1. Niinzi nzweelede kuchita kutanasaanguna kuyaka ng’anda?

ATUTEEDI uyanda kuyaka ng’anda alubo ulaapulani yang’anda eeyo. Pesi eezi zyaamba kuti weelede kusaanguna kuula zintu zyakuyasya na mpawo utalike kuyaka? Peepe. Kuli chimwi chintu chiyandikana nchweelede kusaanguna kuchita. Weelede kulanga-langa kuti kuyandikana maliinzi. Nkamboonzi? Kuchitila kuti ubone kuti uzookonzya na kwiimaninsya. Kuti waziba mali iiyandikana kutanatalisya kuyaka ziyookugwasya kuti uyimaninsye.

2. Kweendelana alugwalo lwa Luka 14:27-30, niinzi nzweelede kuziba kutanabbabbatizigwa?

² Kuyanda Jehova akumulumba kupa kuti uyande kubbabbatizigwa na? Kuti kakuli boobo, chiimo chako chilikozyenie achamuntu uyanda kuyaka ng’anda. Nkamboonzi nitwaamba oobu? Atulange-lange zyakaambwa aJesu muli Luka 14:27-30. (Bala.) Mulugwalo oolu, wakaamba zyeelede kuchitwa amuntu uuyanda kuba sikwiiya. Weelede kuziba kuti kuba mutobeli waJesu kuyanda kuti tusiye zimwi zintu akulisimya mubuyumu-yumu. (Lk. 9:23-26; 12:51-53) Nkinkaako weelede kuziba zintu nzutazooswaane kuti waba muKristu. Eezi ziyookugwasya kuti ukkale kusyomekede kuli Jehova nwaazoobbabbatizigwa.

3. Tulalanga-langaanzi muchiiyo eechi?

³ Nisimpe kuti kuba sikwiiya waJesu kuyanda kuti tusiye zimwi zintu akulipeda kuswaanana abuyumu-yumu. Pesi kulibubotu na mbutujana? Iiyi! Kubbabbatizigwa kupa kuti tujane zilongezyo zyiingi lino amuchiindi chilikunembo. Atulangelange mibuzyo iiyandikana loko iili atala akubbabbatizigwa.  Nsandulo zyamibuzyo eeyi zilakugwasya kubona kuti uleelela na kubbabbatizigwa.

4. (a) Kulipeda niinzi? (b) Kweendelana alugwalo lwa Matayo 16:24, ‘kulitakata’ chaambaanzi?

⁴ Kulipeda niinzi? Kulipeda nkwaambuula aJehova munkombyo kuumubuzya kuti uyanda kumubelekela kwabuumi bwako boonse. Kulipeda kuli Jehova ‘nkulyiimya’ naakuti kulitakata. (Bala Matayo 16:24.) Weelede kulipeda kutanabbabbatizigwa. Kuti walipeda nga waba achilongezyo chipati chakuba muntu waJehova. (Rom. 14:8) Nga wamusyomezya kuti kuzwa mubuzuba oobo uyanda kuchita kuyanda kwakwe kutali nzuyanda. Kulipeda nkuchita nchisyomezyo kuli Leza. Jehova tatumanikizyi pe kuti tulipede kulinguwe pesi kuti twamusyomezya, uyanda kuti tuchizuzikizye chisyomezyo eecho.—Int. 116:12, 14.

5. Kulipeda kusiyene biyeni akubbabbatizigwa?

⁵ Kulipeda kusiyene biyeni akubbabbatizigwa? Kulipeda ukuchita kuli Jehova kuli awulikke pesi kubbabbatizigwa kuchitwa kunembo lyabantu alubo kuchitilwa kumiswaangano mipati. Kuti wabbabbatizigwa nga ulikutondeezya bantu kuti wakalipeda kuli Jehova. * Nkinkaako kubbabbatizigwa nchitondeezyo chakuti ulamuyanda Jehova Leza amoyo wako woonse, abuumi bwako boonse, amizeezo yako yoonse amanguzu aako oonse akuti wakalipeda kumubelekela kwabuumi bwako boonse.—Mk. 12:30.

6-7. Kweendelana alugwalo lwa 1 Petro 3:18-22, ntwaamboonzi tubili tutondeezya kuti kubbabbatizigwa kulayandikana?

