1. Etthu xeeni mutthu onipaka awe ohinatthi opacerya oteka empa?

NKAHAYA mmuupuwele mutthu oniphavela oteka empa. Owo onnisuwela enamuna ya empa oniphavela awe oteka. Nto niireke eyo enooniherya wira onrowa otthimakela olooxa othuma ikaruma wira opacerye oteka empa awe? Nnaari. Ohinatthi opacerya oteka, yookhala etthu yuulupale onipacerya awe opaka. Etthu ene tiila: Owo onnikilaathi wira opake ikontha sa empa awe. Xeeni onipaka awe eyo? Onnipaka eyo wira osuwele akhala wira ookhalana musurukhu omphiyerya omalihana empa awe. Akhala wira onoopaka ikontha oratteene ohinatthi opacerya empa eyo, woonasa wene, onoowerya omaliha.

2. Moovarihana ni Luka 14:27-30, exeeni munireerela anyu wuupuwela muhinatthi opatisiwa?

² Niireke munnuupuwela opatisiwa? Akhala wira ti siiso, woonasa wene nyuwo munnimphenta Yehova ni munnixukhurela itthu sotheene onoovahaaweni. Tthiri nyuwo muhaana opaka yoothanla ntoko ya mulopwana ole oniphavela oteka empa. Xeeni ninhimya ahu siiso? Nkahaya nwehe moolumo a Yesu ari Luka 14:27-30. (Mmusome.) Ni moolumo ala, Yesu aahimya ele enitaphulela aya okhala mutthareli awe. Wira mutthu okhale mutthareli ohaana ‘wupuwela’ akhala wira onoowerya ovilela mixankiho ni ohiya itthu sikina saamusivela. (Luka 9:23-26; 12:51-53) Muhinatthi opatisiwa, muhaana wuupuwela oratteene itthu sotheene sinihela muhina okhala mutthareli a Kristu. Mwiira siiso, munimwiilokiherya oratteene wira muhihiye omukokhorela Yehova moororomeleya nuumala opatisiwa.

3. Mwaha ola, ninrowa othokorerya exeeni?

³ Niireke vannireerela oleva itthu sotheene wira mukhale mutthareli a Kristu? Aayo! Mutthu onipatisiwa onniphwanya mareeliho manceene vano ni muhoolo. Nrowe nithokorerye makoho vakhaani ootthuneya voohimya sa opatisiwa. Waakhuliwa waya onimookhaliheryani waakhula nikoho nni: “Kiireke kihiilokiherya wira kipatisiwe?”

4. (a) Wiivahererya ontaphulela exeeni? (b) Ontaphulela exeeni ‘wikhotta’ onlavuliwa Matheyo 16:24?

⁴ Wiivahererya ontaphulela exeeni? Muhinatthi opatisiwa muhaana wiivahererya. Wiivahererya onitaphulela exeeni? Wiivahererya wa Yehova, ontaphulela opaka nivekelo mmuleelaka wira munrowa orumeelaka okumi anyu wotheene mmukokhorelaka yena mahiku otheene. Vaavo muniivahererya anyu wa Muluku, nyuwo ‘munnikhotta’ mmansinyu. (Mmusome Matheyo 16:24.) Okhuma nihiku muniikhootta anyu, nyuwo mwa mutthu a Yehova, tthiri eyo eparakha yuulupale. (aRom. 14:8) Nyuwo munnimuleela Yehova wira etthu yootepexa otthuneya mookumini mwanyu omurumeela ni omuhakalaliha yena ohiya wiihakalaliha. Musuweleke wira wiivahererya wa Yehova natiri muulupale munimpaka anyu, yoowo muhinreerela anyu omuthweeliha. Yehova khonimukhanyererya mutthu ommana natiri owo. Masi oniphavela wira vaavo nnimmana ahu nihaana ommaliherya.—Esal. 116:12, 14.

