1. Baibain ema ida presiza halo saida antes atu harii uma ida?

IMAJINA toʼok ema ida deside atu harii uma. Nia hatene uma hanesan saida mak nia hakarak harii. Nia sei bá kedas loja no sosa sasán oioin no hahú harii uma neʼe ka lae? Lae. Antes nia komesa, nia presiza halo buat ida neʼebé importante tebes, neʼe mak sura uluk osan hira mak nia presiza. Tanbasá? Tanba nia presiza hatene se ninia osan toʼo atu harii hotu uma neʼe. Se nia sura nanis osan neʼebé nia presiza, karik nia sei harii uma foun neʼe toʼo hotu.

2. Tuir Lucas 14:27-30, Ita presiza hanoin didiʼak kona-ba saida antes hetan batizmu?

² Ita-nia domin no agradese ba Jeová book ona Ita atu hanoin kona-ba batizmu ka lae? Se nuneʼe, Ita presiza halo desizaun hanesan mane ida neʼebé hakarak atu harii uma. Tanbasá? Hanoin toʼok Jesus nia liafuan iha Lucas 14:27-30. (Lee.) Jesus koʼalia kona-ba oinsá atu sai ninia dixípulu. Atu sai dixípulu, ita presiza prontu atu tahan susar balu no mós halo sakrifísiu balu. (Lc 9:23-26; 12:51-53) Tan neʼe antes batizmu, Ita tenke hanoin didiʼak kona-ba buat neʼebé Ita sei hasoru kuandu sai dixípulu. Tuirmai bainhira Ita hetan ona batizmu, Ita sei prontu atu kontinua serbí Maromak ho laran-metin.

3. Ita sei koʼalia kona-ba saida iha lisaun neʼe?

³ Hetan batizmu hodi sai Jesus nia dixípulu mak folin-boot liu se kompara ho susar neʼebé ita hasoru no mós ita-nia sakrifísiu. Batizmu loke dalan ba ita atu simu bensaun agora no iha futuru. Mai ita koʼalia kona-ba pergunta importante balu kona-ba batizmu. Neʼe sei ajuda Ita hatán ba pergunta: “Haʼu prontu ona atu hetan batizmu ka lae?”

4. (a) Saida mak dedikasaun? (b) Liafuan “nega” ita-nia an iha Mateus 16:24 katak sá?

⁴ Saida mak dedikasaun? Antes Ita bele hetan batizmu, Ita presiza dedika Ita-nia an ba Maromak. Ita dedika an ba Jeová hodi halo orasaun ba nia husi laran no fó-hatene nia katak Ita sei uza Ita-nia moris atu serbí nia ba nafatin. Bainhira Ita dedika an ba Maromak, Ita “nega” Ita-nia an rasik. (Lee Mateus 16:24.) Ita sai Jeová nian, no neʼe mak priviléjiu neʼebé boot. (Rom 14:8) Ita fó-hatene nia katak husi tempu neʼe ba oin, Ita sei fokus liu atu serbí nia no la buka ksolok ba Ita-nia an rasik. Ita-nia dedikasaun mak juramentu ida ka promesa sériu neʼebé Ita fó sai ba Maromak. Jeová la obriga ita atu halo juramentu neʼe. Maibé bainhira ita halo nuneʼe, nia hakarak ita atu kumpre.—Sal 116:12, 14.

5. Saida mak la hanesan entre dedikasaun no batizmu?

⁵ Saida mak la hanesan entre dedikasaun no batizmu? Ita-nia dedikasaun mak privadu no ema la hatene bainhira Ita dedika Ita-nia an ba Jeová. Maibé Ita hetan batizmu iha ema barak nia oin, baibain iha reuniaun boot sira. Bainhira Ita hetan batizmu, Ita hatudu ba ema seluk katak Ita dedika an ona ba Jeová. * Tan neʼe Ita-nia batizmu hatudu sai ba ema seluk katak Ita hadomi Jeová ho Ita-nia laran tomak, moris tomak, neon tomak no kbiit tomak, no Ita deside ona atu serbí nia ba nafatin.—Mc 12:30.

6-7. Tuir 1 Pedro 3:18-22, tanbasá ita presiza hetan batizmu?

