1. I yini lexi munhu a faneleke axi yendla na angase na sungula kuyaka yindlu?

PIMISA hi munhu lweyi a lavaka kuyaka yindlu. Se waswi tiva swaku a lava kuyaka yindlu ya kutshamisa kuyini. Kungava leswaku a fanele a tekela kuya xava leswi lavekaka a gama a sungula kuyi yaka? Ahi swona. Nchumu xa lisima lexi a faneleke axi yendla i ku kambisisa swaku kulaveka mali muni na angase sungula kuyaka yindlu ya yena. Hi mhaka muni? Hikusa leswo switamu pfuna kuvona swaku ana yona mali ya kuyenela akuva a heta yindlu ya yena. Loko a sungula hi kuhamba tikonta na angase na yaka yindlu, switamu pfuna kuva a heta yindlu ya yena na anga karhatekanga.

2. Hi kuya hi Luka 14:27-30, u fanele u sungula hi kupimisa hi yini na ungase na tsakamisiwa?

² Lirhandzu la wena hi Yehovha laku yendla uswi lava kutsakamisiwa? Loko ku li leswo, u fanele yendla xiboho xa kufana ni wanuna lweyi a lavaka kuyaka yindlu. Hi mhaka muni? Pimisa hi marito lawa manga ka Luka 14:27-30. (Lerha.) Yesu a avulavula hi swaku swi vula yini kuva mudjondzisiwa wa yena. Leswaku hiva valandzeli va yena, hi fanele hi tinyimisela kutiyisela swikarhato leswi hingata kumana na swona ni kutinyimisela kutshika swilo swin’wana leswi hiswi rhandzaka. (Luk. 9:23-26; 12:51-53) Hi mhaka leyo, na ungase na tsakamisiwa, u fanele u pimisa hi swikarhato hinkwaswu leswi ungaha kumanaka na swona loko uta va mudjondzisiwa wa Kreste. Loko u yendla leswo, se uta va u lunghekile kutirhela Xikwembu hi kutshembeka na u tsakamisiwile.

3. Hita bula hi yini ka djondzo leyi?

³ Swi pfuna yini kuva u tiyisela swikarhato ni kuva u tshika swilo leswi uswi rhandzaka hi mhaka ya kuva mudjondzisiwa wa Kreste lweyi anga tsakamisiwa? Swi pfuna hintamu! A kutsakamisiwa kutaku yendla u kuma minkateko ya yinyingi swoswi ni ka nkama lowu taka. Ahi buleni hi swivutiso swa lisima  leswi fambisanaka ni kutsakamisiwa. Leswo switaku pfuna kuhlamula xivutiso lexinge: “Ni lunghekile kuva ni tsakamisiwa?”

4. a) I yini kutinyiketela? b) Swi vula yini ‘kutitshika’ loko kuvulavuliwaka hi kona ka Matewu 16:24?

⁴ I yini kutinyiketela? U fanele u tinyiketela na ungase tsakamisiwa. A kutinyiketela ka Yehovha, i kukhongela ka yena hi mbilu ya wena hinkwayu, umu byela swaku utamu tirhela wutomi la wena hinkwalu hilaha kunga heliki. Loko u tinyiketela ka Yehovha, wo ‘titshika’. (Lerha Matewu 16:24.) Swoswi se u lumba Yehovha, kunga nkateko wa wukulu. (Rhom. 14:8) U byela Yehovha swaku kusukela namuntlha u lava kuyendla kurhandza ka Yehovha, kunga li kurhandza ka wena. Kutinyiketela ka Xikwembu ahi xitshembiso xa kutlanga hi xona. Yehovha angahi sindzisi kuva hi tinyiketela. Kambe loko hi tinyiketela ka yena, a lava hi hetisisa xitshembiso xa hina. — Pis. 116:12, 14.