5. Wiivahererya onivirikana sai ni opatisiwa?

⁵ Wiivahererya onivirikana sai ni opatisiwa? Khuuvo mutthu mukina onsuwela vaavo muniivahererya anyu wa Yehova, mutthu onisuwela ti nyuwo ni Yehova paahi. Masi okathi munipatisiwa anyu, atthu anceene annisuwela, maana mumpaka eyo ohoolo wa atthu anceene. Okhala wene, onkhala okathi wa asembeleya wala kongresu. Nto vaavo mumpatisiwa anyu, munniwooniherya atthu otheene wira muhiivahererya wa Yehova. * Tthiri opatisiwa wanyu onnaasuweliha atthu akina wira munnimphenta Yehova Muluku anyu ni murima anyu wotheene, ni erooho anyu yotheene, ni muupuwelo anyu wotheene ni ikuru sanyu sotheene. Nave munnaasuweliha wira muniphavela omurumeela Yehova okumi anyu wotheene.—Mar. 12:30.

6-7. Moovarihana ni 1 Pedru 3:18-22, mathowa xeeni manli anniiriha opatisiwa?

⁶ Niireke vannireerela tthiri opatisiwa? Nkahaya nwehe moolumo aniphwanyaneya 1 Pedru 3:18-22. (Mmusome.) Ekalawa ele yaaniwooniherya atthu otheene wira Nowe aanimwaamini Muluku. Mwa enamuna emosaru, okathi munipatisiwa anyu munniwooniherya atthu otheene wira muhiivahererya wa Yehova. Niireke vannireerela tthiri opatisiwa? Aayo. Murummwa Pedru aahihimya mathowa manli anniiriha opaka eyo. Noopacerya, mwaha woowi “obatizo onniwòpolani”. Nave musuweleke wira opatiso onninoopola akhala wira ninnooniherya ni miteko sahu wira ninnimwaamini Yesu, ninnikupali wira ohookhwa wira onoopole, oohihimuxiwa wira akhaleke wiirimu ni ori “mono wolopwana wa Muluku”.

⁷ Na nenli, vaavo nimpatisiwa ahu, ninnikhalana yowuupuxerya ya murima yooloka. Okhuma vaavale niivaherenrye ahu wa Yehova ni opatisiwa, nookhalana waataana wooloka ni yena. Akhala wira nnoottharuwa itampi sahu ni murima wotheene ni ninnaamini mukuttho wowoopola, Muluku onninlevelela. Nto eyo enninikhaliherya okhalana yowuupuxerya ya murima yooloka ohoolo wa Muluku.

8. Etthu xeeni yuulupale enrowa owiirihani opatisiwa?

⁸ Etthu xeeni yuulupale enrowa owiirihani opatisiwa? Okathi mwaamusoma anyu Biibiliya, muhiixutta itthu sinceene voohimya sa Yehova, ntoko omutthu awe, itthu simmusivela ni itthu sihimmusivela. Nto itthu mwiixuntte anyu saahoovarani murima vanceene ni saahiwiirihani omphenta Yehova vanceene. Moohaanyiherya omphenta wanyu Yehova etthu yootepa otthuneya enrowa owiirihani opatisiwa.

9. Ontaphulela exeeni opatisiwa mwa nsina na Tiithi, Mwaana ni munepa wootteela ntoko onihimya awe Matheyo 28:19, 20?

⁹ Etthu ekina enrowa owiirihani opatisiwa okhala wira munnaamini ikeekhai mwiixuntte anyu mBiibiliyani. Nkahaya muupuwele ele Yesu aahimmye awe okathi aarumme awe atthareli awe  waapaka awiixutti. (Mmusome Matheyo 28:19, 20.) Yesu aahimmye wira ale aniphavela opatisiwa, ahaana opatisiwa “ni nsina n’Atithi ni na Mwana ni” munepa wootteela. Eyo entaphulela exeeni? Entaphulela wira, muhinatthi opatisiwa muhaana okupali ni murima wotheene ikeekhai mwiixuntte anyu mBiibiliyani voohimya sa Yehova, Mwanawe ni munepa wootteela. Ikeekhai iyo sookhalana owerya wuulupale woovara murima anyu. (aHéb. 4:12) Nrowe nuuluule ikeekhai vakhaani.