⁶ Ita presiza hetan batizmu ka lae? Hanoin kona-ba liafuan sira neʼebé hakerek iha 1 Pedro 3:18-22. (Lee.) Arka neʼebé Noé harii hatudu ba ema seluk katak Noé tau fiar ba Maromak, nuneʼe mós Ita-nia batizmu hatudu ba ema seluk katak Ita dedika an ona ba Jeová. Maibé ita presiza hetan batizmu ka lae? Sin. Apóstolu Pedro esplika tanbasá. Primeiru, batizmu “salva” ita. Batizmu bele salva ita se ita hatudu liuhusi ita-nia hahalok katak ita tau fiar ba Jesus no mós fiar katak nia mate ba ita, nia moris-hiʼas ona iha lalehan, no mós agora nia iha “Maromak nia liman sorin loos”.

⁷ Segundu, bainhira batizmu, ita hetan “konxiénsia neʼebé diʼak”. Bainhira ita dedika an ba Maromak no hetan batizmu, ita komesa iha relasaun espesiál ho nia. Maromak fó perdua ba ita-nia sala tanba ita arrepende an husi laran no tau fiar ba Jesus nia sakrifísiu. Tan neʼe ita bele iha konxiénsia neʼebé diʼak.

8. Saida mak razaun importante liu atu hetan batizmu?

⁸ Saida mak razaun importante liu atu hetan batizmu? Hodi estuda didiʼak Bíblia, Ita aprende buat barak kona-ba Jeová, hanesan ninia hahalok no dalan sira. Buat neʼebé Ita aprende kona-ba nia book Ita-nia laran no halo Ita hadomi tebes nia. Ita-nia domin ba Jeová mak razaun importante liu atu hetan batizmu.

9. Hanesan temi iha Mateus 28:19, 20, hetan batizmu hodi Aman, Oan, no espíritu santu nia naran katak sá?

⁹ Razaun seluk atu hetan batizmu mak Ita aprende ona lia-loos husi Bíblia no Ita fiar ida-neʼe. Hanoin toʼok Jesus nia liafuan bainhira nia fó mandamentu atu hanorin ema sai dixípulu. (Lee Mateus 28:19, 20.) Jesus dehan katak ema tenke hetan batizmu “hodi Aman, Oan no espíritu santu nia naran”. Neʼe katak  sá? Neʼe katak Ita tenke fiar ho laran tomak lia-loos husi Bíblia kona-ba Jeová, ninia Oan-Mane Jesus, no espíritu santu. Lia-loos sira-neʼe importante tebes no bele book duni Ita-nia laran. (Ebr 4:12) Mai ita koʼalia fali lia-loos sira-neʼe balu.

10-11. Lia-loos saida mak Ita aprende no fiar ona kona-ba Aman?

¹⁰ Hanoin fali tempu neʼebé Ita foin aprende lia-loos sira tuirmai neʼe kona-ba Aman: Ninia ‘naran mak Jeová’, nia mak “Maromak neʼebé Aas Liu Hotu iha mundu tomak”, no nia deʼit mak “Maromak neʼebé loos”. (Sal 83:18; Isa 37:16) Nia mak ita-nia Kriadór, no ‘salvasaun mai husi nia’. (Sal 3:8; 36:9) Nia halo ona arranju atu salva ita husi sala no mate no fó ona esperansa ba ita atu moris ba nafatin. (João 17:3) Ita-nia dedikasaun no batizmu sei hatudu katak Ita mak Testemuña ba Jeová. (Isa 43:10-12) Ita sei sai parte ba família iha mundu tomak neʼebé adora Jeová no sente orgullu atu lori Jeová nia naran no haklaken kona-ba naran neʼe.—Sal 86:12.

¹¹ Ita iha priviléjiu boot atu hatene Bíblia nia hanorin kona-ba Aman. Bainhira Ita fiar lia-loos folin-boot sira-neʼe, neʼe sei book Ita atu dedika an ba Jeová no hetan batizmu.

12-13. Lia-loos saida mak Ita aprende no fiar ona kona-ba Oan?

