1. Мар карыны кулэ корка пуктэмлэсь азьло?

 ПУКТЭ син азяды, кыӵе ке адями корка пуктыны малпаз шуыса. Со умой тодэ, кыӵе корка солэн пуктэмез потэ. Мыноз-а со соку ик пуктӥськон арбериос басьтыны? Уз. Пуктӥськыны кутскемлэсь азьло одӥг кулэ луись ужез быдэстоно — лыдъяно, кӧня тыр луоз выль коркаез пуктон. Малы? Сотэк тодыны уз луы, тырмоз-а коньдон та ужез пумозяз вуттыны. Куке азьло ик лыдъяськод, кӧня коньдон кулэ луоз, соку корка пуктон пумозяз вуоз, вылды.

2. Лукалэсь 14:27—30 лыдэ басьтыса, мар сярысь умой-умой малпаськоно пылатӥськемлэсь азьло?

² Иеговаез яратон но солы тау карон ӝутэ-а тӥлесьтыд мылкыддэс пылатӥськон сярысь малпаськыны? Озьы ке, соку тӥледыз ӵошатыны луоз адямиен, кудӥз корка пуктыны малпа. Малы? Эскеромы Иисуслэсь кылъёссэ, кудъёсыз гожтэмын Лукалэсь 14:27—30 (лыдӟе). Татын Иисус вера со сярысь, мае возьматэ солэн дышетскисез луон. Иисус сьӧры мынон понна, дась луоно «кутон-тыриськонэз» нуыны — шуг-секытъёсты чиданы но малэсь ке куштӥськыны (Лука 9:23—26; 12:51—53). Соин ик пылатӥськон азьын кулэ умой-умой малпаськыны, маин пумиськоно луоз, Иисуслэн дышетскисез луиды ке. Соку тӥ, пылатӥськем христианъёс кадь, эшшо но дась луоды Инмарлы оскымон ужаны-тыршыны.

3. Мае ми эскеромы та статьяын?

³ Кулэ-а пылатӥськыны, шуг-секытъёсын пумиськоно но малэсь ке куштӥськоно луиз ке но? Одно ик кулэ! Малы ке шуоно пылатӥськон трос бакель каронъёс вае али но, азьланяз но. Ойдолэ эскеромы куд-ог кулэ луись юанъёсты, кудъёсыз пылатӥськонэн герӟаськемын. Та юанъёслы валэктонъёс тӥледлы валаны юрттозы, дась-а тӥ та кулэ луись вамышез лэсьтыны.

4. а) Мар со сыӵе сӥзиськон? б) Мае возьмато «аслэсьтыд ачид куштӥськы» кылъёс, кудъёсыз гожтэмын Матфейлэсь 16:24?

⁴ Мар со сыӵе сӥзиськон? Пылатӥськемлэсь азьло астэ Инмарлы сӥзёно. Иеговалы сӥзиськон — со сюлмысь вӧсяськон, кудаз ми вераськомы, солы пырак дауръёс ӵоже ужаммы-тыршеммы потэ шуыса. Инмарлы сӥзиськыса, тӥ асьтэлэсь асьтэос куштӥськиськоды. (Лыдӟе Матфейлэсь 16:24.) Та дырысен тӥ Иеговалэн луиськоды, нош со номырин ӵошатонтэм дан (Рим. 14:8). Тӥ солы вераськоды, та дырысен но пырак дауръёс ӵоже тӥ понна валтӥсез — солы ужан-тыршон, нош асьтэлэсь кулэяськонъёстэс быдэсъян ӧвӧл шуыса. Тӥляд сӥзиськонды — со кулэ луись кылсётон, кудзэ тӥ Инмарлы вераськоды. Иегова тӥледыз кужмысь уг косы озьы лэсьтыны. Нош солы кылдэс сётӥськоды ке, со возьма, тӥ сое быдэстоды шуыса (Пс. 115:3, 5).

5. Кызьы сӥзиськон пылатӥськонэн герӟаськемын?

