1. Kakɔna kahomba onto nsala ntondo ka ntatɛ mbika luudu?

OHƆSA di’onto ɔmɔtshi ambɔsa yɛdikɔ ya mbika luudu. Nde mbeyaka woho wa luudu walangande mbika. Onde nde ayotshɔ lo makashinyi mbala kakɔ ɔtɔi ko tosomba dihomɔ dimɔtshi ko ntatɛ mbika? Ndooko. Ntondo ka nde ntatɛ, ekɔ dui dimɔtshi di’ohomba diahombande nsala, mbuta ate nkamba akumi dia mbeya falanga ngana yayɔlɔmbama dia lika. Lande na? Nɛ dia nde pombaka mbeya dia kana nde ekɔ la falanga yahombama dia lishidiya. Naka nde nkamba akumi dimɛna la ntondo dia mbeya adepasɛ wayosalema, kete ondo nde ayokoka nshidiya luudu lande.

2. Lo ndjela Luka 14:27-30, lo na ahombayɛ nkanyiya efula ntondo ka batizama?

² Onde ngandji ndo lowando lele layɛ le Jehowa kotshutshuyaka dia nkanyiya dia batizama? Naka ngasɔ, kete wɛ ekɔ la ntondo ka yɛdikɔ yafɔna la ya pami kalanga mbika luudu. Lande na? Nyɛsɔ tɔsɛdingole ɛtɛkɛta wa Yeso wele lo Luka 14:27-30. (Adia.) Lanɛ Yeso akɛnyaka kɛnɛ kalembetshiya monga ombeki ande. Dia monga ombeki ande, sho pombaka mbetawɔ mbikikɛ ekakatanu ndo ndjahondja awui amɔtshi. (Luka 9:23-26; 12:51-53) Diakɔ diele ntondo ka wɛ batizama, ekɔ ohomba wɛ nkanyiya efula lo awui tshɛ walɔmba dui sɔ. Lo nsala ngasɔ, wɛ ayoyalɔngɔsɔla dimɛna dia ntetemala kambɛ Nzambi la kɔlamelo tshɛ oko Okristo wambobatizama.

3. Kakɔna kayangaso nsɛdingola lo sawo nɛ?

³ Onde monga ombeki wa Kristo wambobatizama mongaka l’ekakatanu wahombayɛ mbikikɛ ndo l’awui wahombayɛ ndjahondja? Eelo! Batisimu diholaka lokuke di’onto nkondja ɛtshɔkɔ efula, nshi nyɛ ndo lo nshi yayaye. Tayanga nsɛdingola ambola amɔtshi w’ohomba wendana la batisimu. Dui sɔ diayokokimanyiya dia nkadimola dimbola nɛ: “Onde dimi laya suke dia batizama?”

4. a) Ndjakimɔ kɛdikɛdi na? b) Oko wadiɛnya Mateo 16:24, ‘ndjasɛka’ kɛdikɛdi na?

⁴ Ndjakimɔ kɛdikɛdi na? Ntondo ka wɛ batizama, wɛ pombaka ndjakimɔ. Ndjakimɔ kɛdikɛdi ndjasukanya la Jehowa lo dɔmbɛlɔ dia l’otema ɔtɔi ndo mbotɛ dia wɛ ayowokambɛka lo lɔsɛnɔ layɛ pondjo pondjo. Etena kayakimɔyɛ le Nzambi, wɛ ‘ndjasɛkaka.’ (Adia Mateo 16:24.) L’etena kɛsɔ, wɛ ndjalaka onto la Jehowa, ɔsɔ ekɔ diɛsɛ dia woke efula. (Rɔmɔ 14:8) Lo dɔmbɛlɔ, tɛnde ɔnɛ oma ko kakianɛ dui diayolekaka monga ohomba le yɛ ele mbokambɛ, koko aha dia ndjangɛnyangɛnya. Ndjakimɔ kayɛ ekɔ dɔkɔlɔkɔ, mbuta ate daka diatshikayɛ le Nzambi. Jehowa hatotshutshuya dia ntshika dɔkɔlɔkɔ sɔ. Koko etena kaditshikaso, nde nongamɛka dia sho dikotsha.​—Os. 116:12, 14.