¹² Ita sente oinsá bainhira Ita aprende lia-loos sira tuirmai neʼe kona-ba Oan? Jesus iha pozisaun segundu iha universu. Nia prontu atu fó ninia moris nuʼudar sakrifísiu. Bainhira ita hatudu liuhusi ita-nia hahalok katak ita fiar ba Jesus nia sakrifísiu, ita bele hetan perdua ba ita-nia sala, haburas relasaun diʼak ho Maromak, no hetan moris rohan-laek. (João 3:16) Jesus mak ita-nia Amlulik Boot. Nia hakarak ajuda ita atu hetan benefísiu husi ninia sakrifísiu no iha relasaun diʼak ho Maromak. (Ebr 4:15; 7:24, 25) Tanba Jesus mak Liurai ba Maromak nia Ukun, Jeová sei uza nia atu halo santu Jeová nia naran, halakon ema aat hotu, no lori bensaun ba nafatin iha Paraízu. (Mt 6:9, 10; Apok 11:15) Jesus husik ezemplu ba ita atu halo tuir. (1 Ped 2:21) Nia uza ninia moris atu halo Maromak nia hakarak no neʼe sai nuʼudar ezemplu ba ita.—João 4:34.

¹³ Bainhira Ita fiar lia-loos husi Bíblia kona-ba Jesus, Ita sei hadomi liután Maromak nia Oan doben. Domin neʼe sei book Ita atu uza Ita-nia moris hodi halo Maromak nia hakarak hanesan Jesus halo. Rezultadu mak domin neʼe sei book Ita atu dedika an ba Jeová no hetan batizmu.

14-15. Lia-loos saida mak Ita aprende no fiar ona kona-ba espíritu santu?

¹⁴ Ita sente oinsá bainhira aprende lia-loos sira tuirmai neʼe kona-ba espíritu santu? Espíritu santu la hanesan ho anju, maibé neʼe mak Maromak nia forsa. Jeová uza ninia espíritu santu atu book ema hakerek Bíblia, no espíritu santu mós ajuda ita atu komprende no aplika buat neʼebé ita aprende husi Bíblia. (João 14:26; 2 Ped 1:21) Liuhusi ninia espíritu santu, Jeová fó ita “kbiit neʼebé la hanesan baibain”. (2 Kor 4:7) Espíritu santu fó kbiit mai ita atu haklaken liafuan diʼak, kontra hasoru tentasaun, tahan hasoru laran-taridu no susar sira. Espíritu santu ajuda ita atu hatudu hahalok furak sira “neʼebé mai husi Maromak nia espíritu”. (Gal 5:22) Maromak fó ninia espíritu santu ba ema hotu neʼebé tau fiar ba nia no husu ba nia ho laran.—Lc 11:13.

 ¹⁵ Ita sente kontente no kmaan duni hodi hatene katak Jeová nia atan hotu bele sadere ba espíritu santu nia ajuda hodi serbí Jeová. Bainhira Ita fiar lia-loos sira neʼebé Ita aprende kona-ba espíritu santu, neʼe sei book Ita atu dedika an ba Maromak no hetan batizmu.

16. Saida mak ita aprende ona iha lisaun neʼe?

¹⁶ Ita-nia desizaun atu dedika an ba Jeová no hetan batizmu mak importante tebes. Hanesan ita aprende ona, Ita tenke prontu atu tahan susar sira no halo sakrifísiu. Maibé bensaun mak boot tebes. Batizmu bele salva Ita no Ita bele hetan konxiénsia neʼebé diʼak iha Maromak nia oin. Ita-nia domin ba Jeová mak razaun importante liu atu hetan batizmu. Ita mós tenke fiar ho laran tomak lia-loos sira neʼebé Ita aprende ona kona-ba Aman, Oan, no espíritu santu. Depois aprende tiha informasaun sira iha lisaun neʼe, oinsá mak Ita hatán ba pergunta: “Haʼu prontu ona atu hetan batizmu ka lae?”

17. Saida deʼit mak ita presiza halo antes atu hetan batizmu?

¹⁷ Se Ita sente katak Ita prontu ona atu hetan batizmu, karik Ita halo ona buat oioin atu iha relasaun diʼak ho Jeová. * Tanba Ita estuda Bíblia beibeik, Ita komprende ona buat barak kona-ba Jeová no Jesus. Ita hametin ona Ita-nia fiar. (Ebr 11:6) Ita fiar metin ba Jeová nia promesa sira iha Bíblia, no Ita fiar katak Jesus nia sakrifísiu bele salva Ita husi sala no mate. Ita arrepende an ona husi Ita-nia sala sira, neʼe katak Ita sente triste kona-ba sala neʼebé Ita halo ona, no Ita mós husu ona Jeová atu perdua Ita. Ita troka ona Ita-nia moris, neʼe katak Ita husik tiha Ita-nia moris uluk nian no komesa halaʼo moris iha dalan neʼebé halo Maromak kontente. (Após 3:19) Ita mós laran-manas atu fó-hatene ema seluk kona-ba Ita-nia fiar. Ita sai ona haklaken-naʼin neʼebé seidauk hetan batizmu no komesa haklaken hamutuk ho kongregasaun. (Mt 24:14) Jeová sente orgullu tebes ho Ita tanba Ita halo buat sira-neʼe. Ita halo duni ninia laran kontente.—Prov 27:11.