⁵ Кызьы сӥзиськон пылатӥськонэн герӟаськемын? Куке тӥ улондэс Иеговалы сӥзиськоды, со сярысь, Инмар сяна, нокин но уг тоды. Нош пылатӥськон ортчытӥське мукет адямиос азьын, ӵем дыръя конгрессын. Куке пылатӥськиськоды, тӥ мукетъёслы возьматӥськоды, улондэс Иеговалы сӥзиды ини шуыса b. Пылатӥськыкуды адямиос адӟо, тӥ Иегова Инмарез вань сюлмыныды, вань лулыныды, вань визьмыныды, вань кужмыныды яратӥськоды шуыса но солы пырак дауръёс ӵоже ужаны-тыршыны ужпум кутӥды шуыса (Марк 12:30).

6, 7. Кыӵе кык мугъёсъя пылатӥськыны кулэ, 1 Пётрлэсь 3:18—22 лыдэ басьтыса?

⁶ Зэмзэ ик пылатӥськыны кулэ-а? Ойдолэ эскеромы кылъёсты, кудъёсыз гожтэмын 1 Пётрлэн 3:18—22 c. (Лыдӟе.) Кызьы ковчег Нойлэсь осконзэ возьматӥз, озьы ик пылатӥськон мукетъёслы возьматэ, тӥ Иеговалы сӥзиськиды шуыса. Нош зэмзэ ик пылатӥськыны кулэ-а? Кулэ. Апостол Пётр валэктӥз малы. Нырысь ик, пылатӥськон тӥледыз уте. Пылатӥськон уте соку, куке адями ужъёсыныз возьматэ, Иисуслы оске шуыса. Со оске, Христос со понна кулӥз, инмын улыны улӟиз но али «Инмарлэн бур палаз улэ» шуыса.

⁷ Кыкетӥез, пылатӥськонлы луыса ми «чылкыт возьытлыкен» улыны быгатӥськомы. Куке ми улонмес Инмарлы сӥзиськомы но пылатӥськиськомы, милям соин эшшо но матысь кусыпъёсмы луо. Милесьтым сюлмысь ӧпкелеммес но Христослэн курбонэзлы оскеммес адӟыса, Инмар милесьтым сьӧлыкъёсмес куштэ. Озьы милям возьытлыкмы чылкыт луэ.

8. Мар тӥлесьтыд мылкыддэс ӝутыны кулэ пылатӥськыны?

⁸ Мар тӥлесьтыд мылкыддэс ӝутыны кулэ пылатӥськыны? Библиез пыр-поч эскерыса, тӥ трос тодӥды Иегова сярысь, озьы ик со сярысь, кыӵе солэн сямъёсыз но кызьы со ассэ возе пӧртэм учыръёсын. Со, мае тӥ тодӥды Инмар сярысь, тӥляд сюлмады мур пыриз но мылкыддэс ӝутӥз сое эшшо но золгес яратыны. Ӵапак Иеговаез яратон тӥлесьтыд  нырысь ик мылкыддэс ӝутыны кулэ пылатӥськыны.

9. Мае возьмато Иисуслэн кылъёсыз, Атайлэн, Пилэн, святой духлэн нимыз понна пылатӥськыны кулэ шуыса, кудъёсыз гожтэмын Матфейлэсь 28:19, 20?

⁹ Озьы ик тӥ пылатӥськыны ужпум кутӥды, малы ке шуоно Библиысь зэмлыкъёсты тодӥды но соослы оскыны кутскиды. Тодамы ваёмы Иисуслэсь кылъёссэ, куке со дышетскисьёсты дасяны курон-косон сётӥз. (Лыдӟе Матфейлэсь 28:19, 20.) Иисус вераз, выль дышетскисьёс Атайлэн, Пилэн, святой духлэн нимыз понна пылатӥськыны кулэ шуыса. Мае со возьматэ? Тӥ вань сюлмысьтыды оскыны кулэ Библиысь зэмлыкъёслы Иегова сярысь, солэн Иисус Пиез сярысь но святой дух сярысь. Та зэмлыкъёслэн бадӟым кужымзы вань, но соос тӥляд сюлмады мур пыӵаны быгатозы (Евр. 4:12). Ойдолэ соосты тодамы ваёмы.

