1. მუ ოკო აკეთას პიროვნებაქ ჸუდეშ შენებაშ დოჭყაფაშახ?

წერმიდგინით, ნამდა პიროვნება, ჸუდეშ აშენებას გინოჭყვიდუნს. თის უჩქჷ, მუნერ ჸუდე ოკო. მარა, ხეთე ოკო იდასო მაღაზიაშა მასალაშ ოჸიდირშა დო დიჭყასო ოკო შენება? მუშო ოკო რაგად, ვარ. შენებაშ დოჭყაფაშახ, თიქ მნიშვნელოვან მუდგარენ ოკო აკეთას — გეგმიანგარიშას ხარჯეფ. მუშენ რე თენა მნიშვნელოვან? მუშენდა ქიგეგას, ქოუღუნ დო ვარ დასაბაღ ფარა მშენებლობაშ ოთებელო. თინა ხარჯეფს მშენებლობაშ დოჭყაფაშახ გეგმიანგარიშენს-და, მეტ შანს რე, ბოლოშახ ქიმიჸუნას მუშ ახალ ჸუდეშ მშენებლობა.

2. მუჭოთ ლუკაშ 14:27—30-ის ჭარჷ, მუშე ოკო დეფიქრათ ჯგირო ნათუაშახ?

² ნათუაშე ფიქრ იეჰოვაშ მიმართ ჸოროფაქ დო მარდულობაქ დუგოჭჸაფუესო? თაშ ქორენ-და, თქვა ხოლო თიცალ მნიშვნელოვან გადაწყვეტილებაშ წოხოლე გერეთ, მუნერსით თი კოჩ ღებულენს, ნამდგას ჸუდეშ შენება ოკო. მუშენ იფჩიებუთ თეს? დეკვირით იესოშ სიტყვეფს, ნამუთ ინოჭარ ლუკაშ 14:27—30-ის (წეკითხით). იესოქ ენწყჷ, მუს ნიშნენს თიშ მოწაფეთ რინა. იესოშ მიმაჸუნალეფ ქუვორდათინ, მზათ ოკო ვორდათ გავურზათ სირთულეეფს დო მუდგარენეფ ხოლო დაფთმათ (ლუკ. 9:23—26; 12:51—53). თაშ ნამდა, ნათუაშახ ჯგირო ოკო დეფიქრათ თე ირფელშე. თეშ უკულ უჯგუშო იჸით მომზადებულ, ნამდა მუჭოთ ნათილ ქრისტიანქ ართგურო გაგრძელათ ღორონთიშ მსახურება.

3. მუს გუვარჩიენთ თე სტატიას?

³ ქოღირუნო ქრისტეშ ნათილ მოწაფეთ გინორთა სირთულეეფიშ გარზებაშა დო მუდგარენეფიშ დათმებაშა? მუშო ოკო რაგად, ქო! მით დინათუნ, ბრელ კურთხევეფს მიღენს მუჭოთ ამდღა, თეშ მომავალს. მორთ გუვარჩუათ მუსხირენ მნიშვნელოვან კითხვა, ნამუთ ნათუას ოხუ. თენა მიგეხვარებნა,  ქუპასუხათ კითხვას: „ქუვორექო მზათ ნათუაშო?“.

4. ა) მუ რე მეძღვინუა? ბ) მუჭოთ მათეშ 16:24-ის რე მოშინაფილ, მუს ნიშნენს, პიროვნებაქ ვარია თქუას მუშ დუდშე?

