1. Ino ncinzi ncayelede kucita muntu katanatalika kuyaka ŋanda?

AMWEEZEEZYE kujatikizya muntu uuyanda kuyaka ŋanda. Uliizyi ŋanda njayanda kuyaka. Sena muntu ooyo inga waile kunyamuka buyo akuunka kuyooula zintu zyakuyasya ŋanda akutalika kuyaka? Peepe. Katanatalika kuyaka, kuli cintu cimwi iciyandika kapati ncayelede kucita. Weelede kuzyiba mali aayandika kutegwa ŋanda yakwe ikamane kuyakwa. Nkaambo nzi? Nkaambo weelede kuzyiba naa ulijisi mali aakkwene. Ikuti naa wazyibila limwi mali aayandika, tacidoonekwi buya kuti uyoocikonzya kwiiyaka ŋanda yakwe.

2. Kweelana alugwalo lwa Luka 14:27-30, ncinzi ncomweelede kuyeeya kamutanabbapatizyigwa?

² Sena luyando ndomujisi kuli Jehova alimwi akulumba kuzintu nzyaakamucitila kwakamupa kuba amakanze aakubbapatizyigwa? Kuti naa mboobo, cakusala canu cilikozyenye acamwaalumi uuyanda kuyaka ŋanda. Nkaambo nzi ncotwaambila boobo? Amubone majwi aa Jesu aajanika kulugwalo lwa Luka 14:27-30. (Amubale.) Jesu wakapandulula ncocaamba kuba sikwiiya wakwe. Kuti katuyanda kumutobela, tweelede kuti katulisungwide kuliyumya kumapenzi alimwi akuliimya zintu zimwi. (Lk. 9:23-26; 12:51-53) Aboobo kamutanabbapatizyigwa, mweelede kuzinzibala kuyeeya zintu zyoonse izijatikizyidwe mukubbapatizyigwa. Kuti mwacita oobo, munoolibambilide kuzumanana kubelekela Leza cakusyomeka kamuli Munakristo uubbapatizyidwe.

3. Ncinzi ncotutiibandike mucibalo eeci?

³ Sena kutegwa mube sikwiiya wa Kristo uubbapatizyidwe mweelede kupenga alimwi akuleka zintu zimwi? Inzya muleelede! Nkaambo kubbapatizyigwa kuletela zilongezyo zinji lino alimwi akumbele. Atubandike mibuzyo iiyandika kapati kujatikizya lubbapatizyo. Kucita boobo kuyoomugwasya kwiingula  mubuzyo ooyu wakuti, “Sena ndililibambilide kubbapatizyigwa?”

4. (a) Ino kulyaaba kuli Jehova caamba nzi? (b) Kweelana alugwalo lwa Matayo 16:24, ino ‘kuliimya’ caamba nzi?

⁴ Ino kulyaaba caamba nzi? Kamutanabbapatizyigwa, mweelede kulyaaba. Ciindi nomulyaaba kuli Jehova, mulapaila kulinguwe kuzwa ansi aamoyo akumwaambila kuti muyanda kumubelekela kukabe kutamani. Ciindi nomwalyaaba kuli Leza, ‘mulaliimya.’ (Amubale Matayo 16:24.) Icaamba kuti lino muzulilwa kuli Jehova, calo icili ncoolwe cipati. (Rom. 14:8) Kwiinda mukucita boobo, mwaambila Jehova kuti kuzwa lino, munoobikkila kapati maano kukubelekela nguwe ikutali kukulikkomanisya nobeni. Kulyaaba kwanu ncikonke, nkokuti ncisyomezyo cipati muntu ncasyomezya Leza. Jehova kunyina natusinikizya kupanga cikonke eeco. Pele ciindi notwakonka, uyanda kuti tucizuzikizye cikonke cesu.—Int. 116:12, 14.

