1. Ino hey ty raha mila atao ty ndaty raike te hagnoregne tragno?

ALAO sare an-tsaigne tie misy ndaty raike te hagnoregne tragno. Azo antoke fa hai’e tie manao akore ty pozi’e naho ty habey i tragno haore’ey. Faie ino hey ty toko’e hatao’e voaloha’e? Le avy le handeha hivily ze fitaovagne ilaegne vao reke, le hanomboke hagnoregne aze? Aha’a, tsy izay. Mila fantare’e hey tie fire ty vola ilaegne mba hahavitagne aze, le ampe vao ty vola’e sa tsy ampe. Ty fandineha’e izay mialoha, le hagnampe aze hahatrea tie ho vita’e vao ty hagnoregne i tragnoy sa tsy ho vita’e.

2. Ino ty raha mila dinehe’o soa hey naho magniry hatao badisa rehe, arake ty Lioka 14:27-30?

² Azo antoke fa nahavy azo hagniry hatao badisa ty fanagna’o hatea i Jehovah naho ty fankasitraha’o ty raha natao’e ho azo. Naho managne ze fagniriagne zay rehe, le misy raha mila atao’o hey manahake i lahilahy te hagnoregne tragnoy. Ino ty anto’e? Dineho moa ty raha nirehafe i Jesosy amy Lioka 14:27-30 ao. (Vakio.) Nihazavae i Jesosy ao tie, ‘Toko’e ho vognogne hiatreke raha sarotse naho hamoe ze raha tea’e ze te ho mpanonjohy ty lia’e.’ (Lioka 9:23-26; 12:51-53) Ty dika izay, tena ilae’o ty mandineke soa hey tie inogne iaby ty raha va’e hatrehe’o. Hagnampe azo ho vognogne tsy hivalike amy i Jehovah ty fanoa’o izay naho fa agne ty mahavita badisa azo.

3. Ino ty hodinehentikagne ato?

³ Maregne tie mila vognogne hiatreke raha sarotse naho hamoe ze raha tea’e ze te ho mpiana i Kristy. Faie tsy hanegnegne rehe naho manjare kristiana vita badisa satria maro ka ty fitahiagne ho azo’o. Sady tsy amy izao avao rehe ro hahazo fitahiagne fa amy ty hoavy ka. Andao tika handineke fagnonteneagne lahibey miomba ty badisa mba hahafantara’o tie fa vognogne hatao badisa vata’e vao rehe.

4. a) Ino ty dika tihoe manokan-tegna? b)  Ino ty dika tihoe ‘mandietse ty vata’e,’ arake ty Matio 16:24?

⁴ Ino ty atao tihoe manokan-tegna? Mivavake manokagne amy i Jehovah, le mampitamà aze rehe amo o vavake iohoe tie, ‘Atokako mba hanompoagne azo ty fiaignako manomboke amy izao.’ Ty dika izay, mila ‘mandietse ty vata’e’ ze ndaty fa nanokan-tegna. (Vakio ty Matio 16:24.) Ty fanompoagne i Jehovah areke ro tena ho lahibey ama’o fa tsy ze raha tea’o sasa. Manjare ahy i Jehovah rehe manomboke eo. (Rom. 14:8) Tombotsoa lahibey tsy misy hoe’e zay! Toe tsy maintsy manokan-tegna hoahy i Jehovah ka rehe vaho izay azo atao badisa. Manao vava amy i Jehovah rehe naho fa manokan-tegna ho aze. Tsy mamoresé antika hanao izay reke. Faie naho fa manao izay tika, le tena mitamà ty Jehovah fa hitagne ty rehantikagne tika.—Sal. 116:12, 14.

5. Ino ty tsy mampitovy ty fanokanan-tegna naho ty badisa?

⁵ Ino ty tsy mampitovy ty fanokanan-tegna naho ty badisa? Naho fa irehe manokan-tegna, le i Jehovah avao hey ty mahafantatse izay. Fa ty badisa, atao agnatreha o ndaty maro. Mateteke ro amy ty havoriambey faritse naho vondrom-paritse ty anoagne aze. Ndaty maro areke ty manjare mahafantatse tie fa nanokan-tegna hoahy i Jehovah rehe. * Aseho’o amy io ka fa tena tea’o amy ty fo’o, amy ty sai’o, naho amy vata’o vaho amy ty heri’o iaby ty Jehovah Andrianagnahare’o sady tapa-kevetse rehe fa hanompo aze nainai’e.—Mar. 12:30.

6-7. Nagnino ty badisa ro tena lahibey, arake ty 1 Petera 3:18-22?

