1. Ano an kinahanglan himoon han usa antes hiya magtikang pagtukod hin balay?

IMADYINA nga an usa nga tawo nagdidesisyon magtukod hin balay. Maaram hiya kon ano nga klase hin balay an karuyag niya tukuron. Magawas ba dayon hiya ngan mamamalit hin materyales ngan magtitikang pagtukod? Diri. Antes hiya magtikang, may importante nga kinahanglan niya himoon​—kwentahon an magagasto para hito nga balay. Kay ano? Kay kinahanglan niya hibaroan kon may eksakto ba hiya nga kwarta basi mahuman ito nga balay. Kon abanse nga kukwentahon niya hin maopay an magagasto, daku an posibilidad nga matapos niya an pagtukod han iya bag-o nga balay.

2. Sumala ha Lucas 14:27-30, ano an kinahanglan mo hunahunaon hin maopay antes ka magpabawtismo?

² An imo ba gugma ngan apresasyon kan Jehova nagpapagios ha imo nga maghunahuna nga magpabawtismo? Kon amo, kinahanglan ka maghimo hin desisyon nga puropariho han kinahanglan himoon han tawo nga karuyag magtukod hin balay. Kay ano nga masisiring naton ito? Hunahunaa an ginsiring ni Jesus ha Lucas 14:27-30. (Basaha.) Ginhihisgotan ni Jesus kon ano an kahulogan han pagin disipulo niya. Basi magin sumurunod niya, kinahanglan andam kita nga akseptaron an “magagasto”​—an mga kakurian ngan mga sakripisyo. (Luc. 9:23-26; 12:51-53) Salit antes ka magpabawtismo, kinahanglan hunahunaon mo hin maopay an ngatanan nga maieksperyensyahan mo kon magin disipulo ka na. Katapos, magigin mas andam ka nga padayon nga mag-alagad nga matinumanon ha Dios sugad nga bawtismado nga Kristiano.

3. Ano an aton hihisgotan hini nga artikulo?

³ Karag ba an aton aantuson nga mga kakurian ngan an aton mga sakripisyo tungod han pagin bawtismado nga disipulo han Kristo? Diri gud! An bawtismo nag-aabri han purtahan ngadto ha diri maihap nga mga bendisyon​—yana ngan ha maabot nga panahon. Aton hisgotan an pipira nga importante nga mga pakiana mahitungod ha bawtismo. An pagbuhat hito mabulig ha imo nga mabaton an pakiana nga “Andam na ba ako magpabawtismo?”

4. (a) Ano an dedikasyon? (b) Ano an iginpapasabot han ‘pagsalikway’ han kalugaringon, sugad han ginsisiring ha Mateo 16:24?

⁴ Ano an dedikasyon? Antes ka magpabawtismo, kinahanglan idedikar mo an imo kalugaringon. Kon nagdidedikar ka, nadaop ka kan Jehova ha sinsero gud nga pag-ampo ngan iginsusumat ha iya nga gagamiton mo an imo kinabuhi ha pag-alagad ha iya ha kadayonan. Kon igindidedikar mo ha Dios an imo kalugaringon, ‘ginsasalikway’ mo an imo kalugaringon. (Basaha an Mateo 16:24.) Panag-iya ka na ni Jehova, ngan daku gud ito nga pribilehiyo. (Roma 14:8) Iginsusumat mo ha iya nga tikang hito nga takna, magpupokus ka na ha pag-alagad ha iya ngan diri ha pagpalipay han imo kalugaringon. An imo dedikasyon usa nga seryoso nga saad ha Dios. Diri kita ginpipirit ni Jehova nga maghimo hito nga saad. Pero kon maghimo kita hito, naglalaom hiya nga tutumanon naton ito.​—Sal. 116:12, 14.

5. Ano an kaibahan han imo dedikasyon ngan bawtismo?

⁵ Ano an kaibahan han imo dedikasyon ngan bawtismo? An imo dedikasyon personal ngan pribado; kamo la ni Jehova an maaram hito. An bawtismo ginhihimo ha publiko; ginbabawtismohan ka ha atubangan han iba, kasagaran na nga ha asembleya o kombensyon. Kon nagpapabawtismo ka, iginpapakita mo ha iba nga igindedikar mo na an imo kalugaringon kan Jehova. * Salit an imo bawtismo nagpapahibaro ha iba nga hinigugma mo hi Jehova nga imo Dios ha imo bug-os nga kasingkasing, kalag, hunahuna, ngan kusog ngan determinado ka nga mag-alagad ha iya ha kadayonan.​—Mar. 12:30.

6-7. Sumala ha 1 Pedro 3:18-22, ano an duha nga rason kon kay ano nga importante an bawtismo?

