Levi xomumɛtɔ ɖewo ciwo dele avɔnsatɔwo mɛ yí wosɔ mɔ woawa kpobishiwo dɔ. Gbedoxɔ lɔ jikpɔtɔ yí nyi wowo ga. Enuŋwlɛntɔ Philo ci yí nyi Ʒuifu, dre edɔ ci kpobishi lɔwo wanɔ mɛ mɔ: “Eɖewo nɔnɔ xɔmɔnuwo yí cɔnɔ agbo lɔwo, ebuwo nɔnɔ avɔnsaxu lɔ gbɔ yí ɖonɔ te mɛ ciwo yí ese deɖe mɔ nɔ, gan yí woji mɔ yewoaɖo mɛ. Eɖewo trɔnɔdo gbedoxɔ lɔ yí cɔɛni ezan koɖo kede. Woɖɔnɔli nɔnɔ.”

Sanhedrɛn tɛnŋ biɔnɔ kpekpedonu so kpobishi cɛwo gbɔ hɛnnɛ. Ʒuifuwo kpobishi cɛwo ɖekɛ yí Rɔma cɛkpakpa na egbe mɔ woatɛnŋ azan ahwawanuwo.

Wemanyatɔ Joachim Jeremias nu mɔ: “Ci yí kpobishiwo jikɔ ale Yesuɔ, ébiɔ wo se mɔ, nyi yí taɖo wodele ye hwecinu yekplakɔ nu amɛwo le Gbedoxɔ mɛ ma. (Mt. 26:55) Nɔ kpobishi cɛwo denɔnɔ Gbedoxɔ mɛ saɔ, Yesu dabiɔ enyɔ cɛ wo se o.” Wemanyatɔ cɛ gbenu mɔ, mɛ ciwo wodɔ nɔ woale Yesu vayi can nyi gbedoxɔ mɛ kpobishiwo. (Ʒan 7:32, 45, 46) Le yiyimɛɔ, Sanhedrɛn dɔ gbedoxɔ lɔ jikpɔtɔ koɖo kpobishi ɖewo nɔ woale apotruwo. Etɛnŋ gbenyi gbedoxɔ mɛ kpobishiwo yí dɔn apotru Pɔlu ti le gbedoxɔ mɛ.​—Edɔ. 4:1-3; 5:17-27; 21:27-30.