⁴ მუ რე მეძღვინუა? ნათუაშახ დუდ ოკო მეუძღვინათ იეჰოვას. მუჟამსით დუდის უძღვინენთ იეჰოვას, თქვა მთელ გურით ლოცულენთ დო ღორონთის ურაგადუთ, ნამდა ირიათო ემსახურებუთ თის. მეძღვინუათ ვარიას იჩიებუთ თქვან დუდშე (წეკითხით მათე 16:24). თეშ უკულ, თქვა იეჰოვას ოკუთვნუთ, მუთ დიდ პატი რე (რომ. 14:8). ფაქტობრივო, თქვა თის ურაგადუთ, ნამდა თავრეშე მოჸუნაფილ, თქვანო არძაშ უმოს მნიშვნელოვან ღორონთიშ მსახურება იჸუაფ დო ვართ ხოლო თქვან დუდიშ სიამოვნება. მეძღვინუა სერიოზულ პირობა რე, ნამდგას თქვა ღორონთის არზენთ. იეჰოვა ვა მანძალენა თე პირობაშ დოდვალას. მარა, მუჟამსით თეს ვორთუთ, თინა ჩქინდე ელჷ, ნამდა სიტყვას შევასრულენთ (ფსალმ. 116:12, 14).

5. მუჭო რე დაკავშირებულ მეძღვინუა ნათუაწკუმა?

⁵ მუჭო რე დაკავშირებულ მეძღვინუა ნათუაწკუმა? მეძღვინუა პირადულ საკითხ რე; იეჰოვა დო თქვან მეტ, მითინს ვა უჩქჷ, მუჟამ უძღვინენთ დუდის თის. ნათუა სახალხოთ ხვადუ; მუჭოთ წესინ, თქვა შხვეფ გორწყენან თეშ ინათუთ კონგრესის. თეთ შხვეფს ოძირანთ, ნამდა უკვე დუდ მეუძღვინით იეჰოვას. * თეშნერო, თქვან ნათუათ შხვეფ გებულენა, ნამდა იეჰოვა გიჸორა მთელ გურით, შურით, გონებათ დო ძალათ დო გინოჭყვიდილ გაფნა, ირიათო ემსახურათ თის (მარ. 12:30).

6, 7. მუჭოთ 1 პეტრეშ 3:18—22-ს ჭარჷ, ნამ ჟირ მიზეზიშ გურშენ რე ნათუა აუცილებერ?

⁶ მართალო აუცილებერ რენო ნათუა? დეფიქრით თი სიტყვეფშე, ნამუთ ინოჭარ 1 პეტრეშ 3:18—22-ს (წეკითხით). მუჭოთ კიდობან ოძირანდჷ ხალხის, ნამდა ნოეს ღორონთიშ რწმენა უღუდ, თეშ თქვან ნათუა არგამათ ოძირანს შხვეფს, ნამდა დუდ მეუძღვინით იეჰოვას. მარა მართალო აუცილებერ რენო ნათუა? მუშო ოკო რაგად, ქო. მოციქულ პეტრექ მიშინუ თეშ მიზეზ. პირველ, თინა „ომსახურ თქვან რსხებას“. ნათუა თი შემთხვევას მირსხენა, მუჟამსით ჩქინ საქმეეფით ქუვოძირანთ, ნამდა ბწანა იესოშ დო ბჯერა, ნამდა თიქ ჩქინ გურშენ ღურჷ, ზეცას გეთელ დო ასე „ღორონთიშ მარძგვანშე“ ხე.

⁷ მაჟია, ნათუათ „სუფთა სინდის“ მაღვენუნა. მუჟამსით დუდის ვუძღვინენთ ღორონთის დო იმნათუთ, განსაკუთრებულ ურთიერთობას იბჭყანთ თიწკუმა. ღორონთ მაპატიენა ჩქინ ცოდვეფს, მუშენდა მთელ გურით ბნარღენთ დო რწმენას გიმიფრჩქინანთ გიშაჸიდირალიშ მიმართ. თეშნერო, შემლებნა, ღორონთიშ წოხოლე სუფთა სინდის მიღდან.

8. მუ ოკო რდას მთავარ მიზეზ, მუთ ნათუას გინგოჭყვიდირაფუანა?