5. Otshikitanu akɔna wele lam’asa ndjakimɔ la batisimu?

⁵ Otshikitanu akɔna wele lam’asa ndjakimɔ la batisimu? Onto ndamɛ mbayakimɔ ndo dui sɔ salemaka lo woshɛshɛ; dui sɔ salemaka lam’asa onto nde la Jehowa ato. Batisimu salemaka lo sɛkɛ; tɔ salemaka la ntondo k’anto akina, mbala efula lo losanganya la woke. Etena kabatizamayɛ, wɛ mɛnyaka anto akina ɔnɛ wɛ akashile ndjakimɔ wɛmɛ le Jehowa. * Diakɔ diele batisimu kayɛ kimanyiyaka anto akina dia mbeya ɔnɛ wɛ nangaka Jehowa Nzambi kayɛ l’otema ayɛ tshɛ, l’anima ayɛ tshɛ, la yimba yayɛ tshɛ ndo la wolo ayɛ tshɛ ndo ɔnɛ wɛ amboyashikikɛ dia mbokambɛka pondjo pondjo.​—Makɔ 12:30.

6-7. Lo ndjela 1 Petero 3:18-22, naa ɛkɔkɔ ehende wɛnya dia batisimu kekɔ ohomba?

⁶ Onde ekɔ mɛtɛ ohomba batizama? Nyɛsɔ tɔsɛdingole ɛtɛkɛta wele lo 1 Petero 3:18-22. (Adia.) Oko waki waato wa luudu djembetelo yakɛnyaka dia Nɔa aki la mbetawɔ, mbele ndo batisimu kayɛ kekɔ djembetelo yɛnya dia wɛ amboyakimɔ le Jehowa. Ko onde batisimu kekɔ mɛtɛ ohomba? Eelo. Petero akɛnya ɛkɔkɔ ɛmɔtshi. Ɔkɔkɔ wa ntondo ele, tɔ ‘koshimbɛka.’ Batisimu koka toshimbɛ naka tambotakola wanya w’ohomba wɛnya dia tekɔ la mbetawɔ le Yeso ndo wɛnya dia sho mbetawɔka dia nde akavu dikambo diaso, akolɔma, akatshu l’olongo ndo ekɔ kakianɛ “lo lonya l’omi la Nzambi.”

⁷ Ɔkɔkɔ wa hende ele, batisimu kimanyiyaka onto dia monga la “nkum’otema k’ɔlɔlɔ.” Etena kayakimɔso le Nzambi ndo kabatizamaso, sho mongaka la diɔtɔnganelo dia laande la nde. Lam’ele sho ndjatshumoyaka l’otema ɔtɔi ndo mongaka la mbetawɔ l’oshinga w’etshungwelo, Nzambi todimanyiyaka pɛkato yaso. Diakɔ diele sho koka monga la nkum’otema k’ɔlɔlɔ la ntondo kande.

8. L’ɔtɛ w’ɔkɔkɔ akɔna wahombayɛ mbɔsa yɛdikɔ ya batizama?

⁸ L’ɔtɛ w’ɔkɔkɔ akɔna wahombayɛ mbɔsa yɛdikɔ ya batizama? Diɛsɛ la wekelo ayɛ wa Bible wa l’etete, wɛ ambeka akambo efula wendana la Jehowa, lonto lande ndo mboka yande. Kɛnɛ kamboyeka lo dikambo diande kambonanda otema ayɛ ndo kambokotshutshuya dia mbolanga efula. Ngandji kokayɛ Jehowa mbahomba monga ɔkɔkɔ woleki ohomba wahombayɛ mbɔsa yɛdikɔ ya batizama.

9. Lo ndjela Mateo 28:19, 20, batizama lo lokombo la Papa ndo la Ɔna ndo la nyuma k’ekila kɛdikɛdi na?

⁹ Ɔkɔkɔ okina wahomba kotshutshuya dia mbɔsa yɛdikɔ ya batizama ele wɛ ambeka akambo wa mɛtɛ wa lo Bible ndo ambowaetawɔ. Nyɛsɔ tɔsɛdingole kɛnɛ kakate Yeso etena kakandasha didjango dia mbetɛ anto ambeki. (Adia Mateo 28:19, 20.) Lo ndjela Yeso, anto pombaka batizama “lo lokombo la Papa ndo la Ɔna ndo la nyuma k’ekila.” Kakɔna  kalembetshiya dui sɔ? Wɛ pombaka mbetawɔ l’otema ayɛ tshɛ akambo wa mɛtɛ wa lo Bible wendana la Jehowa; la Ɔnande Yeso; ndo la nyuma k’ekila. Akambo wa mɛtɛ asɔ wekɔ la wolo efula ndo vɔ koka minanda otema ayɛ efula. (Hɛb. 4:12) Nyɛsɔ tɔsɛdingole amɔtshi l’atei awɔ.

10-11. Naa akambo wa mɛtɛ wendana la Papa wamboyeka ndo wamboyetawɔ?

