AGANICHISYE ya mundu jwakusaka kutaŵa nyumba. Jwalakwe akusamanyilila mtundu wa nyumba jakusaka kutaŵa. Ana munduju mpaka ajawule mwachitema kukusuma yindu yakamulichisya masengo ni kutanda kutaŵa nyumbajo? Iyayi. Mkanatende yeleyi, pana chindu chakusosekwa mnope champaka atende. Jwalakwe mpaka asosekwe kuŵalanjila mbiya syampaka akamulichisye masengo. Mpaka asosekwesoni kutenda yeleyi kuti amanyilile naga akwete mbiya syakwanila pakutaŵa nyumbajo. Naga jwalakwe akutenda yeleyi mwakusamala, mpaka yiŵe yangasawusya kuti akombole kumalisya kutaŵa nyumbajo.

2. Mwakamulana ni Luka 14:27-30, ana akusosekwa kuganichisya chichi mkanaŵe kubatisidwa?

² Ana akusaka kubatisidwa ligongo lyakuti akusamnonyela Yehofa soni kuyamichila yindu yambone yaŵatendele jwalakwe? Naga yili myoyo, nikuti akulandana ni mundu jwakusaka kutaŵa nyumba. Ligongo chichi tukusala yeleyi? Yesu jwalandenye kuŵa jwakulijiganya jwakwe ni kutaŵa nyumba mwakamulana ni maloŵe gakwe ga pa Luka 14:27-30. (Aŵalanje.) Yesu jwasalaga yayikusagopolela kuŵa jwakulijiganya jwakwe. Naga tukusaka kumkuya jwalakwe, tukusosekwa kupilila yakusawusya soni kulijima yindu yine. (Luk. 9:23-26; 12:51-53) Myoyo mkanaŵe kubatisidwa, akusosekwa kuganichisya mwakusamala yindu yachachisimana nayo. Kutenda yeleyi kuchakamuchisya kuti pachachibatisidwa chamtumichileje Mlungu mwakulupichika.

3. Ana chitukambilane chichi munganiji?

³ Kuŵa jwakulijiganya jwa Klistu jwam’batisidwe kuli kwakusosekwa mnope kupunda yakusawusya yampaka apilile soni kukusapunda yindu yaŵalesile. Kubatisidwa kukusampa mundu upile wekulungwa apano soni msogolo. Kwende tukambilane yiwusyo yakusosekwa mnope yakwamba kubatisidwa. Kutenda yeleyi kuchakamuchisya kwanga chiwusyo chakuti, “Ana ndili jwakoseka kubatisidwa?”

4. (a) Ana kulipeleka kukusagopolela chichi? (b) Ana maloŵe gagakolasile pa Mateyu 16:24 gakuti ‘kulikana’ gakusagopolela chichi?

⁴ Ana kulipeleka kukusagopolela chichi? Mkanaŵe kubatisidwa akusosekwa kulipeleka. Kulipeleka kuli kupopela kwa Yehofa kutyochela pasi pa mtima ni kumsalila kuti chachikamulichisya masengo umi wawo pakumtumichila jwalakwe mpaka kalakala. Palipeleche kwa Mlungu nikuti ‘akusaliliŵalila kapena kuti kulikana.’ (Aŵalanje Mateyu 16:24.) Pelepo akusaŵa ŵa Yehofa, wawuli upile wekulungwa mnope. (Alo. 14:8) Yeleyi yikugopolela kuti chachitendaga yindu yakumsangalasya jwalakwe ngaŵa yakusaka wawojo. Kulipeleka chili chilanga chekulungwa chakusatenda mundu kwa Mlungu. Yehofa jwangatukanganichisya kuti tutende chilangachi. Nambo patutesile chilangachi, jwalakwe akusajembecheya kuti tuchikwanilisye.—Sal. 116:12, 14.