⁸ მუ მიზეზეფიშ გურშენ ოკო გაფდან გინოჭყვიდილ ნათუა? ბიბლიაშ ჯგირო გურაფაშ შედეგო, თქვა ბრელ ქიგეგით იეჰოვაშ გურშენ, მუნერ პიროვნება რე თინა დო მუჭო მოქმედენს. თე ირფელიშ გაგებაქ იმოქმედ თქვან გურშა დო იეჰოვაქ მანგარო ქიგეჸოროფეს. იეჰოვაშ მიმართ ჸოროფა ოკო რდას მთავარ მიზეზ, მუთ ნათუას გინგოჭყვიდირაფუანა.

9. მუჭოთ მათეშ 28:19 დო 20-ის ჭარჷ, მუს ნიშნენს „მუმაშ, სქუაშ დო წმინდა შურიშ სახელით“ ნათუა?

⁹ ხოლო ართ მიზეზ, მუდგაქ ნათუა ოკო გინგოჭყვიდირაფუან თინა რე, ნამდა თქვა ქიგეგით მუს ოგურუანს ბიბლია დო რჯერა თე ირფელ. ქობძირათ, მუ თქუ იესოქ, მუჟამსით მოწაფეეფიშ მომზადებაშ გურშენ მითითება მუჩეს (წეკითხით მათე 28:19, 20). მუჭოთ იესოქ თქუ, თინეფ მით ინათუნა, თენა ოკო აკეთან „მუმაშ, სქუაშ დო წმინდა შურიშ სახელით“. მუს ნიშნენდჷ თენა? თქვა  მთელ გურით ოკო რწანდან ბიბლიურ ჭეშმარიტება იეჰოვა, თიშ სქუა, იესო დო წმინდა შურიშ გურშენ. თე ირფელშე ჭეშმარიტებას დიდ ძალა უღჷ დო შეულებ მანგარო იმოქმედას თქვან გურშა (ებრ. 4:12). მორთ გუვარჩუათ თინეფშე ნამთინე.

10, 11. მუ ჭეშმარიტება გეგით დო ირწმუნით ღორონთიშ გურშენ?

¹⁰ ქიგიშინით თი დრო, მუჟამსით ღორონთიშ გურშენ ჭეშმარიტება გეგით: თიშ „სახელ რე იეჰოვა“, თინა რე „უზენაეს მთელ ქიანას“ დო ხვალე თინა რე „ჭეშმარიტ ღორონთ“ (ფსალმ. 83:18; ეს. 37:16). იეჰოვა რე ჩქინ გუმაჭყაფალ დო მარსხებელ (ფსალმ. 3:8; 36:9). თიქ მუშ მხარეშე ირფელ გაკეთ, ნამდა დამირსხესკო ცოდვა დო ღურაშე დო ქომჩეს მარადიულ სიცოცხლეშ იმენდ (იოან. 17:3). დუდიშ მეძღვინუა დო ნათუათ ოძირანთ, ნამდა ართ-ართ იეჰოვაშ მოწმე რეთ (ეს. 43:10—12). თეშნერო, თქვა იჸუაფუთ თი მსოფლიო ოჯახიშ წევრ, მიდგას ოამაყ, ნამდა ღორონთიშ სახელით რე წოდებულ დო შხვეფს ხოლო ურაგადნა თეშ გურშენ (ფსალმ. 86:12).

¹¹ მართალო დიდ პატი რე, მიჩქუდან მუს ოგურუანს ბიბლია ღორონთიშ გურშენ! მუჟამსით თე ძვირფას ჭეშმარიტება რწანა, მთელ გურით გინოჭყვიდუნთ, დუდ მეუძღვინათ იეჰოვას დო დინათათ.

12, 13. მუ ჭეშმარიტება გეგით დო ირწმუნით ღორონთიშ სქუაშ გურშენ?