5. Hi kwini kuyelana ka kutinyiketela ni kutsakamisiwa?

⁵ Hi kwini kuyelana ka kutinyiketela ni kutsakamisiwa? Loko u tinyiketela, swo tiviwa hi wena na Yehovha ntsena. Kambe kutsakamisiwa swi voniwa hi vanhu hinkwavu. Minkama yotala swi endleka ka masembleya ni makongresu. Loko u tsakamisiwa u komba van’wana swaku u tinyiketelile ka Yehovha. * A kutsakamisiwa ka wena kuyendla van’wana vaswi tiva swaku u rhandza Yehovha hi mbilu ya wena hinkwayu, hi wutomi la wena hinkwalu, hi mimpimiso ya wena hinkwayu ni hi ntamu wa wena hinkwawu ni swaku u tinyimesele kumu tirhela hilaha kunga heliki. — Marka 12:30.

6-7. Hikuya hi 1 Petro 3:18-22, hi swihi swilo swimbirhi leswihi yendlaka hi tsakamisiwa?

⁶ Swa laveka hikakunene kuva u tsakamisiwa? Vona marito lawa ma kumekaka ka 1 Petro 3:18-22. (Lerha.) Ngalawa yi kombise swaku Nowa a ani lipfumelo ka Xikwembu, hi kufanana kutsakamisiwa ka wena ku komba vanhu swaku u tinyiketelili ka Yehovha. Kambe swa laveka hikakunene kuva u tsakamisiwa? Ina, swa leveka. Petro a vule swaku hi mhaka muni. Xa kusungula, hi mhaka kutsakamisiwa kahi “ponisa”. A kutsakamisiwa kutahi ponisa loko hi yendla leswi lavekaka kuva hi kombisa swaku hi ni lipfumelo ka Yesu hi tlhela hi kholwa swaku ahi felile a tlhela a pfuxiwa aya matilweni naswona swoswi ale ‘vokweni laxinene la Xikwembu’.

⁷ Xawumbiri, kutsakamisiwa swihi yendla hiva ni ‘lipfalu lelibaseke’. Loko hi tinyiketela ka Xikwembu hi tlhela hi tsakamisiwa, hiva ni wuxaka la kuhlawuleka na xona. Xikwembu xihi rivalela swidjoho swa hina hi mhaka leswi hi tisolaka hi tlhela hiva ni lipfumelo ka nkutsulo. Leswi swihi yendla hi kuma lipfalu la linene ka xona.

8. I yini lexi faneleke xiku yendla u lava kutsakamisiwa?

⁸ I yini lexi faneleke xiku yendla u lava kutsakamisiwa? Leswi unga djondza kahle Bibele, u twisise swa swinyingi hi Yehovha. U tive swaku Yehovha a tshamise kuyini ni leswi a yendlisaka xiswona swilo. Leswi ungaswi djondza hi Yehovha swiku tsakise hintamu lakakuva u sungula kumu rhandza hintamu. A nchumu xa lisima lexi faneleke xiku yendla u tsakamisiwa, kufanele kuva lirhandzu la wena hi Yehovha.

9. Hi kuya hi Matewu 28:19, 20, swi vula yini kutsakamisiwa hi vito la Papayi, hi vito la N’wana ni la moya wa kukwetsima?

⁹ A nchumu xin’wana lexi yendlaka u tsakamisiwa, hi mhaka ya leswi ungaswi djondza ka Bibele u tlhela u pfumela ka swona.  Pimisa hileswi Yesu angaswi vula loko a nyikela xileriso xa kuyendla vadjondzisiwa. (Lerha Matewu 28:19, 20.) Hi kuya hi Yesu, lava va tsakamisiwaka va fanele va tsakamisiwa hi ‘hi vito la Tatana, ni la N’wana, ni la moya lowokwetsima’. Leswo swi vula yini? U fanele u pfumela hi mbilu ya wena hinkwayu ka leswi Bibele liswi djondisaka hi Yehovha, Yesu, N’wana wa Yena ni leswi liswi djondzisaka hi moya wa kukwetsima. Tidjondzo leti ta Bibele ti ni matimba naswona tinga khumba mbilu ya wena. (Hev. 4:12) Ahi kambisise tin’wana ta tona.