5. Ino kulyaaba alimwi akubbapatizyigwa ziindene buti?

⁵ Ino kulyaaba akubbapatizyigwa ziindene buti? Kulyaaba ncintu ncomucita kamuli nyolikke; maseseke aanu a Jehova. Pele kubbapatizyigwa ncintu cicitwa kubuleya; kulacitwa bantu kabalangilila, kulacitwa lyamuswaangano wabbazu naa wacooko. Ciindi nomwabbapatizyigwa, mutondezya bantu kuti mwakalyaaba kale kuli Jehova. * Aboobo lubbapatizyo lwanu luzyibya bantu kuti mulamuyanda Jehova Leza wanu amoyo wanu woonse, abuumi bwanu boonse, amizeezo yanu yoonse alimwi anguzu zyanu zyoonse alimwi akuti mwakalyaaba kumubelekela mane kukabe kutamani.—Mk. 12:30.

6-7. Kweelana alugwalo lwa 1 Petro 3:18-22, ntwaambo nzi tobilo itutondezya kuti lubbapatizyo lulayandika?

⁶ Sena kubbapatizyigwa kulayandika kapati? Amubone majwi aali kulugwalo lwa 1 Petro 3:18-22. (Amubale.) Mbubwenya bwato bwa Nowa mbobwakali bumboni ibulibonya kubantu bwakuti Nowa wakali aalusyomo muli Leza, alwalo lubbapatizyo lwanu mbumboni ibulibonya kubantu ibwakuti mwakalyaaba kuli Jehova. Pele sena lubbapatizyo lulayandika kapati? Inzya lulayandika. Petro wakakaamba kaambo lubbapatizyo ncoluyandika. Cakusaanguna wakaamba kuti, ‘lulamufwutula.’ Lubbapatizyo lulakonzya kutufwutula ikuti kwiinda mubukkale bwesu twatondezya kuti tulaalusyomo muli Jesu alimwi akusyoma kuti wakatufwida, wakabusyigwa kuunka kujulu, alimwi “lino uli kujanza lyalulyo lya Leza.”

⁷ Cabili, lubbapatizyo lupa kuba ‘amanjezyeezya mabotu.’ Ciindi notulyaaba kuli Leza alimwi akubbapatizyigwa, tuba acilongwe caalubazu anguwe. Akaambo kakweempwa kuzwa ansi aamoyo alimwi alusyomo mucinunuzyo, Leza ulatulekelela zibi zyesu. Aboobo tulakonzya kuba amanjezyeezya mabotu kulinguwe.

8. Nkaambo nzi kapati ikeelede kumupa kubbapatizyigwa?

⁸ Nkaambo nzi kapati ikeelede kumupa kubbapatizyigwa? Akaambo kakwiiya Bbaibbele cakusitikila, mwakazyiba zintu zinji kujatikizya Jehova, nkokuti bube bwakwe alimwi anzila zyakwe. Nzyomwakaiya kujatikizya nguwe zyakamusika amoyo akumupa kumuyanda kapati. Luyando ndomujisi kuli Jehova nkakaambo kapati ikeelede kumupa kubbapatizyigwa.

9. Kweelana alugwalo lwa Matayo 28:19, 20, ino caamba nzi kubbapatizyigwa muzina lya Taata alya Mwana alya muuya uusalala?

⁹ Kaambo kamwi ikeelede kumupa kubbapatizyigwa nkakuti mwakakaiya kasimpe kamu Bbaibbele akukasyoma. Amubone ncaakaamba Jesu ciindi naakapa malailile aakugwasya bantu kuba basikwiiya. (Amubale Matayo 28:19, 20.) Kweelana ancaakaamba Jesu, aabo ibabbapatizyigwa, beelede kubbapatizyigwa “muzina lya Taata alya Mwana alya muuya uusalala.” Pele ino  eeci cakali kwaamba nzi? Mweelede kukasyoma amoyo wanu woonse kasimpe kamu Bbaibbele kajatikizya Jehova; Mwanaakwe, Jesu alimwi amuuya uusalala. Kasimpe aaka kalaanguzu kapati alimwi kalakonzya kumusika amoyo. (Heb. 4:12) Atulange-lange twaambo tumwi kujatikizya kasimpe aaka.

