1. Muthu yede gu gira ginani na si pheyi gu vbaha nyumba?

NGA dundrugeya khu muthu a vbwetago gu vbaha nyumba. Uye a ngu liti lifumbo nya nyumba a vbwetago gu vbaha. Ganiolu, ina yede gu dzegeya gu hongola aya renga materiyali gasi guta vbaha nyumba a yi vbwetago? Ne. Na si gu yi pheyi, gyomo gilo nya lisima ngudzu a yedego gu gira. Gu vbwetega a pheya khu gu dundrugeya khu tengo nya dzitsapawu dzi na vbwetegago. Khu ginani? Kholu yede gu dziti gu khuye a na ni dzitsapawu nyo eneye gasi gu vbedza gu vbaha nyumba gani. A gu pheya khu gu dundrugeya gwadi khu tengo nya dzitsapawu wu na vbwetegago si na mu vbevbugeya gambe gu vbaha nyumba a yi vbwetago nya mba na gigaradzo.

2. Guya khu Luka 14:27-30, ginani u yedego gu dundrugeya khigyo gwadi na wu si gu bhapatiswe?

² Ina lihaladzo lago khu Jehovha ni gu bonga khesi a gu giredego si ngu gu kutsa gu dundrugeya khu gu bhapatiswa? Abari kharato, u womo giemoni nyo fane ni gya mwama wule a vbwetago gu vbaha nyumba. Khu ginani hi ganeyago isoso? Nga wona malito ya Jesu ma gomogo omu ga Luka 14:27-30. (Leri.) Jesu a di gu ganeya khesi si vbwetegago gasi gu khala mupizane waye. Ha gu ba hi vbweta gu mu landreya hi yede gu dzi emiseya gu timiseya sigaradzo nyo khaguri hi bwe hi dzima silo nyo khaguri. (Luka 9:23-26; 12:51-53) Khu kharato, na wu si gu bhapatiswe, gu vbwetega u dundrugeya gwadi khu satshavbo si na pategago. Khavbovbo, u na ba u dongide gu simama gu thumeya Nungungulu na wu tumbegide kha nga muKristo a bhapatisidwego.

3. Ginani hi na ganeyago khigyo avba nya ndrima yeyi?

³ Ina kamo hi na wuyedwa khu gilogyo khu gu khala vapizane va Kristo ambari olu hi na emisanago ni sigaradzo nya singi hi bwe hi dzi hiya silo nyo khaguri? Kha si kanakanisi! Gubhapatiswa gu ngu gu tuleya lidimba nyo mane makategwa nya mangi — olu ni mindru  wa tshigu. Hongoleni hi ganeyani khu siwudziso nya lisima maningano ni gubhapatiswa. Iso si na gu phasa gu hlamula giwudziso gegi: “Ina nyi dongide gasi gu bhapatiswa?”

4. a) Ginani gudzihendzeledza? b) So thula ginani gu “dzi nyenya” wurumba wago, kha nga si ganedwego ga Matewu 16:24?

⁴ Ginani gudzihendzeledza? Na wu si gu bhapatiswe, u yede gu dzi hendzeledza. Gu dzi hendzeledza ga Jehovha so thula gu gira nombelo wu khugeyago monyoni, u tumbisa Jehovha gu khuwe u na thumisa womi wago gasi gu mu thumeya kala gupindruga. Tepo u dzi hendzeledzago ga Nungungulu, wo “dzi nyenya” wurumba wago. Jesu a di embeya vapizane vaye khuye: “Uye a vbwetago gu nyi landrela, a na dzi nyenye wurumba waye, a vbagare simbo waye nya tshanisa a nyi landrela.” (Matewu 16:24, NM) Olu uwe wa gu lumba Jehovha ni gu isoso lithomo nya likhongolo ngudzu. (Rom. 14:8) Wa gu mu embeya gu khuwe, gukhugeya muhuno gilo nya lisima ngudzu guvbanyani gwago gu thumeya uye nasiri gu dzi tsakisa uwe mune. Gudzihendzeledza gwago gifungo mwendro gitumbiso nya lisima ngudzu u gireyago Nungungulu. Jehovha kha hi gurumedzi gu gira gifumbo gegi. Ganiolu tepo hi girago, uye a gu vireya gu khuye hi gi tadzisa. — Ndzi. 116:12, 14.

