1. ¿Xi caquiiñeʼ guni ti binni ante gucuí ti yoo?

BIXUIʼLÚ racalaʼdxiʼ ti hombre gucuí ti yoo ne maʼ nanna ximodo chigúnini. Peru ¿ñee oraqueca zisibe material ne zuzulú zucuibe yoo ca la? Coʼ. Purtiʼ ante guzulube, caquiiñeʼ gúnibe ti cosa nabé risaca: gúʼyabe pabiáʼ bueltu caquiiñebe. ¿Xiñee yaʼ? Purtiʼ caquiiñeʼ chuʼbe seguru nápabe biaʼ bueltu ni caquiiñebe para gucuibe ni. Pa gúnibe ni bizéʼtenu riʼ, qué zaca nagana para laabe gucuibe yoo ca.

2. Casi ná Lucas 14:27-30, ¿xi caquiiñeʼ guiníʼ ique chaahuiluʼ ante chuʼnísaluʼ?

² ¿Ñee guizáʼ nadxiiluʼ Jehová, rudiiluʼ xquixe peʼ laa ne pur nga caníʼ íqueluʼ chuʼnísaluʼ la? Pa zacá ni, cazaacaluʼ ni cazaaca hombre ni racalaʼdxiʼ gucuí ti yoo. ¿Xiñee yaʼ? Guníʼ ique ca diidxaʼ ni guníʼ Jesús ni zeeda lu libru stiʼ Lucas 14:27-30 (biindaʼ ni). Laabe guniʼbe xi naquiiñeʼ guni ti discípulo stibe: caquiiñeʼ chuʼnu dispuestu gúninu «gastu», o gudxiilunu guendanagana ne gúninu sacrificiu (Luc. 9:23-26; 12:51-53). Nga runi, ante chuʼnísaluʼ, caquiiñeʼ guiníʼ ique chaahuiluʼ xi guiráʼ ridxaagalú ti binni ni naca xpinni Cristu. Ne óraca ziuuluʼ listu para gúniluʼ ni ná Dios despué de chuʼnísaluʼ.

3. ¿Xi zadúʼyanu lu artículo riʼ?

³ Maʼ bidúʼyanu xi guiráʼ naquiiñeʼ guni binni ni racalaʼdxiʼ chúʼnisa, peru ¿ñee risaca peʼ guni tobi guiráʼ nga la? ¡Risácani pue! Ora riuunisa tuuxa ricaa stale ndaayaʼ yanna ne lu ca dxi ni zeeda ca. Lu artículo riʼ zadúʼyanu caadxi pregunta nabé risaca ni caníʼ de guendariuunisa. Zacanécani lii gánnaluʼ pa maʼ nuuluʼ listu para chuʼnísaluʼ.

4. a) ¿Xii nga dedicación? b) Casi ná Mateo 16:24, ¿xi riníʼ maʼ qué zabáninu para laanu?

⁴ ¿Xii nga dedicación? Laani nga ni caquiiñeʼ guni tuuxa ante chúʼnisa. Dedicación nga gúniluʼ ti oración Jehová de guidubi ladxidoʼloʼ ra gábiluʼ laa zaquiiñeluʼ xquendanabániluʼ para gúniluʼ ni ná biaʼ dxi guibániluʼ. Nga runi, ora raca dedicar tuuxa Jehová maʼ qué zabani para laa (biindaʼ Mateo 16:24). Ne dede dxi ca maʼ stiʼ Jehová binni ca, ne ti privilegiu guizáʼ naroʼbaʼ ni (Rom. 14:8). Lu dedicación ca zábiluʼ Jehová dede dxi ca zúniluʼ ni nabe, ne nga nga ni jma risaca para lii ne cadi ni racaláʼdxiluʼ. Ne laani nga ti promesa ni rúniluʼ Dios, ne qué runi obligar Jehová laanu gúninu ni. Peru ora maʼ bíninu promesa ca, ribézabe guni cumplirnu ni (Sal. 116:12, 14).

5. ¿Xiñee maʼ gadxé nga dedicación de guendariuunisa?