5. Ana kulipeleka kukusalekangana chamtuli ni kubatisidwa?

⁵ Ana kulipeleka kukusalekangana chamtuli ni kubatisidwa? Kulipeleka kukusatendekwa pasikati pa wawojo ni Yehofa, soni pangali mundu jwakusamanyilila. Pele kubatisidwa kukusatendekwa pameso pa ŵandu ŵajinji, mnopemnope pamsongano wamkuli kapena waupande. Pabatisidwe, akusiŵalosya ŵane kuti ŵalipeleche kala kwa Yehofa. * Myoyo ubatiso wawo ukusiwalosya ŵane kuti wawojo akusamnonyela Yehofa Mlungu jwawo ni mtima wawo wosope, umi wawo wosope, lunda lwawo losope, soni machili gawo gosope. Ukusalosyasoni kuti akusaka kumtumichila jwalakwe mpaka kalakala.—Maliko 12:30.

6-7. Mwakamulana ni 1 Petulo 3:21, 22, ana pana magongo gaŵili gapi gakulosya kuti kubatisidwa kuli kwakusosekwa?

⁶ Ana kubatisidwa kuli kwakusosekwa? Aganichisye ya maloŵe gagakusasimanikwa pa 1 Petulo 3:21, 22, NWT. Palilembali Baibulo jikusati, “Chakulandana ni chombocho chikumkulupusyasoni jemanja apano. Chelechi chili ubatiso, (nganikuŵa kutyosya likaku lya m’chilu nambo kuŵenda chikumbumtima chambone kwa Mlungu,) mu kwimuka kuŵawe kwa Klistu Yesu. Jwalakwe ali kumkono wamlyo wa Mlungu, pakuŵa jwapite kwinani, soni malayika, maulamusi, ni machili yaŵele pasi pakwe.” Chombo chapeleche umboni wakuti Nowa ŵakwete chikulupi mwa Mlungu, myoyosoni ubatiso wawo ukusapeleka umboni kwa ŵandu kuti wawojo ŵalipeleche kwa Yehofa. Nambo ana kubatisidwa kuli kwakusosekwa? Elo kuli kwakusosekwa. Petulo jwasasile kusosekwa kwakwe. Chandanda ‘kukusakulupusya wawojo.’ Ubatiso ukusatukulupusya naga mu yitendo yetu tukusalosya kuti tukwete chikulupi mwa Yesu soni kulupilila kuti jwalakwe jwatuwilile, jwajimwiche kuŵawe ni kwawula kwinani, nambosoni kuti apano “ali kumkono wamlyo wa Mlungu.”—Aheb. 10:10, 12.

⁷ Chaŵili, patubatisidwe tukusakola “chikumbumtima chambone.” Patulipeleche kwa Mlungu soni kubatisidwa, tukusaŵa pa unasi wambone ni jwalakwe. Ligongo lyakuti twapitikwiche mtima yisyesyene soni kulupilila kuti ŵatuwombwele, Mlungu akusatukululuchila yakulemwa yetu. Myoyo tukusakola chikumbumtima chambone pameso pakwe.

8. Ana ni ligongo lyekulungwa lyapi lyampaka lyatendekasye kubatisidwa?

⁸ Ana ni ligongo lyapi lyampaka lyatendekasye kuganisya ya kubatisidwa? Ligongo lyakulijiganya Baibulo mwakusamala, amanyilile yejinji yakwamba Yehofa. Yindu yalijiganyisyeyo yatendekasisye kuti amnonyeleje mnope jwalakwe. Kumnonyela kwawo Yehofa lili ligongo lyekulungwa lyakwatendekasya kubatisidwa.

9. Mwakamulana ni Mateyu 28:19, 20, ana kubatisidwa mu lina lya Atati, ni lya Mwanache, ni lya msimu weswela kukusagopolela chichi?

⁹ Ligongo line lyakwatendekasya kuganisya yakubatisidwa lili kulupilila yindu yalijiganyisye m’Baibulo. Aganichisye yaŵaŵechete Yesu paŵapelekaga lilamusi lyakwamba kwajiganya ŵandu.  (Aŵalanje Mateyu 28:19, 20.) Mwakamulana ni yaŵasasile Yesuyi, ŵandu akusasosekwa kubatisidwa mu ‘lina lya Atati, ni lya Mwanache, ni lya msimu weswela.’ Ana yeleyi yagopolelaga chichi? Akusosekwa kulupilila ni mtima wosope yajikusasala Baibulo yakwamba Yehofa, Mwanache jwakwe Yesu, soni msimu weswela. Yajikusasala Baibuloyi yili yakusosekwa mnope soni mpaka yayiche pamtima. (Aheb. 4:12) Kwende tulole yine mwa yinduyi.

