1. Ino raha tsy maintsy hataonolo araiky alohany izy hiasa tran̈o?

OHATRA iziô misy olo araiky tihiasa tran̈o. Efa hainy koa tran̈o karakory tiany hamboarin̈y. Direkty ma izy hivanga fitaovan̈a jiaby ilain̈a amy zen̈y ke hikomansy hiasa tran̈o io? Aha. Misy raha maventy tsy maintsy hataony antsendriky alohanizen̈y. Mila konteny ôtrino vola mahampy hankifan̈a tran̈o io. Ho vitany firaka amy farany tran̈onany izikoa izy efa nandiniky tsialohaloha karaha zen̈y.

2. Izikoa Lioka 14:27-30 zahan̈a, ino raha mila dinihinao tsarabe anao koa tihan̈ano batisa?

² Tia Jehovah mare sady mankasitraka raha ataony anao matoa tihan̈ano batisa. Nikonteny lelahy in̈y antsendriky ôtrino depansy, zay izy vo niasa tran̈o. Mila man̈ano zen̈y koa anao koa tihan̈ano batisa. Zahava baka raha nivolan̈iny Jesosy amy Lioka 14:27-30 ao. (Vakia.) Koran̈iny ao fa izikoa atsika tihan̈aradia izy, atsika mila von̈ono hiaritry raha sarotro ndreky hahafoe ten̈a. (Lioka 9:23-26; 12:51-53) Ke alohany anao han̈ano batisa, diniha tsarabe antsendriky ino aby raha sarotro tafiditry amy zen̈y. Zen̈y han̈ampy anao ho von̈ono tsy hivadiky amy Jehovah, lera anao vita batisa.

3. Ino raha hidinihintsika amy lahatsoratra ty ato?

³ Mety hiatriky raha sarotro ndreky hahafoe raha sasany anao izikoa fa vita batisa. Fa mbala maromarony zen̈y ndraiky hatsaran̈a miambin̈y anao, rango izioty firaka aminy amaray an̈y. Akory basy hahaizanao asa ‘efa von̈ono hatao batisa anao’ sa tsendriky? Mila dinihinao tsarabe ino aby fan̈ontanian̈a maventy mifandray amy batisa. Alô baka atsika handiniky sasany amy zen̈y.

4. a) Karakory ma manokanten̈a zen̈y? b) Karakory ma “tsy man̈eky” ain̈inten̈a, koran̈iny Matio 16:24 ao?

⁴ Karakory ma manokanten̈a zen̈y? Alohany anao hatao batisa, anao mila manokanten̈a amy Zan̈ahary. Fanokan̈anten̈a io vavaka manokan̈a ataonao aminany, ke amy leranizio anao mampan̈anten̈a Jehovah fa hampiasainao han̈anaovan̈a sitraponany fo fiain̈ananao. Tsy sitraponao tompiny eky ataonao fa niny Zan̈ahary. Karaha zen̈y “tsy man̈eky” ain̈inten̈a, nikoran̈iny Jesosy amy Matio 16:24 ao. (Vakia.) Manjary fanan̈any Jehovah anao komansy iô, ke tsisy raha ambaka zen̈y. (Rom. 14:8) Fanokan̈anten̈a io voady atao amy Zan̈ahary. Mifanta aminany anao fa hanompo izy fo, ke raha zen̈y tsy mety atao kidikidy. Tsy forseny atsika han̈ano izio; fa atsika koa fa nifanta, tsy maintsy hifaintsika raha zen̈y!​—Sal. 116:12, 14.

5. Ino raha tsy mampiran̈a fanokan̈anten̈a ndreky batisa?

⁵ Ino raha tsy mampiran̈a fanokan̈anten̈a ndreky batisa? Fanokan̈anten̈a io vavaka manokan̈a ataonao amy Jehovah, ke tsisy olo mahay anao nan̈ano zen̈y. Fa batisa ndraiky hitanolo maro, fotony matetiky lera misy fivoriambe fan̈anovan̈a izio. Baka amy batisanao ahaizanolo jiaby fa anao efa nanokanten̈a tamy Jehovah. * Izio koa ahaizanolo fa anao tia Jehovah amy fonao jiaby, ndreky vatan̈anao jiaby, ndreky jerinao jiaby, ndreky aminy angovonao jiaby, ke anao tapakevitry hanompo izy fo mandrakizay.—Marka 12:30.

6-7. Izikoa 1 Petera 3:18-22 zahan̈a, nan̈ino ma batisa io ten̈a ilain̈a?