⁵ ¿Xiñee maʼ gadxé nga dedicación de guendariuunisa? Dedicación nga ti oración ni gúniluʼ Jehová stúbiluʼ ra gábiluʼ laa cudiiluʼ xquendanabániluʼ laa. Peru guendariuunisa ca rácani nezalú stale binni, ne jma stale biaje raca ni lu ti asamblea. Ora riuunísaluʼ, rusihuínniluʼ nezalú binni maʼ guca dedicarluʼ Jehová. * Ne culuiʼluʼ laacabe nadxiiluʼ Jehová de guidubi ladxidoʼloʼ, xhiálmaluʼ, xquendabiaaniluʼ ne stipa stiluʼ, ne maʼ gudixhe íqueluʼ gúniluʼ ni nabe biaʼ dxi guibániluʼ (Mar. 12:30).

6, 7. Casi ná 1 Pedro 3:18-22, ¿xi chupa razón rusihuinni caquiiñeʼ peʼ chuʼnísanu?

⁶ ¿Ñee caquiiñeʼ peʼ chúʼnisa binni la? Guníʼ ique ca diidxaʼ ni zeeda lu 1 Pedro 3:18-22 (biindaʼ ni). Cásica guca arca ni bizáʼ Noé ti prueba ni bisihuinni nápabe fe, dxi chuʼnísaluʼ rusihuínniluʼ maʼ guca dedicarluʼ Jehová. Peru ¿ñee caquiiñeʼ peʼ chúʼnisa binni la? Caquiiñeʼ, Pedro bizeeteʼ gunáʼ nga primé razón ni rusihuinni caquiiñeʼ peʼ chúʼnisa binni, laa guníʼ: «Bautismo» nga «ni culá laatu». Zanda gulá guendariuunisa laanu pa gusihuínninu né ca ni rúninu nápanu fe Jesús ne runi crenu gútibe pur laanu, biásabe de lade gueʼtuʼ ne guyebe guibáʼ, ne yanna maʼ zúbabe «ladu derechu stiʼ Dios».

⁷ Guiropa razón ni rusihuinni xiñee risaca chuʼnísanu nga purtiʼ racaneni laanu gápanu «ti conciencia nayá». Ora raca dedicarnu Jehová ne riuʼnísanu, ruzulú riuʼnu jma gaxha de laabe. Cumu maʼ guca arrepentirnu de guidubi ladxidoʼno ne nápanu fe guti Cristu pur laanu, runi perdonar Dios ca pecadu stinu. Zacatiʼ nga zanda gápanu ti conciencia nayá nezalú Dios.

8. ¿Xi naquiiñeʼ gucaa laanu chuʼnísanu?

⁸ ¿Xi naquiiñeʼ gucaa laanu chuʼnísanu? Cumu runi estudiarluʼ Biblia, maʼ biziidiluʼ stale cosa de Jehová, ximodo laabe ne xi rúnibe. Guiráʼ ni maʼ biziidiluʼ maʼ yendácani ndaaniʼ ladxidoʼloʼ ne maʼ bicaacani lii gannaxhiiluʼ laabe de guidubi ladxidoʼloʼ. Nga runi, ni zucaa lii chuʼnísaluʼ nga guendarannaxhii ni nápaluʼ Jehová.

9. Casi ná Mateo 28:19, 20, ¿xi riníʼ chúʼnisa binni lu lá Bixhoze, lu lá Xiiñiʼ ne lu lá espíritu santu?

⁹ Ti cosa ni zucaa lii chuʼnísaluʼ nga guiráʼ ca ni maʼ biziidiluʼ de lu Biblia. Guníʼ ique ni guníʼ Jesús dxi gudxi ca xpinni gacanecaʼ binni gaca discípulo (biindaʼ Mateo 28:19, 20). Jesús guníʼ ca diidxaʼ  riʼ: «Lacuunisa laacaʼ lu lá Bixhozeʼ, lu lá Xiiñiʼ ne lu lá espíritu santu». Ndiʼ riníʼ guni creluʼ de guidubi ladxidoʼloʼ ni rusiidiʼ Biblia de Jehová, de Jesús Xiiñibe ne de espíritu santu. Napa ca ni rusiidiʼ Biblia poder ne zanda chindácani dede ndaaniʼ ladxidoʼno (Heb. 4:12). Guidúʼyanu caadxi cosa de ca ni rusiidiʼ Biblia.

