1. Өйни селиштин авал немә қилиш керәк?

 БИР киши өй салмақчи болди дәйли. У қандақ өй селишни халайдиғанлиғини билиду. Ундақта, у дәрһал берип барлиқ керәклик материалларни вә қурал-сайманларни сетивелиши вә қурулушни башлиши керәкму? Әлвәттә, яқ. Қурулушни башлаштин авал, у киши өйни селишқа қанчә чиқим кетидиғанлиғини һесаплап чиқиши муһим. Немә үчүн? Чүнки у бу өйни селишқа өзиниң пули йетидиғанлиғиға көз йәткүзүши керәк. У алдин-ала чиқимни тәпсилий һесаплап чиқса, бу өйни ахирғичә селип пүтирәлиши мүмкин.

2. Луқа 14:27—30ға асасән, чөмдүрүлүштин өтүштин бурун сиз немә тоғрилиқ пухта ойлинишиңиз керәк?

² Йәһва Худаға болған меһир-муһәббитиңиз вә Униң барлиқ яхшилиқлири үчүн миннәтдарлиғиңиз сизни чөмдүрүлүштин өтүшкә дәвәт қилдиму? Шундақ болса, сизни өйни селишни қарар қилип, тәйярланған кишигә охшитишқа болиду. Немә үчүн? Келиң, Әйсаниң Луқа 14:27—30да (оқуң) йезилған сөзлирини көрүп чиқайли. Әйса униң шагирти болуш үчүн немә қилиш керәклигини ейтқан. Әйсаниң кәйнидин әгишиш үчүн, биз бәзи қийинчилиқларға дуч келишкә вә бәзи нәрсиләрдин ваз кечишкә тәйяр болушимиз керәк (Луқа 9:23—26; 12:51—53). Шуңа чөмдүрүлүш мәрасимидин өтүштин бурун сиз Әйсаниң шагирти болсиңиз, қандақ қийинчилиқларға дуч келидиғанлиғиңиз тоғрилиқ пухта ойлинип көрүшиңиз лазим. Шу чағда сиз чөмдүрүлүштин өткән мәсиһий сүпитидә Худаға садиқ хизмәт қилишқа техиму яхширақ тәйяр болисиз.

3. Бу мақалидә немини муһакимә қилимиз?

³ Мәсиһниң чөмдүрүлүштин өткән шагирти болуш қийинчилиқларға дуч келишиңизгә вә бәзи нәрсиләрдин ваз кечишиңизгә әрзәмду? Әлвәттә, әрзийду! Чөмдүрүлүш мәрасимидин өтүш һазирму, келәчәктиму сан-санақсиз бәрикәтләргә еришишиңизгә йол ачиду. Һазир чөмдүрүлүш билән мунасивәтлик бәзи соалларни муһакимә қилайли. Бу «Мән чөмдүрүлүштин өтүшкә тәйярму?» дегән соалға җавап беришиңизгә ярдәм бериду.

4. а) Өзини беғишлаш дегән немә? ә) Мәтта 16:24тә тилға елинған өзидин «ваз кечиш» дегән сөз немини билдүриду?

⁴ Өзини беғишлаш дегән немә? Чөмдүрүлүш мәрасимидин өтүштин авал, сиз өзүңизни Худаға беғишлишиңиз керәк. Өзүңизни Худаға беғишлиғанда, сиз Йәһва Худаға чин жүрәктин дуа қилип, һаятиңизни Униңға мәңгү хизмәт қилишқа беғишлимақчи екәнлигиңизни ейтисиз. Өзүңизни Худаға беғишланғанда, сиз өзүңиздин «ваз кечисиз» (Мәтта 16:24ни оқуң). Әнди сиз Йәһва Худаға мәнсүп болуш шан-шәрипигә егә (Рим. 14:8). Сиз Йәһваға шу күндин башлап, һаятиңиздики әң муһим орунға өз хаһишлириңизни әмәс, бәлки Униңғила хизмәт қилишни қойидиғанлиғиңизни ейтисиз. Өзини беғишлаш — Худаға берилгән қәтъий вәдә яки қәсәм. Йәһва Худа бизни шундақ вәдә беришкә мәҗбурлимайду. Лекин шундақ вәдини бәрсәк, У бизниң вәдимиздә турушимизни күтиду (Зәб. 116:12, 14).

5. Өзини беғишлаш билән чөмдүрүлүшниң қандақ пәрқи бар?