⁶ Izio ma ten̈a ilain̈a man̈ano batisa io? Zahava baka raha koran̈iny 1 Petera 3:18-22. (Vakia.) Sambofiara niasainy Noa in̈y nahaizan̈a fa izy ten̈a nino Zan̈ahary. Batisa koa porofo ahaizan̈a fa anao nanokanten̈a tamy Jehovah. Nazavainy apostoly Petera antony aroe mahavy batisa io ten̈a ilain̈a. Voanalohany, batisa io “man̈avotro” atsika. Mahavita man̈avotro atsika izio, izikoa aboakantsika amy raha ataontsika fa atsika mino Jesosy; mino fa izy nan̈amia ain̈inany han̈avotan̈a atsika; mino fa nivilominy Zan̈ahary izy ke izy iziô efa andan̈itry an̈y, mipetraka “ankavanan̈a Zan̈ahary.”

⁷ Faharoe, batisa io mahavy atsika hanan̈a “feony fieritreretan̈a madio.” Atsika koa fa nanokanten̈a tamy Jehovah ke natao batisa, manjary manan̈a fifandraisan̈a manokan̈a aminany. Ambelany koa hadisovan̈antsika izikoa atsika efa ten̈a nibebaka sady mino vidipan̈avotan̈a, ke manjary manan̈a feony fieritreretan̈a madio man̈oloan̈a izy atsika.

8. Ino ma antony maventy tokony hahavy anao hatao batisa?

⁸ Nan̈ino ma atsika mila atao batisa? Anao koa fa nianatra Baiboly, anao nanjary nahay raha momba Jehovah. Hainao toetrinany ndreky fomba fan̈anovany raha. Tafiditry lalin̈y tan̈atiny fonao raha aby zen̈y, ke nanjary tia izy mare anao. Tokony fitiavanao Jehovah antony maventy mahavy anao hatao batisa.

9. Ino ma dikany atao batisa aminy an̈arany Baba, zanaka, ndreky fan̈ahy masin̈y, koran̈iny Matio 28:19, 20 ao?

⁹ Tihan̈ano batisa koa anao, fotony nanjary hainao ndreky inoanao ino marin̈y raha ampianariny Baiboly. Diniha baka raha nivolan̈iny Jesosy taminizy nan̈iraka pianatranany hampianatra olo. (Vakia Matio 28:19, 20.) Koran̈iny ao fa olo araiky koa atao batisa, tsy maintsy atao batisa ‘aminy an̈arany Baba ndreky aminy an̈arany Zanaka, baka io aminy an̈arany fan̈ahy masin̈y.’ Ino ma dikanizen̈y? Tsy maintsy inoanao amy fonao jiaby fa marin̈y raha ampianariny Baiboly  momba Jehovah ndreky Jesosy, baka io fan̈ahy masin̈y. Hanohin̈y fonao mare fahaizanao raha aby zen̈y. (Heb. 4:12) Alô zahavantsika sasany amy zen̈y.

10-11. Ino aby ny marin̈y nianaranao momba Jehovah Babantsika ke inoanao?

¹⁰ Azonao onon̈o taminy anao vo nianatra ny marin̈y momba Baba? Hainao fa “Jehovah” an̈aran̈anany, izy “Farany An̈abo amy raha jiaby”, avio izy zaraiky fo “ten̈a Zan̈ahary.” (Sal. 83:18; Isaia 37:16) Jehovah niasa raha jiaby; izy ‘hamonjy atsika.’ (Sal. 3:8; 36:9) Nan̈ano raha koa izy han̈avotan̈a atsika amy fahotan̈a ndreky fahafatesan̈a. Nataony koa raha hahavy atsika ho velon̈o tsisy farany. (Jaona 17:3) Manjary Vavolombelon̈o Jehovah anao, izikoa fa vita fanokan̈anten̈a ndreky batisa. (Isaia 43:10-12) Manjary an̈isany fianakavian̈any pirahalahy erantany anao. Ho ravoravo karaha iro koa anao mitondra an̈aran̈any Jehovah ndreky man̈ambara izio aminolo.—Sal. 86:12.

¹¹ Tsisy raha bebeny mahay ny marin̈y ampianariny Baiboly momba Jehovah Babantsika io! Fahaizanao ny marin̈y aby zen̈y, hahavy anao tihanokanten̈a ndreky hatao batisa.

12-13. Ino aby ny marin̈y nianaranao momba Zanaka Zan̈ahary ke inoanao?

