1. Vanti de far su una casa, cossa che bisogna far?

 PÉNSEGHE sora nte una persona che vol far su una casa. Ela la sà come che la vol farla. Questo vol dir che la pol ndar rento del primo posto che la vede par comprar i materiai par far su la casa? Nò. Vanti de scominsiar el laoro, la ghe toca far una cosa tanto importante: saver quanto che la ndarà guastar. Parché? Parché la persona la ghe ocore saver se la gavarà i soldi par finir el laoro. Se belche la sà quanto che la ndarà guastar vanti de scominsiar, sarà pi fàcile che la sia bona de finir el laoro.

2. De acordo con Luca 14:27-30 cossa che te ghè de saver vanti de batesarte?

² Sito drio pensar in batesarte? Sicuro che el to amor e la to voia de ringrassiar a Geovà te fà pensar nel assunto. In verità, la dessision de batesarte se someia tanto cola dessision de far su una casa. Come cossita? Pénseghe sora in quel che Gesù el ga dito in Luca 14:27-30. b (Ledi.) Gesù l’era drio parlar sora cossa vol dir esser so dissìpolo. Se femo la dessision de seghir a Gesù, ghemo de esser disposti a acetar le dificoltà e i sacrifissi de far questa dessision. (Luca 9:23-26; 12:51-53) Par quela, vanti de batesarte te toca pensar ben in quel che te gavarè de far se te aceti esser un dissìpolo de Gesù. Far questo ndarà giutarte a esser parecià par seitar servir a Dio come un servo batesà.

3. Cossa che ndemo imparar in questo stùdio?

³ Sarà che le dificoltà che te ghè quando ti te deventi un dissìpolo batesà de Cristo val el sforso? Sicuro che si! Se pol dir che el batésimo el verde le porte par tante benedission, adesso e anca nel futuro. Nel stùdio de ancoi ndaremo veder le risposte a arquante domande importante sora el batésimo. Questo ndarà giutarte a saver la risposta a altra domanda: “Sarà che son pronto par batesarme?”

4. (a) Cossa zela la dedicassion? (b) De acordo con Mateo 16:24 cossa vol dir no contentar a si stesso?

⁴ Cossa zela la dedicassion? Vanti del batésimo te toca far la to dedicassion a Geovà. La dedicassion la ze una orassion de cuor che te disi che te vol doperar la to vita par far la volontà de Dio par sempre. Quando te fè la dedicassion no te vè pi “contentar a si stesso”. (Ledi Mateo 16:24. c) Adesso te sì de Geovà e questo l’è un grando privilègio. (Rom. 14:8) Te sì drio dir a Dio che dopo dela to orassion, o sia, dela to dedicassion, te ndarè servirlo par sempre. La dedicassion la ze un voto o una promessa sèria che te ghè fato a Dio. Geovà no’l ne obriga a far questo voto. Ma se lo femo, Geovà el speta che vivemo de acordo col voto.— Sal. 116:12, 14.

5. Che difarensa ghen’è intrà el batésimo e la dedicassion?

⁵ Che difarensa ghen’è intrà el batésimo e la dedicassion? La dedicassion la ze una roba intrà ti e Geovà. Ma el batésimo l’è davanti de altre persone, nte un congresso o una assemblea. Nel batésimo te mostri ai altri che te ghè belche fato la to dedicassion a Geovà. d Anca te te mostri che te ami a Geovà de tuto el cuor, ànima, mente, forsa e che te sì dessidio a servirlo par sempre.— Marco 12:30.

6-7. De acordo con 1 Piero 3:18-22 che due cose le mostra che ne ocore pròpio batesarse?

⁶ Ghe ocore pròpio batesarte? Vedi cossa che la Bìblia la dise in 1 Piero 3:18-22. e (Ledi.) La arca la mostrea a tute le persone che Noè el gavea fede. Dela stessa maniera, el to batésimo mostra a tute le persone che te ghè fato la to dedicassion a Geovà. Ma ghe ocore pròpio batesarte? Si. Piero el ga spiegà i motivi. Primo, parché el batésimo ‘el te salva’. El batésimo ndarà salvarne sol se mostremo fede in Gesù. Ghemo de mostrar che credemo che Gesù l’è morto par noantri, che l’è stà ressussità par viver ntel cielo e adesso l’è “ala drita de Dio”.

⁷ Secondo, el batésimo el ne dà “una bona cossiensa.” Quando femo la nostra dedicassion e semo batesadi, scominsiemo a gaver una amicìssia pi forte con Geovà. Geovà el perdona i nostri pecati parché se ghemo ciamà grami de verità e ghemo fede nel sacrifìssio del risgate. L’è par via de questi motivi che gavemo una bona cossiensa e pace con Dio.

8. Qual che ga de esser el motivo pi importante par batesarte?

⁸ Qual che ga de esser el motivo pi importante par batesarte? Nel to stùdio dela Bìblia te ghè imparà tante cose sora Geovà, come la so personalità e la so maniera de far le robe. Quel che te ghè imparà el ga tocà el to cuor e te ghè scominsià a gaver un grando amor par Geovà. Par quela, el motivo pi importante par batesarte l’è el to amor par Geovà.