⁵ Өзини беғишлаш билән чөмдүрүлүшниң қандақ пәрқи бар? Һаятиңизни Йәһваға беғишлиғанлиғиңизни сиздин вә Йәһва Худадин башқа һечким билмәйду. Чөмдүрүлүштин өткәнлигиңизни болса, башқа адәмләр, адәттә конгресста көриду. Чөмдүрүлүштин өткән чағда, сиз башқиларға өзүңизни аллиқачан Йәһва Худаға беғишлиғанлиғиңизни көрситисиз b. Сиз чөмдүрүлүш мәрасимидин өткәндә, башқиларға Йәһва Худани пүтүн жүригиңиз, пүтүн җениңиз, пүтүн зеһниңиз һәм пүтүн күчиңиз билән сөйидиғанлиғиңизни вә Униңға мәңгү хизмәт қилишқа қәтъий бәл бағлиғанлиғиңизни билдүрисиз (Марк 12:30).

6, 7. Петрусниң 1-хети 3:18—22гә асасән, чөмдүрүлүштин җәзмән өтүшимиз зөрүрлигиниң қандақ икки сәвәви бар?

⁶ Чөмдүрүлүштин җәзмән өтүш зөрүрму? Петрусниң 1-хети 3:18—22дики (оқуң) сөзләрни көрүп чиқайли. Кемә Нуһ пәйғәмбәрниң Худаға ишинидиғанлиғини адәмләргә көрсәткән. Шуниңға охшаш, чөмдүрүлүш мәрасимидин өткәнлигиңиз башқиларға сиз өзүңизни Йәһва Худаға беғишлиғанлиғиңизни көрситиду. Лекин чөмдүрүлүштин җәзмән өтүш зөрүрму? Һә шундақ, зөрүр. Әлчи Петрус буниң сәвәвини чүшәндүргән. Биринчидин, чөмдүрүлүштин өтүш бизни «қутқузиду». Әйса Мәсиһкә, униң биз үчүн җенини пида қилғанлиғиға, асманда яшаш үчүн тирилдүрүлгәнлигигә вә һазир Худаниң «оң йенида» олтарғанлиғиға ишинидиғанлиғимизни иш-һәрикәтлиримиз билән көрсәтсәк, чөмдүрүлүштин өтүш бизни қутқузалайду.

⁷ Иккинчидин, чөмдүрүлүштин өтсәк, «пак вижданға» егә болимиз. Өзүмизни Йәһва Худаға беғишлап, чөмдүрүлүштин өткәндә, Униң билән алаһидә мунасивитимиз пәйда болиду. Биз гуналиримизға чин жүрәктин товва қилғанлиқтин вә төләм қурбанлиғиға ишәнч бағлиғачқа, Худа гуналиримизни кәчүриду. Шу сәвәптин, биз Худаниң алдида пак вижданға егә болалаймиз.

8. Чөмдүрүлүштин өтүшкә сизни немиләр дәвәт қилиши керәк?

⁸ Чөмдүрүлүштин өтүшкә сизни немиләр дәвәт қилиши керәк? Сиз Муқәддәс китапни пухта тәтқиқ қилип, Йәһва Худа, Униң қандақ Шәхс екәнлиги вә У қандақ һәрикәт қилидиғанлиғи тоғрилиқ көп билим алдиңиз. Худа тоғрилиқ алған билимиңиз жүригиңизгә тәсир қилип, сизни Уни бәк яхши көрүшкә дәвәт қилди. Йәһва Худаға болған меһир-муһәббитиңиз чөмдүрүлүштин өтүшиңизгә дәвәт қилидиған әң муһим сәвәп болуши керәк.

9. Мәтта 28:19, 20дә йезилғандәк, Худа Ата, Униң Оғли вә муқәддәс роһниң нами билән чөмдүрүлүш немини билдүриду?

⁹ Сизни чөмдүрүлүштин өтүшкә дәвәт  қилған йәнә бир сәвәп — Муқәддәс китаптики һәқиқәтләрни үгинип, уларға ишәнгәнлигиңиз. Әйса әгәшкүчилиригә шагиртларни тәйярлаш тоғрилиқ буйруғини көрүп чиқайли (Мәтта 28:19, 20ни оқуң). Әйсаниң ейтишичә, чөмдүрүлмәкчи болған адәмләр Худа Ата, Униң Оғли вә муқәддәс роһниң нами билән чөмдүрүлүши керәк. Бу немини билдүриду? Сиз Муқәддәс китаптин Йәһва Худа, Униң Оғли Әйса Мәсиһ вә муқәддәс роһ тоғрилиқ үгәнгән һәқиқәтләргә чин жүрәктин ишинишиңиз керәк. Бу һәқиқәтләрниң күчи зор вә улар жүригиңизгә қаттиқ тәсир қилиши мүмкин (Ибр. 4:12). Уларниң бирнәччисини көрүп чиқайли.