10, 11. ¿Xi guiráʼ maʼ biziidiluʼ lu Biblia de Bixhózenu ni nuu guibáʼ?

¹⁰ Guníʼ ique xi guiráʼ maʼ biziidiluʼ de Bixhózenu ni nuu guibáʼ, biziidiluʼ Jehová nga labe, laabe nga «ni nuu jma luguiáʼ lu guidubi naca guidxilayú» ne nácabe tobi lucha Dios ni dxandíʼ (Sal. 83:18; Is. 37:16). Laabe bizaʼbe laanu ne laasibe nga zanda gulabe laanu (Sal. 3:8; 36:9). Laaca maʼ bíʼnibe xiixa para gulabe laanu de lu náʼ pecadu ne guendaguti, ne maʼ bidiibe laanu esperanza de guibáninu para siempre (Juan 17:3). Ora gaca dedicarluʼ ne chuʼnísaluʼ, zusihuínniluʼ nezalú binni maʼ nácaluʼ testigu stiʼ Jehová (Is. 43:10-12). Zácaluʼ parte de ti familia ni nuu lu guidubi Guidxilayú, ni ziné labe né stale orgullo ne ni racané xcaadxi binni gunibiáʼ labe (Sal. 86:12).

¹¹ Ti privilegiu nga guiene binni ni rusiidiʼ Biblia de Bixhózenu ni nuu guibáʼ. Ora guni creluʼ ni rusiidiʼ Biblia, zucaa ni lii gaca dedicarluʼ Jehová ne chuʼnísaluʼ.

12, 13. ¿Xi guiráʼ maʼ biziidiluʼ lu Biblia de Jesús?

¹² Guníʼ ique xi biʼniʼ sentirluʼ dxi bizulú caziidiluʼ de Jesús, biziidiluʼ laabe nga guiropa binni jma risaca lu universu. Laabe nga bilabe laanu, purtiʼ guyuube dispuestu gátibe pur laanu. Ora gusihuínninu pur ca ni gúninu nápanu fe gútibe pur laanu la? zanda guni perdonar Dios ca pecadu stinu, gaca xhamígunu laabe ne guicaanu ti guendanabani ni qué zaluxe (Juan 3:16). Laaca naca Jesús Sumo Sacerdote stinu, purtiʼ racaláʼdxibe cueendunu ni galán ra gútibe pur laanu ne gaca xhamígunu Jehová (Heb. 4:15; 7:24, 25). Cumu laabe nga Rey lu Reinu stiʼ Dios la? zaquiiñeʼ Jehová laabe para gaca santificar lá, gunitilube cosa malu ne cuʼ ndaayabe laanu para siempre dxi guibáninu ndaaniʼ ti Paraísu ca dxi ni zeeda ca (Mat. 6:9, 10; Apoc. 11:15). Ne Jesús nga ti ejemplu para laanu (1 Ped. 2:21). Biquiiñebe xquendanabánibe para gúnibe ni ná Dios ne zacá bisaanabe ti ejemplu ni zanda chinándanu (Juan 4:34).

¹³ Ora guni creluʼ ni rusiidiʼ Biblia de Jesús la? zannaxhiiluʼ Xiiñiʼ Jehová. Ne zucaa guendarannaxhii ca lii iquiiñeluʼ xquendanabániluʼ para gúniluʼ ni ná Dios, cásica biʼniʼ Jesús. Ne óraca, zaca dedicarluʼ Jehová ne ziuunísaluʼ.

14, 15. ¿Xi guiráʼ maʼ biziidiluʼ de espíritu santu?

¹⁴ ¿Xi guníʼ íqueluʼ ora biziidiluʼ ca ni rusiidiʼ Biblia de espíritu santu? Biziidiluʼ cadi ti binni ni, sínuque laani nga stipa stiʼ Dios. Biquiiñeʼ Jehová espíritu santu stiʼ para guni guiar ca hombre ni bicaa Biblia, ne laaca racané espíritu santu laanu para guiénenu ni ná Biblia ne gúninu ni nani (Juan 14:26; 2 Ped. 1:21). Riquiiñeʼ Jehová espíritu santu stiʼ para gudii laanu poder ni «jma nadipaʼ [...] que poder» stinu (2 Cor. 4:7). Rudii espíritu santu laanu stipa para ganda guni predicarnu ca noticia galán, gucáʼnanu cosa malu, cadi guireʼnu gana ne guni huantarnu ca prueba ni guidxaagalunu. Laaca racaneni laanu gusihuínninu ca «cualidad stiʼ espíritu» (Gál. 5:22). Rudii Jehová espíritu stiʼ ca binni ni napa confianza laabe ne ni rinabaʼ ni laabe de guidubi ladxidóʼ (Luc. 11:13).

