1. Kasi munthu wakwenera kuchita vichi pambere wandambe kuzenga nyumba?

TIYELEZGERE kuti munthu munyake wakukhumba kuzenga nyumba. Wakumanya ukuru wa nyumba iyo wakukhumba kuzenga. Kweni kasi wangachimbilira ku sitoro kukagura vinthu na kwambapo kuzenga? Yayi. Pambere wandambe kuzenga, pali chinthu chinyake chakuzirwa icho wakwenera kuchita. Wakwenera kupendesera ndalama izo zinjirenge pakuzenga nyumba yake. Chifukwa wuli? Chifukwa ntchakuti wakwenera kumanya usange wali na ndalama zakukwana zakuzengera nyumba yake. Usange wapendeselerathu, mbwenu wangamalizga kuzenga nyumba yake.

2. Kuyana na Luka 14:27-30, kasi mukwenera kughanaghanira vichi pambere mundabatizike?

² Kasi mukughanaghana vya kubatizika chifukwa chakuti mukumutemwa Yehova na kumuwonga pa ivyo wamuchitirani? Usange ni nthena, namwe mukwenera kuchita nga ni munthu uyo wakukhumba kuzenga nyumba. Chifukwa wuli tikuyowoya nthena? Wonani mazgu gha Yesu agho ghali pa Luka 14:27-30. (Ŵazgani.) Pa lemba ili Yesu wakayowoyanga ivyo munthu uyo wakukhumba kuŵa msambiri wake wakwenera kuchita. Para tikukhumba kuŵa msambiri wake, tikwenera kuŵa ŵakunozgeka kusangana na masuzgo kweniso kuleka vinthu vinyake. (Luka 9:23-26; 12:51-53) Ntheura pambere mundabatizike, mukwenera kughanaghanira vyose ivyo musanganenge navyo para mwazgoka msambiri wa Khristu. Para mwachita nthena, muŵenge ŵakunozgeka kulutilira kuteŵetera Chiuta mwakugomezgeka pamanyuma pakubatizika.

3. Kasi tidumbiskanenge vichi mu nkhani iyi?

³ Kasi kubatizika nkhwakuzirwa chomene kuluska vinthu ivyo  mulekenge na masuzgo agho musanganenge nagho? Enya. Uyo wabatizika wasangenge vitumbiko vinandi sono na munthazi wuwo. Tiyeni tidumbiskane mafumbo ghakuzirwa pa nkhani ya ubatizo. Ndipo kuchita nthena kumovwiraninge kuzgora fumbo lakuti, “Kasi nili wakunozgeka kubatizika?”

4. (a) Kasi kujipeleka ni vichi? (b) Kuyana na Mateyu 16:24, kasi ‘kujipata’ chikung’anamurachi?

⁴ Kasi kujipeleka ni vichi? Pambere mundabatizike, mukwenera kujipeleka dankha. Para mukujipeleka kwa Yehova, mukumulomba kufumira pasi pamtima na kumuphalira kuti mumuteŵeterenge umoyo winu wose. Para mwajipeleka kwa Chiuta, ndikuti ‘mwajipata.’ (Ŵazgani Mateyu 16:24.) Sono mukuŵa kuti muli ŵa Yehova, uwo ni mwaŵi wapadera chomene. (Rom. 14:8) Mukumuphalira kuti kufuma sono kuluta munthazi, chinthu chakuzirwa chomene kwa imwe nkhumuteŵetera, kujikondweska mwekha yayi. Kweniso manyani kuti para mwajipeleka kwa Chiuta ndikuti mwapanga chilapo. Ndipo Yehova wakuchichizga waliyose yayi kupanga chilapo ichi. Kweni para mwalapa, wakukhazga kuti mufiskenge.—Sal. 116:12, 14.