¹² Nan̈ano karakory anao koa fa nahay ny marin̈y mikasiky Zanaka Zan̈ahary? Nanjary hainao koa fa fan̈arakaraka Jehovah, efa Jesosy edy ny farany mahery; kanefa foeny ain̈inany natao vidipan̈avotan̈a atsika. Pan̈avotro atsika izy. Izikoa aboakantsika amy raha ataontsika fa atsika mino vidipan̈avotan̈a io, Zan̈ahary han̈ambela hadisovan̈antsika, hanjary kamaradiny atsika, ndreky ho velon̈o tsisy farany atsika. (Jaona 3:16) Jesosy koa Pisoron̈obe. Ataony raha hazahoantsika hatsaran̈a baka amy vidipan̈avotan̈a, ke hifandray marikitry amy Zan̈ahary. (Heb. 4:15; 7:24, 25) Panjakany Fanjakan̈any Zan̈ahary koa izy. Jehovah hampiasa izy hankamasin̈y an̈aran̈anany, ndreky han̈adoso raha tsy manjary jiaby, baka io han̈ova tany ty ho paradisa, ke hitondra hatsaran̈a maro aminolombelon̈o. (Mat. 6:9, 10; Apok. 11:15) Modely tsara arehantsika Jesosy. (1 Pet. 2:21) Fan̈anovan̈a sitrapony Zan̈ahary fo ten̈a nampiasany fiain̈ananany.—Jaona 4:34.

¹³ Manjary tianao Zanaka Zan̈ahary io, izikoa fa ikenao raha ampianariny Baiboly momba izy. Fitiavanao Jesosy hahavy anao tihangala tahaka raha nataony, ke han̈ano sitrapony Zan̈ahary fo amy fiain̈ananao jiaby. Zen̈y hahavy anao tihanokanten̈a amy Jehovah ndreky hatao batisa.

14-15. Ino aby ny marin̈y nianaranao momba fan̈ahy masin̈y ke inoanao?

¹⁴ Asa tsaroanao nan̈ano akory anao taminy anao nianatra ny marin̈y momba fan̈ahy masin̈y? Nianaranao fa kaiky fan̈ahy masin̈y io tsy zan̈ahary, fa angovo ampiasainy Zan̈ahary. Nampiasa izio Jehovah taminizy nampanoratra Baiboly. Ampiany fan̈ahy masin̈y atsika hahay dikany raha vakintsika amy Baiboly ao ndreky han̈araka izio amy fiain̈ana. (Jaona 14:26; 2 Pet. 1:21) Mbala izio fo koa ampiasainy Jehovah han̈amezan̈a atsika “angovo fan̈ampiny.” (2 Kor. 4:7) Izio man̈ampy atsika hahavita hanompo, hanohitry fakampan̈ahy, hiatriky raha mampakivy, ndreky hiaritry problemo. Fan̈ahy masin̈y koa mahavy atsika hanan̈a “vokatrany fan̈ahy.” Toetry ten̈a tsara iro io. (Gal. 5:22) Jehovah von̈ono han̈amia fan̈ahy masin̈y atsika izikoa atsika mangataka izio aminany amy fô jiaby .—Lioka 11:13.

¹⁵ Velombelon̈o oe anten̈a mahay fa amezany Jehovah fan̈ahy masin̈y atsika, baka mahavita manompo. Izikoa ikenao ny marin̈y  koran̈iny Baiboly momba fan̈ahy masin̈y io, ke ampidirinao amy fonao tsarabe, tihanokanten̈a ndreky hatao batisa edy anao.

16. Ino aby raha nianarantsika firaka eto?

¹⁶ Tsy zanazanaka fanapahankevitry manokanten̈a amy Jehovah ndreky hatao batisa zen̈y. Nianarantsika tio fa anao mila von̈ono hiatriky raha sarotro ndreky hahafoe raha sasany. Kanefa maro mandilatra raha mety hafoenao hatsaran̈a ho azonao. Ohatra, batisa io mahavita man̈avotro anao. Man̈ampy anao hanan̈a feony fieritreretan̈a madio man̈oloan̈a Zan̈ahary koa izio. Nianarantsika koa fa fitiavanao Jehovah antony ten̈a maventy tokony handrisiky anao han̈ano batisa. Tsy maintsy inoanao amy fô jiaby koa raha koran̈iny Baiboly momba Babantsika, ndreky Zanany, baka io fan̈ahy masin̈y. Ke izikoa fa nidinihinao fan̈azavan̈a aby tio in̈y, akory, “anao ma efa von̈ono hatao batisa?”