10-11. Nkasimpe nzi ikajatikizya Taata nkomwakaiya alimwi akusyoma?

¹⁰ Amuyeeye ciindi nomwakaiya kasimpe aaka kajatikizya Taata: “Izina lyakwe ngu Jehova,” ngo “Mupatikampatila atala aanyika yoonse” alimwi walo alikke ngo “Leza mwini-mwini.” (Int. 83:18; Is. 37:16) Mulengi wesu alimwi ‘lufwutuko luzwa kulinguwe.’ (Int. 3:8; 36:9) Wakabikka bubambe bwakutufwutula kuzwa kucibi alufwu alimwi wakatupa bulangizi bwakuyoopona kukabe kutamani. (Joh. 17:3) Kulyaaba alimwi akubbapatizyigwa kwanu kuyootondezya kuti muli umwi wa Bakamboni ba Jehova. (Is. 43:10-12) Muyooba cibeela camukwasyi wanyika yoonse wabakombi ba Leza ibakkomana kwiitwa azina lyakwe alimwi akulizyibya kubantu.—Int. 86:12.

¹¹ Eelo kaka ncoolwe citaliboteli kumvwisya ncoliisya Bbaibbele kujatikizya Taata! Ikuti mwakasyoma kasimpe aaka ikayandika kapati, muyookulwaizyigwa kulyaaba kuli Jehova alimwi akubbapatizyigwa.

12-13. Nkasimpe nzi ikajatikizya Mwana nkomwakaiya alimwi akusyoma?

¹² Ino mwakalimvwa buti ciindi nomwakaiya kasimpe aaka kajatikizya Mwana? Jesu ngomuntu wabili uuyandika kapati mububumbo. Wakaaba buumi bwakwe kacili cinunuzyo cesu. Ikuti twatondezya kuti tulijisi lusyomo mucinunuzyo kwiinda mubukkale bwesu, tulakonzya kulekelelwa zibi zyesu, kuba acilongwe a Leza alimwi akuyooba abuumi butamani. (Joh. 3:16) Jesu Mupaizi Mupati. Aboobo uyanda kuti tugwasyigwe acinunuzyo alimwi akuba acilongwe ciyumu a Leza. (Heb. 4:15; 7:24, 25) Akaambo kakuti Jesu ngo Mwami wa Bwami bwa Leza, Jehova uyoomubelesya kusalazya zina lyakwe, kumanizya bubi boonse alimwi akuleta zilongezyo zitamani mu Paradaiso iiboola. (Mt. 6:9, 10; Ciy. 11:15) Jesu ncikozyanyo cibotu ncotweelede kutobela. (1Pet. 2:21) Wakatupa cikozyanyo cibotu kwiinda mukucita kuyanda kwa Leza mubuumi bwakwe boonse—Joh. 4:34.

¹³ Kuti mwazisyoma nzyoliyiisya Bbaibbele kujatikizya Jesu, ciyoomupa kumuyanda kapati Mwana wa Leza uuyandwa. Luyando oolo luyoomukulwaizya kucita kuyanda kwa Leza mubuumi bwanu boonse, mbubwenya mbwaakacita Jesu. Kwiinda mukucita boobo, muyookulwaizyigwa kulyaaba kuli Jehova alimwi akubbapatizyigwa.

14-15. Nkasimpe nzi ikajatikizya muuya uusalala nkomwakaiya alimwi akusyoma?

¹⁴ Ino mwakayeeya nzi ciindi nomwakaiya kasimpe aaka kajatikizya muuya uusalala? Muuya uusalala tauli muntu, pele ninguzu nzyabelesya Leza. Jehova wakabelesya muuya uusalala kupa kuti Bbaibbele lilembwe alimwi muuya uusalala ulatugwasya kuzimvwisya nzyotubala mulindilyo akuzibelesya. (Joh. 14:26; 2Pet. 1:21) Kwiinda mumuuya wakwe, Jehova ulatupa “nguzu zigambya iziinda zyabantu.” (2Kor. 4:7) Muuya ulatupa nguzu zyakukambauka makani mabotu, kulwana masunko, kulwana penzi lyakutyompwa alimwi akuliyumya mumasunko. Kuyungizya waawo, muuya uusalala ulatugwasya kutondezya bube bubotu ibupanga “mucelo wamuuya.” (Gal. 5:22) Leza ulapa muuya wakwe camoyo woonse kulibaabo ibasyoma mulinguwe alimwi ibamulomba kuzwa ansi aamoyo.—Lk. 11:13.