 ¹⁵ Laanu ca ni runi adorarnu Jehová, ratadxí ladxidoʼno ora gánnanu zanda guni crenu racané espíritu santu laanu para gúninu ni ná Dios. Ne ora maʼ runi creluʼ ca ni rusiidiʼ Biblia de espíritu santu la? zucaani lii gaca dedicarluʼ Dios ne chuʼnísaluʼ.

16. ¿Xi guiráʼ maʼ bizíʼdinu lu ca párrafo riʼ?

¹⁶ Guizáʼ risaca nga gaca dedicar tuuxa Dios ne chúʼnisa. Casi maʼ bizíʼdinu naquiiñeʼ chuʼluʼ dispuestu gúniluʼ «gastu» o gúniluʼ sacrificiu. Peru jma risaca ca ndaayaʼ ni guicaaluʼ que intiica guendanagana o sacrificiu ni gúniluʼ. Pa chuʼnísaluʼ zanda guilaluʼ ne zacaneni lii gápaluʼ ti conciencia nayá nezalú Dios. Nga runi, ti cosa ni naquiiñeʼ gucaa lii chuʼnísaluʼ nga guendarannaxhii ni nápaluʼ Jehová. Laaca naquiiñeʼ guni creluʼ de guidubi ladxidoʼloʼ ca ni rusiidiʼ Biblia de Bixhózenu ni nuu guibáʼ, Xiiñibe ne de espíritu santu. Né guiráʼ ca ni maʼ bizéʼtenu riʼ, guníʼ ique pa maʼ nuuluʼ listu para chuʼnísaluʼ.

17. ¿Gunáʼ nga caadxi cosa naquiiñeʼ guni tuuxa ante chúʼnisa?

¹⁷ Pa riníʼ íqueluʼ maʼ nuuluʼ listu para chuʼnísaluʼ, zándaca maʼ bíʼniluʼ caadxi cosa para chuʼluʼ jma gaxha de Jehová. * Ra qué nusaanaluʼ de ñuni estudiarluʼ Biblia, maʼ biziidiluʼ stale cosa de Jehová, de Jesús ne maʼ nápaluʼ fe (Heb. 11:6). Maʼ runi creluʼ ca promesa stiʼ Jehová ni zeeda lu Biblia. Laaca runi creluʼ guti Jesús pur lii ne zulá guendaguti stibe lii de lu náʼ pecadu ne guendaguti. Ne maʼ guca arrepentirluʼ de ca pecadu stiluʼ, o riuubaʼ ladxidoʼloʼ pur ca cosa ni cadi jneza bíʼniluʼ dxiqué ne maʼ gunábaluʼ perdón Jehová. Maʼ bichaaluʼ xquendanabániluʼ, o maʼ bisaanaluʼ modo bibániluʼ dxiqué ne yanna maʼ rúniluʼ ni ná Dios (Hech. 3:19). Laaca riuuláʼdxiluʼ guiníʼneluʼ xcaadxi binni de ca ni runi creluʼ. Ne maʼ runi cumplirluʼ ca requisitu para gácaluʼ ti publicador ni caʼruʼ chúʼnisa ne maʼ runi predicarluʼ né ca hermanu (Mat. 24:14). Guizáʼ riecheʼ Jehová ora ruuyaʼ cayúniluʼ ca ni bizéʼtenu riʼ (Prov. 27:11).

18. ¿Xiruʼ caquiiñeʼ gúniluʼ ante chuʼnísaluʼ?