⁶ Nagnino rehe ro tena mila atao badisa? Dineho ty fomba irehafa ty 1 Petera 3:18-22 o badisao. (Vakio.) Rehafe’e ao fa i sambofiara namboare i Noay ty nampiseho tamo o ndatio tie nanam-pinoagne reke. Hoe izay ka, fa ty badisa’o ro ampisehoa’o amo o ndatio fa nanokan-tegna hoahy i Jehovah rehe. Tena lahibey vao o badisao? Ie. Magnamafe izay ty raha nirehafe i Petera. Voaloha’e, ‘mandrombake anareo,’ hoe reke, ty badisa. Faie tsy te hirehake zay tie le avy le ho voavonje ze vita badisa. Mila atorontika amy ty raha ataontika lognandro tie tena mino i Jesosy tika sady ekentikagne fa namoe ty ai’e ho antikagne reke. Mila inoantikagne ka fa nivelomegne indraike sady “ankavanan’Andrianagnahare eo” reke.

⁷ Faharoe, mahavy antika hanagne “feo ty fieretseretagne malio” ty badisa. Manjare managne fifandrambesagne manokagne amy i Jehovah tika naho fa nanokan-tegna ho aze sady vita badisa. Noho itika tena nibebake sady mino i solovoigney, le namela ty fahotantikagne ty Jehovah. Manjare malio agnatreha’e eo areke ty eretserentika.

8. Ino ty toko’e ho anto’e lahibey handrisike azo hatao badisa?

⁸ Ino iaby ty anto’e lahibey toko’e handrisike azo ho tapa-kevetse hatao badisa? Maro ty raha nanjare fanta’o miomba i Jehovah noho irehe nianatse soa ty miomba aze tagnate Baiboly ao. Agnisa izay ty raha tea’e naho ty raha heje’e vaho ty fomba fanoa’e raha. Azo antoke fa nahafale azo ty nahafantatse izay, le nandrisike azo ho tena tea aze. Le ze hatea’o i Jehovah zay ro toko’e ho anto’e lahibey mandrisike azo hatao badisa.

9. Ino ty dika tihoe atao badisa amy ty tahina i Rae naho amy ty agnara i Anakey vaho amy ty agnara ty fagnahy masigne, rehafegne amy Matio 28:19, 20 ao?

⁹ Ty finoa’o ty raha nianara’o agnate Baiboly ao ty toko’e ho anto’e hafa handrisike azo hatao badisa. Magnamafe izay ty raha rineha i Jesosy tamy ie nandily antika ‘hanao mpianatse o ndatioy.’ (Vakio ty Matio 28:19, 20.) Nirehake ty Jesosy tamy io tie mila atao badisa amy ty ‘tahina i Rae naho amy ty agnara i Anakey vaho amy ty agnara ty fagnahy masigne’ ze  atao badisa. Ty dika izay, tsy maintsy inoa’o amy ty fo’o ty raha ampianare ty Baiboly miomba i Jehovah, naho i Jesosy Ana’e vaho ty fagnahy masigne. Lahibey o hamarenagne rehoe sady tena mahafale antika ty mahafantatse aze. (Heb. 4:12) Andao tika hirehake ty miomba ireo.

10-11. Inogne iaby ty hamarenagne fa nianara’o sady inoa’o miomba i Raentikagney?

¹⁰ Inogne iaby zao ty hamarenagne fa nianara’o miomba i Raentikagney? Fa hai’o zao tie i “Jehovah” ty tahina’e, “Ambone Bey” reke, sady ireke raike avao ro ‘Andrianagnahare maregne.’ (Sal. 83:18; Isaia 37:16) Ie ty namorogne antika sady boake ama’e ty famonjeagne tavandraentikagne. (Sal. 3:8; 36:9) Nanao fandaharagne ka reke hagnavotagne antika amy ty ota naho ty fate vaho hahavy antika hahazo havelogne nainai’e. (Jaona 17:3) Naho fa nanokan-tegna sady vita badisa rehe, le manjare Vavolombelo i Jehovah. (Isaia 43:10-12) Manjare agnisa ty mpirahalahy magneran-tane rehe sady tokavegne amy ty tahinan’Andrianagnahare. Voninahitse lahibey zay! Mahafale azo ka ty magnambara ty tahina’e amo o ndatio.—Sal. 86:12.

¹¹ Tombotsoa lahibey tihoe agnisa ty ndaty mahafantatse ty maregne miomba i Raentikagney amy Baiboly ao. Mandrisike azo hanokan-tegna naho hatao badisa ty finoa’o i hamarenagne sarobily miomba aze rey zay.

12-13. Inogne iaby ty hamarenagne fa nianara’o sady inoa’o miomba i Jesosy?

