1. Kumbi munthu wakhumbika kuchitanji wechendayambi kuzenga nyumba?

TIYERUZGIYI kuti munthu wakhumba kuzenga nyumba. Iyu waziŵa mtundu wa nyumba yo wakhumba kuzenga. Kweni kumbi wangaluta nyengu yeniyo ku sitolu kuti wakaguli vipangizu vakuzenge nyumba? Awa. Wangachita cha viyo. Wechendayambi, wakhumbika kuchita dankha chinthu chinyaki chakukhumbika ukongwa. Iyu watenere kuŵerengese ndalama zo wagwiriskiyengi ntchitu pakuzenga nyumba yaki. Chifukwa wuli? Chifukwa wakhumbika kuziŵa asani we ndi ndalama zakukwana zakuyimaliziya. Asani wangaziŵiya limu unandi wa ndalama zo zikhumbika, tikayika cha kuti wangamaliza kuyizenga.

2. Mwakukoliyana ndi Luka 14:27-30, kumbi mukhumbika kuchitanji mwechendabatiziki?

² Kumbi mukhumba kubatizika chifukwa chakuti mutanja Yehova ndipuso muwonga vo watikuchitiyani? Asani ndi viyo, mukhumbika kuchita vo munthu yo wakhumba kuzenga nyumba wachita. Ntchifukwa wuli tikamba viyo? Wonani mazu ngo Yesu wangukamba pa Luka 14:27-30. (Ŵerengani.) Pa lemba ili, Yesu wakambanga vinthu vo munthu wakhumbika kuchita kuti waje wakusambira waki. Kuti tije akusambira ŵaki, titenere kukhumbisiska kukunthiyapu masuzgu ndi kusiya vinthu vinyaki vo titanja. (Luka 9:23-26; 12:51-53) Mwaviyo, mwechendabatiziki mutenere kuŵanaŵaniyapu ukongwa vinthu vo mukumanengi navu asani mwaja wakusambira waku Khristu. Asani mwachita viyo, mwazamukuŵa akunozgeka kuteŵete Chiuta asani mwazibatizika.

3. Kumbi tikambiskanengenji mu nkhani iyi?

³ Chinanga kuti mwazamukumana ndi masuzgu asani mwazibatizika ndipuso mwazamukhumbika kuleka vinthu vinyaki vo mutanja, kweni kumbi mwazamudandawula chifukwa chakuchita viyo? Awa! Tikamba viyo chifukwa munthu yo wabatizika wasaniya vitumbiku vinandi sonu kweniso wazamutumbikika ukongwa kunthazi. Tiyeni tikambiskani mafumbu ngakukhumbika ukongwa ngakukwaskana ndi ubatizu. Venivi vikuwovyeningi  kumuka fumbu lakuti, “Kumbi nde wakunozgeka kubatizika?”

4. (a) Kumbi kujipatuliya kung’anamuwanji? (b) Nge mo pakambiya pa Mateyu 16:24, kumbi ‘kujikana’ kung’anamuwanji?

⁴ Kumbi kujipatuliya kung’anamuwanji? Mwechendabatiziki mukhumbika kujipatuliya dankha. Kujipatuliya kung’anamuwa kukambiya Yehova mupempheru kutuliya pasi pamtima kuti mumuteŵetiyengi kwa umoyu winu wosi. Asani mwajipatuliya kwaku Chiuta, mutuŵa kuti ‘mwajikana,’ kung’anamuwa kuti muchitengi vakukhumba vinu cha. (Ŵerengani Mateyu 16:24.) Asani mwachita viyo, ndikuti sonu mwe aku Yehova. Uwu ndi mwaŵi ukulu ukongwa. (Aro. 14:8) Kutuwa pa zuŵa lenili, mutuŵa kuti mwamukambiya Yehova kuti chinthu chakuzirwa ukongwa kwaku yimwi nkhumuteŵete, mumalu mwakujikondwesa mwija. Kujipatuliya ndi layizgu likulu lo mutimulayizga Chiuta. Yehova wachita kutichichizga cha kuti timulayizgi venivi. Kweni asani tachita viyo, iyu walindizga kuti tifiskengi vo tamulayizga.​—Sumu 116:12, 14.

