Julawi moko ma gibino julam ungo gibed gitimo kit tic mange calu ve nibedo juaskari mir hekalu. Gibed gitimo tic maeno i the telowic pa jadit mir hekalu. Jagor moko ma Jayahudi ma nyinge Philo ukoro pi tic moko ma gibed gitimo, eyero kumae: “Jumoko m’i kindgi [Julawi] gibed gicungo atira i wang’ dhugola pi nikuro dhugola, jumoko ke gibed gicungo i hekalu pi nicero ju ma cik uyio ngo kara kud gikadh i kamaleng’, kadok mir akakaka kunoke ungo. Jumoko gibed giwotho i ng’et hekalu pi nikure. Gibed giwiliri dieceng’ ku diewor.”

Ju ma gibino i dilo mi Sanedrini gibed gikwayu juaskari maeno ukonygi. Ungu mi juaskari maeno kende re ma bimobim mi Roma uyio nia gitii kud umbu.

Joachim Jeremias ma tie jararieko moko m’uponjo lembe iwi Biblia uyero kumae: “Kinde ma juaskari ucidho maku Yesu, ewok epenjogi nia pirang’o gimake ngo saa m’ebino ponjo i hekalu. Ka nwang’u juaskari maeno gibed gitimo ngo i hekalu, nwang’u Yesu copo penjo ngo penji maeno.” (Mat. 26:55) Jararieko ma rom eno uyio nia ju ma nindo moko jular juoro gicidh gimak Yesu ubino juaskari mir hekalu. (Yoh. 7:32, 45, 46) I ng’eye, dilo mi Sanedrini uoro jadit mir hekalu ku juaskari moko gicidh gimak julub pa Yesu, gikelgi i wang’ dilo migi. Bende copere nia juaskari mir hekalu re ma giwayu jakwenda Paulo kud i hekalu, gitere woko.​—Tic. 4:1-3; 5:17-27; 21:27-30.