10-11. Hi wihi ntiyiso lowu hingawu djondza hi tlhela hiwu kholwa hi Papayi wa hina?

¹⁰ Pimisa hi nkama lowu unga djondza ntiyiso hi Papayi wa hina wa le matilweni. U tive swaku ‘vito la yena hi Yehovha’ naswona ‘a Tlakukile ahenhla ka misava hinkwayu’ ni swaku hi yena “ntsena Xikwembu xa ntiyiso.” (Pis. 83:18; Esa. 37:16) Hi yena Muvumbi wa hina naswona “kuponisiwa kuta hi ka Yehovha.” (Pis. 3:8; 36:9) A yendle leswaku hi ponisiwa ka xidjoho ni lifu naswona ka nkama lowu taka atahi yendla hi hanya hilaha kunga heliki. (Yoh. 17:3) Loko u tinyiketela u tlhela u tsakamisiwa utava u kombisa swaku u Mboni ya Yehovha. (Esa. 43:10-12) Uta lumba ndjangu wa vagandzeli va Xikwembu lavanga kona misaveni hinkwayu, lava tsakaka hi kuvitaniwa hi vito la xona va tlhela vali twalisa ka vanhu van’wana. — Pis. 86:12.

¹¹ I nkateko wa wukulu kutwisisa leswi Bibele liswi djondzisaka hi Papayi wa hina Yehovha! Loko u kholwa ka ntiyiso lowunga ka Bibele, mbilu ya wena yitaku yendla u tinyiketela ka Yehovha u tlhela u tsakamisiwa.

12-13. I yini leswi ungaswi djondza u tlhela uswi kholwa hi Yesu?

¹² U titwise kuyini nkama unga djondza leswi landzelaka hi N’wana wa Xikwembu? Yesu i munhu wa wumbirhi hi lisima amatilweni ni laha misaveni. Hi yena Muponisi wa hina. Ahi felile hi kuswi rhandza. Loko hiswi kombisa hi mintirho swaku hi ni lipfumelo ka nkutsulo, hita rivaleliwa swidjoho swa hina, hiva ni wuxaka lelinene ni Xikwembu hi tlhela hi kuma wutomi lelinga heliki. (Yoh. 3:16) Yesu i Muprista Lwenkulo. Waswi lava kuhi pfuna hi nkutsulo ni kuhi yendla leswaku hi va ni wuxaka lelinene ni Xikwembu. (Hev. 4:15; 7:24, 25) Leswi anga Hosi ya Mfumu wa Xikwembu, Yehovha ata tirhisa yena kuva a kwetsimisa vito la Yena, a helisa wubihi ni kuhi tisela minkateko leyinga heliki ka Paradesi leli taka. (Mat. 6:9, 10; Nhla. 11:15) Yesu i xikombiso lexi hi faneleke hixi tekelela. (1 Pet. 2:21) Ahi vekele xikombiso lexinene hi kuva a tirhisa wutomi la yena akuva a yendla kurhandza ka Xikwembu. — Yoh. 4:34.

¹³ Loko u kholwa ka leswi Bibele liswi djondzisaka hi Yesu, u sungula kurhandza n’wana wa Xikwembu. Leswi switaku pfuna kuva u tirhisa wutomi la wena leswaku u yendla kurhandza ka Xikwembu kufana na Yesu. Leswi switaku yendla u tinyiketela ka Yehovha u tlhela u tsakamisiwa.

14-15. I yini leswi ungaswi djondza u tlhela uswi kholwa hi moya wa kukwetsima?

