1. Mbi mutu kafueti vanga ava kutona kutunga nzo?

YINDULABU mutu widi makani ma kutunga nzo. Bukiedika ti mawu mansundula ti kafueti tona kusumba biuma muingi katona kutunga? Ndamba. Kibila nandi kafueti zabi theti ntindu nzo kantomba kutunga ayi kafueti fiongunina buboti boti widi zimbongo zifuana muingi kumanisa kutunga nzo beni.

2. Dedi bummonisina Luka 14:27-30, mambu mbi wufueti yindula buboti ava kubotama?

² Ngie widi mu kuyindula kubotama? Makani ma kubotama bamfuanikisa mawu na mutu wuntomba kutunga nzo. Diawu buboti kukifiongunina boti luzolo luaku mu Yave, luawu lu kuvanga kutomba kubotama. Yindula mambu Yesu katuba mu Luka 14:27-30. (Tanga.) Yesu waba tubila mbi binsundula kuba nlandikini’andi . Nandi wutuba ti boti tuntomba kuba minlandikini miandi, tufueti ba bakubama muingi kukindama mu mambu maphasi ayi khumbu zinkaka kubika kuvanga biuma tunzolanga beni. (Luka 9:23-26; 12:51-53) Diawu ava kubotama, wufueti yindula buboti mu mamoso mantombulu muingi kuba nlandikini wu Yesu. Ayi ngie kubotama, wala ba wukubama muingi kutatamana kusadila Yave mu luzingu luaku loso.

3. Mbi tunkuiza longuka mu dilongi adidi?

³ Bukiedika ti vadi ndandu yi kuba nlandikini wu Klisto ayi kubotama? Ngete, ndandu yiwombo wulenda baka—tona kuandi mu thangu ayiyi, nate mu bilumbu binkuiza. Mu dilongi adidi, tunkuiza tubila biuvu biwombo binkinza bitedi kubotama. Ayi mimvutu beni, minkuiza kusadisa kuzaba boti ngie makubama muingi kubotama voti ndamba.

4. (a) Mbi binsundula kukivana (b) Dedi bummonisina Matai 16:24 mbi binsundula kikuma ‘kukimanga’?

⁴ Mbi binsundula kukivana? Kukivana kunsundula kukimanga muingi kusadila Yave. Vayi buidi wulenda vangila mawu? Mu kuvanga nsambu kuidi Yave ayi kunkanikisa ti tona mu thangu beni, ngie tidi kunsadila mu luzingu luaku loso. Thangu mbi fueti vanga nsambu beni? Ngie fueti vanga nsambu beni va ngieveka ava kubotama mu nlangu. Kuvanga mawu, mansundula ti ngie ma ‘kukimanga’. (Tanga Matai 16:24.) Kukivana kuidi Yave luidi luaku lunneni, kibila tona mu kilumbu beni ngie weka mu thuadusulu yi naveka Yave. (Loma 14:8) Mvandi yidi tsila wuvanga kuidi Nzambi ti ngie tidi kunsadila ayi kunkuangidika. Yave kakuikanga ko ni mutu wumueka kavanga mawu, vayi befu kuvanga tsila beni, Yave wuntombanga tuvanga mangolo muingi kuzingila mu mawu.— Minkunga 116:12, 14.

5. Disuasana mbi didi kukivana ayi kubotama?

⁵ Disuasana mbi didi kukivana ayi kubotama? Kukivana widi nsambu wumvanga va ngieveka, ayi mu nsambu beni ngie wumvana tsila mu kukanikisa Yave ti wunkuiza nsadila. Vayi kubotama didi diambu wunkuiza vangila va meso ma batu bawombo ayi mawu manluta vangiminanga mu zikhutukunu zinneni tumbanga. Bo wumbotama, buawu wummonisina kuidi bankaka ti ngie wukivana kuidi Yave. * Ayi kubotama kunsadisanga batu boso bazaba ti ngie wunzolanga Yave mu ntim’aku woso, mu muel’aku woso, mu mabanza maku moso, mu ngolo ziaku zioso ayi widi wukubama muingi kunsadila mu luzingu luaku loso.— Malako 12:30.

6-7. Dedi bummonisina 1 Petelo 3:18-22, bibila mbi biodi bimmonisa nkinza wu kubotama?