5. Kasi kujipeleka na kubatizika vikupambana wuli?

⁵ Kasi kujipeleka na kubatizika vikupambana wuli? Para munthu wakujipeleka wakuŵa kwayekha. Palije uyo wakumanya para mukujipeleka kwa Yehova. Kweni ubatizo ukuchitika pamaso pa ŵanthu ŵanandi, ndipo kanandi pakuŵa pa ungano wadera panji wachigaŵa. Para mwabatizika mukulongora ŵanji kuti muli kujipeleka kale kwa Yehova. * Ntheura ubatizo ukovwira ŵanji kumanya kuti mukumutemwa Yehova Chiuta winu na mtima winu wose, umoyo winu wose, maghanoghano ghinu ghose, na nkhongono zinu zose. Kweniso ukulongora kuti mwasankha kuti muteŵeterenge Chiuta muyirayira.—Mrk. 12:30.

6-7. Kuyana na 1 Petrosi 3:18-22, chifukwa wuli ntchakukhumbikwa kubatizika?

⁶ Kasi ntchakukhumbikwa nadi kubatizika? Wonani mazgu agho ghali pa 1 Petrosi 3:18-22. (Ŵazgani.) Nga umo chingalaŵa chikalongoleranga kuti Nowa wali na chipulikano, namwe para mwabatizika mukulongora pakweru kuti mwajipeleka kwa Yehova. Kweni kasi ntchakukhumbikwa nadi kubatizika? Enya. Petrosi wakalongosora chifukwa chake. Chakwamba, ubatizo “ukumuponoskani.” Kweni ungatiponoska para mu vyakuchita vithu, tikulongora kuti tili na chipulikano mwa Yesu na kugomezga kuti wakafwira ise, kweniso wakawuskikira kuchanya, ndipo sono wali “ku woko lamalyero la Chiuta.”

⁷ Chachiŵiri, para tabatizika tikuŵa na “njuŵi yiwemi.” Para tajipeleka kwa Chiuta na kubatizika, tikuŵa paubwezi wapadera na iyo. Chiuta wakutigowokera zakwananga zithu chifukwa chakuti tikuŵa talapa zanadi na kuŵa na chipulikano mu sembe yakuwombora. Ntheura tikuŵa na njuŵi yiwemi pamaso pake.

8. Ntchifukwa wuli chikuru icho mukwenera kubatizikira?

⁸ Kasi ni vifukwa wuli ivyo mukwenera kubatizikira? Chifukwa cha kusambira Baibolo, mwamanya vinandi vya Yehova. Mwamanya wunthu wake na nthowa zake. Ivyo mwasambira vyakukhwaskana na iyo vyamufikani pamtima ndipo vyamovwirani kuti mumutemwenge chomene. Kweni chifukwa chikuru icho mukwenera kubatizikira nkhumutemwa Yehova.

9. Kuyana na Mateyu 28:19, 20, kasi kubatizika mu zina la Adada, la Mwana na mzimu utuŵa chikung’anamurachi?

⁹ Kweniso mukwenera kusankha kubatizika chifukwa cha ivyo mwasambira mu Baibolo ndipo sono mukuvigomezga. Wonani ivyo Yesu wakayowoya apo wakapelekanga dango lakuti mukazgore ŵanthu kuŵa ŵasambiri.  (Ŵazgani Mateyu 28:19, 20.) Kuyana na ivyo Yesu wakayowoya, awo ŵabatizikenge ŵakwenera kubatizika “mu zina la Adada na la Mwana na la mzimu utuŵa.” Kasi fundo iyi yikung’anamurachi? Yikung’anamura kuti mukwenera kugomezga na mtima wose ivyo mwasambira mu Baibolo vyakukhwaskana na Yehova; Mwana wake, Yesu; na mzimu utuŵa. Ntchakuzirwa chomene kumanya visambizgo ivi ndipo vingamufikani pamtima. (Heb. 4:12) Tiyeni tiwonepo fundo zinyake za visambizgo ivi.