¹⁴ U titwise kuyini nkama unga djondza leswi landzelaka hi moya wa kukwetsima? Moya wa kukwetsima ahi munhu, kambe i matimba ya Xikwembu lawa xima tirhisaka. Yehovha a tirhise moya wa kukwetsima akuva a yendla vanhu va tsala Bibele, naswona a tirhisa moya wa yena ahi akuva ahi yendla hi twisisa hi tlhela hi tirhisa leswi hiswi djondzaka ka lona. (Yoh. 14:26; 2 Pet. 1:21) Hi kutirhisa moya wa kukwetsima, Yehovha ahi nyika ‘matimba lamakulu lawa, lawa matlulaka hinkwaswu’. (2 Kor. 4:7) A moya wa kukwetsima wuhi nyika ntamu wa kuchumayela mahungu ya kutsakisa, ntamu wa kulwisana  ni miringo, hi lwisana ni kuhela ntamu ni kuva hi hlula miringo. Wuhi pfuna kukombisa wumunhu la kusaseka leli fambisanaka ni “mihandzu ya Moya”. (Gal. 5:22) Xikwembu xi nyikela moya wa kukwetsima ka lava vaxi kombelaka va tlhela vaxi tshemba. — Luk. 11:13.

¹⁵ Swahi tiyisa kutiva swaku vagandzeli va Yehovha vanga kombela moya wa kukwetsima kuva wuva pfuna kutirhela Xikwembu. Loko u kholwa ka ntiyiso lowu ungawu djondza hi moya wa kukwetsima, uta tinyiketela ka Xikwembu u tlhela u tsakamisiwa.

16. Se hi djondze yini kuta fikela swoswi?

¹⁶ Loko u tinyiketela ka Xikwembu u tlhela u tsakamisiwa uva u yendla swilo swa lisima hintamu awuton’wini la wena. Hilaha hinga djondza hi kona, u fanele u tinyimisela kulwisana ni swikarhato leswi tisiwaka kutinyiketela ka wena. Kambe minkateko leyi ungatayi kuma yi tlula swikarhato hinkwaswu leswi ungaha kumanaka na swona. A kutsakamisiwa kungaku ponisa kutlhela kuku yendla uva ni lipfalu lelinene ka Xikwembu. U fanele u tsakamisiwa hi mhaka ya leswi u rhandzaka Yehovha Xikwembu xa wena. Nakambe u fanele u kholwa ka ntiyiso lowu ungawu djondza hi Papayi, ni N’wana ni hi moya wa kukwetsima. Leswi se hinga djondza hi swilo leswi hinkwaswu, awuta hlamulisa kuyini xivutiso lexinge: “Ni lunghekile kuva ni tsakamisiwa?”

17. U fanele u yendla yini na ungase tsakamisiwa?

¹⁷ Loko u titwa se na u lunghekile kuva u tsakamisiwa, aswi kanakanisi swaku se u yendle swa kutala leswaku u kulisa wuxaka la wena na Yehovha. * Leswi u djondzaka Bibele nkama ni nkama, u tiva swa swinyingi hi Yehovha na Yesu. Se u ni lipfumelo. (Hev. 11:6) Waswi tshemba hi kuhelela switshembiso leswinga ka Bibele naswona wa kholwa swaku lipfumelo la wena ka gandzelo la nkutsulo la Yesu lingaku ponisa ka xidjoho ni lifu. Wa tisola ka swidjoho swa wena. U titwa nandzu hintamu hi mahanyelo ya wena ya kubiha ya khale naswona se u kombele Yehovha akuva aku rivalela. Se u hundzukile awuton’wini la wena. U tshike mahanyelo ya wena ya kubiha ya khale naswona se u hanya hi kuya hi kurhandza ka Xikwembu. (Mint. 3:19) Waswi rhandza kuchumayela van’wana. Se wa faneleka kuva muchumayeli lweyi a kalaka anga tsakamisiwanga naswona se unga sungula kuchumayela ni bandla. (Mat. 24:14) Yehovha wa tsaka hi mhaka unga yendla leswi. Umu tsakise hintamu Yehovha. — Swi. 27:11.