10, 11. Кыӵе зэмлыкъёсты тӥ тодӥды Атай сярысь?

¹⁰ Тани кыӵе зэмлыкъёсты тӥ тодӥды Атай сярысь, Библиез эскерыкуды: солэн нимыз Иегова, со одӥгназ «быдэс музъем выллы Вылысь Инмар» но со зэмос Инмар (Пс. 83:18, ВД; Иер. 10:10). Со Кылдытӥсь, но «Кузё-Инмар бордын утиськон» (Пс. 3:9; 35:10). Со сюлмаськиз, милемыз сьӧлыклэсь но кулонлэсь мозмытон понна, но пырак улыны оскон сётӥз (Иоанн 17:3). Куке асьтэдыз Иеговалы сӥзиськоды но пылатӥськиськоды, тӥ Иеговалэн Адӟись-Ивортӥсез луиськоды (Ис. 43:10—12). Тӥ Иеговалэн ужась-тыршисьёсызлэн быдэс дунне вылысь семьяязы пыриськоды, кудаз котькудӥз Иеговалэсь нимзэ данъяськыса нуллэ но со ним сярысь мукетъёсызлы вера (Пс. 85:12).

¹¹ Атай сярысь та зэмлыкъёсты тодон — со туж бадӟым дан! Куке тӥ та дуно зэмлыкъёслы оскыны кутскиськоды, тӥляд мылкыдды ӝутске улондэс Иеговалы сӥзьыны но пылатӥськыны.

12, 13. Кыӵе зэмлыкъёсты тӥ тодӥды Инмарлэн Пиез сярысь?

¹² Кыӵе малпанъёсты тӥляд кылдӥзы, куке Инмарлэн Пиез сярысь зэмлыкъёсты тодӥды? Иегова бере Иисус быдэс дунне вылын тужгес но бадӟым инты басьтэ. Милемыз сьӧлыклэсь мозмытон понна, со дась луыса аслэсьтыз улонзэ сётӥз. Куке ми дун тыронлы осконмес ужъёсын возьматӥськомы, милям сьӧлыкъёсмы куштэмын луыны быгатозы, озьы ик быгатомы Инмарен кусыпъёсмес юнматыны но пырак улыны (Иоанн 3:16). Иисус — милям Быдӟым священникмы. Солэн потэ, дун тырон милемлы бакель каронъёс мед ваёз шуыса но ми Инмарлэн эшъёсыз мед луомы шуыса (Евр. 4:15; 7:24, 25). Иисус — Инмар Эксэйлыклэн Эксэез, но со пыр Иегова аслэсьтыз нимзэ чылкытатоз, вань лек ужъёсты быдтоз, музъемез райлы пӧрмытоз но адямиослы пырак улон сётоз (Матф. 6:9, 10; Усьт. 11:15). Иисус милемлы адӟем карон кельтӥз (1 Пётр 2:21). Быдэс улонэз ӵоже Инмарлэсь эриксэ быдэсъяса, со возьматӥз, кызьы милемлы улоно (Иоанн 4:34).

¹³ Иисус сярысь Библиысь зэмлыкъёслы оскыса, тӥ Инмарлэсь Пизэ яратыны кутскиськоды. Таӵе яратон тӥлесьтыд мылкыддэс ӝутоз Инмарлэсь эриксэ быдэсъяны озьы ик, кызьы сое Иисус лэсьтӥз. Собере тӥляд мылкыдды луоз Иеговалы сӥзиськыны но пылатӥськыны.

14, 15. Кыӵе зэмлыкъёсты тӥ тодӥды Святой дух сярысь?