¹⁵ Eelo kaka cilaumbulizya kapati kuzyiba kuti bakombi ba Jehova balakonzya kusyoma muuya uusalala kutegwa ubagwasye kubelekela Leza! Ikuti mwakasyoma kasimpe nkomwakaiya kujatikizya muuya uusalala, muyookulwaizyigwa kulyaaba kuli Leza alimwi akubbapatizyigwa.

16. Ntwaambo nzi ntotwaiya kusikila waawa mumubandi wesu?

 ¹⁶ Ciindi nomusala kulyaaba kuli Leza alimwi akubbapatizyigwa mubweza ntaamu iiyandika kapati. Kweelana ambotwaiya, mweelede kuti kamulisungwide kuliyumya mumapenzi aajatikizyidwe, nkokuti buyumuyumu alimwi akuliimya zintu zimwi. Pele zilongezyo nzyomuyoojana nzinji kapati kwiinda zintu nzyomuyooliimya. Lubbapatizyo lulakonzya kumufwutula alimwi akupa kuti mube amanjezyeezya mabotu kuli Leza. Kaambo kapati ikeelede kumupa kusala kubbapatizyigwa, nduyando ndomujisi kuli Jehova Leza. Kuyungizya waawo, mweelede kukasyoma amoyo wanu woonse kasimpe nkomwakaiya kujatikizya Taata, Mwana alimwi amuuya uusalala. Nomwamana kulanga-langa twaambo ntotwabandika kusikila waawa, mbuti mbomukonzya kwiingula mubuzyo ooyu wakuti, “Sena ndililibambilide kubbapatizyigwa?”

17. Nintaamu nzi izisololela kukubbapatizyigwa?

¹⁷ Kuti naa mulimvwa kuti mulilibambilide kubbapatizyigwa, cakutadooneka mweelede kuti mwakabweza kale ntaamu zili mbozibede zyakuyumya cilongwe canu a Jehova. * Akaambo kakubala Bbaibbele cakusitikila, mwakazyiba twaambo tunji kujatikizya Jehova alimwi a Jesu. Eeci camupa kuba alusyomo. (Heb. 11:6) Mulazisyoma cakumaninina zisyomezyo zya Jehova izijanika mu Bbaibbele, alimwi mulisinizyide kuti lusyomo lwanu mucipaizyo ca Jesu lulakonzya kumwaangununa kuzwa kucibi alufwu. Mwakeempwa kuzibi zyanu; muluuside kapati akaambo kazibi nzyomwakacita alimwi mwakamulomba Jehova kuti amulekelele. Mwakacinca bukkale bwanu; mwakazileka zintu zibyaabi nzyomwakali kucita musyule alimwi akutalika kupona munzila njakkomanina Leza. (Mil. 3:19) Muliyandide kapati kwaambila bamwi kujatikizya lusyomo lwanu. Mwakeelela kuba sikumwaya uutanabbapatizyigwa alimwi akutalika kukambauka antoomwe ambungano. (Mt. 24:14) Jehova ulikkomene kapati akaambo kantaamu eezyi iziyandika kapati nzyomwakabweza. Mwakakkomanisya moyo wakwe.—Tus. 27:11.