18. U fanele u yendla yini swin’wana na ungase tsakamisiwa?

¹⁸ Kaha ni leswi u faneleke uswi yendla na ungase tsakamisiwa. Hilaha hinga djondza ha kona akusunguleni, u fanele u tinyiketela ka Xikwembu. Kutinyiketela i kuvulavula ni Xikwembu hi xikhongelo na u li wexe, uxi tshembisa swaku uta yendla kurhandza ka xona  wutomi la wena hinkwalu. (1 Pet. 4:2) Loko se u yendle leswo, byela mutlhanganisi wa ntlawa wa madoda swaku u lava kutsakamisiwa. Ata kombela madoda man’wana akuva ma bula na wena. Unga chavi kubula ni madoda. Maku tiva naswona maku rhandza. Mata kambisisa na wena leswi ungaswi djondza ka Bibele. Leswi ma lavaka swona i kukambisisa swaku waswi twisisa leswi ungaswi djondza ni kuvona swaku waswi twisisa leswi vulaka swona kutinyiketela ni kutsakamisiwa. Loko maswi vona swaku u lunghekile, mataku byela swaku unga tsakamisiwa ka asembleya kumbe kongresu leli taka.

19-20. U fanele u yendla yini loko se u tsakamisiwile naswona ungaswi yendlisa kuyini?

¹⁹ Loko se u tsakamisiwile wahata yendla yini swin’wana? * Khumbuka swaku loko u tinyiketela u tshembisa Yehovha naswona a nyimela swaku u hetisisa leswi ungamu tshembisa. Hi mhaka leyo, loko se u tsakamisiwile u fanele u hanya hi kuya hi xitshembiso xa wena. Ungaswi yendlisa kuyini?

²⁰ Unga tiyendli muyeni abandleni. Leswi se unga tsakamisiwa u lumba “nhlengeletanu ya vamakwenu”. (1 Pet. 2:17) Vamakwerhu abandleni i maxaka ya wena ya Wukreste. Loko uya mintlhanganwini nkama ni nkama, uta tiyisa wuxaka la wena na vona. Lerha Rito la Xikwembu siku ni siku u tlhela u yanakanyisisa ha lona. (Pis. 1:1, 2) Loko wahaku gama kulerha Bibele, tinyike nkama wa kuyananyisisa hileswi ungaswi lerha. Loko u yendla leswo, leswi uswi lerhaka swita khumba mbilu ya wena. ‘Khongela’ nkama ni nkama. (Mat. 26:41) Loko u khongela ka Yehovha swi suka mbilwini, switaku yendla uya uva kusuhi na Yehovha. ‘Rhanga utilavela Mfumu wa yena’. (Mat. 6:33) Unga yendla leswo hi kurhangisa ntirho wa kuchumayela awuton’wini la wena. Loko u chumayela nkama ni nkama, uta tiyisa lipfumelo la wena naswona ungaha pfuna van’wana akuva va kuma wutomi lelinga heliki. — 1 Tim. 4:16.

21. Uta kuma yini loko u tsakamisiwa?

²¹ Akuna xiboho xa kuyampsa a wuton’wini la wena kutlula xa kutinyiketela ka Yehovha ni kutlhela u tsakamisiwa. I ntitiso swaku swi lava u tikarhata. Kambe awungata tilaya. Hi mhaka muni? Hi mhaka swikarhato hinkwaswu leswi ungaha kumanaka na swona i swa “nkamanyana ntsena”. (2 Kor. 4:17) Kambe kutsakamisiwa ka wena kutaku yendla u kuma wutomi la kutsakisa swoswi ni ‘wutomi la ntiyiso’ ka nkama lowu taka. (1 Tim. 6:19) Hi mhaka leyo, haku kombela hi ku phindaphinda, pimisa u tlhela u khongela hi nhlamulu ya xivutiso lexi: “Ni lunghekile kuva ni tsakamisiwa?”