⁶ Importante gud ba nga magpabawtismo? Hunahunaa an ginsisiring han 1 Pedro 3:18-22. (Basaha.) Sugad la nga an arka nakikita nga pamatuod han pagtoo ni Noe, an imo bawtismo usa nga nakikita nga ebidensya han imo dedikasyon kan Jehova. Pero importante gud ba an bawtismo? Oo, importante gud. Hi Pedro nagkomento han rason kon kay ano. Siyahan, ‘nagtatalwas [ito] ha imo.’ An bawtismo makakatalwas ha aton kon ginhihimo na naton an importante nga mga pitad basi ipakita nga may pagtoo kita kan Jesus ngan natoo kita nga namatay hiya para ha aton, ginbanhaw ngadto ha langit, ngan yana “aada hiya ha too han Dios.”

⁷ Ikaduha, an bawtismo nagriresulta hin “maopay nga konsensya.” Kon igindidedikar naton ha Dios an aton kalugaringon ngan nagpapabawtismo, nagkakaada kita hin espesyal nga relasyon ha iya. Tungod han aton sinsero nga pagbasol ngan pagtoo ha lukat, ginpapasaylo han Dios an aton mga sala. Salit mahimo kita magkaada maopay nga konsensya ha atubangan niya.

8. Ano an angay nga magin rason han imo desisyon nga magpabawtismo?

⁸ Ano an angay nga magin rason han imo desisyon nga magpabawtismo? Sugad nga resulta han imo maopay nga pag-aram han Biblia, damu an imo nahibaroan mahitungod kan Jehova​—an iya personalidad ngan mga paagi. An imo mga nahibaroan mahitungod ha iya nakabantad gud han imo kasingkasing ngan nagpagios ha imo nga higugmaon gud hiya. An imo gugma kan Jehova kinahanglan amo an nangunguna nga rason han imo desisyon nga magpabawtismo.

9. Ano an karuyag sidngon han pagpabawtismo ha ngaran han Amay ngan han Anak ngan han baraan nga espiritu, sugad han ginsisiring ha Mateo 28:19, 20?

⁹ Nagdidesisyon ka liwat nga magpabawtismo tungod kay nahibaroan mo an igintututdo han Biblia ngan ginkarawat ito. Hunahunaa an ginsiring ni Jesus han iginhatag niya an sugo nga manhimo hin disipulo. (Basaha an Mateo 28:19, 20.) Sumala kan Jesus, kinahanglan magpabawtismo an usa “ha ngaran han Amay  ngan han Anak ngan han baraan nga espiritu.” Ano an karuyag sidngon hito? Kinahanglan bug-os-kasingkasing ka nga tumoo ha mga kamatuoran ha Biblia mahitungod kan Jehova; ha iya Anak nga hi Jesus; ngan ha baraan nga espiritu. Gamhanan gud ini nga mga kamatuoran ngan mahimo makabantad gud han imo kasingkasing. (Heb. 4:12) Repasuhon naton an pipira hito.

10-11. Ano nga mga kamatuoran mahitungod ha Amay an imo nahibaroan ngan ginkarawat?

¹⁰ Hunahunaa an panahon nga nahibaroan mo ini nga mga kamatuoran mahitungod ha Amay: An iya “ngaran amo hi Jehova,” hiya an “Gihitaasi ha bug-os nga tuna,” ngan hiya gud la an “tinuod nga Dios.” (Sal. 83:18; Isa. 37:16) Hiya an aton Maglalarang, ngan “an katalwasan kan Jehova.” (Sal. 3:8; 36:9) Naghimo hiya hin kahikayan basi talwason kita ha sala ngan kamatayon ngan gintagan kita niya hin paglaom nga mabuhi ha waray kataposan. (Juan 17:3) An imo dedikasyon ngan bawtismo magpapakilala ha imo sugad nga usa han mga Saksi ni Jehova. (Isa. 43:10-12) Magigin bahin ka han bug-os-kalibotan nga pamilya han mga magsiringba nga nalilipay nga tawagon ha ngaran han Dios ngan ha pagpakilala hito ha iba.​—Sal. 86:12.

¹¹ Daku gud nga pribilehiyo nga masabtan kon ano an igintututdo han Biblia mahitungod ha Amay! Kon ginkakarawat mo inin presyoso nga mga kamatuoran, napapagios ka nga idedikar an imo kalugaringon kan Jehova ngan magpabawtismo.

12-13. Ano nga mga kamatuoran mahitungod ha Anak an imo nahibaroan ngan ginkarawat?