10-11. Ikeekhai xeeni voohimya sa Tiithi mwiixuntte anyu ni munaamini anyu?

¹⁰ Niireke munnuupuwela ikeekhai mwiixuntte anyu voohimya sa Tiithi? Nyuwo muhiixutta wira nsina nawe ti Yehova, owo “Mulamuli Mulupale àtthu othene” ni tokhanle Muluku a ekeekhai. (Esal. 83:19; Yes. 37:16) Owo Mpattuxa ahu, nave woopowa “onikhuma w’Apwiya” Yehova. (Esal. 3:9; 36:10) Ohiya-vo, Yehova oopaka mareheryo wira noopoliwe etampi ni okhwa. Nave oonivaha nlipelelo na okhala mahiku otheene. (Yoh. 17:3) Musuweleke wira wiivahererya ni opatisiwa onooniherya wira nyuwo mwa Namoona a Yehova. (Yes. 43:10-12) Nyuwo munimwiirelaka mpantta emusi ya olumwenku wotheene ya atthu animukokhorela ni ansiveliwa wiitthaneliwa nsina na Muluku ni waasuweliha atthu akina.—Esal. 86:12.

¹¹ Tthiri eparakha yuulupale osuwela ele Biibiliya oniixuttiha awe voohimya sa Tiithi! Vaavo munaamini anyu ikeekhai iyo, munnoona wira muhaana wiivahererya wa Yehova ni opatisiwa.

12-13. Ikeekhai xeeni voohimya sa Mwaana mwiixuntte anyu ni munaamini anyu?

¹² Moonenle sai okathi mwiixuntte anyu ikeekhai sinittharelana voohimya sa Mwaana? Muhiixutta wira Yesu mutthu a nenli ootepexa otthuneya moolumwenkuni. Owo Moopoli ihu. Moohikhanyereriwa oovaha okumi awe wira noopowe. Vaavo nnooniherya ahu ni miteko sahu wira ninnaamini mukuttho ovanhe awe, nnooleveleliwa itampi sahu, okhala apatthani a Muluku ni ophwanya okumi woohimala muhoolo. (Yoh. 3:16) Yesu, Mukhulupale ahu Aanamukuttho. Owo omphavela onikhaliherya ottottela mureerelo mukuttho ovanhe awe ni okhalana waataana wooloka ni Muluku. (aHéb. 4:15; 7:24, 25) Okhala wira Mwene a Omwene wa Muluku, Yehova oomuthanla wira ovuwihe nsina nawe, omaliha sootakhala ni oniphwanyiha mareeliho mParayiisu. (Math. 6:9, 10; Wis. 11:15) Nave Yesu ntakiheryo ninreerela ahu otthara. (1 Ped. 2:21) Owo oonivaha ntakiheryo vaavo aarumenle awe okumi awe wotheene wira opakeke yootthuna ya Muluku.—Yoh. 4:34.

¹³ Vaavo muneemererya anyu ele Biibiliya oniixuttiha awe voohimya sa Yesu, nyuwo munnipacerya omphenta Mwaana a Muluku. Ophenta iwo, onniwiirihani orumeela okumi anyu wotheene wira mpakeke yootthuna ya Muluku ntoko Yesu aapaka awe. Nto eyo enoowiirihani wiivahererya wa Yehova ni opatisiwa.

14-15. Ikeekhai xeeni voohimya sa munepa wootteela mwiixuntte anyu ni munaamini anyu?