10-11. Ana ŵalijiganyisye soni kulupilila yamtuli yakwamba Atati?

¹⁰ Aganichisye paŵalijiganyaga yindu yakwamba Atati ŵetu ŵakwinani ŵele ‘lina lyawo lili Yehofa.’ Ali ‘ŵakwinani mnope ŵakulamulila pachilambo chosope chapasi,’ soni ŵalakwe jikape ni ŵali ‘Mlungu jwakuwona.’ (Sal. 83:18; Yes. 37:16, NWT) Jwalakwe ni juŵatupanganyisye soni ‘chikulupusyo chikusatyochela kwa ŵalakwe Ambuje [“Yehofa,” NWT].’ (Sal. 3:8; 36:9) Jwalakwe jwalinganyisye yakutukulupusya ku ulemwa ni chiwa soni ŵatupele chembecheyo cha umi wangamala. (Yoh. 17:3) Kulipeleka kwawo soni kubatisidwa kuchilosya kuti ali jwa Mboni sya Yehofa. (Yes. 43:10-12) Chachiŵa mbali ja ŵakutumichila ŵa Yehofa ŵa pa chilambo chosope ŵakusasangalala kumanyika ni lina lya Mlungu soni kulimanyikasya kwa ŵane.—Sal. 86:12.

¹¹ Kusala yisyene uli upile wekulungwa kupikanichisya yajikusajiganya Baibulo yakwamba Atatiŵa. Pakulupilile yajikusasala Baibuloyi, yikusiyatendekasya kulipeleka kwa Yehofa soni kubatisidwa.

12-13. Ana ŵalijiganyisye soni kulupilila yamtuli yakwamba Yesu?

¹² Ana ŵatesile yamtuli paŵalijiganyisye yakwamba Mwanache? Yesu ali mundu jwaŵili jwakusosekwa mnope m’chilambo chosope. Mwakusachilila, jwalakwe jwapeleche umi wakwe kuti atuwombole. Yitendo yetu payikulosya kuti tukusakulupilila kuti jwalakwe ŵatuwombwele, nikuti mpaka tukululuchidwe yakulemwa yetu, kuŵa najo paunasi wambone, soni kupata umi wangamala. (Yoh. 3:16) Yesu ali Jwamkulungwa jwa Ŵambopesi. Jwalakwe akusasaka kuti tuwuwoneje umbone wakutuwombolaku soni kuti tuŵeje paunasi wambone ni Mlungu. (Aheb. 4:15; 7:24, 25) Mpela Mwenye jwa Uchimwene wa Mlungu, Yehofa chachimkamulichisya masengo jwalakwe pakuswejesya lina lyakwe, kutyosya yakusakala nambosoni kuyikasya Paladaiso. (Mat. 6:9, 10; Chiw. 11:15) Yesu ali chisyasyo chambone chatukusosekwa kuya. (1 Pet. 2:21) Jwatupele chisyasyo chambone mwakukamulichisya masengo umi wakwe pakutenda yakusasaka Mlungu.—Yoh. 4:34.

¹³ Pajitichisye yajikusajiganya Baibulo yakwamba Yesu, akusatanda kumnonyela mnope Mwanache jwa Mlunguju. Yeleyo yikusiyatendekasya kukamulichisya masengo umi wawo pakumtumichila Mlungu mpela muŵatendele Yesu. Yakuyichisya yakwe, yikusiyalimbikasya kuti alipeleche kwa Yehofa soni kubatisidwa.

14-15. Ana ŵalijiganyisye soni kulupilila yamtuli yakwamba msimu weswela?