5. Kumbi kujipatuliya kupambana wuli ndi kubatizika?

⁵ Kumbi kujipatuliya kupambana wuli ndi kubatizika? Munthu watuŵa kwakuyija asani watijipatuliya kwaku Yehova ndipu Yehova pe ndiyu waziŵa. Kweni kubatizika kuchitika pagulu la ŵanthu ndipu kanandi munthu wabatizika pa unganu wadera pamwenga wachigaŵa. Asani munthu wabatizika walongo kuti wakujipatuliya kali kwaku Yehova. * Ubatizu utovya ŵanthu kuziŵa kuti mutanja Yehova Chiuta ndi mtima winu wosi, umoyu winu wosi, maŵanaŵanu nginu ngosi ndi nthazi zinu zosi ndipuso kuti mwasimikiza kuti mumuteŵetiyengi kwa umoyu winu wosi.​—Mariko 12:30.

6-7. Mwakukoliyana ndi 1 Peturo 3:18-22, ntchifukwa wuli ubatizu ngwakukhumbika?

⁶ Kumbi kubatizika nkhwakukhumbika? Wonani vo Peturo wangukamba pa 1 Peturo 3:18-22. (Ŵerengani.) Chingalaŵa chalongonga kuti Nowa wenga ndi chivwanu mwaku Yehova. Mwakuyanana ŵaka, asani mubatizika mulongo kuti mukujipatuliya kwaku Yehova. Kweni kumbi ubatizu ngwakukhumbika nadi? Hinya. Peturo wangukamba chifukwa chaki. Chakwamba, wanguti ubatizu “utikutaskani.” Ubatizu ungatitaska asani vakuchita vidu vilongo kuti te ndi chivwanu mwaku Yesu, tigomezga kuti wakutifwiya, wanguyuskika ndi kuluta kuchanya kweniso kuti sonu we “kujanja lamaryi laku Chiuta.”

⁷ Chachiŵi, Peturo wangukamba kuti ubatizu utitiwovya kuti tije ndi “njuŵi yamampha.” Asani tajipatuliya kwaku Chiuta ndi kubatizika, tindere kufupi ukongwa ndi Yehova. Chiuta watitigowoke maubudi ngidu chifukwa chakuti tituŵa kuti talapa kutuliya pasi pamtima kweniso tivwana mu sembi yaku Yesu. Mwaviyo, tituŵa ndi njuŵi yamampha pamasu paku Yehova.

8. Kambani chifukwa chikulu cho mutenere kubatizikiya.

⁸ Kumbi ntchifukwa chikulu nichi cho mutenere kubatizikiya? Chifukwa chakuti mwasambira Bayibolu, tikayika cha kuti mwaziŵa vinandi vakukwaskana ndi Yehova, kung’anamuwa mijalidu yaki kweniso mo wachitiya vinthu. Vo mwasambira vakukwaskana ndi iyu vakufikani pamtima ndipu vakuchitiskani kuti mumuyanjengi ukongwa. Chifukwa chikulu ukongwa cho mutenere kubatizikiya nkhwanja Yehova.

9. Nge mo pakambiya pa Mateyu 28:19, 20, kumbi kubatizika mu zina la Ada, la Mwana, ndipuso la mzimu wakupaturika kung’anamuwanji?

⁹ Chifukwa chinyaki cho mutenere kubatizikiya ntchakuti mugomezga uneneska wa mu Bayibolu wo mwasambira. Wonani vo Yesu wangukamba pa nyengu yo waperekanga dangu lakuti tikasambizengi ŵanthu kuti aje akusambira. (Ŵerengani Mateyu 28:19, 20.)  Mwakukoliyana ndi vo Yesu wangukamba, ŵanthu wo abatizika, atenere kubatizika “mu zina la Ada, la Mwana, ndipuso la mzimu wakupaturika.” Kumbi venivi ving’anamuwanganji? Iyu wang’anamuwanga kuti mutenere kugomezga ndi mtima wosi uneneska wa mu Bayibolu wakukwaskana ndi Yehova, Mwana waki Yesu kweniso mzimu wakupaturika. Uneneska wenuwu ngwanthazi ukongwa ndipu ungakufikani pamtima. (Ahe. 4:12) Tiyeni tiwonepu unyaki mwa uneneska wenuwu.