¹⁴ Moonenle sai vaavo mwiixuntte anyu ikeekhai voohimya sa munepa wootteela? Mwaahiixutta wira munepa wootteela khahiyo mutthu, masi ikuru soowerya sa Muluku. Yehova aahirumeela munepa wootteela wira aaleele etthu yoolepa alopwana aathanlale awe wira amulepe Biibiliya. Nave munepa wootteela onninikhaliherya wiiwexexa ni ovarihela muteko ele ninsoma ahu mBiibiliyani. (Yoh. 14:26; 2 Ped. 1:21) Orumeelaka munepa awe wootteela, Yehova onninivaha “owerya . . . wulupalexa”. (2 aKor. 4:7) Munepa wootteela onninivaha ikuru wira nilaleye ihapari sooreera, oxintta sooweha, oxintta okhulumuwa ni oxintta mixankiho. Nave onninikhaliherya okhalana mikhalelo sooloka seiyo sinikumiheriwa ni yoowiima ya munepa wootteela. (aGal. 5:22) Muluku onnaavaha munepa wootteela ale animuroromela ni aninvekela.—Luka 11:13.

¹⁵ Ale animukokhorela Yehova annikupali wira munepa wootteela onimwakhaliherya omurumeela moororomeleya. Tthiri eyo etthu yoomaaliha ni yoohakalaliha vanceene! Vaavo muneemererya  anyu ikeekhai voohimya sa munepa wootteela, eyo enoowiirihani wiivahererya wa Muluku ni opatisiwa.

16. Mpakha-va, itthu xeeni mwiixuntte anyu?

¹⁶ Yoolakela anyu ya wiivahererya wa Muluku ni opatisiwa ti yootepa otthuneya. Ntoko niixuntte ahu, nyuwo muhaana weemererya itthu sinihela muhina okhala mutthareli a Kristu, ntoko mixankiho ni wiileva. Masi mareeliho munrowa anyu waakhela annivikana itthu mulenve anyu. Maana opatiso onniwoopolani ni onniwiirihani okhalana yowuupuxerya ya murima yooloka ohoolo wa Muluku. Etthu yuulupale eniwiirihani opatisiwa, ohaana okhala omphenta Yehova Muluku ni murima wotheene. Nave, muhaana okupali ni murima wotheene itthu mwiixuntte anyu voohimya sa Tiithi, Mwaana ni ikuru soowerya sa Muluku. Nuumala oweha itthu sotheene nithokorenrye ahu mpakha-va, mwaarowa waakhula sai nikoho noowi: “Kiireke kihiilokiherya wira kipatisiwe?”

17. Itthu xeeni mutthu onireerela awe opaka ohinatthi opatisiwa?

¹⁷ Akhala wira munoona wira muhiilokiherya wira mpatisiwe, woonasa wene moopaka itthu sinceene sookhalihenryeni olipiha waataana wanyu ni Yehova. * Okathi mwaasomihiwa anyu Biibiliya voohihiyererya, nyuwo moomusuwela oratteene Yehova ni Yesu. Nave munniwaamini ni murima anyu wotheene. (aHéb. 11:6) Ohiya-vo, nyuwo munniroromela ni murima wotheene sooleiherya sa Yehova siri mBiibiliyani ni munnikupali wira waamini wanyu mukuttho wowoopola wa Yesu, onimookhaliheryani oleveleliwa itampi ni okhwa. Pooti wira moottharuwa itampi sanyu, munnithanana mwaha wa itthu soohiloka mpanke anyu khalai ni monvekela Yehova wira ooleveleleni. Nyuwo moorukunuxa murima anyu ni munnisyaka mweettelo anyu wa khalai woohiloka. Vano mookhalana mweettelo onimuhakalaliha Muluku. (Mit. 3:19) Nyuwo munniphavela ni murima wotheene waaleela atthu akina ele mwiixuntte anyu. Woonasa wene, munniphwanelela okhala namalaleerya oohipatisiwa wira mulaleeryeke vamosa ni anna ni arokora. (Math. 24:14) Yehova onnisiveliwa vanceene mwaha woowi moopaka itthu iyo sootepa otthuneya. Tthiri munnihakalaliha vanceene murima wa Yehova.—Mir. 27:11.