9. De acordo con Mateo 28:19, 20, cossa vol dir esser batesà “nel nome del Pare, del Fiol e del spìrito santo”?

⁹ Nantra roba che te fà gaver voia de batesarte la ze le verità dela Bìblia che te ghè imparà. Vedi cossa che Gesù el ga dito quando el ga dato la òrdine de far dissìpoli. (Ledi Mateo 28:19, 20. f) Come Gesù el ga parlà, i dissìpoli i ga de esser batesadi “nel nome del Pare, del Fiol, e del spìrito santo.” Cossa questo vol dir? Che te toca creder de cuor nele verità dela Bìblia sora Geovà, el so Fiol Gesù e el spìrito santo. Queste verità le ga tanto poder e le pol rivar nel to cuor. (Ebr. 4:12) Ndaremo ricordar de arquante verità.

10-11. Che verità che te ghè imparà e acetà sora el Pare?

¹⁰ Ti te ricordi quando che te ghè imparà la verità sora el Pare? Par esémpio, el so “nome l’è Geovà,” lu l’è “el Altìssimo sora tuta la tera,” e sol lu l’è el vero Dio. (Sal. 83:18; Isa. 37:16) Lu l’è el nostro Creador e la salvassion la vien de Geovà. (Sal. 3:8; 36:9) Dio el ga catà una maniera de salvarne del pecato e dela morte e ne dà una speransa de viver par sempre. (Gioani 17:3) Quando te fè la dedicassion e el batésimo te sarè cognossesto come una Testimònia de Geovà. (Isa. 43:10-12) Ti te farè parte dela fameia de servi de Dio che lo adora in tuto el mondo. In questa fameia tuti i ga orgòlio de portar el nome de Dio e anca de giutar i altri a cognosserlo.— Sal. 86:12.

¹¹ Pensa nel privilègio che te ghè: capir cossa la Bìblia la insegna sora el Pare. Quando te aceti le bele verità dela Bìblia, el to cuor te motiva a dedicarte a Geovà e batesarte.

12-13. Che verità che te ghè imparà e acetà sora el Fiol?

¹² Come che te te ghè sentio quando te ghè imparà le verità sora el Fiol? Dopo de Geovà, Gesù l’è la persona pi importante del Universo. De volentiera, Gesù el ga dato la so vita come risgate par noantri. Quando mostremo fede nel risgate par via de quel che femo, i nostri pecati i ze perdonadi, deventemo amighi de Dio e anca podemo gaver la vita eterna. (Gioani 3:16) Gesù l’è el nostro Somo Sasserdote. Lu el vol giutarne a gaver le benedission del risgate e anca una amicìssia con Dio. (Ebr. 4:15; 7:24, 25) Lu l’è el Rè del Regno de Dio e el va esser doperà par santificar el nome de Geovà, finir cole robe rugne e el va portar benedission par sempre. (Mat. 6:9, 10; Apo. 11:15) Ghemo de far come Gesù el ga fato. (1 Pie. 2:21) Lu el ga doperà la so vita par far la volontà de Dio e ghemo de far compagno a Gesù.— Gioani 4:34.

¹³ Quando te aceti quel che la Bìblia la insegna sora Gesù te impari a amar el caro Fiol de Dio. Questo amor te fà voler doperar la to vita par servir a Dio, cossita come Gesù el ga fato. Anca te farà gaver la voia de dedicarte a Geovà e batesarte.

14-15. Che verità che te ghè imparà e acetà sora el spìrito santo?

¹⁴ Come che te te ghè sentio quando te ghè imparà le verità sora el spìrito santo? Lu no l’è una persona, ma si la forsa de Dio. Geovà el ga doperà el spìrito santo par far i òmini scriver la Bìblia come che lu el volea. E questo stesso spìrito ne giuta a capir e meter in pràtica quel che ledemo ntela Bìblia. (Gioani 14:26; 2 Pie. 1:21) Par via del so spìrito, Geovà el ne dà el “poder che l’è pi grando del normal.” (2 Cor. 4:7) El spìrito santo el ne dà la forsa par predicar le bone notìssie, lotar contra le tentassion, darghene fora col desànimo e vinser le dificoltà. Anca el ne giuta a gaver le bele qualità del “fruto del spìrito.” (Gàl. 5:22) Quei che i se fida in Dio e domanda a lu el so spìrito santo lo riceve de maniera generosa.— Luca 11:13.

¹⁵ L’è tanto bon saver che quei che i adora a Geovà i pol fidarse nel aiuto del spìrito santo par servir a Dio. Quando te aceti quel che la Bìblia la insegna sora el spìrito santo te ghè la voia de dedicarte a Dio e batesarte.