¹² Ano an imo reaksyon han nahibaroan mo an masunod nga mga kamatuoran mahitungod ha Anak? Hi Jesus an ikaduha nga pinakaimportante nga persona ha uniberso. Hiya an aton Paralukat. Kinaburut-on nga iginhatag niya an iya kinabuhi para ha aton. Kon iginpapakita naton ha aton buhat nga may pagtoo kita ha lukat, mapapasaylo an aton mga sala, magigin sangkay naton an Dios, ngan magkakaada kita kinabuhi nga dayon. (Juan 3:16) Hi Jesus an aton Hitaas nga Saserdote. Karuyag niya kita buligan nga magpahimulos han lukat ngan magkaada duok nga relasyon ha Dios. (Heb. 4:15; 7:24, 25) Sugad nga Hadi han Ginhadian han Dios, gagamiton hiya ni Jehova basi baraanon an Iya ngaran, wad-on an karaotan, ngan maghatag hin waray kataposan nga mga bendisyon ha maabot nga Paraiso. (Mat. 6:9, 10; Pah. 11:15) Hi Jesus an aton susbaranan. (1 Ped. 2:21) Nagpakita hiya hin susbaranan ha aton pinaagi ha paggamit han iya kinabuhi ha pagbuhat han kaburut-on han Dios.​—Juan 4:34.

¹³ Kon ginkakarawat mo an igintututdo han Biblia mahitungod kan Jesus, nagkakaada ka gugma ha pinalangga nga Anak han Dios. Ito nga gugma nagpapagios ha imo nga gamiton an imo kinabuhi ha pagbuhat han kaburut-on han Dios, pariho han ginbuhat ni Jesus. Sugad nga resulta, naaaghat ka nga idedikar an imo kalugaringon kan Jehova ngan magpabawtismo.

14-15. Ano nga mga kamatuoran mahitungod ha baraan nga espiritu an imo nahibaroan ngan ginkarawat?

¹⁴ Ano an imo nahunahuna han nahibaroan mo an masunod nga mga kamatuoran mahitungod ha baraan nga espiritu? Diri ito persona, kondi aktibo ito nga pwersa han Dios. Gin-gamit ni Jehova an baraan nga espiritu basi giyahan an mga nagsurat han Biblia, ngan an espiritu nabulig ha aton nga masabtan ngan iaplikar an mga nababasa naton dida hito. (Juan 14:26; 2 Ped. 1:21) Pinaagi han iya espiritu, gintatagan kita ni Jehova hin “diri ordinaryo nga gahum.” (2 Cor. 4:7) An espiritu naghahatag ha aton hin kusog basi makasangyaw han maopay nga sumat, maatohan an pagsulay, malamposan an panluya, ngan mailob an mga kakurian. Ginbubuligan kita hito nga ipakita an mag-opay nga kalidad nga nagkukompwesto han “bunga han espiritu.” (Gal. 5:22) Hura nga nahatag an Dios han iya espiritu ha mga nasarig ha iya ngan ha mga sinsero nga nangangaro hito ha iya.​—Luc. 11:13.

¹⁵ Nakakaliaw gud hibaroan nga an mga magsiringba ni Jehova makakasarig ha baraan nga  espiritu basi buligan hira ha pag-alagad ha Dios! Kon kakarawaton mo an mga kamatuoran nga imo nahibaroan mahitungod ha baraan nga espiritu, mapapagios ka nga idedikar an imo kalugaringon kan Jehova ngan magpabawtismo.

16. Ano an aton nahibaroan ha aton ginhisgotan?

¹⁶ Importante gud an imo desisyon nga idedikar an imo kalugaringon kan Jehova ngan magpabawtismo. Sugad la han aton nahibaroan, kinahanglan andam ka nga akseptaron an “magagasto”​—an mga kakurian ngan mga sakripisyo. Pero an mga bendisyon nga imo makakarawat mas labaw kay han mga sakripisyo nga imo hihimoon. An bawtismo makakatalwas ha imo, ngan magriresulta ito hin maopay nga konsensya ha atubangan han Dios. An imo nangunguna nga rason ha pagpabawtismo kinahanglan amo an imo gugma kan Jehova nga Dios. Kinahanglan bug-os-kasingkasing ka liwat nga tumoo ha mga kamatuoran nga imo nahibaroan mahitungod han Amay, han Anak, ngan han baraan nga espiritu. Katapos ikonsiderar an aton mga nahisgotan, ano an imo baton ha pakiana nga “Andam na ba ako magpabawtismo?”