18. Etthu xeeni munireerela anyu opaka muhinatthi opatisiwa?

¹⁸ Muhinatthi opatisiwa, sookhala itthu sikina vakhaani munreerela anyu opaka. Ntoko niwenhe ahu wanipacerya, nyuwo muhaana wiivahererya wa Muluku. Munnipaka eyo vaavo muninvekela anyu ni murima wotheene muri ene mekhinyu, mmuleelaka wira okumi anyu wotheene munrowa omurumeelaka yena ni opaka yootthuna awe. (1 Ped. 4:2) Nuumala-vo, muhaana omuleela mutokweene onuuraanyiha nikhuuru na axitokweene wira muniphavela opatisiwa. Owo onimwaavekela axitokweene akina wira avaanele ni nyuwo. Xontte muhoove ovaanela ni axitokweene awo. Nave, muhiliyale wira axitokweene awo tooreera murima, annoosuwelani ni annoophentani. Nto axitokweene awo anoothokorerya ni nyuwo sowiixuttiha  soopacerya sa Biibiliya seiyo mwiixuntte anyu. Awo aniphavela osuwela akhala wira munniiwexexa itthu mwiixuntte anyu ni munnisuwela ele entaphulela aya wiivahererya ni opatisiwa. Axitokweene awo, yoona wira munniphwanelela animooleelani wira munoopatisiwa asembeleya aahiiso kongresu onittharelana.

19-20. Exeeni munreerela anyu opaka nuumala opatisiwa ni munrowa opaka sai eyo?

¹⁹ Nuumala opatisiwa, etthu xeeni munireerela anyu opaka? * Muhiliyale wira Yehova oniphavela wira mummaliherye natiri anyu a wiivahererya. Tivonto, nuumala opatisiwa muhaana okhala moovarihana ni wiivahererya wanyu. Munrowa owerya sai opaka eyo?

²⁰ Yoopacerya mwiimananiheke okhala vamosa ni anna ni arokora. Nuumala opatisiwa, nyuwo muniirela mpantta emusi ya olumwenku wotheene ya anna ni arokora. (1 Ped. 2:17) Muhiliyale wira anna ni arokora awo a mmulokoni amusi anyu oomunepani. Tivonto, vaavo muhincompela anyu mithukumano munoolipiha waataana wanyu ni anna awo. Ya nenli, musomeke ni wuupuwelela Nuulumo na Muluku khula nihiku. (Esal. 1:1, 2) Nuumala omusoma Biibiliya, muhaana ophavelasa okathi wira muupuwelele vanceene ele musomme anyu. Mwiira siiso, ele munrowa anyu osoma enimoovarani murima. Ya neeraru, nvekeleke ikwaha sinceene. (Math. 26:41) Ovekela onimookhaliheryani okhalana waataana wooloka ni Yehova. Ya neexexe, muhaana opacerya “ophavela Omwene wa Muluku”. (Math. 6:33) Munoowerya opaka eyo, akhala wira munnihela nipuro noopacerya mookumini mwanyu muteko woolaleerya. Vaavo munilaleerya anyu ikwaha sinceene, munoolipiha waamini wanyu ni munimwaakhaliherya atthu akina okhalana nlipelelo na okumi woohimala.—1 Tim. 4:16.

21. Opatisiwa onrowa wookhaliheryani ophwanya exeeni?

²¹ Yoothanla ya wiivahererya wa Yehova ni opatisiwa yoothanla yootepexa otthuneya munrowa anyu opaka mookumini mwanyu. Ekeekhai wira sookhala mixankiho munrowa anyu okumana. Niireke nihaana woova mixankiho iyo? Nnaari! Musuweleke wira khula muxankiho ninkumana ahu olumwenku ola wootakhala “itthu soveya [ni] sinvira”. (2 aKor. 4:17) Masi opatisiwa onimookhaliheryani okhalana okumi woohakalaliha ni ophwanya “ekumi yekekhai” muhoolo. (1 Tim. 6:19) Tivonto, muupuweleke oratteene ni nvekeleke wira moone moota munaakhula anyu nikoho nni: “Kiireke kihiilokiherya wira kipatisiwe?”