18. Nzintu nzi azimbi nzyomweelede kucita kamutanabbapatizyigwa?

¹⁸ Kamutanabbapatizyigwa, kuli zintu azimbi nzyomweelede kucita. Mbubwenya mbotwaiya kale, mweelede kulyaaba kuli Leza. Amupaile kulinguwe kuzwa ansi aamoyo kamuli nyolikke, alimwi amumusyomezye kuti munoocita kuyanda kwakwe mubuumi bwanu boonse. (1Pet. 4:2) Mpoonya amwaambile sicuuno wakabunga kabaalu kuti muyanda kubbapatizyigwa. Sicuuno wakabunga kabaalu uyoolomba baalu bamwi kuti babonane andinywe. Mutalibiliki kubonana abaalu aabo. Amuyeeye kuti bakwesu aaba basiluzyalo balimuzyi alimwi balamuyanda. Bayakwiinduluka antoomwe andinywe njiisyo zyamu Bbaibbele zyantalisyo nzyomwakaiya. Bayanda kusinizya kuti mulazimvwisya njiisyo eezyo alimwi akuti mulizyi mbociyandika kapati kulyaaba  alimwi akubbapatizyigwa. Ikuti naa babona kuti muleelela, bayoomwaambila kuti inga mwaakubbapatizyigwa amuswaangano wabbazu naa wacooko uutobela.

19-20. Ncinzi ncomweelede kucita lwaakwiinda lubbapatizyo lwanu alimwi mbuti mbomukonzya kucita boobo?

¹⁹ Ncinzi ncomweelede kucita lwaakwiinda lubbapatizyo lwanu? * Amuyeeye kuti kulyaaba ncikonke alimwi Jehova uyanda kuti mucizuzikizye. Aboobo lwaakwiinda lubbapatizyo lwanu, mweelede kupona kweelana akulyaaba kwanu. Mbuti mbomukonzya kucita oobo?

²⁰ Amukakatile kumbungano yanu. Ciindi nomwaba Munakristo uubbapatizyidwe, muba cibeela ‘caciinga coonse cabakwesu.’ (1Pet. 2:17) Banakristonyoko mumbungano ngomukwasyi wanu wakumuuya. Kwiinda mukujanika lyoonse kumiswaangano, muyooyumya cilongwe canu ambabo. Amubale Jwi lya Leza alimwi akuzinzibala kuyeeya nzyomubala mulindilyo buzuba abuzuba. (Int. 1:1, 2) Mwamana kubala cibeela cimwi mu Bbaibbele, amuzinzibale kuyeeya nzyomwabala. Mpoonya nzyomubala ziyoomusika amoyo. ‘Amuzumanane kupaila.’ (Mt. 26:41) Mipailo yanu iizwa ansi aamoyo iyooyumya cilongwe canu a Jehova. “Amuzumanane kusaanguna kuyandaula Bwami.” (Mt. 6:33) Mulakonzya kucita oobo kwiinda mukubikka mulimo wakukambauka mubusena bwakusaanguna mubuumi bwanu. Kwiinda mukutola lubazu lyoonse mumulimo wakukambauka, muyoozumanana kuyumya lusyomo lwanu alimwi mulakonzya kugwasya bamwi kuba abulangizi bwakuyoopona buumi butamani.—1Tim. 4:16.

21. Ino lubbapatizyo lwanu luyoomupa kuba anzi?

²¹ Kulyaaba kwanu kuli Jehova alimwi akubbapatizyigwa ncakusala iciyandika kapati kwiinda zintu zyoonse nzyomukonzya kusala. Masimpe kuti kuli buyumuyumu bujatikizyidwe mukusala ooku. Pele sena kuli zilongezyo iziliko? Inzya nkozili! Kufwumbwa mapenzi ngomukonzya kujana munyika eeyi, “ngakaindi buyo kaniini alimwi mauba-uba.” (2Kor. 4:17) Lubbapatizyo lwanu luyoomupa kuba abuumi buli kabotu lino alimwi “abuumi bwini-bwini” kumbele. (1Tim. 6:19) Aboobo mwalombwa kuti muzinzibale kuyeeya alimwi akupaila kujatikizya bwiinguzi bwanu kumubuzyo ooyu wakuti, “Sena ndililibambilide Kubbapatizyigwa?”