17. Ino raha sasany tsy maintsy hataonolo araiky alohanizy han̈ano batisa?

¹⁷ Matoa anao mieritreritra fa efa von̈ono hatao batisa, dikanizen̈y efa maro raha nataonao hifandraisan̈a tsara tamy Jehovah. * Nianatra Baiboly tsy tapaka anao, ke nanjary maro raha hainao momba Jehovah ndreky Jesosy. Nanjary nanan̈a finoan̈a anao. (Heb. 11:6) Inoanao mare iro fampan̈antinan̈any Jehovah amy Baiboly ao. Mino soron̈o nataony Jesosy koa anao ke resy lahatra anao fa ho afaka amy fahotan̈a ndreky fahafatesan̈a. Anao nibebaka. Nifono tamy Jehovah anao fotony nanen̈iny mare tamy raha ratsy jiaby vitanao. ‘Nimpody’ anao, ke nialanao lan̈iany raha ratsy nahazatra anao taloha, ke nisoloanao fahazaran̈a tsara tiany Zan̈ahary. (Asa. 3:19) Mazoto mare koa anao mikoran̈a raha inoanao aminolo. Nanjary fenonao koa raha takin̈y amy pitory tsy vita batisa ke anao nanomboko niaraka nitory tamy fiangonan̈a. (Mat. 24:14) Vitanao tsarabe raha tsy maintsy hatao aby zen̈y, ke ravoravo aminao mare Jehovah. Namparavoravo fonany ankitin̈y anao!—Ohab. 27:11.

18. Ino koa raha sasany mila ataonao alohany han̈ikian̈a anao hatao batisa?

¹⁸ Mbala misy raha sasany koa mila ataonao, iô anao vo iken̈y hatao batisa. Efa nianarantsika tio fa mila manokanten̈a amy Jehovah anao. Koràn̈a aminany fan̈irian̈anao hampiasa fiain̈ananao han̈anovan̈a sitraponany. (1 Pet. 4:2) Avio koràn̈a aminy antipan̈ahy pandamin̈y  fa anao tihan̈ano batisa. Izy amy zay han̈iraka antipan̈ahy hafa hitraotro aminao, fa anao aza mavozo. Olo efa fankazatra anao fo iro io sady anao tiandro mare. Handiniky fampianaran̈a fototro nianaranao tamy Baiboly anaro izikoa fa mitraotro. Tiandro alain̈a antoko baka fa hainao sady azonao tsarabe raha efa nianaranao aby io. Tiandro azo antoko koa fa raha ten̈a maventy aminao fanokan̈anten̈a ndreky batisa io! Izikoa hitandro fa mahafeno fepetra hatao batisa anao, hikoran̈indro aminao raha zen̈y, ke efa mety hatao batisa edy anao amy fivoriambeny faritry na vondroparitry man̈araka.

19-20. Ino ma raha tokony hataonao izikoa fa vita batisa? Akory han̈anovanao zen̈y?

¹⁹ Ino ma raha tokony hataonao, anao koa fa vita batisa? * Aleva onon̈o fa nifanta tamy Jehovah anao izikoa fa nanokanten̈a. Izy matoky fa tsy hivadiky amy vava nataonao zen̈y anao koa fa vita batisa, ke han̈ano raha mifan̈araka amy zen̈y. Akory han̈anovan̈ao zen̈y?

²⁰ Mifen̈a fo hifandray marikitry amy fiangonan̈a. Hanjary an̈isany fianakaviambeny ‘pirahalahy erantany’ anao lera vita batisa. (1 Pet. 2:17) Havanao aby olo amy fiangonan̈a ao. Hahaiho tia iro anao, izikoa mivory fo. Vakia isanandra Volan̈a Zan̈ahary, baka io saintsain̈a. (Sal. 1:1, 2) Isaka anao baka mamaky izio, miniminia tsara raha nivakianao, baka hotafiditry amy fonao tsarabe. “Aza voly mivavaka.” (Mat. 26:41) Hahaiharikitry Jehovah fo anao izikoa man̈ano vavaka baka amy fô. Ataova voalohantoeran̈a fo Fanjakan̈any Zan̈ahary. (Mat. 6:33) Dikanizen̈y, ataova raha farany maventy amy fiain̈ananao fitorian̈a. Hahaifatatra fo finoan̈anao izikoa anao mazoto mitory. Mety hahavita han̈ampy olo hiain̈y tsisy farany anao koa man̈ano zen̈y.—1 Tim. 4:16.

21. Ino aby hatsaran̈a ho azonao izikoa anao atao batisa?

²¹ Tsisy fanapahankevitry bebeny fanokan̈anten̈a ndreky batisa zen̈y. Marin̈y fa misy raha mila foenao, baka io hiatriky problemo koa anao, fa zen̈y tsy hanin̈enan̈a. “Mielan̈a ndreky mandalo” fo problemo jiaby handalovanao amy donia efa ho ravan̈a ty. (2 Kor. 4:17) Anao koa fa vita batisa, hahaitsara fo fiain̈ananao rango izioty. Hahazo “ten̈a fiain̈ana” koa anao aminy amaray an̈y. (1 Tim. 6:19) Ke ty raha angatahinay aminao: Mivavaha, baka io diniha tsara fan̈ontanian̈a ty: “Zaho ma Efa Von̈ono Hatao Batisa?”