10-11. Kumbi mbuneneska nuwu wakukwaskana ndi Ada wo mukusambira ndi kugomezga?

¹⁰ Ŵanaŵaniyani nyengu yo mungusambiriya uneneska wakukwaskana ndi Ada. Mungusambira kuti: ‘Zina laki ndi Yehova,’ ‘Ngwapachanya Limu pacharu chosi chapasi’ kweniso iyu yija ndiyu “Chiuta wauneneska.” (Sumu 83:18; Yesa. 37:16) Yehova ndi Mlengi widu ndipu ‘utaski utuliya kwaku iyu.’ (Sumu 3:8; 36:9) Iyu wakunozga nthowa kuti watitaski ku ubudi ndi nyifwa kweniso wakutilayizga umoyu wamuyaya. (Yoha. 17:3) Asani mwazijipatuliya ndi kubatizika mwazamulongo kuti ndimwi Kaboni waku Yehova. (Yesa. 43:10-12) Mwazamuja mu banja lapacharu chosi la ŵanthu wo akondwa kuziŵika ndi zina laku Chiuta ndi kukambiyaku anyawu zina ili.​—Sumu 86:12.

¹¹ Ndi mwaŵi ukulu ukongwa kuziŵa vo Bayibolu lisambiza vakukwaskana ndi Ada! Asani mwagomezga uneneska uwu, vikuchitiskeningi kuti mujipatuliyi kwaku Yehova ndi kubatizika.

12-13. Kumbi mbuneneska nuwu wakukwaskana ndi Mwana wo mwasambira ndi kugomezga?

¹² Kumbi munguchita wuli mwati mwasambira uneneska wakukwaskana ndi Mwana? Yesu ndiyu munthu wachiŵi wakukhumbika ukongwa kuchanya ndi pacharu chapasi. Iyu wangukhumbisiska kupereka umoyu waki nge sembi chifukwa chaku isi. Asani tilongo kuti te ndi chivwanu mu sembi yaku Yesu kuziya mu vakuchita vidu, Chiuta wangatigowoke maubudi ngidu, tingaŵa pa ubwezi ndi iyu ndipuso tingazilonde umoyu wamuyaya. (Yoha. 3:16) Yesu Ndiyu Wasembi widu Mura. Iyu wakhumba kutiwovya kuti tiyanduwi ndi sembi yaki ndi kuŵa pa ubwezi wakukho ndi Chiuta. (Ahe. 4:15; 7:24, 25) Pakuŵa Fumu ya Ufumu waku Chiuta, Yehova wazakumugwiriskiya ntchitu kuti watoweski zina laki, watuzgepu vinthu viheni ndi kupereka vitumbiku vambula kumala mu Paradayisu. (Mate. 6:9, 10; Chivu. 11:15) Yesu ntchakuwoniyapu chamampha cho tikhumbika kulondo. (1 Petu. 2:21) Po wenga pacharu chapasi iyu wajiperekanga pakuchita khumbu laku Chiuta ndipu nasi ndivu tikhumbika kuchita.​—Yoha. 4:34.

¹³ Asani mugomezga vo Bayibolu lisambiza vakukwaskana ndi Yesu, mumuyanjengi ukongwa Mwana waku Chiuta. Chanju chenichi chikuchitiskeningi kuti muchitengi khumbu laku Chiuta nge mo Yesu wanguchitiya. Ndipu venivi vikuchiskeningi kuti mujipatuliyi kwaku Yehova ndi kubatizika.

14-15. Kumbi mbuneneska nuwu wakukwaskana ndi mzimu wakupaturika wo mwasambira ndi kugomezga?