¹⁰ Ohokanyiya yema etena kakayeke akambo wa mɛtɛ wendana la Papa wayela anɛ: ‘Lokombo lande Jehowa,’ nde kele “Ɔnɛ-Laheme-Tshɛ lo nkɛtɛ k’otondo” ndo ndamɛ oto kele “Nzambi ka mɛtɛ.” (Os. 83:18; Isa. 37:16) Nde kele Otungi aso ndo “panda kekɔ ka Jehowa.” (Os. 3:8; 36:9) Nde akakongɛ dia toshimbɛ oma lo pɛkato la nyɔi ndo akatosha elongamelo ka lɔsɛnɔ la pondjo. (Jni. 17:3) Ndjakimɔ ndo batisimu kayɛ mbayɛnya dia wɛ aya Ɔmɛnyi wa Jehowa. (Isa. 43:10-12) Wɛ ayoyala lo nkumbo ka l’andja w’otondo k’atɛmɔdi wele l’ɔngɛnɔngɛnɔ dia mbelamɛ lo lokombo la Nzambi ndo waliewoya anto akina.​—Os. 86:12.

¹¹ Ekɔ mɛtɛ diɛsɛ dia woke dia nshihodia kɛnɛ ketsha Bible lo dikambo dia Papa! Naka wɛ mbetawɔ akambo wa mɛtɛ w’ohomba asɔ, kete otema ayɛ wayokotshutshuya dia ndjakimɔ le Jehowa ndo batizama.

12-13. Naa akambo wa mɛtɛ wendana la Ɔna wamboyeka ndo wamboyetawɔ?

¹² Ngande wakayayaoke etena kakayeke akambo wa mɛtɛ wendana la Ɔna wayela anɛ? Yeso mbele onto la hende loleki ohomba l’andja w’otondo. Nde kele Otshungodi aso. Nde aketawɔ nkimɔ lɔsɛnɔ lande dikambo diaso. Naka sho mɛnya oma l’etsha aso dia tekɔ la mbetawɔ l’oshinga w’etshungwelo, kete pɛkato yaso koka dimanyiyama, tayɔtɔ lɔngɛnyi la Nzambi ndo tayokondja lɔsɛnɔ la pondjo. (Jni. 3:16) Yeso ekɔ Ɔlɔmbɛdi aso wa laadiko. Nde nangaka tokimanyiya dia nkondja wahɔ oma l’oshinga w’etshungwelo ndo dia monga la diɔtɔnganelo dia ma ma la Nzambi. (Hɛb. 4:15; 7:24, 25) Oko wende Nkumekanga ka Diolelo dia Nzambi, Jehowa ayokamba la nde dia nkidia lokombo Lande, dia nkomiya awui wa kɔlɔ ndo dia mbela ɛtshɔkɔ wa pondjo lo Paradiso ka lo nshi yayaye. (Mat. 6:9, 10; Ɛny. 11:15) Yeso mbele ɛnyɛlɔ kaso. (1 Pe. 2:21) Nde akatotshikɛ ɛnyɛlɔ lo ndjakimɔ dia salaka lolango la Nzambi.​—Jni. 4:34.

¹³ Naka wɛ mbetawɔ kɛnɛ ketsha Bible lo dikambo dia Yeso, kete wɛ ayolanga Ɔna Nzambi la ngandji. Ngandji kɛsɔ kotshutshuyaka dia nkamba la lɔsɛnɔ layɛ dia nsala lolango la Nzambi oko wakasale Yeso. Etombelo wayonga ele, wɛ ayɔsɛngiyama dia ndjakimɔ wɛmɛ le Jehowa ndo batizama.

14-15. Naa akambo wa mɛtɛ wendana la nyuma k’ekila wamboyeka ndo wamboyetawɔ?

¹⁴ Kanyi yakɔna yakonge layɛ etena kakayeke akambo wa mɛtɛ wayela anɛ wendana la nyuma k’ekila? Tɔ bu onto, koko tɔ kekɔ wolo wa Nzambi wakamba olimu. Jehowa akakambe la nyuma k’ekila dia sambiyɛ afundji wa Bible awui wakawahombe mfunda, ndo nyuma kɛsɔ tokimanyiyaka dia nshihodia ndo nkamba la kɛnɛ kadiaso lɔkɔ. (Jni. 14:26; 2 Pe. 1:21) Lo tshimbo ya nyuma kande, Jehowa toshaka “wolo woleki wɔnɛ wokongaka l’onto.” (2 Kɔr. 4:7) Nyuma kakɔ toshaka wolo wa nsambisha lokumu l’ɔlɔlɔ, wa ndɔshana l’ehemba, wa ndɔshana l’ɔkɔmwɛlɔ ndo wa mbikikɛ ehemba. Tɔ tokimanyiyaka dia nkɛnɛmɔla waonga w’amɛna wakenga “olowa wa nyuma.” (Ngal. 5:22) La lokaho tshɛ Nzambi mbishaka anto wayaɛkɛ le nde nyuma kande ndo wɔlɔmbatɔ l’otema ɔtɔi.​—Luka 11:13.

