Levi bi komɛ nɛ a pi osɔfohi ɔ tsuɔ ní tsumi kpahi fuu. Wa ma nyɛ maa ngɔ a ní tsumi ɔ kɛ to polisi ní tsumi he. A tsuɔ ní ngɛ sɔlemi we ɔ nɔ hyɛlɔ ɔ sisi. Yuda no ko nɛ a tsɛɛ lɛ ke Philo nɛ e ji womi ngmalɔ ɔ tu a ní tsumi ɔ he munyu ke: “A ngɔɔ Levi bi ɔmɛ a kpɛti ni komɛ kɛ daa sɔlemi we ɔ a gbo ɔ nya, nɛ ni komɛ hu daa si ngɛ sɔlemi we ɔ mi ngɛ jami he ɔ hɛ mi, nɛ́ a hyɛ konɛ nɔ ko nɛ e be he blɔ ɔ nɛ kó sɛ lejɛ ɔ. Ke nɔ ɔ li kaa e be he blɔ kaa e sɛɛ lejɛ ɔ nɛ e ka kaa e maa sɛ lejɛ ɔ po, a be lɛ blɔ ngmɛe. Ni komɛ hu bɔleɔ sɔlemi we ɔ konɛ a bu he. Akɛnɛ a tsuɔ ní nyɔ kɛ pia he je ɔ, a tsakeɔ a sibi.”

Sanhedri bi ɔmɛ hu nyɛɔ nɛ a biɔ polisi nɛ ɔmɛ a yemi kɛ buami. Mɛ pɛ ji Yuda kuu ko nɛ Roma nɔ yemi ɔ ngmɛ mɛ blɔ kaa a hɛɛ ta hwumi níhi.

Ní lelɔ ko nɛ a tsɛɛ ke Joachim Jeremias ɔ de ke: “Benɛ a ma Yesu numi ɔ, e de nihi nɛ a ma lɛ numi ɔ kaa daa ligbi ɔ, e hiɔ si ngɛ sɔlemi we ɔ nɛ e tsɔɔ ní, se a nui lɛ. (Mat. 26:55) E ngɛ heii kaa nihi nɛ a tsuɔ ní kaa polisi ngɛ Sɔlemi We ɔ nɛ a ba konɛ a ba nu Yesu ɔ nɛ.” Loko a maa tsɔ nimli nɛ ɔmɛ kaa a ya nu Yesu ɔ, a sɛ hlami tsɔ ni komɛ po momo kaa a ya nu lɛ. Ní lelɔ nɛ ɔ he ye kaa kekle nihi nɛ a tsɔ kaa a ya nu Yesu ɔ hu piɛɛ sɔlemi we ɔ polisi ɔmɛ a he. (Yoh. 7:32, 45, 46) Pee se ɔ, Sanhedri bi ɔmɛ tsɔ sɔlemi we ɔ nɔ hyɛlɔ ɔ kɛ polisi ɔmɛ ekomɛ kaa a ya nu Yesu kaseli ɔmɛ kɛ ba ha mɛ. E ma nyɛ maa ba kaa sɔlemi we ɔ polisi ɔmɛ nɔuu nɛ a gbla bɔfo Paulo si kɛ je sɔlemi we ɔ nɛ.​—Níts. 4:1-3; 5:17-27; 21:27-30.