10-11. Kasi ni unenesko wuli wakukhwaskana na Dada withu wakuchanya uwo mwasambira na kuwugomezga?

¹⁰ Ghanaghanirani mukati mwamanya unenesko wakuyowoya za Dada withu wakuchanya, kuti ‘zina lake ni Yehova,’ kweniso “Ngwapachanya Nkhanira pa charu chose chapasi,” ndipo ndiyo yekha “Chiuta waunenesko.” (Sal. 83:18; Yes. 37:16) Kweniso ni Mlengi withu, ndipo ‘chiponosko ntchake.’ (Sal. 3:8; 36:9) Wali kunozga nthowa yakutiwombolera ku kwananga na nyifwa, ndipo wali kutipa chilindizga chakuzakaŵa na umoyo wamuyirayira. (Yoh. 17:3) Para mwajipeleka na kubatizika mulongorenge kuti sono ndimwe Kaboni wa Yehova. (Yes. 43:10-12) Muŵenge pakati pa mbumba ya pa charu chose ya ŵateŵeti ŵaunenesko, iyo yikunotha kuchemeka na zina la Chiuta na kuphalirako ŵanji vya zina ili.—Sal. 86:12.

¹¹ Ni mwaŵi wapadera chomene kupulikiska ivyo Baibolo likusambizga vya Dada withu wakuchanya. Para mwagomezga ivyo mwasambira vya Dada withu wakuchanya, vimovwiraninge kuti mujipeleke kwa Yehova na kubatizika.

12-13. Kasi ni unenesko wuli wakuyowoya za Mwana uwo mwasambira na kuwugomezga?

¹² Kasi mukajipulika wuli mukati mwasambira unenesko wakulondezgapo uwu wakuyowoya za Mwana? Yesu ni munthu wachiŵiri wakuzirwa chomene mu chilengiwa chose. Iyo ni Muwomboli withu, ndipo wakapeleka umoyo wake chifukwa cha ise. Para mu vyakuchita vithu, tikulongora kuti tili na chipulikano mu sembe yake, zakwananga zithu zingagowokereka, tingaŵa paubwezi na Chiuta, na kuzakasanga umoyo wamuyirayira. (Yoh. 3:16) Kweniso Yesu Ngwasembe withu Mukuru. Wakukhumba kutovwira kuti tisange chandulo na sembe yake kweniso kuti tiŵe paubwezi wakukhora na Chiuta. (Heb. 4:15; 7:24, 25) Pakuti ndiyo ni Themba la Ufumu wa Chiuta, kwizira mwa iyo, Yehova wazamutuŵiska zina lake, wazamumazga uheni wose, kweniso wazamutipa vitumbiko vyamuyirayira mu Paradiso. (Mat. 6:9, 10; Chivu. 11:15) Yesu ntchakuwonerapo chithu. (1 Pet. 2:21) Wali kutilongora chiyelezgero chiwemi chifukwa wakachita khumbo la Chiuta umoyo wake wose.—Yoh. 4:34.

¹³ Para mwagomezga ivyo Baibolo likusambizga vya Yesu, mumutemwenge chomene Mwana wa Chiuta uyu. Chitemwa ichi, chimuchiskaninge kuti muchite khumbo la Chiuta umoyo winu wose nga umo Yesu wakachitira. Ndipo ivi vimovwiraninge kuti mujipeleke kwa Yehova na kubatizika.

14-15. Kasi ni unenesko wuli wakukhwaskana na mzimu utuŵa uwo mwasambira na kuwugomezga?

