1. Nye omunu umue a sukila oku linga osimbu ka fetikile oku tunga onjo?

SOKOLOLA okuti omunu umue o yongola oku tunga onjo yimue. Eye wa kũlĩha onjo a yongola oku tunga. Anga hẽ vepuluvi liaco, enda vovenda kuenda o landa ovimalẽho vi sukiliwa loku fetika oku tunga? Sio. Osimbu ka fetikile oku tunga, o sukila oku linga cimue ci kuete esilivilo, okuti oku kũlĩhĩsa epese lia kongela voku tunga onjo yaco. Momo lie? Momo eye o sukila oku kũlĩhĩsa nda o kuete olombongo vi tẽla vioku malusula onjo. Nda eye wa kũlĩhĩsa lutate epese liaco osimbu ka fetikile oku tunga, citava okuti o malusula ciwa upange a fetika.

2. Ndomo ca tangiwa kelivulu lia Luka 14:27-30, nye o sukila oku sokolola lutate osimbu kua papatisiwile?

² Ocisola kuenda olopandu o lekisa ku Yehova, vi ku vetiya hẽ oku sokolola koku papatisiwa? Nda oco, o sukila oku linga ocina cimuamue ci linga ulume o yongola oku tunga onjo. Momo lie tu popela ndoco? Kũlĩhĩsa olondaka via Yesu kelivulu lia Luka 14:27-30. (Tanga.) Yesu wa tukula eci ci lomboloka oku kala ondonge yaye. Oco tu kale olondonge viaye, tu sukila oku tava “epese” lia kongelamo ndeci, ovitangi kuenda oku siapo ovina vimue. (Luka 9:23-26; 12:51-53) Omo liaco, osimbu kua papatisiwile o sukila oku kũlĩhĩsa lutate ovina via kongelamo. Nda wa ci linga, o ka litunda ciwa koku vumba Suku Ndukristão wa papatisiwa.

3. Nye tu konomuisa vocipama cilo?

³ Anga hẽ ci kuete muẽle esilivilo oku kala ondonge ya Kristu? Oco, ci kuete esilivilo! Epapatiso li ecelela okuti o kuata asumũlũho alua cilo kuenda kovaso yoloneke. Vocipama cilo, tu konomuisa apulilo amue a kuete esilivilo atiamẽla kepapatiso. Atambululo aco a ka ku kuatisa oku tambulula epulilo liokuti: “Nda li pongiyila hẽ oku papatisiwa?”

4. (a) Elitumbiko li lomboloka nye? (b) Nye ci lomboloka ondaka yokuti, ka ka “lisokolole” vali eye muẽle, ndomo ca tukuiwa ku Mateo 16:24?

⁴ Elitumbiko li lomboloka nye? Osimbu kua papatisiwile o sukila oku litumbika. Poku litumbika ku Yehova, o likutilila lutima wosi pokolika oku u sapuila okuti, o yongola oku linga ocipango caye otembo yosi. Eci o litumbika ku Yehova, ku ‘lisokolola’ vali ove muẽle. (Tanga Mateo 16:24.) Momo kaliye wa tiamẽla ku Yehova. (Va Rom. 14:8) Ove wo sapuila okuti okupisa cilo, ocina ca velapo kokuove oku u vumba, okuti oku lisanjuisa ove muẽle sio. Elitumbiko ohuminyo yimue yi kuete esilivilo lialua yi lingiwa ku Yehova. Ocili okuti, eye ka tu kisika oku linga ohuminyo yaco. Pole, nda tua yi linga, eye o lavoka okuti tu yi tẽlisa.—Osa. 116:12, 14.

5. Etepiso lipi li kasi pokati kelitumbiko lepapatiso?

⁵ Etepiso lipi li kasi pokati kelitumbiko lepapatiso? Elitumbiko li lingiwa pokolika; okuti ove lika la Yehova. Pole epapatiso, li lingiwa powiñi; pocitumãlo cimue kovaso yomanu, ndeci kohongele yimue yimbo ale kohongele yimue yofeka. Eci o papatisiwa o lekisa komanu okuti, wa litumbika ale ku Yehova. * Kuenje epapatiso liove lieca uvangi komanu okuti, o sole Yehova Suku yove lutima wove wosi, lomuenyo wove wosi, lolondunge viove viosi, longusu yove yosi kuenda wa nõlapo muẽle oku u vumba otembo yosi.—Mar. 12:30.