16. Cossa che ghemo imparà fin adesso in questo stùdio?

 ¹⁶ La dessision de dedicarte a Dio e batesarte la ze tanto sèria. Come ghemo belche visto, quando te fè questa dessision, te mostri la disposission de acetar le dificoltà e i sacrifissi. Ma le benedission che te ndarè ricever le ze tanto pi grande che i sacrifissi che te ndarè far. El batésimo el pol salvarte e giutarte a gaver una cossiensa neta ai oci de Dio. El motivo pi importante par batesarte l’è el to amor par Geovà Dio. Anca te toca creder de tuto el cuor nele verità sora el Pare, el Fiol e el spìrito santo. Dopo de tuto quel che ghemo parlà, come che ti te risponderia la domanda: “Sarà che son pronto par batesarme?”

17. Che robe te ghè de far vanti de batesarte?

¹⁷ Se te cati che te sì pronto par batesarte, pol esser che te ghè belche fato arquante robe par esser amigo de Dio. g Par via de quel che te ghè belche studià nela Bìblia, te cognossi tante robe sora Geovà e Gesù. Adesso, te ghè fede. (Ebr. 11:6) Te te fidi del tuto nele promesse de Geovà che le ze ntela Bìblia e te sì sicuro che la fede nel sacrifìssio de Gesù pol salvarte del pecato e dela morte. Te te ghè ciamà gramo dei to pecati, te resti triste nel cuor par i sbali che te ghè fato nel passà e te ghè belche domandà perdon a Geovà. Te ghè cambià la to vita e adesso te vivi de una maniera che assa Dio contento. (Ati 3:19) Anca te ghè bio la voia de parlar ai altri sora la to fede. Par quela, te ghè fato quel che ghe ocorea par esser un predicador che no l’è ancora batesà e te ghè scominsià a predicar insieme cola congregassion. (Mat. 24:14) Geovà l’è tanto contento con ti parché te ghè fato i cambiamenti che te ocorea. Te ghè assà el cuor de Dio tanto contento.— Pro. 27:11.

18. Che altre robe te ghè de far vanti de batesarte?

¹⁸ Vanti de batesarte te ocore far arquante robe. Come ghemo belche visto, te ocore far la dedicassion a Dio. Quando te sì ti sol, fà una orassion a Geovà e dighe a lu che te ndarè doperar la to vita par servirlo. (1 Pie. 4:2) Dopo, parla al cordinador del corpo de ansiani dela to congregassion che te vol batesarte. Lu el va domandar che altri ansiani i parle con ti. Ma no te ocore gaver paura. Questi cari ansiani belche i te cognosse e i te ama. Lori i va parlar con ti sora arquanti insegni dela Bìblia che te ghè belche imparà. I ansiani i ghe ocore esser sicuri che te capissi i insegni dela Bìblia e che ti te sè che la dedicassion e el batésimo i ze importanti. Se lori i cata che te sì pronto, ntela pròssima assemblea o congresso te podarè batesarte.

 19-20. Cossa che te ghè de far dopo del batésimo, e come te ghè de far?

¹⁹ Dopo del batésimo, cossa che te toca far? Ricorda che la dedicassion la ze un voto e Geovà el speta che ti te fae quel che te ghè prometesto. Dopo del batésimo te tocarà viver de acordo cola to dedicassion. Cossa che te ghè de far?

²⁰ In primo posto, seita esser insieme coi fradei e sorele dela to congregassion. Dopo del batésimo te farè parte de una fameia tanto granda. (1 Pie. 2:17) I fradei e sorele dela congregassion i sarà la to fameia spiritual. Se ti te si sempre ntele riunion te gavarè una amicìssia pi forte con lori. Secondo, ledi la Parola de Dio tuti giorni e pénseghe sora. (Sal. 1:1, 2) Dopo de leder un tochetin dela Bìblia, férmate e pénseghe in quel che te ghè ledesto. Cossita le parole dela Bìblia le ndarà rento el to cuor. Terso, “seité far orassion.” (Mat. 26:41) Quando te preghi de cuor a Geovà, te rivi pi darente de lu. Quarto, seité a ndar in serca del Regno de Dio in primo posto. (Mat. 6:33) Te fè cossita quando te meti la predicassion come una dele robe pi importante dela to vita. Se te vè nela predicassion sempre, la to fede la restarà pi forte. Alora, te gavarè la oportunità de giutar i altri a gaver la speransa de viver par sempre.— 1 Tim. 4:16.

21. Che benedission el batésimo te darà?

²¹ La dessision pi importante che te vè far ntela to vita la ze dedicarte e batesarte. Savemo che ghen’è dificoltà e sacrifissi, ma sarà che val el sforso? Sicuro che si! Qualche dificoltà che te ghè in questo sistema de Sàtana no la ze par sempre. (2 Cor. 4:17) Ma el batésimo el farà la to vita esser pi felice adesso e anca te podarè gaver una bela vita nel futuro. (1 Tim. 6:19) Par quela, pensa ben e prega a Geovà par saver la risposta che te vè dar a questa domanda: “Sarà che son pronto par batesarme?”