5. Gudzihendzeledza go yelana kharini ni gubhapatiswa?

⁵ Gudzihendzeledza go yelana kharini ni gubhapatiswa? Gudzihendzeledza gilo u girago na wu si wonwi khu muthu; gi khuhago uwe ni Jehovha basi. Ganiolu gubhapatiswa gilo u girago na wu gu wonwa khu vathu; wa gu bhapatiswa mbeli nya vambe vathu, gutala nya dzitepo mitshanganoni nya gipandre ni mitshanganoni nya mughanga. Tepo u bhapatiswago, vambe vathu va gu dzegeya gu si wona gu khavo u dzi hendzeledzide ga Jehovha. * Khu kharato gubhapatiswa gwago ga gu yeyedza vambe vathu gu khuwe u ngu mu haladza Jehovha Nungungulu wago khu monyo wago watshavbo, hefemulo wago watshavbo, mapimo yago yatshavbo ni tshivba yago yatshavbo nigu u dzi emisede gu mu thumeya kala gupindruga. — Marko 12:30.

6-7. Guya khu 1 Pedro 3:18-22, khu ginani hi yedego gu bhapatiswa?

⁶ Ina si ngu vbwetega kamo gu hi bhapatiswa? Nga wona malito ma gomogo omu ga 1 Pedro 3:18-22. (Leri.) Litaro li yeyedzide vathu gu khilo Nowa a diri ni gukhodwa ga Nungungulu. Khu ndziya nyo fane, gubhapatiswa gwago ga gu yeyedza vathu gu khugo u dzi hendzeledzide ga Jehovha. Ganiolu ina gubhapatiswa gu ngu vbwetega kamo? Ina! Pedro ganede khu sighelo sakone. Nyo pheye, gu ngu gu ‘vbanyisa.’ Gubhapatiswa gu nga hi vbanyisa ha gu yeyedza khu mithumo yathu gu khethu hi ngu khodwa ga Jesu hi bwe hi khodwa gu khethu a hi fede, a wusidwe khu gufani a hongola ndzadzini ni gu khethu womo khu “nyamudye ga Nungungulu.”

⁷ Nya wuvili, gubhapatiswa gu na hi gira hi manega ni livhalo nya ladi. Tepo hi dzi hendzeledzago ga Nungungulu hi bwe hi bhapatiswa, ha gu pheya wupari nyo hathege naye. Khu kotani nya olu hi dzi layidego khu lisine ni gukhodwa avba nya dzegiso wa Jesu, Nungungulu a ngu hi divaleya sighoho sathu. Khu kharato hi nga si kodza gu manega ni livhalo li agidego mahoni ga Nungungulu.

8. Khu gevbini gi yedego gu khala gighelo nya litshina nya gubhapatiswe gwago?

⁸ Khu gevbini gi yedego gu khala gighelo nya litshina nya gubhapatiswe gwago? Kha nga olu u hevbudego gwadi Bhibhiliya u tide nya singi khu Jehovha — makhalelo yaye, esi a si nyenyago ni esi a si golago. Esi u si hevbudego khuye si khuhide monyo wago si bwe si gu kutsa gu mu haladza ngudzu. Lihaladzo lago khu Jehovha li yede gu khala igyo gighelo nya litshina nya gubhapatiswe gwago.

9. Kha nga si ganedwago omu ga Matewu 28:19, 20, so thula ginani gu bhapatiswa khu lina la Babe ni la Mwamana ni la liphuvbo nya guage?

⁹ Gimbe gighelo gi gu giridego u vbweta gu  bhapatiswa kholu u hevbudego esi Bhibhiliya yi si hevbudzago u bwe u si khodwa. Nga wona esi Jesu a ganedego tepo a nga hi ruma gu gira vapizane. (Leri Matewu 28:19, 20.) Khu guya khu malito ya Jesu, vale va vbwetago gu bhapatiswa va yede gu gira isoso khu “lina la Babe, ni la Mwamana ni la liphuvbo nya Guage.” So thula ginani isoso? Gu vbwetega u khodwa khu monyo wago watshavbo lisine nya Bhibhiliya maningano ni Jehovha; Gyanana gyaye ni liphuvbo nya guage. Lisine maningano ni silo sesi li na ni tshivba ngudzu nigu li nga si kodza gu khuha ngudzu monyo wago. (Hebh. 4:12) Hongoleni hi bhulani khu simbe nya silo soso.