¹⁸ Ante chuʼnísaluʼ, caquiiñeʼ gúniluʼ xcaadxi cosa. Casi maʼ bizéʼtenu, gaca dedicar tuuxa nga guni ti oración laasi né Jehová ra guni prometer laabe zaquiiñeʼ xquendanabani para guni ni nabe (1 Ped. 4:2). Despué zanda gábiluʼ coordinador de cuerpu de ancianu maʼ racaláʼdxiluʼ chuʼnísaluʼ. Hermanu riʼ zanábabe xcaadxi ancianu guiniʼné lii. Peru cadi guidxíbiluʼ purtiʼ maʼ runibiáʼ ca hermanu riʼ lii ne nadxiicabe lii. Zuni repasarnécabe lii ca ni maʼ biziidiluʼ de lu Biblia para gúʼyacabe  pa maʼ riéneluʼ xii nga dedicación ne guendariuunisa ne pabiáʼ risácacani. Pa gúʼyacabe maʼ nuuluʼ listu la? zábicabe lii zanda chuʼnísaluʼ lu stiʼ asamblea.

19, 20. ¿Xi caquiiñeʼ gúniluʼ despué de chuʼnísaluʼ, ne xi zacané lii?

¹⁹ ¿Xi caquiiñeʼ gúniluʼ despué de chuʼnísaluʼ? * Cadi guiaandaʼ lii ora raca dedicarluʼ Jehová, rúniluʼ ti promesa zúniluʼ ni nabe ne ribézabe guni cumplirluʼ ni. Nga runi, despué de chuʼnísaluʼ, naquiiñeʼ guibániluʼ modo racalaʼdxiʼ Jehová guibani ca xpinni. ¿Xi zacané lii gúniluʼ ni yaʼ?

²⁰ Cadi guixéleluʼ de ca hermanu de congregación. Dxi chuʼnísaluʼ, zeeda gácaluʼ parte de ti grupu de «hermanu» (1 Ped. 2:17). Zaca ca hermanu de congregación familia stiluʼ. Pa qué guiaadxaluʼ ca reunión, zaca xhamígutu jma. Biindaʼ Biblia guiráʼ dxi ne gulee tiempu para guni meditarluʼ ni nani (Sal. 1:1, 2). Ndiʼ riníʼ, despué de gúʼndaluʼ ti relatu ni zeeda lu Biblia, caquiiñeʼ cueeluʼ tiempu para guiníʼ íqueluʼ ni maʼ biindaluʼ. Zacá zindá Stiidxaʼ Dios ndaaniʼ ladxidoʼloʼ. Laaca zanda gúniluʼ ni guníʼ Jesús: «Cadi gusaana de guni orartu» (Mat. 26:41). Pa guni orarluʼ de guidubi ladxidoʼloʼ, ziuuluʼ jma gaxha de Jehová. Nga runi, biyubi gúniluʼ ni ná «Reinu» stiʼ Dios primé lu xquendanabániluʼ (Mat. 6:33). ¿Ximodo zanda gúniluʼ ni yaʼ? Naquiiñeʼ guni predicarluʼ ne gácani ni jma risaca lu xquendanabániluʼ. Pa qué gusaana de guni predicarluʼ, zaca fe stiluʼ naguidxi ne zándaca gacaneluʼ xcaadxi guicaacaʼ ti guendanabani ni qué zaluxe (1 Tim. 4:16).

21. ¿Xi zabeenduluʼ pa chuʼnísaluʼ?

²¹ Tobi de ca cosa jma risaca ni zanda gúniluʼ lu xquendanabániluʼ nga quixhe íqueluʼ gaca dedicarluʼ Jehová ne chuʼnísaluʼ. Dxandíʼ caquiiñeʼ gúniluʼ caadxi «gastu» o gúniluʼ sacrificiu. Peru ¿xiñee risaca gúniluʼ ca sacrificiu ca yaʼ? Purtiʼ zidiʼdiʼ si ca guendanagana ni cadxaagaluluʼ lu guidxilayú yooxhoʼ riʼ (2 Cor. 4:17). Peru, ora chuʼnísaluʼ, zabániluʼ jma galán ne zápaluʼ ti «guendanabani, ni dxandíʼ guendanabani» lu ca dxi ni zeeda ca (1 Tim. 6:19). Nga runi, guníʼ ique chaahuini, biʼniʼ orar Jehová ne bicabi pregunta riʼ: «¿Ñee maʼ nuaaʼ listu para chuaanisaʼ la?».