⁶ Nkamboonzi kubbabbatizigwa nikuyandikana? Nsandulo tulayijana muli 1 Petro 3:18-22. (Bala.) Bwaato mbwaakayaka Nowa bwakali kutondeezya aantanganana kuti uuli alusyomo. Munzila iikozyenie, kubbabbatizigwa niinzila yakutondeezya aantanganana kuti wakalipeda kuli Jehova. Pesi kubbabbatizigwa kulayandikana na? Iiyi kulayandikana. Petro wakatubuzya twaambo tupa kuti kuyandikane. Kakusaanguna nkakuti ‘kulakufutula.’ Kubbabbatizigwa kulakonzya kupa kuti tukafutuke kuti twachita zintu zitondeezya kuti tulaalusyomo muli Jesu, tulasyoma kuti wakatufwida mpawo wakabusigwa, akuti lino ulikujulu alubo ukkede “kujanza lyalulyo lya Leza.”

⁷ Kaambo kabili nkakuti, kubbabbatizigwa kupa kuti tube ‘amanjezyeezya mabotu.’ Kuti twalipeda kuli Jehova ngatwaba abweenzinyina buyandikana anguwe. Leza ulatulekelela zibi zyesu nkaambo ngatwachincha akutondeezya lusyomo kuchinunuzyo. Nkinkaako moyo wesu nga tuchitupi mulandu kunembo lyakwe.

8. Nkamboonzi kapati keelede kupa kuti usale kubbabbatizigwa?

⁸ Nkamboonzi kapati keelede kupa kuti usale kubbabbatizigwa? Kwiiya Bbayibbele kwakakugwasya kuti uzibe zyiingi atala aJehova, ziswaanizya buntu bwakwe, zintu nzyayanda anzyachita. Nzwaakayiya zyakakusika amoyo alubo zyakapa kuti umuyande. Nkinkaako kuyanda Jehova nkako kaambo kapati keelede kupa kuti usale kubbabbatizigwa.

9. Kweendelana alugwalo lwa Matayo 28:19, 20, zyambaanzi kubbabbatizigwa muzina lyaTaata, lyaMwana alyamuuya uusalala?

⁹ Chimwi cheelede kupa kuti usale kubbabbatizigwa nkasimpe kamuBbayibbele nkwaakayiya akusyoma. Yeeya nzyaakaamba Jesu chiindi naakali kupa mulawu wakuti tuchite bantu kuti babe basikwiiya.  (Bala Matayo 28:19, 20.) Kweendelana amajwi aaJesu bantu beelede kubbabbatizigwa “muzina lya Taata alya Mwana alya muuya uusalala.” Majwi aaya aambaanzi? Weelede kukasyoma amoyo wako woonse kasimpe kali muBbayibbele kali atala aJehova, aMwanaakwe Jesu amuuya uusalala. Kasimpe aaka kalaanguzu zyakuchincha buumi bwako. (Heb. 4:12) Atukalange-lange.

10-11. Nkasimpeenzi kajanika muBbayibbele kali atala aTaata nkwaakayiya akusyoma?

¹⁰ Uchikayeeyede na kasimpe nkwaakayiya atala aTaata? Wakayiya kuti ulaazina “lyakuti Jehova,” “Mupatikampatila atala aanyika yoonse” akuti nguwe alikke “Leza mwini-mwini.” (Int. 83:18; Is. 37:16) Mulengi wesu alubo “lufwutuko luzwa kuli Jehova.” (Int. 3:8; 36:9) Wakachita mabambe aakutwaangununa kuchibi alufu alubo wakatupa bulangilizi bwakupona kukabe kutamani. (Joh. 17:3) Kubbabbatizigwa nchitondeezyo chakuti waba umwi waBakamboni baJehova. (Is. 43:10-12) Alubo kuti wabbabbatizigwa ulaba mumpuli yaJehova iibotelwa akaambo kwakwiitwa azina lyaLeza akulyaambilizya kuli bamwi.—Int. 86:12.

¹¹ Nchilongezyo chipati kuziba kasimpe kajanika muBbayibbele kali atala aTaata. Kuti wakasyoma kasimpe aaka kayandikana loko, zilakonzya kupa kuti usale kulipeda kuli Jehova akuti ubbabbatizigwe.

12-13. Nkasimpeenzi kajanika muBbayibbele kali atala aMwana nkwaakayiya akusyoma?