¹⁴ Ana ŵatandite ganisya yamtuli ali paŵalijiganyisye yisyesyene yakwamba msimu weswela? Msimuwu nganiwuŵa mundu, nambo gali machili gakukamula masengo ga Mlungu. Yehofa ŵakamulichisye masengo msimu weswela paŵalembaga Baibulo. Nambosoni msimuwu ukusatukamuchisya kupikanichisya soni kamulichisya masengo yatukusaŵalanga m’Baibulo. (Yoh. 14:26; 2 Pet. 1:21) Kupitila mwa msimu weswela Yehofa akusatupa “machili gekulungwa.” (2 Akoli. 4:7) Msimuwu ukusatupa machili kuti tukombole kulalichila, kulimbana ni yakulingwa soni yakutengusya, nambosoni kupilila yakusawusya. ‘Msimu wa Mlungu ukusatutendekasyasoni’ kuti tulosyeje ndamo syambone. (Aga. 5:22) Mwakusachilila, Mlungu akusapeleka msimu wakwe kwa ŵandu ŵakusamdalila soni ŵakusaŵenda msimuwu.—Luk. 11:13.

¹⁵ Kusala yisyene, yili yakulimbikasya kumanyilila kuti msimu weswela mpaka wakamuchisye ŵakulambila ŵa Yehofa kuti akombole kumtumichila chenene Mlungu. Pakulupilile yindu yalijiganyisye yakwamba msimu weswela,  yichalimbikasya kuti alipeleche kwa Mlungu soni kubatisidwa.

16. Ana pakwikana apano tulijiganyisye chichi?

¹⁶ Nganisyo syawo syakusaka kulipeleka kwa Mlungu nambosoni kubatisidwa sili syakusosekwa mnope. Mpela mwatuyiwonele munganiji, akusosekwa kumanyilila yakusawusya yachachisimana nayo soni yindu yakusosekwa kulijima. Nambope yindu yambone yayikwika kusogoloku yili yakusosekwa mnope kupunda yindu yachachilijima. Kubatisidwa mpaka kwakulupusye, soni mpaka kwatendekasye kola chikumbumtima chambone pameso pa Mlungu. Akusosekwa kubatisidwa ligongo lyakuti akusamnonyela Yehofa Mlungu. Akusosekwa kukulupililasoni ni mtima wawo wosope yalijiganyisye yakwamba Atati, Mwanache, soni msimu weswela. Panyuma pakuganichisya yindu yatukambileneyi ana mpaka ajanje chamtuli chiwusyo achi, “Ana ndili jwakoseka kubatisidwa?”

17. Ana ni yindu yine yapi yakusosekwa kutenda mundu mkanaŵe kubatisidwa?

¹⁷ Naga akulipikana kuti ali ŵakoseka kubatisidwa, nikuti yili yangakayikasya kuti atesile yindu yakwakamuchisya kuŵa paunasi wambone ni Yehofa. * Ligongo lyakuti akusalijiganya Baibulo ndaŵi syosope, yeleyi yatendekasisye kuti ammanyilile chenene Yehofa soni Yesu. Mwangakayichila akwete chikulupi. (Aheb. 11:6) Akusakulupililasoni yindu yaŵayisasile Yehofa m’Baibulo kuti chachitenda soni kuti mbopesi ja Yesu mpaka jakulupusye ku ulemwa ni chiwa. Ŵalesile yakulemwa yawo soni kulitendela chanasa ligongo lya yakulemwayo. Kupwatika pelepa ŵamŵendile Yehofa kuti ŵakululuchile. Ŵapitikwiche mtima mwakuleka kutenda yindu yakusakala ni kutanda kutenda yayikusamsangalasya Mlungu. (Mase. 3:19) Ali ŵakusachilila kwasalila ŵane yakwamba chikulupi chawo. Soni ŵaŵajilwe kuŵa jwakulalichila jwangabatisidwa nambosoni ŵatandite kulalichila ni mpingo. (Mat. 24:14) Yehofa akusiŵanyadila wawojo pakwawona ali mkukwanilisya yeleyi. Yosope yatesileyi yitendekasisye kuti amsangalasye Yehofa.—Mis. 27:11.