¹⁴ Нош кыӵе малпанъёсты тӥляд кылдӥзы, куке святой дух сярысь зэмлыкъёсты тодӥды? Святой дух — со инмар ӧвӧл. Со Инмарлэн ужась-лэсьтӥсь кужымез. Святой дух пыр Иегова кивалтӥз пиосмуртъёсын, Библиез гожтон понна, та ик дух юрттэ милемлы валаны но улонамы кутыны сое, мае ми отысь лыдӟиськомы (Иоанн 14:26; 2 Пётр 1:21). Иегова сётэ милемлы святой духсэ, «мертантэм бадӟым кужыммы» мед луоз шуыса  (2 Кор. 4:7). Святой дух милемлы кужым сётэ ӟеч иворез вераны, визь сынаськонъёсын нюръяськыны, мылкыд куашканэз вормыны но шуг-секытъёс пыр потыны. Со юрттэ милемлы будэтыны умой сямъёсмес, кудъёсыз духлэн емышез пӧлы пыро (Гал. 5:22). Инмар шумпотыса сётэ аслэсьтыз духсэ соослы, кинъёс оско солы но сюлмысь куро солэсь духсэ (Лука 11:13).

¹⁵ Ми буйгатон басьтӥськомы, куке тодӥськомы, Иегова ужась-тыршисьёсызлы аслэсьтыз святой духсэ сётэ, соос ужан-тыршонзэс азьланьтыны мед быгатозы шуыса! Святой дух сярысь Библиысь зэмлыкъёслы оскыса, тӥляд мылкыдды ӝутске улондэс Иеговалы сӥзьыны но пылатӥськыны.

16. Мае ми эскеримы ини та статьяын?

¹⁶ Аслэсьтыд улондэ Иеговалы сӥзьыны но пылатӥськыны — со туж кулэ луись ужпум. Кызьы ми тодӥмы, дась луыны кулэ кутон-тыриськонэз нуыны — шуг-секытъёсты чиданы но малэсь ке но куштӥськыны. Нош бакель каронъёс кутон-тыриськонъёслэсь тросгес луозы. Пылатӥськон тӥледыз утьыны быгатоз но Инмар азьын чылкыт возьытлыкен улыны юрттоз. Валтӥсь муг, малы тӥ пылатӥськыны ужпум кутыны кулэ,— со Иеговаез яратон. Озьы ик тӥледлы вань сюлмысьтыды оскыны кулэ со зэмлыкъёслы, кудъёссэ тӥ тодӥды Атай сярысь, солэн Пиез сярысь но святой дух сярысь. Та эскерон вылын малпаськыса, кыӵе ответ тӥ сётысалды та юанлы: «Дась-а мон пылатӥськыны?»

17. Кыӵе вамышъёс лэсьтоно пылатӥськемлэсь азьло?

¹⁷ Асьтэды пылатӥськыны дась шуыса лыдъяськоды ке, тӥ, одно ик, трос лэсьтӥды ини, Иеговалы матэгес луон понна d. Библиез эскерыса, тӥ трос тодӥды Иегова но Иисус сярысь. Тӥ быгатӥды оскондэс будэтыны (Евр. 11:6). Тӥ оскиды, Иеговалэн кылсётонъёсыз, кудъёсыз Библиын гожтэмын, зэм луо шуыса но Христослэн мозмытӥсь курбонэзлы оскон тӥледыз сьӧлыклэсь но кулонлэсь утьыны быгатэ шуыса. Тӥ сьӧлыкъёсты сярысь ӧпкелиды, яке Иеговалы возьматӥды сюлмысь жялямдэс, азьвыл шонертэм ужъёс лэсьтӥды шуыса, но солэсь прощенизэ куриды. Тӥ Инмар пала берытскиды, яке быдэсак улон амалдэс воштӥды но Инмарлэн эсэпъёсызъя улыны кутскиды (Ап. уж. 3:19). Асьтэлэн осконды сярысь мукетъёсызлы верамды потӥз. Тӥ пылатӥськымтэ ивортӥсь луиды но кенешен ӵош тодытыны кутскиды (Матф. 24:14). Иегова данъяське соин, кыӵе вамышъёс тӥ лэсьтӥды! Тӥ солэсь сюлэмзэ туж шумпоттӥськоды (Мад. 27:11).