¹⁵ Ekɔ mɛtɛ ekeketshelo ndo esambelo dia mbeya di’atɛmɔdi wa Jehowa koka ndjaɛkɛ le nyuma k’ekila dia mbakimanyiya dia kambɛ Nzambi! Naka wɛ mbetawɔ akambo wa mɛtɛ  wamboyeka wendana la nyuma k’ekila, kete wɛ ayotshutshuyama dia ndjakimɔ le Nzambi ndo batizama.

16. Awui akɔna wamboteka?

¹⁶ Wɛ ekɔ lo ntakola nna di’ohomba efula etena kɔsayɛ yɛdikɔ ya ndjakimɔ le Nzambi ndo batizama. Oko wakatadiɛnyi, wɛ pombaka mbetawɔ awui walɔmbama dia nsala dui sɔ, mbuta ate mbikikɛ ekakatanu ndo ndjahondja awui amɔtshi. Koko ɛtshɔkɔ wayoyokondja wayoleka awui wayahondjayɛ la fwa. Batisimu koka koshimbɛ, ndo tɔ koka kokimanyiya dia monga la nkum’otema k’ɔlɔlɔ la ntondo ka Nzambi. Ɔkɔkɔ woleki ohomba wahombayɛ mbɔsa yɛdikɔ ya batizama pombaka monga ngandji kokayɛ Jehowa Nzambi. Wɛ pombaka nto mbetawɔ l’otema ayɛ tshɛ akambo wa mɛtɛ wamboyeka wendana la Papa, Ɔna ndo la nyuma k’ekila. L’ɔkɔngɔ wa sho nsɛdingola awui wakateki, ngande wayoyokadimola dimbola nɛ: “Onde dimi laya suke dia batizama?”

17. Naa wanya amɔtshi wahomba onto ntakola dia batizama?

¹⁷ Naka wɛ mbokaka dia wɛ aya suke dia batizama, kete ondo wɛ akashile nsala akambo efula dia monga la diɔtɔnganelo dia dimɛna la Jehowa. * Diɛsɛ la wekelo ayɛ wa Bible wa mbala la mbala, wɛ ambeya awui efula wendana la Jehowa ndo la Yeso. Wɛ aya la mbetawɔ. (Hɛb. 11:6) Wɛ amboyaɛkɛ tshɛ lo tshɛ lo alaka wa Jehowa wele lo Bible ndo wɛ amboshikikɛ dia mbetawɔ kayɛ l’oshinga w’etshungwelo wa Yeso koka koshimbɛ oma lo pɛkato la nyɔi. Wɛ amboyatshumoya oma lo pɛkato yayɛ, mbuta ate wɛ ambonyanga efula l’ɔtɛ wa munga yakayasale ndo wɛ ambɔlɔmba Jehowa dia kodimanyiya. Wɛ ambokadimola otema, mbuta ate wɛ akatone l’eshikikelo tshɛ yoho yayɛ ya lɔsɛnɔ ya kɔlɔ ndo akatatɛ nsɛna lo yoho yangɛnyangɛnya Nzambi. (Ets. 3:19) Wɛ nomɔlomɔka mbutɛ anto akina awui wendana la mbetawɔ kayɛ. Wɛ akakotsha kɛnɛ kalɔmbama dia monga opandjudi wahatabatizama ndo akatatɛ nsambisha kaamɛ l’ase etshumanelo. (Mat. 24:14) Jehowa ekɔ l’ofunu lo dikambo diayɛ l’ɔtɛ wamboyotakola wanya w’ohomba asɔ. Wɛ ambɔɔngɛnyangɛnya efula.​—Tok. 27:11.