18. Ana akusosekwa kutenda chindu chine chapi mkanabatisidwe?

¹⁸ Mkanabatisidwe, akusosekwa kutenda yindu yineyakwe. Mpela mwatuyiwonele kundanda kula, akusosekwa kulipeleka kwa Mlungu. Mpaka atende yeleyi mwakupopela kwa jwalakwe pali pajika, nikumsalila kuti akusaka kamulichisya masengo umi wawo kutenda yakusasaka Mlungu. (1 Pet. 4:2) Kaneko akusosekwa kumsalila jwakulondesya masengo ga achakulungwa kuti akusaka kubatisidwa. Jwalakwe chachaŵenda achakulungwa ŵane kuti asimane ni wawojo. Ngakusosekwa kudandawula kuti yichamalila wuli pachachisimanaga ni achakulungwaŵa. Mwangakayichila, achakulungwaŵa akusiŵamanyilila chenene wawojo soni akusiŵanonyelaga. Jemanjaji chachikambilana ni wawojo yiwundo ya m’Baibulo yaŵele ali mkulijiganya. Akusagambaga kusaka kumanyilila naga wawojo akupikanichisya yijiganyo ya m’Malemba yakwamba kusosekwa  kwa kulipeleka soni kubatisidwa. Naga jemanjaji ayiweni kuti wawojo akuŵajilwa, chachamanyisya kuti mpaka abatisidwe pamsongano wa upande kapena wamkuli.

19-20. Ana chachisosekwa kutenda chichi ali abatisidwe, soni mpaka atende chamtuli yeleyo?

¹⁹ Ana chachisosekwa kutenda chichi pachachibatisidwa? * Akumbuchileje kuti kulipeleka chili chilanga chakusajembecheya Yehofa kuti wawojo akwanilisye. Myoyo, pachachibatisidwa chachisosekwa kutenda yindu mwakamulana ni kulipeleka kwawo. Ana mpaka atende chamtuli yeleyi?

²⁰ Atendeje yindu yimpepe ni mpingo wawo. Pachachibatisidwa chachitendelaga yindu yimpepe ni ‘ŵakulupilila achimjawo.’ (1 Pet. 2:17) Abale ni alongo ŵa mumpingo chachiŵa mpela ŵandu ŵa m’liŵasa lyawo. Kusimanikwa pamisongano ndaŵi syosope, kuchakamuchisya kuti alimbisye unasi wawo ni jemanjajo. Aŵalanjeje Maloŵe ga Mlungu soni kugaganichisya lisiku lililyose. (Sal. 1:1, 2) Paŵalasile mbali jine ja m’Baibulo, akoleje ndaŵi jaganichisya mwakusokoka yaŵalasileyo. Yeleyi yichakamuchisya kuti maloŵego gayicheje pamtima. ‘Apopeleje’ mwangalechesya. (Mat. 26:41) Mapopelo gawo gakutyochela pasi pamtima gachakamuchisya kuti amŵandichile Yehofa. ‘Asosesoseje . . . chandanda Uchimwene wa Mlungu.’ (Mat. 6:33) Mpaka atende yeleyi mwakugawona masengo gakulalichila kuŵa gakusosekwa mnope paumi wawo. Naga akulalichila ndaŵi syosope, chikulupi chawo chichiŵa chakulimba mnope, soni chachakamuchisya ŵane kola chembecheyo cha umi wangamala.—1 Tim. 4:16.

21. Ana kubatisidwa kuchapa upile wamtuli?

²¹ Kusagula kulipeleka kwa Yehofa soni kubatisidwa, chili chindu chakusosekwa mnope champaka atende paumi wawo. Yili yisyene kuti kutenda yeleyi kukusasaka yejinji. Nambo ana kulipeleka soni kubatisidwa kuli kwakusosekwa kupunda yakusawusya yampaka asimane nayo? Elo. Yakusawusya yiliyose ya m’chilambochi yikusaŵa “ya ndaŵi japanandi.” (2 Akoli. 4:17) Mwakulekangana ni yeleyi, kubatisidwa kwawo kuchapa upile wakola umi wambone mnope apano soni “umi usyesyene” msogolo. (1 Tim. 6:19) Myoyo, tukwaŵenda kuti chonde ajiganichisye chenene nganiji, soni akusosekwa kupopela pakwanga chiwusyo chakuti, “Ana ndili jwakoseka kubatisidwa?”