¹⁴ Kumbi munguŵanaŵananji mwati mwasambira uneneska wakukwaskana ndi mzimu wakupaturika? Mwakuyeruzgiyapu, mungusambira kuti mzimu wakupaturika ndi munthu cha, kweni ndi nthazi yo Chiuta wagwiriskiya ntchitu. Yehova wangugwiriskiya ntchitu mzimu wakupaturika pakulongozga ŵanthu wo alembanga Bayibolu. Ndipu mzimu wenuwu utitiwovya kuvwisa ndi kugwiriskiya ntchitu vo tiŵerenga mu Bayibolu. (Yoha. 14:26; 2 Petu. 1:21) Yehova wagwiriskiya so ntchitu mzimu waki wakupaturika kutipaska “nthazi yakujumpha yo tituŵa nayu.” (2 Akori. 4:7) Kweniso mzimu utitipaska nthazi kuti tipharazgengi uthenga wamampha, timalani ndi mayeseru ndi vakuguŵiska kweniso kuti tikunthiyengepu masuzgu. Utitiwovya so kuti tije ndi mijalidu yamampha “yo mzimu utuzga.” (Aga. 5:22) Chiuta wapereka ndi mtima wosi mzimu waki wakupaturika ku ŵanthu  wo atimuthemba ndi kumupempha kutuliya pasi pamtima.​—Luka 11:13.

¹⁵ Vakuchiska ukongwa kuti Yehova wagwiriskiya ntchitu mzimu wakupaturika kuti wawovyi ateŵeti ŵaki po atimuteŵete! Asani mwagomezga uneneska wo mwasambira wakukwaskana ndi mzimu wakupaturika, vingakuchitiskani kuti mujipatuliyi kwaku Chiuta ndi kubatizika.

16. Kumbi kufika yapa takambiskananji?

¹⁶ Asani mwasankha kujipatuliya kwaku Chiuta ndi kubatizika, ndikuti mwasankha chinthu chakukhumbika ukongwa. Nge mo tasambiriya, mutenere kukhumbisiska kukunthiyapu masuzgu ndi kusiya vinthu vinyaki vo mutanja. Kweni vitumbiku vo mwazamulonde, vinandi ukongwa kuphara vinthu vo mungaleka. Ubatizu ungakutaskani kweniso ungakuwovyani kuti muje ndi njuŵi yamampha pamasu paku Chiuta. Kwanja Yehova Chiuta ndiku kutenere kukuchitiskani kuti mubatiziki. Mutenere so kugomezga ndi mtima winu wosi uneneska wo mwasambira wakukwaskana ndi Ada, Mwana ndi mzimu wakupaturika. Kufika yapa, takambiskana vo mukhumbika kuchita kuti mubatiziki. Kumbi sonu mungamuka wuli fumbu lakuti, “Kumbi nde wakunozgeka kubatizika?”

17. Kumbi ndi vinthu wuli vo munthu wakhumbika kuchita wechendabatiziki?

¹⁷ Asani muwona kuti mwe akunozgeka kubatizika, tikayika cha kuti mwachita kali vinandi kuti muje pa ubwezi wakukho ndi Yehova. * Chifukwa chakuti musambira Bayibolu kaŵikaŵi mwaziŵa vinandi vakukwaskana ndi Yehova ndi Yesu. Sonu mwe ndi chivwanu. (Ahe. 11:6) Mugomezga ndi mtima wosi vo Yehova wakulayizga mu Bayibolu kweniso musimikiza kuti kuvwana mu sembi yaku Yesu kungakuwovyani kuti mutaskiki ku ubudi ndi nyifwa. Mukulapa maubudi nginu, kung’anamuwa kuti mungujivwiya chitima chifukwa cha vinthu viheni vo mwachitanga ndipu mungupempha Yehova kuti wakugowokiyeni. Mukung’anamuka, kung’anamuwa kuti mukuleka kuchita vinthu viheni ndipu mukwamba kuchita vinthu vo vikondwesa Chiuta. (Machi. 3:19) Mukhumbisiska kukambiyaku anyinu vo mugomezga. Sonu mwe akwenere kuŵa mupharazgi wambula kubatizika ndipu mukwamba kupharazga ndi mpingu. (Mate. 24:14) Yehova wamalika namwi chifukwa chakuchita vinthu vakukhumbika venivi. Mutimukondwesa ukongwa.​—Nthanthi 27:11.