18. Кыӵе эшшо вамышъёс лэсьтоно на пылатӥськемлэсь азьло?

¹⁸ Пылатӥськемлэсь азьло эшшо кӧня ке вамышъёс лэсьтоно на. Кызьы верамы вал ини, Инмарлы сӥзиськыны кулэ. Инмарлы ас поннады сюлмысь вӧсяське но солы кылдэс сётэ, табере тӥ солэсь эриксэ быдэсъялоды шуыса  (1 Пётр 4:2). Собере пылатӥськыны мылкыдды сярысь вералэ тӧроослэн кенешсылэсь ужзэ радъясьлы. Со тӧроосты куроз тӥледын вераськыны. Куриськомы, эн кышкалэ соосын пумиськыны. Та сюлмаськись вын-агайёс тӥледын тодматскизы но тӥледыз яратӥзы ини, луоз. Соос тӥледын эскерозы Библиысь валтӥсь дышетонъёсты. Соослэн адӟемзы потэ, тӥ та дышетонъёсты валаськоды шуыса, озьы ик сӥзиськонлэсь но пылатӥськонлэсь кулэ луэмзэ дунъяськоды шуыса. Тӧроос ужпум кутӥзы ке, тӥ пылатӥськыны дась шуыса, соос вералозы тӥледлы, вуоно конгрессын пылатӥськыны быгатоды шуыса.

19, 20. Мар карыны кулэ пылатӥськем бере но мар со пӧлы пыре?

¹⁹ Мар карыны кулэ пылатӥськем бере? e Кызьы верамы вал ини, сӥзиськон — со кылсётон. Иегова возьма, ми сое быдэсъяломы шуыса. Соин ик пылатӥськемды бере тӥледлы та сӥзиськондыя улыны кулэ. Мар со пӧлы пыре?

²⁰ Кенешысьтыды вын-агайёсын но сузэр-апайёсын матысь кусыпъёс возе. Пылатӥськемды бере тӥ христиан вынлыклэн оглюкетэз луиськоды (1 Пётр 2:17). Табере со тӥляд духовной семьяды. Ялан кенеше ветлыса, тӥ вын-агайёсын но сузэр-апайёсын кусыпъёстэс юнматӥськоды. Котькуд нунал Инмарлэсь Кылзэ лыдӟе но со вылын малпаське (Пс. 1:1, 2). Библиысь оглюкетсэ лыдӟемды бере, дыр висъялэ, та кылъёс вылын мур малпаськон понна. Соку Библиысь малпанъёс сюлмады пырозы. Иеговалы котьку вӧсяське (Матф. 26:41). Сюлмысь вӧсяськонъёс тӥледыз Иеговалы матэ карозы. «Нырысь ик Инмарлэсь Эксэйлыксэ» утчалэ (Матф. 6:33). Со понна кулэ, тодытон уж тӥляд улонады валтӥсь инты мед басьтоз шуыса. Ялан тодытыса, тӥ асьтэлэсь оскондэс юнматӥськоды но мукетъёслы юрттӥськоды султыны сюрес вылэ, кудӥз пырак улонэ нуэ (1 Тим. 4:16).

21. Мар сётоз тӥледлы пылатӥськон?

²¹ Аслэсьтыд улондэ Иеговалы сӥзён но пылатӥськон — со туж кулэ луись ужпум. Солэсь но кулэезгес ноку но уз луы ни! Зэм но, та ужпум герӟаськемын кутон-тыриськонъёсын. Соку кулэ-а пылатӥськыны? Одно ик кулэ! Та вуж дуннеын шуг-секытъёс «вакчи дырлы» гинэ луо (2 Кор. 4:17). Пылатӥськон али ик ини шудогес улонлы ӧсъёс усьтэ но вуонояз «быронтэм улон» басьтыны юрттэ (1 Тим. 6:19). Соин ик тӥледыз куриськомы, сак но вӧсяськыса малпаське, кыӵе ответ тӥ сётоды та юанлы: «Дась-а мон пылатӥськыны?»