10-11. Lisine muni u li hevbudego maningano ni Babe u bwe u li dzumeya?

¹⁰ Nga dundrugeya khu tepo u hevbudego esi maningano ni Babe: Lina laye khuye Jehovha, uye khuye a “Khusegidego ngudzu vbatshani nya litigo latshavbo” nigu khuye enga a gu Nungungulu nya lisine. (Ndzi. 83:18, NM; Isa. 37:16) Uye khuye Muvangi wathu nigu ‘guvbanyiswa gwa guta khiyo ga [Jehovha].’ (Ndzi. 3:8; 36:9) Uye giride malulamiselo nyo hi vbulugise avba nya gighoho ni gufa a bwe a hi ninga gutumba nyo vbanye kala gupindruga. (Joh. 17:3) Gudzihendzeledza gwago ni gubhapatiswa sa gu gu tivegisa kha nga mweyo nya Dzifakazi dza Jehovha. (Isa. 43:10-12) U na gira gipandre nya ndranga yathu ya mafuni gwatshavbo nya vakhozeyi va tsakiswago khu gu ranwa khu lina la Nungungulu va bwe va li tivegisa ga vambe. — Ndzi. 86:12.

¹¹ Kha hi kanakani gu khethu lithomo nya likhongolo ngudzu gu pwisisa esi Bhibhiliya yi si hevbudzago khu Papayi wathu! Tepo u dzumeyago lisine nya lisima li gomogo omu nya Bhibhiliya, monyo wago wu na gu kutsa gu dzi hendzeledza ga Jehovha u bwe u bhapatiswa.

12-13. Lisine muni u li hevbudego maningano ni Mwamana?

¹² U dzipwide kharini tepo u hevbudego lisine li landreyago maningano ni Mwamana? Jesu khuye muthu nya wuvili nya lisima ngudzu mafuni ni ndzadzini. Khuye a nga hi dzegisa. Uye a di dzi emiseya gu ningeya womi waye khu kotani yathu. Tepo hi yeyedzago khu sigiro gu khethu hi na ni gukhodwa avba nya dzegiso, hi nga si kodza gu divaledwa sighoho sathu, hi engedzeya wupari wathu ni Nungungulu hi bwe hi mana guvbanya nya gupindruge. (Joh. 3:16) Jesu khuye Muphasi wathu nya khongolo nya Mhamba. A gu vbweta gu khuye hi phasega khu dzegiso ni gu bwe hi manega ni wupari wa vbafuvbi ni Nungungulu. (Hebh. 4:15; 7:24, 25) Kha nga Pfhumu nya Mufumo wa Nungungulu, khuye a na thumiswago khu Jehovha gasi gu agisa lina Laye, a fuvisa wuvivbi watshavbo a bwe a hi reseya makategwa nya mba vbeya mafuni, Paradhesini. (Mat. 6:9, 10; Gutu. 11:15) Jesu khuye giyeyedzo gyathu. (1 Ped. 2:21) Hi vegede giyeyedzo nya gyadi khu gu thumisa womi waye gasi gu gira gugola ga Nungungulu. — Joh. 4:34.

¹³ Tepo u dzumeyago esi Bhibhiliya yi si hevbudzago maningano ni Jesu, wa gu haladza Mwamana nya gigodwa wa Nungungulu. Lihaladzo lolo li na gu kutsa gu thumisa womi wago gasi gu gira gugola ga Nungungulu, kha nga edzi Jesu a giridego khidzo. Kha nga handro wakone, u na kutsega gu dzi hendzeledza ga Jehovha u bwe u bhapatiswa.

14-15. Lisine muni maningano ni liphuvbo nya guage u li hevbudego ni gu li khodwa?

