akị kẹ̌koatengu kangerẹ, kụ orasẹ̌ ini seng něbiahẹ̌ dingangu cara makal᷊uasẹ̌ Mawu. (Kis. 3:19) I kau lai sěbạe mapulu měhabarẹ̌ su taumata wal᷊inẹ soal u apa pẹ̌pangimangengu. I kau seng memenuhi syarat gunang makoạ penyiar bědang tawe nibaptisẹ̌ kụ něnětạ timol᷊e něnginjilẹ̌ dingangu sidang. (Mat. 24:14) Yehuwa sěbạe mal᷊uasẹ̌ ual᷊ingu i kau seng někoạ kěbị ene. I kau sěbạe nakal᷊uasẹ̌ naung’E.​—Amsal 27:11.

18. Těntal᷊ang bědang tawe nibaptisẹ̌, apa lai harusẹ̌ koatengu?

¹⁸ Tadeạu botonge ibaptisẹ̌, piạ lai piram baụ hal᷊ẹ̌ bal᷊inẹ harusẹ̌ koatengu. Kere seng niěndungang i kitẹ, i kau harusẹ̌ mẹ̌diandi měgělị watangengu si Yehuwa. Pẹ̌doạe dingangu kaguwạu naung si Yehuwa. Su daroa ene, pẹ̌diandịe si Yehuwa i kau sarung měpakẹ pěbawiahu gunang měkoạ kapulu-Ne. (1 Ptr. 4:2) Bọu ene, i kau botonge maul᷊ị su koordinator badan penatua soal u kapulunu gunang ibaptisẹ̌. I sie sarung měngatorẹ̌ tadeạu pirang katau penatua mẹ̌bisara dingangu. I kau tawe harusẹ̌ matakụ mẹ̌sombang dingangi sire. Saudara-saudara mapia ini tantu seng masingkạ dingangu makěndagẹ̌ si kau. I sire sarung mẹ̌bisara dingangu soal u piram baụ těntiro dasarẹ̌ bọu Alkitapẹ̌, kụ seng niěndungangu. I sire mapulu měmarikěsa apa i kau  nakaěna manga těntiro ene dingangu masingkạ mẹ̌diandi měgělị watangengu si Yehuwa kụ ibaptisẹ̌ ene kai hal᷊ẹ̌ sěbạe serius. Mạeng i sire setuju i kau seng sadia ibaptisẹ̌, i sire sarung maul᷊ị i kau botonge ibaptisẹ̌ su kebaktian tuhụe.

19-20. Apa harusẹ̌ koatengu su apang bọu nibaptisẹ̌, kụ kerea i kau měkoạ ene?

¹⁹ Su apang bọu nibaptisẹ̌, apa harusẹ̌ koatengu? * Turusẹ̌e pẹ̌tahěndung su tempong něgělị pěbawiahu si Yehuwa, i kau nẹ̌diandi si Sie, kụ i Sie mapulu i kau měkoạ diandi ene. Hakị u ene su apang i kau bọu nibaptisẹ̌, i kau harusẹ̌ měnodẹ i kau kahěngang-hěngang měpakẹ pěbawiahu gunang měkoạ kapulung Yehuwa. Kerea carane?

²⁰ Tatapẹ̌e marani dingangu sidang. Ual᷊ingu i kau seng nibaptisẹ̌, i kau seng nakoạ bageang bọu ”persekutuan anạu sěmbaụ”. (1 Ptr. 2:17, catatan kaki) Anạu sěmbaụ su sidang ene kai keluarga rohaning i kitẹ. Hakị u ene, pakarading měngibadah tadeạu pẹ̌dal᷊ahapịu dingangu anạu sěmbaụ sarung matoghasẹ̌. I kau lai harusẹ̌ mẹ̌basa Alkitapẹ̌ dingangu mẹ̌tiněna ene ěllo-ěllo. (Mz. 1:1, 2) Sabang mẹ̌basa Alkitapẹ̌, pěnadia tempo gunang kahěngang-hěngang mẹ̌tiněna apa seng niwasanu. Hasile, Hengetangu Mawu makawahangsang si kau. Bọu ene, ”turusẹ̌e pẹ̌doa”. (Mat. 26:41) Daroa bọu naung, sarung makakoạ si kau limembong marani dingangi Yehuwa. Kụ, ”Deạ kal᷊imona Kararatuang.” (Mat. 6:33) Koạ hal᷊ẹ̌ měnginjilẹ̌ kahumotongange su pěbawiahu. Mạeng i kau masau měnginjilẹ̌, i kau sarung měndiagạ pangangimangu tatapẹ̌ matoghasẹ̌, kụ i kau aramanung sarung makatul᷊ung taumata wal᷊inẹ makaěbạ pěbawiahẹ̌ kěkalẹ̌.​—1 Tim. 4:16.

21. Su apang seng nibaptisẹ̌, pěbawiahẹ̌ kerea sarung kaěbạkengu?

²¹ Putusang gunang měgělị watangengu si Yehuwa kụ ibaptisẹ̌ ene kai putusang sěbạe gěguwạ su pěbawiahu. Tantu, sarung piạ kasasigěsạ sarung tatěngongu. Katewe, al᷊amatẹ̌ sarung kaěbakengu limembong mal᷊awọ. Maning apa kasasigěsạ nikahombangengu su dunia ini, ene kětạeng ”sementara dingangu mahaěng”. (2 Kor. 4:17) Katewe su apang seng bọu nibaptisẹ̌, i kau sarung piạ pěbawiahẹ̌ mal᷊uasẹ̌ orasẹ̌ ini dingangu makaěbạ ”pěbawiahẹ̌ sěběnarẹ̌e” su ěllo mahi. (1 Tim. 6:19) Hakị u ene, pẹ̌doae si Yehuwa, kụ pẹ̌tiněna pakapia kakiwal᷊o ini: ”Apa iạ seng sadia ibaptisẹ̌?”