¹² Wakamvwa biyeni nwaakayiya kasimpe katobela kali atala aMwana? Jesu nguwe muntu wachibili ngutweelede kulemeka. Mufutuli wesu. Wakalipeda kutufwida. Kuti twatondeezya lusyomo muchinunuzyo tulakonzya kulekelelwa zibi zyesu, kuba abweenzinyina bulikabotu aLeza akuzoojana buumi butamani. (Joh. 3:16) Jesu Mupayizi wesu Mupati. Uyanda kutugwasya kuti tujane zilongezyo zyeetwa akaambo kachinunuzyo akuti tube abweenzinyina bulikabotu aLeza. (Heb. 4:15; 7:24, 25) Leza wakasala nguwe kuti abe Mwaami waBwaami bwakwe nkinkaako uyoomubelesya kusalazya zina lyakwe, kumaninsya bubi akweeta zilongezyo muParadayizi. (Mt. 6:9, 10; Ciy. 11:15) Jesu chikozyano chibotu. (1 Pet. 2:21) Wakatutondeezya mbutukonzya kubelekela Leza amoyo woonse.—Joh. 4:34.

¹³ Nwakasyoma kasimpe kali muBbayibbele kali atala aMwana waLeza ngwayandisya, Jesu, zyakapa kuti umuyande. Kumuyanda ooku kwakapa kuti utobelezye chikozyano chakwe kwiinda mukubelekela Leza. Alubo eezi zipa kuti uyande kulipeda kuli Jehova akubbabbatizigwa.

14-15. Nkasimpeenzi kajanika muBbayibbele kali atala amuuya uusalala nkwaakayiya akusyoma?

¹⁴ Wakamvwa biyeni nwaakayiya kasimpe katobela kali atala amuuya uusalala? Wakaziba kuti muuya uusalala teemuntu pe pesi ninguzu zyaJehova. Jehova wakabelesya muuya uusalala kuti azulwide balembi baBbayibbele, alubo muuya uusalala ulatugwasya kumvwisisisya nzitubala mulindilyo. (Joh. 14:26; 2 Pet. 1:21) Jehova utupa “nguzu zigambya iziinda zyabantu” kabelesya muuya uusalala. (2 Kor. 4:7) Muuya usalala ulatugwasya kuti tukambawuke makani mabotu, tulwane masunko, tutamani manguzu akuti tulisimye mumapenzi. Alubo ulatugwasya kuti tube abuntu bubotu buswaanizidwe ‘mumuchelo wamuuya.’ (Gal. 5:22) Jehova ulatupa muuya uusalala kuti twamusyoma akumukumbila.—Lk. 11:13.

¹⁵ Kulabotezya alubo kulawumbulizya kuziba kuti Jehova ulakonzya kutupa muuya  uusalala kuti utugwasye kumubelekela! Kusyoma kasimpe nkwaakayiya kali atala amuuya uusalala kulakonzya kupa kuti uyande kulipeda kuli Leza akubbabbatizigwa.

16. Niinzi nzitwalanga-langa muchiiyo eechi?

¹⁶ Kusala kulipeda kuli Leza akubbabbatizigwa nintaamu iiyandikana loko. Mbuli mbutwabona muchiiyo eechi, kuswaanizya kulipeda kusiya zimwi zintu akuswaana buyumu-yumu. Pesi zilongezyo nzutakajane nzibotu loko kwiinda zintu nzwakasiya. Kubbabbatizigwa kulakonzya kukufutula alubo kupa kuti ube abweenzinyina bulikabotu aLeza. Kuyanda Jehova nkikaambo kapati keelede kupa kuti usale kubbabbatizigwa. Alubo weelede kukasyoma kasimpe nkwaakayiya kali atala aTaata, Mwana amuuya uusalala. Kweendelana anzitwalanga-langa muchiiyo eechi, ubonaanga uleelela na kubbabbatizigwa?

17. Niinzi nzyayelede kuchita muntu katanabbabbatizigwa?

¹⁷ Kuti walibona kuti uleelela kubbabbatizigwa kweelede kuti ulikuchita zintu zikugwasya kuti ube abweenzinyokwe bulikabotu aJehova. * Kwiiya Bbayibbele kwakakugwasya kuti uzibe zyiingi atala aJehova aJesu. Alubo wakaba alusyomo. (Heb. 11:6) Ulazisyoma zisyomezyo zyaJehova zili muBbayibbele alubo ulasyoma kuti chinunuzyo chaJesu chilakonzya kukwaangununa kuchibi alufu. Kweelede kuti wakachincha, chaamba kulisola akaambo kazintu zibi nzwaakachita, alubo wakakumbila Jehova kuti akulekelele. Wakasala kuchita kuyanda kwaLeza akuleka zintu zibi nzwaakali kuchita. (Mil. 3:19) Ulaachiyandisyo chakubuzya bamwi zintu nzusyoma. Wakaba sikupupulula uutanabbabbatizigwa alubo wakatalika kukambawuka abamwi mumbungano. (Mt. 24:14) Jehova ulakuyanda akaambo kakuti ulikuchita zintu eezi ziyandikana. Alubo wakapa kuti moyo wakwe ubotelwe.—Tus. 27:11.