10, 11. Атимиз тоғрилиқ қандақ һәқиқәтләрни биливалдиңиз вә ишәндиңиз?

¹⁰ Сиз Ата тоғрилиқ һәқиқәтләрни биринчи қетим үгәнгәнлигиңизни есиңизгә елиң. Сиз Униң исми Йәһва екәнлигини, Униң пүткүл җаһанда Әң Бүйүк вә бирдинбир һәқиқий Худа екәнлигини билдиңиз (Чиқ. 6:3; Зәб. 83:18; Йоһ. 17:3). У бизниң Яратқучимиз вә Қутқазғучимиз (Зәб. 3:8; 36:9). У бизни гуна вә өлүмдин азат қилиш үчүн вә мәңгү яшишимиз үчүн бир чарә орунлаштурған (Йоһ. 17:3). Өзүңизни Худаға беғишлап, чөмдүрүлүш мәрасимидин өткәнлигиңиз Йәһва гувачилириниң бири болғанлиғиңизни көрситиду (Йәшая 43:10—12). Сиз Худаниң исми билән атилиш вә Униң исмини башқиларға ейтиштин пәхирлинидиған Худа хизмәтчилиридин ибарәт дуниявий аилиниң әзаси болисиз (Зәб. 86:12).

¹¹ Атимиз тоғрилиқ Муқәддәс китаптики һәқиқәтләрни чүшиниш немә дегән зор шан-шәрәп! Сиз бу һәқиқәтләргә ишәнгәндә, өзүңизни Йәһва Худаға беғишлап, чөмдүрүлүш мәрасимидин өтүшкә интилисиз.

12, 13. Оғул тоғрилиқ қандақ һәқиқәтләрни биливалдиңиз вә қобул қилдиңиз?

¹² Оғул тоғрилиқ һәқиқәтни билгәндә, сиз қандақ һис-туйғуда болдиңиз? Әйса Каинаттики иккинчи әң муһим шәхс. У бизни қутқузуш үчүн һаятини тәйярлиқ билән қурбанлиққа бәргән. Иш-һәрикәтлиримиз билән төләм қурбанлиғиға ишинидиғанлиғимизни көрсәтсәк, гуналиримиз кәчүрүлиду, Худа билән достлуқ мунасивәтни йетилдүрәләймиз вә мәңгү һаятқа еришәләймиз (Йоһ. 3:16). Әйса — Алий Роһаний. У бизниң төләмдин пайда елишимизни вә Худа билән йеқин мунасивәттә болушимизни халайду (Ибр. 4:15; 7:24, 25). Әйса Мәсиһ Худа Падишалиғиниң Падишаси болғанлиқтин, Йәһва Худа Әйса арқилиқ Өз исмини муқәддәс қилиду, рәзилликни йоқ қилиду вә келәчәктики җәннәттә инсанларни пүтмәс-түгимәс бәрикәтләргә ериштүриду (Мәт. 6:9, 10; Вәһ. 11:15). Әйса — бизниң үлгимиз (Пет. 1-х. 2:21). У һаятини Худаниң ирадисини орунлашқа беғишлап, бизгә үлгә қалдурған (Йоһ. 4:34).

¹³ Сиз Муқәддәс китапта Әйса тоғрилиқ йезилған һәқиқәтләрни қобул қилғанда, Худаниң сөйүмлүк Оғлини яхши көрүшкә башлайсиз. Бу меһир-муһәббәт сизни Әйсадин үлгә елип, һаятиңизни Худаниң ирадисини орунлашқа беғишлишиңизға дәвәт қилиду. Нәтиҗидә сиз өзүңизни Йәһва Худаға беғишлап, чөмдүрүлүш мәрасимидин өтүшкә интилисиз.

14, 15. Сиз муқәддәс роһ тоғрилиқ қандақ һәқиқәтләрни үгәндиңиз вә қобул қилдиңиз?