¹² Azo antoke fa nifale rehe naho fa nahafantatse ty maregne miomba i Jesosy. Managne toeragne tena ambone reke satria ie ty manonjohy i Jehovah. Faie nivognogne hamoe ty ai’e reke mba hamonjeagne antikagne. Naho fa atorontikagne amy ty fiaignantika tie mino i solovoigne nanoe’ey tika, le hahazo famelan-keloke, hilongo soa aman’Agnahare sady hahazo havelogne nainai’e. (Jaona 3:16) Mpisorom-bey ka ty Jesosy. Izay ty mahavy aze afake magnampe antika mba handrambe soa amy i solovoigne nanoe’ey naho hifandrambe soa amy i Jehovah. (Heb. 4:15; 7:24, 25) Ie ty hampiasae i Jehovah hagnamasigne ty tahina’e, hagnafake o haratiagneo, naho hinday fitahiagne nainai’e amy ty hoavy satria ireke ty Mpanjaka i Fanjakàn’Andrianagnaharey. (Mat. 6:9, 10; Apok. 11:15) Modely ho antikagne ka reke. (1 Pet. 2:21) Nampiasa ty fiaigna’e hanoagne ty zoton’arofo i Jehovah ty Jesosy, le toko’e hanahake aze tika.—Jaona 4:34.

¹³ Hitombo ty hatea’o i Jesosy naho fa inoa’o ty raha ampianare ty Baiboly miomba aze. Le ze hatea’o i Jesosy zay ty handrisike azo hampiasa ty fiaigna’o mba hanoagne ty zoton’arofo i Jehovah manahake ty natao’e. Mahavy azo te hanokan-tegna hoahy i Jehovah naho hatao badisa ka zay.

14-15. Inogne iaby ty hamarenagne fa nianara’o sady inoa’o miomba ty fagnahy masigne?

¹⁴ Va’e nanagne heve-diso miomba ty fagnahy masigne ka rehe. Faie naho fa nianatse Baiboly rehe, le nahafantatse tie tsy andrianagnahare io fa hery ampiasaen’Andrianagnahare. Io ty nampiasae i Jehovah mba hitarihagne i ndaty nanoratse Baiboly rey. Magnampe antika hahatakatse soa naho hahavita hampihatse ze raha nivakientikagne agnate Baiboly ao ka ty fagnahy masigne. (Jaona 14:26; 2 Pet. 1:21) Amy ty alala io ka ty agnomea i Jehovah antika “hery fagnampe’e.” (2 Kor. 4:7) Sahy mitory i talily soay areke tika, mahatohetse tsapa hevetse, mahavita miatreke hakiviagne naho miaretse fitsapagne. Magnampe antika haneho i toetse soa maro rehafe ty Baiboly tihoe ‘vokatse ty fagnahỳ’ ka io. (Gal. 5:22) Vognogne hagnomey fagnahy masigne hoahy ze matoky aze naho ze mangatake mafe ama’e ty Jehovah.—Lioka 11:13.

¹⁵ Tena mampahery ty mahafantatse tie naho miantehetse amy ty fagnahy masin’Andrianagnahare o mpanompo’eo, le hahavita hanompo aze avao! Mbe agnisa ty handrisike azo hanokan-tegna hoahy i Jehovah sady hatao badisa ka ty finoa’o ty fampianara ty Baiboly miomba ty fagnahy masigne.

16. Inogne iaby ty raha nianarantikagne miomba ty badisa?

 ¹⁶ Tena fanapahan-kevetse lahibey tihoe manokan-tegna naho atao badisa. Maregne fa tsy maintsy vognogne hiatreke raha sarotse naho hahafoe ze raha tea’e ze te hatao badisa. Faie ndra tie maro ty raha afoe’o, le mbe ambone izay ty fitahiagne ho azo’o. Mahavy azo hanagne feo ty fieretseretagne malio agnatrehan’Andrianagnahareo naho ho voavonje ohatse ty badisa. Faie ndra tie eo zay, le ty hatea’o i Jehovah ty toko’e ho anto’e lahibey mahavy azo ho tapa-kevetse hatao badisa. Tsy maintsy mino ka rehe fa tena maregne ty raha nianara’o miomba i Raentikagney naho i Anakey vaho ty fagnahy masigne. Naho izay areke, le ino amy izay ty havale’o ty fagnonteneagne toy: “Vognogne hatao badisa vata’e vao rehe?”