¹² მუ რეაქცია გიღდეს, მუჟამსით ღორონთიშ სქუაშ გურშენ ჭეშმარიტება გეგით? იესო მაჟია პიროვნება რე მთელ სამყაროს. თიქ ჩქინ გიშაჸიდირალო მზადყოფნათ დათმჷ მუშ სიცოცხლე. მუჟამსით გიშაჸიდირალიშ რწმენას საქმეეფით ვოძირანთ, ცოდვეფ მეპატიებნა, ღორონთწკუმა მეგობრობას ვავითარენთ დო საბოლათ მარადიულ სიცოცხლეს მიბღენთ (იოან. 3:16). იესო ჩქინ მღვდელმთავარ რე. თის ოკო მიმეხვარან, ნამდა გიშაჸიდირალქ ჯგირობუა მომღან დო ღორონთწკუმა ხოლოშიან ურთიერთობა მიღდან (ებრ. 4:15; 7:24, 25). ღორონთიშ სამეფოშ მეფე იესო რე, ნამდგაშ საშვალებათ იეჰოვა განწმინდენს მუშ სახელს, ბოლოს მუღენს უბადობას დო მარადიულ კურთხევეფს მომღანა სამოთხეს (მათ. 6:9, 10; გამოცხ. 11:15). იესო ჩქინ მაგალით რე (1 პეტ. 2:21). თიქ მუშ სიცოცხლე ღორონთიშ ნებაშ შესრულებას მეუძღვინ დო თეშნერო, მაგალით მუჩეს (იოან. 4:34).

¹³ მუჟამსით რწანა, მუდგას ბიბლია ოგურუანს იესოშ გურშენ, გეჸოროფებნა ღორონთიშ ძვირფას სქუა. თე ჸოროფა გინგოჭყვიდირაფუანა, იესოცალო, თქვან სიცოცხლე ღორონთიშ ნებაშ შეიოსრულებერო გეგმირინუათ. შედეგო, აღძრულ იჸუაფუთ დუდ მეუძღვინათ იეჰოვას დო დინათათ.

14, 15. მუ ჭეშმარიტება გეგით დო ირწმუნით წმინდა შურიშ გურშენ?

¹⁴ მუჭო იმოქმედ თქვანწკუმა წმინდა შურიშ გურშენ ჭეშმარიტებაშ გაგებაქ? თინა პიროვნება დო სამებაშ ნაწილ ვარინ ღორონთიშ მოქმედ ძალა რე. იეჰოვაქ წმინდა შურიშ შთაგონებათ ქომოლკათას ბიბლია ოჭარაფუ; წმინდა შურ მოხვარნა, ქინვანჭათ დო გეგმიბრინუათ, მუდგას ბიბლიაშე ბკითხულენთ (იოან. 14:26; 2 პეტ. 1:21). იეჰოვა წმინდა შურიშ საშვალებათ მარზენა ძალას, „ნამუთ ჩვეულებრივშე უმოს რე“ (2 კორ. 4:7). თეს გეძინელ, წმინდა შურ მარზენა ძალას, ნამდა იფქადაგათ სახიოლო ამბე, ვებრძოლათ ცდუნებეფს, გურგოტახილობას დო გივორჯგინათ სირთულეეფს. წმინდა შურ მოხვარნა, გეგმიფრჩქინათ თი ჯგირ თვისებეფ, ნამუთ თე „შურიშ ნაყოფ რე“ (გალ. 5:22). ღორონთ მუშ მოქმედ ძალას თინეფს არზენს, მით ონდჷ თის დო მთელ გურით თხინს წმინდა შურს (ლუკ. 11:13).

¹⁵ მართალო გურიშ ემაკინალ რე თიშ რჩქინა, ნამდა იეჰოვაშ თაყვანიშმცემლეფს შეულებნა, უღდან წმინდა შურიშ მოხვარაშ იმენდ ღორონთიშ მსახურებას! მუჟამსით რწანა, ჭეშმარიტება წმინდა შურიშ გურშენ, თენა გინგოჭყვიდირაფუანა დუდ მეუძღვინათ ღორონთის დო დინათათ.