¹⁴ Муқәддәс роһ тоғрилиқ һәқиқәтләрни билгиниңиздә, қандақ һис-туйғуда болдиңиз? Муқәддәс роһ шәхс әмәс, у Худаниң һәрикәт күчи. Йәһва Худа бу роһ арқилиқ Муқәддәс китапни язған адәмләргә йол көрсәткән вә бизниң Худа Сөзидин оқуп-үгәнгәнлиримизни чүшинип, әмәлийәттә қоллинишимизға ярдәм бериду (Йоһ. 14:26; Пет. 2-х. 1:21). Муқәддәс роһ арқилиқ Йәһва Худа бизгә «адәттики күчтин ешип чүшидиған күчни» бериду (Кор. 2-х. 4:7). Муқәддәс роһ бизгә хуш хәвәрни җакалаш, езиқишларға берилмәслик, чүшкүнлүккә чүшмәслик вә қийинчилиқларға бәрдашлиқ беришкә күч бериду. У бизгә муқәддәс роһ мевисигә киридиған хисләтләрни риваҗландурушқа ярдәмлишиду (Гал. 5:22). Худа Униңға  ишинидиған вә Униңдин чин жүрәктин муқәддәс роһни сорайдиған кишигә уни сехийлиқ билән бериду (Луқа 11:13).

¹⁵ Муқәддәс роһ Йәһва Худаниң хизмәтчилиригә Униңға хизмәт қилишқа ярдәм беридиғанлиғини билиш бизгә тәсәлли бериду, шундақ әмәсму? Сиз муқәддәс роһ тоғрилиқ үгәнгән һәқиқәтләрни қобул қилғанда, өзүңизни Худаға беғишлап, чөмдүрүлүштин өтүшни халайсиз.

16. Биз немиләрни биливалдуқ?

¹⁶ Өзүңизни Худаға беғишлаш вә чөмдүрүлүш мәрасимидин өтүш — интайин муһим қарар. Жуқурида биливалғинимиздәк, сиз бәзи қийинчилиқларға дуч келишкә вә бәзи нәрсиләрдин ваз кечишкә тәйяр болушиңиз керәк. Амма еришидиған бәрикәтлириңиз ваз кечидиған нәрсилириңиздин ешип чүшиду. Чөмдүрүлүштин өтүш һаятиңизни қутқузалайду вә Худаниң алдида пак вижданға ериштүрәләйду. Чөмдүрүлүштин өтүшкә қарар қилғанлиғиңизниң әң муһим сәвәви Йәһва Худаға болған меһир-муһәббитиңиз болуши керәк. Шундақла сиз Ата, Оғул вә муқәддәс роһ тоғрилиқ билгән һәқиқәтләргә пүтүн жүригиңиз билән ишинишиңиз лазим. Буларниң һәммисини муһакимә қилип болғандин кейин сиз «Мән чөмдүрүлүштин өтүшкә тәйярму?» дегән соалға қандақ җавап берисиз?

17. Чөмдүрүлүштин өтүштин авал қандақ қәдәмләрни қилиш керәк?

¹⁷ Мән чөмдүрүлүштин өтүшкә тәйяр дәп ойлисиңиз, сиз Йәһва Худа билән йеқин достлуқ мунасивәттә болуш үчүн аллибурун нурғун қәдәмләрни қилғанлиғиңиз шәк-шүбһисиздур c. Муқәддәс китапни дайим оқуп-үгәнгәнликтин, Йәһва Худа вә Әйса Мәсиһ тоғрилиқ көп нәрсиләрни биливалдиңиз. Сиз етиқадиңизни риваҗландурдиңиз (Ибр. 11:6). Сиз Худаниң Муқәддәс китаптики һәммә вәдилиригә ишинисиз вә Әйсаниң төләм қурбанлиғиға болған етиқадиңиз сизни гуна вә өлүмниң қуллуғидин азат қилалайдиғанлиғиға ишәнчиңиз камил. Шундақла өткүзгән хаталиқлириңизға ечинип вә Йәһва Худадин қилған яман ишлириңиз үчүн кәчүрүм сорап, гуналириңизға товва қилдиңиз. Сиз йәнә бурунқи яман һаят тәрзиңизни ташлап вә Худаниң жүригини хурсән қилғидәк яшашни башлап, һаятиңизни түп йилтизи билән өзгәрттиңиз (Әлч. 3:19). Сиз башқиларға өз етиқадиңиз тоғрилиқ қизғин вәз қилисиз. Шуңа сиз чөмдүрүлүш мәрасимидин өтмигән вәз ейтқучи болуп, җамаәттики қериндашлар билән биллә вәз қилишни башлидиңиз (Мәт. 24:14). Йәһва Худа сизниң шундақ муһим қәдәмләрни қилғанлиғиңиздин пәхирлиниду. Сиз Униң көңлини хошаллиққа чөмдүрдиңиз (Пәнд н. 27:11).