⁶ Kibila mbi tufueti botimina? Theti kubotama kulenda ‘kuvukisa’. Vayi muingi mawu mamonika wufueti ba kiminu mu khudulu Yesu ayi kumonisa ti wunkikininanga ti nandi wufua mu kibila kiaku, vayi wuyiza vulubuka ayi bubu widi va khonzo yi lubakala lu Yave ayi widi Ntinu mu Kintinu ki Nzambi. Tala mambu Kibibila kintuba mu 1 Petelo 3:18-22. (Tanga.) Kiawu kintuba ti nzaza kiba kivisa kuidi batu boso ti Nowa wuba kiminu mu Yave. Bobuawu mvandi kubotama kidi kivisa kimmonisa kuidi bankaka ti ngie ma kivana kuidi Yave.

⁷ Dimuadi, kubotama kutusadisanga kuba “kilunzi kimboti.” Bo tukivana ayi kubotama, befu tummonisanga ti tuidi kiminu mu khudulu yi Yesu ayi tunyongina masumu mitu, mawu ma tusadisanga kuba kikundi kingolo na Yave kibila nandi be lemvukila masumu mitu. Ayi mu kibila akioki, tunkuiza banga kilunzi kimboti va meso ma Yave.

8. Kibila mbi kinkinza wufueti botimina?

⁸ Kibila mbi kinkinza fueti bakila makani ma kubotama? Mu ndongukulu’aku yi kibibila, ngie wulonguka mawombo matedi Yave—dedi zikhadulu ziandi ayi phila kamvangilanga mambu. Kuzaba mawu manyikuna mabanza maku ayi luzolo luaku mu Yave lubuelama. Diawu, luzolo mu Yave kiawu kibila kilutidi nkinza wufueti bakila makani ma kubotama.

9. Dedi bummonisina Matai 28:19, 20 mbi binsundula kubotama mu dizina di Tata, Muana ayi Phevi yinlongo?

⁹ Kibila kinkaka kilenda kukindisa kubotama, kidi malongi ma Kibibila wulonguka. Yindula mu mambu Yesu katuba bo kavana nsiku wu kuvanga minlonguki. (Tanga Matai 28:19, 20.) Nandi wutuba ti minlandikini miandi bafueti botama mu “dizina di Tata, di Muana ayi di phevi yinlongo.” Mbi mawu mansudula? Mansudula ti ngie wufueti kikinina  kiedika kitedi Yave; Yesu; ayi phevi yinlongo. Kuzaba mawu madi beni nkiza, kibila malenda nyikuna mabanza maku. (Ebeleo 4:12) Diawu tuentubila matedi mawu.

10-11. Kiedika mbi kitedi Tata wulonguka ayi wufueti kikinina?

¹⁰ Ngie wuntebuka moyo mu thangu wulonguka kiedika kitedi Tata? Buka ngie wulonguka va thonono ti “dizina diandi Yave’’, nandi “lutidi Zangama mu nza yoso,” ayi nandi to “Nzambi yikiedika.” (Minkunga 83:18; Yesaya 37:16) Mvandi wulonguka ti Yave nandi Mvang’itu, ayi “phulusu kuidi Yave yimbanga.” (Minkunga 3:8; 36:9) Bosi ngie wulonguka ti nandi wufila Muan’andi muingi kafuila mu kibila kitu, muingi kutu kula mu masumu ayi kutu vana kivuvu ki kuzinga mvu ka mvu. (Yoane 17:3) Diawu ngie kukivana ayi kubotama, wunkuiza monisa ti weka Mbangi yi Yave. (Yesaya 43:10-12) Ayi ngie wunkuiza ba wumueka mu dikanda di Nzambi didi mu nza yimvimba. Kadika mutu mu dikanda beni, widi mayangi mu kuba wuzakana Mbangi yi Yave.— Minkunga 86:12.

¹¹ Luidi luaku lunneni beni kuvisa kiedika kitedi Tata! Ngie kuvisa ayi kukikinina kiedika beni, mala kusadisa kukivana kuidi Yave ayi kubotama.

12-13. Kiedika mbi kitedi Muana ngie wuzaba ayi fueti kikinina?