16. მუ გებგით გარჩიებულ მასალაშე?

 ¹⁶ თქვა მნიშვნელოვან ნაბიჯის გინოდგუნთ, მუჟამსით გინოჭყვიდუნთ, დუდ მეუძღვინათ ღორონთის დო დინათათ. მუჭოთ გებგით, თქვა მზათ ოკო რდათ სირთულეეფიშ გარზებელო დო მუდგარენეფიშ დათმებელო. მარა თე ირფელს ბრელით გინოწონუნს თი კურთხევეფ, ნამდგას მიღენთ. ნათუას შეულებ გირსხან დო ღორონთიშ წოხოლე სუფთა სინდის მერჩან. მთავარ მიზეზ, მუთ ნათუას გინგოჭყვიდირაფუანა, იეჰოვაშ ჸოროფა ოკო რდას. თეს გეძინელ, მთელ გურით ოკო რწანდან თი ჭეშმარიტება, ნამუთ იეჰოვა, იესო დო წმინდა შურიშ გურშენ გეგით. თე ირფელიშ გარჩიებაშ უკულ, მუჭო უპასუხენთ კითხვას: „ქუვორექო მზათ ნათუაშო?“.

17. მუ ნაბიჯეფ ოკო გინოდგას პიროვნებაქ ნათუაშახ?

¹⁷ ქოფიქრენთ, ნამდა ნათუაშო მზათ რეთ-და, ალბათ უკვე გეგნოდგით ნაბიჯეფ, იეჰოვაწკუმა ჯგირ ურთიერთობაშ გავითარებელო. * ბიბლიაშ რეგულარულო გურაფაშ შედეგო, თქვა ბრელ მუდგარენ ქიგეგით იეჰოვა დო იესოშ გურშენ. თეს გეძინელ, გევითარით რწმენა (ებრ. 11:6). თქვა ბოლოშა ონდუთ იეჰოვაშ დაპირებეფს, ნამუთ ბიბლიას რე მოჩამილ დო რჯერა, ნამდა იესოშ მსხვერპლიშ მიმართ რწმენას შეულებ თქვან რსხება ცოდვა დო ღურაშე. თქვა მინანით ცოდვეფ, შხვა სიტყვეფით ქოფთქუათინ, მანგარო გაწუხენა ულირს დაშებულ დო პატიება თხით იეჰოვას თი ირფელშენ. თქვა მთლიანო დოთირეთ თქვან ცხოვრება, შხვა სიტყვეფით ქოფთქუათინ, მიოტეთ გლახა ცხოვრებაშ წეს დო ღორონთიშ მოსაწონო ცხოვრება ქიდიჭყით (საქ. 3:19). გოკონა, შხვეფს ეჩუათ თქვან რწმენაშ გურშენ. თქვა მოუნათლავ მაუწყებელო გინირთით დო ქიდიჭყით კრებაწკუმა ართო ქადაგება (მათ. 24:14). იეჰოვას ოამაყუთ, მუშენდა თე აუცილებერ ნაბიჯეფ გინოდგით. თქვა მანგარო გახარით თიშ გურ (იგავ. 27:11).

18. ხოლო მუ ოკო აკეთათ ნათუაშახ?

¹⁸ ნათუაშახ შხვა მუდგარენეფ ხოლო ოკო გაკეთათ. მუჭოთ უკვე გებგით, დუდ ოკო მეუძღვინათ ღორონთის. მთელ გურით ქილოცით, მუჟამსით ხვალე იჸუაფუთ დო პირობა ქიმეჩით ღორონთის, ნამდა მთელ ცხოვრებას თიშ ნებას შეასრულენთ (1 პეტ. 4:2). თეშ უკულ, უხუცესეფიშ საბჭოშ კოორდინატორს ქუწით, ნამდა გოკონა დინათათ. თინა მუსხირენ უხუცესის ქოთხინს, ქეშერხვადან. ქორთხინთ, ვენერვიანათ თინეფწკუმა შეხვალამაშ გურშენ. რშუდან, ნამდა თე ძვირფას ჯიმალეფ უკვე  გიჩინენა დო უჸორთ. თინეფ თქვანწკუმა თი ძირითად ბიბლიურ გურაფეფს გარჩიენა, ნამუთ დიგურეთ. თინეფს ოკონა დერწმუნან, ნამდა ჯგირო გარჩქილენა თე გურაფეფ დო მეძღვინუა დო ნათუაშ მნიშვნელობა. მუჟამსით დერწმუნებნა, ნამდა მზათ რეთ ნათუაშო, ქოიწინა, ნამდა შეილებნა დინათათ ანწიან კონგრესის.