18. Naa akambo akina wahombayɛ nsala ntondo ka batizama?

¹⁸ Ntondo ka wɛ batizama, ekɔ akambo akina wahombayɛ nsala. Oko wakatadiɛnyi oma l’etatelo, wɛ pombaka ndjakimɔ wɛmɛ le Nzambi. Yasukanya la nde lo woshɛshɛ lo nsala dɔmbɛlɔ dia l’otema ɔtɔi, ndo lakande dia wɛ ayosalaka lolango lande lo lɔsɛnɔ layɛ. (1 Pe. 4:2) Oma laasɔ, tɛ ɔnɔmbɔdi w’olui wa dikumanyi dia wɛ nangaka batizama. Nde ayɔlɔmba dikumanyi dimɔtshi dia nsawola la yɛ. Lam’alangɛ toyakiyanyake l’ɔtɛ wayoyosawola la wɔ. Ohɔ di’anangɛso wokana ngandji asɔ keyaka ndo kookaka ngandji. Vɔ wayovusola kaamɛ la yɛ wetshelo w’etatelo wa lo Bible wakayeke. Vɔ nangaka ndjashikikɛ dia kana wɛ shihodiaka wetshelo akɔ ndo dia kana wɛ mbeyaka ohomba  wele la ndjakimɔ ndo batisimu. Naka vɔ wambetawɔ dia wɛ ambokoka batizama, vɔ wayokotɛ ɔnɛ wɛ kokaka batizama lo losanganya la woke layela.

19-20. Ahombayɛ nsala l’ɔkɔngɔ wa wɛ batizama, ndo ngande wakokayɛ nsala dui sɔ?

¹⁹ L’ɔkɔngɔ wa wɛ batizama, ahombayɛ nsala? * Ohɔ dia ndjakimɔ ekɔ dɔkɔlɔkɔ ndo ɔnɛ Jehowa nongamɛka dia wɛ dikotsha. Diakɔ diele l’ɔkɔngɔ wa wɛ batizama, wɛ pombaka nsɛna lo yoho yɔtɔnɛ la ndjakimɔ kayɛ. Ngande wakokayɛ nsala dui sɔ?

²⁰ Toyanganyake l’etshumanelo. Oko wayayɛ Okristo wambobatizama, wɛ aya ose ‘nkumbo k’anangɛso.’ (1 Pe. 2:17) Ananyɔ l’akadiyɛyɛ wa l’etshumanelo mbaya nkumbo kayɛ ka lo nyuma. Naka wɛ mbɔtɔka nsanganya mbala la mbala, kete wɛ ayokeketsha dimama diasayɛ la wɔ. Adiaka Ɔtɛkɛta wa Nzambi ndo kanaka la wɔ yimba lushi tshɛ. (Os. 1:1, 2) L’ɔkɔngɔ wa mbadia etenyi kɛmɔtshi ka lo Bible, ɔsa yema y’etena ka nkana yimba efula lo kɛnɛ kamboyadia. Oma laasɔ ɛtɛkɛta akɔ wayonanda otema ayɛ. ‘Tetemala nɔmba.’ (Mat. 26:41) Alɔmbɛlɔ ayɛ wa l’otema ɔtɔi wayoleka kosukanya la Jehowa. “[Tetemala] nyanga ntondo Diolelo.” (Mat. 6:33) Wɛ koka nsala dui sɔ naka wɛ mbetɛ olimu w’esambishelo dui dioleki ohomba lo lɔsɛnɔ layɛ. Naka wɛ sambishaka mbala la mbala, kete mbetawɔ kayɛ kayoyala wolo ndo wɛ koka nkimanyiya anto akina dia monga lo mboka katɔla otsha lo lɔsɛnɔ la pondjo.​—1 Tim. 4:16.

21. Batisimu kayɛ kayokodiholɛ mboka k’otsha lo na?

²¹ Yɛdikɔ ya ndjakimɔ le Jehowa ndo batizama yekɔ yɛdikɔ yoleki ohomba yakokayɛ mbɔsa. Ekɔ mɛtɛ dia wɛ ayohomana l’ekakatanu ndo wɛ ayoyahondja awui amɔtshi. Ko onde ekɔ ohomba nsala dui sɔ? Eelo! Okakatanu akɔna tshɛ wakokayɛ mpomana lawɔ l’andja ɔnɛ w’omusu wekɔ wa lo “tshanda mɔtshi tsho ndo bu wa wolo.” (2 Kɔr. 4:17) Koko, batisimu kayɛ kayokodiholɛ mboka k’otsha lo lɔsɛnɔ loleki dimɛna nshi nyɛ ndo “lɔsɛnɔ l’oshika” lo nshi yayaye. (1 Tim. 6:19) Diakɔ diele lam’alangɛ, nkana yimba dimɛna ndo lɔmba dikambo di’okadimwelo ayɛ wa dimbola nɛ: “Onde dimi laya suke dia batizama?”