18. Niinzi chimwi nchayelede kuchita muntu uuyanda kubbabbatizigwa?

¹⁸ Atubone zimwi zintu nzyayelede kuchita muntu kuti kayanda kubbabbatizigwa. Mbuli mbutwayiya, weelede kulipeda kuli Jehova. Eechi chaamba kumusyomezya kwiinda munkombyo iizwa aansi amoyo kuti uyanda kuponena nguwe. (1 Pet. 4:2) Kuzwa waawo, buzya mulangizi wakabunga kabaalu kuti uyanda kubbabbatizigwa. Mulangizi ooyu uyookumbila baalu kuti bazoowambuuzyanie anduwe. Utayoowi kwaambuuzyania abaalu aaba. Bakwesu aaba balikuzi alubo balakuyanda. Bayoowambuuzyania anduwe atala anjiisyo zili muBbayibbele ziyandikana nzwaakayiya. Bayanda kuba aachoonzyo chakuti ulazimvwisisisya na akubona kuti ulizi na kuti kulipeda akubbabbatizigwa nintaamu iiyandikana loko. Kuti babona kuti uleelela kubbabbatizigwa  bayookubuzya kuti uzoobbabbatizigwa kumuswaangano mupati uutobela.

19-20. Niinzi nzweelede kuchita nwaazoobbabbatizigwa, alubo niinzi chinga chilakugwasya?

¹⁹ Niinzi nzweelede kuzoochita nwaazoobbabbatizigwa? * Utalubi kuti kulipeda nkuchita chisyomezyo akuti Jehova ulangilila kuti uchizuzikizye. Nkinkaako weelede kuzumanana kuchizuzikizya chisyomezyo chako wazoobbabbatizigwa. Kujana wazichita biyeni eezi?

²⁰ Kkala kuliswaanizya abantu bamumbungano. Kuti wabbabbatizigwa nga waba aakati ‘kachiinga chabakwesu.’ (1 Pet. 2:17) Bakombinyokwe bamumbungano nimpuli yako yamubukombi. Kunjila miswaangano chiindi choonse kuyoopa kuti bweenzinyokwe ambabo busime. Bala Bbayibbele buzuba abuzuba akuyeeyesesya atala anzwaabala. (Int. 1:1, 2) Nulikubala Bbayibbele yimikila uyeeyesesye nzulikubala. Kuti wachita oobo uyoozimvwisisisya kabotu nzulikubala. ‘Zumanana kukomba.’ (Mt. 26:41) Kukomba amoyo woonse kuyoopa kuti uswene aafwiifwi aJehova. ‘Zumanana kusaanguna kuyandaula Bwami.’ (Mt. 6:33) Ulakonzya kuchita oobu kwiinda mukubikka mulimu wakukambawuka mubusena bwakusaanguna mubuumi bwako. Kukkala kuzwa mumulimu wakukambawuka kuyoopa kuti lusyomo lwako lusime alubo uyoogwasya bamwi kuti bakafutuke.—1 Tim. 4:16.

21. Uyoojanaanzi kuti wasala kubbabbatizigwa?

²¹ Kulipeda kuli Jehova akubbabbatizigwa nchintu chiyandikana loko nchukonzya kusala. Nisimpe kuti kuba sikwiiya waJesu kuyanda kuti tusiye zimwi zintu akulipeda kuswaanana abuyumu-yumu. Pesi kuli bubotu na mbutujana? Iiyi! Mapenzi ngukonzya kuswaana munyika eeyi mbi “ngakaindi buyo kaniini alimwi mauba-uba.” (2 Kor. 4:17) Kuti wasala kubbabbatizigwa uyoobotelwa mubuumi lino alubo uyoojana “buumi bwini-bwini” kunembo. (1 Tim. 6:19) Nkinkaako yeeyesesya alubo ukombe kuli Jehova kuti ubone kuti uleelela na kubbabbatizigwa.