17. Ano an pipira nga mga pitad nga kinahanglan himoon basi mabawtismohan?

¹⁷ Kon inaabat mo nga andam ka na magpabawtismo, waray ruhaduha nga damu na an imo ginhimo basi magkaada maopay nga relasyon kan Jehova. * Tungod han imo regular nga pag-aram han Biblia, damu an imo nahibaroan mahitungod kan Jehova ngan kan Jesus. Nagkaada ka pagtoo. (Heb. 11:6) Bug-os ka nga nasarig ha mga saad ni Jehova nga mababasa ha Biblia, ngan kombinsido ka nga an imo pagtoo ha halad ni Jesus makakatalwas ha imo ha sala ngan kamatayon. Nagbasol ka na han imo mga sala; nasusubo ka gud ha mga sayop nga imo nabuhat, ngan nangaro ka na han kapasayloan ni Jehova. Nagbag-o ka na; bug-os nga ginbayaan mo na an imo maraot nga pagkinabuhi ngan nagtikang magkinabuhi ha paagi nga nalilipayan han Dios. (Buh. 3:19) Karuyag mo gud isumat ha iba an mahitungod han imo pagtoo. Nagin kwalipikado ka nga magin diri-bawtismado nga magwarali ngan nagtikang ka magsangyaw kaupod han kongregasyon. (Mat. 24:14) Hi Jehova proud gud ha imo kay ginhimo mo inin importante nga mga pitad. Napalipay mo gud an iya kasingkasing.​—Prob. 27:11.

18. Ano pa an kinahanglan mo buhaton antes ka mabawtismohan?

¹⁸ Antes ka mabawtismohan, may mga kinahanglan ka pa buhaton. Sugad la han aton nahibaroan, kinahanglan mo idedikar an imo kalugaringon ha Dios. Daop ha iya ha pribado ngan kinasingkasing nga pag-ampo, ngan pagsaad ha iya nga gagamiton mo an imo kinabuhi ha pagbuhat han iya kaburut-on. (1 Ped. 4:2) Katapos, sumati an koordinetor han lawas han mga tigurang nga karuyag mo na magpabawtismo. Hahangyoon niya an pipira nga tigurang nga makiistorya ha imo. Alayon ayaw kabaraka mahitungod ha pakiistorya  ha ira. Inin buotan nga kabugtoan sigurado nga nakilala na ngan nahigugma ha imo. Rirepasuhon nira ha imo an basihan nga mga katutdoan ha Biblia nga imo nahibaroan. Karuyag nira siguruhon nga nasasabtan mo ito nga mga katutdoan ngan maaram ka han pagkaimportante han dedikasyon ngan bawtismo. Kon umuyon hira nga andam ka na, susumatan ka nira nga puydi ka na mabawtismohan ha sunod nga asembleya o kombensyon.

19-20. Ano an kinahanglan mo buhaton katapos han imo bawtismo, ngan paonan-o mo ito mahihimo?

¹⁹ Kon mabawtismohan ka na, ano an kinahanglan mo buhaton? * Hinumdumi nga an dedikasyon usa nga saad, ngan naglalaom hi Jehova nga tutumanon mo ito. Salit katapos han imo bawtismo, kinahanglan mo tumanon an imo dedikasyon. Paonan-o mo ito mahihimo?

²⁰ Magpabilin nga duok ha kongregasyon. Sugad nga bawtismado nga Kristiano, usa ka na han mga kabugtoan. (1 Ped. 2:17) Espirituwal mo nga pamilya an imo kabugtoan ha kongregasyon. Pinaagi han regular nga pagtambong ha mga katirok, mapaparig-on mo an imo relasyon ha ira. Basaha an Pulong han Dios ngan pamalandonga ito adlaw-adlaw. (Sal. 1:1, 2) Katapos magbasa hin usa nga bahin han Biblia, paggahin hin panahon nga hunahunaon hin maopay an imo nabasa. Ngan makakabantad ito han imo kasingkasing. “Padayon kamo nga . . . mag-ampo.” (Mat. 26:41) An imo sinsero nga mga pag-ampo makakabulig ha imo nga magin mas duok kan Jehova. “Padayon nga unaha . . . an pagpamiling han Ginhadian.” (Mat. 6:33) Mahihimo mo ito pinaagi ha pagprayoridad han pagsangyaw nga buruhaton. Pinaagi ha regular nga pakigbahin ha ministeryo, matitipigan mo nga marig-on an imo pagtoo, ngan mabubuligan an iba nga magkaada paglaom nga kinabuhi nga waray kataposan.​—1 Tim. 4:16.

21. An imo bawtismo mag-aabri han dalan ngadto ha ano?

²¹ An imo desisyon nga magdedikar kan Jehova ngan magpabawtismo an pinakaimportante nga desisyon nga imo hihimoon. Tinuod nag-uupod ito hin mga sakripisyo. Pero angayan ba ito han aton mga sakripisyo? Oo! An bisan ano nga kakurian nga imo atubangon hinin daan nga kalibotan “temporaryo la ngan magaan.” (2 Cor. 4:17) Ha kabaliktaran, an imo bawtismo nag-aabri han dalan ngadto ha mas makalilipay nga kinabuhi yana ngan ha “tinuod nga kinabuhi” ha maabot nga panahon. (1 Tim. 6:19) Salit alayon hunahunaa hin maopay ngan ig-ampo an imo baton ha pakiana nga “Andam na ba ako magpabawtismo?”