6-7. Ndomo ca tangiwa kukanda 1 Petulu 3:18-22, asunga api avali tu sukilila oku papatisiwa?

⁶ Anga hẽ epapatiso li sukiliwa muẽle? Kũlĩhĩsa olondaka vi sangiwa kukanda 1 Petulu 3:18-22. (Tanga.) Ndeci ocimbaluku ca Noha ca kala uvangi wekolelo liaye, cimuamue haico okuti, epapatiso lieca uvangi komanu okuti ove wa litumbika ku Yehova. Anga hẽ epapatiso li sukiliwa muẽle? Oco, li sukiliwa. Petulu wa tukula esunga liaco. Tete, epapatiso li tu ‘popela.’ Epapatiso li tu popela nda tua eca ananga a sukiliwa okuti, oku kuata ekolelo ku Yesu kuenda oku tava okuti, eye wa fa kuenda wa pinduiwa kuenje wa enda kilu, cilo o kasi “kondio ya Suku.”

⁷ Vali, epapatiso li tu kuatisa oku kuata “utima wa yela.” Eci tu litumbika ku Yehova loku papatisiwa, tu fetika ukamba umue ulikasi laye. Omo lioku likekembela lutima wosi kuenda ekolelo lietu kocisembi, Yehova ecela akandu etu. Etu tu kuata utima wa yela kovaso a Yehova.

8. Lipi esunga lia velapo li ku vetiya oku papatisiwa?

⁸ Lipi esunga lia velapo li ku vetiya oku papatisiwa? Omo lioku kapako ovina wa lilongisa Vembimbiliya, wa kũlĩha ovina vialua viatiamẽla ku Yehova, kekalo liaye kuenda kolonjila viaye. Ovina viaco, via vetiyavo utima wove kuenda oku u sola calua. Ocisola o kuetele Yehova, te oco ci kala ocina ca velapo ci ku vetiya oku papatisiwa.

9. Nye ci lomboloka oku papatisiwa vonduko ya Tate la Mõla kuenda yespiritu sandu, ndomo ca tukuiwa ku Mateo 28:19, 20?

⁹ Esunga likuavo lieci o papatisiwila lieli okuti, wa lilongisa ovina vi sanguiwa Vembimbiliya kuenda wa tava kokuavio. Kũlĩhĩsa eci Yesu a popia poku eca ocikundi coku longisa omanu oco va linge olondonge. (Tanga Mateo 28:19, 20.) Ndomo Yesu a ci popia,  vana va yongola oku papatisiwa te va ci linga ‘vonduko ya Tate la Mõla kuenda yespiritu sandu.’ Eci ci lomboloka nye? Ci lomboloka okuti o sukila oku tava lutima wosi kocili Cembimbiliya catiamẽla ku Yehova; Komõlaye Yesu; kuenda kespiritu sandu. Ocili caco ci kuete unene walua kuenda ci pondola oku vetiya ondongosi yutima wove. (Va Hev. 4:12) Tu konomuisi vimue pokati kovina viaco.

10-11. Ocili cipi catiamẽla ku Tate ove wa lilongisa loku tava?

¹⁰ Sokolola eci wa fetika oku lilongisa ocili catiamẽla ku Tate okuti: ‘Onduko yaye Yehova,’ eye lika “Tõlo koluali luosi” kuenda eye lika ‘Suku yocili.’ (Osa. 83:18; Isa. 37:16) Eye ululiki wetu kuenda ‘epopelo li tunda ku Yehova.’ (Osa. 3:8; 36:9) Eye wa linga eliangiliyo lioku tu yovola kekandu kuenda kolofa loku tu ĩha elavoko liomuenyo ko pui. (Yoa. 17:3) Elitumbiko liove kuenda epapatiso, vi ka situlula okuti Wumbangi ya Yehova. (Isa. 43:10-12) Kuenje o ka panga onepa kepata liafendeli va Yehova koluali luosi vana vambata onduko yaye loku yi sapuila komanu vakuavo.—Osa. 86:12.

¹¹ Hesumũlũhokuolio oku kuata elomboloko lieci Embimbiliya li longisa catiamẽla ku Tate Yehova! Eci o tava kocili caco, utima wove u ka ku vetiya oku litumbika ku Yehova kuenda oku papatisiwa.

12-13. Ocili cipi catiamẽla Komõla ove wa lilongisa loku tava?