18. Чөмдүрүлүштин илгири сиз йәнә немиләрни қилишиңиз керәк?

¹⁸ Чөмдүрүлүштин өтүштин илгири сиз йәнә бирнәччә нәрсиләрни қилишиңиз керәк. Жуқурида ейтилғандәк, сиз өзүңизни Худаға беғишлишиңиз лазим. Буниң үчүн өзүңиз ялғуз болғанда Худаға чин жүрәктин дуа қилип, һаятиңизни Униң ирадисини орунлаш үчүн беғишлашни вәдә қилиң (Пет. 1-х. 4:2). Андин  ақсақаллар кеңишиниң рәисигә чөмдүрүлүштин өтүшни халайдиғанлиғиңизни ейтиң. У бәзи ақсақалларни сиз билән учришишни сорайду. Улар билән учришиштин әнсиримәң. Бу меһрибан бурадәрләр сизни билиду вә бәк яхши көриду. Улар сиз билән өзүңиз оқуп-үгәнгән Муқәддәс китапниң асасий тәлимлирини көрүп чиқиду. Ақсақаллар сизниң бу тәлимләрни чүшинидиғанлиғиңизға вә беғишлиниш билән чөмдүрүлүшниң муһимлиғини билидиғанлиғиңизға көз йәткүзүшни халайду. Улар тәйяр екәнлигиңизгә көз йәткүзсә, йеқинда өтидиған конгресста чөмдүрүлүштин өтәләйдиғанлиғиңизни хәвәр қилиду.

19, 20. Чөмдүрүлүштин өткәндин кейин немә қилишиңиз керәк вә буни қандақ қилалайсиз?

¹⁹ Чөмдүрүлүштин кейин немә қилишиңиз керәк d? Беғишланғанда сиз Йәһва Худаға қәсәм бәргәнлигиңизни вә Униң бу вәдиңиздә турушиңизни күтидиғанлиғини унтумаң. Шуңа чөмдүрүлүштин өткәндин кейин сиз шу вәдиңизгә мас яшишиңиз керәк. Сиз буни қандақ қилалайсиз?

²⁰ Қериндашлар билән йеқин мунасивәттә болуң. Чөмдүрүлүштин өткән етиқатчи болғанлиқтин, әнди сиз дуниявий «қериндашлиқниң» әзаси (Пет. 1-х. 2:17). Җамаәттики қериндашлар сизниң аилиңиздәк. Учришишларға дайим қатнашсиңиз, улар билән достлуғиңизни мустәһкәмләләйсиз. Һәр күни Худаниң Сөзини оқуп, униң үстидин ойлиниң (Зәб. 1:1, 2). Муқәддәс китапни оқуғандин кейин оқуғанлириңиз тоғрилиқ чоңқур ойлинишқа вақит чиқириң. Шу чағда Худа Сөзи жүригиңизгә тәсир қилиду. «Тохтимай дуа қилиң» (Мәт. 26:41). Чин жүрәктин ейтқан дуалириңиз сизни Йәһва Худаға йеқинлаштуриду. «Авал Падишалиқни... издәшни давамлаштуруң» (Мәт. 6:33). Буниң үчүн вәз ишини һаятиңизниң муһим бир қисми қилиң. Вәз хизмитигә дайим қатнашсиңиз, етиқадиңиз күчлүк болиду вә сиз башқиларға мәңгү яшаш үмүтигә еришишкә ярдәм берәләйсиз (Тим. 1-х. 4:16).

21. Чөмдүрүлүштин өтүш немигә йол ачиду?

²¹ Йәһва Худаға беғишлинип, чөмдүрүлүш мәрасимидин өтүш һаятиңиздики әң муһим қарар. Әлвәттә, буниң үчүн бәзи нәрсиләрдин ваз кечишкә тоғра келиду. Лекин бу униңға әрзәмду? Әлвәттә! Бу дунияда дуч келидиған һәрқандақ қийинчилиқ «қисқа вақитлиқ һәм йеник» (Кор. 2-х. 4:17). Лекин чөмдүрүлүш мәрасимидин өтүш сизни һазирниң өзидә бәхитлик һаятқа ериштүрүп, келәчәктә «һәқиқий һаятлиққа» йол ачиду (Тим. 1-х. 6:19). Шуңа илтимас, «Мән чөмдүрүлүштин өтүшкә тәйярму?» дегән соалниң җавави тоғрилиқ дуа қилип, бу соалға җавап бериң.