18. Saida tan mak Ita presiza halo antes atu hetan batizmu?

¹⁸ Ita presiza halo buat balu tan antes hetan batizmu. Ita aprende ona katak Ita presiza dedika an ba Maromak. Hakbesik ba Maromak hodi halo orasaun husi laran, no promete ba nia katak Ita sei uza Ita-nia moris atu halo ninia hakarak. (1 Ped 4:2) Depois neʼe, fó-hatene ba koordenadór ba grupu katuas katak Ita hakarak hetan batizmu. Nia sei husu katuas kongregasaun balu atu hasoru Ita.  Keta laran-taridu kona-ba neʼe. Hanoin-hetan katak katuas sira-neʼe hatene ona Ita no hadomi Ita. Sira sei koʼalia hamutuk Ita kona-ba hanorin báziku sira neʼebé Ita aprende ona husi Bíblia. Sira hakarak buka-hatene se Ita komprende hanorin sira-neʼe no mós komprende katak dedikasaun no batizmu mak importante. Se sira sente katak Ita prontu ona, sira sei fó-hatene Ita katak Ita bele hetan batizmu iha reuniaun boot tuirmai.

19-20. Ita presiza halo saida depois batizmu? Oinsá Ita bele halo ida-neʼe?

¹⁹ Ita presiza halo saida depois hetan batizmu? * Hanoin-hetan katak Ita-nia dedikasaun mak juramentu ida no Jeová hakarak Ita atu kumpre ida-neʼe. Entaun depois Ita hetan batizmu, Ita tenke moris tuir Ita-nia dedikasaun. Oinsá mak Ita bele halo ida-neʼe?

²⁰ Hakbesik nafatin ba Ita-nia kongregasaun. Nuʼudar ema Kristaun neʼebé hetan ona batizmu, agora Ita sai ona parte ba “maluk fiar-naʼin” iha mundu tomak. (1 Ped 2:17) Irmaun-irmán sira iha kongregasaun mak Ita-nia família espirituál. Tuir beibeik reuniaun sira bele hametin Ita-nia relasaun diʼak ho sira. Lee no medita kona-ba Maromak nia Liafuan loroloron. (Sal 1:1, 2) Depois lee tiha parte balu husi Bíblia, uza tempu atu hanoin kleʼan kona-ba buat neʼebé Ita lee. Hodi halo nuneʼe, liafuan sira-neʼe sei book Ita-nia laran. Ita mós presiza “harohan beibeik”. (Mt 26:41) Ita-nia orasaun husi laran sei halo Ita hakbesik liután ba Jeová. “Kontinua buka uluk Maromak nia Ukun.” (Mt 6:33) Ita bele halo nuneʼe liuhusi tau uluk serbisu haklaken iha Ita-nia moris. Hodi haklaken beibeik, Ita-nia fiar sei metin nafatin, no karik Ita bele ajuda ema seluk atu laʼo iha dalan ba moris rohan-laek.—1 Tim 4:16.

21. Ita-nia batizmu sei loke dalan ba Ita atu hetan saida?

²¹ Ita-nia desizaun atu dedika an ba Jeová no hetan batizmu mak desizaun importante liu iha Ita-nia moris. Klaru katak Ita presiza halo sakrifísiu. Maibé sakrifísiu sira-neʼe la saugati. Susar naran deʼit neʼebé Ita hasoru iha sistema aat neʼe mak “ba tempu uitoan deʼit no kmaan”. (2 Kor 4:17) Maibé, Ita-nia batizmu sei loke dalan ba Ita atu moris kontente agora no hetan “moris neʼebé loloos” iha futuru. (1 Tim 6:19) Tan neʼe favór ida, hanoin didiʼak no halo orasaun kona-ba Ita-nia resposta ba pergunta: “Haʼu prontu ona atu hetan batizmu ka lae?”