¹² Wa liyeva ndati eci wa lilongisa ocili catiamẽla Komõla? Yesu eye omunu wa vali wa velapo voluali luosi. Eye Onjovoli yetu. Wa lieca olumue poku tu fila. Kuenje eci tu lekisa kovilinga okuti tua kolela kocisembi, akandu etu a ecelua, tu kuata ukamba uwa la Suku kuenda omuenyo ko pui. (Yoa. 3:16) Yesu eye Ocitunda cetu Cinene. Eye o yongola okuti, tu kuatisiwa locisembi loku kuata ukamba la Suku. (Va Hev. 4:15; 7:24, 25) Omo okuti Yesu Osoma Yusoma wa Suku, pocakati caye Yehova o ka kemãlisa onduko yaye, o ka malako evĩho kuenda o ka nena asumũlũho ka a pui Vocumbo Celau. (Mat. 6:9, 10; Esit. 11:15) Yesu ongangu ya velapo tu sukila oku kuama. (1 Pet. 2:21) Eye wa tu sila ongangu yiwa poku lieca olumue koku linga ocipango ca Suku.—Yoa. 4:34.

¹³ Eci o tava kalongiso Embimbiliya atiamẽla ku Yesu, o ka sola Omõla wa Suku o soliwe. Ocisola caco, ci ka ku vetiya oku linga ocipango ca Suku, ndeci Yesu a linga. Kuenje o ka vetiyiwa oku litumbika ku Yehova loku papatisiwa.

14-15. Ocili cipi catiamẽla kespiritu sandu ove wa lilongisa loku tava?

¹⁴ Ocisimĩlo cipi wa kuata eci wa lilongisa ocili catiamẽla kespiritu sandu? Espiritu sandu, hamunuko, pole, ongusu ya Suku. Yehova pocakati cespiritu sandu, wa vetiya alume oku soneha Embimbiliya kuenje olio li tu kuatisa oku kuata elomboloko loku kapako ovina tu tanga. (Yoa. 14:26; 2 Pet. 1:21) Handi vali, Yehova pocakati cespiritu liaye, o tu ĩha “unene wa piãla.” (2 Va Kor. 4:7) Espiritu liaco, li tu kuatisa oku kunda olondaka viwa, oku yula oloseteko, esumuo kuenda alambalalo. Olio li tu kuatisavo oku lekisa ovituwa viwa vi panga onepa ‘kepako liespiritu.’ (Va Gal. 5:22) Suku eca espiritu liaye ku vana vo kolela haivo va pinga espiritu liaco lutima wosi.—Luka 11:13.

¹⁵ Ci lembeleka calua oku kũlĩha okuti, afendeli va Yehova va pondola oku kolela okuti espiritu sandu li va kuatisa oku u vumba! Omo liaco, nda wa tava kocili catiamẽla kespiritu sandu, o ka vetiyiwa oku litumbika ku Suku kuenda oku papatisiwa.

16. Ovina vipi tua lilongisa toke cilo?

 ¹⁶ Onjila wa nõla yoku litumbika ku Suku loku papatisiwa, enanga limue lia velapo. Ndomo tua ci lilongisa ale, o sukila oku kũlĩha ovina via kongelamo ndeci, ovitangi kuenda oku siapo ovituwa viosimbu. Pole, asumũlũho o ka tambula a velapo, okuti ovina wa siapo vi sule. Epapatiso li pondola oku ku yovola kuenda li ecelela okuti o kuata utima wa yela kovaso a Suku. Ocisola o kuetele Yehova Suku, te oco ci kala esunga lia velapo lieci o papatisiwila. Ove o sukilavo oku tava lutima wosi kocili wa siata oku lilongisa catiamẽla ku Tate, Komõla kuenda kespiritu sandu. Ndomo tua ci konomuisa toke cilo, o tambulula ndati epulilo liokuti, “Ame hẽ nda lipongiyila oku papatisiwa?”

17. Nye omunu umue a sukila oku linga osimbu ka papatisiwile?

¹⁷ Nda wa limbuka okuti wa lipongiyila oku papatisiwa, o fetika oku eca enanga lioku kuata ukamba uwa la Yehova. * Omo lioku lilongisa Embimbiliya olonjanja viosi, wa kũlĩha ovina vialua viatiamẽla ku Yehova la Yesu. Kuenje ekolelo liove lia li vokiya. (Va Hev. 11:6) Ove wa kolela lutima wosi kolohuminyo via Yehova vi sangiwa Vembimbiliya loku tava okuti ekolelo liove kocilumba ca Yesu li ku yovola kakandu kuenda kolofa. Wa likekembela akandu ove; wa limbuka akulueya ove kuenda wa pinga ku Yehova oco a ku ecele. Wa linga apongoloko komuenyo wove; wa siapo ovina vĩvi wa lingaile kuenje wa fetika oku linga ovina vi sanjuisa Suku. (Ovil. 3:19) Ove wa sanjukila oku sapuila vakuene ovina viatiamẽla kekolelo liove. Kuenje wa linga ukundi ka papatisiwile kuenda wa fetika oku kunda kumue lekongelo. (Mat. 24:14) Yehova wa ku sanjikila poku eca ananga aco. Kuenje ove wa sanjuisa calua utima waye.—Olosap. 27:11.