17. Inogne iaby ty dingagne mila atao ty ndaty raike vaho izay azo atao badisa reke?

¹⁷ Naho ohatse rehe mahatsapa tie fa vognogne hatao badisa, le azo antoke tie fa nisy dingagne maromaro natao’o mba hahavy azo hifandrambe maifitse aman’Andrianagnahare. * Nianatse tsy tapake ty Baiboly zao rehe, le nitombo ty raha fanta’o miomba i Jehovah naho i Jesosy. Nitombo ka ty finoa’o. (Heb. 11:6) Tena matoky zao rehe fa hotanterahe i Jehovah ty raha nampitamae’e agnate Baiboly ao. Tena mino ka rehe fa ho afake amy ty ota naho ty fate noho ty sorogne natao i Jesosy. Fa nibebake naho nanegnegne amy ty fahotagne natao’o ka rehe, le nangatake famelan-keloke tamy i Jehovah. Fa niova ka rehe, le niala tamy ty raha raty natao’o taloha sady nikezake hanagne fiaignagne mampifale an’Andrianagnahare. (Asa. 3:19) Mazoto mitory amy ty hafa ty raha inoa’o ka rehe satria fa nahafeno fepetse ho mpitory tsy vita badisa agnivo o fiangonagneo. (Mat. 24:14) Ankasitraha i Jehovah o dingagne natao’o rehoe. Tena fale reke mahavazoho azo mikezake mafe.—Ohab. 27:11.

18. Ino ka ty raha hafa mila atao’o naho magniry hatao badisa rehe?

¹⁸ Misy raha hafa ka mila atao’o naho irehe magniry hatao badisa. Nianarantika teo fa mila manokan-tegna hoahy i Jehovah hey rehe. Rehafo ama’e amy ty alala ty vavake mitokagne atao’o tie vognogne hampiasa ty fiaigna’o mba hanoagne ty zoton’arofo’e rehe. (1 Pet. 4:2) Rehafo amy ty androanavi-pagnahy mpandrindra amy ty fiangonagne misy azo i fagniria’oy afara izay. Le hanendre androanavi-pagnahy hiara-midineke ama’o reke. Faie ao rehe tsy hatahotse satria ndaty mahay azo, soa fagnahy sady tea azo iareo.  Hiara-midineke ama’o ty hamarenagne fototse nianara’o tamy Baiboly ao iareo mba hahafantaragne tie taka’o soa vao o hamarenagne reo naho ty mahalahibey tihoe manokan-tegna naho atao badisa. Naho trea tie taka’o soa o raha rehoe, le hampahafantare iareo azo tie azo atao badisa rehe amy ty havoriambey faritse ndra vondrom-paritse magnarake.

19-20. Ino ty raha mila atao’o afara ty badisa’o, le akore ty hanoa’o izay?

¹⁹ Ino ty raha mila atao’o naho fa vita badisa rehe? * Ko haligno fa nanao vava tamy i Jehovah rehe tamy ihe nanokagne ty fiaigna’o ho azey. Tsy maintsy tanterahe’o zay. Mila manao raha mifagnarake amy i fanokanan-tegna’oy areke rehe. Akore ty hanoa’o izay?

²⁰ Mikezaha hiarake amo o fiangonagneo avao ndra tie fa vita badisa rehe. Ty anto’e, fa agnisa ty ‘rahalahy iaby amy ty finoagne ao’ rehe. (1 Pet. 2:17) O mpiara-manompo ama’o rehoe ro tena rahalahi’o naho rahavave’o vata’e. Mikezaha areke hagnatreke fivoriagne tsy tapake amy izay hitombo ty hatea’o iareo. Mamakia ka Baiboly isan’andro, le saintsaigno ze vinaki’o. (Sal. 1:1, 2) Ty dika izay, mila manokagne fotoagne handinehagne laleke ze ampaha’e nivakie’o rehe. Tena hisy voka’e ama’o amy izay ze raha nivakie’o agnate Baiboly ao. Ilaegne ka ty ‘mivavake tsy tapake’ amy i Jehovah. (Mat. 26:41) Naho atao’o amy ty fo’o zay, le hifandrambe maifitse ama’e rehe. ‘Asao aloha hey ka i Fanjakà’ey.’ (Mat. 6:33) Manao izay rehe, naho ty asa fitoriagne ro atao’o voalohan-draha amy ty fiaigna’o. Naho ihe manompo tsy tapake, le hihamafe ty finoa’o sady hagnampe ty hafa handeha amy i lalagne mbamy i havelogne nainai’e mbeoy.—1 Tim. 4:16.

21. Ino ty soa ho azo’o naho fa vita badisa rehe?

²¹ Tena fanapahan-kevetse lahibey tihoe manokan-tegna hoahy i Jehovah naho atao badisa. Maregne fa misy sorogne tsy maintsy hatao’o naho raha sarotse hatrehe’o. Faie tsiarovo fa “mihelagne naho maivagne” avao i raha rey. (2 Kor. 4:17) Naho ty maregne, le maro ty raha fanjaka ho azo’o. Hanagne fiaignagne soa rehe manomboke amy izao sady hahazo havelogne nainai’e amy ty hoavy. (1 Tim. 6:19) Dineho soa areke ty fagnonteneagne toy, sady mivavaha mafe aloha ty hamalea’o aze: “Vognogne hatao badisa vata’e vao raho?”