18. Kumbi mukhumbika so kuchitanji mwechendabatiziki?

¹⁸ Mwechendabatiziki, pe vinthu vinyaki so vo mukhumbika kuchita. Nge mo tawone kali, mutenere kujipatuliya kwaku Chiuta. Mutenere kupemphera kwaku iyu kutuliya pasi pamtima kuti mumukambiyi kuti muchitengi khumbu laki pa umoyu winu. (1 Petu. 4:2) Asani mwachita viyo, mutenere kukambiya wakukumaniska ntchitu za wupu wa ŵara kuti mukhumba kubatizika. Iyu wapemphengi ŵara anyaki kuti akumani namwi.  Kweni mungachitanga mantha cha asani akudanani kuti akumani namwi. Mukumbukengi kuti abali ŵenaŵa atikuziŵani ndipuso atikuyanjani. Yiwu akufumbeningi mafumbu ngakukwaskana ndi fundu zakwambiriya za mu Bayibolu zo mukusambira. Ŵara yaŵa akhumba waka kusimikiziya asani mukuzivwisisa fundu zenizi kweniso asani muziŵa kukhumbika kwa kujipatuliya ndi kubatizika. Asani asimikiziya kuti mwe akunozgeka nadi kubatizika, angakukambiyani kuti mwamubatizika pa unganu wadera pamwenga wachigaŵa wo uchitikengi.

19-20. Kumbi mukhumbika kuchitanji asani mwabatizika, nanga mungachita wuli venivi?

¹⁹ Kumbi mutenere kuchitanji asani mwabatizika? * Kumbukani kuti kujipatuliya ndi layizgu lo munthu wakambiya Yehova ndipu iyu wakhumba kuti mulisungi. Mwaviyo, asani mwabatizika mukhumbika kuchita vinthu mwakukoliyana ndi vo mukulayizga. Kumbi mungachita wuli venivi?

²⁰ Mungajipatuwanga cha kwa abali ndi azichi a mu mpingu winu. Chifukwa chakuti mukubatizika, sonu mwe mu ‘gulu la abali.’ (1 Petu. 2:17) Abali ndi azichi mu mpingu winu ŵe nge ŵanthu amubanja linu. Asani muwunganengi nyengu zosi mujengi nawu pa ubwezi wakukho. Mukhumbika kuŵerenga Mazu ngaku Chiuta zuŵa lelosi ndi kuŵanaŵaniyapu. (Sumu 1:1, 2) Asani mwaŵerenga mavesi ngamanavi mu Bayibolu, mumengi dankha ndi kuŵanaŵaniyapu pa vo mwaŵerenga. Ndipu asani mwachita viyo, vo mwaŵerenga vikufikeningi pamtima. “Lutirizgani kupemphera.” (Mate. 26:41) Mapempheru nginu ngakutuliya pasi pamtima ngakuwovyeningi kuti mundere kufupi ndi Yehova. “Lutirizgani kupenja dankha Ufumu.” (Mate. 6:33) Mungachita viyo, asani muwona kuti ntchitu yakupharazga ndiyu yakukhumbika ukongwa pa umoyu winu kuphara vinthu vinyaki vosi. Asani mupharazgengi kaŵikaŵi, chivwanu chinu chiŵengi chakukho ndipu muwovyengi ŵanthu kuti ayendengi pa nthowa yakuluta ku umoyu wamuyaya.​—1 Timo. 4:16.

21. Kumbi musaniyengi vitumbiku wuli asani mwabatizika?

²¹ Kujipatuliya kwaku Yehova ndi kubatizika ntchinthu chakukhumbika ukongwa kuluska vinthu vinyaki vosi vo mungasankha. Mbuneneska kuti mwazamukumana ndi masuzgu asani mwazibatizika ndipuso mwazamukhumbika kuleka vinthu vinyaki vo mutanja. Kweni kumbi mwazamudandawula chifukwa chakuchita viyo? Awa! Masuzgu ngosi ngo mungakumana nangu mucharu ichi, “ngakujalisa cha ndipu ngapepu.” (2 Akori. 4:17) Kweni ubatizu ungakuwovyani kuti muje ndi umoyu wamampha sonu kweniso kuti muzisaniyi “umoyu weneku” kunthazi. (1 Timo. 6:19) Mwaviyo, ŵanaŵaniyanipu umampha ndi kupemphera kwaku Yehova pakumuka fumbu lakuti, “Kumbi nde wakunozgeka kubatizika?”