18. Ovina vipi vikuavo o sukila oku linga osimbu kua papatisiwile?

¹⁸ Osimbu kua papatisiwile, kuli ovina vikuavo o sukila oku linga. Ndomo tua ci konomuisa ale, ove o sukila oku litumbika ku Suku. Vangula laye pokolika, lutima wosi u sapuila ovisimĩlo viove vohutililo kuenda likuminya kokuaye okuti o yongola oku linga ocipango caye. (1 Pet. 4:2) Noke sapuilako mitavaso yakulu vekongelo okuti o yongola oku papatisiwa. Eye o ka sapuilakovo akulu vakuavo vekongelo oco va sapele love. Pole, ku ka saluke omo lioku ka li sanga lavo. Vamanji vaco, va ku kũlĩha ciwa kuenda va ku sole. Va ka pitulula love alongiso Embimbiliya ana wa lilongisa ale. Ovo va yongola oku kũlĩha okuti ovina wa lilongisa via ku lomboloka ciwa kuenda wa kũlĩha ovina via kongela  voku litumbika loku papatisiwa. Kuenje nda va limbuka okuti ovina viaco via ku lomboloka ciwa, ovo va ka ku sapuila okuti o pondola oku papatisiwa kohongele yimbo yi ka kuamamo, ale yofeka.

19-20. Nye o sukila oku linga noke liepapatiso kuenda o pondola oku ci linga ndati?

¹⁹ Nye o sukila oku linga noke liepapatiso? * Ivaluka okuti elitumbiko, ohuminyo yimue wa linga kuenje Yehova o lavoka okuti o yi tẽlisa. Omo liaco, noke lioku papatisiwa, o sukila oku amamako oku tẽlisa ohuminyo yaco. O pondola oku ci linga ndati?

²⁰ Li kuata omunga la vamanji vekongelo. Eci o papatisiwa, o panga onepa ku “vamanji vosi.” (1 Pet. 2:17) Vamanji vekongelo, epata liove kespiritu. Poku endaenda kolohongele olonjanja viosi, o pamisa ukamba wove lavo. Tanga Ondaka ya Suku eteke leteke kuenda sokolola kovina wa tanga. (Osa. 1:1, 2) Noke lioku tanga onepa yimue yelivulu Liembimbiliya, talamapo kamue oco o sokolole kueci wa tanga. Kuenje olondaka viaco, vi ka vetiya utima wove. Yesu wa popia hati: “Likutilili olonjanja viosi.” (Mat. 26:41) Ohutililo yove yutima wosi, yi ku kuatisa oku kuata ukamba uwa la Yehova. Yesu wa popiavo hati: “Tete sandiliyi Usoma.” (Mat. 6:33) Ove o sukila oku tenda upange woku kunda ndocikele cimue ca velapo komuenyo wove. Poku kunda olonjanja viosi, ekolelo liove li pama kuenda o kuatisa vakuene oku endela vonjila yi tuala komuenyo ko pui.—1 Tim. 4:16.

21. Epapatiso li ku ecelela oku linga nye?

²¹ Oku nõlapo oku litumbika ku Yehova loku papatisiwa, onjila yimue ya velapo ove o pondola oku kuama. Ocili okuti voku ci linga, mua kongela alikolisilo alua. Anga hẽ alikolisilo aco a kuete onima? Oco, a kuete! Ohali yosi o pita layo voluali lulo “yitito, haiyo yokatembo kamue lika.” (2 Va Kor. 4:17) Pole, epapatiso li ecelela okuti ove o kuata omuenyo wesanju cilo kuenje kovaso yoloneke, o ka kuata ‘omuenyo wocili.’ (1 Tim. 6:19) Omo liaco, sokolola lutate kuenda likutilila kueci catiamẽla ketambululo liepulilo liokuti, “Nda lipongiyila hẽ oku papatisiwa?”