¹⁴ Kasi ntchivichi chikiza mu maghanoghano ghinu mukati mwasambira unenesko wakulondezgapo uwu wakuyowoya za mzimu utuŵa? Mzimu utuŵa ni munthu yayi, kweni ni nkhongono iyo Chiuta wakuyigwiliskira ntchito. Yehova wakagwiliskira ntchito mzimu wake kuti Baibolo lilembeke, ndipo mzimu utuŵa ukutovwira kupulikiska na kulondezga ivyo tikuŵazga mu Baibolo. (Yoh. 14:26; 2 Pet. 1:21) Kwizira mu mzimu wake, Yehova wakutipa “nkhongono zakuluska zakawiro.” (2 Kor. 4:7) Mzimu ukutipaso nkhongono kuti tipharazge makani ghawemi, tilimbane na viyezgo, titonde ivyo vingatigongoweska, na kuzizipizga masuzgo. Kweniso ukutovwira kuti tiŵe na mikhaliro yiwemi iyo yili mu gulu la “vipambi vya mzimu.” (Gal. 5:22) Chiuta wakupeleka mwawanangwa mzimu wake ku  wose awo ŵakumugomezga na kumulomba kufumira pasi pamtima.—Luka 11:13.

¹⁵ Ntchakukhozga chomene kumanya kuti ŵateŵeti ŵa Yehova ŵakwenera kuthemba mzimu utuŵa kuti uŵawovwire kuteŵetera Chiuta. Para mwagomezga unenesko uwo mwasambira wakukhwaskana na mzimu utuŵa, umovwiraninge kuti mujipeleke kwa Chiuta na kubatizika.

16. Kasi kufika apa tasambira vichi mu nkhani iyi?

¹⁶ Para mwasankha kujipeleka kwa Chiuta na batizika ndikuti mwasankha chinthu chakuzirwa chomene. Nga umo tasambilira, mukwenera kuŵa ŵakunozgeka kusangana na masuzgo kweniso kuleka vinthu vinyake. Kweni vitumbiko ivyo musangenge vikujumpha vinthu ivyo mulekenge. Ubatizo ungamuponoskani kweniso ungamovwirani kuti muŵe na njuŵi yituŵa pamaso pa Chiuta. Chifukwa chikuru icho mukwenera kubatizikira nkhutemwa Yehova Chiuta. Kweniso mukwenera kugomezga na mtima winu wose unenesko uwo mwasambira wakuyowoya za Dada, Mwana, na mzimu utuŵa. Pakuti tadumbiskana vyose ivi, kasi sono mungazgora wuli fumbo ili lakuti, “Kasi nili wakunozgeka kubatizika?”

17. Kasi ni vinthu wuli ivyo munthu wakwenera kuchita pambere wandabatizike?

¹⁷ Para mukuwona kuti ndimwe ŵakunozgeka kubatizika, tikukayika yayi kuti mwachita kale vinandi kuti mukhozge ubwezi winu na Yehova. * Pakuti nyengo zose mukusambira Baibolo, mwamanya vinandi vyakukhwaskana na Yehova na Yesu. Ndipo sono muli na chipulikano. (Heb. 11:6) Mukugomezga na mtima wose ivyo Yehova walayizga mu Baibolo, ndipo mwakhorwa kuti sembe ya Yesu yingamuwomborani ku kwananga na nyifwa. Mwalapa zakwananga zinu, na kujinyumwa chifukwa cha viheni ivyo muli kuchita, ndipo mwamulomba Yehova kuti wamugowokerani. Mwasintha umoyo winu, icho chikung’anamura kuti mwalekerathu nkharo ziheni izo mukachitanga ndipo mwamba kuchita vinthu ivyo vikukondweska Chiuta. (Mil. 3:19) Mukunweka chomene kuphalirako ŵanyinu ivyo mukugomezga. Ndipo mukenelera kuŵa mupharazgi wambura kubatizika ndipo mukamba kupharazga pamoza na mpingo. (Mat. 24:14) Yehova wakunotha namwe chifukwa chakuchita vinthu vyakukhumbikwa ivi, kweniso kuti mwakondweska chomene mtima wake.—Zinth. 27:11.