¹⁴ Ginani u gi pimisago tepo u hevbulago lisine li landreyago maningano ni liphuvbo nya guage? Ilo khandri muthu, tshivba eyi Nungungulu a yi thumisago. Jehovha thumiside liphuvbo nya guage gasi gu thangeya vama va lovidego Bhibhiliya. Nigu ilo li ngu hi phasa gu pwisisa esi hi si lerigo omu nya Bhibhiliya ni gu si thumisa guvbanyani gwathu. (Joh. 14:26; 2 Ped. 1:21) Khu gu thumisa liphuvbo laye, Jehovha a ngu hi ninga tshivba “nya yikhongolo” ngudzu. (2 Kor. 4:7) Liphuvbo nya guage li ngu hi ninga tshivba gasi gu tshumayela mahungu nya yadi, gu emisana ni silingo, gu emisana ni gu vbeya tshivba hi bwe hi timiseya sigaradzo. Ilo li ngu hi phasa gambe gu yeyedza  makhalelo nyo mbure nya mihandro nya liphuvbo. (Gal. 5:22) Nungungulu a gu ninga liphuvbo laye vale va mu tumbago va bwe va mu lomba na si gu khugeya monyoni. — Luka 11:13.

¹⁵ Si ngu tiyisa ngudzu guti gu khethu vakhozeyi va Jehovha va nga phaswa khu liphuvbo nya guage gasi gu thumeya Nungungulu! Tepo u khodwago lisine u li hevbudego maningano ni liphuvbo nya guage, u na kutsega gu dzi hendzeledza ga Nungungulu u bwe u bhapatiswa.

16. Ginani hi gi hevbudego kala avba?

¹⁶ Gu hunga gu dzi hendzeledza ga Nungungulu ni gu bhapatiswa silo nya lisima ngudzu. Kha nga hi si hevbudego, gu vbwetega u dzi emiseya gu timiseya sigaradzo nyo khaguri u bwe u dzima silo nyo khaguri. Ganiolu makategwa yakone mangi ngudzu guvbindra esi hi dzi hiyago. Gubhapatiswa gu nga gu vbulugisa gu bwe gu gu gira u manega ni livhalo li agidego mahoni ga Nungungulu. Lihaladzo lago khu Jehovha Nungungulu khigyo gighelo nya litshina gi yedego gu gu kutsa gu bhapatiswa. U yede gambe gu khodwa khu monyo wago watshavbo lisine u li hevbudego maningano ni Babe, Mwamana ni liphuvbo nya guage. Hwane nya satshavbo hi si hevbudego kala avba, u di hadzi hlamula kharini giwudziso gegi: “Ina nyi dongide gasi gu bhapatiswa?”

17. Khu sevbini esi muthu a yedego gu gira na si gu bhapatiswe?

¹⁷ Wa gu ba u dzipwa na wu dongide gasi gu bhapatiswa, kha si kanakanisi gu khiso u giride silo nya singi gasi gu vbaha wupari nyo tiye ni Jehovha. * Nigu khu kotani nya olu u hevbulago Bhibhiliya tshigu ni tshigu u si kodzide guti nya singi khu Jehovha ni Jesu. U hagulede gukhodwa. (Hebh. 11:6) U ngu tumba khu guvbeleya situmbiso sa Jehovha si gomogo omu nya Bhibhiliya ni gu u ngu tiyisega gu khuwe gukhodwa gwago avba nya muphaso wa Jesu gu nga gu vbulugisa ga gighoho ni gufa. U dzi layide sighohoni sago kholu u dzipwide nandru khu kotani nya sighoho u si giridego khavbovbo u lomba gu khuwe Jehovha a gu divaleya. U vbindrugedzide mavbanyelo yago, iso si thulago gu nyenya mavbanyelo yago ya gale u bwe u pheya gu vbanya khu ndziya nya yadi yi tsakisago Nungungulu. (Mith. 3:19) U ngu nyaganyedwa khu gu vbweta gu bhuleya vambe esi u si khodwago. U ninganedwe khu gu khala muhuweleyi a si gu bhapatiswigo khavbovbo u pheya gu tshumayela ni libandla. (Mat. 24:14) Jehovha a ngu tsaka ngudzu khuwe kholu u giridego silo sesi nya lisima ngudzu. U ngu tsakisa ngudzu monyo waye. — Mav. 27:11.