19, 20. მუ ოკო აკეთათ ნათუაშ უკულ დო მუჭო შეილებნა თეშ კეთება?

¹⁹ მუ ოკო აკეთათ ნათუაშ უკულ? * ვაგგოჭყორდან, ნამდა მეძღვინუა პირობა რე დო იეჰოვა თქვანდე ელჷ, ნამდა შეასრულენთ თის. თაშ ნამდა, ნათუაშ უკულ ოკო შეასრულათ პირობა, ნამუთ მეძღვინუაშ დროს დოდვით. მუჭო შეილებნა თეშ კეთება?

²⁰ კრებაწკუმა გიღდან ხოლოშიან ურთიერთობა. მუჭოთ ნათილ ქრისტიან თქვა მსოფლიო საჯიმალოშ ნაწილ რეთ (1 პეტ. 2:17). კრებას რენან თი და დო ჯიმალეფ თქვან სულიერ ოჯახ რე. ქრისტიანულ შეხვალამეფიშ რეგულარულო დასწრებათ, თინეფწკუმა უმოს ხოლოშიან ურთიერთობა გაღვენუნა. ირდღას წეკითხით ღორონთიშ სიტყვა დო იფიქრით თიშე (ფსალმ. 1:1, 2). ბიბლიაშ გარკვეულ მონაკვეთიშ კითხირიშ უკულ, დრო გეგმურთით ნაკითხირშე ჯგირო დაფიქრებას. შედეგო, ნაკითხირ იმოქმედენს თქვან გურშა. „ირიათო ილოცით“ (მათ. 26:41). შურდოგურით ლოცვა დუგაახლოვენა იეჰოვაწკუმა. „პირველ რიგის გორით სამეფო“ (მათ. 6:33). თეს გაკეთენთ, მუჟამსით ქადაგებაშ საქმე თქვან ცხოვრებაშ მნიშვნელოვან ნაწილ იჸუაფ. მსახურებას რეგულარულო მონაწილებათ გემანგარენთ რწმენას დო შილებე შხვეფს ხოლო ქიმეხვარათ, ქიგედირთან მარადიულ სიცოცხლეშ შარას (1 ტიმ. 4:16).

21. მუს მოიღანა ნათუა?

²¹ იეჰოვაშა დუდიშ მეძღვინუა დო ნათუა არძაშ უმოს მნიშვნელოვან გადაწყვეტილება რე, ნამდგას ღებულენთ. თეშო სირთულეეფიშ გარზება დო მუდგარენეფიშ დათმება რე საჭირო. ქოღირუნო თეშ კეთება? მუშო ოკო რაგად, ქო! არძა სირთულე, ნამდგას შილებე თე ქვეყნიერებას შეხვადათ, „დროებით დო ჭიჭე რე“ (2 კორ. 4:17). თეშ გინაწონს, ნათუათ უმოს ბედნერ ცხოვრება გაღვენუნა ამდღა დო მომავალს „ჭეშმარიტ სიცოცხლე“ (1 ტიმ. 6:19). თაშ ნამდა, რთხინთ, ჯგირო დეფიქრით, ქილოცით დო თეშ ქუპასუხით კითხვას: „ქუვორექო მზათ ნათუაშო?“.