18. Kasi ni vinthu wuli vinyake ivyo mukwenera kuchita pambere mundabatizike?

¹⁸ Pambere mundabatizike, pali vinthu vinyake vichoko waka ivyo mukwenera kuchita. Nga umo tasambilira kale mu nkhani iyi, mukwenera kujipeleka kwa Chiuta. Mulombani kufumira pasi pamtima, na kumulayizga kuti mumuteŵeterenge umoyo winu wose. (1 Pet. 4:2) Kufumapo apo, phalirani mulaŵiliri wa milimo ya wupu wa ŵalara kuti mukukhumba kubatizika. Iyo wapemphenge ŵalara ŵanyake kuti ŵakumane namwe. Chonde kopa yayi para ŵakukumana namwe. Ŵabali aŵa ŵakumumanyani kale ndipo  ŵakumutemwani. Ŵawelerengemo namwe visambizgo vyakwambilira vya Baibolo ivyo mwasambira. Ŵakukhumba waka kuwoneseska kuti mukuvimanya nadi visambizgo ivi kweniso mukumanya kuzirwa kwa kujipeleka na kubatizika. Para ŵawona kuti muli ŵakunozgeka nadi, ŵazamumuphalirani kuti mungakabatizika pa ungano wadera panji wachigaŵa uwo ukwiza.

19-20. Kasi mukwenera kuchita vichi para mwabatizika, ndipo mungachita wuli nthena?

¹⁹ Kasi mukwenera kuchita vichi para mwabatizika? * Kumbukani kuti para mwajipeleka ndikuti mwapanga chilapo, ndipo Yehova wakukhazga kuti mufiskenge. Ntheura para mwabatizika, mukwenera kufiska ivyo mukalayizga apo mukajipelekanga. Kasi mungachita wuli?

²⁰ Lutilirani kukolerana na mpingo winu. Para mwabatizika ndikuti namwe muli pakati pa “ŵabali wose.” (1 Pet. 2: 17) Ŵabali na ŵadumbu mu mpingo winu ni mbumba yinu yauzimu. Para nyengo zose muwunganenge, mukhozgenge ubwezi winu na iwo. Zuŵa lililose muŵazgenge Mazgu gha Chiuta na kughanaghanirapo. (Sal. 1:1, 2) Para mwaŵazga Baibolo, patulani nyengo ya kughanaghanirapo chomene ivyo mwaŵazga. Para mwachita nthena mazgu gha Chiuta ghamufikaninge pamtima. ‘Lutilirani kulomba.’ (Mat. 26:41) Malurombo ghinu ghakufumira pasi pamtima ghamovwiraninge kuti muŵe paubwezi wakukhora na Yehova. “Lutilirani kupenja dankha Ufumu.” (Mat. 6:33) Mungachita nthena para mukuŵika pakwamba mulimo wa kupharazga mu umoyo winu. Para mupharazgenge nyengo zose, musungilirenge chipulikano chinu kuŵa chakukhora, kweniso movwirenge ŵanji kuzakasanga umoyo wamuyirayira.—1 Tim. 4:16.

21. Kasi ubatizo umovwiraninge kuti musange vichi?

²¹ Para mwasankha kujipeleka na kubatizika ndikuti mwasankha chinthu chakuzirwa chomene icho muzamuchitaposo yayi pa umoyo winu. Mbunenesko kuti pali vinyake ivyo mukwenera kuleka kuti mubatizike. Kweni kasi ni vyakuzirwa chomene kuluska kubatizika? Yayi. Masuzgo ghose agho mungasangana nagho mu charu ichi ‘ngakanyengo kweniso ngakupepuka.’ (2 Kor. 4:17) Kweni ubatizo umovwiraninge kuti muŵe na umoyo uwemi sono kweniso muzakasange “umoyo wanadi” munthazi. (1 Tim. 6:19) Ipo chonde, ghanaghaniranipo chomene na kulomba, umo mungazgolera fumbo lakuti, “Kasi nili wakunozgeka kubatizika?”