¹² Buidi ngiewu wumuena bo wulonguka kiedika kitedi Muana? Yesu nandi mutu wumuadi wulutidi nkinza mu nza yoso. Nandi wuvana luzingu luandi mu kibila kitu mu khambu kuiku. Mu thangu tummonisa mu mavanga mitu ti tuidi kiminu mu khudulu yi Yesu, tumbakanga nlemvu wu masumu, kikundi kitu na Nzambi kimbuelamanga kukinda ayi tuidi luaku lu kuzinga mvu ka mva. (Yoane 3:16) Yesu bubu widi Nganga Nzambi ku diyilu. Nandi tidi ku tusadisa mu nzila khudulu kuvutuka kuba kithuadi na Nzambi. (Ebeleo 4:15; 7:24, 25) Yesu widi Ntinu mu Kitinu ki Nzambi, ayi nandi wela vedisa dizina di Nzambi, wala manisa ziphasi ayi wala tuadisa lusakumunu luwombo ku Paladizu. (Matai 6:9, 10; Nzaikusu 11:15) Yesu wutubikila kifuani kiandi. (1 Petelo 2:21) Nandi wutulonga mu kifuani kiandi bu kusadila luzingu luitu muingi kuvanga luzolo lu Yave.— Yoane 4:34.

¹³ Ngie kukikinina mambu Kibibila kinlonga matedi Muana, luzolo luaku mu Yesu muana Nzambi lunkuiza buelama. Ayi luzolo beni luala buela kukindisa kuvanga luzolo lu Nzambi banga bo Yesu kavangila. Mvandi lunkuiza kuvana phuila yi kukivana kuidi Yave ayi kubotama.

14-15. Kiedika mbi kitedi phevi yinlongo ngie wulonguka ayi fueti kikinina?

¹⁴ Buidi ngiewu wumuena bo wulonguka kiedika kitedi phevi yinlongo? Phevi yinlongo madi mangolo mamfuminanga kuidi Yave, yisi ko mutu. Yave wusadila yawu muingi kutuadisa batu basonika Kibibila, ayi yawu yi tusadisanga kuvisa ayi kuzingila mu mambu tunlongukanga mu Kibibila. (Yoane 14:26; 2 Petelo 1:21) Mu nzila phevi beni, Yave wutuvananga ‘mangolo malutidi’. (2 Kolinto 4:7) Mvandi phevi yinlongo yi tusadisanga kuba mangolo mu kisalu ki kusamuna, kukindama mu zithotolo, mu ziphasi ayi bo tuidi mu kiunda. Ayi yawu yi tusadisanga kumonisa zikhadulu zimboti voti “mbutu wu phevi”. (Ngalatia 5:22) Nzambi wumvananga phevi’andi kuidi batu ba kumfiatilanga ayi ba kundindanga yawu.— Luka 11:13.

¹⁵ Ma tubombanga beni kuzaba ti tulenda fiatila mu lusalusu lu phevi yinlongo bo tunsadila Yave! Diawu, ngie kukikinina kiedika Kibibila kinlonga mu matedi phevi yinlongo, wala baka mangolo ma kukivana kuidi Nzambi ayi kubotama.

16. Mambu mbi tuma tubila kumbusa mu dilongi adidi?

 ¹⁶ Makani ma kukivana ayi kubotama masi ko makani ma kusakinina. Ayi dedi bo tuma muena, ngie fueti ba wukubama mu kukikinina kubika biuma wunzolanga bilenda kutula nkaku kukindama mu zithotolo ayi mambu mankaka maphasi. Angi bika kumona boma, kibila lusakumunu wala tambula lulutidi beni na zithotolo zioso wulenda viokila. Kubotama kulenda kuvukisa ayi kusadisa kuba kilunzi kidiodila va meso ma Yave. Vayi tebuka moyo ti luzolo luaku mu Yave, kiawu kibila kilutidi nkinza kifueti kuvanga kubotama. Ngie mvaku fueti kikinina mu ntima woso kiedika malonguka kitedi Tata, Muana ayi phevi yinlongo. Buabu, mu kutala mamoso tuma tubila kumbusa, mvutu mbi wulenda vana mu kiuvu akiki, “Minu yima fuana kubotama?”

17. Mbi ngie wufueti nunga kuvanga ava kubotama?

¹⁷ Boti ngie wunkikinina ti mafuana kubotama, buna kiminu ayi kikundi kiaku na Yave kieka beni kikinda ayi mawombo ngie mavanga muingi kukindisa kiawu. * Dedi, mu ndongokulu’aku yi Kibibila, ngie wulonguka mawombo matedi Yave ayi Yesu. (Ebeleo 11:6) Mvandi widi beni lufiatu mu zikhanu zi Yave zidi mu Kibibila, ayi widi kiminu ti khudulu yi Yesu, yawu to yilenda kuvukisa mu masumu ayi mu lufua. Diawu wunyongina masumu maku, wudinda nlemvu mu mawu kuidi Yave ayi wubika phila luzingu waba natanga muingi kuzingila mu phila yinkuangidika Nzambi. (Mavanga 3:19) Ngie wuyangalala beni kulonga bankaka matedi Yave, diawu wukivanina muingi kuba nsamuni wukhambu botama. (Matai 24:14) Bukiedika, ngie widi mu kukuangidika ntima wu Yave mu mamoso manunga kuvanga.— Zingana 27:11.