18. Ginani gimbe u yedego gu gira na wu si gu bhapatiswe?

¹⁸ Na wu si gu bhapatiswe somo simbe silo nya sidugwana u yedego gu gira. Kha nga hi si wonidego gupheyani gu vbwetega u dzi hendzeledza ga Nungungulu. U mu hidzimeleya khu nombelo u mu tumbisa gu khuwe u na thumisa womi wago gasi gu gira gugola gwaye. (1 Ped. 4:2) Khavbovbo embeya mutshanganise nya huwo nya madhota gu khuwe u ngu vbweta gu bhapatiswa. Uye a na lomba  madhota nyo khaguri gasi gu bhula nago. U nga khali hwanga gu tshangana nawo. Dundruga gu khuwe vandriyathu vava va ngu guti nigu va ngu gu gola. Avo va na wusedza nago sihevbudzo nya litshina nya Bhibhiliya u si hevbudego. Avo va gu vbweta gu tiyisega gu khavo u ngu si pwisisa sihevbudzo sesi ni gu u ngu liti lisima nya gu dzi hendzeledze ni gubhapatiswa. Va gu wona gu khavo u ngu ninganedwa, avo va na gu embeya gu khavo u na bhapatiswa ga tshangano nya gipandre wu landreyago mwendro ga tshangano nya mughanga wu landreyago.

19-20. Ginani u yedego gu gira hwane nya gu bhapatiswe nigu u nga si gira kharini?

¹⁹ Hwane nyo bhapatiswe u yede gu gira ginani? * Dundruga gu khuwe gudzihendzeledza gifungo egi Jehovha a vireyago gu khuye gima u si gi digi. Khu kharato, hwane nyo bhapatiswe gu vbwetega u vbanya guya khesi u si tumbisidego. U nga gira kharini isoso?

²⁰ U nga dzi hambanisi ni libandla lago. Kha nga muKristo a bhapatisidwego, olu wa gu gira gipandre nya hengeledzano nya vandriyathu. (1 Ped. 2:17) Vandriyago libandlani khavo valongo vago khu liphuvboni. Wa gu hongola mitshanganoni tshigu ni tshigu u na tiyisa gupwanana gwago navo. Leri Lito la Nungungulu tshigu ni tshigu u bwe u dundrugeya khilo. (Ndzi. 1:1, 2) Hwane nya gu leri gipandre nyo khaguri nya Bhibhiliya tshiya tepo nyo khaguri gasi gu dundrugeya gwadi khesi u si leridego. Khavbovbo malito yoyo ma na khuha monyo wago. Gombeya tepo yatshavbo. (Mat. 26:41) Milombelo yago yi khugeyago monyoni yi na tiyisa wupari wago ni Jehovha. ‘Gupheya dwaneya Mufumo wa Nungungulu.’ (Mat. 6:33) U nga gira isoso khu gu thangisa thumo nya gutshumayele guvbanyani gwago. Wa gu hongola thumoni nya gutshumayele tepo yatshavbo u na tiyisa gukhodwa gwago nigu u na phasa vambe gu mana gutumba nya womi nya gupindruge. — 1 Thim. 4:16.

21. Gubhapatiswa gu na gu tuleya ndziya nyo mane ginani?

²¹ Gu dzi hendzeledza ga Jehovha ni gu bhapatiswa khigyo gilo nya lisima ga satshavbo u na girago. Ganiolu khu lisine singi si pategago. Ina kamo hi na wuyedwa khu gu gira isoso? Kha si kanakanisi! Ni gevbini gigaradzo u na emisanago nagyo mafuni momu khya ‘guvbevbuga nigu khya gikhatinyana.’ (2 Kor. 4:17) Khu lisine, gubhapatiswa gu na gu tuleya ndziya nyo mane womi nyo tsakise ngudzu olu ni “guvbanya nya lisine” teponi yi tago. (1 Thim. 6:19) Khu kharato, dundrugeya gwadi khu hlamulo wago ga giwudziso gegi: “Ina nyi dongide gasi gu bhapatiswa?”