18. Mambu mbi mankaka wufueti vanga ava kubotama?

¹⁸ Ava kubotama, ngie fueti vanga mambu mankaka mankinza. Dedi bo tuma muena, ngie fueti kukivana kuidi Nzambi mu nsambu ayi mu nsambu beni wumvangila va ngieveka fueti kanikisa Yave ti ngie wunkuiza vanga luzolo luandi mu luzingu luaku loso. (1 Petelo 4:2) Bosi zabikisa ntuadisi wu dingumba di bakulutu ba kimvuka ti ngie tidi kubotama. Bosi nandi wala dinda lusalusu lu bakulutu bankaka muingi bavutukila yaku biuvu bitedi kubotama. Vayi bika kumona boma, kibila madi mambu ngie wulonguka ayi zikhomba beni ba kuzebi buboti ayi ba kuzolanga beni. Bakulutu beni bankuiza vangila mawu muingi bazaba ti ngie wuvisa malongi matheti ma Kibibila ayi boti ngie zebi nkinza widi kukivana ayi kubotama. Ba kumona ti weka wukubama, bawu bala kuzabikisa ti ngie wulenda kubama muingi kubotama mu lukutukunu lunneni lunkuiza.

19-20. Mbi fueti vanga bo wummana kubotama, ayi buidi wulenda vangila mawu?

¹⁹ Ngie mana kubotama, mbi ngie fueti vanga? * Fueti vanga mangolo muingi kuzingila mu tsila wuvanga kuidi Yave. Kibila Yave wuntomba ngie wusadila mambu wunkanikisa. Buidi ngie wulenda nungina kuvanga mawu?

²⁰ Bo wummana kubotama, ngie wunkuiza ba mu khati dikanga di Nzambi didi mu nza yimvimba. Diawu bika kutatuka kimvuka. (1 Petelo 2:17) Zikhomba mu kimvuka, bankuiza ba dikanda diaku di kiphevi ayi ngie kutatamana kulandakana zikhutukunu, wala kindisa kikundi kiaku na zikhomba. Diambu dinkaka fueti vanga didi, kutanga Kibibila kadika kilumbu ayi kuyindula mambu wuntanga. (Minkunga 1:1, 2) Bo wumbotula thangu muingi kuyindula ma wuntanga, buawu diambu di Nzambi diala luta nyikunina ntim’aku. Mvandi ‘wufueti tatamana kusambila.’ (Matai 26:41) Ngie kutatamana kusambila, buawu wunkuiza luta fikimina Yave. Ayi “tomba theti Kintinu ki Nzambi.” (Matai 6:33) Phila wulenda vangila mawu yidi, mu kutula kisalu ki kusamuna va theti mu luzingu luaku. Bo wumbuela kifuza kiaku mu kisalu ki kusamuna, buawu kiminu kiaku kimbuelimina. Ayi widi luaku lu kusadisa bankaka kubakula nzila yikiedika muingi babaka luzingu lu mvu ka mvu.—1 Timoteo 4:16.

21. Ndandu mbi wela baka ngie kubotama?

²¹ Makani ma kukivana kuidi Yave ayi kubotama, mawu makani malutidi nkinza wulenda baka mu luzingu luaku loso. Bukiedika ti vankuiza tombulu kubika biuma biwombo ngie wunzolanga vayi bi kutula nkaku. Angi kuvanga mawu, kuala kutuadisila ndandu yiwombo ayi ziosokua ziphasi wulenda mona, mu mua thangu to wala muena ziawu. (2 Kolinto 4:17) Mvandi, kubotama kulenda kuvana mayangi mu luzingu mu thangu ayiyi ayi kubaka “luzingu lukiedika” mu bilumbu binkuiza kuntuala. (1 Timoteo 6:19) Diawu, yindula buboti ayi sambila matedi mvutu wumvana mu kiuvu akiki: “Minu yima fuana kubotama?”